ARTÍCULO ÑA̱ KAʼVIYÓ 30
Ná ndakundeéyó kandíxayó ña̱ nda̱a̱
“Ña̱ sákusi̱íníka-inii̱ kúú ña̱ kúnda̱a̱-inii̱ ña̱ ndákundeé na̱ se̱ʼi̱ kándíxana ña̱ nda̱a̱” (3 JUAN 4).
YAA 54 “Ña̱yóʼo kúú ña̱ nda̱a̱”
ÑA̱ KA̱ʼA̱NYÓ XA̱ʼA̱ *
1. Nda̱a̱ táki̱ʼva káchi 3 Juan 3, 4, ¿ndáaña sákusi̱í-iniyó?
¿Á KIVI ndakanixi̱níyó ña̱ ni̱kusi̱íní-ini ta̱ apóstol Juan tá na̱kunda̱a̱-inira ña̱ nda̱kúní íyo ini na̱ hermano na̱ chi̱ndeétáʼanra xíʼin ña̱ sa̱kuaʼana xa̱ʼa̱ ña̱ nda̱a̱? Nda̱a̱ táki̱ʼva íyo se̱ʼera saá ni̱xi̱yona. Xa̱ʼa̱ ña̱ ni̱xi̱yoní tu̱ndóʼo nu̱úna, ta̱ apóstol Juan chi̱ka̱a̱ra ndee̱ ña̱ chindeétáʼanra xíʼinna ña̱ ndakú koo ña̱ kándíxana Ndióxi̱. Ta saátu miíyó kúsi̱íní-iniyó tá na̱ se̱ʼeyó á na̱ chi̱ndeétáʼanyó xíʼin ña̱ sa̱kuaʼana xa̱ʼa̱ ña̱ nda̱a̱, ndátaxina miína ndaʼa̱ Jehová ta ndákundeéna káchíñuna nu̱úra (kaʼvi 3 Juan 3, 4). *
2. ¿Nda̱chun ka̱ʼyí ta̱ Juan u̱ni̱ carta?
2 Tá ku̱i̱ya̱ 98, ta̱ Juan sana ni̱xi̱yora chí ñuu Éfeso á yatin kán. Sana tá ki̱tara veʼeka̱a ña̱ ni̱xi̱yo chí isla ña̱ Patmos saá kúú ña̱ ni̱xa̱a̱ra ni̱xi̱yora kán. Tasaá kúú ña̱ chi̱ndeétáʼan espíritu santo Jehová xíʼinra ña̱ ka̱ʼyíra u̱ni̱ carta. Ka̱ʼyíra carta yóʼo saáchi xi̱kuni̱ra chika̱a̱ra ndee̱ xíʼin na̱ hermano ña̱ va̱ʼa ná ndakundeéna kandíxana ta̱ Jesús, ta kandíxana ña̱ nda̱a̱.
3. ¿Ndáa pregunta ka̱ʼa̱nyó xa̱ʼa̱ nu̱ú ña̱ artículo yóʼo?
3 Tá tiempo saá, xa̱a̱ ni̱xi̱ʼi̱ ndiʼi na̱ apóstol ta ndáa iinlá ta̱ Juan kúú ta̱ xi̱taku, ta xi̱ndi̱ʼi̱-inira chi ti̱xin congregación ni̱xi̱yo na̱ xi̱sanáʼa̱ ña̱ vatá (1 Juan 2:18, 19, 26). * Na̱ apóstata yóʼo xi̱ka̱ʼa̱nna ña̱ xi̱xini̱na Ndióxi̱ soo va̱ása níxikeʼéna ña̱ xi̱ka̱ʼa̱nra. Nu̱ú ña̱ artículo yóʼo ka̱ʼa̱nyó xa̱ʼa̱ consejo ña̱ ta̱xi ta̱ Juan, ta ndakuiinyó u̱ni̱ pregunta: ¿Ndáaña kúni̱ kachi ña̱ kandíxayó ña̱ nda̱a̱? ¿Ndáa tu̱ndóʼo kúú ña̱ yáʼayó nu̱ú? Ta, ¿ndáa ki̱ʼva chindeétáʼanyó xíʼin táʼanyó ña̱ ndakundeéyó kandíxayó ña̱ nda̱a̱?
¿NDÁAÑA KÚNI̱ KACHI ÑA̱ KANDÍXAYÓ ÑA̱ NDA̱A̱?
