1. Yumanyi yatutiyishaña kuwaha kwesekeja na3 Yowanu 3, 4?

KAPOSTOLU YOWANU watiyili kuwaha hakutiya nindi antu akwashiliyi kwiluka chalala anatwalekihu kumukalakela Yehova nakashinshi. Amweneña kukala kwakuvulu nawa Yowanu watwalekelihu kuyikolesha awa akwaKristu ashinshika nawa wayimweneña nindi adiña anyanindi akuspiritu. Ninetu, twatiyaña kuwaha neyi anyanetu hela antu itwadizishaña chalala adihana kudi Yehova nawa atwalekahu kumukalakela.—Tañenu 3 Yowanu 3, 4.

2. Muloñadi Yowanu chasonekeleliyi nyikanda yisatu?

² Mu 98 C.E., hadaha Yowanu wadiña nakushama muEfwesesa hela kwakwihi naEfwesesa. Watela wayili kweniku hanyima yakumufumisha mukaleya hachitutu chaPatamosa. Haniyi mpinji, spiritu yaYehova yamukwashili kusoneka nyikanda yisatu. Wasonekeli iyi nyikanda kulonda yakwashi akwaKristu ashinshika kutwalekahu kumukuhwelela Yesu nikwenda muchalala.

3. Malwihwinyi itukwakula?

³ Yowanu diyi kapostolu wadiñaku haniyi mpinji nawa wadiña nakwakama muloña wantañishilu yakutwamba yatañishileñawu muyipompelu. * (1 Yow. 2:18, 19, 26) Awa akwakusekesha ahosheleña nawu amwiluka Nzambi, ilaña hiyadiña nakwovwahila nshimbi jaYehovaku. Tuhanjekenu hakufumba kwasonekeliyi Yowanu. Chitukuhanjekaña haniku kufumba, tukwakula malwihu asatu: Kwenda muchalala kwatalisha mudihi? Yumanyi yinateli kutukañesha kutwalekahu kwenda muchalala? Nawa tunateli kudikwasha ñahi wumu namukwawu kutwalekahu kwenda muchalala?

4. Kwesekeja na 1 Yowanu 2:3-6 ni 2 Yowanu 4, 6, yumanyi yabombela mukwenda muchalala?

⁴ Hakwila nawu twendi muchalala, twatela kwiluka chalala chekala Mwizu daNzambi, Bayibolu. Kubombelahu, twatela “kuhemba nshimbi [jaYehova],” dikwila nawu, twatela kujovwahila. (Tañenu 1 Yowanu 2:3-6; 2 Yowanu 4, 6.) Yesu wamwekesheli chitwatela kumwovwahila Yehova. Dichi njila yimu yalema mutwamwovwahilaña Yehova hikulondela chikupu muntampu jaYesu.—Yow. 8:29; 1 Pet. 2:21.

5. Yumanyi yitwatela kukuhwelela chikupu?

⁵ Hakwila tutwalekuhu kwenda muchalala, twatela kukuhwelela chikupu netu Yehova hiNzambi wachalala nawa netu yuma yejima yatulejañayi Mwizu dindi Bayibolu, yalala. Nawa twatela kukuhwelela cheñi netu Yesu diyi Mesiya akaniniwu. Antu amavulu makonu ajinookaña neyi chakwila Yesu amuwayisha kwikala Mwanta waWanta waNzambi. Yowanu wasoñamishili nindi kwadiña “akwakudimbana amavulu,” adi kuluwañesha antu abulili kudiloñesha kuhakwilaku chalala kutalisha hadi Yehova niYesu. (2 Yow. 7-11) Yowanu wasonekeli nindi: “Indi mukwakutwamba hinyi, komana hiyowu muntu wakaanaña nindi Yesu hidiyi Kristuku, tahindi?” (1 Yow. 2:22) Neyi tudizaña Izu daNzambi hiyanateli kutudimbaku. Chitwela mwenimu tukumwiluka Yehova niYesu. (Yow. 17:3) Nawa dihu hitukwiluka chikupu netu tukweti chalala.

