1. Ni kaineti ma 3 Ioane 3, 4, tera ae ti kukurei iai?

KO KONA n iangoa kukurein te abotoro Ioane ngke e ongo taekaia naake e buokiia n reiakina te koaua, bwa a teimatoa ni kakaonimaki ni beku ibukin Iehova? A kaaitara ma kangaanga aika bati, ma e kekeiaki mwaaka Ioane ni kakorakorai aia onimaki Kristian aika kakaonimaki aikai, aika kaanga natina n te onimaki. N aron anne, ti kukurei naba ngkana a katabui maiuia nakon Iehova natira ke natira n te onimaki, ao n teimatoa ni beku ibukina.​—Wareka 3 Ioane 3, 4.

2. Tera bukina ngke e korei reeta Ioane?

² N 98 C.E., e bae ni maeka Ioane i Ebeto ke n uakaan ma Ebeto. Tao e mwaing nako ikanne imwini kainaomataana mani kabureakina n te aba ae Batemoti. N te tai anne are e a kairaki iai n taamnein Iehova bwa e na korei reeta aika tenua. A koreaki reeta akanne ibukini kaungaakia Kristian aika kakaonimaki ni koaua bwa a na teimatoa n onimakina Iesu, ao n teimatoa n nakonako n te koaua.

3. Baikara titiraki aika ti na kaekai?

³ Ai bon tii Ioane nikiraia abotoro ni maiu, ao e tabeaianga irouia kaain te ekaretia ake a rotakibuaka irouia taan angareirei ni kewe. * (1Ioa. 2:18, 19, 26) A taekinna taan tannako man te koaua akanne bwa a ataa Iehova, ma a aki ongeaba n ana tua. Ti na rinanon ana reirei ni kairiri Iehova are e anga Ioane, ao ni kaekai titiraki aika tenua aikai: Tera ae nanonaki n te nakonako i nanon te koaua? Baikara baika kona n tukira mani karaoan anne? Ao ti na kangaa n ibuobuoki i marenara bwa ti na teimatoa n te koaua?

4. Ni kaineti ma 1 Ioane 2:3-6 ao 2 Ioane 4, 6, tera ae nanonaki n te nakonako n te koaua?

⁴ Ngkana ti na nakonako n te koaua, ti riai n ataa te koaua are n Ana Taeka te Atua ae te Baibara. Irarikin anne, ti riai ni “kakairi n ana tua [Iehova]” ke n ongeaba iai. (Wareka 1 Ioane 2:3-6; 2 Ioane 4, 6.) E katea te katoto ae kororaoi Iesu ibukin te ongeaba iroun Iehova. Ngaia are te anga teuana ae ti ongeaba iai iroun Iehova, boni man arora n toua raoi mwini mwanekan Iesu n aron ara konaa.​—Ioa. 8:29; 1Bet. 2:21.

5. Tera ae ti riai ni kakoauaa raoi?

⁵ Ngkana ti na teimatoa n nakonako n te koaua, ti riai ni kakoauaa ae Iehova bon te Atua ae bwabwaina te koaua, ngaia are bwaai nako ake e taekin n ana Taeka ae te Baibara, a boni koaua. Ti riai naba ni kakoauaa ae Iesu bon te Mesia are beritanaki. A bati ni boong aikai aika aki koaua raoi ni kaineti ma kabirakin Iesu bwa te Uea n Ana Tautaeka n Uea te Atua. E anga te kauring Ioane bwa a “mwaiti taani bureburea te aba” ake a kona ni burebureiia naake a tuai ni matoa raoi aia koaua ibukin Iehova ao Iesu. (2Ioa. 7-11) E korea aei Ioane: “Antai te tia kewe? Tiaki bon te aomata are taku bwa tiaki Iesu te Kristo?” (1Ioa. 2:22) Te anga teuana ae ti kona iai n totokoa mwamwanaakira, bon rinanon te ukeuke n reirei n Ana Taeka te Atua. Ngkana ti karaoa anne, ti na ataa Iehova ao Iesu. (Ioa. 17:3) Ao ti a tibwa kona ni kakoauaa raoi bwa e a reke te koaua iroura.