4. Nda̱a̱ táki̱ʼva káchi 1 Juan 2:3-6 xíʼin 2 Juan 4, 6, ¿ndáaña xíniñúʼu keʼéyó ña̱ va̱ʼa ndakundeéyó kandíxayó ña̱ nda̱a̱?
4 Ña̱ va̱ʼa kandíxayó ña̱ nda̱a̱ xíniñúʼu kunda̱a̱-iniyó xa̱ʼa̱ ña̱ nda̱a̱ ña̱ va̱xi nu̱ú tu̱ʼún Ndióxi̱. Ta saátu xíniñúʼu kuniso̱ʼoyó ndiʼi ña̱ káʼa̱n Jehová (kaʼvi 1 Juan 2:3-6; * 2 Juan 4, * 6). * Ta̱ Jesús kúú ta̱ va̱ʼaní ke̱ʼé ña̱yóʼo tasaá va̱ʼaní yichi̱ sa̱ndákoora nu̱úyó. Ña̱kán, ña̱ va̱ʼa kuniso̱ʼoyó ña̱ káʼa̱n Jehová xíniñúʼu keʼéyó nda̱a̱ táki̱ʼva ke̱ʼé ta̱ Jesús (Juan 8:29; 1 Ped. 2:21).
5. ¿Ndáaña xíniñúʼu kandíxayó?
5 Ña̱ va̱ʼa ndakundeéyó kandíxayó ña̱ nda̱a̱, xíniñúʼu kandíxayó ña̱ nina ña̱ nda̱a̱ kúú ña̱ káʼa̱n Jehová ña̱kán ndiʼi ña̱ va̱xi nu̱ú tu̱ʼunra ña̱ nda̱a̱ kúúña. Ta saátu xíniñúʼu kandíxayó ña̱ mií Ndióxi̱ kúú ta̱ nda̱kaxin ta̱ Jesús. Tiempo vitin, ku̱a̱ʼání na̱ yiví va̱ása kándíxana ña̱ nda̱kaxin Ndióxi̱ ta̱ Jesús ña̱ koora rey ti̱xin Reinora. Ta̱ Juan ni̱ka̱ʼa̱nra ña̱ kooní na̱ vatá na̱ kivi sandáʼvi na̱ xa̱a̱ kándíxa Jehová xíʼin ta̱ Jesús (2 Juan 7-11). Ta̱ Juan ka̱ʼyíra ña̱yóʼo: “¿Ndáana kúú na̱ vatá? ¿Á su̱ví na̱ káʼa̱n ña̱ va̱ása kúú ta̱ Jesús ta̱ Cristo?” (1 Juan 2:22). Tá ná kaʼviyó tu̱ʼun Ndióxi̱ saá kúú ña̱ va̱ása taxiyó ña̱ ná sandáʼvina miíyó. Tasaá kuxini̱kayó Jehová xíʼin ta̱ Jesús (Juan 17:3). Tá ná keʼéyó ña̱yóʼo va̱ása kaka-iniyó ña̱ kúúmiíyó ña̱ nda̱a̱.
¿NDÁA TU̱NDÓʼO KÚÚ ÑA̱ YÁʼAYÓ NU̱Ú?
6. ¿Ndáa tu̱ndóʼo yáʼa na̱ va̱lí kúa̱an nu̱ú?
6 Ndiʼiyó xíniñúʼu kiʼinyó kuenta ña̱ va̱ása xa̱a̱yó kandíxayó ña̱ sánáʼa̱ na̱ ñuyǐví yóʼo (1 Juan 2:26). Na̱ va̱lí kúa̱an kúú na̱ xíniñúʼu kiʼinníka kuenta xíʼin ña̱yóʼo. Ñá Alexia, * ñá íyo chí Francia ñá kúúmií 25 ku̱i̱ya̱, káchiñá: “Tá xi̱xaʼi̱n escuela xi̱kaʼvii̱ xa̱ʼa̱ ña̱ evolución xíʼin inkaka ña̱ sánáʼa̱ na̱ ñuyǐví yóʼo. Xa̱ʼa̱ ña̱yóʼo, ki̱xáʼa xíka-inii̱ xa̱ʼa̱ ña̱ nda̱a̱. Sava yichi̱ xi̱kutóí sakuaʼakai̱ xa̱ʼa̱ ña̱ xi̱sanáʼa̱na yi̱ʼi̱ ti̱xin escuela. Soo nda̱kanixi̱níi̱ ña̱ su̱ví nda̱saa ña̱ sánáʼa̱na yi̱ʼi̱ ti̱xin escuela kúú ña̱ xíniñúʼu kandíxai̱, chi saátu xíniñúʼu kandíxai̱ ña̱ káʼa̱n tu̱ʼun Ndióxi̱”. Ñá Alexia ka̱ʼviñá libro ña̱ naní La vida... ¿cómo se presentó aquí? ¿Por evolución, o por creación? Tá ni̱ya̱ʼa loʼo semana va̱ása níxi̱kaka-iniñá xa̱ʼa̱ ña̱ nda̱a̱. Káchiñá: “Xa̱ʼa̱ ña̱ ka̱ʼvii̱ ña̱yóʼo ni̱xa̱a̱i̱ ku̱nda̱a̱-inii̱ ña̱ sánáʼa̱ ña̱ Biblia ña̱ nda̱a̱. Ta ki̱ʼii̱n kuenta ña̱ tá ná kandíxai̱ ña̱ káʼa̱nña kusi̱íní-inii̱ ta táxi̱n koo inii̱”.
