1. 3 Juan 3, 4 tä niere erere, ¿dre tä kä mike juto nibätä?

APÓSTOL JUAN nitre dimikani kukwe metre mike gare jai. Nitre ye nämäne näin jankunu kukwe metre jiebiti kukwe nuani kwe ngwane ye käi namani jutobätä. Juan nämäne nitre kristiano ye mike tuin jai ngäbriänkätre kwe erere. Niaratre nämäne ja tuin kukwe keta kabre ben yebätä apóstol Juan ja di ngwani tödeka kwetre mike dite. Monsotre nikwe aune nitre dimikata nikwe ja üairebiti ye tä ja denkä mento Jehová kräke aune tä jankunu Jehová mike täte ye käita nemen juto nibätä arato (ñäkädre 3 Juan 3, 4 yebätä). *

2. ¿Drekäre Juankwe tärä ketamä tikani?

² Juan nämäne ngite Patmos namaninta kwäre ye bitikäre nikani nüne Éfeso o känime juta ye bäre kä 98 yete raba ruin nie. Ye ngwane üai deme Jehovakwe töi mikani tärä chi ketamä ye tike. Kukwe ye tikani kwe ne kwe nitre kristiano ja ngwanka metre tödekadre jankunu Jesubiti aune nändre jankunu kwetre kukwe metre yebiti.

3. ¿Kukwe ngwantarita meden nibike mike gare jai?

³ Juan aibe namanina apóstol erere kä ye näire. Dirikätre ngwarbe nämäne nitre kwati töi kwite yebätä niara nämäne konkrekasion töibikaire (1 Juan 2:18, 19, 26). * Nitre ye ja mikaka kukwe metre rüere, nämänentre Ngöbö mike täte nie nämäne  kwetre akwa ñaka nämäne Jehová kukwei mike ütiäte jai. Juankwe mäträbare yebätä nibike ja tötike aune nibike kukwe ngwantarita ne mike gare jai: ¿Nändre kukwe metre yebiti ye nuaindre ño? ¿Dre ñaka raba ni tuenmetre näin jiebiti? ¿Ni raba ja dimike ño kwärikwäri nänkäre jankunu kukwe metre jiebiti?

4. 1 Juan 2:3-6 aune 2 Juan 4, 6 tä niere erere, ¿nikwe dre nuaindre nänkäre kukwe metre yebiti?

⁴ Ni tädre näin kukwe metrebiti yekäre, käne nikwe kukwe metre tä Bibliabätä ye mikadre gare jai. Ne madakäre Jehovakwe “kukwe biani nuendre nie” ye ni rabadre mike täte (ñäkädre 1 Juan 2:3-6; 2 Juan 4, 6 yebätä). Jehová kukwei mikadre ño täte ye Jesukwe bämikani kwin ni käne. Yebätä ni törbadre Jehová kukwei mike täte kwin ngwane, nikwe ja di ngwandre nuainne Jesús erere (Juan 8:29; 1 Ped. 2:21).

5. ¿Dre tädre gare metre nie?

⁵ Kukwe mada tä nuaindre nie nänkäre jankunu kukwe metre yebiti. Ye abokän Jehová ye Ngöbö metre rabadre era ni kräke, kukwe nieta kwe nie Bibliabätä ye metre rabadre tuin nie aune Jesús ye Mesías käbämikani ye tädre gare metre nie. Jesús dianinkä gobrankäre Gobran Ngöbökwe yete ye nitre kwati ñaka tä mike era jai. “Ni kwati tä näin kwäräkwärä ni ngökakäre” niebare Juankwe. Nire ñaka tä kukwe metre Jehovabätä aune Jesubätä mike erametre jai ye raba nemen nuäre ngökadre (2 Juan 7-11). Juankwe tikani: “Jesu abko Ni Dianinkä ñakare Ngöbökwe, ye nire nire tä niere, ni ye abko ni ngökaka” (1 Juan 2:22). Ni ñan tö ja ngökamana ngwane nikwe ja tötikadre Bibliabätä. Ye aibe köböire Jehová aune Jesús rabai gare nie (Juan 17:3, TNM). Aune kukwe metre tä nikwe rabai gare metre nie.

6. ¿Monsotre kristiano tä ja tuin kukwe medenbe?

