1. Johana thawn thum châng 3, 4-a sawi angin, engin nge min tihlim?

TIRHKOH Johana’n thutak hre tûra a ṭanpui mite’n rinawm takin Jehova rawng an bâwl chhunzawm zêl tih a hriat huna a hlim dân tûr chu i mitthla thei em? Anni chuan harsatna tam tak an hmachhawn a; mahse, Johana chuan thlarau lama fate anga a thlîr, chûng Kristian rinawmte rinna tichak tûrin theih tâwp a chhuah a ni. Chutiang bawkin, tisa lam, a nih loh leh thlarau lama kan fate’n Jehova hnênah inpumpêk a, a rawng an bâwl zawm zêl hian kan hlim a ni.—3 Johana 3, 4 chhiar rawh.

2. Johana ziah lehkha thawnte’n a tum chu eng nge ni?

² C.E. 98-naah Johana chu Ephesi khuaah, a nih loh leh chumi khaw bulah a awm niin a lang. Chutah chuan Patmos thliarkâra a tânna ata a chhuah hnuah a insawn a nih a rinawm. Chutih hun lai vêl chuan, Jehova thlarau thianghlimin chûng lehkha thawn pathumte chu ziak tûrin a chêttîr a. Chûng lehkha thawnin a tum chu Isua ring nghet tlat tûr leh thutaka awm reng tûra Kristian rinawmte fuih hi a ni.

3. Eng zawhnate nge kan chhân ang?

³ Johana chu tirhkohte zînga dam rei ber a nih angin, zirtîrtu dik lote’n kohhranah nghawng ṭha lo an neih a hlauthâwng hle a. * (1 Joh. 2:18, 19, 26) Chûng kalpêngte chu Pathian hria niin an inchhâl a; mahse, Jehova thupêkte chu an zâwm lo a ni. Thlarauva thâwk khum Johana pêk fuihna thu hi i lo ngaihtuah ang u. Kan ngaihtuahho laiin, hêng zawhna pathumte hi kan chhâng ang: Thutaka awm tih awmzia chu eng nge ni? Eng harsatnate nge kan hmachhawn? Engtin nge thutaka awm reng tûra kan inṭanpui tawn theih? tihte hi.

4. Johana thawn khat 2:3-6 leh 2 Johana 4, 6-a sawi angin, thutaka awmnaah engte nge tel?

⁴ Thutaka awm tûr chuan, Pathian Thu, Bible-a kan hmuh thutak chu kan hriat a ngai a. Chu bâkah, ‘Jehova thupêkte chu kan pawm a,’ kan zawm a ngai a ni. (1 Johana 2:3-6; 2 Johana 4, 6 chhiar rawh.) Isua chuan Jehova entawnna kawngah entawn tûr ṭha famkim a siam a. Chuvângin, Jehova thuâwih theih dân kawng pawimawh tak pakhat chu theih tâwp chhuaha Isua entawn tûr siamte zui hi a ni.—Joh. 8:29; 1 Pet. 2:21.

5. Eng nge kan rin ngheh tlat theih?

⁵ Thutaka awm reng tûr chuan, Jehova chu thutak Pathian a ni a, a Thu, Bible-a a sawi zawng zawng chu a dik vek tih kan ring nghet tlat tûr a ni. Isua chu thutiam Messia a ni tih kan ring nghet tlat tûr a ni bawk. Tûn laia mi tam tak chuan Isua chu Pathian Lalrama Lal atâna ruat a ni tih chu an ringhlel a. Johana chuan Jehova leh Isua chungchânga thutak hum tûra inbuatsaih lâwk lo mite hruai sual theitu “bumtu tam tak” an awm thu a vaukhân a ni. (2 Joh. 7-11) Ani chuan: “Isua chu Krista a ni tih âwih lotu aliama dawthei tu nge awm?” tiin a ziak a. (1 Joh. 2:22) Bumna kan pumpelh theih dân kawng awmchhun chu Pathian Thu zir hi a ni. Chutianga kan tih chauhvin, Jehova leh Isua kan hria ang a. (Joh. 17:3) Tichuan, thutak kan nei tih kan ring nghet tlat thei ang.