7. ¿Ndáaña kǒo xíniñúʼu keʼéyó, ta nda̱chun?
7 Kúúyó na̱ va̱lí á na̱ náʼnu, kǒo kívi keʼéyó ña̱ va̱ása va̱ʼa ta ka̱ʼa̱nyó ña̱ ndásakáʼnuyó Ndióxi̱. Ta̱ Juan ni̱ka̱ʼa̱nra xa̱ʼa̱ ña̱yóʼo tá ka̱chira ña̱ va̱ása kivi kandíxayó ña̱ nda̱a̱ soo saátu keʼéyó ña̱ kini (1 Juan 1:6). Tá kúni̱yó ña̱ ná kusi̱í-ini Jehová xíʼin ña̱ kéʼéyó vitin ta saátu chí nu̱únínu, xíniñúʼu ndakaʼányó ña̱ ni va̱ása xíto na̱ yiví ña̱ kéʼéyó, Jehová xítovaraña (Heb. 4:13).
8. ¿Ndáaña va̱ása xíniñúʼu xa̱a̱yó ndakanixi̱níyó xa̱ʼa̱?
8 Ná va̱ása ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo xa̱ʼa̱ ña̱ va̱ása va̱ʼa. Ta̱ apóstol Juan ka̱ʼyíra ña̱yóʼo: “Tá káʼa̱nyó: ‘Kǒo ku̱a̱chiyóʼ, sándaʼviyó miíyó” (1 Juan 1:8). Tá tiempo ña̱ ni̱xi̱yo ta̱ Juan, na̱ apóstata xi̱ka̱ʼa̱nna ña̱ kiviva koo na̱ yiví migo Ndióxi̱ ni ndákundeéna kéʼéna ña̱ kini. Saá ndákanixi̱ní ku̱a̱ʼánína tiempo vitin. Káʼa̱nna ña̱ kándíxana Ndióxi̱, soo va̱ása xíínna kandíxana ña̱ káʼa̱nra xa̱ʼa̱ ña̱ va̱ása va̱ʼa, tá kúú ña̱ kísi̱ na̱ yiví xíʼin táʼanna. Sava ña̱ kéʼé na̱ yiví iin ku̱a̱chi ndeé kúúña nu̱ú Jehová, soo nu̱ú miína ña̱ va̱ʼava kúúña ta káʼa̱nna ña̱ kiviva keʼénaña tá kúni̱na.
Nandukú nda̱chun kúú ña̱ káʼa̱n Jehová ña̱ íyo sava ña̱ʼa ña̱ kivi keʼéyó ta inkaña va̱ása kivi keʼéyóña, tasaá kivi ka̱ʼún xíʼin inkana nda̱chun va̱ása kúni̱ún keʼún ña̱ va̱ása va̱ʼa. (Koto párrafo 9). *
9. ¿Nda̱chun va̱ʼaníka tá ná keʼé na̱ va̱lí kúa̱an ña̱ káʼa̱n tu̱ʼun Ndióxi̱?