⁶ Ni kristiano jökrä rabadre ja kriemike ni kä nebätä tä dre driere yebätä ne kwe ñaka ni ngökadre (1 Juan 2:26). Akwa monsotre kristiano ye bäri rabadre ja kriemike kukwe yebätä. Alexia * käi Francia kä 25 biti tä niere: “Kwelate jondron jatani nikwite jatäri aune kukwe mada drieta ni kä nebätäkwe ye drieba tie. Ye köböite kukwe metre ye ñan jataba tuin era tie. Aune ruäre ngwane kukwe kwelate nämä  tuin kwin tie. Akwa ti nütüba, ti ñaka raba kukwe metre ye käikwitekä jabiti aune kukwe mada mike täte”. Alexia ja tötikani tärä La vida... ¿cómo se presentó aquí? ¿Por evolución, o por creación? yebätä. Bämän nikani ruäre ta yete ñan namanina töbike jene kukwe metre yebätä. Alexia tä niere: “Kukwe Bibliabätä ye metre tikwe mikaba nüke gare kwin jai. Tikwe kukwe metre mikai ütiäte jai ngwane kä rabai juto tibätä aune tikwe nünain jäme”.

7. ¿Nikwe ñaka dre nuaindre aune ñobätä?

⁷ Nitre kristiano umbre aune bati ñaka rabadre ja bämike jerekäbe. Ni ñaka raba näin kukwe metre yebiti aune bengwairebe kukwe kämekäme nuainne niebare Juankwe (1 Juan 1:6). Jehovakwe ni kadre ngäbiti nengwane aune ja känenkäre yekäre, nita ja ngwen ño ye ni jökrä tä mike ñärärä ye erere nikwe ja ngwandre. Ni ñaka jire iti raba ja mike ngite gore ñobätä ñan aune jondron jökrä tuin mrebe Jehovai (Heb. 4:13).

8. ¿Dre abokän ñaka kadre ngäbiti nikwe?

⁸ Nitre kä nebätä tä ja mika ngite mike tuin ño jai ye erere nikwe ñaka mikadre tuin jai aune nikwe ñaka kadre ngäbiti. Apóstol Juan käkwe tikani: “Ni ja mike ngite ñakare Ngöbö rüere nikwe niedre ne ngwane, nita ja ngökö au amne nita ñäke ngwarbe” (1 Juan 1:8). Nitre nämäne ja mike kukwe metre rüere Juan näire ye nämäne niere, ni raba ja mike ngite nierare aune Ngöbö mike täte jankunu. Ye erere nitre kwati töita kä nengwane, tätre Ngöbö mike täte nieta kwetre akwa Ngöbö töita ño ja mika ngite yebätä ye erere ñaka tätre töbike. Ñodre, ja mika gure ngwarbe ye käme Ngöbö kräke, akwa ye kukwe nikwe aune ni raba ja ngwen kore nitre tä niere.

9. ¿Monsotre bati tä kukwe Bibliabätä mike täte ye ñobätä kwin krubäte?

⁹ Monsotre bati kristiano ye nuateta bäri ja ngwankäre monsotre nänkä kwelate aune sribi muko kwetre tä ja mike gure ngwarbe ye erere.  Ni testiko kädekata Aleksandar käkwe ja tuani kukwe ye erere ben. Niara tä niere: “Meritre ruäre nämä ti töi mike krubäte nemen bentre. Ti kukwei muko ñan nämä yebätä ti nämä bike merire nie nämä kwetre tie”. Monso bati, mätä tuin kukwe ne erere ben raba ruin nuen. Ye erere ngwane, mäkwe ne ngwan törö jai: Kukwe Bibliabätä tuin metre mäi ye ererebätä mätä nüne ngwane, mä ye ütiäte, mätä ja kriemike bren yebätä, ja ñan rabai ruin ngite mäi aune mäkwe ja keta Jehovabe ye kriemikai. Aune bati bobu mäkwe kä ngwain nüke jai ngwane, rabai bäri nuäre mä kräke kukwe kwin ye nuainne. Ni nemen jabe yebätä nitre töita ño ye Satana tä driere ietre mäkwe ngwan törö jai. Mä ñaka tä kukwe mike tuin jai nitre kä nebätä erere ngwane mätä Satana ngututu ye ganainne kwäräbe (1 Juan 2:14).

10. ¿Kukwe nieta 1 Juan 1:9 ye raba ni dimike ño Ngöbö mike täte töi jämebiti?

