1. Lee 3 Jaan 3, 4 xlɛ́ gbɔn é ɔ, etɛ ka nɔ zɔ́n bɔ xomɛ nɔ hun mǐ?

DǑ NUKÚN mɛ bo kpɔ́n lě dò xomɛ na ko hun mɛsɛ́dó Jaan sɔ, hwenu e é sè ɖɔ mɛ ɖěɖee é kplɔ́n nǔgbo ɔ lɛ é kpò ɖò Jehovah sɛn wɛ kpo gbejininɔ kpo é. Klisanwun gbejinɔtɔ́ enɛ lɛ e Jaan nɔ kpɔ́n dó mɔ vǐ tɔn gbigbɔ tɔn lɛ é mɔ wuvɛ̌ gegě, bɔ é ɖò gǎn dó wɛ bo na na hlɔnhlɔn nǔɖiɖi yetɔn. Mɔ̌ ɖokpo ɔ, enyi mǐ mɔ nú vǐ mǐtɔn lɛ, alǒ mɛ ɖěɖee mǐ kplɔ́n nǔgbo ɔ lɛ é sɔ́ yeɖée jó nú Jehovah, bo ɖò sinsɛn ɛ wɛ ɔ, xomɛ nɔ hun mǐ.—Xà 3 Jaan 3, 4.

2. Etɛwu mɛsɛ́dó Jaan ka wlán wema-sɛ́dó-mɛ tɔn lɛ?

² Efɛzi alǒ toxo e sɛkpɔ́ finɛ é ɖé mɛ wɛ Jaan sixu ko nɔ nɔ ɖò 98 H.M. tɔn. Hwenu e è ɖè è tɔ́n sín ganmɛ ɖò tɔtɛntinto Patimɔsi tɔn mɛ é wɛ é sixu ko yì dɔ̌n. Táan enɛ lɛ mɛ mɔ̌ ɔ, gbigbɔ mímɛ́ Jehovah tɔn sísɛ́ ɛ, bɔ é wlán wema-sɛ́dó-mɛ atɔn. Linlin e wu é wlán wema enɛ lɛ é wɛ nyí ɖɔ é na bló bɔ Klisanwun gbejinɔtɔ́ enɛ lɛ na zunfan nǔɖiɖi e ye ɖó nú Jezu é, bo na lɛ́ kpò ɖò gbɛ̀ zán wɛ ɖò nǔgbo ɔ mɛ.

3. Nǔkanbyɔ tɛ lɛ mǐ ka na mɔ xósin na?

³ Jaan wɛ nyí mɛsɛ́dó gudo tɔn e nɔ gbɛ̀ é, bɔ nǔ e adingban-núkplɔnmɛtɔ́ lɛ ɖò wiwa dó agun ɔ wu wɛ é nɔ ɖu ayi mɛ n’i. * (1 Jaan 2:18, 19, 26) Gǔfɔndómawujitɔ́ enɛ lɛ nɔ ɖɔ ɖɔ emi tuùn Jehovah, amɔ̌, ye ka nɔ setónú nú gbeɖiɖe tɔn lɛ ǎ. Mǐ ni kpɔ́n wě e Jaan ɖè xá ye lɛ é. Enɛ na d’alɔ mǐ bɔ mǐ na mɔ xósin nú nǔkanbyɔ atɔn elɔ lɛ: Etɛ ka nyí tinmɛ è ni zán gbɛ̀ ɖò nǔgbo ɔ mɛ tɔn? Etɛ lɛ ka sixu nyí afɔklɛ́nnú nú mǐ? Nɛ̌ mǐ ka sixu d’alɔ mǐɖée, bo na kpò ɖò nǔgbo ɔ mɛ gbɔn?

