1. Enke fa 3 Yohanisi 3, 4 e soi, da san e meke wi e piisii?

PAKISEI fa apostel Yohanisi be e fii di a be yee taki den sama di a be yeepi fu kon sabi Yehofa be e dini Yehofa anga den hii ati ete. A omen tesi be e miti den, ma Yohanisi be e yeepi den fu taanga den biibi, bika a be e si den enke en pikin. Leti enke Yohanisi wi e piisii te u si taki den pikin fu u, efuso den sama di u yeepi fu kon sabi Yehofa, e dini Yehofa anga den hii ati ete.​—Leisi 3 Yohanisi 3, 4.

2. Saide Yehofa be meke Yohanisi sikiifi dii biifi gi den Kelesten?

² Aini a yali 98, a gei enke Yohanisi be e tan a Efeise efuso koosube fu Efeise. Kande a baka di a komoto a sitaafu-osu a Patmos a foloisi go ape. Na a pisiten de Yehofa meke a sikiifi dii biifi gi den baala anga sisa. Yehofa be meke a sikiifi den biibi ya fu gi den Kelesten taanga-sikin fu tan biibi Yesesi. Den biifi ya be gi den taanga-sikin tu fu tan du san den leli.

3. Sowtu akisi wi o luku?

³ Yohanisi a be a lasiti apostel di be de a libi ete. A be e booko en ede anga den baala anga sisa, bika sama be de aini a kemeente di be e paati falisi leli * (1 Yoh. 2:18, 19, 26). Den falisi Kelesten ya be e taki den sabi Gadu, ma den á be e wooko anga den sani di den be e leli. Meke u luku sowtu taanga-sikin Yohanisi be gi den Kelesten. Wi o luku dii akisi aini a artikel ya: San o yeepi u fu tan aliki Gadu? San sa meke a taanga gi u fu tan aliki Gadu? Fa u sa yeepi taawan fu tan aliki Gadu?

4. Enke fa 1 Yohanisi 2:3-6 anga 2 Yohanisi 4, 6 e soi, da san o yeepi u fu aliki Gadu ala yuu?

⁴ Efu u wani aliki Gadu ala yuu, u mu sabi fosi san sikiifi aini en Wowtu Beibel. Boiti dati, u mu e holi den ‘weiti fi en’. (Leisi 1 Yohanisi 2:3-6 anga 2 Yohanisi 4, 6.) Yesesi be e aliki Yehofa ala yuu. A moo bun fasi fa u sa aliki Yehofa, a te wi e meke moiti fu waka a Yesesi baka.​—Yoh. 8:29; 1 Peit. 2:21.

5. San u mu biibi?

⁵ Efu u wani aliki Yehofa ala yuu, u mu e biibi ala den sani di sikiifi aini a Wowtu fi en. U mu biibi tu taki a Yesesi na a Mesiyas. A omen sama nai biibi taki Yehofa poti Yesesi enke Kownu fu Gadu Kownukondee. Apostel Yohanisi be taki a omen ‘bidiigiman’ de di nai biibi Yehofa anga Yesesi anga den hii ati (2 Yoh. 7-11). Yohanisi be taki: ‘Sama na a leiman? A ná a sama di taki a nai biibi taki Yesesi na a Kelestesi noh?’ (1 Yoh. 2:22) A wan kodo fasi fa sama ná o fende u koli, a te wi e sutudeli Gadu Wowtu ala yuu. Te wi e du a sani ya, a o yeepi u fu sabi Yehofa anga Yesesi bun (Yoh. 17:3). Wi o biibi den sani di wi e leli anga u hii ati tu.

6. San sa meke a taanga gi yonkuuwan fu tan du san den e leli?

⁶ Ala Kelesten mu luku bun anga a denki fu a goontapu (1 Yoh. 2:26). Moomoo yonkuuwan mu luku bun anga den falisi denki fu a goontapu. Alexia, * wan sisa fu Faansikondee di abi 25 yali, taki: ‘Di mi be e go a sikoo, den be leli u taki libisama a mongii paansu. Den be leli u wantu taa sani di koniman e biibi tu. Mi be lobi son wan fu den leli ya. Ma den leli ya be e buuya mi. Mi á be e kaba biibi son sani di mi be leli aini Beibel moo. Ma mi be e fusutan taki a á be o de wan koni sani fu biibi ala den sani di mi be e leli a sikoo, da mi poti den sani di mi leli aini Beibel a wanse, sondee fu mi ondoosuku luku efu a tuu.’ Neen meke Alexia sutudeli a buku (Leven​— Hoe is het ontstaan? Door evolutie of door schepping?) di e soi taki wan Gadu de di meke u. Baka wantu wiki  a be e biibi anga en hii ati now taki den sani di sikiifi aini Beibel a tuu. Alexia taki: ‘Di mi ondoosuku Beibel mi si kiin taki san sikiifi aini a tuu. Mi kon fusutan tu taki te yu e wooko anga san Beibel taki yu e piisii tuutuu. A omen booko-ede i nai abi.’

