1. N’nga ngumwasa uvi okalela aimwerumweru unofwanya i-yo va lemba la 3 Juwau 3, 4?

RUMIWI Juwau utokami-a atu anjinji ira kafunjedhe imbarimbari. Wa liye makristawala kali ninga a-imee. Moi kanogumanana nyarwa dhinjinji, aliwa kata-iidhe lambela Yohova. Munooda thuulela imwerumweru yan’na Juwau? Malamboano thitho i-yo ninooda kaana imwerumweru naonanga a-imi-u oabala na aunemba tadhowanganave lambela Yohova thitho nolimba mwaunembaa.​—Muleri 3 Juwau 3, 4.

2. N’nga makarta alemba Juwau aya waan’ni?

² Kumela yawa ya 98  C.E. Juwau akalecha wu Aefeso venango vakwikwi na wewo. Vinooneya ira liye adhowile wewo agakumile perezo ya isuwa ya Patmo. Vahora yenne nemba ochena wa Yohova watomlimbi-a Juwau ira alembe makarta mararu vofuna limbi-a makristau ororomeleya ira ka-a-iye roromela Yesu thitho dhoanave wenda mwiimbarimbari.

3. N’nga ndivyofuka viivi vinofuna dharumeliwa va yofunjedha yei?

³ Juwau ali rumiwi a-adhiwo thitho liye anothakaleliwana mafunji-edho airechana anamafunji-a onama mipingoni. * (1 Ju. 2:18, 19, 26) Aliwa taongecha ira atommwidhiwa Nlungu, mbwenye katavwela malamulwee. Dhoweni nione malangi-o akumi-idhe Yohova alembiwile na rumiwi Juwau. Mwari mofunjedha ninofwanya vyowakula vya vyofuka viraru ninga vi: N’nga wenda mwiimbarimbari unothapulelan’ni? N’nga ndimyasa dhiivi dhinaniimwanani-e wenda mwiimbarimbari? N’nga ninaire a-vi ira nilimbi-engana mutu na fwee vodhowanave kala olimba iroromelo?

4. Movwelana na lemba la 1 Juwau 2:3-6 na 2 Juwau 4, 6, n’nga ninofwanela iran’ni ira nidhowenave wenda mwiimbarimbari?

⁴ Akala ninofuna wenda mwiimbarimbari ninofuneela idhiwa imbarimbari inofwanyeya mmadhu a Nlungu kumela Bibilyani, kumi-avo vyevyo ninofwanela vwela malamulo a Yohova. (Muleri 1 Juwau 2:3-6; 2 Juwau 4, 6.) Yesu ndiifwanafwani-o yapama vamwasa ovwela Yohova. Va mwasa wen’na ndivyofuneya vinjinji vwela Yohova vo-arela ifwanafwani-o ya Yesu mwapolepole.​—Juwau 8:29; 1 Pe. 2:21.

5. N’nga ninofwanela roromelan’ni?

⁵ Ira nidhowenave wenda mwiimbarimbari ninofwanela roromela ira Yohova ngu Nlungu waimbarimbari thitho vyoira vyothene vinoonga liye,dhela Bibilyani pyaimbarimbari. Nororomela ira Yesu ngu Mesiya olanyedhiwa. Atu anjinji malamboano anokaikela ira Yohova utomsakula Yesu kala Mwene wa Umwene wa Nlungu. Juwau atoongelatu ira “vatokala onama anjinji” awesedha nami-a atu ale tali ta-anaidhiwe imbarimbari yooda vunelana dhina la Yohova na Yesu. (2 Ju. 7-11) Juwau alembile ira: “N’nga unonama mbaan’ni, kai ule unokonda ira Yesu ngu Kristu?” (1 Ju. 2:22) Ikundu imbo-i inofuna i-yo kala ira na-anami-iwe kukala anamafunjedha apama vamadhu a Nlungu ndivyevyo vinaniidhiwi-e makalelo a Yohova na Yesu. (Juwau 17:3) Naira ee-no ninoda roromela ira nitokaana imbarimbari.