6. Tera ae kona n tukiia Kristian aika rooro n rikirake bwa a na aki nakonako n te koaua?

⁶ A riai ni bane n taratara raoi Kristian bwa a na aki burebureaki ni wanawanaia aomata. (1Ioa. 2:26) A riai riki Kristian aika rooro n rikirake n tarataraiia man te bwai ni kamwane aei. E taku Alexia * ae te tari te aine mai Buranti ae 25 ana ririki: “Ngke I mena n te reirei, I reiakina te ewarutin ao aia iango riki tabeua aomata, ao ibukin anne I a nanououa n te koaua. N tabetai, e rangi n anaaki nanou n reirei aikai. I ataia ae I aki riai ni kakoauai bwaai ni kabane ake a taekinaki n te tabo n reirei, ma I riai naba ni butimwaei baike e taekin Iehova.” E ukeuke n reirei Alexia n te boki ae Life​—How  Did It Get Here? By Evolution or by Creation? I nanon tabeua te wiki, e a toki nanokokorakina. E taku: “I a kakoauaa i bon irou bwa a boni koaua baike a taekinaki n te Baibara. Ao I a ataia ae N na boni kimwareirei ao n rau ngkana I maiuakini kaetieti ake iai.”

7. Tera ae ti riai n rarawa ni karaoia, ao bukin tera?

⁷ A riai ni bane Kristian aika rooro n rikirake ao aika ikawai naba n rarawa ni maiuakina te maiu ae kiriuoua. E taekinna Ioane bwa ti aki kona n nakonako n te koaua ao ti boni maiuakina naba te aroaro ni maiu ae aki riai. (1Ioa. 1:6) Ngkana ti kan akoaki iroun te Atua ngkai ao nakon taai aika imwaira, ti riai n ururingnga ae a noraki ara mwakuri ni kabane. E ngae ngke a aki nori aomata ara mwakuri ake ti karaba ni karaoi, ma e bon nori Iehova.​—Ebera 4:13.

8. Tera ae ti riai n rawa ni butimwaeia?

⁸ Ti riai n rawa ni butimwaei aia iango kaain te aonnaba ibukin te bure. E korea aei te abotoro Ioane: “Ngkana ti kangai, ‘Akea ara bure,’ ao ti burebureira i bon iroura.” (1Ioa. 1:8) N ana bong Ioane, a taekinna taan tannako man te koaua bwa e kona te aomata ni kakaraoa ae bure n oin nanona, ao e bon teimatoa naba n riki bwa raoraon te Atua. Ni boong aikai, ti a maeka ma aomata aika titeboo aia iango ma anne. A bati aika taku bwa a kakoauaa te Atua, ma a aki butimwaea ana iango Iehova ibukin te bure, moarara riki ni kaineti ma te wene n taanga. Te bwai ae bure i matan Iehova, a taekinna bwa akea burena ngkana e boni kani karaoia te aomata.

9. A na kangaa ni kakabwaiaaki rooro n rikirake ngkana a karaoa te bwai ae eti ae taekinaki n te Baibara?

⁹ A kona ni kaririaki riki Kristian aika rooro n rikirake bwa a na butimwaei aia iango raoia n reirei ke raoia ni mwakuri ni kaineti ma te wene n taanga. Anne te bwai ae riki nakon Aleksandar. E ururing ni kangai teuaei: “A kataia ni kaririai nakon te wene n taanga ataeinnaine  tabeman n te tabo n reirei. Ao ngke I aki kariaia, a aranai bwa I tataania raou ni mwaane.” N te tai are ko kaaitara iai ma te aekaki anne, uringnga are ngkana ko karaoa te bwai ae eti ae taekinaki n te Baibara, ko a kateimatoa iai raoiroin taekam, ko kamanoko man te aoraki ao te rawawata, ao ko kawakina am iraorao ma Iehova. Ao ni katoatai are ko rawa iai nakon te kariri, e nang bebete riki karaoan te bwai ae eti iroum. Uringnga naba are aia iango kaain te aonnaba ae aki eti ibukin te wene n taanga, e bon nako mairoun Tatan. Ngaia are ngkana ko rawa ni kakairi n aia iango, ko boni “kataenikaia teuare buakaka.”​—1Ioa. 2:14.

