1. Ngera rullid el mo dmeu a rengud, el ua losaod a 3 Johanes 3, 4?

NGSEBECHEM el melebedebek er a deuil a rengul a apostol Johanes er a lerenges el kmo tirke el lullengeseu er tir el mei er a klemerang a dirk mesiou er a Jehovah loba blakerreng? Te chilebangel a betok el mondai, me a Johanes a mle blak a rengul melisiich er a klaumerang er tirka el lulemes er tir el ua lengelekel. Me ngdi osisiu, kid me ngmo dmeu a rengud sel dodengei el kmo a rengeleked er a klechad me a klereng a mla tuib a rengrir el mora Jehovah e dirk melemolem el mesiou er ngii.​—Monguiu er a 3 Johanes 3, 4.

2. Ngera mle moktek er aike el babier el lulluches a Johanes?

² Sera 98 C.E., e a Johanes a locha kiliei er a Efesus me a lechub e ngbeluu el kmeed er ngii. Nglocha millukl el mong er a uriul er a letobed er a kelebus er a iungs er a Patmos. Nglocha ngar seikid el taem, e ngmlukreng er a Jehovah el mo meluches a edei el babier. A moktek er aika el babier a mo melisiich er a reblak a rengrir el Kristiano me lemelemii a klaumerang er tir er a Jesus e lolemolem el oltirakl er a klemerang.

3. Kede mo onger a ngera el ker?

³ A Johanes a ngike el mlo ulebongel el apostol me ngkmal mle bekikl el kmo ngera te mo rullii er a ongdibel tirke el olisechakl a klsuul el osisechakl. * (1 Jn. 2:18, 19, 26) Tirka el chad a millekoi el kmo te medengelii a Jehovah engdi te dimlak lolengesenges a llechul. Ka me bo dosaod er a mlukreng el uleklatk el lulluches a Johanes. A doruul uaisei, e kede mo onger a edei el ker el kmo: Ngera belkul a doltirakl er a klemerang? Ngera el omelsemai a dechelebangel? E mekera dekaingeseu me dolemolem el ngar er a klemerang?

4. A doltirakl er a 1 Johanes 2:3-6 me a 2 Johanes 4, 6, e ngera uldimukl er a doltirakl er a klemerang?

⁴ A bo doltirakl er a klemerang e ngbelkul a kmo ngkired el mo medengelii a klemerang el ngar er a Tekingel a Dios, el Biblia. Ngdirrek el kired el “oltirakl a tekingel [a Jehovah]” el belkul a kmo, kede olengesenges a tekingel. (Monguiu er a 1 Johanes 2:3-6; 2 Johanes 4, 6.) A Jesus a kiltmeklii a cherrungel kerebai el kirel a dolengesenges er a Jehovah. Me a ta er a klou a ultutelel el rolel e kede olengesenges er a Jehovah a sel bo dekerekikl el oltirakl er a kerebil a Jesus.​—Jn. 8:29; 1 Pe. 2:21.

5. Ngkired el mo ulterekokl a rengud el kirel a ngerang?

⁵ Me a dolemolem el oltirakl er a klemerang, e ngkirel mo ulterekokl a rengud el kmo a Jehovah a Dios er a klemerang, me a rokui el tekoi el louchais er kid el ngar er a Tekingel, el Biblia a klemerang. Ngdirrek el kired el mo ulterekokl a rengud el kmo a Jesus a ngike el telbiil Mesias. A rebetok el chad er chelecha el taem a oumededenger el kmo a Jesus a mla mengilt el King er a Rengedel a Dios. A Johanes a ulemeklatk el kmo te mla er ngii a re “betok el cheblad el chad” el mle sebechir el mengeuid er tirke el dimlak el kltmokl el mo mesebechakl er a klemerang el kirel a Jehovah me a Jesus. (2 Jn. 7-11) Ngmilluches el kmo: “Me ng techa bulak? Ng ngikel chad el kmo a Jesus a diak le ngii a Mesias.” (1 Jn. 2:22) Me a di ta el rolel e ngdiak demecheblad a sel dosuub er a Tekingel a Dios. Seikid e kede mo medengelii a Jehovah me a Jesus. (Jn. 17:3) E seikid e ngmo ulterekokl a rengud el kmo kede oba klemerang.

