1. Kweelana a 3 Joni 3, 4, ino nciinshi citupa lusangalalo?

AMUYEEYEBO mutumwi Joni mbwaakalinyumfwa ndyaakanyumfwa ayi balya boonse mbwakacafwa kwiiya cancine batolelela kusebensela Yehova cakushomeka. Bakeenda mumapensho aanji alimwi Joni wakasebensa cankusu kwaamba ayi ayumye lushomo lwa Beneklistu mbwaakalinga kubona anga mbana bakwe bakumushimu. Aswebo tulakondwa na bana besu bakumubili nabi bakumushimu balyaaba kuli Yehova, akutolelela kumusebensela.​—Amubelenge 3 Joni 3, 4.

2. Ino nceebonshi Joni ncaakalembela makalata otatwe?

² Mu mwaaka wa 98 C.E., Joni alyeelete wakalinga kukala ku Efeso na pafwiifwi aku Efeso. Cilyeelete kwaamba ayi wakalongela kumusena uko pesule lyakuswa mujeele pansumbu ya Patimosi. Paciindi ceenka cilya, Yehova wakamutanjilila kulemba makalata otatwe. Wakalemba makalata aya kwaamba ayi ayuminishe Beneklistu bashomeka kutolelela kuyumya lushomo lwabo muli Yesu akutolelela kweenda mucancine.

3. Ino njimiipusho nshi njeshi tucane shikumbulo?

³ Joni ngowakalinga mutumwi wakweelaako kufwa, aboobo wakalisukama ceebo ca njiisho shakubeca shakalinga kuyuminisha bafundishi bakubeca mboshakalinga kukuma Beneklistu mulibungano. * (1 Joni 2:18, 19, 26) Bantu aba bakapondoka kuswa mucancine bakalinga kubeca bantu ayi balishi cancine, sombi tabakalinga kukonkela milawo yakwe Yehova. Amuleke tubandike kululika Joni nkwakalemba. Lyalo tutocana shikumbulo  kumiipusho iyi: Ino kweenda mucancine cilaamba nshi? Ino nshiinshi sheenga shapa kwaamba ayi twaalilwe kweenda mucancine? Alimwi ino inga twacita buyani kwaamba ayi tucafwane kutolelela kweenda mucancine?

4. Kweelana a 1 Joni 2:3-6 alimwi a 2 Joni 4, 6, ino nshiinshi nshotweelete kucita kwaamba ayi tucikonshe kweenda mucancine?

⁴ Tulyeelete kutaanguna kushiba cancine ncetucana mu Maswi akwe Lesa, kwaamba ayi tucikoonshe kweenda mucancine. Kwiilikaawo, tulyeelete “kulama milawo [yakwe Yehova],” nkokwaamba ayi, tulyeelete kunyumfwila. (Amubelenge 1 Joni 2:3-6; 2 Joni 4, 6.) Yesu wakatondesha cakubonenaako cibotu cakunyumfwila Yehova. Aboobo nshila yomwi iyandika abuumbi mbweenga twakonkela milawo yakwe Yehova, nkukonkela cakubonenaako cakwe Yesu.​—Joni 8:29; 1 Pita 2:21.

5. Ino nciinshi ncotweelete kushoma cakutatoonsha?

⁵ Kwaamba ayi tutolelele kweenda mucancine, tulyeelete kushoma cakutatoonsha kwaamba ayi Yehova ngo Lesa walushinisho, alimwi shoonse nshaatulwiita mu Maswi akwe Baibo, nshancine. Alimwi tulyeelete kushoma cakutatoonsha kwaamba ayi Yesu ngo Mesiya wakashomeshekwa. Bantu baanji munshiku shino balatoonsha na ncakwiila Yesu wakasalwa mbuli Mwaami wa Bwaami bwakwe Lesa. Joni wakacenjesha ayi “kuli beshikubeca baanji,” beenga bayunga baabo batashomi cakushinisha cancine ncotwiiya pali Yehova alimwi a Yesu. (2 Joni 7-11) Joni wakalemba ayi: “Ono mubeshi ngani, ngooyo utasumini ayi Yesu ngo Klistu?” (1 Joni 2:22) Tulyeelete kwiiya Maswi akwe Lesa kwaamba ayi tutabecekwi. Lyalo ndyeenga twamushiba kabotu Yehova a Yesu. (Joni 17:3) Alimwi ndyeenga twashoma cakutatoonsha kwaamba ayi ncakwiila nshetushoma nshancine.