4. Sɔgbe xá 1 Jaan 2:3-6 kpo 2 Jaan 4, 6 kpo ɔ, etɛ gbɛ̀ zinzan ɖò nǔgbo ɔ mɛ ka nɔ byɔ?

⁴ Cobonu mǐ na zán gbɛ̀ ɖò nǔgbo ɔ mɛ ɔ, mǐ ɖó na tuùn nǔgbo e ɖò Xó Mawu tɔn Biblu ɔ mɛ é. Gɔ́ na ɔ, mǐ ɖó na ‘nyi sɛn Jehovah tɔn lɛ,’ enɛ wɛ nyí ɖɔ mǐ ɖó na setónú nú ye. (Xà 1 Jaan 2:3-6; 2 Jaan 4, 6.) Jezu zé kpɔ́ndéwú tónúsíse nú Jehovah tɔn e nǔ bǐ vɔ ɖ’ewu é ɖ’ayǐ. Enɛ wu ɔ, ali taji e nu mǐ nɔ setónú nú Jehovah ɖè é ɖokpo wɛ nyí ɖɔ mǐ nɔ sɔ́ afɔ dó afɔdo Jezu tɔn lɛ mɛ télélé lee é nyɔ́ bló gbɔn é bǐ.—Jaan 8:29; 1 Pi. 2:21.

5. Etɛ lɛ jí mǐ ka ɖó na kú dó?

⁵ Bonu mǐ na kpò ɖò gbɛ̀ zán wɛ ɖò nǔgbo ɔ mɛ ɔ, mǐ ɖó na kúdeji ɖɔ Jehovah nyí Mawu e nɔ ɖɔ nǔgbo é, bɔ nǔ e é ɖɔ ɖò Xó tɔn Biblu ɔ mɛ lɛ é bǐ nyí nǔgbo. Mǐ ɖó na lɛ́ ganjɛwu ɖɔ Jezu wɛ nyí Mɛsiya e sín akpá è dó é. Mɛ gegě nɔ xò nǔ kpɔ́n égbé ɖɔ è kún ko sɔ́ Jezu Axɔ́su Axɔ́suɖuto Mawu tɔn tɔn ó. Jaan gb’akpá nú mɛ ɖɔ “adingbannɔ gegě” tíìn bo sixu flú mɛ ɖěɖee ma sɔnǔ ɖ’ayǐ bo na jɛhun dó nǔgbo e kúnkplá Jehovah kpo Jezu kpo é jí ǎ lɛ é. (2 Jaan 7-11) Jaan wlán ɖɔ: “Mɛ̌ ka ɖò nǔvúɖótɔ́ ɔ nyí wɛ? Mɛ e ɖɔ Jezu kún nyí Klisu ɔ ó é wɛ.” (1 Jaan 2:22) Xó Mawu tɔn kplɔnkplɔn jɛn sixu zɔ́n bɔ mǐ na lɔn nú mɛɖé na flú mǐ ǎ. Enɛ ɔ, mǐ na wá tuùn Jehovah kpo Jezu kpo. (Jaan 17:3) Mɔ̌ mɛ ɔ, mǐ na ganjɛwu ɖɔ mǐ mɔ nǔgbo ɔ.

6. Ðɔ nǔ e sixu nyí afɔklɛ́nnú nú Klisanwun winnyawinnya lɛ é ɖokpo.

⁶ Klisanwun lɛ bǐ wɛ ɖó na cɔ́ yeɖée bonu tamɛ-núkplɔnmɛ gbɛtɔ́ tɔn lɛ ma wá wà nǔ dó ye wu ó. (1 Jaan 2:26) Ðò taji ɔ, Klisanwun winnyawinnya lɛ ɖó na cɔ́ yeɖée dó mɔ enɛ wu. Alexia * e nyí nɔví nyɔnu xwè 25 mɛví ɖé bo nɔ nɔ France é ɖɔ: “Hwenu e un ɖò wemaxɔmɛ yì wɛ é ɔ, linlin gbɛ̀ ɔ tɔn lɛ, ɖi nǔkplɔnmɛ nǔ lɛ jɔ nú yeɖée tɔn kpo tamɛ-núkplɔnmɛ gbɛtɔ́ tɔn ɖevo lɛ kpo wlú tamɛ nú mì. Nǔkplɔnmɛ enɛ lɛ wá dɔn mì. Un mɔ ɖɔ é kún sɔgbe bonu má ɖi nǔ nú nǔ e un kplɔ́n ɖò wemaxɔmɛ lɛ é bo wɔn ya nú nǔkplɔnmɛ Biblu tɔn lɛ ó.” Alexia kplɔ́n wema La vie: comment est-elle apparue? Évolution ou création? ɔ. Aklunɔzán  gblamɛ yɔywɛ ɖé gudo ɔ, nǔxokpɔ́n tɔn lɛ bǐ blí bú. Alexia ɖɔ: “Nyiɖesunɔ gbéjé nǔ e ɖò Biblu mɛ lɛ é kpɔ́n, bo wá mɔ ɖɔ gbɛzinzan sɔgbe xá nǔgbododó e ɖ’emɛ lɛ é na hɛn awǎjijɛ kpo fífá kpo wá nú mì.”

