1. 3 Yoˇhanˬ liꞈ 3, 4 hkʼaw kʼoˆ taˍ ve hkʼe, ngaˬ hui ha lehˬ tuˬ aˬ htoꞈ ma te laˇ ve le?

 Tcuh yaˇ Yoˇhanˬ yawˇ ga piˇ ve chaw hteˇ ve cawˇ ve hkʼaw Yaˬhoˉvaˬ ve kanˉ ka tiꞈ yeˬ leh te chehˇ ve yawˇ gʼa kaˇ htaˇ hkʼaˬ hkʼe taw ha lehˬ ve htaꞈ dawˇ nyi sheˍ. Yawˇ hui shoꞈ shaꞈ ve laiˉ ceuˬ gʼa hpuˇ leh ka tiꞈ yeˬ ve Hkriꞈ yaˇ chi teˇ hpaˍ htaꞈ yawˇ hui ve yonˍ hkʼaˇ htaꞈ awˬ gʼaˇ piˇ tuˬ Yoˇhanˬ coˇ caˇ jaˇ. Chaw chi teˇ hpaˍ lehˬ Yoˇhanˬ ve yaˇ hkʼe hpehꞈ ve yoˬ. Chi ve hkʼa shuˍ shuˍ, ngaˬ hui ve yaˇ leh ngaˬ hui ga piˇ ve chaw Yaˬhoˉvaˬ htaꞈ awˬ to chiˇ aꞈ piˇ leh yawˇ ve kanˉ caˉ leh te ve ngaˬ hui mawˬ htaˇ ha lehˬ jaˇ.—3 Yoˇhanˬ 3, 4 gʼaw sheˍ.

2. Yoˇhanˬ bvuhꞈ ve liꞈ hkʼaw aˬ htoꞈ ma dawˇ teh taˍ ve le?

² 98 hkʼawꞈ C.E. htaˇ, Yoˇhanˬ Eˇfeˇsuꞈ venˇ maˇ heˆ leh venˇ awˬ paˇ lo chehˇ ve yoˬ hehˉ. Nyi˗a kʼo, Paˍmoˆ conˇ htawnˍ hkʼaw tawˆ la peuˬ hkʼaw nawˉ, yawˇ oˇ kaˬ lo ca chehˇ˗e ve yoˬ hehˉ. Oˇ ve teˇ yanˇ, Yaˬhoˉvaˬ ve awˬ ha hpu yawˇ htaꞈ dawˇ pawnˍ piˇ leh liꞈ 3 daw bvuhꞈ tcuh ve yoˬ. Ka tiꞈ yeˬ ve Hkriꞈ yaˇ yawˇ hui Yeˍsuˆ htaꞈ yonˍ ve haꞈ shaˉ gʼa tuˬ leh a shaꞈ teꞈ hkʼaˇ hteˇ ve cawˇ ve awˬ hkʼaˇ suh caˉ leh kʼai gʼa tuˬ dawˇ teh taˍ ve yoˬ.

3. Ngaˬ hui aˬ htoꞈ ma na hkawˇ htaꞈ hkʼawꞈ tuˬ le?

³ Yoˇhanˬ lehˬ tcuh yaˇ hkʼa peu˗eˬ hkʼaw a shaꞈ teꞈ chehˇ ve awˬ leh meuˇ teˇ gʼaˇ hpehꞈ ve yoˬ. Maˇ heˆ heˆ maˍ ve chaw Hkriꞈ yaˇ awˬ moˍ teˇ hpaˍ htaꞈ heuˆ la kuiˬ cawˬ la ve htaꞈ yawˇ dawˇ haˍ ve yoˬ. * (1 Yoˇhanˬ 2:18, 19, 26) Gʼuiˬ sha htaꞈ hpfuhˆ ve chaw chi teˇ hpaˍ yawˇ hui Gʼuiˬ sha htaꞈ shiˍ ve tehꞈ kʼoˆ ve htawˇ, Gʼuiˬ sha ve awˬ liˇ tawˇ hkawˇ htaꞈ maˇ na yuˬ. Awˬ lawn chi ve hkʼaw Yoˇhanˬ beˆ maˍ laˇ ve leh na hkawˇ 3 maˬ htaꞈ ngaˬ hui teˇ geh henˇ tuˬ yoˬ. A shaꞈ teꞈ hkʼaˇ hteˇ ve cawˇ  ve awˬ hkʼaˇ suh kʼai ve hkʼaˬ hkʼe kʼoˆ gaˇ ve le? A shaꞈ teꞈ hkʼaˇ hteˇ ve cawˇ ve awˬ hkʼaˇ suh maˇ kʼai tuˬ aˬ htoꞈ ma te laˇ gʼa ve le? Leh ngaˬ hui ga daꞈ leh hteˇ ve cawˇ ve hkʼaw caˉ leh chehˇ kʼai gʼa tuˬ aˬ htoꞈ ma ga laˇ ve le?