9 Na̱ va̱lí kúa̱an kúú na̱ kivi kixáʼa ndakanixi̱ní nda̱a̱ táki̱ʼva ndákanixi̱ní na̱ yiví xa̱ʼa̱ ña̱ va̱ása va̱ʼa, tá kúú na̱ káchíñu xíʼinna á na̱ káʼvi xíʼinna. Ña̱yóʼo kúú ña̱ ndo̱ʼo iin ta̱ hermano ta̱ naní Aleksandar. Ta̱yóʼo ndákaʼánra: “Sava ná válí ná xi̱kaʼvi xíʼi̱n xi̱ ixandúxaná xíʼi̱n ña̱ ku̱su̱i̱n xíʼinná. Xi̱ka̱ʼa̱nná xíʼi̱n ña̱ xa̱ʼa̱ ña̱ va̱ása íyo noviai̱, sana na̱ ta̱a kútói̱”. Sana táʼan ña̱yóʼo kúútu ña̱ ndóʼo yóʼó. Tá saá íyoña, ndakaʼán chi tá ná keʼún ña̱ káʼa̱n tu̱ʼun Ndióxi̱, va̱ʼa kuniún xíʼin ña̱ kéʼún, va̱ása kiʼin kue̱ʼe̱ yóʼó, va̱ása xo̱ʼvi̱ún ta vií kutáʼún xíʼin Jehová. Tá ná kundeé-iniún ta va̱ása keʼún ña̱ kini, va̱ása ixayo̱ʼvi̱ña xíʼún ke̱ʼún ña̱ va̱ʼa. Va̱ása nandósóún ña̱ ta̱ Ndi̱va̱ʼa kúú ta̱ násama ki̱ʼva ña̱ ndákanixi̱ní na̱ yiví xa̱ʼa̱ ña̱ kísi̱na xíʼin táʼanna. Ña̱kán, tá ná va̱ása ndakanixi̱níún nda̱a̱ táki̱ʼva ndákanixi̱ní na̱ ñuyǐví yóʼó, va̱ása taxiún ña̱ ná sandáʼvi ta̱ Ndi̱va̱ʼa yóʼó (1 Juan 2:14).
10. ¿Ndáa ki̱ʼva chíndeétáʼan 1 Juan 1:9 xíʼinyó ña̱ kachíñuyó nu̱ú Jehová ta va̱ása ndakaniníxi̱níyó xa̱ʼa̱ ña̱ va̱ása va̱ʼa ke̱ʼéyó tá ya̱chi̱?
10 Iinlá Jehová kúú ta̱ kivi ka̱ʼa̱n ndáaña kúú ña̱ va̱ása va̱ʼa, ta chíka̱a̱yó ndee̱ ña̱ va̱ása keʼéyóña. Soo tá kéʼéyó ña̱ va̱ása va̱ʼa, nátúʼunyó xíʼinra xa̱ʼa̱ ña̱yóʼo (kaʼvi 1 Juan 1:9). * Ta, tá ku̱a̱chi ndeé kúú ña̱ ni̱ki̱ʼviyó, káʼa̱nyó xíʼin na̱ anciano ña̱ ná chindeétáʼanna xíʼinyó, saáchi na̱yóʼo kúú na̱ nda̱kaxin Jehová ña̱ kundaana miíyó (Sant. 5:14-16). Ta saátu, va̱ása xíniñúʼu ndakaniníxi̱níyó xa̱ʼa̱ ña̱ va̱ása va̱ʼa ña̱ ke̱ʼéyó tá ya̱chi̱. ¿Nda̱chun? Chi xa̱ʼa̱ ña̱ kúʼvi̱ní-ini yiváyó xínira miíyó ta̱xira se̱ʼera ña̱ ni̱xi̱ʼi̱ra xa̱ʼa̱yó tasaá va̱ʼa ixakáʼnu-inira xa̱ʼa̱ ku̱a̱chiyó. Tá káʼa̱n Jehová ña̱ ixakáʼnu-inira xa̱ʼa̱ na̱ ni̱ki̱ʼvi ku̱a̱chi, kéʼévaraña. Ña̱kán, kiviva kachíñuyó nu̱úra chi vií íyo ña̱ xínitúni̱yó (1 Juan 2:1, 2, 12; 3:19, 20).
11. ¿Ndáaña xíniñúʼu keʼéyó ña̱ va̱ʼa ná va̱ása kandíxayó ña̱ káʼa̱n na̱ apóstata?
