1. Ik tzeʼn in tzaj tqʼamaʼn 3 Juan 3 ex 4, ¿tiʼ in qo tzalaj tuʼn?

¿JAKUPE kubʼ qnaʼn tzalajbʼil kubʼ tnaʼn apóstol Juan tej tok tbʼiʼn qa kukx in che ajbʼen okslal te Jehová, aqeju onin kyiʼj? Ok tqʼoʼn apóstol Juan qe okslal lu ik tzeʼn qe tkʼwal. Tuʼnju e ok weʼ erman twitz junxichaq nya bʼaʼn, ok tilil tuʼn apóstol Juan tuʼn tonin kyiʼj tuʼn tchʼiy qʼuqbʼil kykʼuʼj. Ax ikx qe, in qo jaw tzalaj aj t-xi tqʼamaʼn jun qkʼwal te Jehová tuʼn tajbʼen te moqa jun xjal in xnaqʼtzan qukʼil ex qa kukx in nok tilil tuʼn (kjawil uʼjit 3 Juan 3, 4).

2. ¿Tiquʼn kubʼ ttzʼibʼin Juan qeju oxe tuʼj?

² Toj abʼqʼi 98, atzlo anqʼin Juan toj tnam Éfeso moqa nqayin tiʼj. Bʼalo xiʼ anqʼil atz tej otoqxi tzʼetz toj cárcel toj isla te Patmos. Tuʼntzunju, onin Jehová tiʼj tuʼn tkubʼ ttzʼibʼin oxe uʼj. Xi ttzʼibʼin qe uʼj lu tuʼn tonin kyiʼj erman tuʼn miʼn tnaj qʼuqbʼil kykʼuʼj tiʼj Jesús ex tuʼn kukx kybʼet toj axix tok.

3. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

³ Toj ambʼil aju, oʼkx te apóstol Juan itzʼxtoq ex tzaj bʼaj tkʼuʼj tuʼnju otoq chmet kybʼaj nya ax tok aj xnaqʼtzal kyxol erman (1 Juan 2:18, 19, 26). * Kyqʼama nya ax tok aj xnaqʼtzal lu qa ojtzqiʼn Dios kyuʼn, pero mintiʼ ok kyqʼoʼn toklen qe tkawbʼil Jehová. Toj xnaqʼtzbʼil lu, kʼelel qnikʼ kyiʼj consej xi tqʼoʼn Juan kye ex kxel qqʼoʼn tzaqʼwebʼil kyiʼj oxe xjel: ¿Tiʼ t-xilen tuʼn qbʼet toj axix tok? ¿Alkyeqe nya bʼaʼn in qo ok weʼ twitz? ¿Ex tzeʼn jaku bʼaj qonin qibʼ tuʼn kukx qbʼet toj axix tok?

4. Ik tzeʼn in tzaj tqʼamaʼn 1 Juan 2:3 a 6 ex 2 Juan 4 ex 6, ¿tiʼ kbʼantel quʼn tuʼn qbʼet toj axix tok?

⁴ Tuʼn qbʼet toj axix tok, tnejel il tiʼj tuʼn tok qojtzqiʼn ex atz tkuʼx toj Xjan Uʼj. Ax ikx, il tiʼj tuʼn t-xi qbʼiʼn qe tkawbʼil Jehová (kjawil uʼjit 1 Juan 2:3-6; 2 Juan 4, 6). Ex kyaj tqʼoʼn Jesús jun tbʼanel techel tiʼj jlu. Tuʼntzunju, jun tumel tuʼn qnimen te Jehová, aju qa ma tzʼok tilil quʼn tuʼn tel qkanoʼn tiʼj Jesús (Juan 8:29; 1 Ped. 2:21).

5. ¿Tiʼ il tiʼj tuʼn tok qeʼxix qkʼuʼj tiʼj?

⁵ Tuʼn kukx qbʼet toj axix tok, il tiʼj tuʼn tok qeʼ qkʼuʼj tiʼj qa a Jehová aju Dios axix tok, ex qa ax tok aju in tzaj tqʼamaʼn toj Tyol. Ax ikx, nim toklen tuʼn tok qeʼ qkʼuʼj tiʼj qa a Jesús aju Mesías tzaj ttziyen Dios. Toj ambʼil jaʼlo, nim xjal mintiʼ in xi kynimen qa o jaw skʼoʼn Jesús te aj Kawil toj Tkawbʼil Dios. Kyaj tqʼamaʼn Juan qa che ul nim «aj qʼoj» ex qa jaku che sbʼuʼn kyiʼj qeju mintiʼxix in nok qeʼ kykʼuʼj tiʼj axix tok tiʼj Jehová ex tiʼj Jesús (2 Juan 7-11). Kubʼ ttzʼibʼin Juan jlu: «¿Alkyetzunju nikʼal yol? ¿Myapetzunju in tmaʼn qa mya ate Jesús ju Crist?» (1 Juan 2:22). Tuʼn miʼn kysbʼun xjal lu qiʼj, nim toklen tuʼn qxnaqʼtzan tiʼj Xjan Uʼj ex oʼkx tuʼn jlu jaku tzʼok qojtzqiʼn Jehová ex Jesús (Juan 17:3). Iktzun tten, kʼokel qeʼxix qkʼuʼj tiʼj qa atoʼ toj axix tok.