6. Chumanyi chinateli kuyiletesha akwaKristu atwansi kuleka kwenda muchalala?

⁶ AkwaKristu ejima atela kwikala asoñama kulonda abuli kuyiluwañesha namaana awantu. (1 Yow. 2:26) Sweje-e akwaKristu atwansi atela kusoñama naniwu wubanji. Muhela Alexia, * wudi nayaaka 25 wahosheli nindi: “Hinadiña kansi naluwankeni nayitoñojoka yamukaayi nimaana awantu akwila nawu yuma yadileñeli yayeni. Mpinji yikwawu, iyi yuma yatañishileñawu yatiyakeneña neyi yalala kudi ami. Namweni nami chadi kwikala chaluwa kudiwula yuma yejima yatañishaña Bayibolu nakwiteja yuma yatañishileñawu kushikola.” Alexia wadizili mukanda waLife—How Did It Get Here? By Evolution or by Creation? Hashimbwili wanyi, walekeli kujinooka.  Alexia wahosheli nindi: “Nelukili chikupu nami Bayibolu yikweti chalala. Nawa nelukili nami kulondela nshimbi jekalamu kunateli kunletela muzañalu nikuwunda.”

7. Chumanyi chatela kubula kwilawu akwaKristu ejima, nawa muloñadi?

⁷ AkwaKristu ejima, hiyatela kumukalakelaña Yehova iku anakukoña yuma yatamaku. Yowanu washimwini nindi hitunateli kwenda muchalala iku tunakukoña yuma yatamaku. (1 Yow. 1:6) Neyi tunakukeña netu Nzambi yotutiyi kuwaha, twatela kwanukaña netu wamonaña yuma yejima yitwelaña. Dikwila nawu, kwosi nshidi yaswamaku, muloña Yehova wamonaña yuma yejima yitwelaña.—Heb. 4:13.

8. Yumanyi yitwatela kutondolwela?

⁸ Hitwatela kumonaña nshidi neyi chayimonañawu mukaayiku. Kapostolu Yowanu wasonekeli nindi: “Neyi tuhosha netu, ‘Hitukweti nshidiku,’ dikwila nawu tunakudidimba etu aweni.” (1 Yow. 1:8) Mumafuku aYowanu, akwakusekesha ahosheleña nawu muntu nateli kwikala ibwambu daNzambi hela chakwila nakwila yuma yinelukiyi nindi yatama. Niantu itunakushakama nawu makonu dichatoñojokañawu. Antu amavulu makonu ahoshaña nawu amukuhwelela Nzambi, ilaña hiyamonaña nshidi neyi chayimonañayi Yehovaku, sweje-e yilwilu yawuvumbi. Yuma yamonañayi Yehova nindi hinshidi wena ahoshaña nawu hiyuma yatela kwilayi muntu neyi nakeñi.

9. Yumanyi yayiwahi yafumañamu neyi atwansi alondelaña chahosha Bayibolu?

⁹ Atwansi akwaKristu anateli kuyikanjikija kwiteja yitoñojoka yatama yikwetiwu akwawu mwatañilañawu hela mwazatilañawu kutalisha hawuvumbi. Dichuma chamumwekeneni Aleksandar. Wahosheli nindi: “Atwansi awambanda hashikola ankanjikijileña nawu nili nawu wuvumbi. Ahosheleña nawu chineli hinadikundileña nawambandaku, dikwila nawu  nadikamineña nawakwetu amayala.” Neyi mumona kweseka kwamuchidiwu, ilaña mulondela chahosha Bayibolu, akuyilemeshaña, mukudikiña kunyisoñu, mukwikala nakuwunda kwamuyitoñojoka nawa mukukiña wubwambu wenu naYehova. Neyi mutondolwela kweseka, chikwikala chaswayi kwila yuma yayiwahi. Anukenuña cheñi nenu yitoñojoka yawantu kutalisha hawuvumbi yafumaña kudi Satana. Neyi mukaana yitoñojoka yawantu amukaayi, ‘mukumwimika watama mushindu.”—1 Yow. 2:14.

