LONGO DIA 30
Landula Guwenda mu Giamatshidia
‘Gusuanguluga guakoma ngudi nago gunyogu: Ame nguvue egi an’ami adi mulandula guwenda mu giamatshidia.’—3 YONE 4.
LUNGIMBO 54 “ C’est ici le chemin ”
NDAGA JIDI MU LONGO EDI *
1. Luholo 3 Yone 3, 4 yayimonesa, ndaga itshi yana gutusuanguluisa?
WAJIYA gutangiza gusuanguluga guakhalele nago mupostolo Yone tangua avuile egi athu alongesele muene giamatshidia akhalele mulandula gukombelela Yehowa nu mutshima wagasue ba? Atagenele nu milonga yavula, hene Yone gakalegele yagasue ha gukolesa gutshigina gua Aklisto awa akhalele mumona muene gifua an’enji mu nyuma. Esue nji, tuana gusuanguluga tangua an’etu tuavualele nga an’etu a mu nyuma adi gudihana gudi Yehowa nu adi mulandula gumukalegela mudimo.—Tanga 3 Yone 3, 4.
2. Mukunda natshi Yone gasonegele mikanda yenji thahtu?
2 Mu givo 98 gia T.D., idi naye gukhala egi mupostolo Yone wakhalele mujinga gu Efeso nga ndo hehi nu dimbo diene. Yajiya gukhala egi wayile guene tangua diazogele muene mu bologo gu hongo dia Patmos. Mu tangua diene, nyuma yabonga ya Yehowa yamutumine ha gufunda mikanda thathu. Wasonegele mikanda yene ha gukuatesa Aklisto ha gubamba gutshigina guawo gudi Yesu nu ha gulandula guwenda mu giamatshidia.
3. Mihu itshi tuza muzuelela?
3 Apostolo agasue akhalele afi gale, phamba Yone waselele nu monyo, hene gakhalele gudisagesa mukunda nu ndaga jiabola jiakhalele mulongesa alongeshi a mambo mu hungu. * (1 Yone 2:18, 19, 26) Ba aposta ene akhalele muzuela egi ajiya Nzambi, uvi akhalelego mutumagela mikhuala ya Yehowa. Tutadile gale longo diahanele Yone. Tangua tudi mutadila longo diene, tuza muhana gueteya gu mihu eyi thathu: Guwenda mu giamatshidia guakotelesa itshi? Malamba atshi mbatutagana nawo? Luholo lutshi tuajiya gukuatesa athu ako ha gusala mu giamatshidia?
GUWENDA MU GIAMATSHIDIA GUAKOTELESA ITSHI?
4. Ha gutadila 1 Yone 2:3-6 nu 2 Yone 4, 6, itshi tudi naye gukalagala ha guwenda mu giamatshidia?
4 Ha guwenda mu giamatshidia, tudi naye gujiya giamatshidia gidi mu Biblia. Luko, tudi naye “gubamba mikhuala ya [Yehowa],” yakotelesa egi tudi naye guyitumagela. (Tanga 1 Yone 2:3-6; 2 Yone 4, 6.) Yesu udi gifezegeselo giatagana giatadila gutumagela Yehowa. Hene, luholo luabonga tuajiya gutumagela Yehowa ludi gulandula muabonga gifezegeselo gia Yesu.—Yone 8:29; 1 Phet. 2:21.
5. Ndaga itshi tudi naye gutshigina?
5 Ha gulandula guwenda mu giamatshidia, tudi naye gutshigina egi Yehowa udi Nzambi wa giamatshidia, nu ndaga jiagasue ana gutuwambela mu Biblia jidi jia giamatshidia. Tudi naye luko gutshigina egi Yesu muene Masiya. Athu avula muanyo anago gutshigina egi Yesu watombewe ha gukhala Fumu wa Ufumu wa Nzambi. Yone wazuelele egi “awungishi avula” mbaazoga ha guwungisa athu anyi ashigo nu gutshigina guakola gudi Yehowa nu Yesu. (2 Yone 7-11) Yone wafundile egi: “Nanyi udi muenya mambo gula gashigo yago udi mutuna gamba, Yesu gashigo Klisto?” (1 Yone 2:22) Ndaga imoshi yajiya gutukuatesa hagula tuhuigiwago idi gulonguga Mbimbi ya Nzambi. Gula tuatshita ngenyi, mbatujiya Yehowa nu Yesu kiawaha. (Yone 17:3) Ngenyi, mbatukotelesa diago egi tuakhala mu giamatshidia.