6. N’nga ndi vyongo viivi vyorucha vinogumanana azombwe?

⁶ Makristau othene anofwanela ira polepole ira ta-aode nami-iwa na mafuji-edho aundhe. (1 Ju. 2:26) Simbwasimbwa waazombwe anofwanela kala methove ira ta-agwele go-ini. Alexia * rongola wau Farasa wa vyawa 25 uongile en’ni: “Vvyali miyo mwana kandavwechecha pama mafunji-edho a ilambo va mwasa wa vyopanduchiwa. Miyo ndanodhiveliwa zelu dhedhi. Mbwenye kavinakala vyolongomana roromela vyongo vyothene vinofunja miyo xikolani a-iyacheda Yohova ngari yofuna o-onga.” Alixia atofunjedha buku la Mmene Moyo Unayambira? Zinthu Zinachita Kusintha Kuchokera ku Zinthu Zina? Vangavirile masumana vyakaikela liye vyothene vyatomala liye unoonga ira: Miyo nditoona mekene ira Bibilya litokaana imbarimbari. Thitho nditoona ira a-rela malangi-o anofunji-a aliwa unodhi-a rendele na imwerumweru.

7. N’nga ndivyongo viivi vinofuna i-yo gumanana, n’nga mwasiwa ngwan’ni ninofwanela limbanana?

 ⁷ Makristau othene kumela azombwe naandimuwene anofwanela limbanana ingumi yofuna vinjinji. Rumiwi Juwau alembile ira kaninawende mwiimbarimbari, thitho hora imbo-ive irana vyongo vyailambo. (1 Ju. 1:6) Akala ninofuna ira niroromele peeno na vyasogolo ninofwanela thuulela ira Yohova unoona vyongo vyothene vinoira i-yo. Mwaimbarimbari kavali yodawa jili jolokoteya mwasiwa vyongo vyothene vinoira i-yo vili “vyodhuleya thitho vyooneya vamethoni” va Yohova.​—Aeb. 4:13.

8. N’nga ninofwanela rambelan’ni?

⁸ Ninofwanela rambela maonelo ailambo va mwasa wa vyodawa. Rumiwi Juwau alembile ira: “akala naonganga, ira kanina madao,’ ninaavinami-a okene.” (1 Ju. 1:8) Hora ya rumiwi Juwau anamafunji-a tatoonga ira mutu unooda dawa komove na dhowanave kala xamwali wa Nlungu. Malamboano thitho i-yo ninowendana atu amathuulelo ninga enala. Atu anjinjii anorumela ira anororomela Nlungu mbwenye aliwa katinorumela maonelwee va mwasa wa vyondawa simbwasimbwa va mwasa wa mararu-o. Yohova inoonga liye ira chothakala atwao anoonga ira chapama, thitho ndijosakula jamutu no kaana ingumi yapama.

9. N’nga ndi maraeli-o aavi anowachela azombwe kalimbanana nyarwa, thitho kasakula vyongo viidhi aliwa ira pyapama?

⁹ Azombwe apama anooda ona kala vyo-orucha ona vyodawa ninga munoona afwiwa axikolani venango a basani munoonela aliwa. Ndivyevyo vyamwiireele Aleksandar. Liye unothuulela: asikana enango axikolani kanodhikanyi-edha ira ndiire mararu-o naaliwa. Aliwa kaongecha ira na mwasa oira miyo kandina imweendi kaiira ndili ngomwa. N’nga nyo thitho munolimbana na mwasa ninga wen’na? Va mwasa wen’na thuulelani ira, irana vyongo viidhinyo ira pyapama vinoudhi-edhani  maraeli-o. Irana vinoonga Bibilya unobarela mathuulelinyu, ingumi yinyu, imwerumweru yinyu thitho na uxamwalinyu na Yohova. Vanolimbananyo mawesedho mwaimbarimbari munairenga limba mwaunemba thitho munade-di-edhenga o-arela ira mwaalimbanena. Thitho kamudiwale ira mathuulelo a mararuo akumele wa Satana. Na mwasa wen’na va hora inodhikondi-a nyo vyongo vyothakala nyo ‘munongonji-a Othakaluo.’​—1 Ju. 2:14.

