1. 3 Juanv 3, 4-ant dakhoilolea pormonnem amkam kitem khuxalkai haddtta?

APOSTL Juanvan zankam sot xikoilolem, tim Jehovachi seva visvaxiponnan korit asat tem aikon to kitlo khuxal zalo astolo tem chintat. Tankam zaitea somosiancho fuddo korcho poddlo. Punn tancho bhavarth ghott korunk Juanv khub vavurlo. Ani hea visvaxi Kristanvank to aplim bhurgim koxim lekhtalo. Teach bhaxen, amchim bhurgim ani ami sot xikoilam tim, Jehovak apli jivit somorponn kortat tednam ani tachi seva korit ravtat tednam ami khuxal zatat.—3 Juanv 3, 4 vachat.

2. Juanvan chitti kiteak boroiloleo?

² Juanv Patmosachea zunvear koidi mhunn aslo. Punn tachi suttka zalea uprant, sumar 98 K.X.-ant to ghoddie Efezant vo tachea lagim ravonk gel’lo astolo. Tea vellar Jehovachea povitr xokten taka tin chitti borounk prerit kel’lo. Heo chitti visvaxi Kristanvank Jezucher sodanch bhavarth ghott dovrunk ani sota pormonnem cholot ravonk urba diunk boroil’leo.

3. Khoinche prosnanche zobab ami polloitolim?

³ Tea vellar, Jezuchea apostlam modem fokot Juanv jivo aslo. Ani sobhent khotte xikoupeanchea probhava vixim taka husko aslo. * (1 Juanv 2:18, 19, 26) Hem dhorm-broxtt Devak vollkhotat mhunn sangtale. Punn Jehovacheo adnea pallinasle. Hea lekhant Juanvan dil’lo sol’lo polloum-ia, ani hea tin prosnanche zobab zannam zaum-ia: Sota pormonnem cholop mhunnche kitem? Oxem kortana amkam koslea oddchonneancho fuddo korcho poddtta? Ani sotant ravonk ami eka-mekak koxim modot korunk xoktat?

4. 1 Juanv 2:3-6 ani 2 Juanv 4, 6-a pormonnem, sota pormonnem cholonk amkam kitem gorjechem?

⁴ Sota pormonnem cholounk Devachem Utor Bible-ant aslole sot zannam zavop gorjechem. Tea bhair, ami Jehovachi ‘adnia pallunk’ zai. (1 Juanv 2:3-6; 2 Juanv 4, 6 vachat.) Jezun Jehovachi adnia purnn toren pallun amkam ek bori dekh dovorlea. Jehovachi adnia pallunk ek mhotvachi vatt mhunnttlear, ami zata titlea bore toren Jezuchea pavlamnim cholop.—Juanv 8:29; 1 Ped. 2:21.

5. Amkam kiteachi khatri asonk zai?

⁵ Ami sota pormonnem choltolim zalear, Jehova sodanch sot uloitat ani tachem Utor Bible-ant sot mhunn amkam khatri asonk zai. Jezuk Devachea Rajeacho Raza mhunn nemla, hem zaito lok dubavta. Ani Jehova ani Jezu vixim aslolea sotacher ghott patienni nasloleank fottounk, “zaite fosovpi” ietole mhunn Juanvan xittkailolem. (2 Juanv 7-11) Juanvan boroilem: “Fottkirim konn? Jezu Krist mhonn mandun ghenant tim.” (1 Juanv 2:22) Ami fosonastana ravonk ekuch vatt mhunnttlear, Devachea Utracho obheas korop. Oxem kelearuch ami Jehovak ani Jezuk vollkhonk pavtolim. (Juanv 17:3) Ani tednanch amchea lagim sot asa mhunn amkam khatri zatoli.

