1. Dapre 3 Zan 3, 4, ki kitsoz rann nou ere?

MAZINE ki kantite lapot Zan ti kontan kan li ti aprann ki bann dimounn ki li ti ede pou konn laverite, ti pe kontign servi Zeova avek fidelite! Zot ti gagn boukou problem, ek Zan ti fer boukou zefor pou ed zot ranforsi zot lafwa. Zan ti konsider sa bann Kretien-la kouma so bann zanfan spiritiel. Dan mem fason, nou osi nou kontan kan nou prop zanfan ouswa nou bann zanfan spiritiel vwe zot lavi ar Zeova ek kontign servi Li.​—Lir 3 Zan 3, 4.

2. Ki ti lobzektif sa trwa let ki Zan ti ekrir la?

² Lane 98 Nou Lepok, Zan kitfwa ti pe viv dan Efez ouswa dan lezanviron. Kitfwa li ti al res laba apre ki li ti sorti dan prizon lor lil Patmos. Sa lepok-la, Zeova ti servi so lespri sin pou fer Zan ekrir trwa let. Ki ti lobzektif sa trwa let-la? Motiv bann Kretien pou kontign ena enn lafwa for an Zezi ek pou kontign mars dan laverite.

3. Ki bann kestion nou pou reponn dan sa lartik-la?

³ Sa lepok-la, Zan ti dernie zapot ki ti ankor vivan. Li ti bien trakase akoz move linflians ki bann fos ansegnan ti ena dan bann lasanble. * (1 Zan 2:18, 19, 26) Sa bann aposta-la ti dir ki zot konn Bondie, me zot pa ti obeir bann komannman Zeova. Dan sa lartik-la, nou pou examinn bann konsey ki Zan ti done, ek nou pou reponn sa bann kestion-la: Ki savedir mars dan laverite? Ki bann obstak nou bizin sirmonte? Ek kouma nou kapav  ed sakenn parmi nou pou res dan laverite?

4. Dapre 1 Zan 2:3-6 ek 2 Zan 4, 6, ki nou bizin fer pou mars dan laverite?

⁴ Pou nou mars dan laverite, nou bizin konn laverite ki ena dan Labib. Anplis, nou bizin “gard [Zeova] so komannman,” setadir nou bizin obeir so bann komannman. (Lir 1 Zan 2:3-6; 2 Zan 4, 6.) Zezi ti obeir Zeova dan enn fason parfe ek li’nn les nou enn bon lexanp. Alor, enn parmi bann meyer fason ki nou obeir Zeova se kan nou fer tou seki nou kapav pou swiv lexanp Zezi.​—Zan 8:29; 1 Pier 2:21.

5. Pou nou kontign mars dan laverite, ki kitsoz nou bizin sir?

⁵ Pou nou kontign mars dan laverite, nou bizin sir ki Zeova touletan koz laverite ek ki tou seki Li dir dan so Parol, Labib, li vre. Ek nou bizin sir ki Zezi limem Lemesi. Azordi, boukou dimounn pa krwar ki Zezi, li lerwa dan Rwayom Bondie. Zan ti dir ki ti pou ena boukou dimounn ki ti pou “tronp lezot.” Zot ti pou anbet bann ki feb dan laverite. (2 Zan 7-11, NW) Zan ti ekrir: “Kisannla ki manter, apar sa kikenn ki refiz aksepte ki Zezi, limem Kris?” (1 Zan 2:22, NW) Sel fason pou ki bann dimounn pa anbet nou se kan nou etidie Labib. Lerla, nou pou aprann konn Zeova ek Zezi. (Zan 17:3) Se zis kan nou fer sa ki nou pou sir ki nou dan laverite.

6. Ki obstak bann zenn Kretien bizin sirmonte?

⁶ Tou bann Kretien bizin fer atansion pou pa les bann filozofi sa lemond-la anbet zot. (1 Zan 2:26) Se sirtou bann zenn Kretien ki bizin fer bien atansion. Alexia, * enn ser dan Lafrans ki ena 25 an, dir: “Kan mo ti ankor lekol, mo ti etidie lor levolision ek lor bann lezot lansegnman imin. Sa ti fer mwa koumans ena bann dout lor laverite. Parfwa, mo ti trouv sa bann lansegnman-la lozik. Me mo ti dir ar momem ki fode pa mo inior tou seki ena dan Labib ek zis krwar tou seki mo bann profeser ansegne.” Alexia ti etidie liv La vie : comment est-elle apparue ? Évolution  ou création ? De-trwa semenn apre, li ti nepli ena okenn dout. Alexia dir: “Mo ti verifie par momem ki seki Labib dir li laverite. Ek mo ti realize ki si mo swiv bann prinsip Labib, mo ti pou gagn lazwa ek lape.”

