MAGIGIAMMU NGA ARTIKULO 30
Tulu-tuloy nga Mattolay Segun ta Kinakurug
“Awan ngana tu mas paga nga makapagayaya niakan nu ari i pakadumug ku tu mattolay i ána ku ira segun ta kurug.”—3 JUAN 4.
KANSION 54 “Yaw i Dalan”
SUMARIO *
1. Segun ta 3 Juan 3, 4, anni i mamagayayya nittam?
MAIMAJIMMU kari i ayayya ni apostol Juan turi ta naginnana nga tulu-tuloy nga sigga-matalo nga masserbi kani Jehova danuri noffunanna nga makannammuadda i kinakurug? Neparubang ira ta aru nga problema anna nappursigi si Juan tapenu mapaladdana i pangurug danatun nga matalo nga Cristiano nga nibilanna nga espiritual nga ánana. Kunnatun gapa, magayayya ittam nu i mismu nga ána tam onu i espiritual nga ána tam ay idedikada i baggida kani Jehova anna tulu-tuloy ira nga masserbi nisa.—Bibbigan i 3 Juan 3, 4.
2. Anni i gakkag na tura ira ni Juan?
2 Ta 98 C.E., posible nga naddian si Juan ta Efeso onu aranni tatun. Awayyana nga minay yayya tatun kabalinna nga napalawan ta affukutan ta isla na Patmos. Tatun nga tiempo, pinaguyu yayya na masanto nga espiritu ni Jehova tapenu paddayan i tallu nga tura. Gakkag danatun nga tura nga pagaramman i matalo ira nga Cristiano nga pattalupaddianadda i pangurugda kani Jesus anna tulu-tuloy ira nga mattolay segun ta kinakurug.
3. Anni ira nga pakkiavu i tabbagattam?
3 Si Juan i ultimu nga matolay nga apostol anna mavurung yayya ta efekto na appe-mestru ta kongregasion ira. * (1 Juan 2:18, 19, 26) Ikakkagi danatun nga apostata ira nga ammuda i Dios ngem ariadda nga tuttulan i bili-bilinna. Gigiammuattam i nainspiran nga tabarang nga niyawa ni Juan. Durante nga kuattam yatun, tabbagattam i tallu nga pakkiavu: Anni i kayà kagian na pattolay segun ta kinakurug? Anni i mamarriga nittam nga kuan yatun? Anna kunnasi tam moffunan i kataggi-tadday tapenu mattalupaddian ta kinakurug?
ANNI I KAYÀ KAGIAN NA PATTOLAY SEGUN TA KINAKURUG?
4. Segun ta 1 Juan 2:3-6 anna 2 Juan 4, 6, anni i mawag nga kuattam tapenu makapattolay segun ta kinakurug?
4 Tapenu makapattolay segun ta kinakurug, mawag nga ammuattam i kinakurug nga malegan ta Uvovug na Dios, i Biblia. Kunnatun gapa, mawag nga ‘parulattattam i bili-bilin’ ni Jehova. (Bibbigan i 1 Juan 2:3-6; 2 Juan 4, 6.) Nipasingan ni Jesus i perfekto nga ehemplo na pamarulo kani Jehova. Yatutta tadday ta importante nga makua tam tapenu parulattan si Jehova ay gukaban na panuttul tam tu mapia ta ehemplo ni Jesus.—Juan 8:29; 1 Ped. 2:21.
5. Ta anni ittam nakuan kumbinsidu?
5 Tapenu makapattolay segun ta kinakurug, kumbinsidu ittam nakuan nga si Jehova i Dios na kinakurug anna kurug i ngamin nga ikakkagina nittam gukaban na Uvovugna, i Biblia. Mawag gapa nga kumbinsidu ittam nga si Jesus i nepromesa nga Mesias. Aru ta kaggawattam i madduda nu si Jesus i sinunno nga Patul na Pappatulan na Dios. Niyabiso ni Juan nga luttuag i ‘napakaru nga minangngilogo’ nga mangiyawawan turi ira ta ari masikan i pangurugda ta kinakurug meyannung kani Jehova anna kani Jesus. (2 Juan 7-11) Nitura ni Juan: “Sinni gafu i massiri-siri? Yaya yuri i makkagi tu si Jesus ay ari tu Cristo.” (1 Juan 2:22) Nu gigiammuattam i Uvovug na Dios, ari ittam melogo. Nu kuattam yatun, makannammuattam si Jehova anna si Jesus. (Juan 17:3) Bilang resulta, kumbinsidu ittam nga egga nittam i kinakurug.
ANNI IRA I MAMARRIGA TA PATTOLETAM SEGUN TA KINAKURUG?