11 Íyo inka ña̱ va̱ása xíniñúʼu kandíxayó: ña̱ káʼa̱n na̱ apóstata. Nda̱a̱ tá ki̱xáʼa íyo ña̱ congregación, ta̱ Ndi̱va̱ʼa xíniñúʼura na̱ vatá ña̱ va̱ʼa sandáʼvina na̱ nda̱kú íyo ini xíʼin Ndióxi̱. Xa̱ʼa̱ ña̱yóʼo xíniñúʼu kunda̱a̱-iniyó ndáaña kúú ña̱ nda̱a̱ tá ndáaña kúú ña̱ vatá. * Na̱ sáa̱-ini xíni miíyó kivi kuniñúʼuna Internet á inkaka ña̱ʼa, ña̱ va̱ʼa sandáʼvina miíyó ta va̱ása kandíxakayó Jehová ta ni va̱ása kuʼvi̱ka-iniyó kuniyó na̱ hermano. Ta̱ Ndi̱va̱ʼa kúú ta̱ xíniñúʼu na̱yóʼo, ña̱kán ná va̱ása kandíxayóna (1 Juan 4:1, 6; Apoc. 12:9).
12. ¿Nda̱chun xíniñúʼu ndasandakúyó ña̱ kándíxayó Ndióxi̱?
12 Tá kúni̱yó kundeé-iniyó nu̱ú ña̱ kéʼé ta̱ Ndi̱va̱ʼa, xíniñúʼu ndasandakúyó ña̱ kándíxayó ta̱ Jesús, ta xíniñúʼu kandíxayó ña̱ mií Ndióxi̱ kúú ta̱ xíniñúʼu ta̱yóʼo ña̱ keʼéra ña̱ kúni̱ra. Saátu xíniñúʼu kandíxayó na̱ hermano na̱ xíniñúʼura ña̱ va̱ʼa kuniʼina yichi̱ nu̱ú na̱ ñuura (Mat. 24:45-47). Tá ná kaʼviyó tu̱ʼun Ndióxi̱ ndiʼi ki̱vi̱, kandíxaníkayóra ta ña̱yóʼo xa̱a̱ña kooña nda̱a̱ táki̱ʼva íyo iin yitu̱n tú kúnuní ñúʼu ti̱oʼo. Ta̱ Pablo ni̱ka̱ʼa̱nra xa̱ʼa̱ ña̱yóʼo tá ka̱ʼyíra carta ku̱a̱ʼa̱n ndaʼa̱ na̱ ñuu Colosas: “Xa̱ʼa̱ ña̱ ka̱ndíxandó ta̱ Cristo Jesús, ndakundeéndó kutáʼanndó xíʼinra, ndakúní ta viíní ná koo ña̱ kándíxandóra” (Col. 2:6, 7). Tá saá íyo ña̱ kándíxayó Ndióxi̱, nda̱a̱ ni iin ña̱ ná keʼé ta̱ Ndi̱va̱ʼa á na̱ kítáʼan xíʼinra va̱ása kivi sandákavaña miíyó (2 Juan 8, 9).
13. ¿Ndáaña kúnda̱a̱-iniyó, ta nda̱chun?
13 Kúnda̱a̱-iniyó ña̱ sa̱a̱-ini na̱ yiví kunina miíyó (1 Juan 3:13). Ta saátu, ta̱ Juan ni̱ka̱ʼa̱nra ña̱ “ñuyǐví yóʼo ndíka̱a̱ña ndaʼa̱ ta̱ Ndi̱va̱ʼa” (1 Juan 5:19). Xa̱a̱ ku̱yatinní ndiʼi-xa̱ʼa̱ ña̱ ñuyǐví yóʼo, xa̱ʼa̱ ña̱yóʼo sáa̱ní ta̱ Ndi̱va̱ʼa (Apoc. 12:12). Va̱ása xíniñúʼu kuitíra ña̱ kini á tu̱ʼun vatá ña̱ káʼa̱n na̱ apóstata, chi saátu íxandi̱va̱ʼara xíʼinyó. Xa̱ʼa̱ ña̱ kúnda̱a̱-inira ña̱ si̱lóʼo kúma̱ní ndiʼi-xa̱ʼa̱ra, tuku ta tuku kúni̱ra kasira nu̱úyó ña̱ ná va̱ása natúʼunkayó xíʼin na̱ yiví á kúni̱ra sandíʼi-xa̱ʼa̱ra ña̱ kándíxayó Ndióxi̱. Xa̱ʼa̱ ña̱yóʼo va̱ása ndákanda̱-iniyó, tá kúnda̱a̱-iniyó ña̱ sava país va̱ása táxikana ña̱ ná ndasakáʼnuyó Ndióxi̱. Soo ni saá, na̱ hermano na̱ íyo país kán ndakú íyo inina. Saá náʼa̱na ña̱ nda̱a̱ ndáaka ña̱ ná keʼé ta̱ Ndi̱va̱ʼa xíʼinyó, va̱ása kuchiñura kasira nu̱úyó ña̱ nda̱kú koo iniyó xíʼin Ndióxi̱.