MALAMBA ATSHI TUAJIYA GUTAGANA NAWO?
6. Ndaga itshi yajiya gukanga mavuala a Aklisto njila ha gulandula guwenda mu giamatshidia?
6 Aklisto agasue adi naye gutema hagula ahuigiwago gu malongo a filozofi jia athu. (1 Yone 2:26) Mavuala adi naye gutema hagula abuigo mu muheto owu. Phangi mumoshi wa mukhetu wa ivo 25 gu France mu jina dia Alexia, * udi muzuela egi: “Tangua ngakhalele mu khalasa, ngalongugile longo dia évolution nu malongo ako a athu a ha mavu awa. Ndaga jiene jiangutumine ha guhaga ba dute gu giamatshidia. Matangua ako, malongo ene akhalele gungusuanguluisa. Uvi ngatangijile gamba, yakhalelego ndaga yabonga ha gutegelela phamba malongo ngakhalele mulonguga gu khalasa, uvi gutegelela ndo Yehowa.” Alexia walongugile mukanda La vie : comment est-elle apparue ? Évolution ou création ? Gu ngima dia phoso jiazonda, ba dute enji ahuile. Alexia udi muzuela egi: “Ngakotelesele diago gamba Biblia idi nu giamatshidia. Ngakotelesele luko egi gutumagela mikhuala yene mbagungubatela gusuanguluga nu guhuima.”
7. Gu ndaga itshi tudi naye gutemena, nu mukunda natsthi?
7 Aklisto agasue, ikhale mavuala nga athu a mambuta, adi naye gutema hagula akhadigo kulu mu njila kulu mu foto. Yone wayimonesele haphelo egi tuajiyilego guwenda mu giamatshidia uvi gukhanda iko tudi mutshita ndaga jiabola mu gisuegi. (1 Yone 1:6) Gula tuatshigina gusuanguluisa mutshima wa Yehowa, tudi naye gutangiza matangua agasue gamba Yehowa wana gumona ndaga jiagasue tuana gukalagala. Ikhale athu anago gumona ndaga tuana gutshita mu gisuegi, uvi ima jiagasue idi haphelo gu phala ya Yehowa.—Heb. 4:13.
8. Ndaga itshi tudi naye gutuna?
8 Tudi naye gutuna matangi a athu a ha mavu atadila gubola. Mupostolo Yone wasonegele egi: “Gula tuazuela egi ‘tushigo nu gubola,’ tudi mudihuiga.” (1 Yone 1:8) Mu masugu a Yone, ba aposta akhalele muwambele athu egi muthu wajiya gukalagala gubola uvi galandula gukhala nu ufuta wabonga nu Nzambi. Mangino, tudi mujinga mukatshi dia athu ana khala nu matangi a luholo elu. Athu avula ana zuela egi ana gutshigina Nzambi, uvi anago gutumagela ndaga jiana zuela muene mukunda nu gubola. Anago gutshigina ndaga Yehowa ana zuelela mukunda nu uthambi. Ndaga jia musonyi jidi ndaga jiabola gu meso a Yehowa, uvi athu ana gujitshigina nu ana guzuela egi muthu wajiya gujitshita gula watshigina.
Mavuala, kambenu gujiya mukunda natshi Yehowa gana zuela egi ndaga eyi yabonga uvi eyi yabola. Ngenyi mbamumumona luholo lua gukotelesela athu gishina muana tuna gutshita gubola (Tala paragrafe 9) 9) *
9. Gubonga gutshi muvuala ana guheta gula adi mutshita ndaga Biblia yana gulongesa ?
9 Yajiya gukhala lamba gudi mavuala ha gutuna matangi abola atadila uthambi, gula mafuta awo a khalasa nga a mudimo, ashigo mutshigina ndaga Biblia yana guzuela mukunda nu uthambi. Aleksandar wataganele nu ndaga ya luholo elu. Udi muzuela egi: “Gu khalasa, mavuala a akhetu ako akhalele gu ngutuma ha gukalagala nawo uthambi. Akhalele gunguwambela egi luholo ngushigo nu gafuta ga mukhetu, idi mumonega egi ngana bungisa muila nu mala n’ako.” Gula ndaga ya luholo elu yagubuila, jiya egi, gula watumagela Biblia, mbawubamba ginemua giaye, sante yaye, matangi aye nu ufuta waye nu Yehowa. Gula watshita ndaga jiawaha, mbayikhala ndaga yaleba gudi aye ha gutshita ndaga jiawaha. Jiya egi, ndaga jiabola jiatadila uthambi jianaza gudi Satana. Hene, gula watuna matangi abola a ha amavu awa, idi mumonesa egi ‘wabinga muthu wabola.’—1 Yone 2:14.
