1. Kala kilondekesa o mukanda wa 3 Nzwá 3, 4, ihi itena kutuzediwisa?

XINGANEKA ngó! Kyebhi kya divu poxolo Nzwá, kyoso kyevu kwila, o athu akwatekesa kudilonga o kidi, amusuluka ni kusidivila Jihova ni ufiyele woso? Ene exile mudibhana ni ibhidi yavulu, Nzwá wexile mubhanga yoso phala kukolesa o kixikanu kya Jikidistá jiji jafiyele, wexile mwamona kala twana twê. Kyene kimoxi we, etu tusanguluka kyavulu kyoso kitumona o twana twetu kudibhakula kwa Jihova ni kudibatizala ni kukolokota mukumusidivila.—Tanga 3 Nzwá 3, 4.

2. Ihi yabhangesa poxolo Nzwá kusoneka o mikanda itatu yoyo?

² Mu muvu wa 98 K.K., Nzwá nange watungile kubandu ya Efezu. Nange, mwene wayiku kyoso kyamukatula mukaleya mukikolo ya Patamu. Mukithangana kyokyo bhukaxi ka nzumbi ikôla Jihova wabhangesa Nzwá kusoneka o mikanda itatu yoyo. Mwene wasoneka o mikanda itatu yiyi phala kukolesa o kixikanu kya Jikidistá mwa Kidistu ni kusuluka mukwendela mukidi.

3. Ibhwidisu yebhi itwandatambwijila mumbandu yiyi?

³ Nzwá mwene o poxolo wasukina mu jipoxolo joso, mwene wejidile kyambote o ilongesu yamakutu yexile mudimwanga mukilunga kya Nzambi. * (1 Nzwá 2:18, 19, 26) O alunguludi yó ejidile Nzambi, maji ene kexile mubelesela o itumu ya Nzambi. Tumone o itendelesu yabhana Nzwá ni kikwatekesu kya nzumbi ikôla. Mumbandu yiyi twandatambwijila ibhwidisu itatu: Ihi ilombolola kwendela mukidi? Ibhidi yebhi itudibhananayu mukwenda mukidi? Ni kyebhi kitutena kukwatekesa akwetu kwenda mukidi?

4. Kala kilondekesa o mukanda 1 Nzwá 2:3-6, 2 Nzwá 4, 6, ihi itwabhingi kubhanga phala kwenda mukidi?

⁴ Phala kwenda mukidi, twabhingi kwijiya o kidi kitusanga mu Mak’â Nzambi o Bibidya. Kumbandu yengi twatokala tu “twaluka o ijila ya [Jihova],” kifwa, twabhingi kumubelesela. (Tanga 1 Nzwá 2:3-6; 2 Nzwá 4, 6.) Jezú waxila phangu yayuka yakubelesela Jihova. Kyenyiki o ukexilu umoxi wabetakota wakubelesela Jihova o kukayela phangu ya Jezú o mukukayela o makanda mê.—Nzwá 8:29; 1 Phe. 2:21.

5. Ihi itwatokala kuxikina ni muxima wetu woso?

⁵ Phala kusuluka mukwenda mukidi, twatokala kuxikina ni muxima wetu woso kwila, Jihova, mwene o Nzambi yakidi, ni kwila ima yoso itutangela mu Mak’â Nzambi yakidi. Twatokala kuxikina we kwila Jezú, mwene o Mexiya amukanene. Avulu akala ni phata kuma Jezú kamundu kala Sobha ya Utuminu wa Nzambi. Nzwá wadimuna kuma kwejimoneka ‘athu avulu akwa kunganala.’ Ene ejinganala yó kexile hanji pholondo phala kuzokela o kidi kyalungu ni Jihova ni Jezú. (2 Nzwá 7-11) Nzwá wasoneka: “O mukwa makutuphe, nanyi? Oko mwenyó woso udituna kuma Jezú ki mwene Kidistu.” (1 Nzwá 2:22) O ukexilu umoxi ututena kubhanga phala katunganale, o kudilonga o Mak’â Nzambi. Se tubhanga kiki twandakwijiya Jihova ni Jezú. (Nzwá 17:3) Seku ndunge yengi, kyene ngó kitwandaxikina kwila twala mukidi.