7. Ki kitsoz nou bizin fer bien atansion, ek kifer?

⁷ Tou bann Kretien, ki zot zenn ouswa vie, bizin fer atansion pou pa amenn enn doub lavi. Zan ti dir ki nou pa kapav mars dan laverite ek anmemtan ena enn lavi imoral. (1 Zan 1:6) Si nou anvi fer Zeova plezir, nou bizin touletan rapel ki Zeova trouv tou seki nou fer. Mem si bann dimounn pa trouv seki nou fer an sekre, Zeova trouv tou kitsoz.​—Ebre 4:13.

8. Ki nou bizin rezete?

⁸ Nou bizin rezet fason ki lemond konsider pese. Lapot Zan ti ekrir: “Si nou dir ki nou pena pese, nou tronp noumem.” (1 Zan 1:8) Dan lepok lapot Zan, bann aposta ti dir ki enn kikenn ti kapav fer enn pese volonterman ek anmemtan kontign ena enn bon relasion avek Bondie. Azordi, nou pe viv parmi bann dimounn ki ena mem fason panse. Boukou dimounn dir ki zot krwar dan Bondie, me zot pa aksepte fason ki Bondie konsider pese, sirtou kan sa konsern sexialite. Seki Zeova konsider kouma enn pese, zot zot konsider sa kouma enn swa personel, ouswa enn fason viv.

9. Kan bann zenn res atase ar bann prinsip Zeova, ki bienfe zot gagne?

⁹ Parfwa, bann kamarad lekol ouswa bann koleg travay met presion lor bann zenn Kretien, pou ki bannla ena mem fason panse ki zot lor sexialite. Se seki ti ariv Aleksandar. Li dir: “Dan lekol, sertin tifi ti met presion lor mwa pou ki mo  gagn relasion ar zot. Akoz mo pa ti ena enn ti-kopinn, zot ti panse ki mo enn omosexiel.” Enn kitsoz koumsa kapav ariv twa osi. Me si to res atase ar bann prinsip Zeova ek ki to sir ki sa bann prinsip-la bon pou twa, to pou ena respe pou tomem, to pou protez to lasante fizik ek emosionel, ek to pou gard enn bon relasion avek Zeova. Anplis, sak fwa ki to rezet enn tantasion, to pou trouve ki li vinn pli fasil pou fer seki bon. Pa bliye osi ki sa move fason panse ki lemond ena lor sexialite la, li sorti kot Satan. Alor, si to pa les twa inflianse par sa lemond-la, to pou kapav “vink lemal.”​—1 Zan 2:14.

10. Kouma 1 Zan 1:9 ed nou pou servi Zeova avek enn konsians kler?

¹⁰ Nou rekonet ki Zeova ena drwa pou dir ki kitsoz pa bon. Ek nou fer tou seki nou kapav pou pa fer pese. Me kan nou fer pese, nou priye Zeova ek nou dir Li seki nou’nn fer. (Lir 1 Zan 1:9.) Ek si nou’nn fer enn pese grav, nou rod led bann ansien, parski Zeova inn etabli zot pou pran nou swin. (Zak 5:14-16, NW) Selman, fode pa nou kontign santi nou koupab akoz bann erer ki nou’nn fer dan lepase. Kifer? Parski nou Papa ki bien kontan nou finn donn nou laranson pou ki nou kapav gagn pardon nou bann pese. Kan Zeova dir ki Li pardonn bann ki repanti, Li vremem pardonn zot. Alor, pena nanye ki kapav anpes nou pou servi Zeova avek enn konsians kler.​—1 Zan 2:1, 2, 12; 3:19, 20.

11. Kouma nou kapav protez noumem kont bann lansegnman ki kapav afebli nou lafwa?

¹¹ Nou bizin rezet lansegnman bann aposta. Satan Lediab finn touletan esey afebli lafwa bann Kretien. Akoz sa, nou bizin kone kouma pou fer diferans ant  seki vre ek seki fos. * Nou bann lennmi kapav servi Internet ouswa bann rezo sosial pou esey afebli nou lafwa an Zeova ek nou lamour pou nou bann frer ek ser. Pa bliye kisannla ki deryer sa bann mansonz-la. Alor, rezet zot!​—1 Zan 4:1, 6; Rev. 12:9.

12. Kifer nou bizin ranforsi nou lafwa dan bann verite ki nou’nn aprann?

¹² Pou reziste kont bann latak Satan, nou bizin fortifie nou lafwa an Zezi ek ena konfians dan rol ki li ena dan proze Zeova. Nou bizin osi ena konfians dan lesklav fidel ek saz, sel mwayin ki Zeova pe servi azordi pou diriz so lorganizasion. (Mat. 24:45-47) Nou ranforsi nou lafwa kan nou etidie Labib regilierman. Lerla, nou lafwa pou kouma enn pie ki so rasinn bien profon dan later. Pol ti servi sa lexanp-la kan li ti ekrir bann Kolosien. Li ti dir: “Kontign viv zot lavi selon seki finn transmet zot lor Lekris Zezi Lesegner, gard zot rasinn plante an li, tenir ferm dan lafwa.” (Kol. 2:6, 7) Si nou fer zefor pou fortifie nou lafwa, Satan ek bann ki soutenir li pa pou kapav fer nanye pou anpes nou mars dan laverite.​—2 Zan 8, 9.