7. Kɔgbidínúmɛ tɛ nukɔn mǐ ka ɖó na gbí dɔn ɖè? Etɛwu?

⁷ Klisanwun lɛ bǐ, mɛ winnyawinnya kpo mɛxo kpo, wɛ ɖó na gbí dɔn ɖò kɔ e è nɔ gbidí nú ye bonu ye na zán gbɛ̀ we é nukɔn. Jaan ɖexlɛ́ ɖɔ mǐ kún sixu ɖò gbɛ̀ zán wɛ ɖò nǔgbo ɔ mɛ, bɔ ɖò hwe ɖokpo ɔ nu ɔ, mǐ na lɛ́ ɖò gbɛ̀ bliblí zán wɛ ó. (1 Jaan 1:6) Enyi nǔ mǐtɔn na nyɔ́ Mawu nukúnmɛ dìn kpo sɔgudo kpo ɔ, mǐ ɖó na nɔ flín hwebǐnu ɖɔ é nɔ mɔ nǔ e wà wɛ mǐ ɖè lɛ é bǐ. Enyi gbɛtɔ́ lɛ ma tlɛ sixu mɔ nǔ e mǐ nɔ wà ɖò nǔglɔ lɛ é ǎ ɔ, Jehovah nɔ mɔ nǔ bǐ.—Ebl. 4:13.

8. Etɛ mǐ ka ɖó na nyi alɔ na?

⁸ Mǐ ɖó na nyi alɔ nú linlin e gbɛ̀ ɔ nɔ ɖó dó hwɛhuhu wu é. Mɛsɛ́dó Jaan wlán ɖɔ: “Enyi mǐ ɖɔ hwɛ ɖě kún ɖò kɔ nú mǐ ó hǔn, mǐɖée blɛ́ wɛ mǐ ɖè.” (1 Jaan 1:8) Ðò Jaan hwenu ɔ, gǔfɔndómawujitɔ́ lɛ nɔ ɖɔ ɖɔ mɛɖé hɛn ɔ, é na nɔ sɔ́ jlǒ dó zán hwɛhuhu gbɛ̀, bo sixu lɛ́ kpò ɖò kancica ɖó xá Mawu wɛ. Égbé ɔ, mɛ e nɔ lin nǔ gbɔn mɔ̌ lɛ é tɛntin wɛ mǐ ɖè. Mɛ gegě nɔ ɖɔ ɖɔ emi ɖi nǔ nú Jehovah, amɔ̌, ye nɔ yí gbè nú linlin e é nɔ ɖó dó hwɛhuhu wu é, ɖò taji ɔ, xóɖóxámɛ wu é ǎ. Nǔ e Jehovah nɔ kpɔ́n dó mɔ hwɛhuhu é ɔ, yedɛɛ lɛ nɔ ɖɔ ɖɔ mɛɖesunɔxó wɛ, alǒ lee é jló mɛ gbɔn é wɛ è na wà gbɔn.

