1. 3 Yawhan 3, 4 hku nga yang hpa gaw anhte hpe ngwi pyaw shangun ai kun?

KASA Yawhan gaw shi karum ya wa ai ni Yehowa hpe sadi dung let matut nawku nga ai hpe na ai shaloi, grai kabu nga na re. Shanhte hta manghkang ni nga ai. Yawhan gaw shi a wenyi kashu kasha ni hpe makam masham shangang shakang ya na matu shakut wa ai. Anhte a kashu kasha ni (sh) wenyi kashu kasha ni gaw, Yehowa hpang apnawng nna matut nawku dawjau nga ai hpe na lu ai shaloi grai kabu ai.​—3 Yawhan 3, 4 hpe hti u.

2. Yawhan ka ai laika ni a yaw shada lam gaw hpa rai kun?

² A.D. 98 hta Yawhan gaw Ehpesu (sh) dai makau hta nga wa ai rai na re. Patmu zunlawng hta htawng hkrat nna lawt wa ai hpang dai de htawt wa ai. Dai aten ni hta, Yehowa a wenyi gaw laika 3 hpe ka na matu shi hpe shadut ya ai. Laika 3 a yaw shada lam gaw sadi dung ai Hkristan ni Yesu hpe matut kamsham lu hkra, tengman ai tara hta matut hkawm sa lu hkra shadut ya na matu re.

3. Gara ga san ni a mahtai hpe chye lu na kun?

³ Yawhan gaw hpang jahtum asak hkrung wa ai kasa re. Nawku hpung hta shut shai ai sharin achyin lam ni shingkang ka-up nga ai majaw, shi myit tsang nga ai. * (1 Yh 2:18, 19, 26) Makam masham htak mat ai ni gaw Karai hpe chye tim, Yehowa a tsang madang ni hpe n hkan sa ai. Yawhan ka wa ai Chyum hpaji jaw ga ni hpe yu yu ga. Ndai sumhpa hta ndai  ga san 3 a mahtai hpe chye lu na re: Tengman ai lam hta hkawm ai ngu ai lachyum gaw hpa rai kun? Anhte hpa mayak mahkak ni hkrum chye ai kun? Tengman ai lam hta matut nga lu na matu shada da gara hku karum ya lu ai kun?

4. 1 Yawhan 2:3-6 hte 2 Yawhan 4, 6 hku nga yang tengman ai tara hta hkan sa ai lam hta hpa ni lawm ai kun?

⁴ Tengman ai lam hta hkawm lu na matu, Chyum Laika hta lawm ai tengman ai lam hpe chye ra ai. Dai sha n-ga, “[Yehowa] a hkang da ai ga” ni hpe hkan sa ra ai. (1 Yawhan 2:3-6; 2 Yawhan 4, 6 hpe hti u.) Yesu gaw Yehowa hpe madat mara ai hta kaja htum kasi madun wa ai. Yehowa hpe madat mara lu ai lam langai gaw, Yesu a kasi ningli hpe htep lahti hkan sa ai hku nna re.​—Yhn 8:29; 1 Pe 2:21.

5. Anhte hpa hpe kam ra ai kun?

⁵ Tengman ai lam hta matut hkawm lu na matu, Yehowa gaw tengman ai lam a Karai re ai hpe kam ra nna, Chyum Laika hta tsun da ai lam yawng hpe kam ra ai. Yesu gaw ga sadi tawn da ai Meshia re ai hpe mung kam ra ai. Yesu gaw Karai Mungdan a Hkawhkam hku nna aya tang hkrum ai lam masha law law ntsen ma ai. Yehowa hte Yesu hte seng ai tengman lam hpe kamsham ai myit nau n ngang shi ai ni hpe hkalem ai masha ni nga wa na ngu Yawhan sadi jaw da ai. (2 Yh 7-11) Shi ndai hku ka wa ai: “Yesu gaw, Hkristu n rai nga ai, nga nna ndang kau ai wa sha n rai yang gaw, masu ai wa gaw kadai rai nga a ta?” (1 Yh 2:22) Hkalem n hkrum na matu Chyum Laika hkaja ra ai. Rai yang she, Yehowa hte Yesu a lam hpe chye wa na re. (Yhn 17:3) Anhte hta tengman ai tara nga ai hpe mung kam wa na re.