10. Luholo lutshi 1 Yone 1:9 idi gutukuatesa ha gukombelela Yehowa nu mutshima wa phelegeta?
10 Tuana jiya egi Yehowa udi nu ufumu wa guzuela egi ndaga eyi idi yabonga nga ndo idi yabola. Tudi naye gukalagala ngolo hagula tutshitshigo gubola. Uvi gula tuakalagala gubola, tudi naye guwambela Yehowa gubola guetu mu gisambu. (Tanga 1 Yone 1:9.) Uvi gula tuakalagala gubola guakoma, tudi naye gukamba ukuateshi wa akulu, anyi Yehowa watombele ha gutubamba. (Yak. 5:14-16) Uvi tushigo naye gulandula gudisagesa mukunda nu gubola tuakalegele sendese mualeha. Mukunda natshi? Handaga Sh’etu wa guzumba watuhanele mun’enji gifua mulambu ha gututotesela gubola guetu. Tangua Yehowa wana zuela gamba mbawutotesa gubola guetu gula tuabalumuna mutshima, wana gutaganesa mbimbi jienji. Hene, gushigo nga gima gimoshi giajiya gutukanga njila ha gukombelela Yehowa nu mutshima wa phelegeta.—1 Yone 2:1, 2, 12; 3:19, 20.
11. Luholo lutshi tuajiya gudibamba gu ndaga jia mambo jiajiya gubolesa gutshigina guetu?
11 Tudi naye gutuna malongo a ba aposta. Sadige gu gisendeselo gia hungu dia Uklisto, Diabulu wana gukalagala yagasue ha gulebesa gutshigina gua Aklisto. Hene, tudi naye gukamba gujiya gudisha gudi mukatshi dia giamatshidia nu mambo. * Mbalagaji jietu jiajiya gukalegela Internet, nga maluholo ako ha gulebesa gutshigina guetu gudi Yehowa nu guzumba guetu mukunda nu aphangi etu. Utshigina ndo ndaga jiene jia mambo, jidi mukatuga gudi Satana!—1 Yone 4:1, 6; Yat. 12:9.
12. Mukunda natshi tudi naye gukolesa gutshigina guetu mu giamatshidia tualongugile?
12 Hagula Satana gabolesago gutshigina guetu, tudi naye gukolesa gutshigina guetu gudi Yesu nu mu luholo Yehowa ana gumukalegela ha gutagenesa felela dienji. Tudi naye nji guhaga mutshima gudi athu anyi Yehowa ana gukalegela mangino ha gutuameza ulondegi wenji. (Mat. 24:45-47) Ha gukolesa gutshigina guetu, tudi naye gulonguga Biblia muavula. Ngenyi, gutshigina guetu mbagukola gifua muana ngina miji ya mutshi mu mavu. Phaula wazuelele ndaga ya luholo lumoshi tangua gafundile mukanda gu hungu dia gu Kolosai. Wazuelele egi: ‘Gifua luholo muatshiginyine Yesu Klisto gifua Fumu, landulenu guwenda nenji, hagenu miji gudi muene, tungenu gudi muene, khalenu nu gutshigina guakola.’ (Kol. 2:6, 7) Gula tuatshita ngolo ha gukolesa gutshigina guetu, mbayikhala lamba gudi Satana nga gudi athu ana gumulandula ha gutukanga njila ha gulandula guwenda mu giamatshidia.—2 Yone 8, 9.
13. Ndaga itshi tudi naye gujiya, nu mukunda natshi?
13 Tudi naye gujiya egi enya a ha mavu awa adi naye gututuna. (1 Yone 3:13) Yone wazuelele egi: “Mavu agasue adi mu uhinyinyi wa muthu wabola.” (1 Yone 5:19) Gisugishilo gia mavu awa gia suena hehi, Satana udi nu khabu jiakola. (Yat. 12:12) Udi mukalegela miheto yavula ha gutuluisa, gifua gubungisa muila mu luholo luabola nga mambo a ba aposta. Wajiya nji gukalegela umbalagaji ha gutuluisa. Satana wana jiya egi wasala nu tangua diazonda ha gukanga mudimo wetu wa gulongesa nu ha gubolesa gutshigina guetu. Hene, tuajiyilego gudihula luholo mudimo wetu udi mutunyishiwa mu ifutshi yavula. Uvi aphangi etu a mala nu a akhetu a mu ifutshi yene ana gukolesela. Ana monesa diago egi, ngatshima Satana watuluisa, esue tudi naye gusala ya gujinginyina!