¿NDÁA KI̱ʼVA CHINDEÉTÁʼANYÓ XÍʼIN TÁʼANYÓ ÑA̱ NDAKUNDEÉYÓ KANDÍXAYÓ ÑA̱ NDA̱A̱?
14. ¿Ndáa ki̱ʼva chindeétáʼanyó xíʼin na̱ hermano ña̱ ndakundeéna kandíxana ña̱ nda̱a̱?
14 Kivi chindeétáʼanyó xíʼin na̱ hermano ña̱ ndakundeéna kandíxana ña̱ nda̱a̱ tá kúndáʼvi-iniyó xíniyóna (1 Juan 3:10, 11, 16-18). Ndiʼi tiempo kúú ña̱ xíniñúʼu kuʼvi̱-iniyó kunitáʼanyó. Tá kúú, ¿á xíni̱yó iin na̱ hermano na̱ sa̱kán ni̱xi̱ʼi̱ iin táʼan, ta xíniñúʼu sandíkoyó-inina á chindeétáʼanyó xíʼinna? ¿Á kúnda̱a̱-iniyó ña̱ íyo sava na̱ hermano na̱ xíniñúʼu chindeétáʼanyó xíʼin ña̱ ndasaviíyó veʼe nu̱ú ndátakana ña̱ sakuaʼana xa̱ʼa̱ Ndióxi á ña̱ sandáʼayó veʼena xa̱ʼa̱ ña̱ ku̱un sa̱ví kini á xa̱ʼa̱ ña̱ ni̱ta̱an? Tá ndixa kúʼvi̱-iniyó xíniyó na̱ hermano, va̱ása ka̱ʼa̱n kuitíyóña chi saátu na̱ʼa̱yóña xíʼin ña̱ kéʼéyó.
15. Nda̱a̱ táki̱ʼva káchi 1 Juan 4:7, 8, ¿ndáaña xíniñúʼu keʼéyó?
15 Tá náʼa̱yó ña̱ kúʼvi̱-iniyó xínitáʼanyó, kéʼéyó nda̱a̱ táki̱ʼva kéʼé yiváyó ta̱ íyo chí ndiví (kaʼvi 1 Juan 4:7, 8). * Tá íxakáʼnu-iniyó xa̱ʼa̱ inkana saá kúú ña̱ náʼa̱yó ña̱ kúʼvi̱-iniyó xíniyóna. Tá kéʼéna ña̱ va̱ása va̱ʼa xíʼinyó, íxakáʼnu-iniyó xa̱ʼa̱na ta nándósóyó xa̱ʼa̱ ña̱ ke̱ʼéna xíʼinyó chi kúʼvi̱-iniyó xíniyóna (Col. 3:13). Ná kotoyó ña̱ ndo̱ʼo iin ta̱ hermano ta̱ naní Aldo. Ni̱sa̱a̱níra tá xi̱niso̱ʼora ña̱ ni̱ka̱ʼa̱n iin ta̱ hermano ña̱ va̱ása va̱ʼa xa̱ʼa̱ na̱ yiví na̱ íyo ñuu nu̱ú ke̱era. Ta̱yóʼo káchira: “Ku̱a̱ʼání yichi̱ ni̱ka̱ʼi̱n xíʼin Jehová ña̱ ná chindeétáʼanra xíʼi̱n ña̱ vií ndakanixi̱níi̱ xa̱ʼa̱ ta̱ hermano yóʼo”. Soo íyo inkaka ña̱ ke̱ʼé ta̱ Aldo: ni̱ka̱ʼa̱nra xíʼin ta̱ hermano kán ña̱ ná ku̱ʼu̱nra xíʼinra ña̱ natúʼunna xa̱ʼa̱ Ndióxi̱. Tasaá kúú ña̱ ni̱ka̱ʼa̱nra xíʼinra xa̱ʼa̱ ña̱ xi̱ndakanixi̱níra. Ta̱yóʼo káchira: “Tá na̱kunda̱a̱-inira xa̱ʼa̱ ña̱ ndo̱ʼi̱ xíʼin ña̱ ni̱ka̱ʼa̱nra, ta̱ hermano yóʼo ni̱ka̱ʼa̱nra xíʼi̱n ña̱ ná ixakáʼnu-inii̱ xa̱ʼa̱ra. Xa̱ʼa̱ ki̱ʼva ña̱ ni̱ka̱ʼa̱nra ña̱yóʼo xíʼi̱n, ki̱ʼi̱n kuenta ña̱ ndixa nda̱ndikó-inira. Tasaá, vií nda̱kutáʼanndi̱ ta na̱ndósó-inindi̱ xa̱ʼa̱ ña̱ ku̱u”.