13. Ki kitsoz fode pa nou bliye, ek kifer?

¹³ Fode pa nou bliye ki lemond ena laenn pou nou. (1 Zan 3:13) Zan ti dir ki “lemonn antie li dan pouvwar Lemal.” (1 Zan 5:19) Plis lafin sa lemond-la pe koste, plis Satan pou ankoler. (Rev. 12:12) Li pa zis servi bann latak indirek kouma limoralite ek lansegnman bann aposta, me li servi osi bann latak direk kouma persekision. Satan kone ki li res bien tigit letan pou esey aret nou travay predikasion ek pou detrir nou lafwa. Alor, sa pa etonn nou ki nou laktivite interdi dan sertin pei. Kanmem sa, nou bann frer ek ser dan sa bann pei-la pe kontign andire. Zot montre ki ninport ki kitsoz ki Satan fer kont pep Zeova, nou kapav res fidel!

14. Sit enn fason ki nou kapav ed nou bann frer ek ser pou res dan laverite.

¹⁴ Pou ed nou bann frer ek ser pou res dan laverite, nou bizin montre konpasion anver zot. (1 Zan 3:10, 11, 16-18) Nou bizin kontan nou bann frer ek ser pa zis kan tou korek, me osi kan zot dan difikilte. Par exanp, eski to konn enn frer ouswa enn ser ki’nn perdi enn kikenn ki li kontan dan lamor? Ki to kapav fer pou ed li ouswa pou rekonfort li? Ouswa eski to konn bann frer ek ser ki’nn viktim bann katastrof natirel ek ki bizin led pou rekonstrir zot Lasal ouswa zot lakaz? Nou montre profonder nou lamour ek nou konpasion pou nou bann frer ek ser, pa zis par nou bann parol, me pli inportan, par nou bann aksion.

15. Dapre 1 Zan 4:7, 8, ki nou bizin fer?

¹⁵ Nou imit nou Papa ki dan lesiel kan nou montre lamour anver nou kamarad. (Lir 1 Zan 4:7, 8.) Enn fason ki nou montre nou lamour se kan nou pardonn nou kamarad. Par exanp, si enn kikenn bles nou ek apre li demann nou pardon, nou montre nou lamour kan nou pardonn li ek nou bliye seki’nn arive. (Kol. 3:13) Enn frer ki apel Aldo ti ankoler kan li ti tann enn frer, ki li ti bien respekte, dir enn kitsoz blesan lor so kiltir. Aldo  dir: “Mo ti priye Zeova boukou pou ki mo pena okenn santiman negatif anver sa frer-la.” Me Aldo ti fer enn lot kitsoz osi. Li ti demann frer-la pou pres avek li. Pandan ki zot ti pe prese ansam, Aldo ti dir frer-la ki seki li ti dir ti bien bles li. Aldo dir: “Kan frer-la ti konpran ki kantite sa ti bles mwa, li ti demann mwa exkiz. Par so fason koze, mo ti trouve ki li ti vremem regrete. Apre sa, nou ti re-vinn bon kamarad.”

16-17. Ki to bizin bien deside pou fer?

¹⁶ Lapot Zan ti bien kontan so bann frer ek ser, ek li ti anvi ki zot ena enn lafwa for. Nou trouv lamour ek latansion ki li ti ena pou zot dan sa trwa let ki li ti ekrir la. Sa bien ankouraz nou kan nou kone ki bann ki pou diriz ansam avek Zezi dan lesiel, zot ena boukou lamour, parey kouma Zan!​—1 Zan 2:27.

¹⁷ Anou bien deside pou swiv bann konsey ki nou’nn examine dan sa lartik-la. To bizin bien deside pou mars dan laverite, setadir obeir Zeova dan tou seki to fer. Kontign etidie ek ena konfians dan Labib. Fortifie to lafwa an Zezi, ek rezet bann filozofi sa lemond-la ek lansegnman bann aposta. Fode pa ki to amenn enn doub lavi. Fer tou seki to kapav pou pa fer pese. Fer zefor pou viv dapre bann prinsip Zeova. To kapav osi ed to bann frer ek ser pou res dan laverite, kan to pardonn bann ki’nn bles twa ek kan to ed bann ki bizin led. Kan to fer sa bann kitsoz-la, ninport ki difikilte ki to gagne, to pou kontign mars dan laverite!