9. Enyi mɛ winnyawinnya lɛ tɛ́dó nǔ e ye ɖi nǔ na lɛ é wu ɔ, lè tɛ é ka nɔ hɛn wá nú ye?

⁹ Klisanwun winnyawinnya lɛ sixu nɔ mɔ ɖɔ wemaxɔmɛvígbɛ́ alǒ azɔ̌gbɛ́ emitɔn lɛ nɔ zín emi jí bonu emi lɔ na ɖó linlin e ye nɔ ɖó dó xóɖóxámɛ wu é. Nǔ e jɛ dó Aleksandar jí é nɛ. É flín nǔ elɔ: “Ðyɔvǐ ɖé lɛ ɖò wemaxɔ ce mɛ, bo nɔ gbidí kɔ nú mì, bonu má ɖóxó xá ye. Ee un gbɛ́ é ɔ, ye ɖɔ ɖɔ ɖó un ma ɖó nyɔnu xɔ́ntɔn ǎ wu ɔ, sunnu nyi  ɖɔhun lɛ wɛ un na ko nɔ ɖóxó xá.” Nú a mɔ mɛtɛnkpɔn mɔ̌hun lɛ hǔn, flín ɖɔ nú a tɛ́dó nǔ e a ɖi nǔ na lɛ é wu ɔ, a na cyɔn alɔ wi e ɖò ta nú we é, agbaza towe, lee nǔ nɔ cí nú we é kpo kancica e ɖò hwi kpo Jehovah kpo tɛntin é jí. Bɔ hweɖebǔnu e a gbí dɔn ɖò mɛtɛnkpɔn ɖé nukɔn é ɔ, nǔ e sɔgbe é wiwa na nɔ bɔwǔ nú we. Lɛ̌ flín ɖɔ linlin agɔ e gbɛ̀ ɔ nɔ ɖó dó xóɖóxámɛ wu é ɔ, Satáan wɛ ɖò gudo na. Enɛ wu ɔ, enyi a gbɛ́ linlin gbɛ̀ ɔ tɔn enɛ ɔ, a na “ɖu ɖò mɛ nyanya ɔ jí.”—1 Jaan 2:14.

10. Nɛ̌ 1 Jaan 1:9 ka d’alɔ mǐ, bɔ mǐ na sɛn Jehovah kpo ayixa mímɛ́ ɖé kpo gbɔn?

¹⁰ Mǐ mɔ nǔ jɛ wu ɖɔ Jehovah wɛ ɖó acɛ bo na ɖɔ ɖɔ nǔ lě ɔ, hwɛhuhu wɛ. Mǐ nɔ wà nǔ e wu mǐ kpé é bǐ, bo nɔ nyi alɔ nú hwɛhuhu. Amɔ̌, enyi mǐ hu hwɛ ɔ, mǐ nɔ ɖɔ nǔ e mǐ wà nyi dò é nú Jehovah ɖò ɖɛ mɛ. (Xà 1 Jaan 1:9.) Enyi mǐ hu hwɛ syɛnsyɛn ɖé ɔ, mǐ nɔ ba alɔdó mɛxo agun tɔn e Jehovah sɔ́, bɔ ye na kpé nukún dó mǐ wu lɛ é tɔn. (Ja. 5:14-16) Amɔ̌, mǐ ɖó na nɔ ɖò hwɛ dó mǐɖée wɛ, ɖó hwɛ e mǐ hu wá yì lɛ é wu ǎ. Etɛwu? Ðó Tɔ́ mǐtɔn wanyiyinɔ ɔ ko sɔnǔ nú vɔsisa gbɛxɔnúmɛ tɔn Vǐ tɔn tɔn, bonu mǐ na mɔ hwɛsɔ́kɛ hwɛ mǐtɔn lɛ tɔn. Jehovah ɖɔ ɖɔ emi na sɔ́ hwɛ mɛ e lɛkɔ sín hwɛ tɔn lɛ gudo é tɔn kɛ ɛ, bo ka nɔ wà mɔ̌ nǔgbo. Enɛ wu ɔ, nǔ ɖě tíìn bo na ɖó mǐ te, bonu mǐ na gɔn Jehovah sɛn kpo ayixa mímɛ́ ɖé kpo ǎ.—1 Jaan 2:1, 2, 12; 3:19, 20.

