1. Ngaashi sha popiwa muJohannes omutitatu 3, 4, oshike hashi tu nyanyudha?

DHILADHILA owala kunkene omuyapostoli Johannes a li e uvite, sho a uvu mboka a kwathele yi ilonge oshili, ya li taya tsikile okulongela Jehova nuudhiginini. Oya li ya taalele omaupyakadhi ogendji, naJohannes okwa li a longo nuudhiginini, opo a kwathele Aakriste mbaka aadhiginini ya kale ye na eitaalo lya kola nokwa li e ya tala ko ye li oyana. Sha faathana, ohatu kala twa nyanyukwa, uuna aanona yetu kutya nduno oyo mboka yetu yene nenge oyo mboka twa kwathela yi ilonge oshili, yi iyapulila Jehova nokutsikila oku mu longela. — Lesha 3 Johannes 3, 4.

2. Elalakano lyoontumwafo ndhoka dha nyolwa kuJohannes, olya li lyashike?

² Mo 98 E.N., Johannes otashi vulika a li ha zi muEfeso nenge popepi nasho. Otashi vulika a li a tembukile ko, konima sho a mangululwa mo mondholongo, mokantuntu Patmos. Lwopethimbo ndyoka, ombepo yaJehova oya li ye mu inyengitha a nyole oontumwafo ndatu. Elalakano lyoontumwafo ndhoka, olya li okwiinyengitha Aakriste aadhiginini ya kale ye na eitaalo muJesus nokutsikila okweenda moshili.

3. Omapulo geni tatu ka yamukula?

³ Maayapostoli ayehe, Johannes oye a li a hugunine ko kombanda yevi, nokwa li ti ipula nenwethemo ewinayi momagongalo, lyaalongi aaniifundja. * (1 Joh. 2:18, 19, 26) Aashunimonima mboka oya li haya ti oye shi Kalunga, ihe kaya li haya vulika komalombwelo ge. Natu ka taleni komayele ga nwethwa mo, ngoka Johannes a gandja. Sho tatu shi ningi, otatu ka yamukula omapulo ngaka gatatu: Okweenda moshili otashi ti shike? Omashongo geni hatu tsakaneke? Ongiini tatu vulu okukwathela yalwe ya kale moshili?

4. Shi ikolelela kuJohannes gwotango 2:3-6 nosho wo kuJohannes omutiyali 4, 6, okweenda moshili okwa kwatela mo shike?

⁴ Opo tu ende moshili, otwa pumbwa okutseya oshili ndjoka tayi adhika mOohapu dhaKalunga, Ombiimbeli. Shimwe ishewe, otwa pumbwa ‘okuvulika kiipango yaJehova.’ (Lesha 1 Johannes 2:3-6; 2 Johannes 4, 6.) Jesus okwe tu tulila po oshiholelwa sha dhenga mbanda, shokuvulika kuJehova. Onkee ano, omukalo gumwe gwa simana gwokuvulika kuJehova, okulandula oshiholelwa shaJesus, ngaashi tashi vulika. — Joh. 8:29; 1 Pet. 2:21.

5. Otu na okukala twa tompwa kushike?

⁵ Opo tu tsikile okweenda moshili, otu na okukala twa tompwa kutya Jehova oKalunga koshili nonokutya kehe shoka te tu lombwele mOohapu dhe, Ombiimbeli, oshili. Otu na wo okukala twa tompwa kutya Jesus oye Mesiasa omuuvanekwa. Oyendji kunena oya limbililwa kutya Jesus okwa langekwa po e li Omukwaniilwa gwUukwaniilwa waKalunga. Johannes okwa li a gandja elondodho kutya opwa li “aapukithi oyendji,” mboka ya li taya vulu okupukitha mboka kaaya li yi ilongekidha okupopila oshili kombinga yaJehova naJesus. (2 Joh. 7-11) Johannes okwa nyola a ti: “Olye ano omufundja? Oye tuu ngoka ta tindi okutya, Jesus oye Kristus.” (1 Joh. 2:22) Omukalo owala moka tatu vulu okuyanda okupukithwa, omokukonakona Oohapu dhaKalunga. Ngele otwe shi ningi, opo owala tatu ka tseya Jehova naJesus. (Joh. 17:3) Kungawo, opo owala tatu ka kala twa tompwa kutya otu na oshili.