10. Indi 1 Yowanu 1:9 yatukwashaña ñahi kumukalakela Yehova nachinleji chitooka?

¹⁰ Tweluka netu Yehova wukweti wuswa wakuhosha nindi iyi hinshidi. Nawa twazataña nañovu kulonda tubuli kukoña nshidi. Ilaña neyi tukoña nshidi, twashimunaña kudi Yehova mukulomba. (Tañenu 1 Yowanu 1:9.) Nawa neyi tukoña nshidi yeneni, twalombaña wukwashu kudi akulumpi atondawu kudi Yehova nindi atwakameneña. (Yak. 5:14-16) Hela chochu, bayi tudinkaña nyiloña hanshidi yitwakoñeli kunyimaku. Muloñadi? Muloña Tata yetu wukweti kukeña wahanini mulambu wefutu danyiloña daMwanindi kulonda atwanakeni nshidi jetu. Neyi Yehova yahosha nindi wukwanakena akwanshidi anabalumuki, wayanakenaña. Kwosi chuma chinateli kutukañesha kumukalakela Yehova nachinleji chitookaku.—1 Yow. 2:1, 2, 12; 3:19, 20.

11. Tunateli kudikiña ñahi kuyuma yinateli kukisañana chikuhwelelu chetu?

¹¹ Twatela kukaana ntañishilu yawakwakusekesha. Kufuma tuhu mpinji yatachikili chipompelu chawakwaKristu, Satana nakuzatisha akwakutwamba kuluwañesha yitoñojoka yawambuña aNzambi ashinshika. Dichi twatela kwiluka chaambu chidi hakachi kayuma yalala niyakutwamba. * Ayilumbu jetu  anateli kuzatisha intaneti hela njila jakuhanjekelamu jahaintaneti kulonda tuleki kumukuhwelela Yehova nikukeña amanakwetu niahela. Bayi mukuhwelelaña awa makudiku muloña anakufuma kudi Satana.—1 Yow. 4:1, 6; Chim. 12:9.

12. Muloñadi chitwatela kukoleshela chikuhwelelu chetu muyuma yitwakuhwelela?

¹² Hakwila nawu Satana yobuli kuzeyesha chikuhwelelu chetu, twatela kumukuhwelela Yesu nikwiluka mudimu wazatañayi hakushikija nkeñelu yaNzambi. Twatela cheñi kukuhwelela nduñu wamaana nikashinshi anakuzatishawu kudi Yehova makonu. (Mat. 24:45-47) Twakuhwelelaña chikupu kuhitila mukudiza Izu daNzambi mpinji yejima. Nkumininaku, chikuhwelelu chetu chikwikala neyi mutondu weñija nankashi nyiji heseki. Pawulu wahosheli chuma chadifwanaku mumukanda wasonekeleliyi chipompelu chaKolosi. Wahosheli nindi: “Neyi chochimwamwiteja Kristu Yesu Mwanta, endenuña nakumwovwahila yena, iku munashimati nikutuñewa mudi yena nikukola muchikuhwelelu.” (Kol. 2:6, 7) Kwosi chuma chinateli kwilayi satana hela antu jindi chinateli kuluwañesha chikuhwelelu chamukwakristuku.—2 Yow. 8, 9.

13. Chumanyi chitwatela kwiluka, nawa muloñadi?

¹³ Twatela kwiluka netu kaayi katela kutuhela. (1 Yow. 3:13) Yowanu watwanukishaña nindi “kaayi kejima kadi mumakasa awatama.” (1 Yow. 5:19) Kukuma kwakanu kaayi kunakuswina kwakwihi nawa Satana nasweji kuzuwa. (Chim. 12:12) Wazatishaña wuvumbi, makudi afumaña kudi akwakusekesha nimakabisha. Satana neluki nindi nashali hohu nakapinji kantesha kakulekesha mudimu wetu wakushimwina hela kuzeyesha chikuhwelelu chetu. Dichi, chumichi hichatuhayamishañaku hela chakwila mudimu wetu anakuwukañesha hela kuwulekesha mumatuña amakwawu. Hela chochu, amanakwetu niahela munawa matuña anakuumika. Anakumwekesha nawu hela chakwila Satana wukutukabisha ñahi, tunateli kutwalekahu kwikala ashinshika.

