1. Nk’oku olwandiko lwa 3 Yohana 3, 4 luderhere, bichi binarhulerhera obusime?

WAKAWAZA busime bungana gurhe entumwa Yowane yaligwerhe amango yayunvaga oku balala arhabalaga kumenya obukweri baligenderere kukolera Yehova oku bwimana? Balihurene bibazo binene, na Yowane alichihanganire kukomeza obwemere bw’abola Bakristu bimana aliri abona nka bana bage b’ekiroho. Konakuguma, rhunayunva rhusimire bwenene amango omwana werhu, rhube rhwamuburhaga changwa w’ekiroho, amahana akalamo kage emwa Yehova n’okugenderera kumukolera.​—Osome 3 Yohana 3, 4.

2. Guhe gwaliri muhigo gw’amaruba Yowane ayandikaga?

² Omu mwaka gwa 98 N.K.Y., bibonekene oku Yowane alilamire omu Efeso changwa hofi naho. Nkabaga ahamiraga yo oku anamala kushwekulwa omu pirizo oku chizimba che Patmose. Mu ezola siku, eroho lichesibwa lya Yehova lyamurhabala ayandike maruba masharhu. Omuhigo gw’amola maruba gwaliri g’okurhabala Abakristu bimana bachunge obwemere bwabo mu Yesu n’okugenderera kulambagira omu bukweri.

3. Bibazo bihe rhwashubiza ko?

³ Yowane yewaliri ntumwa y’obuzinda, analiri agayiswa n’amashumi mabi enyigirizo z’obubeshi zaliri zalerha omu bibaga. * (1 Yo. 2: 18, 19, 26) Ebyola bigamba by’obwemere byaliri byachivuga oku bimenyere Mungu, aliko birhaliri byakenga amarhegeko ma Yehova. Leka rhulole amahano menja Yowane alihanire. Okurhuli rhwamaganira ko, rhwashubiza kw’ebila bibazo: Okulambagira omu bukweri k’okuderha gurhe? Bibazo bihe rhuli rhwahurana nabyo? Na gurhe rhwakarhabalana buli muguma n’owindi kugenderera omu bukweri?

4. Nk’oku olwandiko lwa 1 Yohana 2:3-6 n’olwa 2 Yohana 4, 6 luderhere, bichi bihemere rhujirage yi rhugala kulambagira omu bukweri?

⁴ Yi rhugala kulambagira omu bukweri, bihemere rhumenye okuli kwe Chinwa cha Mungu, Ebiblia. Oku bwindi, rhukwanene “kulolereza amarhegeko ma [Yehova],” kweri, bihemere rhumakenge. (Osome 1 Yohana 2:3-6; 2 Yohana 4, 6.) Yesu alilekere olwiganyo lwinja l’okukenga amarhegeko ma Yehova. Che chirhumire njira nguma y’akamaro y’okukenga amarhegeko ma Yehova, kuli kukulikira bwinja-bwinja olwiganyo lwa Yesu nk’oku bigalikene.—Yoh. 8:29; 1 Pe. 2:21.

5. Bichi rhukwanene kuchizera?

⁵ Yi rhugenderera kulambagira omu bukweri, rhukwanene kuchizera oku Yehova ye Mungu w’obukweri, oku byoshi aderhubwirire omu Biblia, buli bukweri. Bishubire kuhema rhuchizere oku Yesu ye Masiya walaganywaga. Bantu banene zene barhayemerere bwinja oku Yesu ashigirwe amavurha nka Mwami w’Obwami bwa Mungu. Yowane alikengusuze oku haliri “bantu banene b’okurhebekana,” bakashumikire balala barhalivire bayemera bwinja obukweri eju ya Yehova na Yesu. (2 Yo. 7-11) Yowane ali yandikire ntya: “Inde oli mubeshi, arhali olala oli ahakana oku Yesu ye Kristu?” (1 Yo. 2:22) Chintu chiguma chakarhurhabala yi rhurhabekwa, kuli kuyiga Echinwa cha Mungu. Nka rhujirire ntyo, rhwanamenya Yehova na Yesu. (Yoh. 17:3) N’eyola ye njira nguma yakarhuyemeza oku rhuli omu bukweri.