6. Anni i mamarriga ta mabbing ira nga Cristiano ta pattoleda segun ta kinakurug?
6 Mawag nga magimmugug i ngamin nga Cristiano tapenu ari ira nga melogo na pilosopia na tolay. (1 Juan 2:26) Mas ngana nga mawag na mabbing ira nga Cristiano nga magimmugug taw nga silu. Kinagi na 25-anios nga si Alexia * nga taga-France: “Turi ta maggigiammu ngà paga, nagigiammù i meyannung ta ebolusion anna i karuan nga ideya na totolay anna danatun nga ideya i rason nu ngatta nadduda ngà ta kinakurug. Egga ira i tiempo nga nagustuakku danatun nga tuttuddu. Ngem nanono ku nga ari gapa puede nga basta ngana laman nga ginnakku i metuddu ta eskuela tapus ariakku nga iddan si Jehova tu tiansa nga maguvovug.” Ginigiammu ni Alexia i libru nga Life—How Did It Get Here? By Evolution or by Creation? Ta pappasa na piga ligguan, ari ngana yayya nadduda. Kinagina: “Napakurug ku nga kinakurug i egga ta Biblia. Anna nagigiammù nga nu mattolay ngà segun ta estandarte natun, mabbalin ngà tu magayayya anna memammo.”
7. Anni nakuan i mawag nga lillitattam, anna ngatta?
7 Mawag na ngamin nga Cristiano nga lillitan i doble-kara nga pattolay, mabbing man ira onu manakam. Kakkagian ni Juan nga ariattam mapaggiddang i pattolay segun ta kinakurug anna i imoral nga pattolay. (1 Juan 1:6) Nu kayà tam nga faboran ittam na Dios ta maddaggun anna ta mappange, mawag tu kanayuttam nga daddamman nga masingan ni Jehova i ngamin nga kukukuattam. Kayàna kagian natun nga awan tu metagu nga liwa megafu ta masingi-singan ngamin ni Jehova i kukukuattam.—Heb. 4:13.
8. Anni i mawag nga pammanakitattam?
8 Mawag tu pammanakitattam i pagimamma na mundo ta liwa. Nitura ni apostol Juan: “Nu kagiat-tam tu awan tu katagaruliat-tam, ilogo tam i baggi tam.” (1 Juan 1:8) Ta kaggawan ni Juan, kakkagian na apostata ira nga puede lagapa nga makikkofun ta Dios i tadday nga tolay maski nu kuanna i kagian na Dios nga marake. Ta kaggawattam, kunnatun gapa i pagimamma na totolay. Aru i makkagi nga kurugadda i Dios ngem ariadda umanugu ta pagimamma ni Jehova ta liwa, netallugaring nu meyannung ta sex. Egga ira i seksual nga kondukta nga kagian ni Jehova nga marake ngem kakkagian na totolay nga ayus laman danatun nu yatun i kayàda.
Sikamu nga kabataan, pasikannannu i nebase-Biblia nga kombiksionnu ta nu anni i fustu anna nu anni i mali ta moral tapenu medefensanu i pangurugnu (Innan i parapo 9) *
9. Kunnasi nga mabbenefisio i kabataan ira nu itaddaggadda i nebase-Biblia nga kombiksiodda?
9 Awayyana nga matenta i kabataan ira nga Cristiano nga parigan i pagimamma na kaklase onu katrabahuda ta imoral nga kondukta. Kunnatun i nesimmu kani Aleksandar. Kunna: “Pilitannà na karuan nga babbay ta eskuela nga maki-sex. Kagiadda nga homoseksual ngà megafu ta awan tu nobià.” Nu meparubang nikaw i kunnatun nga kapurueba, daddammammu nga nu itaddaggammu i nebase-Biblia nga kombiksiommu, maprotektammu i respetom ta baggim, i gawa-gawayyammu, i emosiommu, anna i relasiommu kani Jehova. Kada pammanakitammu i tentasion, mas mabi para nikaw nga kuan i fustu. Daddammammu gapa nga naggafu kani Satanas i killu nga pagimamma naw nga mundo ta sex. Yatutta nu manaki mu i makikompromiso, ‘mapatulu mu i Demonio.’—1 Juan 2:14.