6. Tornnattea Kristanvank khoinche eke oddchonnecho fuddo korcho poddtta?

⁶ Soglea Kristanvamnim munxachea zannvaie thaun fosona zaunk chotrai dhorunk zai. (1 Juanv 2:26) Hea fasant poddona zaunk, chodd korun tornnattea Kristanvamnim chotrai dovrunk zai. 25 vorsanchi French uloupi bhoinn Alexia * mhunntta: “Hanv iskolak voitalem tednam munis mankdda thaun aila hea vixim, ani munxancheo her xikounneo xiklolem. Hea xikounneank lagon hanv sota vixim dubavunk laglem. Thodde pavtti, mhaka teo xikounneo sarkeo koxeo disonk lagleo. Punn, Bible sangta tem nakarun, tticher sangta tem patievop mhaka chukichem koxem dislem.” Alexia-n, Life—How Did It Get Here? By Evolution or by Creation? hea pustokacher obheas kelo. Thoddeach sumanam bhitor, taka aslole dubav pois zale. Alexia mhunntta: “Bible-ant asa tem sot mhunn hanvem khatri korun ghetli.  Ani sota pormonnem chol’lolean khuxalkai ani xanti mellttoli mhunn mhaka kollon ailem.”

7. Ami kitem nakarunk zai, ani kiteak?

⁷ Chukichim kamam kortana Jehovachi seva korchem ddhong korop, soglea Kristanvamnim, tornnatteamnim ani zanntteamnim nakarunk zai. Ami onoitik jivit jietat zalear amchean sota pormonnem cholonk zaunchem na mhunn Juanvan dakhoun dilem. (1 Juanv 1:6) Jehovak khuxal kortolim zalear ami kortat tem soglem Jehova polloita mhunn ami sodanch ugddas dovrunk zai. Ami lipoun kortat tim patkam ghoddie munxank dischimnant, punn Jehovak soglem dixtti poddtta.—Heb. 4:13.

8. Ami kitem nakarunk zai?

⁸ Patka vixim sonvsarache lok kitem chintat, tem chintop ami nakarunk zai. Apostl Juanvan boroilem: ‘“Amkam patok na”, oxem ami mhollem zalear, ami amkanch fottoitanv.’ (1 Juanv 1:8) Dev jeo vostu chukicheo mhunn sangta teo kortana pasun ami Devache ixtt zaunk zata mhunn Juanvachea disamnim dhorm-broxtt korpi sangtale. Toslem chintop aslolea lokam modem ami aiz jietat. Aiz zaito lok Dev asa mhunn patietat. Punn patka vixim Jehova jem sangta, chodd korun noitik sombonda vixim, tem tim manun ghenant. Dev jeo vostu chukicheo mhunn lekhta, teo vostu apleak boreo dista zalear teo korunk zata mhunn lok chintat.

9. Bible jem kitem xikoita tem tornnattim kortat tednam tem tankam kiteak boreak poddtta?

⁹ Aiz chodd korun tornnattea Kristanvank tanche iskolantlea vo kama voilea vangddeam thaun onoitik jivit apnnaunk dobhav ieunk xokta. Aleksandar-ak oxench ghoddlem. To mhunntta: “Iskolant thoddea cheddvamnim mhojea sangata loingik sombond dovrunk mhojer dobhav ghatlo. Mhaka girlfriend naslem dekhun, tim mhaka homo mhunnttalim.” Tumkam osleach oddchonneancho fuddo korcho poddot. Punn tea vellar, Bible kitem sangta  tachea pormonnem tumi kortat zalear tumkam tumchea vixim borem distolem, tumchi bolaiki bori urtoli, tumi nirax zaunchimnant, ani Jehova sangata tumchi ixttagot ghott urtoli. Tumi jitle pavtti tallnni nakartolim, titlem tumkam sarkem tem korunk sompem zatolem. Loingik sombonda vixim sonvsarachea lokank aslolem chukichem chintop Soitana thaun upzota mhunn pasun ugddas dovrat. Tor tumi toslem chintop nakartat tednam ‘noxtteacher tumi zoit vhortolim.’—1 Juanv 2:14.

