1. Ngoku kiri omu 3 Yoane 3, 4, ni kyahi ekikathutsemesaya?

WUKALENGEKANAYA omukwenda Yoane mwatsema bungahi akowa ngoku abo awathikaya eriminya ekwenene banemulholha embere erikolera Yehova buthaleghulha? Mubabana bitsibu bingyi, kandi Yoane mwalengaho erighumya erikirirya ly’Abakristayo abathaleghulha aba abo abya akalhangira ng’abaana biwe ab’obunyakirimu. Kuthya nethu, thukatsema abaana bethu, mbulha ni baana abo thubuthire kutse ab’obunyakirimu bakayihayo oku Yehova n’erilholha embere erimukolera.​—Soma 3 Yoane 3, 4.

2. Esyobaruha esyo Yoane ahandika syabya siwithe kighendererwaki?

² Omo mwaka 98 E.K., Yoane angabya iniabya ikere e Efeso kutse hakuhi nayu. Angabya imwayayo abirilhua omwa bunyewa okwa kitsinga kye Patemo. Okwa buthuku obo, omulimu wa Yehova mwamusondolha erihandika esyobaruha isathu. Ekighendererwa ky’esyobaruha esyo lyabya iry’erihira omwa Bakristayo abathaleghulha mw’omuhwa w’eribya ibanamakirire erikirirya lyabu omu Yesu n’erilholha embere erikwama ekwenene.

3. Ni bibulyo byahi ebyo thukendi subirya?

³ Yoane yuwabya mukwenda w’erighunzerera eribyaho, kandi mwayilhalikirira busana n’abakangirirya b’amabehi ababuthuka omwa kithunga. * (1 Yn. 2:18, 19, 26) Abakayisamambulha okw’ikirirya abo ibakabugha bathi banasi Nyamuhanga, aliwe isibali kenga ebihano bya Yehova. Thulebaye erihabulha erya Yoane asondolibawa eriha. Omo mwatsi ono, thukendi subirya ebibulyo bisathu bino: Kikamanyisayaki erikwama ekwenene?  Ni byahi ebyanga thukakirya? Kandi thwanga wathikania thuthi eribya ithune omwa kwenene?

4. Ngoku kiri omu 1 Yoane 2:3-6 na 2 Yoane 4, 6, erikwama ekwenene mwamuliki?

⁴ Erikwama ekwenene, thutholere ithwaminya ekwenene eyiri omwa Kinywe kya Nyamuhanga, e Biblia. Eryongera okw’ekyo, thutholere ‘ithwakenga ebihano’ bya Yehova, ni bugha ambu, thutholere ithwabighenderako. (Soma 1 Yoane 2:3-6; 2 Yoane 4, 6.) Yesu mwahiraho eky’erileberyako ekihikene eky’eriowa Yehova. Neryo enzira ngulhu ey’erikengeramu Yehova ly’erikwama olhughobe lhwa Yesu ngoku thwanga thoka.​—Yn. 8:29; 1 Pet. 2:21.

5. Ni kyahi ekya thutholere ithwaligha ndeke-ndeke?

⁵ Erilholha embere erikwama ekwenene, thutholere ithwaligha ndeke-ndeke ngoku Yehova ya Nyamuhanga we kwenene, ngoku ebyosi ebyo akathubwira omwa Kinywe kiwe, e Biblia, bihikire. Kandi thutholere ithwaligha ngoku Yesu ya Masiya oyuwalhaghanisibawa. Munabwire, abangyi bakaghana bathi Yesu syathahakabibwa eribya Mwami w’Obwami bwa Nyamuhanga. Yoane mwabugha athi habya “abathebya bangyi,” abakathebaya ababya isibawithe erikirirya erighumire omu Yehova na Yesu. (2 Yn. 7-11) Yoane mwahandika athi: “Omubehi nindi kwehi yo n’oyukaghana Yesu kw’ali Kristo.” (1 Yn. 2:22) Enzira nguma eyo thwanga yihighuliramo okw’ithebibwa ly’erigha Ekinywe kya Nyamuhanga. Thwamakolha ekyo, ithukendi minya Yehova na Yesu. (Yn. 17:3) Neryo aho ibbwa imuthukendi ligha ndeke-ndeke ku thuwithe ekwenene.