6. Ngera ta er a omelsemai el lechelebangel er ngii a rengeasek el Kristiano?

⁶ A rokui el Kristiano a kirir el mo kerekikl me ngdiak lemecheblad er a osisecheklir a rechad. (1 Jn. 2:26) A rengeasek el Kristiano a ileakl el kirir el mo kerekikl er tiang. A Alexia * el 25 a rekil el odos el chad er a France a kmo: “Sera kkekerei e ngkora kmal di milengesang er a uldesuek aike el osisechakl er tia el beluulechad el ua osisechakl el kmo kede mlara mongkii el mei me a dirrek el osisecheklir a rechad. A lebebil e ngkora kmal mo soak aika el osisechakl. Engdi ak mlo omdasu el kmo ngdiak el kirek el di orrenges aike el lolisechakl er ngak er a skuul e ngdirrek el kirek el msa techellel a Jehovah me ngmengedecheduch er ngak.” Me a Alexia a mlo mesuub er a babier el Life​—How Did It Get Here? By Evolution or by Creation? E a  sesei el sandei er a uriul, e aika el osisechakl a mlo diak longesang er a uldesuel. Ngmelekoi el kmo: “Ngdi mle ngak el oterekeklii el kmo a Biblia a klemerang. Ak dirrek el miltebengii el kmo a bo kkiei loltirakl a llechul e ngmeskak a deurreng me a budech.”

7. Ngera kired el kerekikl me ngdiak bo doruul er ngii, e ngera uchul?

⁷ A rokui el Kristiano, el meklou me a remekekerei, a kirir el mo kerekikl me ngdiak bo el eru a blekerdelel a klengar er tir. A Johanes a milsaod el kmo ngdiak el sebeched el oltirakl er a klemerang e a osisiu el taem e kede ngar er a deleboes. (1 Jn. 1:6) Me a lsekum e ngsoad el nguu a kengei er a Dios er chelechang me a ngar medad el taem, e ngkired el kiei el ua dengar cheungel a spotlight. Tia belkul a kmo, ngdiak a berrotel el klengit e le Jehovah omes a rokui el tekoi el doruul.​—Heb. 4:13.

8. Ngera kired el otngeklii?

⁸ Ngkired el otngeklii a osengel a beluulechad el kirel a klengit. A apostol Johanes a milluches el kmo: “A lsekum kede kmo ng diak a kngtid, e ng di kid el mengeblad er kid.” (1 Jn. 1:8) Sera taem er a Johanes, e a rumtok a mera el osisechakl a millekoi el kmo a chad a sebechel durengul el meruul a klengit e dirk ngar ngii a deleuill er ngii me a Dios. Chelecha el taem, e kede kiei el iliuekl er a rechad el oba osisiu el uldasu. Te betok a melekoi el kmo te oumerang er a Dios, engdi ngdiak lekengei er a osengel el kirel a klengit, tokubets sel losaod el kirel a tekoi er a durs. Me a tekoi el lomes a Jehovah el kmo ngklengit a ledu el kmo ngkuk di omelilt er a chad.

9. Te mekera rengeasek e ngmai a klungiolir a lolemolem lurrekodel er a klaumerang er tir er a Biblia?

⁹ A rengeasek el Kristiano a ileakl el mo melechesuar a orimel el mo oltirakl a uldesuir tirke el ledak el ngar er a skuul me a lechub e ngureor el kirel a deleboes el omeruul. Tia dilubech el mora Aleksandar. Ngmelekoi el kmo: “A rebebil redil el ngalek er a skuul a millasem el orimel er ngak el mo meruul a deleboes lobengterir. Te millekoi el kmo ngak el diak a sechelik el redil, me ak locha mengolchotaor.” A lsekum e ke mo  chelebangel osisiu el omelsemai e lak mobes el kmo, a omolemolem el urrekodel er a klaumerang er kau er a Biblia e ke mukerreu e le ngmo ungil a uldesuem el kirem, e ungil a health er kau, e budech a uldesuem, e ungil a deleongel er kau el obengkel a Jehovah. Me a bek el taem el moltngakl a ongetikaik, e ngmo beot er kau el meruul a melemalt el tekoi. E lak mobes el kmo a kikiongel el osengel a beluulechad el kirel a durs a ulemuchel er a Satan. Me sel lak lemesim a uldesuem, e ke “mo mesisiich er Ngikel Mekngit.”​—1 Jn. 2:14.