4. 1 Yoˇhanˬ liꞈ 2:3-6 leh 2 Yoˇhanˬ liꞈ 4, 6 hkʼaw kʼoˆ taˍ ve hkʼe, ngaˬ hui a shaꞈ teꞈ hkʼaˇ hteˇ ve cawˇ ve awˬ hkʼaˇ suh kʼai gʼa tuˬ hkʼaˬ hkʼe gʼa te cawˇ ve le?

⁴ A shaꞈ teꞈ hkʼaˇ hteˇ ve cawˇ ve awˬ hkʼaˇ suh kʼai gʼa tuˬ, ngaˬ hui Liꞈ hpu hkʼaw hteˇ ve cawˇ ve htaꞈ gʼa shiˍ cawˇ ve yoˬ. Chi hkʼoˆ kaꞈ, ngaˬ hui “[Yaˬhoˉvaˬ] piˇ taˍ ve tawˇ hkawˇ htaꞈ na yuˬ leh te” cawˇ ve yoˬ. (1 Yoˇhanˬ 2:3-6; 2 Yoˇhanˬ 4, 6 gʼaw sheˍ.) Yeˍsuˆ lehˬ Yaˬhoˉvaˬ hkawˇ na yuˬ ve daꞈ jaˇ ve henˇ yuˬ tuˬ hpehꞈ ve yoˬ. Chi htaꞈ pa taw, ngaˬ hui Yaˬhoˉvaˬ hkawˇ na yuˬ tuˬ a yeˇ uiˍ jaˇ ve lehˬ, ngaˬ hui te gʼa ve hkʼe Yeˍsuˆ htaꞈ henˇ yuˬ cawˇ ve yoˬ.—Yoˇhanˬ 8:29; 1 Peˍtruˆ 2:21.

5. Ngaˬ hui aˬ htoꞈ ma cawˬ ve tehꞈ gʼa yonˍ cawˇ ve le?

⁵ A shaꞈ teꞈ hkʼaˇ hteˇ ve cawˇ ve awˬ hkʼaˇ suh caˉ leh kʼai gʼa tuˬ Yaˬhoˉvaˬ hkʼaˬ htaˆ kaꞈ awˬ tehˬ ve tawˇ tiˉ yaw ve tehꞈ gʼa yonˍ ve yoˬ.Chi htaꞈ pa taw, yawˇ ngaˬ hui htaꞈ kʼoˆ laˇ ve Liꞈ hpu hkʼaw ve hkʼa peu˗eˬ awˬ tehˬ hpehꞈ ve yoˬ. Leh Yeˍsuˆ lehˬ ka tiꞈ te taˍ ve Meˍsiˉyaꞈ hpehꞈ ve tehꞈ ngaˬ hui kaꞈ gʼa yonˍ cawˇ ve yoˬ. Chi beuꞈ teˇ co˗e laiˉ gʼaˇ Yeˍsuˆ Gʼuiˬ sha ve mvuhˇ miˬ hkʼaw Jawˇmawˇ te chehˇ˗oˬ ve laˇ tehꞈ yawˇ hui htawˇ dawˇ nawˬ dawˇ cawˬ ve yoˬ. Yaˬhoˉvaˬ leh Yeˍsuˆ htaꞈ caˉ daꞈ ve hkʼa dehꞈ maˇ yonˍ ve chaw hui htaꞈ “chaw heˍ paˍ laiˉ gʼaˇ” heˍ laˇ tuˬ yoˬ tehꞈ Yoˇhanˬ shaˍ tiꞈ peꞈ laˇ ve yoˬ. (2 Yoˇhanˬ 7-11) Yoˇhanˬ kʼoˆ ve, “heˍ shehˍ hpaˇ a shu le. Yeˍsuˆ lehˬ Hkriꞈ maˇ heˆ tehꞈ kʼoˆ ve gʼawˬ hkʼaˆ ve chaw teˇ gʼaˇ yoˬ maˇ heˆ laˇ?” (1 Yoˇhanˬ 2:22) Ngaˬ hui htaꞈ maˇ heˍ laˇ gʼa ve, Gʼuiˬ sha ve tawˇ hkawˇ henˇ ve teˇ hkʼaˇ tiˉ cawˬ ve yoˬ. Ngaˬ hui chi hkʼe te ve kʼo Yaˬhoˉvaˬ leh Yeˍsuˆ htaꞈ shiˍ daꞈ tuˬ yoˬ. (Yoˇhanˬ 17:3) Leh ngaˬ hui hteˇ ve cawˇ ve cawˬ ve tehꞈ yonˍ gʼa ve yoˬ.