¹⁰ Kukwe käme raba ni mike ja mike ngite ye Jehová raba mike gare ye gare nie aune nita ja di ngwen ñaka nuainne. Akwa nita ja mike ngite ngwane nita kukwe ye mike gare Jehovai (ñäkädre 1 Juan 1:9 yebätä). Aune nita ja mike ngite krubäte ngwane nita nitre umbre ji ngwanka känene ja dimikakäre ñobätä ñan aune Jehovakwe niaratre kädekani ni ngübakäre (Sant. 5:14-16). Akwa ni ja mikani ngite mekera yebätä ja täbe ruin ngite nie ye nikwe ñaka tuanemetre ja ngwen di nekä. ¿Ñobätä? Ñobätä ñan aune ni Rün ni tarekä käkwe Monso kwe biani murie ketadre ni ngite ütiäre. Ni ja mikaka ngite ye tä ja töi kwite ngwane Jehovakwe ngite juain tabiti nieta kwe. Yebätä ni raba niara mike täte töi jämebiti (1 Juan 2:1, 2, 12; 3:19, 20).

11. ¿Nikwe dre nuaindre tödeka nikwe kriemikakäre nitre ja mikaka kukwe metre rüere yebätä?

¹¹ Nitre ja mikaka kukwe metre rüere tä dre driere ye nikwe ñaka kadre ngäbiti arato. Konkrekasion kristiana ükaninte kena nükebe  nengwane Diablu tä nitre kwati yebiti kukwe ngwarbe nökö ni kristiano metre ye töite. Yebätä kukwe meden metre aune kukwe meden ngwarbe ye tädre gare kwin nie. * Nitre ja mikaka ni rüere ye raba Internet aune redes sociales yebiti ni töi mike ñaka tö ngwen Jehovai aune ñaka ja mräkätre tarere. Kukwe ngwarbe nieta ye mäkwe ñaka mika era jai, ye kite Satanakri (1 Juan 4:1, 6; Apoc. 12:9).

12. ¿Ñobätä nikwe tödekadre bäri kukwe metre niena gare nie yebätä?

¹² Satana ñaka tödeka nikwe ngwandre di nekä yekäre nikwe tö ngwandre bäri Jesús ie aune niara tä Ngöbö töi mike nemen bare ño yei. Arato ni klabore ie tö ngwan raba bätä töbätä ye aibe Ngöbökwe kädekani juta kwe jie ngwankäre ie nikwe tö ngwandre (Mat. 24:45-47, TNM). Käre nikwe ja tötikai Bibliabätä ngwane nikwe tö ngwain bäri kukwe ye jökrä ie. Tödeka nikwe rabai kri ngätri mente nguse ye kwrere. Pablokwe kukwe tikani konkrekasion Colosas ie ngwane bäsi kukwe ye kwrere niebare kwe. “Munkwe Jesukristo kani ngäbti ño ja Dänkiene, ye kwrere munkwe nüna janknu ketetibe ben. Amne kri ngätri tä niken mente dobote nguse käta kri mike dite, ye kwrere munkwe ja töi mika kwatibe Kristobtä. Erere arato, ju mikata angwane, ürä nökata mente nguse abko kwe juta nebe dite, ye kwrere munkwe nüna ketetibe Kristobe tödekakäre kwatibe niarabti” (Col. 2:6, 7). Nikwe tödekai ye erere ngwane, Satana o nitre gobrainta kwe ye ñaka ni juain tibien jire (2 Juan 8, 9).

13. ¿Dre gare ni kristiano ie aune ñobätä?

¹³ Nitre brukwä rabai ni kräke ye gare nie (1 Juan 3:13). Aune “ni kä jökräbti temen tä nüne Ngöbö rüere abko tä Satana ngututu ngoto täni” ye Juankwe ngwani törö nie (1 Juan 5:19). Kä gobrainta Satanakwe bikera krüte yebätä niarata bäri rubun krubäte (Apoc. 12:12). Satana tä ni nuinte ja mika gure ngwarbe aune nitre kukwe ngwarbe niekä yebiti. Akwa niara ñaka tä kö okwä ye aibebiti ni nuinte, ñakare aune tä näin kisere ni jiebiti ni ngwankäre ja tare nike. Kä nebera braibe niara käne yebätä tö bäri kukwe drie ye ketebätä aune tödeka nikwe ye juen ngwarbe. Aisete ñobätä juta ruäre känti sribi Ngöbökwe ye ñäkäita ye gare nie. Akwa yebiti ta ja mräkätre juta yekänti tä kä ngwen nüke jai. Yebiti tätre bämike ni raba ja ngwen metre Jehovai Diablukwe dre nuaindre yebiti ta.