6. Hkristan ramma ni hkrum chye ai mayak mahkak langai gaw hpa rai kun?

⁶ Hkristan yawng gaw, masha a myit mang hpaji hte hkalem n hkrum hkra sadi ra ai. (1 Yh 2:26) Laksan hku nna, Hkristan ramma ni gaw ndai shoihpa hpe sadi ra ai. Pyintit kaw na asak 25 ning re ai nauna Eleksea * ndai hku tsun ai: “Ngai asak naw kaji ai shaloi, sinda masa, masha a myit mang hpaji a majaw, ntsen ai myit nga wa ai. Dai zawn sharin achyin ya ai lam ni hpe myit lawm wa ai. Chyum Laika hta tsun da ai hpe n hkaja ai sha, sara ni tsun ai lam yawng hpe n mai hkap la ai ngu ngai myit wa ai.” Dai majaw, shi gaw Asak Gara Hku Byin Wa Ai Kun? Sinda  Masa Hku Nna Kun? Hpan Da Hkrum Ai Kun? ngu ai laika buk hpe hkaja wa ai. Bat loi mi na ai hpang, ntsen ai myit n nga mat ai. Shi ndai hku tsun ai: “Chyum Laika hta tengman ai lam lawm ai hpe ngai chye mat ai. Chyum Laika tsang madang ni hte maren asak hkrung ai gaw ngwi pyaw lam jaw ai hpe ngai chye wa ai.”

7. Gara lam hpe ninghkap ra ai kun? Hpa majaw kun?

⁷ Hkristan yawng gaw, prat lahkawng hte asak hkrung na matu shadut hkrum ai hpe ninghkap ra ai. Anhte gaw tengman ai tara hta hkawm nga ninglen, n kaja ai prat hkrun lam hte asak n mai hkrung ai lam Yawhan tsun wa ai. (1 Yh 1:6) Ya aten hte htawm hpang hta, Karai a myi man lu mayu yang, anhte galaw ai lam yawng hpe Yehowa mu ai hpe dum ra ai. Anhte ip da ai lam hpe masha gaw n mu lu tim, Yehowa gaw yawng hpe mu ai.​—Heb 4:13.

8. Hpa hpe nyet kau ra ai kun?

⁸ Mara hte seng ai mungkan a mu mada lam hpe anhte nyet kau ra ai. Kasa Yawhan ndai hku ka ai: “Anhte yubak n rawng ga ai, nga nna tsun ga yang gaw, anhte hkum hpe anhte hkalem kau ga ai” re. (1 Yh 1:8) Marai langai gaw mara galaw tim pyi, Karai hte hku hkau lam matut nga lu ai ngu, Yawhan aten na makam masham htak mat ai ni tsun ma ai. Dai ni aten hta mung, dai zawn myit jasat nga ai ni a lapran hta asak hkrung nga ra ai. Karai hpe kam ai masha law law gaw, mara hte seng nna Yehowa a mu mada lam hpe n hkap la ma ai. Laksan hku nna ngang hte seng ai lam ni hpe re. Mara nga ai ngu Yehowa mu mada ai lailen ni hpe tinang ra yang hkap la mai ai ngu tsun ai.

9. Chyum Laika tsang madang ni hpe hkan sa ai ramma ni gara akyu ni lu la na kun?

⁹ Ramma Hkristan ni gaw jawng manang, bungli manang ni a akyang lailen hte seng ai mu mada lam ni hpe hkap la na matu shadut hkrum chye ai. Alekzenda dai zawn hkrum wa ai. Shi ndai hku tsun ai: “Jawng kaw na  numsha nkau gaw shanhte hte arau yup na matu ngai hpe tsun ai. Ngai hta sumtsaw n nga ai majaw, hkrang bung shada nga sha ai wa re ngu shanhte tsun ai.” Nang dai zawn hkrum nga ai rai yang, Chyum Laika tsang madang ni hpe hkan sa ai gaw, na hkum nang makawp maga lam lu shangun ai. Hkamja lam, hkamsha lam, Yehowa hte hku hkau lam kaja wa na hpe dum u. Chyam dinglik hkrum ai hpe ninghkap lu magang, jaw ai hpe galaw na matu grau loi wa magang re. Satan gaw ngang hte seng nna, shut ai hku mu mada hkra galaw nga ai hpe dum u. Shanhte myit ai hku n myit ai nga yang, “nhkru ai wa hpe dang kau” lu na re.​—1 Yh 2:14.