6. Yaˇ nehˬ awˬ tehˬ ve awˬ hkʼaˇ suh maˇ kʼai tuˬ aˬ htoꞈ ma te piˇ gʼa ve le?

⁶ Chaw yaˇ maˍ ve htaꞈ pa taw, Hkriꞈ yaˇ htaꞈ maˇ gʼa heˍ laˇ tuˬ shaˍ tiꞈ gʼa te ve yoˬ. (1 Yoˇhanˬ 2:26) Yaˇ nehˬ teˇ hpaˍ chi htaꞈ shaˍ tiꞈ gʼa te ve yoˬ. Hpaˉlanˍ mvuhˇ miˬ lo ve awˬ viˉ awˬ nyi yaˇ miˇ teˇ gʼaˇ A˗leˆseˍyaˬ * 25 hkʼawꞈ gaˬ˗oˬ ve kʼoˆ ve, “ngaˬ liꞈ  henˇ yehˬ lo chehˇ htaˇ, a shaꞈ teꞈ ve yawˇ hkʼaˇ yawˇ cawˬ la gʼa ve leh chaw yaˇ ve cuˇ yiˍ ve awˬ lawn gʼa henˇ ve yoˬ. Chi hkʼe gʼa henˇ ve lehˬ ngaˬ awˬ tehˬ ve htaꞈ htawˇ dawˇ nawˬ dawˇ cawˬ tuˬ te laˇ ve yoˬ. Teˇ pawˆ pawˆ ngaˬ chi hkʼe ve htaꞈ dawˇ cawˇ jaˇ. Yaꞈ hkʼaˇ, Liꞈ hpu hkʼaw maˍ laˇ ve htaꞈ a yeˇ maˇ yuˬ leh liꞈ henˇ yehˬ lo saˍ laꞈ maˍ laˇ ve teˇ ceuˬ le le htaꞈ yonˍ ve chi yaꞈ ve tehꞈ dawˇ ve yoˬ.” A˗leˆseˍyaˬ A shaꞈ hkʼaˬ hkʼe te cawˬ la gʼa ve le? A shaꞈ teꞈ ve yawˇ hkʼaˇ yawˇ cawˬ la gʼa ve maˇ heˆ leh hpanˍ shehˍ hpaˇ cawˬ ve laˇ? tehꞈ liꞈ kʼoˆ chi yawˇ gʼa henˇ ve yoˬ. Chi henˇ ve hkʼaˬ nyiˇ shinˉ maˇ gaˬ sheˍ ve kaꞈ, htawˇ dawˇ nawˬ dawˇ maˇ cawˬ˗oˬ. A˗leˆseˍyaˬ kʼoˆ ve, “Liꞈ hpu hkʼaw cawˬ ve awˬ ceuˬ awˬ tehˬ hpehꞈ ve htaꞈ ngaˬ hkʼa dehꞈ chaˬ nyi ve yoˬ. Leh Liꞈ hpu hkʼaw ve awˬ liˇ awˬ hkʼaˇ ngaˬ ha lehˬ leh dawˇ sha gawˬ lehˍ cawˬ tuˬ te laˇ ve tehꞈ na gʼa ve yoˬ.”

7. Ngaˬ hui aˬ htoꞈ ma maˇ te tuˬ shaˍ tiꞈ te cawˇ ve le? Leh aˬ htoꞈ ma pa taw le?

⁷ Hkriꞈ yaˇ teˇ gʼaˇ le le yaˇ nehˬ leh chaw mawˇ htawˇ, Yaˬhoˉvaˬ ve kanˉ te ve shu mawˬ tuˬ ceh leh yaꞈ ve maˇ gʼa te tuˬ shaˍ tiꞈ gʼa te ve yoˬ. Yoˇhanˬ kʼoˆ ve, ngaˬ hui a shaꞈ teꞈ hkʼaˇ hteˇ ve cawˇ ve awˬ hkʼaˇ suh kʼai leh yaꞈ ve awˬ ceuˬ htaꞈ maˇ gʼa te. (1 Yoˇhanˬ 1:6) Yaˬhoˉvaˬ ngaˬ hui htaꞈ nyi hkʼaˇ suh tcuh gaˇ ve kʼo, Yaˬhoˉvaˬ ngaˬ hui te ve teˇ ceuˬ le le htaꞈ mawˬ ve tehꞈ hkʼaˬ htaˆ kaꞈ tawnˇ taˍ sheˍ. Ngaˬ hui shu maˇ mawˬ kuiˬ lo te ve awˬ ceuˬ htawˇ, Yaˬhoˉvaˬ mawˬ ve yoˬ.—Heˍbrehˇ 4:13.