6. Kristian ṭhalai pakhatin eng harsatna nge a hmachhawn?

⁶ Kristian zawng zawngte chu mihring finnaa hruai bova awm lo tûrin kan fîmkhur tûr a ni. (1 Joh. 2:26) A bîk takin, kan unau ṭhalaite chu he thang lakah hian an fîmkhur a ngai a. French rama kum 25 mi unaunu Alexia-i * chuan: “Ka naupan laiin, chanchhâwnna leh mihring finna ang chi khawvêl zirtîrnate chuan min tibuai a. A châng chuan, chûng zirtîrnate chu dik niin ka hria. Mahse, Bible zirtîrnate ngaihthah a, kan zirtîrtute sawi apiang rin ngawt mai chu dik ni hian ka hre lo,” tiin a sawi. Alexia-i chuan Life—How Did It Get Here? By Evolution or by Creation? tih lehkhabu chu a zir ta a. Chawlhkâr rei lo te chhûngin, a rinhlelhnate chu a bo ta a ni.  Ani chuan: “Bible-ah hian thutak a awm tih keimah ngeiin ka chian a. Bible tehnate mila nunna chuan hlimna leh lâwmna min thlen ang tih ka hria,” tiin a sawi a ni.

7. Eng nge kan do tlat ang a, engvângin nge?

⁷ Kristian a pui a pangte chuan nun kawng chi hniha nung tûra nêksâwrnate chu an do tlat tûr a ni. Johana chuan thutaka awm reng chunga nungchang bawlhhlawhnaa inhnamhnawih chu thil theih a ni lo tih a sawi a. (1 Joh. 1:6) Tûnah leh nakina Pathian duhsakna dawn kan duh chuan, êng fate anga thil kan tih a ngai a. Chu chu, Jehova’n kan thiltih engkim a hmuh avângin, a rûkin engmah tihtheih a ni lo tihna a ni.—Heb. 4:13.

8. Eng nge kan hnâwl ang?

⁸ Sual chungchânga khawvêl thlîr dân chu kan hnâwl tûr a ni. Tirhkoh Johana chuan: “‘Sual ka nei lo’ kan tih chuan mahni leh mahni kan inbum,” tiin a ziak a. (1 Joh. 1:8) Johana hun laiin, kalpêngte chuan miin duh rêng vângin sual kawng zawh mah se, Pathian nêna inlaichînna a la nei reng thei niin an sawi a ni. Tûn laiah pawh, chutiang ngaih dân neite zîngah kan awm a. Mi tam tak chuan Pathian ring niin an inchhâl a; mahse, Jehova’n sual a thlîr dân, a bîk takin mipat hmeichhiatna chungchânga a thlîr dân chu an pawm lo a ni. Jehova’n thil suala a ngaih chu anni chuan mi mal duh thlanna, a nih loh leh nun kawng chi khat mai niin an sawi a ni.

9. Ṭhalaite chuan Bible ṭanchhan an rinna vawn ngheh tlat chu engtin nge an hlâwkpui?

⁹ A bîk takin, ṭhalai kan unaute chu nungchang bawlhhlawhna chungchângah an school kalpui te, a nih loh leh an hnathawhpuite thlîr dân pawm tûra nawrluih niin an inhre mai thei a. Chutiang chu Aleksandar-a’n a tawng a ni. Ani chuan: “School-a hmeichhe ṭhenkhat chuan mutpui tûrin min sâwm ṭhîn a. Anni chuan bialnu ka neih loh avângin, neih inang kawp chîngah min ngai a ni,”  tiin a sawi. Chutiang fiahnate i tawh huna Bible ṭanchhan i rinna i vawng nghet tlat a nih chuan, mahni inzahna te, i hrisêlna te, chhia leh ṭha hriatna thiang i neih te, leh Jehova nêna in inlaichînnate chu i hum tlat tih hre reng ang che. Thlêmnate i do hneh apiangin i tân thil dik tih a awlsam lehzual ang. Mipat hmeichhiatna chungchânga khawvêl thlîr dân dik lo chu Setana aṭanga lo chhuak a ni tih hre reng rawh. Khawvêl mite ngaihtuah dân i hnâwl chuan ‘mi sual chu i ngam’ a ni ang.—1 Joh. 2:14.