6. ¿Alkyeqe nya bʼaʼn in che ok weʼ kuʼxun twitz?

⁶ Qkyaqilx il tiʼj tuʼn tok qxqʼuqin qibʼ tuʼntzun miʼn qkubʼ sbʼuʼn tuʼn kyximbʼetz xjal (1 Juan 2:26). Pero mas nim toklen tuʼn tok kyxqʼuqin kyibʼ kuʼxun tiʼj jlu. In tzaj tqʼamaʼn jun ermana te 25 abʼqʼi jlu te tnam Francia, aju Alexia tbʼi: * «Tej attoq qine toj tja xnaqʼtzbʼil, in xnaqʼtzane tiʼj evolución ex tiʼj junjuntl kyximbʼetz xjal. Kyuʼn xnaqʼtzbʼil lu, ya mintiʼ ok qeʼ nkʼuʼje tiʼj axix tok. At maj, tbʼanel ela qe xnaqʼtzbʼil toj nwitze. Noqtzun tuʼnj, kubʼ nximane qa nya oʼkx tuʼn tok nbʼine aju in tzaj xnaqʼtzaʼn weye, sino iltoq tiʼj tuʼn t-xi nqʼoʼne ambʼil te Jehová  tuʼn tyolin». Kubʼ t-xnaqʼtzaʼn Alexia aju uʼj La vida... ¿cómo se presentó aquí? ¿Por evolución, o por creación? Ex noq oʼkx tej tikʼ junjun seman ya mintiʼ jawje tkʼuʼj Alexia tiʼj axix tok. Naʼnx jlu tuʼn: «Ok qeʼ nkʼuʼje tiʼj qa atz tkuʼx axix tok toj Tyol Dios. Ex el nnikʼe tiʼj qa mas jaku chin tzalaje qa ma chex nbʼiʼne qe consej tkuʼx toj ex jaku chin tene toj txubʼtxaj».

7. ¿Tiʼ il tiʼj tuʼn tkubʼ tiʼj quʼn ex tiquʼn?

⁷ Qa kuʼxun qoʼ moqa ma qo tijen, il tiʼj tuʼn tok tilil quʼn tuʼn miʼn qok te xmeletzʼ toj qajbʼebʼil te Jehová. Yolin Juan tiʼj jlu te tqʼama qa mlay qo bʼet toj axix tok ex toj ax ambʼil in kubʼ qbʼinchaʼn jun nya bʼaʼn (1 Juan 1:6). Qa qaj tuʼn ttzalaj Jehová quʼn toj ambʼil jaʼlo ex toj ambʼil tzul, bʼaʼn tuʼn ttzaj qnaʼn qa in keʼyin Jehová tiʼj tkyaqilju in bʼant quʼn, ex mlayx kubʼ qewin jun tiʼ twitz (Heb. 4:13).

8. ¿Tiʼ il tiʼj tuʼn tel qikʼun?

⁸ Ax ikx, il tiʼj tuʼn tel qikʼun kyximbʼetz xjal at tiʼj il. Kubʼ ttzʼibʼin apóstol Juan jlu: «Qa in qmaʼn qa mintiʼ qil, in qsbʼun qibʼ quʼnx qibʼ, ex ju yol axix tok mintiʼ tuj qanmi» (1 Juan 1:8). Toj tqʼijlalil Juan, ateʼ junjun e ok te apóstata ex in kyqʼamaʼn qa kukx jaku tzʼok jun xjal te tamiw Dios maske in kubʼ t-ximen tuʼn tkubʼ tbʼinchaʼn jun il. Ax kyximbʼetz xjal at toj ambʼil jaʼlo ik tzeʼn jlu. In kyqʼamaʼn qa kʼujlaʼn Dios kyuʼn, pero mintiʼ in xi kynimen aju in tzaj tqʼamaʼn tiʼj il, mas tiʼj yaẍbʼil. Aju in nok tqʼoʼn Jehová te nya bʼaʼn, in nok kyqʼoʼn xjal te bʼaʼn ex in tzaj kyqʼamaʼn qa jaku kubʼ kybʼinchaʼn qa in che tzalaj tuʼn.