8. Ngaˬ hui aˬ htoꞈ ma htaꞈ maˇ haꞈ yuˬ cawˇ ve le?

⁸ Venˇ baˆ htaꞈ caˉ daꞈ ve miˬ guiˬ yaˇ ve dawˇ hkʼaˇ hkʼe ngaˬ hui maˇ gʼa dawˇ tuˬ shaˍ tiꞈ gʼa te ve yoˬ. Tcuh yaˇ Yoˇhanˬ kʼoˆ ve, “ngaˬ hui venˇ baˆ maˇ cawˬ tehꞈ kʼoˆ ve kʼo, ngaˬ hui a shu yawˇ awˬ to htaꞈ heˍ” ve yoˬ. (1 Yoˇhanˬ 1:8) Yoˇhanˬ ve awˬ co˗e htaˇ, Gʼuiˬ sha htaꞈ hpfuhˆ ve chaw, Gʼuiˬ sha taˇ te kʼoˆ ve awˬ ceuˬ htaꞈ te gʼa leh Gʼuiˬ sha htaꞈ awˬ chawˇ te gʼa ve tehꞈ yawˇ hui kʼoˆ ve yoˬ. Chi beuꞈ teˇ co˗e ngaˬ hui awˬ paˇ awˬ kui chehˇ ve chaw kaꞈ chi hkʼe dawˇ ve yoˬ. Laiˉ gʼaˇ Gʼuiˬ sha htaꞈ yonˍ ve tehꞈ kʼoˆ ve htawˇ, venˇ baˆ leh teˇ geh zuhꞈ ve awˬ lawn htaꞈ caˉ daꞈ ve Yaˬhoˉvaˬ yawˇ hui htaꞈ kʼoˆ piˇ ve maˇ  haꞈ yuˬ. Yaˬhoˉvaˬ yaꞈ ve tehꞈ kʼoˆ ve awˬ ceuˬ htaꞈ ngaˬ hui te gaˇ ve kʼo te gʼa ve tehꞈ yawˇ hui haꞈ yuˬ ve yoˬ.

9. Shaˉhkiˆhkanˍ ve chaw yaˇ nehˬ Liꞈ hpu hkʼaw cawˇ ve htaꞈ gʼaꞈ te htaˇ aˬ htoꞈ ma te daꞈ ve le?

⁹ Liꞈ henˇ kuiˬ, kanˉ te kuiˬ, leh awˬ paˇ awˬ kui lo ve chaw, Liꞈ hpu hkʼaw maˍ piˇ ve htaꞈ yawˇ hui maˇ haꞈ yuˬ ve pa taw, Shaˉhkiˆhkanˍ ve chaw yaˇ nehˬ teˇ geh zuhꞈ ve awˬ lawn cawˇ ve hpawˇ dawˇ tuˬ haˍ jaˇ. Chi hkʼe ve Aˍleˆsanˍdeuˆ gʼa hpuˇ ve yoˬ. Yawˇ kʼoˆ ve, “liꞈ henˇ kuiˬ lo yaˇ miˇ teˇ hpaˍ ngaˬ yawˇ hui geh zuhꞈ tuˬ nyiˉ laˇ ve yoˬ. Yawˇ hui kʼoˆ ve ngaˬ yaˇ miˇ haˉ maˇ cawˬ ve kʼo, hawˉ hkʼaˆ htaꞈ dawˇ cawˇ ve tehꞈ kʼoˆ ve yoˬ.” Chi ve hkʼa shuˍ shuˍ nawˬ kaꞈ gʼa hpuˇ puiˉ la ve yoˬ. Yaꞈ hkʼaˇ, nawˬ Liꞈ hpu hkʼaw cawˇ ve tehꞈ kʼoˆ laˇ ve htaꞈ te ve kʼo, nyi sha ve, nyi ma maˇ luˬ ve, chehˇ sha ve, leh Yaˬhoˉvaˬ geh meuˆ daꞈ ve htaꞈ haꞈ shaˉ gʼa ve yoˬ. Beˬ ve lawˇ ve htaꞈ nawˬ tawˍ daꞈ gʼaˇ htaˇ, cawˇ ve htaꞈ te tuˬ sha ve yoˬ. Miˬ guiˬ yaˇ teˇ geh zuhꞈ ve awˬ lawn maˇ cawˇ ve hpawˇ dawˇ ve Saˍtanˍ geh laˬ ve tehꞈ tawnˇ taˍ sheˍ. Chi htaꞈ pa taw, miˬ guiˬ yaˇ hkʼe nawˬ maˇ haꞈ yuˬ htaˇ, nawˬ ‘haiˬ ve awˬ shehˍ hpaˇ htaꞈ gʼaˇ ve yoˬ.’—1 Yoˇhanˬ 2:14.