10. Ti kangaa ni buokaki n 1 Ioane 1:9 bwa ti na beku ibukin Iehova ma mataniwin nanora ae itiaki?

¹⁰ Ti kakoauaa ae e bon riai Iehova ni baireia bwa tera te bwai ae bure. Ao ti karaoa ara kabanea n tamaroa bwa ti na aki karaoa ae bure. Ma ngkana ti karaoa ae bure, ti kaota ara bure nakon Iehova n te tataro. (Wareka 1 Ioane 1:9.) Ao ngkana ti karaoa te bure ae kakaiaki, ti ukera aia ibuobuoki unimwaane ake e mwiokoiia Iehova bwa a na tabeakinira. (Iak. 5:14-16) Ma ti aki riai n teimatoa n rawawata ibukin ara bure rimoa. Bukin tera? Ibukina bwa Tamara ae tatangira e katauraoa ana karea ni kaboomwi Natina ibukini kabwaraan ara bure. Ngke e taekinna Iehova bwa e na kabwarai aia bure taani bure aika rairi nanoia, e na boni karaoia. Ngaia are e boni buokira Iehova bwa ti na kona ni beku ibukina ma mataniwin nanora ae itiaki.​—1Ioa. 2:1, 2, 12; 3:19, 20.

11. Ti na kangaa ni kamanoira man reirei aika kona n uruana ara onimaki?

¹¹ Ti riai n rarawa nakon aia reirei taan tannako man te koaua. Ngke e moan tei te ekaretia ni Kristian, e kamanenaia taani bureburea te aba te Riaboro ibukini kauekean te nanououa irouia ana toro te Atua aika kakaonimaki. Ngaia are ti riai n atai kaokoroni baika  koaua ma aika kewe. * A kona taani kairiribai nakoira ni kamanena te Intanete ke waaki ni kanakorongorongo, bwa a na kataia ni kamamaraa onimakinan Iehova iroura ao tangiraia tarira. Uringnga bwa bon Tatan ae kauekei rongorongo ni kewe akanne, ao rarawa ni butimwaei!​—1Ioa. 4:1, 6; TeKao. 12:9.

12. E aera bwa ti riai ni kakorakoraa ara onimaki ni kaineti ma koaua ake ti reiakin?

¹² Ibukini kaitaraan ana waaki nako Tatan, ti riai ni kakorakoraa riki onimakinan Iesu iroura, ao tabena ni kaineti ma ana kantaninga te Atua. Ti riai naba n onimakinia naake e kamanenaia Iehova ni boong aikai bwa a na kaira ana botaki. (Mat. 24:45-47) Ti kakorakoraa ara onimaki rinanon te katoatai n ukeuke n reirei n Ana Taeka te Atua. E na riki ngkanne ara onimaki bwa ai aron te aroka ae ribunako wakaana i aontano. E taekina naba anne Bauro ngke e kororeta nakon te ekaretia i Korote. E taku: “Ngkai kam a tia ni butimwaea Kristo Iesu ae te Uea ao kam na teimatoa n nakonako ni katiteuanaaki ma ngaia, ni kaneneaki wakaami ao ni kakorakoraaki i nanon teuaei ao ni kateimatoaaki n te onimaki.” (IKoro. 2:6, 7) Akea te bwai ae e kona ni karaoia Tatan ma taani boutokaia ae e na kamamaraa iai te Kristian ae kateimatoa ana onimaki.​—2Ioa. 8, 9.

13. Tera ae ti riai ni kantaningaia, ao bukin tera?

¹³ Ti riai ni kantaningaia bwa a na ribaira kaain te aonnaba. (1Ioa. 3:13) E kauringira Ioane bwa “a bane kaain te aonnaba ni mena i aani mwaakan teuare buakaka.” (1Ioa. 5:19) E a korakora riki unin Tatan ibukina bwa e a kaan tokin te waaki ae ngkai. (TeKao. 12:12) E a aki tii kamanenai aanga aika aki otara n aron te kariri nakon te wene ni bure ke aia kewe taan tannako man te koaua. E na boni kaaitaraira naba ma mwakuri n iowawa. E ataia Tatan ae e a kimototo ana tai ni kataia ni katoka ara uarongorongo ke n urua kakaonimakira. Ngaia are ti aki mimi ngkai e a tiatianaki ao ni katabuakaki ara mwakuri n aaba tabeua. Ma e ngae n anne, a teimatoa n nanomwaaka taari n aaba akanne. A kaotia raoi iai bwa ti boni kona n tokanikai, n aki ongeia bwa tera ae e karaoia nakoira Tatan!