7. Anga san u mu luku bun? Saide u mu luku bun anga a sani de?

⁷ Winsi u yonkuu efuso gaandi, ala u mu luku bun taki u nai dini Yehofa da wi e kibii du ogii. Yohanisi be taki te wi e dini Yehofa wi á mu e du sani di á fiti (1 Yoh. 1:6). Efu u wani Yehofa piisii anga u, u mu holi a pakisei taki Yehofa e si ala san wi e du. Dati wani taki kibii sondu á de, bika Yehofa e si ala sani.​—Heb. 4:13.

8. Anga sowtu denki fu a goontapu i mu luku bun?

⁸ Wi á mu e si sondu enke fa a goontapu e si en. Apostel Yohanisi be taki: ‘Efu u taki “u ná abi sondu,” a koli wi e koli useefi’ (1 Yoh. 1:8). Aini a ten fu Yohanisi den sama di be daai baka gi a tuu biibi be e taki awinsi yu e du ogii, yu anga Gadu sa de mati ete. A so omen sama e denki aini a ten ya tu. Neen meke den sama di e taki den e biibi Gadu nai si den sani di Gadu e buuse enke fa Gadu e si den. Wan fu den sani ya na a fasi fa den e si man anga uman libi. Yehofa e leli u taki a wan man anga uman di toow wawan sa siibi anga denseefi. Ma den sama ya e taki i sa siibi anga sama i wani, on ten i wani.

9. Saide a bun te yonkuuwan e du san Beibel taki?

⁹ A sa taanga gi yonkuuwan fu si man anga uman libi enke fa Yehofa e si en. Moomoo te den sama a sikoo efuso wookope wani dwengi den fu du sani enke den. Na a sani ya be miti wan baala den e kai Aleksandar. A taki: ‘Wantu meisyo a sikoo be wani mi siibi anga den. Di mi á  wani neen den taigi mi taki a musu de taki a boi mi lobi.’ Efu den sani ya e miti i, da holi a pakisei taki te yu e du san Beibel e taki yu o fii moo bun fu di yu e tyai iseefi enke fa Yehofa wani. Boiti dati, i ná o du sani di sa meke i siki, di o meke i fii booko-saka, efuso di o poli yu anga Yehofa. Ala yuu te i taki nono gi wan sani di Yehofa á lobi, ai moo makiliki gi i fu du san bun. Yu á mu feegete taki a goontapu e si man anga uman libi enke fa Saatan e si en, neen meke te i nai denki enke fa a goontapu e denki yu e wini ogii.​—1 Yoh. 2:14.

10. Fa a sani di sikiifi a 1 Yohanisi 1:9 e yeepi u fu dini Yehofa anga wan kiin kosensi?

¹⁰ Wi e fusutan taki a Yehofa wawan abi a leti fu taki san a sondu. Te a taigi u kaba, da u mu meke moiti fu wi á sondu. Efu a pasa taki u meke wan fowtu, da u mu taigi Yehofa kiin san u du. (Leisi 1 Yohanisi 1:9.) Efu a wan gaan sondu u du, u mu go a den owluman di Yehofa poti fu yeepi u (Yak. 5:14-16). Ma te Yehofa gi u paadon kaba wi á mu e pakisei den fowtu di u meke moo. Saide? Bika Yehofa sende en Manpikin kon dede gi u fu u sa fende paadon fu u sondu. Yehofa paamisi u taki a o gi u paadon te u soi taki den sani di u du e hati u. U sa biibi taki a o du san a taki. A sani ya e yeepi u fu dini Yehofa anga wan kiin kosensi.​—1 Yoh. 2:1, 2, 12; 3:19, 20.

11. San u mu du efu wi á wani u biibi swaki?

¹¹ U mu luku bun anga den falisi leli fu den sama di daai baka gi a tuu biibi. Senten di a Kelesten kemeente sete, neen Didibii e meke moiti fu swaki a biibi fu den Kelesten. Neen meke te u yee wan sani, u mu meke moiti fu sabi efu a tuu. * Den  feyanti fu u sa koboloiki internet fu paati lei fu di den wani swaki a biibi fu u. Den lei ya sa meke wi á lobi u baala anga sisa anga u hii ati moo. Yu á mu biibi den lei ya, bika a Saatan Didibii e holibaka gi den sama di e paati den.​—1 Yoh. 4:1, 6; Openb. 12:9.

12. Saide u mu meke moiti fu taanga u biibi?

¹² Efu wi á wani Saatan fende u koli, u mu e biibi Yesesi anga u hii ati. U mu e biibi taki neen Yehofa poti fu du san a abi a pakisei. U mu e fitoow den baala tu di Yehofa poti fu tii a olikanisâsi (Mat. 24:45-47). Efu wi e sutudeli Gadu Wowtu ala yuu, a sani ya o yeepi u fu taanga u biibi. U biibi o de enke wan bon di lutu beli go te aini a doti. Na a sani ya Pawlesi be taigi den Kelesten a Korente. A be taigi den taki: ‘Leti enke fa u biibi Masaa Yesesi, a letiso u mu tyai useefi a wan fasi di e soi taki wi e aliki en. Leti enke fa den lutu fu wan bon e meke a fasi gingin a doti, a so useefi mu taampu gingin da u biibi Yesesi’ (Kol. 2:6, 7). Efu u du ala san u poi fu taanga u biibi, Saatan anga den bakaman fi en ná o poi tapu u fu du san u leli.​—2 Yoh. 8, 9.