10. 1 Yoˇhanˬ liꞈ 1:9 Liꞈ hpu chi teˇ tawn lehˬ, ngaˬ hui dawˇ shiˍ puiˉ ve nyi ma daꞈ kehˬ ve hkʼaw Yaˬhoˉvaˬ ve kanˉ caˉ leh te gʼa tuˬ hkʼaˬ hkʼe ga laˇ ve le?

¹⁰ Venˇ baˆ ve awˬ lawn Yaˬhoˉvaˬ kʼoˆ laˇ tuˬ a hkaw˗anˬ cawˬ ve tehꞈ ngaˬ hui haꞈ yuˬ ve yoˬ. Ngaˬ hui venˇ baˆ maˇ gʼa te tuˬ te gʼa ve hkʼe teˇ ceuˬ le le te ve yoˬ. Yaꞈ hkʼaˇ, ngaˬ hui venˇ baˆ te htaˇ, ngaˬ hui te yaꞈ ve awˬ ceuˬ bon lawˬ ve hkʼaw Yaˬhoˉvaˬ htaꞈ kʼoˆ maˍ piˇ. (1 Yoˇhanˬ 1:9 gʼaw sheˍ.) Chi hkʼoˆ kaꞈ, ngaˬ hui venˇ baˆ uiˍ jaˇ ve htaꞈ te yaꞈ ve kʼo, ngaˬ hui htaꞈ nyi haꞈ shaˉ laˇ tuˬ, Yaˬhoˉvaˬ leuˆ teh taˍ ve chaw htaꞈ ga laˇ tcuh sheˍ. (Yaˍkoˆ 5:14-16) Oˇ htaˇ ngaˬ hui te yaꞈ jaw ve htaꞈ caˉ leh nyi ma maˇ luˬ cawˇ. Aˬ htoꞈ ma pa taw le? Awˬ lawn kʼo ngaˬ hui htaꞈ haꞈ jaˇ ve Awˬ pa yawˇ ve yaˇ teˇ gʼaˇ tiˉ ve venˇ baˆ awˬ pon htaiˍ hkʼawꞈ tcuh laˇ ve yoˬ. Chi htaꞈ pa taw, awˬ tehˬ venˇ baˆ dawˇ hpfuhˆ ve chaw htaꞈ Yaˬhoˉvaˬ venˇ baˆ hpehˇ laˇ ve yoˬ. Hkʼe te leh, ngaˬ hui dawˇ shiˍ puiˉ ve nyi ma daꞈ kehˬ ve hkʼaw Yaˬhoˉvaˬ ve kanˉ caˉ leh  te gʼa tuˬ yawˇ ga laˇ ve yoˬ.—1 Yoˇhanˬ 2:1, 2, 12; 3:19, 20.

11. Ngaˬ hui ve yonˍ hkʼaˇ maˇ gʼa i kʼai tuˬ hkʼaˬ hkʼe te haꞈ shaˉ gʼa tuˬ le?

¹¹ Gʼuiˬ sha htaꞈ hpfuhˆ ve chaw maˍ laˇ ve htaꞈ ngaˬ hui maˇ haꞈ yuˬ. Awˉ lawˉ peuˇ ve Hkriꞈ yaˇ awˬ moˍ tanˬ htaˇ, Hkriꞈ yaˇ ve yonˍ hkʼaˇ awˬ gʼaˇ nuˇ tuˬ Saˍtanˍ chaw laiˉ gʼaˇ htaꞈ cuˇ leh heˍ ve yoˬ. Chi htaꞈ pa taw, awˬ tehˬ ve leh heˍ ve ngaˬ hui gʼa shiˍ cawˇ ve yoˬ. * Ngaˬ hui Yaˬhoˉvaˬ leh awˬ viˉ awˬ nyi geh meuˆ daꞈ ve i kʼai tuˬ, ngaˬ hui htaꞈ maˇ dawˇ cawˇ ve chaw in˗teu˗neꞈ leh awˬ chawˇ geh caˉ daꞈ tuˬ ve awˬ hkʼeun hkʼaw, ngaˬ hui htaꞈ caˉ daꞈ ve awˬ lawn heˍ ve bvuhꞈ keu ve yoˬ. Yaꞈ hkʼaˇ, heˍ ve chi teˇ hpaˍ Saˍtanˍ geh laˬ ve pa taw taˇ na!—1 Yoˇhanˬ 4:1, 6; Hpeuꞈ maˍ ve 12:9.