6. Ino nciinshi ceenga capa kwaamba ayi Kamboni wacanike acileeke kweenda mucancine?

⁶ Beneklistu boonse balyeelete kucenjela kwaamba ayi batayungwi anjiisho sha buntu. (1 Joni 2:26) Bacanike bunene bunene balyeelete kucenjela abuumbi akoose kakukonkela njiisho sha buntu. Nankashi waliina lya Alexia, * ucite myaaka 25, wakucishi ca France wakaamba ayi: “Ndyendakalinga kucikolo ndakeeya njiisho yakwaamba ayi shintu shakasandukabo alimwi anjiisho shimwi, aboobo ndakatalika kutoonsha cancine. Cimwi ciindi njiisho ishi shakalinga kunyumfwika anga nshancine. Nacibi boobo, ndakatalika kuyeeya ayi tacibete kabotu kusuula Baibo nshoiisha akutalika kushoma  makani oonse bamatica ngobaiisha kucikolo.” Nankashi Alexia wakatalika kwiiya libuku lyamu Cisungu lya Life​—How Did It Get Here? By Evolution or by Creation? Lyalo ndipakeendabo nsondo shiniini, wakacileka kutoonsha cancine. Wakaamba ayi: “Ndakesa mukushiba kwaamba ayi anu ncakwiila Baibo nshoyaamba nshancine. Alimwi ndakabona kwaamba ayi kukonkela njiisho shamu Baibo nkweenga kwampa lusangalalo lwancinencine aluumuno.”

7. Ino Beneklistu boonse balyeelete kuleya kucita nshi, alimwi ino nceebonshi?

⁷ Beneklistu boonse balyeelete kuleya kucita shibiibi uku kabasebensela Yehova. Joni wakaamba ayi tatweelete kunokweenda mucancine alimwi paciindi comwi katucita shibiibi. (1 Joni 1:6) Na tulisuni kusangalasha Lesa, lyoonse tulyeelete kwiibaluka kwaamba ayi alabona shintu shoonse nshetucita. Munshila imwi inga twaamba ayi Yehova alabona shintu shili shoonse nshetucita, aboobo taakuwo cibiibi nceenga twaciita Yehova kwakubula kutubona.​—Ebu. 4:13.

8. Ino nciinshi ncotweelete kuleya?

⁸ Tulyeelete kuleya kubona kubisha munshila yakucishi. Mutumwi Joni wakalemba ayi: ‘Ono na twaamba ayi tatubishi, nkokwaamba ayi tutoolibeca sobeene.’ (1 Joni 1:8) Muciindi ca mutumwi Joni, bakapondoka kuswa mucancine bakalinga kulibeca ayi muntu inga watolelela kuba abushicibusa a Lesa nabi atoocita shibiibi kashanga. Bantu baanji munshiku shino abalo mbobayeeya. Baanji balaamba ayi balashoma muli Lesa, sombi balakaka kusumina Yehova nshaamba pamakani akubisha, bunene bunene pamakani akoonana. Kuli koonana Yehova nkwaamba ayi takubete kabotu, sombi bantu aba balaamba ayi kulibo kabotu na muntu mwiine alisuni kucita boobo.

9. Ino mbubotu nshi mbweenga bacanike bacana na kabakonkela Baibo nshoyaamba ayi shililuleme?

⁹ Inga caba ciyumu ku Beneklistu bacanike kutolelela kubona makani akoonana munshila yeelete, na babyaabo kucikolo nabi kuncito tabasumini Baibo nshoyaamba pamakani  akoonana. Ishi nsheshakacitika kumukwesu waliina lya Aleksandar. Wakaamba ayi: “Banakashi kucikolo bakalinga kunjunga ayi ngonane ambabo. Bakankonga akwaamba ayi mukwiinga nshiciteewo mwanakashi, nkokwaamba ayi ndoonana abasankwa.” Mpashi ca mushobo uyu amwebo inga camucitikila, ano na mwakonkela Baibo nshoyaamba ayi shililuleme, mulaakulinyumfwa kabotu, kushitilisha buumi bwanu, kuleya mapensho, akutolelela kuba shicibusa wakwe Yehova. Alimwi lyoonse na kamucikoonsha kukoma meelesho, cilaakuba cuubu kucita shiluleme. Alimwi mutaluubi kwaamba ayi bantu bakucishi balabona makani akoonana munshila itabete kabotu ceebo cakuyungwa a Satana. Aboobo na mwaleya kuyeeya anga mbantu bakucishi, nkokwaamba ayi ‘mwamukoma mubiibi.’​—1 Joni 2:14.