10. Ngmekera 1 Johanes 1:9 e ngosukid el mesiou er a Jehovah el klikiid a ukltked?

¹⁰ Kede kongei el kmo a Jehovah a ngar ngii a llemeltel lolterekokl el kmo ngera klengit. Me kid a mora tkurrebab el sebeched el diak debo er a klengit. Engdi a lsekum e kede rullii a klengit, e kede meluluuch louchais er a Jehovah el kirel. (Monguiu er a 1 Johanes 1:9.) E a lsekum e kede ruebet er a oberaod el klengit, e kede mo osiik a ngeso er a remechuodel, el tir a mla moterekokl er a Jehovah el mo omekerreu er kid. (Jak. 5:14-16) Me nguaisei, engdi ngdiak el kired el di melatk a kngtid er a ngar er a mong. E ngera uchul? E le betik a rengul Demad a mla kutmeklii a olubet el tengetengel a Ngelekel me bo lsebechel musubes a kngtid. E a Jehovah sel ledu el kmo ngmo ousubes er tirke el mla obult er a kngterir, e ngoltaut a tekingel. Me ngdiak a ngera el sebechel torebengid me lak dosiou er a Jehovah el klikiid a ukltked.​—1 Jn. 2:1, 2, 12; 3:19, 20.

11. Ngmekera domekerreu er a uldesued er aike el osisechakl el sebechel rullid el mo oumededenger er a klaumerang er kid?

¹¹ Ngkired el otngakl a osisecheklir a rumtok a mera el osisechakl. Sera lomuchel a ongdibel er a Rekristiano el me lmuut er chelechang, e a Diabelong a mla ousbech er a rebetok el cheblad el chad el rulleterir a reblak a rengrir el mesiungel a Dios el mo oumededenger er a klemerang. Sei a uchul me ngkired el mo medengelii a klekakerous er a klemerang me a blulak. * A  recherroued a sebechir lousbech er a Internet me a lechub e ng social media el meruul er kid el mo oumededenger er a klaumerang er kid er a Jehovah me a dirrek el bltkil a rengud el mora rudam me a rudos er kid. Lak mobes el kmo ngtecha ngike el uchul aika el tekoi, me motngakl!​—1 Jn. 4:1, 6; Och. 12:9.

12. Ngera me ngkirel mo dmolech a omereng el saul er kid el kirel aike el klemerang el bla desuub?

¹² Me a bo doltngakl a odelecheklel a Satan, e ngkirel mo dmolech a klaumerang er kid er a Jesus me a deruchellel er a moktek er a Dios. Ngdirrek el kired el oumerang er ngike el lousbech er ngii a Jehovah el omekrael er a cheldebechelel er chelecha el taem. (Mt. 24:45-47) Ngmo dmolech a klaumerang er kid sel deblechoel mesuub er a Tekingel a Dios. E seikid e ngmo ua kerrekar el mesisiich a risel. A Paulus a milsaod er a osisiu el tekoi er a loluches el mora ongdibel er a Kolose. Ngdilu el kmo: “Ko mla nguu a Kristus Jesus el Rubak, mo morael el ngar ngii, e momak a risiu er ngii e meteketek er ngii e bo lulterekokl a kloumera er kemiu.” (Kol. 2:6, 7, BT) Ngdiak a ngera el sebechel a Satan me tirke el cheltikaik er ngii el rullii el mo choitechetur a Kristiano el mla smisichii a klaumerang er ngii.​—2 Jn. 8, 9.

13. Ngera el tekoi a kired el medengelii, e ngera uchul?

¹³ Ngkired el medengei el kmo kede mo muketui er a beluulechad. (1 Jn. 3:13) A Johanes a omeklatk er kid el kmo “a beluulchad el rokir a ngar eungel Ngikel Mekngit.” (1 Jn. 5:19) Me chelecha el lolekedang a ulebongel er a blekeradel er tia el beluulechad, e a Satan a mengal mla mo kesib a rengul. (Och. 12:12) Me a Satan a diak di lousbech aike el diak lebleketakl el rolel e ngmelemall a klaumerang er kid el ua deleboes me a lechub e ngblulekngir a rumtok a mera el osisechakl. Ngdirrek el ousbech a meringel lodechelakl. Ngmedengei el kmo ngkmal kedeb a temel el merrob er a urered er a berkel a klumech me a lechub e ngmelemall a klaumerang er kid. Sei a uchul me ngdiak lemechas a rengud el kmo a bebil me a lechub e ngrokui el urered a lorrob er a bebil beluu. Me nguaisei, engdi a rudam me a rudos el ngar aika el beluu a dirk outekangel. Te ochotii el kmo alta ngike el mekngit a mo meruul a kakerous el tekoi el oldechelakl er kid, engdi ngsebeched el lomelemii a blakerreng er kid!