10. Engtin nge 1 Johana 1:9-na chuan chhia leh ṭha hriatna thiang tak nei chunga Jehova rawngbâwl tûra min ṭanpui?

¹⁰ Jehova chuan sual chu eng nge a nih tih sawi tûrin dikna a nei tih kan pawm a. Chu bâkah, thil sual ti lo tûrin theih tâwp kan chhuah bawk. Mahse, thil sual kan tih hunah, kan sual chu Jehova hnênah ṭawngṭaiin kan hrilh a ni. (1 Johana 1:9 chhiar rawh.) Sual lian tak kan ti a nih chuan, min enkawl tûra Jehova ruat kohhran upate ṭanpuina kan zawng a. (Jak. 5:14-16) Mahse, tûn hmaa kan thil sual tihte avângin engmah ti thei lovin kan awm tûr a ni lo. Engvângin nge? Hmangaihna nei tak kan Pa chuan kan sualte ngaihdam a nih theih nân a Fapa tlanna inthawina min buatsaihsak vâng a ni. Jehova’n inlamlêt tawh thil sual titute chu a ngaidam ang tia a sawi hian, a sawi ang ngeiin a ngaidam a ni. Chuvângin, chhia leh ṭha hriatna thiang tak nei chunga Jehova rawngbâwl lo tûra min dâl theitu engmah a awm lo.—1 Joh. 2:1, 2, 12; 3:19, 20.

11. Engtin nge kan rinna tichhe thei zirtîrnate aṭanga kan invênhim theih?

¹¹ Kalpêngte zirtîrna chu kan hnâwl tûr a ni a. Kristian kohhran din a nih aṭangin, Diabola chuan Pathian chhiahhlawh rinawmte rilruah rinhlelhna chi tuh tûrin bumtu tam tak a hmang a ni. Chuvângin, thu dik leh dik  lo inan lohna chu kan hriat hran a ngai a ni. * Kan hmêlmate chuan Jehova kan rinchhanna leh kan unaute kan hmanngaihna tinêp tûrin Internet leh social media an hmang thei a. Chu thu theh darhtu tak chu hria la, hnâwl ang che!—1 Joh. 4:1, 6; Thup. 12:9.

12. Engvângin nge kan rinna chu kan tihngheh lehzual ang?

¹² Setana beihnate do thei tûr chuan, Isua kan rinna leh Pathian thiltuma a chanvo neiha kan rinna chu kan tihngheh lehzual a ngai a. Chu bâkah, tûn laia Jehova hman ‘bâwih rinawm leh fing tak’ chu kan rin a ngai bawk. (Mt. 24:45-47) Chu kan rinna chu Pathian Thu zir ziahna hmangin kan tinghet lehzual a ni. Chutianga kan tih chuan, kan rinna chu thûk taka zung kaih thingkûng ang a ni ang. Paula’n Kolossa kohhran hnêna a lehkha thawnah, chutiang thu chu a ziak a. Ani chuan: ‘Krista Isua, Lalpa chu in lawm ang khân, amaha zung kai leh rem chhoh deuh deuhva awmin, an zirtîr che u ang khân in rinnaah chuan nghet takin awm rawh u,’ tiin a sawi a ni. (Kol. 2:6, 7) Kan rinna tinghet tûra theih tâwp kan chhuah chuan, Setana leh amah thlâwptute chuan thutaka awm reng lo tûrin min dang thei lo vang.—2 Joh. 8, 9.

13. Eng nge kan beisei ang a, engvângin nge?

¹³ Khawvêl mite huat kan hlawh ang tih kan beisei tûr a ni. (1 Joh. 3:13) Johana chuan “khawvêl pumhlûm hi mi sual thu thuin a awm,” tiin min hriatnawntîr a. (1 Joh. 5:19) He khawvel tâwpna a hnaih zêl rual hian, Setana chu a thinrim nasa lehzual a. (Thup. 12:12) Nungchang bawlhhlawhna leh kalpêngte dâwt sawite ang chi fing vervêk taka beihna mai aia tam a hmang a. Râwng taka beihna pawh a hmang bawk. Ani chuan kan thu hrilhna titâwp tûr leh kan rinna tichhe tûrin hun tlêm tê chauh a nei tawh tih a hria a. Chuvângin, ram ṭhenkhata kan rawngbâwlna khuahkhirh, a nih loh leh khap beh a ni pawh hi thil mak a ni lo. Chuti chung pawhin, chûng rama awm kan unaute chuan chhel takin an tuar a. Anni chuan Setana’n engtiang pawhin min do mah se, hnehna kan chang thei tih an lantîr a ni!