11. Nɛ̌ mǐ ka sixu cyɔn alɔ mǐɖée jí sín adingban-núkplɔnmɛ e sixu wà nǔ dó nǔɖiɖi mǐtɔn wu lɛ é sí gbɔn?

¹¹ Mǐ ɖó na nyi alɔ nú nǔkplɔnmɛ gǔfɔndómawujitɔ́ lɛ tɔn. Sín bǐbɛ̌mɛ agun Klisanwun tɔn tɔn wɛ Awoví ko ɖò adingbannɔ gegě zán wɛ, bonu ye na bló bɔ mɛsɛntɔ́ gbejinɔtɔ́ Mawu tɔn lɛ na xò nǔ kpɔ́n. Enɛ wu ɔ, mǐ ɖó na tuùn lee è sixu tuùn vogbingbɔn e ɖò xó jɔ xó lɛ kpo adingbanxó lɛ  kpo tɛntin é gbɔn é. * Kɛntɔ́ mǐtɔn lɛ sixu zán tɛn Ɛntɛnɛti tɔn e jí è nɔ zun xɔ́ntɔn ɖè lɛ é dó bló bɔ nǔɖiɖi e mǐ ɖó nú Jehovah é kpo wǎn e mǐ yí nú nɔví mǐtɔn lɛ é kpo na vɔ́da. Nɔ flín mɛ e ɖò gudo nú nǔjlajla enɛ lɛ é, bo nɔ nyi alɔ nú nǔjlajla enɛ lɛ!—1 Jaan 4:1, 6; Nǔɖe. 12:9.

12. Etɛwu mǐ ka ɖó na na hlɔnhlɔn nǔɖiɖi e mǐ ɖó nú nǔgbo e mǐ kplɔ́n lɛ é é?

¹² Bo na dó gbí dɔn ɖò ahwantɔ́nmɛ Satáan tɔn lɛ nukɔn ɔ, mǐ ɖó na bló bɔ jiɖiɖe e mǐ ɖó dó Jezu kpo azɔ̌ e wà wɛ é ɖè nú linlin Mawu tɔn sín jijɛnu wu é kpo na syɛn d’eji. Mǐ ɖó na lɛ́ ɖeji dó deví gbejinɔtɔ́ e zán wɛ Jehovah ɖè ɖò égbé é wu. (Mat. 24:45-47) Xó Mawu tɔn kplɔnkplɔn ɖò gbesisɔmɛ nɔ zɔ́n bɔ jiɖiɖe mǐtɔn nɔ syɛn. Enɛ ɔ, nǔɖiɖi mǐtɔn na cí atín e ɖò ɖɔ dó dò wɛ ganji é ɖé ɖɔhun. Pɔlu ɖɔ nǔ mɔ̌hun ɖé hwenu e é wlán wema sɛ́dó agun Kolosi tɔn é. É ɖɔ: “Ee mi yí Klisu Jezu dó yí Aklunɔ mitɔn na ɔ, mi bo nɔ bǔ xá ɛ ɖò gbɛzán mitɔn mɛ. Mi dó ɖɔ dò ɖò Klisu mɛ; gbɛ̀ mitɔn bǐ ni nɔ alɔ tɔn mɛ; mi ni nɔ syɛnlǐn ɖò nǔɖiɖi mɛ hwebǐnu.” (Kolo. 2:6, 7) Enyi Klisanwun ɖé na hlɔnhlɔn nǔɖiɖi tɔn ɔ, Satáan kpo ahwan tɔn lɛ kpo sixu wà nǔ ɖebǔ dó flú i gbeɖé ǎ.—2 Jaan 8, 9.