10. Ino 1 Joni 1:9 ilatucafwa buyani kusebensela Yehova anjeelacaamba isalalite?

¹⁰ Tulishi kwaamba ayi Yehova ngoocite nkusu shakutulwiita cibiibi aciluleme. Alimwi tulacita nsheenga twacikonsha kwaamba ayi tuleye kucita shibiibi. Ano na twacita cibiibi, tulalyaambilila cibiibi ico kuli Yehova mumupailo. (Amubelenge 1 Joni 1:9.) Alimwi na twacita cibiibi cinene, tulasenga lucafwo kubamanene abo Yehova mbwakapa mukuli wakutulama. (Jemu. 5:14-16) Nacibi boobo, tatweelete kutolelela kunooyeeyabo pashibiibi nshotwakacita kale kale. Ino nceebonshi? Nceebo cakwaamba ayi Ishiwesu shilusuno wakatupa cilubula ca mulambu wa mwanaakwe kwaamba ayi tulekelelwe shibiibi shesu. Na Yehova waamba ayi alaakulekelela baabo baana cancine, nkokwaamba ayi ncakwiila. Aboobo Yehova wakapa kwaamba ayi tucikoonshe kumusebensela anjeelacaamba isalalite.​—1 Joni 2:1, 2, 12; 3:19, 20.

11. Ino inga twacita buyani kwaamba ayi tuleye njiisho sheenga shanyonyoola lushomo lwesu?

¹¹ Tulyeelete kuleya njiisho shiyuminisha baabo bakapondoka kuswa mucancine. Kuswabo ciindi libungano lya Bwineklistu ndyelyakatalika, Satana aleelesha cankusu kwaamba ayi anyonyoole lushomo lwa Beneklistu.  Aboobo tulyeelete kushiba kabotu bwakupusanya cancine ku njiisho shakubeca. * Balwani besu inga bapukisha makani akubeca kwiinda mukusebensesha intaneti na nshila shimwi kwaamba ayi banyonyoole lushomo lwesu muli Yehova, alusuno ndotucite kubamakwesu abenankashi. Mutabushoomi bubeshi ubo mukwiinga bulaswa kuli Satana!​—1 Joni 4:1, 6; Ciyu. 12:9.

12. Ino nceebonshi tulyeelete kuyumya lushomo lwesu mucancine ncetwakeeya?

¹² Kwaamba ayi tucikoonshe kulwana meelesho akwe Satana, tulyeelete kuyumya lushomo lwesu muli Yesu alimwi alubasu ndwaacite mukukumanisha luyaando lwakwe Lesa. Alimwi tulyeelete kushoma anshila yomwibo Yehova njaatoosebensesha munshiku shino. (Mate. 24:45-47) Inga twayumya lushomo lwesu kwiinda mukubelenga Maswi akwe Lesa bushiku abushiku. Lyalo lushomo lwesu lulaakuyuma anga ncisamu cicite miyaanda ishimpite mubulongo. Paulo wakaambawo makani mbuli aya munkalata njaakalembela libungano lya kubene Kolose. Wakaamba ayi: “Aboobo bweenka mbomwakasumina Klistu Yesu Mwaami, amutolelele kweenda mulucatano anguwe, kamushimpite miyaanda akuyakwa mulinguwe alimwi akukalikana mulushomo.” (Kolo. 2:6, 7) Na twasebensa cankusu kuyumya lushomo lwesu, Satana na abo bali kulubasu lwakwe teshi bakacikoonshe kutupa kwaamba ayi tucileeke kweenda mucancine.​—2 Joni 8, 9.

13. Ino nshiinshi nsheenga twalangila, alimwi ino nceebonshi?

¹³ Tulyeelete kulangila kupatwa kubantu bamucishi. (1 Joni 3:13) Joni wakatwiibalusha ayi “cishi coonse citokweendeleshekwa amubiibi.” (1 Joni 5:19) Mamanino abweende bwa shintu ubu ali pafwiifwi abuumbi, aboobo bukali bwakwe Satana bwatolelela kuya panembo. (Ciyu. 12:12) Taatokweelabo pakusebensesha toose mbuli bulale na makani akubeca aamba bakapondoka kuswa mucancine, sombi weelikaawo akupensha bantu bakwe Lesa. Alicishi kwaamba ayi wacaalabo akaciindi kaniini kakweelesha kwaamba ayi akashe ncito yesu yakushimikila akunyonyoola lushomo lwesu. Aboobo tatukankamani kwaamba ayi incito yesu na mbasu shimwi sha ncito yesu shilakashikwa mushishi shimwi. Nacibi boobo, bamakwesu abenankashi mushishi isho batolelela kuliyumya. Aboobo bantu bakwe Yehova inga batolelela kushomeka nabi Satana acite sha mushobo nshi!