10. N’nga lemba la 1 Juwau 1:9 linanikami-a a-vi ira nilambele Yohova na ithuulela rima yapama?

¹⁰ I-yo nitoidhiwa ira Yohova utokaana izo yomali-a vyodawa na vyothakala. Mbwenye i-yo ninoirana vinaode i-yo ira na-airena vyodawa. Mbwenye akala nitodawa ninoonga na Yohova lobeloni. (Muleri 1 Juwau 1:9.) Akala yodawa ji-u chiilukulu i-yo ninosaka andimuwa avapingoni. aliwa tasakuliwile na Yohova ira tanikami-enga. (Tiy. 5:14-16) Va hora imbo-ive ninofwanela ira polepole ira na-avionenga kala o-ofuneya mwasa wa vyodawa viirile i-yo walelene. Mwaimbarimbari Babi-u waudhivela Yohova u-niva-a mwanee ninga kuto okunela vyodawa vi-u. Akala Yohova onoonga ira unolevelela mulimbo dawa liye unoleveleladi mwaimbarimbari, moi ee-no ninooda lambela Yohova na ithuulela rima yapama.​—1 Ju. 2:1, 2, 12; 3:19, 20.

11. N’nga ninavunele a-vi mathuulelwi-u wa vyofunji-a vyofooki-a iroromelwi-u

¹¹ Ninofwanela rambela mafunji-edho onama. Romela vakaathi-iwile pingo waukristau, Satana unooda wesedha dhala mbeu dhokaikeli-a mathuuleloni mwa anamalaba ororomeleya a Nlungu. Ngumwasiwa, ninofwanela idhiwechecha pama ira imbarimbari njivi n’nga vyonama piivi. * Amwidani-u anooda indi-edha basa interneti ira kaode nifooki-a iroromelo yi-u wa Yohova thitho udhiveli-u naabali-u. Mbwenye mumthuulelenga wenuo  unairi-a vyothene vyevyo thitho rambelani vyonama.​—1 Ju. 4:1, 6; Apok 12:9.

12. Mwasiwa ngwan’ni ninofwanela limbi-a iroromelo yi-u?

¹² Nafunanga rabela makalelo a Satana, ninofwanela wenjedhela iroromelwi-u wa Yesu thitho nyindela mwemo Yohova muno-indi-edha liye basa Yesu vokwakwaneli-edha vilanyedhile liye. Thitho ninofwanela nyindelanga atu ale Yohova anoa-indi-edha liye basa ira taing’anelenga atwee. (Mat. 24:45-47) Ninooda wenjedhela iroromelo yi-u nafunjedhanga moweli-edha weli-edha madhu a Nlungu. Ee-no madwao anodha kala n’ninga imiri yo-eleliwa ma-inje pama, yamichichi dhodhowa vathi vinjinji. Paulo atoawandela abali a pingo wa kolose vyongo vyolandana ninga vyevi ira: “Ee-ni ninga nyo mutorumela Yesu Kristu, Mbwiye, dhowananive wenda movwelana na liye, mukale olimba thitho mosogoleliwa na liye, nodhowanave kala mwiiroromelo.” (Akol. 2:6, 7) Akala Kristau unoira vyevi ira akaena iroromelo yolimba, Satana naatu ale anotukulela makalelwee, katinodha mwimwanani-a ira adhowenave wenda mwaimbarimbari.​—2 Ju. 8, 9.