10. San seng ai myit nsam hte Yehowa hpe nawku lu na matu 1 Yawhan 1:9 gaw gara hku karum ya lu ai kun?

¹⁰ Mara nga ai akyang lailen gaw hpa re ai hpe tsun na ahkang Yehowa hta sha nga ai hpe anhte hkap la ai. Mara n galaw hkrup na matu anhte kaja htum asak hkrung ga ai. Raitim, anhte mara galaw hkrup ai shaloi Yehowa kaw akyu hpyi nna, mara ni hpe yin la ai. (1 Yawhan 1:9 hpe hti u.) Mara kaba galaw hkrup yang, anhte hpe lanu lahku na matu, Yehowa aya tang da ai myitsu salang ni kaw karum hpyi ai. (Yak 5:14-16) Raitim, lai wa sai aten hta galaw wa ai mara ni a majaw, mara nga ai ngu n hkamsha ging ai. Hpa majaw kun? Anhte a mara raw dat hkrum na matu, Yehowa gaw shi a Kasha hku nna gawng malai hkungga hpe lajang da ya ai majaw re. Anhte teng sha myit malai lu yang, Yehowa mara raw ya ai. Dai majaw, Yehowa hpe san seng ai myit nsam hte nawku lu ai.​—1 Yh 2:1, 2, 12; 3:19, 20.

11. Makam masham hpe hten za shangun ai sharin achyin ai lam kaw nna anhte a myit mang ai lam hpe gara hku makawp maga na kun?

¹¹ Makam masham htak mat ai ni a sharin achyin ai lam ni hpe nyet kau ra ai. Hkristan nawku hpung nnan hpang ai kaw nna, Satan gaw hkalem ai masha law law hpe akyu jashawn nna, Karai a sadi dung ai mayam ni  hpe ntsen ai myit nga hkra galaw ya ai. Dai majaw, jaw ai hte shut ai hpe ginhka chye ra ai. * Hpyen ni gaw Intanet hpe akyu jashawn nna, Yehowa hpe kamhpa ai myit hte hpunau nauna ni hpe tsawra ai myit yawm mat hkra shakut nga ai. Dai zawn masu ga ni hpe hkum kam. Dai gaw Satan kaw nna sa ai re.​—1 Yh 4:1, 6; Shr 12:9.

12. Anhte chye wa ai tengman ai lam ni hpe kamsham ai myit ngang kang hkra hpa majaw galaw ra ai kun?

¹² Satan a gasat ai lam hpe ninghkap lu na matu, Yesu hpe kam ra nna, Karai a yaw shada lam hta lawm ai shi a daw hpe mung kam ra ai. Dai ni aten hta Yehowa akyu jashawn ai uhpung langai sha nga ai hpe mung kam ra ai. (Mat 24:45-47) Chyum Laika hpe ayan hkaja nna makam masham ngang kang hkra galaw ra ai. Rai yang, makam masham gaw ru jung nga ai hpun hte bung wa na re. Kolose nawku hpung de Pawlu laika ka ai shaloi, dai hte bung ai masa lam langai hpe tsun wa ai. Shi ndai hku tsun ai: ‘Nanhte gaw Madu Hkristu Yesu hpe hkap hkalum la ai hte maren, shi hta e a hkawm nga mu: shi hta e ru jung nna gaw da nga ai hte, . . . makam masham hta ngang ngang kang kang rai nga u.’ (Kol 2:6, 7) Anhte a makam masham hpe ngang kang hkra galaw yang, tengman ai lam hta hkawm nga ai kaw nna hkring mat hkra, Satan hte shi hpang hkan ai ni galaw lu na n re.​—2 Yh 8, 9.

13. Hpa hpe myit mada da ra ai kun? Hpa majaw kun?

¹³ Mungkan a nju ndawng hkrum na hpe anhte myit mada da ra ai. (1 Yh 3:13) “Mungkan ting gaw dai n hkru ai wa hta e lup” nga ai ngu Yawhan sadi jaw da ai. (1 Yh 5:19) Mungkan a jahtum nhtoi ni magang Satan gaw grau nna pawt magang re. (Shr 12:12) Akyang hten za ai lam, makam masham htak mat ai ni a masu ga zawn re ai lam ni hte gasat ai sha n-ga, zingri zingrat ai lam ni hku nna mung gasat ai. Anhte a hkaw tsun bungli hkring mat na matu hte, anhte a makam masham hpe hten za hkra galaw na matu aten loi mi sha ngam sai hpe Satan chye ai. Mungdan law law hta anhte a bungli ni hpe tsep kawp hkum pat kau ai (sh) pat shing dang kau ai shaloi n mau ga ai. Raitim, dai mungdan ni hta nga ai hpunau nauna ni gaw hkamjan nga ma ai. Yehowa a masha ni hpe Satan hpa mi galaw tim, matut nna sadi dung lu ai.