6. Ni kitsibu kyahi ekya Bakristayo abalere bakabana?

⁶ Abakristayo abosi batholere ibayitheya okw’ithebibwa omwa menge w’abandu. (1 Yn. 2:26) Kutsibu-tsibu Abakristayo abalere batholere ibayitheya okwa kithegho ekyo. Alexia, *mwali wethu ow’emyaka 25 owe France, akabugha athi: “Ingakine mulere, amalengekania w’ekihugho, ng’engangirirya ey’ebindu eriyibuthukira n’amenge w’ekihugho ibikanyitabura. Ihakanayira, inabya nga namanza esyongangirirya esyo. Aliwe munayowa isinanga gheghena ebya Yehova akabugha neryo kandi ingaligha ebyosi ebyo ngakangiriribawa okwa sukuru.” Alexia mwayeghesya ekitabu  Life​—How Did It Get Here? By Evolution or by Creation? Omo mayenga make, erithika-thika liwe mulyahwa. Alexia akabugha athi: “Munayikakasirya ngoku e Biblia yirimo ekwenene. Munaminya ngoku erighendera okwa bihano byayo kikendi nyilethera obutseme n’obuholho.”

7. Ni kahathikano kahi ako thutholere ithwaghana, kandi busana naki?

⁷ Abakristayo abosi, abalere n’abakulhu, batholere ibaghana akahathikano k’eribya omwa ngebe ibiri. Yoane mwakangania ngoku sithwanga kwama ekwenene kandi ithune omwa ngebe y’obutswatswa. (1 Yn. 1:6) Thwamabya thwanzire erisimwa na Nyamuhanga lino n’omwa buthuku obukasa, thutholere ithwabya ithun’ibukire ngoku Yehova akalhangira ekyosi-kyosi ekyo thukakolha. Ni bugha ambu, sihali ekibi ekyanga kolhwa omo mbiitha ekyo Yehova athe angalhangira.​—Ebr. 4:13.

8. Ni byahi ebyo thutholere ithwaghana?

⁸ Thutholere ithwaghana amalengekania agho ekihugho kiwithe okwa kibi. Omukwenda Yoane mwahandika athi: “Thwamabugha thuthi sithuwithe kibi, thukayitheba, n’omwatsi w’ekwenene syali nethu.” (1 Yn. 1:8) Omwa biro bya Yoane, abakayisamambulha okw’ikirirya ibakabugha bathi omundu angananza iniakolha ekibi omw’ikighenderera kandi iniabya inianawithe obughuma obuwene na Nyamuhanga. Munabwire, thuli omwa bandu abawithe amalengekania ng’ayo. Abangyi bakabugha bathi b’ikirirye omu Nyamuhanga, aliwe sibali ligha amalengekania agho Yehova awithe okwa kibi, kutsibu-tsibu bikahika okw’ikolha emyatsi y’engyingo. Ebya Yehova akalhangira mwa bibi, abandu bakabugha bathi wangana bikolha wamanza.

9. Abalere bakaghasirawa bathi bamamakirira ebya Biblia yikabugha?

⁹ Kutsibu-tsibu abo Abakristayo abalere bakasoma nabu kutse abo bakakolha nabo bangana bahathikana erithunga amalengekania  wabu agho bawithe okwa by’obutswatswa. Ekyo ky’ekyabya oku Aleksandar. Akabugha athi: “Abandi basika okwa sukuru ibakanyihathikana erikolha nabu emyatsi y’engyingo. Ibakabugha bathi kundi singawithe omusika oyo ngathetha, obo ngali mundu oyukakolha emyatsi y’engyingo n’ow’olhubutho ng’olhwaghe.” Wamabana erilengwako ng’eryo, wibuke ngoku eryamakirira ebya Biblia yikabugha, wukatheghaya ekitsumbi kyawu, amaghalha, obulengekania, n’engolongana yawu na Yehova. Kandi obuli rwanisya erilengwako, kikaleka ikyakwolhobera erikolha ekihikire. Kandi wibuke ngoku amalengekania w’obutswatswa aw’ekihugho aya akalhua oku Sitani. Wamaghanir’ighuma amalengekania w’ekihugho, ‘wukakinda omubi.’​—1 Yn. 2:14.