10. Jehovachi seva nitoll ontoskornnan korunk 1 Juanv 1:9 amkam koso modot korta?

¹⁰ Kitem kelear patok, tem sangonk Jehovak hok’k asa mhunn ami manun gheunk zai. Ani ami patkam adarchimnant mhunn ami zata titlo proitn korunk zai. Ami patok adarlem zalear pasun, Jehova lagim magnnem korun ami tea chuki vixim sangonk zai. (1 Juanv 1:9 vachat.) Ek gombhir patok adarlem zalear, Jehovan amchi kallji gheunk nemlolea vhoddilanchi ami modot gheunk zai. (Jak. 5:14-16) Punn ami adim kel’lea chuki vixim chintit ravonk zaina. Kiteak? Karonn amcho mogall bap aplea putachea soddvonne udexim amchim patkam bhogxita. Ami kel’lea patkam vixim ami khorench kallzant thaun poschatap kortat zalear, Jehova amkam bhogxitoloch. Tor Jehovachi seva nitoll ontoskornnan korunk amkam kitench addaunk xokona.—1 Juanv 2:1, 2, 12; 3:19, 20.

11. Amcho bhavarth halonk xokta toslea xikounneam thaun ami amkam koxim rakhunk xoktat?

¹¹ Ami dhorm broxtt korpeancheo xikounneo nakarunk zai. Kristi sobha suru zali tednam thaun aiz meren zaite fosoupeank uzar korun Devchar Devachea visvaxi sevokanchea monant dubhav ghalta. Tor khorem kitem ani fott kitem tem koxem vollkhunchem tem ami zannam zavop gorjechem. * Internet vo social media uzar korun amche dusman Jehovacher amcho bhavarth ani bhav-bhoinnam pasot  amcho mog unno korcho proitn kortat. Punn tumi hem nakarunk zai. Karonn ugddas dovrat, Soitan hachea fattlean asa!—1 Juanv 4:1, 6; Prok. 12:9.

12. Ami xiklolea sotancher amcho bhavarth ghott korop kiteak gorjechem?

¹² Soitan amcho bhavarth halouncho proitn korta. Punn tem nakartolim zalear Jehova aplo ud’dex purnn korunk Jezuk koso uzar korta tacher ami amcho bhorvonso ghott korunk zai. Tea bhair Jehova aplem songotton cholounk zankam uzar korta, tancher pasun ami bhorvonso dovrunk zai. (Mt. 24:45-47) Ami sodam Devachea Utracho obheas kortana pasun amcho bhavarth vaddtta. Tednam amcho bhavarth oslea eka zhadda sarko zatolo, zachim pallam sarkim zomni bhitor geleant. Kolos-achea sobhek Paulun boroilem tednam tannem oxench kitem sanglem. Tannem mhunnttlem: “Jezu Kristak tumcho Somi mhonn tumi manun ghetla mhonnttoch, Tachea ekvottant jieiat. Tumchim pallam Tache bhitor khol-khol riglolim asum-di. Tumchem jivit Tacher bandun haddat, ani, tumkam xikoilam toxem, tumchea bhavarthant odik ghott zaiat.” (Kol. 2:6, 7) Ami amcho bhavarth ghott korcho proitn kelo zalear, Soitan vo tache vangddi sota pormonnem cholonk amkam addaunk xokchenant.—2 Juanv 8, 9.

13. Amkam kiteacho fuddo korcho poddttolo mhunn ami zannant, ani kiteak?

¹³ Sonvsar amcho dves kortoloch mhunn ami zannant. (1 Juanv 3:13) “Ak’kho sonvsar Noxtteachea tabeant asa” mhunn Juanv amchea ugddasak haddtta. (1 Juanv 5:19) Hea sonvsaracho xevott lagim pavta toso, Soitanacho rag choddot asa. (Prok. 12:12) To fokot onoitik ani khotteo xikounneo nhoi, punn amcher krur dhumallo pasun haddtta. Amchem porgottnnechem kam bond korunk vo amcho bhavarth halounk apleak thoddoch vell asa mhunn Soitan zannam. Tor zaitea desamnim amchea kamancher bondi asa mhunn ami ojap zainant. Punn tea desant aslolea amchea bhav-bhoinnamnim Jehovachi seva korop soddun diunk na. Tor Soitan Jehovachea lokanchea add kitem-i haddum, ami sodanch visvaxi ravonk xoktat!

