1. Kweseka naWaYowano 3, 3, 4, chuma muka cheji kutwivwisanga kuwaha?

KAPOSETOLO YOWANO awahililile chikuma omu evwile ngwavo vatu vaze anangwile muchano vapwile nakuzachilanga lika Yehova nakashishi. Vatu kana vapwilenga nakuhita muukalu wauvulu, kaha Yowano akilikichile mangana ajikijise lufwelelo lwavava vaka-Kulishitu vaze amwene kupwa vana venyi vakushipilitu. Nayetu nawa tweji kwivwanga kuwaha kachi nge vana vetu vakulisemena chipwe vakushipilitu navalihana kuli Yehova nakumuzachilanga.—Tangenu WaYowano 3, 3, 4.

2. Mwomwo ika Yowano asonekelele mikanda yayindende yitatu?

² Mumwaka wa 98 C.E., Yowano pamo apwile nakutwama muEfwesu chipwe kwakamwihi nanganda kana. Chasoloka nge ayileko omu afumine muufunge halitungu lyaPatamu. Kafwe halwola kana hakiko shipilitu yajila yamutwaminyinyine asoneke mikanda yayindende yitatu. Mikanda kana ayisonekele mangana akunyule vaka-Kulishitu vakushishika vatwaleho lika kufwelela Yesu nakutambuka lika mumuchano.

3. Vihula muka natukumbulula?

³ Halwola kana, Yowano kaha ikiye kaposetolo asalileko, kaha alizakaminyine chikuma haukalu vanehelenga vaka-kunangula vamakuli muvikungulwilo. * (Yowa. 1, 2:18, 19, 26) Ava vaka-kunangula vamakuli kavakavangijilenga jishimbi jaYehovako, numba tuhu valimwenenga ngwavo vatachikijile Kalunga. Tukekesenu mazu akuhuhumuna aze asonekele Yowano. Omu natukekesa mazu kana, natukumbulula vihula vitatu. Chatete, uno kutambuka mumuchano chalumbununa ika? Chamuchivali, ukalu muka tunahase kumona hakutambuka mumuchano? Kaha chamuchitatu, tunahase kukafwa ngachilihi vandumbwetu vahase kutambuka lika mumuchano?

4. Kweseka naWaYowano 1, 2:3-6 naWaYowano 2, 4, 6, vyuma muka twatela kulinga numba tuhase kutambuka mumuchano?

⁴ Twatela kutachikiza muchano wamuMazu aKalunga Mbimbiliya numbanyi tuhase kutambuka mumuchano. Kaha nawa twatela “kulama jishimbi” jaYehova, kulumbununa kujikavangizanga. (Tangenu WaYowano 1, 2:3-6; WaYowano 2, 4, 6.) Yesu atusela chakutalilaho chamwaza. Shikaho, jila yimwe yakwononokelamo Yehova shina kukavangiza kanawa mujitambo jaYesu.—Yowa. 8:29; Petu. 1, 2:21.

5. Uno twatela kukunyuka havyuma muka?

⁵ Hakusaka tutambukenga mumuchano, twatela kukunyuka chikupu ngwetu Yehova ikiye Kalunga wamuchano, kaha nawa ngwetu vyuma vyosena atulweza muMbimbiliya vyapwa vyamuchano. Twatela nawa kukunyuka ngwetu Yesu ikiye Meshiya uze vashikile. Oloze vatu vavavulu makumbi ano kavetavila ngwavo Yesu vamuwavisa lyehi kupwa Mwangana waWangana waKalungako. Yowano ambile ngwenyi kwapwile “vaka-kwonga vavavulu” vaze vahashile kuhungumwisa vaka-Kulishitu vaze vahonene kutachikiza kanawa muchano wakuvuluka Yehova naYesu. (Yowa. 2, 7-11) Asonekele ngwenyi: “Iyaze napu muka-kwonga? Kumana keshi ou mwakana ngwenyi Yesu keshi ikiye Kulishituko nyi?” (Yowa. 1, 2:22) Shikaho kulinangula Mazu aKalunga chikiko kaha chinahase kutukafwa mangana vahone kutuhungumwisa kuli ava vaka-kwonga. Kahechi nachitukafwa tutachikize kanawa Yehova naYesu. (Yowa. 17:3) Ngocho natukunyuka ngwetu tunawane muchano.