14. ¿Ni raba dre nuainne ja mräkätre dimikakäre näin jankunu kukwe metre yebiti?

¹⁴ Nikwe ja mräkätre mikai tuin bobre jai ngwane nikwe dimikai näin jankunu kukwe metrebiti (1 Juan 3:10, 11, 16-18). Kä kwin näire aune kukwe tare näire nikwe ja taredre kwärikwäri. Ñodre, ¿ni raba ja mräkä töi mike jäme aune dimike kukwe madabätä mräkä krütani kän yebätä? ¿O ni raba ja mräkätre dimike Ju Ja Ükarakrö aune ju jeñe kwetre ye ükete kukwe tare nakaninkä yebätä? Ja mräkätre tarere nikwe ngwane, nikwe bämikai metre ietre aune ñaka kukweibiti aibe.

15. 1 Juan 4:7, 8 tä niere erere, ¿nikwe dre nuaindre?

¹⁵ Nita ja tarere kwärikwäri ngwane nita ja ngwen ni Rün kä kwinbiti erere (ñäkädre 1 Juan 4:7, 8 yebätä). Nikwe ngite juandre ta ni madabiti ye ütiäte krubäte ja tare bämikakäre kwärikwäri. Ñodre, ni iti kukwe tare niedre nie o nuaindre nibätä ngwane ni ye tare nikwe yebätä nikwe ngite juain tabiti aune nikwe kukwe ye käi kwitaikä jabiti (Col. 3:13). Ja mräkä kä Aldo yebätä dre namani bare ye ani mike gare jai. Aldo nämäne ja mräkä iti mike ütiäte  jai. Bati ja mräkä ye ñäkäbare tare nitre nünanka Aldo käite tä nüne ño yebätä. Kukwe ye matani tare Aldobätä. Niara tä niere: “Ti ñan okwä rabadre jabätä ja mräkä yebe ye tikwe ribeba bati bobu Jehovai”. Akwa kukwe mada nuainbare kwe. Ja mräkä ye nübaibare kwe kukwe driere jabe aune ja nämäne ruin ño ie ye niebare kwe ie. Aldo tä niere: “Ñobätä kukwe matani tare tibätä ye rükaba gare ie ngwane, tikwe ngite juandre tabiti nieba kwe tie. Ja kukwei mikaba ño kwe yebätä ja rababa ruin ngite ie rükaba gare tie. Nunkwe kukwe ükateba jabe aune nunkwe kukwe ye käi kwitakaba jabiti”.

16, 17. ¿Nikwe ja töi mikadre kwatibe dre nuainne?

¹⁶ Apóstol Juan nämäne ja mräkätre tarere krubäte aune tö nämäne tuai kwin ja üairebiti. Yebätä tärä ketamä tikani kwe Ngöbö üai deme köböire mäträkäre bätätre. Juan erere, ja mräkätre näin kä kwinbiti gobrankäre Kristobe ye töita nibätä ye käi juto krubäte nibätä (1 Juan 2:27).

¹⁷ Kukwebätä nikwe ja tötiri ye nikwe ja di ngwandre mike täte. Ani ja töi mike kwatibe näin jankunu kukwe metre yebiti, ye abokän nikwe Jehová mikadre täte kukwe jökräbätä. Nikwe ja tötikadre Bibliabätä aune tö ngwandre kukwe yei. Nikwe tödekadre bäri Jesús ie. Nitre kä nebätä tä kukwe driere aune nitre ja mikaka kukwe metre rüere tä kukwe ngwarbe niere ye nikwe ñaka kadre ngäbiti. Nikwe ñaka ja bämikadre jerekäbe aune ni nuateta ngwane, nikwe ñaka ja tuenmetre ganainne. Jehovakwe kukwe ükaninte yebiti nikwe ja jie ngwandre. Nikwe ngite juandre ta ja mräkätre tä kukwe nuainne nibätä yebiti aune nire tä ja di ribere ye nikwe dimikadre. Kukwe meden meden ben nikwe ja tuadre akwa nikwe ja di ngwandre näin jankunu kukwe metre yebiti.