12. Ngaˬ hui gʼa henˇ taˍ ve awˬ tehˬ ve aˬ htoꞈ ma te ngaˬ hui ve yonˍ hkʼaˇ uiˍ la mvuh la tuˬ te cawˇ ve le?

¹² Saˍtanˍ beˬ ve htaꞈ tawˍ daꞈ gʼaˇ tuˬ, ngaˬ hui Yeˍsuˆ htaꞈ gʼa yonˍ yeˬ ve yoˬ. Yaˬhoˉvaˬ yawˇ ve a loˍ biˇ la tuˬ Yeˍsuˆ htaꞈ cuˇ ve yoˬ tehꞈ gʼa yonˍ ve yoˬ. Chi hkʼoˆ kaꞈ, Yaˬhoˉvaˬ yawˇ ve kanˉ hkʼaˇ biˇ la tuˬ, ka tiꞈ yeˬ leh cuˇ yiˍ cawˬ ve awˬ ceˬ htaꞈ cuˇ ve tehꞈ ngaˬ hui gʼa yonˍ ve yoˬ. (Maꞈhtehˍ 24:45-47) Ngaˬ hui ve yonˍ hkʼaˇ uiˍ la mvuh la tuˬ Liꞈ hpu hkʼaˬ htaˆ kaꞈ gʼa henˇ ve yoˬ. Ngaˬ hui chi hkʼe te ve kʼo, suhˆ cehˬ awˬ geu tcuhˆ naˉ ve hkʼe hpehꞈ ve yoˬ. Pawˇluꞈ Kawˇlawˇsehˇ Hkriꞈ yaˇ awˬ moˍ htaꞈ liꞈ bvuhꞈ piˇ htaˇ chi hkʼa shuˍ kʼoˆ ve yoˬ. Yawˇ kʼoˆ ve, “Jawˇmawˇ Yeˍsuˆ Hkriꞈ htaꞈ nawˬ hui haꞈ yuˬ peuˬ ve hkʼe yawˇ awˬ hkʼaw lo kʼai chehˇ˗oˆ. Yawˇ awˬ hkʼaw lo nawˬ hui awˬ geu gʼa tcuhˉ nawꞈ taˍ leh gʼa uiˍ la yeˬ la chehˇ ve yoˬ.” (Kawˇlawˇsehˇ 2:6, 7) Ngaˬ hui yonˍ hkʼaˇ uiˍ la mvuh la tuˬ te ve kʼo, ngaˬ hui hteˇ ve cawˇ ve awˬ hkʼaˇ suh maˇ kʼai tuˬ Saˍtanˍ te laˇ maˇ gʼa.—2 Yoˇhanˬ 8, 9.

13. Ngaˬ hui aˬ htoꞈ ma awˬ lawn htaꞈ anˇ tuˬ maˇ loˍ ve le?

¹³ Miˬ guiˬ yaˇ ngaˬ hui htaꞈ canˇ ve anˇ tuˬ maˇ loˍ. (1 Yoˇhanˬ 3:13) “Miˬ guiˬ hkʼa peu˗eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ ve” tehꞈ Yoˇhanˬ ngaˬ hui htaꞈ shaˍ tiꞈ peꞈ laˇ ve yoˬ. (1 Yoˇhanˬ 5:19) Chi teˇ hkui awˬ leh meuˇ ve awˬ yanˇ gaˬ la paˇ neˇ ve pa taw, Saˍtanˍ beuꞈ jaˇ. (Hpeuꞈ maˍ ve 12:12) Pehꞈ ve tzuhˆ ve leh Gʼuiˬ sha htaꞈ hpfuhˆ ve chaw heˍ ve htaꞈ ceh Saˍtanˍ yehˇ ve maˇ heˆ. Yaꞈ hkʼaˇ, Saˍtanˍ fawˉ mehˍ piˇ ve hehnˇ jaˇ ve htaꞈ kaꞈ yehˇ ve yoˬ. Saˍtanˍ yawˇ ve awˬ yanˇ a ciˉ ceh cawˬ ve htaꞈ shiˍ ve pa taw, ngaˬ hui Gʼuiˬ sha ve kanˉ te ve leh ngaˬ hui ve yonˍ hkʼaˇ htaꞈ te luˬ gaˇ ve yoˬ. Chi htaꞈ pa taw, ngaˬ hui Gʼuiˬ sha ve kanˉ te tuˬ a hkaw˗anˬ maˇ gʼa leh mvuhˇ miˬ teˇ hpaˍ hkʼaw Gʼuiˬ sha ve kanˉ hkʼa dehꞈ maˇ gʼa te ve anˇ tuˬ maˇ loˍ. Chi hkʼe hpehꞈ ve htawˇ, ngaˬ hui ve awˬ viˉ awˬ nyi yeunˇ hkanˍ chehˇ ve yoˬ. Chi htaꞈ pa taw, Saˍtanˍ ngaˬ hui htaꞈ hkʼaˬ hkʼe te laˇ ve htawˇ, caˉ leh ka tiꞈ yeˬ gʼa ve yoˬ.