14. Munjilanyi mutunateli kukwashila amanakwetu niahela kutwalekahu kwenda muchalala?

¹⁴ Hakwila nawu tukwashi amanakwetu kutwalekahu kwenda muchalala, twatela kumwekesha wushona. (1 Yow. 3:10, 11, 16-18) Twatela kudikeña wumu namukwawu mumpinji yayiwahi niyakala. Chakutalilahu, kudihu manakwetu hela muhela wumuneluki wunafwishi wunakukeña kukundejewa hela wunakukeña wukwashu wudi wejima? Indi kwiji munatiyi nawu akwetu akwakwitiya anajimbeshi yuma yawu muwubanji wadimwekenaña anakukeña kuyikwasha kutuñulula Matala aWanta hela matala awu? Twamwekeshaña netu twayikeña nikuyitiyila wushona amanakwetu niahela muyuma yitwahoshaña niyitwelaña.

15. kwesekeja na 1 Yowanu 4:7, 8, chumanyi chitwatela kwila?

¹⁵ Neyi tudikeña wumu namukwawu dikwila nawu tunakumwimbujola Tata yetu wamwiwulu wukweti kukeña. (Tañenu 1 Yowanu 4:7, 8.) Njila yimu yalema mutwamwekeshelaña kukeña hikudanakena wumu namukwawu. Chakutalilahu, muntu nateli kutuneñesha, ilaña yenza nakudanakena. Twamwekeshaña kukeña kuhitila mukumwanakena nikuvulamenaku. (Kol. 3:13) Manakwetu Aldo waneñeli chelili manakwetu walemesheliyi yahoshi chatama kutalisha hadi antu akuchitachi chindi. Aldo wahosheli nindi: “Nalombeli kudi Yehova nami yankwashi kulonda nibuli kutoñojoka chatama hadi iwu manakwetu.” Ilaña Aldo welili chuma chimu.  Wamwilili iwu manakwetu nindi yoyi nakushimwina nindi. Chayiliwu nakushimwina hamu, Aldo walumbulwili chaneñeliyi namazu ahosheliyi iwu manakwetu. Aldo wahosheli nindi: “Chatiyiliyi iwu manakwetu nawu naneñeli namazu ahosheliyi, walombeli kwanakena. Chahosheleñayi izu dindi datiyakeneña nawu watiyili kutama namazu ahosheliyi. Twekalili amabwambu nawa twavulameneniku yuma yamwekeni.”

16-17. Yumanyi yitunakufwila kwila?

¹⁶ Kapostolu Yowanu wayikeñeli nankashi amanakwindi nawa wakeñeleña nindi ekali nachikuhwelelu chakola. Wamwekesheli iku kukeña munyikanda yisatu yayisonekeleliyi. Chatukoleshaña hakwiluka netu amayala niambanda akweti kukeña nawa akamenaña neyi Yowanu ayiwayisha kulonda akayuuli hamu naKristu.—1 Yow. 2:27.

¹⁷ Tuzatisheña kufumba kutunahanjekihu. Tufwilenuña kwenda muchalala, nawa tumwovwahileña Yehova muyuma yonsu muchihandilu chetu. Dizenuña Izu dindi nawa kuhwelelenu chikupu idi Izu. Mukuhwelelenu nankashi Yesu. Kaanenuña maana awantu nintañishilu yawakwakusekesha. Bayi mumukalakeleña Yehova iku munakukoña yuma yatamaku nawa bayi mwiteja antu kuyikakeja kukoña nshidiku. Londelenuña nshimbi jaYehova. Nawa tukwasheña amanakwetu kwikala akola kuhitila mukwanakena antu atuneñeshaña nikukwasha antu anakankili. Tukutwalekahu kwenda muchalala hichikweti muloña nakukala kutunakumonaku.