6. Ihi itena kufidisa o mizangala ya Jimbangi ya Jihova kwendela mukidi?

⁶ O Jikidistá joso atokala kudilanga phala kanganale mu ixinganeka mba mu ilongelu ya athu yajifilozofiya. (1 Nzwá 2:26) Bengebenge o mizangala ya Jikidistá atokala kudilanga mwilwezu yiyi yamakutu. Phange Alexia, * wala ni 25 a mivu watungu ku França, wambe: “Kyoso eme ngexile muzangala eme ngexile mudibhana ni ibhidi ya ixinganeku ya mundu kala o athu amoneka ngó ni jifilozofiya ja athu. Mukithangana kyokyo o ilongesu yiyi yexile mungiwabhela. Maji ngaxinganeka kwila kikima kyambote kuta o ilongesu ya Bibidya kumbandu anga ngixikina ngó mu ima yoso ilonga o jimesene jami.” Alexia wamateka kudilonga o kadivulu A Vida—Teve um Criador? A origem da vida—Cinco perguntas que merecem resposta? Wabhiti ngó tusemana ni kudilonga mwene kexile dingi ni phata. Alexia wambe dingi: “Ngaxikina ni  kidi kyoso kwila o Bibidya yene o kidi. Ngamono kwila o kukayela o itendelesu yiyi kumwenyu wami ingibhana kusanguluka ni kutululuka.”

7. Twatokala kudilanga phala kitubhange ihi ni mukonda dyahi?

⁷ O Jikidistá joso atokala kudilanga phala kadinganale kwila amusidivila Jihova maji mukithangana kimoxi amubhanga ima yayibha. Nzwá wambe kwila kitutena kwendela mukidi, maji mukithangana kimoxi twambata mwenyu wa ufusa. (1 Nzwá 1:6) Se twamesena kwila Jihova usanguluka n’etu, twambhingi kulembalala kuma Jihova umona yoso itubhanga. Kumbandu yengi, né mwene se athu kamumona o ima itumbhanga mukaswekele, Jihova umona yoso itubhanga.—Jihe. 4:13.

8. Ihi itwatokala kudituna?

⁸ Etu twatokala kudituna o ukexilu wa mundu wakutala o ituxi. Poxolo Nzwá wasoneka: “Se twedi twixi kitumoneka ituxi, twadinganala etwene.” (1 Nzwá 1:8) Mu izuwa ya Nzwá, akwa kulungulula o kidi exile muzwela kuma o muthu utena kubhanga o ima yazembe Nzambi, maji né kiki utena kukala hanji ni ukamba ni Nzambi. Lelu we, twatungu bhukaxi ka athu adifu kala yó. Avulu azwela kuma axikina kwa Nzambi maji ene kaxikina o ima izwela Jihova yalungu ni kituxi, ene kaxikina kotelele o milongi yalungu ni undumbu. Sayi ima Jihova wamba kuma kituxi, maji o athu yâ amba kwila kikituxi se muthu wamesena kubhanga ukibange, mukonda ukexilu wê wamwenyu.

9. Mukonda dyahi kima kyambote kyoso o mizangala kyabhaka mba kya xikina o milongi ya Bibidya?

⁹ Kibhonza dingi phala o Jikidistá ja mizangala kusuluka mukukala ni ukexilu wambote wakutala o undumbu mukonda dya yó akondoloka, kikale musalu mba muxikola kaxikina o ihi ilonga o Bibdiya yalungu ni undumbu. Kiki kyene kyabhiti ni Kabasa. Mwene wambe: “Sayi tuhetu muxikola angijijidika phala kubhanga nawu undumbu. Ene angambela kwila se eme kingala ni sáyi eme ngene muzeka ni diyala ni mukwa.” O ijijidiku kala yiyi itena kubhita  n’eye. Maji se ubhanga o ima iwejiya kwila yatokala kala kyambe o Bibidya wandadivwa kyambote n’eye mwene, wandalanga o sawidi yé, kiwanda kala ni ndolo kumuxima, wandasuluka ni kukala ni ukamba wé ni Jihova. Ithangana yoso i utolola o jitendasa wandakala dingi polondo phala kubhanga o ima yambote. Lembalala kwila o ukexilu wayibha wakumona o undumbu wamateka ni Satanaji. Kyenyiki kyoso ki udituna kuxinganeka kala o athu kumundu eye ‘wamutolola o Kadyapemba.’—1 Nzwá 2:14.