14. Awˬ viˉ awˬ nyi awˬ tehˬ ve hkʼaw chehˇ tuˬ ga piˇ gʼa ve teˇ hkʼaˇ aˬ htoꞈ ma le?

¹⁴ Ngaˬ hui ve awˬ viˉ awˬ nyi awˬ tehˬ ve hkʼaw chehˇ ve ga piˇ gʼa tuˬ ngaˬ hui gʼa ha kʼaˉ ve yoˬ. (1 Yoˇhanˬ 3:10, 11, 16-18) Ngaˬ hui teˇ ceuˬ le le daꞈ˗oˬ htaˇ ceh gʼa haꞈ daꞈ ve maˇ heˆ. Yaꞈ hkʼaˇ, shoꞈ shaꞈ ve cawˬ htaˇ kaꞈ gʼa haꞈ daꞈ ve yoˬ. Tawˇ pa haˉ te kʼo, nawˬ shiˍ daꞈ ve chaw teˇ gʼaˇ yawˇ haꞈ ve chaw suh˗e ve nawˬ gʼa kaˇ htaˇ, yawˇ htaꞈ awˬ gʼaˇ piˇ leh awˬ nu ve awˬ hkʼaˇ kaꞈ ga piˇ˗aw laˇ? Mvuhˇ yeˬ mvuhˇ haw leh awˬ nu ve awˬ ceuˬ gʼa hpuˇ ve pa taw, awˬ viˉ awˬ nyi ve mawˇ luˬ kʼai ve kʼo, hpawnˬ daꞈ kuiˬ yehˬ leh yawˇ hui ve yehˬ kʼawꞈ gu te tuˬ loˍ ve nawˬ gʼa kaˇ˗aw laˇ? Ngaˬ hui awˬ viˉ awˬ nyi htaꞈ haꞈ ve kʼoˆ ve ceh maˇ heˆ. A yeˇ uiˍ jaˇ ve lehˬ gʼa te tawˆ la ve yoˬ.

15. 1 Yoˇhanˬ liꞈ 4:7, 8 hkʼaw kʼoˆ taˍ ve hkʼe, ngaˬ hui hkʼaˬ hkʼe gʼa te cawˇ ve le?

¹⁵ Teˇ gʼaˇ leh teˇ gʼaˇ haꞈ daꞈ htaˇ, ngaˬ hui mvuhˇ naw ma hkʼoˆ ve Awˬ pa htaꞈ henˇ yuˬ gʼa ve yoˬ. (1 Yoˇhanˬ 4:7, 8 gʼaw sheˍ.) Haꞈ daꞈ ve a yeˇ uiˍ jaˇ ve lehˬ venˇ baˆ gʼa hpehˇ daꞈ ve yoˬ. Tawˇ pa haˉ te kʼo, chaw teˇ gʼaˇ ngaˬ hui beuꞈ tuˬ te laˇ leh peuˬ hkʼawꞈ nawˉ lawˬ hkawˉ laˇ ve kʼo, ngaˬ hui yawˇ  hui htaꞈ venˇ baˆ hpehˇ piˇ leh yaꞈ ve htaꞈ maˇ kʼawꞈ dawˇ nyi˗o. (Kawˇlawˇsehˇ 3:13) Awˬ viˉ awˬ nyi Aˉdonˍ yawˇ yawˆ yan ve awˬ viˉ awˬ nyi teˇ gʼaˇ yawˇ htaꞈ chaw liˇ vaˇ liˇ maˇ daꞈ ve hpawˇ kʼoˆ piˇ ve pa taw beuꞈ ve yoˬ. Aˉdonˍ kʼoˆ ve “awˬ viˉ awˬ nyi oˇ ve teˇ gʼaˇ htaꞈ ngaˬ maˇ daꞈ ve hpawˇ maˇ dawˇ tuˬ Yaˬhoˉvaˬ ga laˇ tuˬ hkʼaˬ htaˆ kaꞈ bon lawˬ ve yoˬ.” Yaꞈ hkʼaˇ, Aˉdonˍ chi aꞈ kehˉ te ve yoˬ. Yawˇ dawˇ cheˆ leh awˬ viˉ awˬ nyi oˇ ve teˇ gʼaˇ geh hto toˇ˗e tuˬ ca lawˬ ve yoˬ. Teˇ geh hto toˇ˗e htaˇ, awˬ viˉ awˬ nyi kʼoˆ ve htaꞈ Aˉdonˍ hkʼaˬ hkʼe taw beuꞈ ve kʼoˆ maˍ piˇ ve yoˬ. Aˉdonˍ kʼoˆ ve, “ngaˬ hkʼaˬ hkʼe kʼoˆ ve awˬ viˉ awˬ nyi oˇ ve shiˍ htaˇ yawˇ lawˬ hkawˉ laˇ ve yoˬ. Yawˇ kʼoˆ ve nyi ma luˬ ve tehꞈ ngaˬ shiˍ ve yoˬ. Peuˬ hkʼawꞈ nawˉ, ngaˬ hui daꞈ ve awˬ chawˇ kʼawꞈ hpehꞈ ve yoˬ.”