10. Kunnasi ittam moffunan na 1 Juan 1:9 tapenu marenu i konsensia tam nga masserbi kani Jehova?
10 Anugutattam nga egga i kepangngattan ni Jehova nga kagian nu liwa i tadday nga gannug. Kuattam gapa i adde na mawayya tam tapenu ari nga makaliwa. Ngem nu makaliwa ittam, kagiattam yatun kani Jehova ta pakimallo. (Bibbigan i 1 Juan 1:9.) Anna nu nakaliwa ittam tu madammo, mappoffun ittam ta elder ira nga sinunno ni Jehova tapenu manangngal nittam. (Sant. 5:14-16) Ngem ariattam nakuan nga sobra nga makokkonsensia ta nakaliwatattam ira ta nappasa. Ngatta? Megafu ta niyawa na minaggiddu nga Yama tam i sakrifisio nga tavvu na Anana tapenu mapakoma i liwi-liwa tam. Nu kagian ni Jehova nga pakomanna danuri mabbabawi nga nakaliwa, talakkuruganna yatun. Yatutta awan tu maski anni nga makefugag nittam tapenu makapasserbi kani Jehova nga marenu i konsensia.—1 Juan 2:1, 2, 12; 3:19, 20.
11. Kunnasi tam nga protektan i ginnonopattam ta tuddu ira nga makadaral ta pangurug tam?
11 Mawag tu pammanakitattam i tuttuddu na apostata. Namegafu paga ta kepataddag na Cristiano nga kongregasion, usu-usan ngana na Diablo i aru nga minangngilogo tapenu mangimula tu padduda ta ginnonopan na matalo ira nga aripan na Dios. Yatutta mawag tu ammu tam i nadduman na kinakurug ta kinaladdug. * Awayyana nga usan na kumokkontra nittam i Internet onu i social media tapenu pakkafian i pattalo tam kani Jehova anna i pangaya tam ta wawwaragi tam. Naggafu danatun nga kinaladdug kani Satanas. Ariammu kurugan danatun!—1 Juan 4:1, 6; Nep. 12:9.
12. Ngatta paladdattam nakuan i pangurug tam ta kinakurug ira nga nagigiammu tam?
12 Tapenu malabanattam i pangatake ira ni Satanas, mawag tu padakallattam i pangurug tam kani Jesus anna ta papelna ta gakkag na Dios. Mawag gapa nga mattalo ittam laman ta usu-usan ni Jehova tapenu idirekta i organisasionna ta maddaggun. (Mat. 24:45-47) Mapadakal tam i pangurug tam gukaban na regular nga paggigiammu tu Biblia. Nu kunnatun, megitta i pangurug tam ta kayu nga aralam i nikegamuna ta davvun. Kunnatun gapa i kinagi ni Pablo ta turana ta kongregasion na Colosas. Kinagina: “Megafu ta inalawa nu ngana si Cristo Jesus nga Yafu, mattolay kamu nga mekunnay sa. Megamu anna makimoray kamu sa ta attolay nu. Pasikannan nu i angngurug nu.” (Col. 2:6, 7) Nu mappursigi ittam tapenu pasikannan i pangurug tam, imposible nga mapagimmang ni Satanas onu na taga-suportana ira i pattoletam segun ta kinakurug.—2 Juan 8, 9.
13. Ta anni ittam ari ngana nga makaddag, anna ngatta?
13 Ari ngana ittam makaddagan nga ikalussaw ittam na mundo. (1 Juan 3:13) Iperaddam nittam ni Juan nga “i mundo ay egga ta pammaguray na Demonio.” (1 Juan 5:19) Durante nga umara-aranni i pangultimu naw nga sistema, mas maggrabe i poray ni Satanas. (Nep. 12:12) Mangiyusa yayya tu ari mataga-tageno nga pangatake gitta na imoralidad onu kinaladdug na apostata ira. Fuera paga tatun, mangusa gapa yayya tu direkta nga pangatake gitta na pameppersigi. Ammu ni Satanas nga baddi ngana laman nga tiempo i nabattang nisa tapenu pagimmangan i trabahu tam nga pallayyagayya onu tapenu daralan i pangurug tam. Ariattam ngana gafu makaddag nga egga i restriksion onu pangigamma ta trabahu tam ta karuan ira nga nasion. Maski paga kunnatun, magattattam lagapa i wawwaragi tam tatun ira nga nasion. Yatutta maski anni i kuan ni Satanas ta totolay ni Jehova, makapattalupaddian ittam nga matalo!
MAKKA-UFFU-UFFUN TAPENU MATTALUPADDIAN TA KINAKURUG
14. Anni i tadday nga makua tam tapenu moffunattam i wawwaragi tam nga mattalupaddian ta kinakurug?
14 Tapenu moffunattam i wawwaragi tam nga mattalupaddian ta kinakurug, mawag nga mangipasingan ittam tu pangikallo. (1 Juan 3:10, 11, 16-18) Mawag nga makka-aya-aya ittam ari laman nu makasta i situasion, nu ari, maski gapa nu egga ira i luttuag nga problema. Angngariganna, egga kari i kilalam nga natayan tu iddeddukanna anna magawag tu banna-bannay onu praktikal nga uffun? Onu egga kari i nadumug mu nga kapangngurug ira nga nawawadda i pakkukuada megafu ta kalamidad anna magawag tu uffun tapenu mepataddag uli i Kingdom Hall-da onu i babaleda? Mepasingattam nga ayatan anna ikallo tam i wawwaragi tam ari laman ta kakkagiattam, nu ari, mas ngana ta kukukuattam.