9. ¿Alkye tten in nonin kyiʼj kuʼxun aj tkubʼ kyanqʼin aju in tzaj tqʼamaʼn Tyol Dios?

⁹ Bʼalo kwest tuʼn t-xi kynimen kuʼxun qe tkawbʼil Jehová tiʼj yaẍbʼil tuʼnju jaku tzʼel kykanoʼn kymod kyukʼil toj tja xnaqʼtzbʼil  moqa toj aqʼuntl. Atzun jlu bʼaj tiʼj jun qʼa Aleksandar tbʼi. In tzaj tnaʼn jlu: «Ok tilil kyuʼn junjun txin toj tja xnaqʼtzbʼil tuʼn nkubʼ kuẍeʼye kyukʼil. Tuʼnju mintiʼ in chin yoline tukʼil jun txin, kyqʼama oʼkxlo in pon nkʼuʼje kyiʼj xinaq moqa ichin». Aya kuʼxun, bʼalo aʼyex nya bʼaʼn in nok weʼya twitz ik tzeʼn jlu. Qa ikju, bʼaʼn tuʼn ttzaj tnaʼna qa aj tkubʼ tanqʼina aju nimen tuʼna, in nok tqʼoʼna toklena, in nok t-xqʼuqin tibʼa, kukx ktzalajela ex kʼokel t-xqʼuqina tamiwbʼila tukʼil Jehová. Ex qa mas ma kubʼ kyiʼj joybʼil tuʼna, mas nya kwest kbʼel tbʼinchaʼna aju bʼaʼn. Miʼn tzikʼ tnaʼl tuʼna qa a Satanás nejni twitz kyximbʼetz xjal at tiʼj yaẍbʼil. Tuʼntzunju, qa mintiʼ ma ten t-ximbʼetza ik tzeʼn kye, in kubʼ tiʼj Tajaw il tuʼna (1 Juan 2:14).

10. ¿Tzeʼn in nonin 1 Juan 1:9 qiʼj tuʼn qajbʼen te Jehová tukʼil tzalajbʼil?

¹⁰ Ojtzqiʼn quʼn qa at toklen Jehová tuʼn ttzaj tqʼamaʼn alkyeqe tiʼchaq in che ok te il. Ex in nok tilil quʼn tuʼn kyel qikʼun. Pero qa ma kubʼ qbʼinchaʼn jun il, in jatz qpaʼn qil twitz Jehová toj naʼj Dios tuʼntzun tkubʼ tnajsaʼn (kjawil uʼjit 1 Juan 1:9). Qatzun ma kubʼ qbʼinchaʼn jun matij il, in qo jyon onbʼil kyukʼil ansyan, tuʼnju o tzʼok tqʼoʼn Jehová kyoklen tuʼn kyxqʼuqin qiʼj (Sant. 5:14-16). Noqtzun tuʼnj, qa kubʼ qbʼinchaʼn jun il toj ambʼil ojtxe, miʼn txi qqʼoʼn ambʼil te jlu tuʼn tkubʼ qximen qa mintiʼ qajbʼen. ¿Tiquʼn? Tuʼnju o tzaj tqʼoʼn Jehová Tkʼwal tuʼn tkyim tuʼntzun tchjet qil. Aj in tzaj tqʼamaʼn Jehová qa kbʼel tnajsaʼn kyil qeju in najtz tiʼj kyanmi, in japun twi tyol. Tuʼntzunju, jaku qo ajbʼen te tukʼil tzalajbʼil (1 Juan 2:1, 2, 12; 3:19, 20).

11. ¿Tiʼ jaku bʼant quʼn tuʼn miʼn tnaj qʼuqbʼil qkʼuʼj kyuʼn tiʼchaq in tzaj kyqʼamaʼn apóstata?

¹¹ At juntl tiʼ il tiʼj tuʼn tel qikʼun, aju in  tzaj kyqʼamaʼn apóstata. Atxix tej ttzaj tzyet kʼloj okslal, o tzʼok tilil tuʼn Tajaw il tuʼn tajbʼen junxichaq tumel tuʼn tuʼn miʼn tok qeʼ kykʼuʼj tmajen Dios tiʼj xnaqʼtzbʼil in tzaj tqʼoʼn. Tuʼntzunju, nim toklen tuʼn tel qnikʼ tiʼj alkye ax tok ex alkye nya ax tok. * Jaku tzʼajbʼen Internet ex redes sociales kyuʼn aj qʼoj qiʼj tuʼn tnaj qʼuqbʼil qkʼuʼj tiʼj Jehová ex tuʼn tnaj qkʼujlabʼil kyiʼj erman. Miʼn tzʼok qqʼoʼn qwiʼ kyiʼj yol lu, tuʼnju atz tzajni qe tukʼil Satanás (1 Juan 4:1, 6; Apoc. 12:9).