6. Ukalu umwe muka veji kumonanga vaka-Kulishitu vavakweze?

⁶ Vaka-Kulishitu vosena vatela kupwa vakuvanguluka kuchina navahungumuka namangana autu. (Yowa. 1, 2:26) Vaka-Kulishitu vavakweze vakiko vatela kupwa vakuvanguluka chikuma kuchina navafwa mumuheto kanou. Ndumbwetu wapwevo Alexia, * wamyaka yakusemuka 25 wakuFrance ambile ngwenyi: “Omu ngwapwile ngukanyike, ngwahuhwasanyinenga chikuma muchano mwomwo yavyuma vanangula vatu, nakunangula chakwamba ngwavo vyuma vyalijilile vivene. Shimbu jimwe ngwetavilile kunangula kana. Oloze ngwashinganyekele ngwami nachipwa chakuhenga kuhumbula vyuma yanangula Mbimbiliya nakufwelela vyuma vyosena navangunangula kushikola.” Ngocho Alexia  aputukile kutanga mukanda wakwamba ngwavo, Life—How Did It Get Here? By Evolution or by Creation? Omu mwahichile vyalumingo vyavindende, kahuhwasanyine cheka hamuchano alinangwile muMbimbiliyako. Kaha ambile ngwenyi: “Ngwamwene jino hatoma ngwami chikupu vene Mbimbiliya yapwa yamuchano. Kaha ngwamwene nawa ngwami, kukavangiza jindongi jatwamamo nachingulingisa ngupwenga nguwakuwahilila nakuunda.”

7. Chuma muka twatela kulihendako, kaha mwomwo ika?

⁷ Vaka-Kulishitu kavatela kuzachila Yehova oku nawa vali nakulinga vyuma vyavipiko. Yowano ahanjikile hatoma ngwenyi katweshi kuhasa kutambuka mumuchano oku nawa tuli nakulinga vyuma vyavipiko. (Yowa. 1, 1:6) Kachi nge tuli nakusaka Kalunga atwivwile uselewa oholyapwa nakulutwe, kaha twatela kwanukanga ngwetu Yehova eji kumonanga vyuma vyosena tweji kulinganga. Numba tuhu vatu kaveshi kumona vyuma natulinga mukuswekako, oloze Yehova mwavimona.—Hepe. 4:13.

8. Chuma muka twatela kulihendako?

⁸ Katwatela kumona shili nganomu veji kuyimonanga vaka-kayeko. Kaposetolo Yowano asonekele ngwenyi: “Kachi nge natwamba ngwetu, ‘Etu katweshi nashiliko,’ kaha tuli nakulyonga etu vavene.” (Yowa. 1, 1:8) Halwola kana vaka-kulikanga kuli Kalunga vanangwilenga ngwavo mutu nahase lika kupwa sepa lyaKalunga oku ali nakulinga shili. Namakumbi ano, kuli vatu vali navishinganyeka vyakufwana ngana. Vavavulu veji kwambanga ngwavo vafwelela Kalunga, oloze kavetavila vyuma ahanjika Yehova kupandama kushili, chikumanyi hachihande chakulisavalako. Kuli vilinga vimwe vyakupandama kukulisavala vize ahunga Yehova, oloze vakiko veji kwambanga ngwavo mutu nahase tuhu kulinga vyuma kana nge nasake.

9. Uno kukavangiza vyuma yanangula Mbimbiliya nachikafwa ngachilihi vakweze?

⁹ Chinahase kupwa chachikalu kuli vaka-Kulishitu vavakweze kulihenda kuvilinga vyaunyengwe vize veji kulinganga vakwavo vaka-shikola  chipwe vaka-milimo. Omu mukiko chapwile nakuli Aleksandar. Ambile ngwenyi: “Vanyike vamwe vamapwevo hashikola vangushinjililenga ngulisavale navo. Vambilenga ngwavo ngwakanyinenga kulisavala navo mwomwo pamo ngwalisavalilenga navakwetu malunga.” Kachi nge namulitalasana nacheseko chakufwana ngana echi, kaha mwatela kwanuka ngwenu, kachi nge namukavangizanga vyuma yanangula Mbimbiliya, kaha namupwa vakuwahilila, nakulikangula kumujimba, nakuhona kulivwa kupwa vamokomoko nakulama usepa wenu naYehova. Kachi nge namufungululanga vyeseko, kaha nachimikafwa mulingenga lika vyuma vyakwoloka. Mwatela nawa kwanukanga ngwenu, Satana ikiye ali nakulingisa vatu mukaye vamone kulisavala mujila yakuhenga. Shikaho kachi nge namulihenda kuvishinganyeka vyavaka-kaye kaha ‘namufungulula uze wakuhuka.’—Yowa. 1, 2:14.