6. Chibazo chihe Abakristu bachili misole bali bahurana nacho?

⁶ Abakristu boshi bakwanene kuchilanga barhashumikwa n’efilozofi z’abantu. (1 Yo. 2:26) Ahanene Abakristu bachili misole bakwanene kuchilanga n’ogola murhego. Alexia, * mwali-werhu w’omu Franse wa myaka 25, aderhere ntya: “Omu myaka yagerere, nalirinashumikwa n’amawazo m’egulu, nk’enyigizo y’empindamuko n’efilozofi z’abantu. Haligerere akasanzi nasimiswa n’ezola nyigirizo. Aliko nawaza oku ntalikwanene kuyunviriza enyigirizo z’oku masomo n’okufunda kuyunviriza ebi Yehova aderhere.” Alexia asoma echitabu; La Vie​—Comment est-elle apparue? Evolution ou Création? Enyuma wa maboso mageke, engangane zage zahwanza kuhwa. Alexia aderhere ntya: “Nachiyemeza oku ebi Ebiblia ederhere  buli bukweri. Nanashuba kubona ok’okulama nk’oku amarhegeko mayo maderhere, kwakanderhera obusime n’omurhula.”

7. Bichi rhukwanene kuchilanga kuwaza, na bulagurhe?

⁷ Abakristu boshi, emisole n’abakulu, bakwanene kuchilanga barhawaza oku byakagalikana bakolere Yehova eyi banali bajira amaligo. Yowane alikengusize oku rhurhakaba yirhwalambagira omu bukweri, eyi na mw’akola kasanzi yirhwajira ebiro bibi omu kalamo. (1 Yo. 1:6) Akaba rhulonzeze Mungu arhuyemere zene n’omu siku zayinja, rhukwanene kumenya oku Yehova ali abona buli choshi rhuli rhwakola. Oku bwindi, nta chintu choshi-choshi chakaba siri omu chaha bulala buli choshi rhukola chili butambara emwa Yehova.​—Ebr. 4:13.

8. Bichi rhukwanene kukabulira?

⁸ Bihemere rhukabulire amawazo m’egulu oku bilolere echaha. Entumwa Yowane yaliyandikire ntya: “Nka rhuchibwirire oku, ‘Nta chaha rhugwerhe,’ eyi rhuli rhwachirhebeka rhwenyine.” (1 Yo. 1:8) Omu siku za Yowane, ebigamba by’obwemere byaliri byayemeza oku byakagalikene omuntu agenderere kukola ebyaha, anayorhe eyi anali mwira wa Mungu. Zene, rhulamire ahakagarhi k’abantu bagwerhe amawazo mali nk’amola. Bantu banene banachivuga oku bagwerhe obwemere mu Mungu, aliko barhayemerere amawazo mage oku bilolere echaha, ahanene oku biyekerere obubaraga. Ebi Yehova anabona nka bijiro bibihire, bi bowe bayirika bijiro bilolere omuntu yewe yenyine changwa kalamo k’akahunda.

9. Bulagurhe kuli kwinja nk’abachili misole bamenyere bwinja oku ebi Ebiblia ederhere b’obukweri?

⁹ Byakaba bikomerere bwenene Abakristu bachili misole okugenderera kugwarha amawazo makwirire oku bilolere obubaraga, amango abantu banakola nabo changwa ababo banafunzi barhayemerere ebi Ebiblia ederhere eju y’echola chijiro. By’ebyahikira Aleksandar. Ashambere ntya: “Banyere baguma oku masomo baliri bapima kunshumika ndale nabo. Baliri  bambwira akaba nta mwira-kazi ingwerhe, k’okuderha oku inambaraga n’aberhu barhabana.” Akaba oli wahurana n’echigeregezo chili nk’echola, oyibuke oku nk’oyemerere oku ebi Ebiblia ederhere by’eby’obukweri, wachikengesa wenyine, wachunga amagala mawe, okuntu wakaba oli wachiyunva, n’obwira bwawe haguma na Yehova. N’amango moshi oli wahima amashumi, byaba bikuyanguhire kukola ebikwanene. Oshube oyibuke oku amola mawazo m’egulu mahumire oku bilolere obubaraga, marhengerere emwa Shetani. Che chirhumire, amango oli walahira kushumikwa n’elila gulu, eyi ‘oli wahima olala mubi.’​—1 Yo. 2:14.