16, 17. ¿Ndáaña xíniñúʼu chika̱a̱-iniyó keʼéyó?
16 Ta̱ apóstol Juan xi̱kuʼvi̱ní-inira xi̱xinira na̱ hermano ta xi̱kuni̱ra ña̱ ndakú ná koo ña̱ kándíxana Ndióxi̱. Ta ni̱na̱ʼa̱ra ña̱yóʼo xíʼin consejo ña̱ ta̱xira nu̱ú u̱ni̱ saá carta ña̱ ka̱ʼyíra. Kúsi̱íní-iniyó chi na̱ ku̱ʼu̱n kaʼndachíñu xíʼin ta̱ Cristo chí ndiví, kúʼvi̱-inina xínina miíyó nda̱a̱ táki̱ʼva ni̱xi̱yo ta̱ Juan (1 Juan 2:27).
17 Viíní ná kundiku̱nyó consejo ña̱ xa̱a̱ ni̱ka̱ʼa̱nyó xa̱ʼa̱ yóʼo. Ná ndakundeéyó kandíxayó ña̱ nda̱a̱, ta saá na̱ʼa̱yó xíʼin ña̱ kéʼéyó ña̱ kándíxayó Jehová. Ná kaʼviyó tu̱ʼunra ta ná kandíxayó ña̱ káʼa̱nña. Ná ndakundeéyó kandíxayó ta̱ Jesús. Ná va̱ása ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo, ta ná va̱ása kandíxayó ña̱ káʼa̱n na̱ apóstata. Ná va̱ása ndakanixi̱níyó ña̱ kivi ndasakáʼnuyó Ndióxi̱ ta saátu keʼéyó ña̱ va̱ása va̱ʼa, chi tá ná keʼéyó ña̱yóʼo saá ki̱ʼviyó ku̱a̱chi nu̱úra. Va̱ʼaka ná keʼéyó ña̱ káʼa̱n Jehová xíʼinyó. Ná chindeétáʼanyó xíʼin na̱ hermanoyó ña̱ ndakú koona, ta kivi keʼéyó ña̱yóʼo, tá íxakáʼnu-iniyó xa̱ʼa̱na ta chíndeétáʼanyó xíʼinna. Tasaá, ni nda̱a̱ ndáaka ña̱ ná ya̱ʼayó nu̱ú ndakundeéyó kandíxayó ña̱ nda̱a̱.
YAA 49 Ná sakúsi̱íyó níma̱ Jehová
^ párr. 5 Ta̱ ndísochíñu xíʼin ñuyǐví ña̱ ndóoyó kúú ta̱ Ndi̱va̱ʼa, ta̱ káʼa̱n ña̱ vatá. Ña̱kán íxayo̱ʼvi̱níña xíʼinyó ña̱ ndakundeéyó kandíxayó ña̱ nda̱a̱. Ña̱yóʼo kúú ña̱ ndo̱ʼo na̱ hermano na̱ ni̱xi̱yo tá kúni̱ ndiʼi ña̱ siglo nu̱ú. Ña̱ va̱ʼa chindeétáʼan Jehová xíʼin na̱ hermano kán ta saátu xíʼin miíyó, chi̱ndeétáʼanra xíʼin ta̱ apóstol Juan ña̱ ka̱ʼyíra u̱ni̱ carta. Ña̱yóʼo chindeétáʼanña xíʼinyó ña̱ va̱ʼa ndakuniyó ña̱ íxayo̱ʼvi̱ xíʼinyó, ta ndáa ki̱ʼva ya̱ʼayó nu̱úña.
^ párr. 1 3 Juan 3, 4: “Saáchi ni̱kusi̱íní-inii̱ tá ki̱xi na̱ hermano ta ni̱ka̱ʼa̱nna ña̱ nda̱kúní íyo iniún, ta chíka̱a̱níún ndee̱ ña̱ keʼún ña̱ nda̱kú. 4 Ña̱ sákusi̱íníka-inii̱ kúú ña̱ kúnda̱a̱-inii̱ ña̱ ndákundeé na̱ se̱ʼi̱ kéʼéna ña̱ kúni̱ Ndióxi̱”.