10. Uno mukanda WaYowano 1, 1:9, watukafwa ngachilihi tuzachile Yehova nachivezu chitoma?

¹⁰ Twatachikiza chikupu ngwetu Yehova kaha ikiye nahase kulumbununa kanawa omwo yapwa shili. Chipwe ngocho twatela kukilikita tuhonenga kulinga shili. Oloze nge tunalingi shili, kaha twatela kumulweza Yehova kuhichila mukulomba. (Tangenu WaYowano 1, 1:9.) Kachi nge tunalingi shili yayinene, kaha twatela kuya kutulama vaze atongola Yehova vatukafwe. (Yako. 5:14-16) Chipwe ngocho, katwatela kulihananga milonga hashili twalingile lyehi kunyimako. Mwomwo ika? Mwomwo Setu wazangi Yehova ahanyine ndando yakusokola yaMwanenyi mangana akonekele jishili jetu. Shikaho Yehova eji kutukonekelanga kachi nge natupihilila nakwalumuka. Ngocho twatela kuzachila Yehova nachivezu chitoma.—Yowa. 1, 2:1, 2, 12; 3:19, 20.

11. Tunahase kulikinga ngachilihi kukunangula chize chinahase kutuzeyesa kushipilitu?

¹¹ Twatela kukana kunangula chavaka-kulikanga kuli Kalunga. Kufuma vene halwola chaputukile chikungulwilo chavaka-Kulishitu, Liyavolo nazachisanga vaka-kwonga vavavulu mangana valingise vangamba jaKalunga vakushishika vahuhwasane vyuma vafwelela. Shikaho twatela  kutachikiza kanawa chihandwa chatwama hamuchano uze twalinangula namakuli aze veji kunangulanga. * Vaka-kole jetu vanahase kuzachisa Internet hakutandakanyisa makuli mangana vatuhonese kufwelela Yehova nakuhona nawa kufwelela vandumbwetu. Shikaho, mwatela kutachikiza ngwenu makuli kana awa eji kufumanga kuli Satana, ngocho mwatela kuwakana.—Yowa. 1, 4:1, 6; Kuso. 12:9.

12. Mwomwo ika twatela kupwa vakukunyuka hamuchano twalinangula?

¹² Hakusaka tufungulule Satana, twatela kufwelela chikuma Yesu najila yize Kalunga eji kumuzachishilangamo mangana atesemo vyuma ajina. Kaha nawa twatela kufwelela jila yize Yehova ali nakuzachisa mangana atuhane kulya chakushipilitu. (Mateu 24:45-47) Kachi nge natutanganga Mazu aKalunga kaha lufwelelo lwetu naluzama nakupwa kwijiva nge mutondo uze unazamika chikuma miji mumavu. Omu mukiko Paulu akolezezele chikungulwilo chamuKolose. Avasonekelele ngwenyi: “Tambukenunga lika nakulikata naikiye, muvakuzamika miji muli ikiye, muvakutunga muli ikiye kaha nawa muvakuzama mbe mulufwelelo.” (Kolo. 2:6, 7) Kachi nge natuzamisa lufwelelo lwetu, kaha Satana chipwe vatu jenyi kaveshi kuhasa kulinga chuma numba chimwe chize nachituhonesa kutambuka mumuchanoko.—Yowa. 2, 8, 9.

13. Chuma muka twatela kutachikiza, kaha mwomwo ika?

¹³ Twatela kutachikiza ngwetu kaye nakatuhunga. (Yowa. 1, 3:13) Yowano asonekele ngwenyi: “Kaye kosena katwama mumavoko ayauze wakuhuka.” (Yowa. 1, 5:19) Omu kaye kali hakamwihi chikuma nakunonga, Satana ali namatoto amanene chikuma. (Kuso. 12:12) Numba tuhu eji kuzachisanga jijila jakuswama jakufwana nge ujila namakuli nakunangula chavaka-kulikanga kuli Kalunga, oloze eji kulukukanga nawa vatu jaKalunga hatoma kuhichila mukuvayanjisa. Satana nejiva nawa ngwenyi nasale kaha nalwola lwalundende ngocho ali nakuzata nangolo afwile kuhonesa mulimo wetu wakwambulula chipwe kuzeyesa lufwelelo lwetu. Shikaho katwatela kulikomokela hakumona mafuchi amwe anasoko mulimo wetu chipwe kutukanyisa kulinga vyuma vimweko. Chipwe ngocho, vandumbwetu vamumafuchi kana vali nakutwalaho lika kupwa vakumika. Chikupu vene ava vandumbwetu vali nakusolola hatoma ngwavo, chamokomoko nakala ukalu mwaneha uze wakuhuka, tunahase kumufungulula.