10. Nka gurhe olwandiko lwa 1 Yohana 1:9 lurhurhabere kukolera Yehova n’ezamiri echere?

¹⁰ Rhumenyere bwinja oku Yehova yekwanene kuderha echikwanene chibe chaha. Rhunajira n’okurhugalire koshi yi rhurhajira echaha. Aliko amango rhwamachijira, rhunahungama amagosa merhu emwa Yehova omu sala. (Osome 1 Yohana 1:9.) Na nka rhwamajira echaha chikomere, rhunalonza oburhabale bw’abashamuka Yehova ashimikire yi barhulaga ko. (Yak. 5:14-16) Bobunola, rhurhakwanene kugenderera kuwaza eju y’amagosa merhu ma mira. Bulagurhe ntyo? Bulala Darha w’obuzigire ahanire enterekero y’enchungu y’Omugala, na ntyo ebyaha byerhu byakababalirwa. Eyi Yehova aderha oku ababalira abanya-byaha bahungamire, arhakachishubanganya. Che chirhumire, ntacho choshi-choshi chakarhubuza kukolera Yehova n’ezamiri echere.​—1 Yo. 2:1, 2, 12; 3:19, 20.

11. Gurhe rhwakayasa obwenge bwerhu n’enyigirizo zakanosya obwemere bwerhu?

¹¹ Rhukwanene kuchiyasa enyigirizo z’ebigamba by’obwemere. Kurhenga oku murhangiro gw’echibaga ch’Echikristu, Ibilisi aligenderere kukolesa babeshi banene babyale engangane omu bwenge bw’abakozi bimana ba Mungu. Che chirhumire, bihemere rhumenye gurhe rhwakachirhegereza etofauti ahakagarhi  k’echinja n’echibi. * Abashombanyi berhu bakakolesa Enternete changwa obuhanga b’okubwirana oku myazi oku Enternete yi banosya obulangalire bwerhu mu Yehova n’obuzire bwerhu ku bene-berhu. Oyibuke omuntu oyimangire ebyola byoshi, onachilange nabyo!​—1 Yo. 4:1, 6; Ufu. 12:9.

12. Bulagurhe rhukwanene kukuza obwizere bwerhu oku bukweri rhwayigire?

¹² Yi rhuhima amashumi ma Shetani, bihemere rhukuze obulangalire bwerhu mu Yesu n’omu ch’amalire omu mupango gwa Mungu. Bishubire kuhema rhulangalire njira nguma yonyine Yehova ali akolesa zene omu kuyerekeza akasi kage. (Mt. 24:45-47) Rhunakuza obulangalire bwerhu, omu kuyiga Echinwa cha Mungu oku kahunda. Ahola obwemere bwerhu bwaba kuguma n’omurhi guherhe emizi echimire bwenene omu budaka. Paulo alikoleseze omufano guli nk’ogola amango ayandikiraga echibaga che Kolosai. Aderhere ntya: “Nk’oku mwayemerere Kristu Yesu Waliha, mugenderere kulambagira omu buguma naye, muherhe emizi n’okuyumbakwa mu yewe munaserere omu bwemere.” (Kol. 2:6, 7) Ntacho choshi-choshi Shetani akajire changwa chirhumirwe naye chakayumanza Omukristu okomeze obwemere bwage.​—2 Yo. 8, 9.

13. Bichi rhukwanene kuyorha rhumeneyere, na bulagurhe?

¹³ Rhukwanene rhuyorhe rhumenyere oku egulu lyarhuhidika. (1 Yo. 3:13) Yowane alirhukengusize oku “Egulu lyoshi lili omu burhegesi b’olala mubi.” (1 Yo. 5:19) Oku elila gulu lili lyahikira obuzinda, ku Shetani naye ali agenderera kukaliha bwenene. (Ufu. 12:12) Ali akolesa njira zinene z’okurhujira buligo, nk’okurhuyerekeza omu bijiro bibi changwa obubeshi bw’ebigamba by’obwemere. Ali ashuba kurhurhera aho han’aho. Shetani amenyere oku asigalene kasanzi kageke k’okupima kuyumanza akasi kerhu k’okuhubiri changwa oku nosya obwemere bwerhu. Birhasomeze okubona akasi kerhu kali kayumanzwa changwa kalahizwa mu bihugo binene. Chiro akaba ntyo, bene-berhu na bali-berhu balamire mw’ebyola bihugo bali bagenderera kulembera. Bali bagenderera kuyerekana oku chiro omubi ajira gurhe y’arhulibuza, rhwakagenderera kuba bimana!