13. Etɛ mǐ ka ɖó na nɔ ɖó nukún? Etɛwu?

¹³ Mǐ ɖó na nɔ ɖó nukún ɖɔ gbɛ̀ ɔ na gbɛ́ wǎn nú mǐ. (1 Jaan 3:13) Jaan flín mǐ ɖɔ “gbɛ̀ ɔ bǐ . . . ɖò Mɛnyanya ɔ sín acɛ mɛ.” (1 Jaan 5:19) Ðó vivɔnu gbɛ̀ elɔ tɔn ko sɛya bǐ wu ɔ, Satáan ɖò xomɛsin jí tawun. (Nǔɖe. 12:12) Gbɔn vo nú wlɛnwín e ma ɖò gannaganna ǎ lɛ é, ɖi nǔbliblíwiwa sín mɔ lɛ, alǒ gǔfɔndómawujitɔ́ lɛ sín adingban lɛ zinzan dó tɔ́n ahwan mǐ ɔ, Satáan nɔ lɛ́ tɔ́n ahwan mǐ tlɔlɔ, ɖi yadonúmɛ syɛnsyɛn lɛ mɔ̌. Satáan tuùn ɖɔ hwenu klewun ɖé jɛn kpò nú emi, enɛ wu wɛ é ɖò tintɛnkpɔn wɛ bo na ɖó wɛnjijlazɔ́ mǐtɔn te, alǒ bló bɔ nǔɖiɖi mǐtɔn na vɔ́da. Enɛ wu ɔ, azɔ̌ mǐtɔn e è ɖó dogbó na alǒ gbɛ́ ɖò tò ɖé lɛ mɛ é kpaca mǐ ǎ. É ɖò mɔ̌ có, nɔví mǐtɔn e ɖò tò enɛ lɛ mɛ lɛ é ɖò didɛ wɛ. Ye ɖò xíxlɛ́ wɛ ɖɔ Satáan na bo wà nǔ ɖebǔ nú mǐ ɔ, mǐ sixu ɖu ɖ’eji!

14. Ðɔ ali e nu mǐ sixu d’alɔ nɔví mǐtɔn lɛ bɔ ye na kpò ɖò nǔgbo ɔ mɛ ɖè é ɖokpo.

¹⁴ Bo na dó d’alɔ nɔví mǐtɔn lɛ bonu ye na nɔ nǔgbo ɔ mɛ ɔ, mǐ ɖó na nɔ sè wuvɛ̌ xá ye. (1 Jaan 3:10, 11, 16-18) Hwenu e nǔ lɛ ɖò yiyi wɛ ganji é kɛɖɛ wɛ mǐ na nɔ ɖè wanyiyi xlɛ́ mǐɖée ǎ, loɔ, mǐ na nɔ lɛ́ wà mɔ̌ hwenu e tagba lɛ wá xwetɔ́n é. Ði kpɔ́ndéwú ɔ, a ka tuùn mɛɖé bɔ mɛvívɛ́ ɖé kú n’i, b’ɛ byɔ ɖɔ è ni dó gbɔ n’i alǒ d’alɔ ɛ ɖò ali tawun tawun ɖé lɛ nu à? Alǒ, a sè bɔ nǔɖitɔ́ hatɔ́ towe lɛ hɛn nǔɖokan gegě bú ɖò adla j’ayǐ ɖé hwenu, bo ɖó hudo alɔdó tɔn, bo na vɔ́ Kpléxɔ Axɔ́suɖuto ɔ tɔn alǒ xwé yetɔn lɛ gbá à? Gbɔn vo nú xó ɖiɖɔ dó ɖè lě dò mǐ yí wǎn nú nɔví mǐtɔn lɛ bo nɔ lɛ́ sè wuvɛ̌ xá ye sɔ é xlɛ́ ɔ, ɖò taji bǐ ɔ, mǐ nɔ lɛ́ wà nǔɖe dó d’alɔ.