10. O mukanda 1 Nzwá 1:9 utukwatekesa kyebhi kusidivila Jihova ni kitongolwelu kyazele?

¹⁰ Etu tuxikina kwila Jihova mwene ngó utena kubhana o ijila yakwamba yebhi o ima yambote ni ima yayibha. Etu tubhanga yoso itutena phala kitute kituxi. Maji kyoso kituta o kituxi, etu tudyela, tubhinga o muloloke kwa Jihova bhukaxi kamusambu. (Tanga 1 Nzwá 1:9.) Ma se twate kituxi kyadikota, tusota o kikwatekesu kyatufunga kyatubhana Jihova phala kutulanga munzumbi. (Tiya. 5:14-16) Maji kitwabhingi kuditatela mukonda dya ituxi itwate m’ukulu. Mukonda dyahi? Mukonda o Tata yetu yahenda watubhana o sata yakukula bhukaxi kamone ibhangesa kutuloloka o ituxi yetu. Kyoso Jihova kyamba kwila wandakuloloka oso adyela o ituxi, kiki kilombolola kuma mwene wandakuloloka mwene. Kyenyiki seku muthu utena kutufidisa kumusidivila ni kitongolwelu kyazele.—1 Nzwá 2:1, 2, 12; 3:19, 20.

11. Kyebhi kitutena kudilanga mu ilongesu itena kuzozesa o kixikanu kyetu?

¹¹ Twatokala kudituna o ilongesu ya yó alungulula o kidi. Tunde kyamateka o kilunga kya Jikidistá Satanaji wene musota kubhanga yoso phala kuzozesa o kixikanu kya Jikidistá ja Nzambi. Kyenyiki, twabhingi kwijiya kuthonginina yebhi o ilongesu yamakutu ni yebhi o ilongesy yakidi. * Yó atuzembe atena kumwanga makutu bhukaxi ka internete mba kurede sosiyale, phala kuzozesa o kidyelelu kyetu kwa  Jihova ni henda yetu ku jiphange. Kana kudyelela kumakuta yâ, ene amutunda kwa Satanaji!—1 Nzwá 4:1, 6; Dij. 12:9.

12. Mukonda dyahi twatokala kubandekesa o kisakidilu kyetu mukidi kutwadilongo?

¹² Phala kukolokota o kujiphitu ja Satanaji ja kuzozesa o kixikanu kyetu twabhingi kukolesa o kisakidilu kyetu kwa Jezú ni kyebhi Jihova wandakubindila o vondadi yê bhukaxi ka Jezú. Lelu, Jihova wamukwendesa o kilunga bhukaxi kakibuka kyê kyafiyele, kyenyiki, twabhingi kwadyelela. (Mat. 24:45-47) Twatokala kubhandekesa o kidyelelu kyetu mukudilonga Mak’â Nzambi izuwa yoso. Kyenyiki, o kixikanu kyetu kyandakala kala o jindanji ja muxi jikola kyambote mu mavu. Phawulu wate kifika kyadifu kiki kyoso kyasonekena phala akwa koloso. Mwene wambe: “kyoso ki mwa tambulula Ngana, Kidistu Jezú, kyene ki mwenda mwa mwène. Muta jindaji jenu mwa mwène, anga mu sabhuka mwa mwène, mwa disokejeka myenyu yenu mwa mwène, mwa kolo mu kuxikana kwenu.” (Kol. 2:6, 7) Se tubhanga yoso itutena phala kukolesa o kixikanu kyetu, Satanaji ni akayedi yê, kandatena kutufidisa kwendela mukidi.—2 Nzwá 8, 9.

13. Ihi itutena kukingila ni mukonda dyahi?

¹³ Etu tukingila kwila o mundu wandakutuzemba. (1 Nzwá 3:13) Nzwá watulembalesa kwila “o mundu wosophe wa zeka mwa Kadyaphemba yó mukwa ku tondalesa.” (1 Nzwá 5:19) Kuma o mundu yu wakadyampemba wamuzukama kyá kudisukilu dyê, o jinda ya Satanaji yamudibandekesa mu kizuwa ni kizuwa. (Dij. 12:12) Mwene katutela ngó mibhetu yadisweka, kala o undumbu ni makutu a akwa kulungulula o kidi. Maji usota we kutukwatela mu mibhetu imoneka kala o izukutisu ni usweya. Satanaji wejiya kwila o kithangana kyamutolo phala kufidisa o kikalakalu kya kubhoka ni kuzozesa o kixikanu kyetu. Kyenyiki, kyoso kitumona o kikalakalu kyetu amwifidisa mu jixi javulu, kitwene mudiwana dingi. Maji né kiki, o jiphange jetu jatokala mu jixi jiji, amukolokota. Kabhasa o ima ibhanga Satanaji, o mundu wa Jihova wandatena kusoluka ni kukolesa o ufiyele wê!