14. Ngera ta er a rolel e ngsebeched el ngosuterir a rudam me a rudos er kid me lolemolem el ngar er a klemerang?

¹⁴ A dolengeseu er a rudam me a rudos er kid me lolemolem el ngar er a klemerang, e ngkired el olecholt a klechubechub. (1 Jn. 3:10, 11, 16-18) Ngkired el mo kaubltikerreng el diak di el sel lungil blsechel e ngdirrek sel leduubech a mondai. El ua tiang, kau ke medengelii a chad el mla mad a betik er a rengul me ngousbech a ongelaod me a lechub e ngeso? Me a lechub e ke mla remenges el kmo a rekldemem er a klaumerang a mla oriid a betok el kloklir er a mesisiich el eolt me te ousbech a ngeso lomekedechor a Blil a Ongdibel me a lechub e ngblirir? Kede olecholt a delechel a bltkil a rengud me a klechubechub er kid el kirir a rudam me a rudos el diak di lokiu a cheldechedechad, ngbai ngaruchei e ngomerelled.

15. A doltirakl er a 1 Johanes 4:7, 8, e ngera kired el meruul er ngii?

¹⁵ Kede oukerebai er a betik a rengul Demad sel dekaubltikerreng. (Monguiu er a 1 Johanes 4:7, 8.) A klou a ultutelel rolel e kede olecholt a bltikerreng a sel dekausubes er a delongeled. El ua tiang, a chad a sebechel tomellii a rengud e a uriul e ngolengit a klausubes. Me kede ochotii a bltkil a rengud sel dousubes er ngii e dobes er a tekoi el lerirellii. (Kol. 3:13) A odam el ngklel a Aldo a mlo chelebangel er tia  el omelsemai er a lerenges el kmo, a ta er a odam el lulengull er ngii a millekoi a mekngit el kirir a rechad er a belual. A Aldo a kmo: “Ak mle blechoel meluluuch el mora Jehovah me lengesukak el mo diak lemekngit a uldesuek el kirel ngika el odam.” A Aldo a dirrek el rirellii a ta er a tekoi. Ngullengit el mo oureor el obengkel ngika el odam. Me sera ledak loldingel, e nguluuchais er ngii el kmo a tekingel a kmal tilemellii a rengul. Me a Aldo a kmo, “Sera bo lodengelii a uldesuek el kirel tia el tekingel, e ngullengit a klausubes. Ngdi mle delecherul a ngerel, e ak mlo medengei el kmo ngkmal uluuchel er a rengul er a tekoi el ledilung. A uriul er tiang, e ngmlo ungil a delongelam.”

16-17. Ngkirel mo ulterekokl a rengud el mekerang?

¹⁶ A apostol Johanes a kmal mle dmolech a bltkil a rengul el kirir a rudam er ngii e mle soal a lemesisiich a klaumerang er tir, e tia desa er a uleklatk el ngar er aike el edei el mlukreng el babilengel. Ngmera el melisiich er kid sel dodengei el kmo a resechal me a redil, el uai ngii, a ngellitel e mo mengedereder el obengkel a Kristus!​—1 Jn. 2:27.

¹⁷ Me desichedekl er a rengud aika el bla desaod. E doterekeklii a rengud el mo oltirakl er a klemerang, e olengesenges er a Jehovah er a rokui el tekoi el doruul. Dosuub e bo doumerang er a Tekingel. Doleketek a mesisiich el klaumerang er kid er a Jesus. Doltngakl a osisecheklir a rechad me tirke el omtok a mera el osisechakl. Bo dekerekikl me lak bo el eru a blekerdelel a klengar er kid me a dirrek el bo dekerekikl me lak derebet er a klengit. Dekiei el oltirakl a ngarbab el llechul a Jehovah. E dengesuterir a rudam er kid me lolemolem el mesisiich sel dousubes er tirke el tomall a rengud e dolengeseu er tirke el ousbech a ngeso. E seikid e alta kede chelebangel a ringel, engdi kede mo melemolem el oltirakl er a klemerang.