15. Lee 1 Jaan 4:7, 8 ɖɔ gbɔn é ɔ, etɛ mǐ ka ɖó na wà?

¹⁵ Enyi mǐ ɖè wanyiyi xlɛ́ mǐɖée ɔ, mǐ nɔ xlɛ́ ɖɔ mǐ wà nǔ Tɔ́ mǐtɔn jixwé tɔn wanyiyinɔ ɔ ɖɔhun. (Xà 1 Jaan 4:7, 8.) Ali taji e nu mǐ nɔ ɖè wanyiyi xlɛ́ ɖè é ɖokpo wɛ nyí hwɛ sísɔ́ kɛ mǐɖée. Ði kpɔ́ndéwú ɔ, mɛɖé sixu dó xomɛsin nú mǐ, bo ka lɛ́ wá savo nú mǐ. Mǐ nɔ sɔ́ hwɛ kɛ ɛ, bo nɔ jó xó dó, dó xlɛ́ ɖɔ mǐ yí wǎn n’i. (Kolo. 3:13) Xomɛ sin nɔví sunnu e nɔ nyí Aldo é hwenu e é sè bɔ nɔví sunnu e é nɔ sí é ɖé ɖɔ xó nyanya ɖé dó tò tɔn mɛ nu lɛ wu é. Aldo ɖɔ, “Un nɔ xoɖɛ magbokɔ sɛ́dó Jehovah nú é ni d’alɔ mì  bonu un ma lin nǔ nyanya ɖé dó nɔví ɔ wu ó.” Amɔ̌, Aldo lɛ́ wà nǔ ɖevo. É wá gbeta ɔ kɔn, bo byɔ nɔví ɔ ɖɔ emi kpo é kpo na tɔ́n yì kúnnuɖegbé. Ee ye ɖò azɔ̌ wà ɖó kpɔ́ wɛ é ɔ, Aldo tinmɛ lee nǔ e nɔví ɔ ɖɔ é vɛ́ n’i sɔ́ é n’i. Aldo ɖɔ: “Hwenu e nɔví ɔ sè lee nǔ cí nú mì dó xó nyanya e é ɖɔ é wu é ɔ, é dó kɛnklɛn. Kɔnugbe tɔn zɔ́n bɔ un mɔ lee nǔ e é ɖɔ é vɛ́ n’i sɔ é. Mǐ lɛ́ wá huzu xɔ́ntɔn ɖagbe lɛ, bo wɔn xó enɛ.”

16-17. Etɛ lɛ jí mǐ ka ɖó na kú dó?

¹⁶ Mɛsɛ́dó Jaan yí wǎn nú nɔví tɔn lɛ tawun, bɔ ganjininɔ yetɔn ɖò gbigbɔ lixo nɔ ɖu ayi mɛ n’i. Wanyiyi enɛ kpo lee nǔ yetɔn nɔ ɖu ayi mɛ n’i gbɔn é kpo tɔ́n céɖécéɖé ɖò wema-sɛ́dó-mɛ tɔn atɔn lɛ mɛ. Tuùn e mǐ tuùn ɖɔ Jehovah sɔ́ sunnu kpo nyɔnu kpo mɛsɛ́dó Jaan ɖɔhun lɛ, bɔ ye na kp’acɛ xá Klisu é dó wusyɛn lanmɛ nú mɛ kpɔ́n!—1 Jaan 2:27.

¹⁷ Mi nú mǐ ni hɛn wěɖexámɛ e jí mǐ ɖɔ xó dó dìn lɛ é ayi mɛ. Mi nú mǐ ni nɔ setónú nú Jehovah ɖò ali lɛ bǐ nu ɖò gbɛzán mǐtɔn mɛ; enɛ wɛ nyí ɖɔ mǐ ni kánɖeji bo na zán gbɛ̀ ɖò nǔgbo ɔ mɛ. Mǐ ni nɔ kplɔ́n Xó Mawu tɔn, lobo lɛ́ ɖeji dó nǔ e mǐ kplɔ́n lɛ é wu. Mǐ ni syɛnlǐn ɖò nǔɖiɖi e mǐ ɖó nú Jezu é mɛ. Mǐ ni nyi alɔ nú tamɛ-núkplɔnmɛ gbɛtɔ́ tɔn lɛ kpo gǔfɔndómawujitɔ́ lɛ sín nǔkplɔnmɛ lɛ kpo. Mǐ ni gbí dɔn ɖò kɔ e gbidí nú mǐ wɛ è nɔ ɖè bonu mǐ na zán gbɛ̀ we, lobo wà nǔ nyanya é nukɔn. Mǐ ni zán gbɛ̀ sɔgbe xá nǔgbododó walɔ ɖagbe tɔn Jehovah tɔn lɛ. Mǐ ni nɔ sɔ́ hwɛ kɛ nɔví mǐtɔn ɖěɖee dó xomɛ sin nú mǐ lɛ é, bo nɔ lɛ́ d’alɔ ye mɛ ɖěɖee ɖò hudo mɛ lɛ é, enɛ ɔ, mǐ na bló bɔ ye na syɛnlǐn. Mɔ̌ mɛ ɔ, nú mǐ na bo mɔ wuvɛ̌ ɖebǔ ɔ, mǐ na kpò ɖò gbɛ̀ zán wɛ ɖò nǔgbo ɔ mɛ.