12. ¿Tiquʼn nim toklen tuʼn tchʼiy qʼuqbʼil qkʼuʼj kyiʼj axix tok o tzʼel qnikʼ tiʼj?

¹² Qa qaj tuʼn qex kywitz nya bʼaʼn in kubʼ tqʼoʼn Satanás qwitz, il tiʼj tuʼn tchʼiy qʼuqbʼil qkʼuʼj tiʼj Jesús ex tiʼj aqʼuntl in bʼant tuʼn tuʼntzun tbʼant tajbʼil Jehová. Ax ikx il tiʼj tuʼn tok qeʼ qkʼuʼj tiʼj majen in bʼant taqʼun, aju in najbʼen tuʼn Jehová tuʼn tkubʼ nej twitz ttnam (Mat. 24:45-47). Qa ma qo xnaqʼtzan tiʼj Tyol Dios, kʼonil qiʼj tuʼn tchʼiy qʼuqbʼil qkʼuʼj ik tzeʼn jun tzeʼ in xiʼ tlokʼ toj txʼotxʼ. Tqʼama Pablo jlu tej t-xi ttzʼibʼin jlu kye okslal te Colosas: «Ik tzaʼn ma kykʼame Qajaw Jesucrist, ikxtzun tuʼn kyanqʼine junx tukʼil. Kyawam kyibʼe tiʼj Crist ex kybʼinchaʼn jawe kychwinqlale tibʼaj, porke ate Crist simyent; che weʼxixe tuj kyokslabʼle» (Col. 2:6, 7). Qa kyuw taʼ qʼuqbʼil qkʼuʼj, mlay qo kubʼ numj tuʼn tkyaqilju in bʼant tuʼn Satanás nix kyuʼn qeju ax kyximbʼetz at ik tzeʼn te (2 Juan 8, 9).

13. ¿Tiʼ ojtzqiʼn quʼn ex tiquʼn?

¹³ Ojtzqiʼn quʼn qa qo elel ikʼun kyuʼn xjal (1 Juan 3:13). In tzaj tqʼamaʼn Juan qe qa «kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19). Ojtzqiʼn tuʼn Satanás qa chʼix tul kanin qʼij tuʼn tkubʼ xiten tkyaqilju tokx tjaqʼ tkawbʼil, ex tuʼntzunju mas in tzaj tqʼoj (Apoc. 12:12). Nya oʼkx in najbʼen yaẍbʼil ex kyyol apóstata tuʼn tuʼn tsbʼun qiʼj, sino ax ikx in najbʼen ikʼbʼil tuʼn. Tuʼntzunju, mas in nok tilil tuʼn tuʼn ya miʼn qpakbʼan moqa tuʼn tnaj qʼuqbʼil qkʼuʼj. Mintiʼ in qo jaw labʼin tuʼn jlu, tuʼnju toj junjun tnam o tzʼel qʼiʼn ambʼil qe tuʼn qajbʼen te Jehová. Maske ikju, kukx in nikʼx kyuʼn erman ateʼ kyoj lugar aju. Tuʼn jlu in kubʼ kyyekʼin erman qa kukx jaku qo ajbʼen te Jehová, maske in nok tilil tuʼn Tajaw il tuʼn tkubʼ tqʼoʼn nim nya bʼaʼn toj qbʼe.

14. ¿Alkye jun tten jaku qo onin kyiʼj erman tuʼn kukx kybʼet toj axix tok?

¹⁴ Jaku qo onin kyiʼj erman tuʼn kukx kybʼet toj axix tok aj ttzaj qʼaqʼin qkʼuʼj kyiʼj (1 Juan 3:10, 11, 16-18). Ax ikx nim toklen tuʼn tok qkʼujlan qibʼ kyoj ambʼil bʼaʼn ex kyoj ambʼil kwest. Jun techel, ¿atpe jun erman o kyim jun toj tja ex taj tuʼn t-xi qʼuqbʼet tkʼuʼj moqa taj juntl onbʼil? ¿Moqa o tzʼok qbʼiʼn qa o tzaj jun xitbʼil tuʼnx twitz txʼotxʼ ex kyaj erman onbʼil tuʼn tjaw bʼinchet Ja te Chmabʼil moqa kyja? Qa ax tok at qkʼujlabʼil kyiʼj erman ex in tzaj qʼaqʼin qkʼuʼj kyiʼj, kbʼel qyekʼin jlu tukʼil qbʼinchbʼen ex nya oʼkx tuʼn qyol.