14. Jila muka yimwe tunahase kukafwilamo vandumbwetu vatambukenga lika mumuchano?

¹⁴ Twatela kwivwilanga keke vandumbwetu numba tuhase kuvakafwa vatambukenga lika mumuchano. (Yowa. 1, 3:10, 11, 16-18) Twatela nawa kulizanga chikuma navandumbwetu numba nge vyuma vili kanawa chipwe chiku. Chakutalilaho, nge ndumbwetu nafwisa, chipwe nge tunevu ngwavo vandumbwetu vali muukalu mwomwo yavyuma vyakulijila kaha vali nakusakiwa kuvakafwa kutunga Zuvo yaWangana chipwe kuvatungila jizuvo javo, kaha katwatela kusolola zangi yetu yamwenemwene namuchima wetu wakeke hakuhanjika kaha hakanwako, oloze chachilemu shina muvilinga.

15. Kweseka namukanda WaYowano 1, 4:7, 8, vyuma muka twatela kulinga?

¹⁵ Kachi nge natulizanganga navakwetu kaha natulondezeza Yehova uze apwa Setu wazangi. (Tangenu WaYowano 1, 4:7, 8.) Jila yayilemu chikuma tunahase kusolwelamo zangi shina hakulikonekelanga navakwetu. Chakutalilaho nge ndumbwetu natwivwisa kupihya kumuchima, twatela kumukonekela nakuvulyama chuma kana. (Kolo. 3:13) Chakutalilaho ndumbwetu Aldo apwile mucheseko kana omu evwile ndumbwenyi uze avumbikilenga chikuma mwahanjika mazu amapi hali vatu vakungalila afumine. Aldo ambile ngwenyi, “Ngwalombelenga chikuma kuli Yehova angukafwe nguhone kupwa  navishinganyeka vyavipi hali ou ndumbwami.” Oloze Aldo kakuminyinyine kaha ahako. Alwezele uze ndumbwenyi vazachile hamwe mumulimo wakwambulula. Kahomu vazachililile hamwe Aldo alwezele ou ndumbwenyi ngwenyi evwile kupihya chikuma hamazu ahanjikile. Aldo ambile ngwenyi: “Omu ngwahanjikile nenyi nakumulweza omu ngwevwile hamazu ahanjikile, alikonekelele chikuma. Kaha jila ahanjikililemo yangulingishile ngumone hatoma ngwami aliveyele hakuhanjika mazu kana. Kufumaho twapwile cheka tumasepa nakuvulyama nawa vyuma vyasolokele.”

16-17. Vyuma muka twatela kufwila kulinga?

¹⁶ Kaposetolo Yowano azangile chikuma vandumbwenyi kaha afwililile kuvamona vanazame mulufwelelo. Kaha zangi kana ayisolwele namumazu akuvahuhumuna aze avasonekelele mumikanda yayindende yitatu. Twawahilila chikuma hakutachikiza ngwetu, malunga namapwevo vakuwavisa vaze navakayula naKulishitu vatwama namuchima ngana uze apwile nawo Yowano.—Yowa. 1, 2:27.

¹⁷ Tufwilenu kukavangiza vyuma tunalinangula. Shikaho, tufwilenu lika kutambuka mumuchano hakwononokanga lika Yehova mukala vyuma natulinganga. Tulinangulenunga Mazu enyi nakuwafwelela. Kaha nawa tufwelelenunga chikuma Yesu. Kanenunga mangana autu nakunangula chavaka-kulikanga kuli Kalunga. Kanda kuzachila Yehova oku nawa muli nakulinga vyuma vyavipiko, kaha nawa mwatela kulihenda kushili. Tufwilenunga kukavangiza jishimbi jaYehova jakwoloka. Kaha nawa twatela kukafwanga vandumbwetu vapwenga lika vakujikiza hakukonekelanga vaze navatupihisa nakukafwanga nawa vaze vali muukalu. Kachi nge natulinga ngocho, kaha natutambukanga lika mumuchano.