14. Ino nciinshi nceenga twaciita kwaamba ayi tucafwe bamakwesu abenankashi kutolelela kuba mucancine?

¹⁴ Tulyeelete kutondesha nkumbu kwaamba ayi tucikoonshe kucafwa bamakwesu abenankashi kutolelela kuba mucancine. (1 Joni 3:10, 11, 16-18) Tulyeelete kutondeshanya lusuno kuteshibo shintu ndyeshitokweenda kabotu sombi apaciindi ndyekwacitika mapensho. Kucakubonenaako, sa kuli umwi ngomushi wakasowekelwa muntu ngwaasuni mulufu alimwi utoyandika kuyuminishikwa na lucafwo lumwi? Na sa kuli bashominyineesu mbomwakanyumfwa ayi bacitikilwa mapensho anene, aboobo batoyandika lucafwo lwakuyakilwa Ŋanda ya Bwaami na maanda akukalaamo? Tulatondesha ayi tulicite nkumbu alusuno kubamakwesu abenankashi kuteshibo mushintu nshetwaamba sombi amushintu nshetucita.

15. Kweelana a 1 Joni 4:7, 8, ino nshiinshi nshotweelete kucita?

¹⁵ Tulakonkela cakubonenaako cakwe Yehova Ishiwesu kwiinda mukutondeshanya lusuno. (Amubelenge 1 Joni 4:7, 8.) Nshila yomwi iyandika abuumbi mbotutondesha lusuno nkwiinda mukulekelelana. Kucakubonenaako,  muntu umwi inga watukalasha lyalo akusa mukusenga kulekelelwa. Inga twatondesha lusuno kwiinda mukumulekelela akulubaako ku sheesho nshaakatubishisha. (Kolo. 3:13) Mukwesu waliina lya Aldo wakakalala ndyaakanyumfwa mukwesu umwi ngwakalinga kupa bulemu abuumbi kaamba shitabete kabotu pabantu baswa kumusena nkwaakakulila. Mukwesu Aldo wakaamba ayi, “Ndakalinga kupaila lyoonse kuli Yehova kwaamba ayi ancaafwe kutayeeya shibiibi pa mukwesu uyu.” Mukwesu Aldo taakwe kweelabo pakupaila. Wakasenga mukwesu uyo kwaamba ayi basebensele pomwi muncito yakushimikila. Ndyebakalinga pomwi, mukwesu Aldo wakaambila mukwesu uyu umwi mbwaakalinyumfwa ceebo ca makani mukwesu ngakaamba. “Mukwesu uyu ndyaakanyumfwa mbondakalinyumfwa pa maswi atabete kabotu ngakaamba, wakasenga kulekelelwa. Kweelana aliswi mbolyakalinga kunyumfwika ndyaakalinga kusenga kulekelelwa, ndakashiba ayi ncakwiila walinyumfwa cibiibi pasheesho nshakaamba. Pesule lyakubandikishanya twakatalika kunyumfwana alimwi.”

16-17. Ino nshiinshi nshotweelete kuba bashinishite kucita?

¹⁶ Mutumwi Joni wakalinga kubasuni abuumbi bamakwesu abenankashi, aboobo wakalinga kusuni ayi babe alushomo luyumu. Inga twabona ayi ncakwiila wakalinga kubasuni abuumbi akubabikila maano na twalangilisha makani ngakabalembela mumakalata akwe otatwe. Cilayuminisha abuumbi kushiba kwaamba ayi abo bakasalwa kuya mukweendelesha kwiculu pomwi a Klistu mbasankwa abanakashi bacite lusuno alimwi babikila maano bweenka mbuli Joni!​—1 Joni 2:27.

¹⁷ Atubikile maano kumakani ngotwabandika. Atube bashinishite kweenda mucancine, nkokwaamba ayi kunyumfwila Yehova mushintu shoonse nshotucita. Amwiiye Maswi akwe, akwaashoma. Amuyumye lushomo lwanu muli Yesu. Amukake njiisho sha buntu alimwi a sha baabo bakapondoka kuswa mucancine. Amuleye kucita shibiibi uku kamusebensela Yehova alimwi mutakonkeli baabo bamuyuminisha kucita shintu shitabete kabotu. Amukonkele njiisho shakwe Yehova shiluleme pamakani akulilemeka. Alimwi atucafwe bamakwesu kutolelela kuba bayumu kwiinda mukulekelela baabo batukalasha akucafwa baabo babulishite shiyandika. Na twacita boobo, tulaakucikonsha kutolelela kweenda mucancine nabi tucane mapensho.