14. Thutaka awm reng tûra kan unaute ṭanpui theih dân kawng khat chu eng nge ni?

¹⁴ Thutaka awm reng tûra kan unaute ṭanpui tûr chuan, lainatna kan lantîr tûr a ni. (1 Joh. 3:10, 11, 16-18) Dinhmunte a ṭhat hunah chauh ni lovin, harsatnate a lo awm hunah pawh kan inhmangaih tawn tûr a ni. Entîr nân, thihnaa hmangaih tak chân avânga thlamuanna, a nih loh leh ṭanpuina mamawh tuemaw hriat i nei em? A nih loh leh, leilung chhiatna avânga an thil neihte chân a, an Kingdom Hall emaw, an inte emaw sak ṭhat ngai Kristian unaute chanchin hriat i nei em? Unaute chungah hmangaihna leh lainatna thûk tak kan nei tih chu kan thusawiah mai ni lovin, chu aia pawimawh zâwk thiltihin kan lantîr a ni.

15. Johana thawn khat 4:7, 8-a sawi angin, eng nge kan tih ngai?

¹⁵ Kan inhmangaih tawn hian hmangaihna nei tak kan Pa vâna mi kan entawn a ni. (1 Johana 4:7, 8 chhiar rawh.) Hmangaihna kan lantîr theih dân kawng pawimawh tak pakhat chu inngaihdam tawn hi a ni. Entîr nân, tuemaw chuan kan rilru a tinain, a hnuah ngaihdam min dîl mai thei a. Ani chu ngaidamin, a chungah hmangaihna kan lantîr a, a sualna chu a hnuah kan sawi chhuak tawh lo a ni. (Kol. 3:13) Unau Aldo-a chuan a zah tak  unaupa pakhatin a hnam dân chungchâng ṭha lo taka a sawi avângin a rilru a na hle a. Ani chuan: “Chu unaupa chunga rilru ṭha lo pu lo tûrin Jehova hnênah ṭanpuina dîlin ka ṭawngṭai reng a ni,” tiin a sawi. Mahse, thil dang pawh a ti bawk. Chu unaupa chu rawngbâwlnaah thawhpui a tum ta a. An thawh dun laiin, unaupa hnênah chuan a thusawiin a rilru a tihnat dân chu a hrilh a. “Unaupa chuan a thusawiin ka rilru a tina tih a hriat chuan, ngaihdam min dîl a. A thusawi dân aṭangin, pawi a tihzia ka hre thei a ni. Tûnah chuan ṭhian ṭha tak kan nih leh a, kan inkâra buaina chu kan theihnghilh ta a ni,” tiin a sawi.

16-17. Eng nge tih kan tum tlat ang?

¹⁶ Tirhkoh Johana chuan thlarau lama a unaute ṭhatna tûr chu a vei hle a, chu a rilru put hmang chu thlarauva thâwk khum a lehkha ziak pathuma fuihna a pêkah a lang chiang hle. Krista rorêlpuitu tûr hriak thih a hmei a pate chu amah anga hmangaihna nei tak leh mite ngaihsak tak an ni tih hriat chu a va thlamuanthlâk tak êm!—1 Joh. 2:27.

¹⁷ Kan sawiho tâk fuihna thute chu thinlungah i vawng tlat ang u. Thutaka awm reng tumin, kan nun kawng tinrêngah Jehova thu i âwih tlat ang u. A Thu, Bible chu zirin, amah chu rinchhan tlat ang che. Isua chungah rinna nghet tak nei la. Mihring finna leh kalpêngte zirtîrna chu hnâwl ang che. Nun kawng chi hniha nung tûra nêksâwrna chu hnâwl la, sual chu ngam rawh. Nungchang lama Jehova tehna sâng tak milin nung ang che. Kan rilru tinatute ngaidamin leh ṭanpui ngaite ṭanpuiin, kan unaute chu nghet taka awm tûrin i ṭanpui ang u. Chutianga kan tih chuan, eng harsatna pawh hmachhawn mah ila, thutakah kan awm reng thei ang.