13. N’nga i-yo ninofwanela dedi-edhangan’ni, mwasiwa ngwan’ni?

¹³ Nidedi-edhelenga ira ilambwila inongo niidanana. (1 Ju. 3:13) Juwau unonithuucha ira “ilambo yothene ili mandhani mwa othakaluo”. (1 Ju. 5:19) Hora inokala irorome-lo vakwikwive, thitho vyo-ira vya Satana vinowenjedheleya. (Apok. 12:12) Mbwenye liye kananikopa mwamakalelo o-oneya, mwaifwanafwani-o, unongooda indi-edha basa malamulo ira anigwegweduche dhelana vyamararuo Venango vo-idi-edha basa vyonama vyo-iyana-iyana. Thitho liye uno-indi-edha basa ngurudhee dho-olongomana, ninga a-ra-ariwa. Satana utoidhiwa ira u-adhina malambo oyeva ira awesedhe imeli-a basali-u lolaleela thitho ira afooki-e iroromelo yi-u. ngumwasiwa, kaninodabwa naonanga basali-u likondi-iwanga vilambo vinjinji. Angalive ee-no, abali-u na arongoli-u vilambo vyevi anodhowanave kala ovilela. Aliwa tanave oni-a ira, mo-obala yorucha ili yothene inaode nidhi-edha “othakaluo” i-yo ninooda ganyali!

14. Ongani ndhila inango yokami-edha abali-u dhowanave kala muimbarimabri.

¹⁴ Ira nikami-e abali-u dhowanave wenda mwiimbarimbari, ninofwanela athonyi-edha tangaranga. (1 Ju. 3:10, 11, 16-18) Ninofwanela oni-a udhivela mwinango na fwee a-kala va vyapamave mbwenye thitho nakala vanyarwani. Mofwanafwani-a nyo mutommwidhiwa bali ukweliwile mutu ali ofuneya. Mbwenye unofuneela didili-iwa venango kami-iwa vavyongo vyaututuni? Mutoidiwa abali agumanena masoka a vilengo thitho mbofuneya kami-iwa vofuna mangeliwa Nyumba dha Umwene thitho dhogona? I-yo ninooni-amoda unodhiveliwana i-yo abali na arongoli-u a-kala mwa madhuve mbwenye muvyoira vi-u.

15. Movwelana na lemba la 1 Juwau 4:7, 8, ninofwanela iran’ni?

¹⁵ Naoni-anga udhivela unango na fwee ninomsazi-edha babi-u uli dhulu. (Muleri 1 Juwau 4:7, 8.) Ndhila inango yofuneya yooni-edha udhivela kulevelelana unango na fwee. Ninooni-a udhivela waafwi-u mo-othuulela vyoireyavyo. (Akol. 3:13) Bali mwinango dhinalee Aldo atogumanana yowesedha yei mwasa o-owakula paama bali mwinango angaongile madhu o-ofwanelela voonga vya zizalee. Aldo atoonga ira: miyo ndatolobela vinjinjivyene ira Yohova andikami-e ira nda-athuulelenga  vyothakala wa balule. Kai vyevyo baa-i, liye atosakula mmwitana baluo nowendela vambo-i muurumuwini. Ee-no Aldo atoonga vyothene vyamsukwali-a. Liye atoonga ira “balule angaoni mwavwela miyo na madhu aongile liye atovepa leveleliwa. Thitho moda waonga liye ndatozindiyela ira atochinyuwa. Natosaka-edha uxamwali-u nodiwala vyothene vyaireile.”

16-17. N’nga ninofwanela sakula iranan’ni?

¹⁶ Rumiwi Juwau anodhiveliwana vinjinji abalee muunembani. Ninoonga ee-no mwasa wa malangi-o avelele liye waabali enala vamakarta mararu ovudheleleliwa. Ndi vyapama idhiwa ira alombwana naa-iyana audhivela ninga Juwau tatosakuliwa ira tamatongenga dhulu na Kristu!​—1 Ju. 2:27.

¹⁷ Ninofwanela indi-edha basa malangi-o othene awachenle i-yo waari mofunjedha muru wen’na. Kalani okozeya wenda muimbarimbari, vovwela Yohova mwa vyothene vinoira liye. Funjedhani Bibilya nororomela vinoonga aliwa. Limbi-ani iroromelwinyu mwa Yesu. Rambelani zelu dhailambo na mafunji-edho onama. Kamukopeye vofuna kaana ingumi yofuna vinjinji thitho kamuire vyongo vinoonanyo kala vyothakala. Muwendelenga makundu a Yohova. Thitho kami-ani abalinyu dhowanave kala muimbarimbari volevelela enao tausukwali-idheni noakami-a vinofuna aliwa. Mwandhila yen’na, angalive ira ninogumanana nyarwa, ninodha dhowanave wenda muimbarimbari.