10. Yoane ow’erimbere 1:9 hakathuwathikaya hathi erikolera Yehova n’obunyamuthima-thima obuhenirye?

¹⁰ Thukaligha ngoku Yehova yuwithe ehamuli y’eribugha athi eki ni kibi. Kandi thukalengaho erithendi kolha ekibi. Aliwe thwamakolha ekibi, thukasaba Yehova y’ekighanyiro. (Soma 1 Yoane 1:9.) Kandi thwamakolha ekibi ekikalire, thukasaba obuwathikya bw’abasyakulhu, abo Yehova abirisombolha erithutheya. (Yak. 5:14-16) Aliwe, isithwabera erilengekania okwa bisobyo ebyo thwakolha kera. Busana naki? Kundi Thatha wethu w’olhwanzo abirithuha endongolya y’ekihongwa kya Mughalha wiwe nuku ebibi byethu bighanyirawe. Yehova akabya akabugha athi akendi ghanyira oyukayisubamo, akabya iniakakimanyisaya. Neryo sihali ekyanga thukakirya erikolera Yehova n’obunyamuthima-thima obuhenirye.​—1 Yn. 2:1, 2, 12; 3:19, 20.

11. Thwanga theya thuthi obulengekania bwethu okwa syongangirirya esyanga tsandya erikirirya lyethu?

¹¹ Thutholere ithwaghana esyongangirirya sy’abakayisamambulha okw’ikirirya. Aho ekithunga ky’Ekikristayo kikathatsukira, Diabolo abiribya inianemukolesya abathebya  bangyi erihira omwa bulengekania bw’abaghombe ba Nyamuhanga abathaleghulha mw’erithika-thika. Busana n’ekyo, thutholere ithwaminya ngoku thwanga minyerera ekwenene n’amabehi. * Esyonzighu syethu syangana kolesya e Intaneti kutse emithahulha y’erikanirania eritsekya eriyikethera lyethu omu Yehova n’olhwanzo olhwathuwithire balikyethu. Wibuke ngoku amabehi ayo akalhua oku Sitani, kandi ghanagho!​—1 Yn. 4:1, 6; Erib. 12:9.

12. Busana naki thutholere ithwaghumya erikirirya lyethu omwa kwenene eyo thwabirigha?

¹² Eriyitheya okwa bithegho bya Sitani, thutholere ithwakamathya eriyikethera lyethu omu Yesu n’omwa lhukwamirwa olhw’awithe omw’iberererya ekighendererwa kya Nyamuhanga. Kandi thutholere ithwayikethera enzira nguma nyisa eyo Yehova anemukolesya munabwire. (Mt. 24:45-47) Thukakamathaya eriyikethera lyethu omw’igha mughulhu wosi Ekinywe kya Nyamuhanga. Neryo erikirirya lyethu irikendibya ng’omuthi owahandire ndeke emirihi yagho omwa kithaka. Paulo mwabugha ekiri ng’ekyo akahandikira ekithunga kye Kolosai. Mwabugha athi: “Neryo kusangwa mwabiriangirira Kristo Yesu mo Mukama, mumukwame n’erimathikana nayu. Muhande emirihi yenyu omw’isi wiwe. Musikaye erikirirya lyenyu.” (Kol. 2:6, 7) Sihali ekya Sitani kutse abamukwamire bangakolha eritsingya-tsingya Omukristayo oyuwithe erikirirya erighumire.​—2 Yn. 8, 9.

13. Ni kyahi ekyo thutholere ithwabya ithunasi, kandi busana naki?

¹³ Thutholere ithwabya ithunasi ngoku ekihugho kikendi thupona. (1 Yn. 3:13) Yoane akathwibukaya ngoku “ekihugho kyosi kiri omwa buthoki bw’omubi.” (1 Yn. 5:19) Enduli y’omughulhu mubi ono yinemuseghera hakuhi, Sitani akendyongera erihithana. (Erib. 12:12) Eryongera okw’ikolesya ebithegho ebibisamire, akakolesaya eby’obusingiri kutse amabehi w’abakayisamambulha okw’ikirirya. Kandi akakolesaya n’obutsurumi bunene omw’endererya. Sitani anasi ku awithe kathambi kake buyira ak’erilengesya erimania omubiiri wethu w’erithulira kutse eritsekya erikirirya lyethu. Neryo sikiri thuswekaya, omubiiri wethu akahirwako olhukako omwa bindi bihugho. Nomwabine, balikyethu omwa bihugho ebyo banemuyiyinia. Banemukangania ngoku thwangana sighalha bathaleghulha, omubi nomwanga thukolhakoki!