14. Tera te anga teuana ae ti kona iai ni buokiia tarira bwa a na teimatoa n te koaua?

¹⁴ Ngkana ti na buokiia tarira bwa a na teimatoa n te koaua, ti riai ni kaotiota te nanoanga. (1Ioa. 3:10, 11, 16-18) Ti riai n itangitangiri i marenara tiaki tii ngkana a nakoraoi arora, ma ngkana a riki naba kangaanga. N te katoto, iai temanna ae ko ataia ae e a tia ni mate ae tangiraki irouna, ao e kainnanoa kabebeteana ke buokana n aanga tabeua? Ke ko ongo taekaia taari ake a bua aia bwai n te kabuanibwai ae karina ao a kainnanoa buokaia ibukini katean aia Tabo n Taromauri ke mwengaia? Ti kaotia bwa ti rangi n tangiriia ao n nanoangaiia tarira, tiaki tii mani baike ti taekin, ma ae kakawaki riki, mani baike ti karaoi.

15. Ni kaineti ma 1 Ioane 4:7, 8, tera ae ti riai ni karaoia?

¹⁵ Ti kakairi iroun Tamara are i karawa ngkana ti itangitangiri i marenara. (Wareka 1 Ioane 4:7, 8.) Te anga ae kakawaki ae ti kaota iai te tangira, boni mani bwainan te ikabwarabure. N te katoto, e kona ni kammarakira temanna ao e kabwaraa ana bure. Ti kaota te tangira ngkana ti kabwaraa te bure anne ao ni mwaninga taekana. (IKoro. 3:13) E maraki nanon te tari te mwaane ae Aldo ngke e taetae n aki akaka ibukia kaain abana te tari te mwaane temanna ae e karinea. E taku Aldo: “I  teimatoa n tataro nakon Iehova bwa e na buokai bwa N na aki iangoi baika bubuaka ibukin te tari anne.” Ma e karaoa riki te bwai teuana Aldo. E baireia bwa e na tuanga te tari anne bwa a na toa n te mwakuri ni minita. N aia tai ni mwakuri, e a kabwarabwaraa ana namakin Aldo ibukin ana taeka te tari anne. E taku: “Ngke e ongo te tari aei au namakin ibukin te baere e taekinna, ao e kabwaraa ana bure. I kona n ataia man teini bwanaana bwa e rangi n uringaaba n te baere e a tia n taekinna. Imwin anne, ti a manga riki bwa raao ni koaua ao ti a mwaninga taekan te kangaanga anne.”

16-17. Tera ae ti riai ni kamatoai nanora bwa ti na karaoia?

¹⁶ E rangi n tangiriia tarina n te onimaki te abotoro Ioane ao e tabe ma marurungia n te onimaki. E oti raoi anne n te reirei ni kairiri are e angania n ana reta ake tenua. Ai kaungananora ataakin ae a kabiraki naba bwa raoni Kristo n tautaeka mwaane ao aine aika titeboo aroaroia ma Ioane!​—1Ioa. 2:27.

¹⁷ Ti bia mutiakina te reirei ni kairiri ae ti a tia ni maroroakinna. Ti bia kamatoai nanora bwa ti na nakonako n te koaua, ae nanona bwa ti na ongeaba iroun Iehova n iterani maiura ni kabane. Ukeuke n reirei n ana Taeka ao onimakina ana taeka. Kakorakoraa onimakinan Iesu iroum. Rarawa nakoni wanawanaia aomata ao aia reirei taan tannako man te koaua. Rarawa ni maiuakina te maiu ae kiriuoua ao ni karaoa ae bure. Maiuakin ana kaetieti aika moan raraoi Iehova ibukin te aroaro ni maiu ae riai. Ao ti bia buokiia tarira bwa a na teimatoa ni korakora, man arora ni kabwarai aia bure naake a kammarakira ao ni buokiia naake a kainnanoa te ibuobuoki. Ao n aki ongei kangaanga ake ti kaaitarai, ti na bon teimatoa n nakonako i nanon te koaua.