6. Eshongo limwe lini Aakriste aagundjuka haya tsakaneke?

⁶ Aakriste ayehe, oye na okukala ya kotoka, opo kaaya pukithwe komalongo gopantu. (1 Joh. 2:26) Aakriste aagundjuka oyo unene ya pumbwa okukotokela omwigo nguka. Alexia, * omumwameme gwomimvo 25 gwokOfulaanisa, okwa ti: “Sho nda li omugundjuka, onda li nda ngwangwanekwa kelongo lyoevolusi nokomalongo galwe gopantu. Omathimbo gamwe, onda li ndi na ohokwe mugo. Ihe onda kala ndi uvite kutya itandi vulu okukala owala tandi pulakene kwaashoka nda longwa mosikola nokwiipwililikila shoka Jehova ta ti.” Alexia okwa konakona embo Life — How  Did It Get Here? By Evolution or by Creation? Meni lyiiwike iishona, ka li we e na omalimbililo. Alexia okwa ti: “Onda tompwa kutya shoka shi li mOmbiimbeli, oshili. Onda li wo nde shi mono mo kutya ngele onda kala metsokumwe nomithikampango dhOmbiimbeli, otandi ka kala nda nyanyukwa nondi na ombili.”

7. Eshongo lini tu na okukondjitha, nomolwashike?

⁷ Aakriste ayehe kutya nduno aagundjuka nenge aakuluntu, oye na okukondjitha eshongo lyokukala ye na onkalamwenyo yopaali. Johannes okwe shi popya kutya itatu vulu okweenda moshili nopethimbo opo tuu mpoka otu na onkalamwenyo inaayi yogoka. (1 Joh. 1:6) Ngele otwa hala okukala twa hokiwa kuJehova ngashingeyi nosho wo monakuyiwa, otwa pumbwa okudhimbulukwa kutya Jehova oha kala e wete ashihe shoka tatu ningi. Nonando aantu kaye wete shoka tatu ningi uuna tu li otse atuke, Jehova oha kala e wete kehe shimwe tatu ningi. — Heb. 4:13.

8. Oshike shoka tu na okuyanda?

⁸ Otu na okuyanda etaloko lyuuyuni li na ko nasha nomayono. Omuyapostoli Johannes okwa nyola a ti: “Ngele otatu ti kutya katu na oondjo, nena otatu ipukitha tse yene, noshili kayi mo mutse.” (1 Joh. 1:8) Pethimbo lyaJohannes, aashunimonima oya li taya ti kutya omuntu ota vulu okukala ta yono owina, ihe natango oku na ekwatathano naKalunga. Kunena, otu li mokati kaantu mboka ye na etaloko lya faathana. Oyendji ohaya ti kutya oyi itaala muKalunga, ihe ihaya tsu kumwe netaloko lye li na ko nasha nomayono, unene tuu kombinga yomilalo. Shoka Jehova a tala ko shi li eyono, yo oye shi tala ko kutya omuntu ota vulu oku shi ninga, ngele okwa hala.

9. Aagundjuka ohaya mono mo uuwanawa wuni, mokukakatela kwaashoka Ombiimbeli tayi longo?

⁹ Otashi vulika Aakriste aagundjuka ya kale ye uvite taya thiminikwa kaanasikola ooyakwawo nenge kaaniilonga pamwe nayo, ya tale ko omilalo ngaashi yo. Shoka osho sha ningilwa  Aleksandar. Ota ti: “Aakadhona yamwe kosikola, oya kala nokuthiminikila ndje momilalo. Oya ti kutya molwaashoka kandi na omukadhona, ondi na okukala eshenge.” Ngele owa adhika komashongo ga tya ngawo, dhimbulukwa kutya ngele owa kala wa kakatela kwaashoka Ombiimbeli tayi ti, oto ka kala wi inyanyukilwa, oto ka gamena uukolele woye, omaiyuvo goye nekwatathano lyoye naJehova. Ethimbo kehe to kondjitha omamakelo, otashi ka kala oshipu okuninga shoka shu uka. Dhimbulukwa wo kutya etaloko ewinayi li na ko nasha nomilalo, olya za kuSatana. Onkee ano, uuna to tindi etaloko lyuuyuni, kungawo oto ‘sindi Mwiinayi ngoka.’ — 1 Joh. 2:14.