14. Ni nzira yahi nguma eyathwanga wathikiryamu balikyethu eribya ibane omwa kwenene?

¹⁴ Eriwathikya balikyethu eribya ibane omwa kwenene, thutholere ithwabatsomana. (1 Yn. 3:10, 11, 16-18) Thutholere ithwanzana omwa mighulhu yuwene n’omughulhu hali ebitsibu. Ng’eky’erileberyako, wunasi oyuwabiriholerwa oyukayithagha erihumulikanibwa kutse oyukayithagha obuwathikya? Kutse wanabiriowa okwa balikyethu ababiriwa kw’ekitsinduli abo Ekisenge kyabu ky’Obwami kutse amanyumba wabo akayithagha erithasyahimbwa? Thukakanganaya ku thwanzire n’eritsomana kutsibu balikyethu omwa bya thukabugha, kandi kutsibu-tsibu omwa bya thukakolha.

15. Ngoku kiri omu 1 Yoane 4:7, 8, thutholere ithwakolhaki?

¹⁵ Thukagherereraya Thatha wethu w’elhubulha ow’olhwanzo omughulhu thukanzana. (Soma 1 Yoane 4:7, 8.) Enzira ngulhu eyo thukakanganirayamu olhwanzo ly’erighanyirana. Ng’eky’erileberyako, omundu angana thuhithania aliwe iniasaba ekighanyiro. Thukakanganaya olhwanzo omw’imughanyira n’erithendibera erilengekania okwa kisobyo kiwe.  (Kol. 3:13) Mughalha wethu oyukahulhawamo Aldo mwahithana akowa owundi mughalha wethu oyo asikirye akabugha nabi okwa bandu b’ekalikya yiwe. Aldo akabugha athi, “Iningabera erisaba Yehova indi angwathikaye nuku singathunge oku mughalha wethu oyu kw’amalengekania mabi.” Aliwe Aldo mwakolha ekindi kindu. Mwabwira mughalha wethu oyo athi baghende nayu omw’ithulira. Ibane omw’ithulira, Aldo mwamusoborera ngoku ebyo abugha mubyamuhambako nabi. Aldo akabugha athi: “Mughalha wethu abere akaminya ngoku nayowa busana n’ebyo abugha, mwasaba ekighanyiro. Omulenge wiwe mwanyikangania ngoku amayikubyabwomo busana n’ebyo abugha. Muthwaghunzaho ekitsibu kandi thwamasubanamo.”

16-17. Thutholere ithwathwamu erikolhaki?

¹⁶ Omukwenda Yoane abya atsomene kutsibu obunyakirimu bw’abalikyabo, kandi eritsomana eryo linalhangirikire omw’ihabulha eryo aha eriri omwa syobaruha siwe isathu. Kikatsemesaya eriminya ngoku abalhume n’abakali, abali ng’iyo, bakahakabibawa erisyathabalha haghuma na Kristo!​—1 Yn. 2:27.

¹⁷ Neryo ambi ithwaghendera okw’ihabulha eryo thwamabirikaniako. Thuthwemu erikwama ekwenene, eriowa Yehova omwa ngebe yethu yosi. Igha Ekinywe kiwe, kandi yiketherekyo. Kamathaya erikirirya lyawu omu Yesu. Ghana amenge w’abandu n’esyongangirirya sy’abakayisamambulha okw’ikirirya. Rwanisaya akahathikano ak’eribya omwa ngebe ibiri n’ak’erikolha ekibi. Ghondera ebihano bya Yehova eby’esyongeso. Kandi thuwathikaye balikyethu babye ibanaghumire omw’ighanyira abakathuhithanaya n’eriwathikya abali omwa buyithawa. Neryo, nomuthwangabana ebikathukaliraya engebe, thukendi lholha embere erikwama ekwenene.