13. Saide wi á mu foondoo taki a goontapu á lobi u?

¹³ Wi á mu foondoo taki a goontapu á lobi u (1 Yoh. 3:13). Yohanisi taki a hii goontapu de aini a makiti fu a ogiiwan (1 Yoh. 5:19). A kaba fu a goontapu ya e koosube namo. Neen meke Saatan ati e boon moo anga moo (Openb. 12:12). Boiti taki Saatan e meke moiti fu koli wi anga hululibi efuso falisi leli, ai du ogii anga u tu. Saatan sabi taki a yuu fi en satu, neen meke ai du ala san a poi fu tapu a peleikiwooko. Ai du ala san a poi fu swaki u biibi tu. Neen meke a nai foondoo wi taki lanti e tapu a peleikiwooko aini omen kondee. Ma winsi san Saatan e du, den baala anga sisa fu wi aini den kondee ya e holidoo. Neen meke winsi san Saatan e du anga u, u mu du ala san u poi fu holidoo tu.

14. Fa u sa yeepi u baala anga sisa fu den á gwe fika Yehofa?

¹⁴ Efu u wani yeepi u baala anga sisa fu tan dini Yehofa, u mu soi den taki wi e booko wi ede anga den (1 Yoh. 3:10, 11, 16-18). A ná te sani e go bun namo u mu lobi u baala anga sisa, ma te den abi polobelema u mu soi den tu taki u lobi den. Meke u taki i yee taki wan sama fu wan baala efuso sisa dede, i be o suku wan fasi fu toosutu en? Efi i yee taki wan gaan winta booko omen osu fu baala anga sisa efuso Kownukondee zaal, i be o meke moiti fu yeepi? Wi á mu e taki namo taki u lobi u baala anga sisa, ma u mu e du sani fu soi taki u lobi den. U mu soi den tu taki wi e booko wi ede anga den.

15. Enke fa 1 Yohanisi 4:7, 8 e soi, da san u mu du?

¹⁵ Te wi e soi taki u lobi taawan, wi e waka a u Dda Yehofa baka. (Leisi 1 Yohanisi 4:7, 8.) Wan fasi fa wi e soi taki u lobi taawan a te wi e gi den paadon. Kande wan sama du wan sani anga u di hati u, ma bakaten ai akisi u paadon. Wi e soi taki u lobi en te u gi en paadon da u fika a sani (Kol. 3:13). Na a sani ya be miti wan baala de e kai Aldo. Wan leisi a yee wan baala di ai lesipeki e kuutu sama fu a nasi fi en. Ná pikin hati a sani ya hati Aldo. A taki: ‘A omen leisi mi be e begi Yehofa fu mi á holi a baala ya na ati.’  Boiti taki Aldo begi Yehofa, a du ete wan sani. A meke mofu anga a baala fu wooko anga en aini a peleikiwooko. Di en anga a baala e wooko, a taigi en taki ná pikin fii a fii a sani di a taki. Aldo taki: ‘Di a baala yee fa mi fii fu a sani di a taki, ná pikin hati a sani ya hati en. A akisi mi fu mi gi en paadon. Mi si taki a hati en tuutuu. A so u meke en bun baka neen u fika a taki.’

16-17. San u mu meke moiti fu du?

¹⁶ Apostel Yohanisi be lobi den baala anga sisa anga en hii ati. A be wani den biibi taanga tu. Den dii biifi di a be sikiifi gi den e soi taki a be e booko en ede anga den tuutuu. Leti enke Yohanisi, a so den taa sama di Yehofa teke fu tii makandaa anga Yesesi e booko den ede anga u, fu di den lobi u.​—1 Yoh. 2:27.

¹⁷ U mu meke moiti fu du den sani di u leli aini a artikel ya. U mu e aliki Yehofa ala yuu. U mu e sutudeli a Wowtu fi en. U mu e biibi den sani di wi e leli. U mu e biibi Yesesi anga u hii ati. U mu e meke moiti ala yuu fu wi á denki enke den sama fu a goontapu. Wi á mu biibi den falisi leli di den sama di daai baka gi Yehofa e paati. Boiti dati, wi á mu e kibii du sondu. Wi á mu meke sama dwengi u fu du sani di á bun. U mu libi enke fa Yehofa wani. U mu yeepi den baala anga sisa fu u te den de a nowtu. U mu gi den paadon te den du wan hati sani anga u. Te wi e du den sani ya, wi e soi taki wi e du san u leli.