14. Webhi o ukexilu umoxi ututena kukwatekesa nawu jiphange jetu phala akolokote mukidi?

¹⁴ Phala kukwatekesa o jiphange kukolokota mukwendela mukidi, twatokala kudizola. (1 Nzwá 3:10, 11, 16-18) Etu twabhingi kudizola mudyetu, kana ngó kyoso ima yamukwenda kyambote, maji we kyoso kikumoneka ibhhidi mba maka. Mukifika, eye wejiya muthu wafundu kazola mba ndandu, wabhindamena kiximbakatesu mba kikwatekesu mu ukexilu wakubhana kima? O kwila eye wevu kuma sayi jiphange abhiti ni mavuwa, atexika ima yoso, abhingi kikwatekesu kya kutunga jinzo jawu mba Kididi kya Ubhezelu? Etu tulondekesa o henda yetu yamuxima kana ngó mu ima ituzwela, maji bengebenge mu ima tubhanga.

15. Kala kilondekesa o mukanda 1 Nzwá 4:7, 8, ihi itwabhingi o kubhanga?

¹⁵ Etu tukayela o Tata yetu yahenda wala kudyulu, kyoso kitudilondekesa o henda mudyetu. (Tanga 1 Nzwá 4:7, 8.) O ukexilu umoxi wabetakota wakulondekesa o henda, o kudiloloka mudyetu. Mukifika, se sayi muthu watulwalesa, twatokala kumulondekesa henda, mukumuloloka ni kujimba o kima kyabhange. (Kol. 3:13) Sayi phange amwixana Aldu wadibhana ni ibhidi kala yiyi. Kyoso kyevu kuma sayi phange wazwela kyayibha yalungu ni athu atokalele kukijila kyê, mwene waluwala kyavulu, sumbala wexile mu xila o phange mwenyu. Aldu wambe: “Mu ithangana yavulu ngexile musamba kyavulu mukubhinga kikwatekesu kwa Jihova, phala kingikale ni ixinganeku yayibha yalungu ni phange yó.” Maji phange Aldu wabhange dingi kima kyengi. Mwene wabhingi kwa phange  mwenyu phala n’a boke kumoxi. Kyoso ene kyexile muboka Aldu wajimbulula kyebhi kyexile mudivwa mukonda dya ima yazwele phange. Mwene wambe dingi: “Kyoso phange kyatonginina kwila o ima yazwelele yangiluwalesa, mwene wangibhingi muloloki. O mbimbi ya izwelu yé kyoso kyangibhingi o muloloki yangilondekesa kwila mwene wadyela mu ima yazwelele. Mukonda dya kiki, kyoso ima yabhiti etu twakituka makamba akidi, twajimbi o maka oso.”

16-17. Ihi itwandasota o kubhanga?

¹⁶ Poxolo Nzwá wazolele kyavulu o jiphange yu wamesenene kwila ene akolesa o kixikanu kyâ. O kidimwinu kyabhana poxolo Nzwá mumikanda itatu yasoneka, kilondekesu kya kwila mwene wa azolele, wamesenene o mbote yâ. Kiswinisu kyadikota mukwijiya kwila mayala ni ahatu andatumina kumoxi ni Jezú kudyulu athu a henda asuwa akwa kala kyexile musuwa poxolo Nzwá!—1 Nzwá 2:27.

¹⁷ Twatokala kubhaka kumuxima o itendelesu yoso itwadilongo mumilongi yiyi. Tusote kwendela mukidi, mukubelesela Jihova mu ima yoso yamwenyu wetu. Dilonge o Mak’â Nzambi, dyelela mumaka u wamudilonga. Kolesa o kixikanu kyé kwa Jezú. Ditune o jifilozofiya ni ilongesu ya akwa kulungulula o kidi. Kana kulondekesa mumakutu kwila wamusidivila Jihova, maji mukithangana kimoxi wamubhanga o ima yayibha. Kana kubhana o matwi kwa yó asota kukufwinyisa phala kubhanga o ima yayibha. Kayela o itendelesu ya Jihova kumwenyu wê. Tukwatekese o jiphange jetu kukala ni kixikanu kyakolo ni kuloloka yó atuluwalesa ni kukwatekesa yó abhindama. Se kyene kitubhanga, sumbala ni ibhidi itudibhana nayu twandasukula mukwendela mukidi.