10. Johannes gwotango 1:9, ote tu kwathele ngiini tu longele Jehova neiyuvo lya yela?

¹⁰ Otwa zimina kutya Jehova oye e na uuthemba wokupopya kutya oshinima shini shi li eyono. Ohatu ningi ngaashi tatu vulu, opo kaatu yone. Uuna twa yono, ohatu shi lombwele Jehova megalikano. (Lesha 1 Johannes 1:9.) Uuna twa yono eyono lya kwata miiti, ohatu kongo ekwatho kaakuluntugongalo mboka Jehova a langeka po ye tu tonatele. (Jak. 5:14-16) Nonando ongawo, katu na okukala tatu ipula nomapuko ngoka twa ninga monakuziwa. Omolwashike mbela? Omolwaashoka Tate yetu omunahole, okwe tu pa ekuliloyambo lyOmwana, opo oondjo dhetu dhi vule okudhimwa po. Sho Jehova a ti kutya ota ka dhimina po aayoni mboka yi iyela ombedhi, shoka a ti osho ha ningi. Onkene kapu na shoka tashi vulu oku tu keelela tu longele Jehova neiyuvo lya yela. — 1 Joh. 2:1, 2, 12; 3:19, 20.

11. Ongiini tatu vulu okwiigamena komalongo ngoka taga vulu okuyona po eitaalo lyetu?

¹¹ Otu na okuyanda omalongo gaashunimonima. Okuza ngaa sho egongalo lyopaKriste lya totwa po, omuhindadhi okwa kala nokulongitha aapukithi oyendji, ya kune omalimbililo maapiya yaKalunga aadhiginini. Oshizemo, otwa pumbwa okutseya okuyoolola pokati  koshili niifundja. * Aatondi yetu otashi vulika ya longithe ointaneta nenge omakwatathano gopaintaneta, opo ya kambadhale okuyona po einekelo lyetu muJehova nosho wo ohole yetu yokuhola aamwatate. Dhimbulukwa ngoka e li konima yiifundja mbyoka, e to yi yanda! — 1 Joh. 4:1, 6; Eh. 12:9.

12. Omolwashike tu na okukoleka eitaalo lyetu moshili ndjoka twi ilonga?

¹² Opo tu kondjithe omaponokelo gaSatana, otwa pumbwa okukoleka eitaalo lyetu muJesus nomonkandangala ndjoka ta dhana mokugwanitha po elalakano lyaKalunga. Otwa pumbwa wo okwiinekela mwaamboka Jehova ta longitha kunena ya kwatele komeho ehangano lye. (Mat. 24:45-47) Ohatu koleke eitaalo lyetu, mokukonakona Oohapu dhaKalunga pandjigilile. Opo nduno, eitaalo lyetu otali ka kala lya fa omuti ngoka gu na omidhi dha ya muule. Paulus okwa popi oshinima sha faathana, sho a nyolele egongalo lyaKolossa. Okwa ti: “Sho mwa taamba Jesus Kristus, a kale Omuwa gweni, kaleni ihe muukumwe naye. Dhameni muye ne mu itungile muye. Kaleni meitaalo shi vulithe shito.” (Kol. 2:6, 7) Kutya nduno oSatana nenge oomboka a nwetha mo, kapu na shoka taya vulu okuninga shi shunithe Omukriste monima, ngoka e na eitaalo lya kola. — 2 Joh. 8, 9.

13. Oshike tu na okukala twa tegelela, nomolwashike?

¹³ Otu na okukala twa tegelela okutondika kuuyuni. (1 Joh. 3:13) Johannes okwe tu dhimbulukitha kutya “uuyuni auhe ou li mepangelo lyomuhindadhi.” (1 Joh. 5:19) Sho uuyuni mbuka tawu ende wu uka pehulilo, ongeyo yaSatana oya pimbila noonkondo. (Eh. 12:12) Kakele komwigo gwonyata yiipala nogwiifundja yaashunimonima, Satana oha longitha wo omikalo dhilwe odhindji. Ota ka longitha wo omahepeko ga kwata miiti. Satana oku shi wo kutya oku na ko owala okathimbo okafupi kokukambadhala okukeelela iilonga yetu yokuuvitha nokuteya po eitaalo lyetu. Itashi tu kumitha, sho iilonga yetu ya ngambekwa nenge yi indikwa miilongo yimwe. Nonando ongawo, aamwatate naamwameme miilongo mbyoka, otayi idhidhimike. Otaya ulike kutya nando Satana ne tu ningile shike, otatu vulu okusindana.