14. Njira nguma ehe rhwakarhabala mu bene-berhu na bali-berhu bagenderere omu bukweri?

¹⁴ Rhukwanene kuyereka bene-berhu na bali-berhu olukogo yi rhubarhabala bagenderere omu bukweri. (1 Yo. 3:10, 11, 16-18) Bihemere rhuzigirane buli muguma n’owindi, arhali mpu omu mango m’obusime monyine, s’ahubwe n’omu kasanzi k’ebibazo. Omufano, hali omuntu omenyere wafisize omuzigirwa wage, onakenere kuhebwa omurhima n’oburhabale omu njira ebonekene si? Changwa si, wayunvirhe oku hali aberhu bakristu bali balibuka eju y’echinjira chabahikire banakenere oburhale b’okushuba kuyumbakirwa Echumbi lyabo ly’Obwami changwa enju zabo? Rhunayerekana kangana gurhe rhuzigire n’okugwarha olukogo ku bene-berhu na bali-berhu, arhali mpu kugerera ebinwa byerhu byonyine, si ahubwe ech’akamaro bwenene, kuli kugerera ebijiro byerhu.

15. Nk’oku biyerekenwe omu 1 Yohana 4:7, 8, bichi bihemere rhujirage?

¹⁵ Rhunayiganya Darha muzigirwa w’embingu amango rhwamayereka abandi obuzigire. (Osome 1 Yohana 4:7, 8.) Enjira nguma rhwakayerekana m’obuzigire, kuli kubabalirana buli muguma n’owindi. Omufano, hali ok’omuntu akarhugayisa, aliko anahema obubabale. Rhwakamuyereka obuzigire omu kumubabalira n’okuyibagire amabi arhujirire. (Kol. 3:13) Mwene-werhu oyirikirwe Aldo alihurene n’echola chibazo amango ayunvaga mwene-werhu  akengere aderha ebinwa by’okudukanga obuko bwage. Aldo aderhere ntya: “Nayurukira nasalira Yehova antabale y’intagwarha amawazo mabi eju y’oyola mwene-werhu.” Aliko hali echindi chintu Aldo alijirire. Ahigirira kubwira mwene-werhu baje oku mahubiri bombi. Oku bali bahubiri haguma, Aldo afasiriya mwene-werhu gurhe alichiyunvire kubi eju y’eby’aderhaga. Aderhere ntya: “Mwene-werhu anayunvirhe gurhe nalichiyunvirhe eju y’eby’aderhaga, ayurukira ahema obonjo. Omulenge aderhaga mo, gwanyereka kangana gurhe ababere n’eby’aderhaga. Rhwagalula obwira n’okumaliriza echibazo.”

16-17. Bichi rhukwanene rhuhigirire kukola?

¹⁶ Entumwa Yowane yalizigire bene-babo bwenene, yanaliyunvirhe elagirire oborhere bwabo bw’ekiroho. Obuzigire n’akababaro kage byalibonekene wazi omu mahano ali hebere mu maruba masharhu ayandikaga maliyerekezwe n’eroho lichesibwa. Bihebere omurhima bwenene okumenya gurhe abalume n’abakazi bali nkaye, bashigirwe amavurha yi baba babo barhegesi haguma na Kristu!​—1 Yo. 2:27.

¹⁷ Rhuyorhe rhuyibukire amahano rhwaganirire. Rhuhigirirage kulambagira omu bukweri, kukenga Yehova omu njira zoshi z’akalamo kerhu. Oyige Echinwa chage, n’okuchilangalira. Okuze obwemere bukomere muli Yesu. Olekane n’efilozofi z’abantu n’enyigirizo z’ebigamba by’obwemere. Ohime akahidiko k’okuwaza oku byakagalikana obere mwira wa Yehova ey’onali wajira ebyaha. Olame nk’oku amarhegeko ma Yehova maderhere. Kandi, leka rhurhabale bene-berhu bayorhe eyi bagwerhe emisi omu kubabalira balala barhugayisize n’okurhabala abakenere oburhabale. Ahola, chiro rhwahurana n’ebibazo bili gurhe, rhwagenderera kulambagira omu bukweri.