^ párr. 3 Koto recuadro “ ¿Nda̱chun ka̱ʼyí ta̱ Juan carta?”.
^ párr. 4 1 Juan 2:3-6: “Xa̱ʼa̱ ña̱yóʼo, náʼa̱yó ña̱ xíni̱yóra, tá ndákundeéyó kándíxayó ña̱ káʼa̱nra. 4 Na̱ káʼa̱n: ‘Xa̱a̱ xíni̱vai̱raʼ, soo va̱ása kándíxana ña̱ káʼa̱nra, na̱ vatá kúúna, ta kǒo ña̱ nda̱a̱ íyo xíʼin na̱yóʼo. 5 Soo tá iinna kándíxana ña̱ káʼa̱nra, ndixa kúʼvi̱-inina xínina Ndióxi̱. Ta xa̱ʼa̱ ña̱yóʼo xíni̱yó ña̱ kítáʼan va̱ʼayó xíʼinra. 6 Na̱ káʼa̱n ña̱ kítáʼanna xíʼinra, xíniñúʼu kundiku̱nna yichi̱ra nda̱a̱ táki̱ʼva ke̱ʼé ta̱kán”.
^ párr. 4 2 Juan 4: “Ni̱kusi̱íní-inii̱ tá na̱kunda̱a̱-inii̱ ña̱ sava na̱ se̱ʼún ndíku̱nna ña̱ nda̱a̱, táki̱ʼva káchi ley ña̱ ta̱xi ta̱ kúú yivá”.
^ párr. 4 2 Juan 6: “Ña̱ kúʼvi̱-iniyó kúni̱ kachiña: ña̱ ná ndakundeéyó kundiku̱nyó ley Ndióxi̱. Nda̱a̱ táki̱ʼva xa̱a̱ xi̱niso̱ʼondó tá ya̱chi̱, ña̱yóʼo kúú ley: ña̱ ná ndakundeéndó kuʼvi̱-inindó kunitáʼanndó”.
^ párr. 6 Na̱sama sava ki̱vi̱na.
^ párr. 10 1 Juan 1:9: “Tá ná natúʼunyó xa̱ʼa̱ ku̱a̱chiyó, xa̱ʼa̱ ña̱ nda̱kúní-inira, ixakáʼnu-inira xa̱ʼa̱ ku̱a̱chiyó ta ndakatara ndiʼi ña̱ va̱ása va̱ʼa ke̱ʼéyó”.
^ párr. 11 Koto artículo ña̱ kaʼviyó “¿Á xa̱a̱ kúnda̱a̱ va̱ʼa iniyó xa̱ʼaña?” ña̱ va̱xi nu̱ú Tutu Ña̱ Nátúʼun xíʼinyó agosto ña̱ ku̱i̱ya̱ 2018.
^ párr. 15 1 Juan 4:7, 8: “Ná ndakundeéyó kuʼvi̱-iniyó kunitáʼanyó, saáchi ña̱ kúʼvi̱-iniyó xínitáʼanyó kuenta Ndióxi̱ kúúña, ta ndiʼi na̱ kúʼvi̱-ini xínitáʼan kúúna se̱ʼe Ndióxi̱ ta xíni̱na Ndióxi̱. 8 Na̱ kǒo kúʼvi̱-ini xíni inkana ta̱ʼán xa̱a̱na kuxini̱na Ndióxi̱, chi mií Ndióxi̱ kúú ta̱ kúʼvi̱-ini xíni miíyó”.
^ párr. 65 ÑA̱ KÁʼA̱N XA̱ʼA̱ NA̱ʼNÁ: Iin ñá loʼo ñá kúú testigo, ti̱xin escuela xítoñá ku̱a̱ʼání tutu ña̱ káʼa̱n xa̱ʼa̱ ña̱ kiviva tindaʼa̱ iin ta̱a xíʼin inka ta̱a á iin ñaʼá xíʼin inka ñaʼá (sava ñuu xíniñúʼuna color ña̱ kúúmií tí arcoíris ña̱ va̱ʼa ka̱ʼa̱nna xa̱ʼa̱ ña̱yóʼo). Soo, táváñá tiempo ña̱ nandukúñá xa̱ʼa̱ ña̱yóʼo tasaá kandíxakañá ndáaña kúú ña̱ nda̱a̱. Ta ña̱yóʼo chíndeétáʼanña xíʼinñá tá xíniñúʼu ka̱ʼa̱nñá xíʼin inkana xa̱ʼa̱ ña̱ kándíxañá.