15. ¿Tiʼ kxel qbʼinchaʼn ik tzeʼn in tzaj tqʼamaʼn 1 Juan 4:7 ex 8?

¹⁵ Aj tkubʼ qyekʼin qkʼujlabʼil qxolx, in nel qkanoʼn tiʼj Qtat at toj kyaʼj (kjawil uʼjit 1 Juan 4:7, 8). Ex jun tten tuʼn tkubʼ qyekʼin qkʼujlabʼil, aju qa ma kubʼ qnajsaʼn kyil txqantl. Jun techel, qa ma tzʼok tbʼinchaʼn  jun erman jun nya bʼaʼn qiʼj, kbʼel qnajsaʼn til tuʼnju kʼujlaʼn quʼn ex ya mlay tzaj qnaʼn aju otoq bʼaj (Col. 3:13). Qo yolin tiʼjju bʼaj tiʼj ermano Aldo. Tzaj nim tbʼis tej tok tbʼiʼn junjun yol nya toj tumel tqʼama jun erman kyiʼj xjal jatumel tzajni ex in noktoq tqʼoʼn toklen erman. Tqʼama Aldo jlu: «Nim maj xi nqanine te Jehová tuʼn tonin wiʼje tuʼn miʼn tten nya bʼaʼn nximbʼetze tiʼj ermano». Noqtzun tuʼnj, ax ikx bʼant juntl tiʼ tuʼn Aldo, xi tqʼoʼn txokbʼil tiʼj erman tuʼn tex pakbʼal tukʼil. Toj ambʼil lu xi tqʼamaʼn te erman tiʼ kubʼ tnaʼn kyuʼn tyol. Tqʼamatl Aldo jlu: «Tej tel tnikʼ erman tiʼj tiʼ kubʼ nnaʼne kyuʼn tyol, tzaj tqanin najsam weye. Tuʼn tqʼajqʼajel twiʼ, el nnikʼe tiʼj qa ax tok tzaj tbʼis tuʼnju otoq tqʼama. Xi qbʼinchaʼne tiʼj nya bʼaʼn ex ikʼ tnaʼl quʼne».

16, 17. ¿Tiʼ bʼaʼn tuʼn tkubʼ qximen tuʼn tbʼant quʼn?

¹⁶ Ten nim tkʼujlabʼil apóstol Juan kyiʼj erman ex ximen tiʼj kyamiwbʼil tukʼil Jehová. In nel qnikʼ tiʼj jlu tej t-xi tqʼoʼn junjun consej kye kyoj qeju oxe uʼj xi ttzʼibʼin kye tuʼn tonbʼil Jehová. Aqeju xinaq ex xuʼj o che jaw skʼoʼn tuʼn kyxiʼ kawil tukʼil Jesús toj kyaʼj, ax kyximbʼetz at ik tzeʼn te Juan. Aj tel qnikʼ tiʼj jlu, nim in qo tzalaj (1 Juan 2:27).

¹⁷ Qbʼinx qe consej ma qo yolin tiʼj toj xnaqʼtzbʼil lu. Bʼaʼn tuʼn tkubʼ qximen tuʼn kukx qbʼet toj axix tok ex tuʼn qnimen te Jehová toj tkyaqilju in bʼant quʼn. Qo xnaqʼtzan tiʼj Xjan Uʼj ex qeʼk qkʼuʼj tiʼjju in tzaj tqʼamaʼn. Qchʼiysam qʼuqbʼil qkʼuʼj tiʼj Jesús. Miʼn txi qbʼiʼn kyximbʼetz xjal ex aju in tzaj kyqʼamaʼn apóstata. Bʼaʼn tuʼn tok tilil quʼn tuʼn miʼn qok te xmeletzʼ toj qokslabʼil ex miʼn txi qqʼoʼn ambʼil tuʼn qkubʼ tzʼaq toj il. Qbʼinx qe tkawbʼil Jehová tiʼj yaẍbʼil. Ex qo onin kyiʼj erman tuʼn kyten kyuw toj kyokslabʼil, jaku bʼant jlu quʼn aj tkubʼ qnajsaʼn kyil qa ma tzʼok kybʼinchaʼn jun nya bʼaʼn qiʼj ex qo onin kyiʼj qeju kyaj onbʼil. Iktzun tten kukx qo bʼetil toj axix tok maske in qo ok weʼ twitz alkyexku nya bʼaʼn.