15. Segun ta 1 Juan 4:7, 8, anni i mawag nga kuattam?
15 Maparigattam i minaggiddu nga nelangitan nga Yama tam nu makka-aya-aya ittam. (Bibbigan i 1 Juan 4:7, 8.) Makua tam yatun nu makkapaka-pakoma ittam. Angngariganna, baka egga i nakataki nittam ngem nakkiddaw yayya tu pamakoma. Mepasingattam i aya nu pakomattam yayya anna kattamattam i nakuana nittam. (Col. 3:13) Kunnatun i naekspiriensa ni Aldo turi ta naginnana i tadday nga brother nga irerrespetona nga nakkagi tu makapataki meyannung ta totolay nga kaparehuna tu kultura. Kinagi ni Aldo: “Kanayun ngà nga makimallo kani Jehova tapenu moffunannà nga ari nga mannegatibo tatun nga brother.” Ngem egga paga i kingngua ni Aldo. Nikiddona tatun nga brother nga makkavulu ira nga mallawan. Durante nga makkavulu ira ta pallayyagayya, kinagi ni Aldo nga natakitan yayya ta kinagi na brother. Kunna: “Turi ta nammuan natun nga brother nga natakitan ngà ta kinagina, nakkiddaw yayya tu pamakoma. Anna matageno ku ta tono na bosesna nga kuruga mabbabawi yayya ta nakagina. Kabalin natun, netoli i makasta nga pakkofummi anna kinattamammi ngana i problema.”
16-17. Anni nakuan i determinadu nga kuattam?
16 Kuruga iddukan ni apostol Juan i wawwaragina anna kayàna nga mapeggan ira tu masikan nga pangurug. Manawag nga masingan i aya anna pangikavurunna ta tabarang nga niyawana nira ta tallu nga turana. Anni ngana nga ayayya tam nga mammuan nga minaggiddu anna minangngikavurung gapa kagitta ni Juan danatun nga lallaki anna babbay nga makipammaguray kani Jesus ta langi!—1 Juan 2:27.
17 Ipafutu tam nakuan i tabarang nga nagigiammu tam. Determinadu ittam nakuan nga mattolay segun ta kinakurug gukaban na pamarulo kani Jehova ta ngamin nga kukukuattam. Gigiammuattam i Uvovugna anna mattalo ittam tatun. Pasikannattam i pangurug tam kani Jesus. Pammanakitattam i pilosopia na tolay anna i tuddu ira na apostata. Lillitattam i tentasion nga mattolay tu doble-kara anna magangngua tu liwa. Mattolay ittam segun ta atannang ira nga estandarte ta moral ni Jehova. Anna uffunattam i wawwaragi tam nga mattalupaddian nga masikan gukaban na pamakoma turi ira ta nakataki nittam anna panguffun turi ira ta magawag. Nu kuattam danatun, maski meparubang ittam ta ziga-riga, tulu-tuloy ittam nga makapattolay segun ta kinakurug.
KANSION 49 Pinasasaya ang Puso ni Jehova
^ par. 5 Mattolay ittam ta mundo nga pammagurayan na yama na kinaladdug nga si Satanas. Yatutta mariga para nittam i mattolay segun ta kinakurug. Kunnatun gapa i naekspiriensa na ollu-siglo ira nga Cristiano. Tapenu moffunan ira anna moffunan ittam, ininspiran ni Jehova si apostol Juan nga mamadday tu tallu nga tura. Tatun ira nga tura, magigiammu tam nu anni ira i mamarriga ta nittam nga makapattolay segun ta kinakurug anna nu anni i kuattam tapenu marubang danatun.
^ par. 3 Innan i kahon nga “ Nu Ngatta Pinadday ni Juan i Turana Ira.”
^ par. 6 Natalianan i karuan nga ngagan.
^ par. 11 Innan i magigiammu nga artikulo nga “Fustu Kari i Informasion nga Egga Nikaw?” ta Agosto 2018 nga isyu na Passifusifutan.
^ par. 59 DESKRIPSION NA LETRATU: Ta eskuela, napalevutan i kabataan nga sister tu gannug ira nga mangipasingan nga normal laman i homoseksualidad. (Ta karuan nga kultura, meyusa i kulor na rainbow tapenu isimbolo i homoseksualidad.) Ta baleda, nar-research yayya tapenu mapasikan i pangurugna ta kakkagian ni Jehova nga fustu. Nakoffun yatun nisa tapenu marubang i mariga nga kapurueba.