16-17. Ngaˬ hui aˬ htoꞈ ma te tuˬ dawˇ teh taˍ cawˇ ve le?

¹⁶ Tcuh yaˇ Yoˇhanˬ awˬ viˉ awˬ nyi htaꞈ haꞈ jaˇ ve leh yonˍ hkʼaˇ uiˍ la mvuh la tcuh gaˇ ve yoˬ. Yawˇ ve liꞈ 3 daw hkʼaw awˬ viˉ awˬ nyi htaꞈ haꞈ leh dawˇ haˍ ve tehꞈ ngaˬ hui hkʼa tawˍ lehˆ gʼa mawˬ ve yoˬ. Yoˇhanˬ hkʼa shuˍ mvuhˇ naw ma hkʼoˆ Yeˍsuˆ geh teˇ geh uˉ peunˍ tuˬ ve chaw kaꞈ ngaˬ hui htaꞈ haꞈ leh dawˇ haˍ ve ngaˬ hui shiˍ htaˇ ha lehˬ jaˇ!.—1 Yoˇhanˬ 2:27.

¹⁷ Ngaˬ hui gʼa henˇ peuˬ ve htaꞈ a yeˇ yuˬ sheˍ. Yaˬhoˉvaˬ hkawˇ na yuˬ leh ngaˬ hui te ve teˇ ceuˬ le le a shaꞈ teꞈ hkʼaˇ hteˇ ve cawˇ ve awˬ hkʼaˇ suh kʼai tuˬ dawˇ teh taˍ sheˍ. Liꞈ hpu hkʼaw Gʼuiˬ sha ve awˬ liˇ tawˇ hkawˇ henˇ leh gʼaˇ va sheˍ. Ngaˬ hui Yeˍsuˆ htaꞈ yonˍ yeˬ sheˍ. Chaw yaˇ maˍ ve leh Gʼuiˬ sha htaꞈ hpfuhˆ ve chaw maˍ ve htaꞈ tawˍ baˬ sheˍ. Gʼuiˬ sha ve kanˉ shu mawˬ kuiˬ hkʼaw ceh te leh yaꞈ ve hkʼaw taˇ te. Ngaˬ hui htaꞈ yaꞈ tuˬ te tcuh gaˇ ve chaw hkawˇ taˇ na. Yaˬhoˉvaˬ ve awˬ liˇ awˬ hkʼaˇ daꞈ jaˇ ve htaꞈ gʼaꞈ te sheˍ. Awˬ viˉ awˬ nyi yonˍ hkʼaˇ uiˍ la mvuh la tuˬ ga piˇ leh ngaˬ hui beuꞈ tuˬ te laˇ ve chaw htaꞈ venˇ baˆ hpehˇ piˇ leh loˍ ve chaw htaꞈ ga piˇ sheˍ. Ngaˬ hui chi hkʼe te ve kʼo hkʼaˬ hkʼe ve htaꞈ gʼa tawˍ daꞈ ve htawˇ, a shaꞈ teꞈ hkʼaˇ hteˇ ve cawˇ ve awˬ hkʼaˇ suh caˉ leh kʼai gʼa ve yoˬ.