14. Hpunau nauna ni tengman ai tara hta matut nga lu hkra karum ya lu ai lam langai gaw hpa rai kun?

¹⁴ Hpunau nauna ni tengman ai tara hta matut nga lu hkra, matsan dum myit madun ra ai. (1 Yh 3:10, 11, 16-18) Masa kaja ai aten hta sha n-ga, manghkang hkrum ai aten hta mung, tsawra myit madun ra ai. Ga shadawn, tsawra ai marai langai si mat ai majaw shalan shabran lam ra nga ai (sh) tatut karum ya ra ai marai langai ngai hpe nang chye ai kun? Shing nrai, hpunau nauna ni gaw shingra tara tsin-yam a majaw shanhte a Nawku Htingnu hte nta ni hpe bai gap na matu ra nga ai shiga hpe nang na ai kun? Hpunau nauna ni hpe n-gup ga hte sha n-ga, tatut karum ya ai hku nna, tsawra myit hte matsan dum myit madun mai ai.

15. 1 Yawhan 4:7, 8 hku nga yang anhte hpa galaw ra ai kun?

¹⁵ Anhte shada da tsawra myit madun ai gaw Yehowa hpe kasi la ai re. (1 Yawhan 4:7, 8 hpe hti u.) Tsawra myit madun lu ai kaga lam langai gaw, shada da mara raw ya ai hku nna re. Ga shadawn, marai langai gaw  anhte hpe hkra machyi hkra galaw nna bai hpyi nem ai ngu saga. Shi hpe mara raw ya ai, galaw wa ai lam ni hpe malap kau ya ai hku nna tsawra myit madun ga ai. (Kol 3:13) Hpunau Aldo gaw, shi amyu masha hte seng nna, shi hkungga ai hpunau langai a hkra machyi hkra tsun ai hpe hkrum wa ai. Shi ndai hku tsun ai: “Dai hpunau hte seng nna n kaja ai hkamsha lam ni n byin wa na matu karum ya rit ngu Yehowa kaw akroi anoi akyu hpyi ai.” Shi gaw akyu hpyi ai hta n-ga galaw wa ai. Dai hpunau hte hkaw tsun magam arau sa na matu dawdan ai. Dai shaloi, hpunau tsun ai ga a majaw, grai hkamsha wa ai hpe tsun dan ai. “Ngai kade daram hkamsha ai lam hpunau hpe tsun ai shaloi, ngai hpe shi bai hpyi nem ai. Shi tsun ai hpe madat yu yang, kade daram myit malai lu mat ai hpe chye lu ai. Dai hpang, an yan gaw moi na zawn bai hku hkau mat ai” ngu hpunau Aldo tsun ai.

16-17. Hpa galaw na matu dawdan da ging ai kun?

¹⁶ Kasa Yawhan gaw hpunau nauna ni hpe grai tsawra nna makam masham hta ngang kang shangun mayu ai. Shi ka ai laika masum hta shi a tsawra myit hte myit tsang ya ai lam hpe asan sha mu lu ai. Shi zawn myit jasat nga ai num, la ni gaw Hkristu hte arau uphkang na matu namman chya hkrum ai hpe chye lu ai gaw grai n-gun lu hpa re.​—1 Yh 2:27.

¹⁷ Anhte hkaja wa ai hpaji jaw ga ni hpe myit hta matsing da ga. Prat hkrun lam shagu hta Yehowa a ga madat ai hku nna tengman ai tara hta hkawm sa lu hkra dawdan da ga. Chyum Laika hpe hkaja nna dai hpe kam u. Yesu hpe kamsham u. Masha a myit mang hpaji hte makam masham htak mat ai ni a sharin achyin ai lam ni hpe nyet kau u. Prat lahkawng hte asak hkrung na matu, mara galaw na matu shadut hkrum yang ninghkap u. Akyang lailen hte seng ai Yehowa a tsang madang ni hte maren asak hkrung u. Hkra machyi hkra galaw ai ni hpe mara raw ya ai, ra kadawn nga ai ni hpe karum ai hku nna hpunau nauna ni tengman ai lam hta matut nga lu hkra karum ya mat ga. Rai yang, yakhkak ai lam ni nga tim, tengman ai lam hta matut hkawm nga lu na re.