14. Khoinchea eka vatten ami amchea bhav-bhoinnank sotant ghott ravonk modot korunk zata?

¹⁴ Amchea bhav-bhoinnank sotant ghott ravonk modot zaunk, ami tankam doia-maia dakhoitolim. (1 Juanv 3:10, 11, 16-18) Soglem borem asta tednanch nhoi, punn oddchonneo ietat tednam pasun ami amchea bhav-bhoinnank mog dakhounchi goroz asa. Udharonnak, tumi oslea bhavak vo bhoinnik vollkhotat zancho mogacho konn tori mela? Tankam buzvonnechi vo ani koslea-i torechea modotichi goroz asa kai? Vo halinch eka vattarant odruxttak sampoddlolea bhav-bhoinnam vixim tumi aikolam? Tanchi Raj-ghoram vo ghoram porot bandunk tumi modot korunk sodhtat kai? Tanchea pasot amkam kitlo mog ani doia-maia asa, tem ami fokot utramnim nhoi, punn kornneamnim pasun dakhovop chodd gorjechem.

15. 1 Juanv 4:7, 8-ant sanglolea pormonnem, ami kitem korunk zai?

¹⁵ Ami eka-mekak mog dakhoitat tednam ami amchea mogall sorginchea Bapachi dekh ghetat. (1 Juanv 4:7, 8 vachat.) Mog dakhounchi ek mukhel vatt mhunnttlear eka-mekak bhogsop. Udharonnak, konn eklo amkam dukhounk xokta. Punn uprant apunn chuklo mhunn manun gheunk xokta. Ami ti chuk amchea mon-a thaun kaddun, visortat ani bhogxitat tednam ami taka mog dakhoitat. (Kol. 3:13) Aldo nanvachea eka bhavak osleach eka poristithicho fuddo korcho poddlo. To jea bhavak khub resped ditalo, tannem tachea sonskruti vixim taka kitem tori mhunnttlem, jem aikon taka dukh zalem.  Aldo mhunntta, “Tea bhava vixim hanvem vaitt chintunk zaina mhunn hanv Jehova lagim magnnem korit ravlom.” Tea bhair, Aldo-n anik kitem tori kelem. Aldo-n tea bhavak aplea sangata sevek apoilo. Sangata porgottnni kortana, tea bhavan kitem mhunnttlolem tea vixim apleak koxem dislem tem Aldo-n taka sanglem. Aldo fuddem mhunntta, “Tannem kitem mhunnttlolem tea vixim mhaka koxem bhoglem tem tea bhavak koll’llem tednam apunn chuklo mhunn tannem sanglem. Tachea avazantlean mhaka dukhoilem mhunn taka kitlem dukh bhoglem tem mhaka kollon ailem. Tachea uprant ami porot bore ixtt zale.”

16-17. Ami kitem korcho nichov korunk zai?

¹⁶ Apostl Juanvan aplea bhav-bhoinnancho khub mog kortalo ani tim sodanch bhavarthant ghott ravlolim taka zai aslim. Tannem boroilolea tin chittint aslolea sol’lea thaun, to tancho kitlo mog kortalo ani taka tanchi kitli kallji asli tem sarkem dison ieta. Sorgar Jezu sangata Raj choloitole te dadle ani bailo, Juanva bhaxen mogall ani kallji gheupi mhunn zannam zal’lean ami kitlim khuxal zatat!—1 Juanv 2:27.

¹⁷ Ami bhasabhas kel’le sol’le apnnaum-ia. Ami sodam sota pormonnem cholot ravum-ia ani ami kortat tea soglea kamamnim Jehovachem Utor pallum-ia. Tachea Utracho obheas korat ani tacher tumcho bhavarth dovrat. Jezucher tumcho ghott bhavarth vaddoiat. Munxanchi zannvai, ani dhorm broxtt korpeanchi xikounn nakarat. Vaitt kamam kortana, Jehovachi seva korchem ddhong korinakat. Ani tumkam vaitt vatten cholonk urba ditat tosleanchem aikonakat. Jehovachea unch noitik dorjeam pormonnem jieiat. Bhav-bhoinnam amkam dukhoitat tednam tankam bhogsum-ia, ani gorjevontank adar dium-ia. Hea toren, sotant ghott ravonk ami tankam modot kortolim. Ani oxem kortat tednam amkam kosleo-i oddchonneo ieum, ami sota pormonnem cholot ravonk pavtolim.