14. Omomukalo gumwe guni tatu vulu okukwathela aamwatate naamwameme ya tsikile okukala moshili?

¹⁴ Opo tu kwathele aamwatate naamwameme ya tsikile okukala moshili, otwa pumbwa oku ya ulukila olukeno. (1 Joh. 3:10, 11, 16-18) Otwa pumbwa okukala tu holathane, uuna iinima tayi tu endele nawa nuuna itaayi tu endele nawa. Pashiholelwa, mbela owu shi gumwe ngoka a silwa omuholike gwe nokwa pumbwa okuhekelekwa nenge okukwathelwa momikalo dhontumba? Nenge owu uva ooitaali ooyakweni ya kanitha iinima yawo, omolwoshiponga shopaunshitwe, noya pumbwa ekwatho ya tungulule Iinyanga yawo yUukwaniilwa nenge omagumbo gawo? Ohatu ulike kutya otu hole notu na ko nasha naamwatate naamwameme shi thike peni mwaashoka tatu ningi, ihe hamwaashoka owala tatu popi.

15. Ngaashi sha popiwa muJohannes gwotango 4:7, 8, oshike twa pumbwa okuninga?

¹⁵ Ohatu holele Tate yetu omunahole gwomegulu, uuna tatu ulukilathana ohole. (Lesha 1 Johannes 4:7, 8.) Omukalo gwa simana moka hatu ulike ohole, ogwo okudhiminathana po. Pashiholelwa, gumwe otashi vulika e tu uvithe nayi e ta gandja ombili. Ohatu mu ulukile ohole, moku mu dhimina po nokudhimbwa shoka e tu ninga. (Kol. 3:13) Omumwatate  Aldo okwa li a adhika keshongo ndyoka. Okwa li u uvu omumwatate gumwe ngoka a li a simaneka ta popile muuwinayi omuhoko gwe, nosha li she mu uvitha nayi. Aldo ota ti: “Onda kala nokugalikana Jehova a kwathele ndje kaandi dhiladhilile omumwatate ngoka muuwinayi.” Kakele kaashono, Aldo okwa li wo a katuka onkatu yilwe. Okwa li a tokola okupula omumwatate nguka ya ka longe pamwe naye momapya. Sho taya longo pamwe, Aldo okwa lombwele omumwatate ngoka nkene a li a gumwa kwaashoka a popi. Aldo ota ti: “Sho omumwatate u uvu nkene nda li ndi uvite kombinga yaashoka a popi, okwa pe ndje ombili. Okutala komukalo moka a popi, onda mono kutya okwi iyela ombedhi shili. Okuza mpono, otwa ningi ookuume, e tatu dhimbwa oshinima shoka.”

16-17. Otu na okutokola toko okuninga shike?

¹⁶ Omuyapostoli Johannes okwa li e na ko nasha lela nonkalonawa yaamwahe, naashoka osha ulikwa sha yela momayele ngoka a gandja moontumwafo dhe ndatu dha nwethwa mo. Otashi tu tsu lela omukumo, okutseya kutya aalumentu naakiintu mboka ye mu fa, oya gwayekwa ya ka pangele pamwe naKristus. — 1 Joh. 2:27.

¹⁷ Natu taambe ko nomutima aguhe omayele ngoka twa zi nokukundathana. Natu kale twa tokola toko okweenda moshili nokuvulika kuJehova mukehe shimwe tatu ningi monkalamwenyo. Kala ho konakona Oohapu dhe nokukala we dhi inekela. Kala wu na eitaalo lya kola muJesus. Yanda omalongo gopantu nogaashunimonima. Yanda ethiminiko lyokukala nonkalamwenyo yopaali nosho wo okuyona owina. Kala metsokumwe nomithikampango dhaJehova dha dhenga mbanda, dhi na ko nasha nomikalo. Natu kwathele aamwatate ya tsikile okukala ye na eitaalo lya kola, mokudhimina po mboka ye tu uvitha nayi nokukwathela mboka ye li mompumbwe. Opo nduno, nonando otwi iyadhe momashongo ga tya ngiini, otatu ka tsikila okweenda moshili.