TUDIKUATESENU HA GUSALA MU GIAMATSHIDIA
14. Mu luholo lutshi tuajiya gukuatesa aphangi etu ha gusala mu giamatshidia?
14 Ha gukuatesa aphangi etu a mala nu a akhetu ha gusala mu giamatshidia, tudi naye guavila khenda. (1 Yone 3:10, 11, 16-18) Tushigo naye guzumba aphangi etu phamba mu tangua dia gusuanguluga, uvi tudi naye nji guazumba mu tangua dia lamba. Ha gufezegesa, udi mujiya phangi mumoshi wafuishile muthu, nu udi nu funu ya ukuateshi ba? Nga ndo wajiyi gale egi jinzo jia aphangi nga ndo Inzo yawo ya Ufumu yabolesewa gu gikudi nu idi mutoga ukuateshi ha guyilondega ba? Tushigo naye gumonesa guzumba nu khenda gudi aphangi etu phamba gu kano, uvi nu mu midimo.
15. Luholo 1 Yone 4:7, 8 yayimonesa, ndaga itshi tudi naye gukalagala?
15 Ha gulandula gifezegeselo gia Sh’etu wa mu dilu, tudi naye guzumba aphangi etu. (Tanga 1 Yone 4:7, 8.) Luholo luabonga lua gumonesa guzumba ludi gutotesela athu ako gubola. Ha gufezegesa, muthu wajiya gututshitshila gubola, gungima gatogi pardo. Ha gumonesa guzumba, tudi naye gumutotesela, gungima tujimbila mulonga wene. (Kol. 3:13) Phangi mumoshi mu jina dia Aldo watagenele nu ndaga eyi tangua gavile egi phangi mumoshi gana gunemesa muavula wazuelele ndaga yabola mukunda nu giphutha giawo. Aldo udi muzuela egi: “Ngakhalele musamba Yehowa muavula hagula angukuatese ngukatule matangi abola mukunda nu phangi muene.” Uvi Aldo wakalegele ndaga iko. Watogele phangi muene ha guya n’enji mu mudimo wa gulongesa. Hayile ene, Aldo wawambelele phangi muene luholo gakhalele gudivua mukunda nu ndaga yazuelele phangi muene. Aldo udi muzuela egi: “tangua phangi muene gajiyile luholo ngakhalele gudivua, wangutogele pardo. Guzuela guenji guamonesele diago egi wadisagesele mukunda nu ndaga jiazuelele muene. Tuamanele mulonga wene muabonga, tuasalele mafuta.”
16-17. Desizio ditshi tuazula?
16 Mupostolo Yone wakhalele muzumba aphangi Aklisto muavula, nu wakhalele mutshigina egi akhale nu gutshigina guakola. Guzumba guene guamonegele mu malongo ahanele muene mu mikanda thathu yafundile muene. Idi ndaga ya gusuanguluga ha gujiya egi mala nu akhetu anyi mbahinyina nu Yesu mu dilu, akhala nu guzumba gifua muakhalele nago Yone!—1 Yone 2:27.
17 Aphangi, tukalegelenu malongo tuazuelela mu longo edi. Tulandulenu guwenda mu giamatshidia, nu tutumagelenu Yehowa mu monyo wetu wagasue. Tulongugenu Biblia, nu tuyishilenu mutshima. Tukudisenu gutshigina gudi Yesu. Tutunenu malongo a mambo a enya filozofi nu a ba aposta. Tukhadigo mukombelela Yehowa uvi gu khanda iko nu gutshita ndaga jiabola mu gisuegi. Tukhadigo mutegelela athu adi gututuma ha gukalagala gubola. Tutumagelenu mikhuala yatagana ya Yehowa. Tukuatesenu aphangi etu ha gukhala nu gutshigina guakola, tutoteselenu athu gubola guawo nu tukuatesenu athu adi nu funu ya ukuateshi. Ngenyi, ngatshima tuatagana nu malamba, mbatulandula guwenda mu giamatshidia.
LUNGIMBO 49 Jéhovah, nous réjouirons ton cœur
^ par. 5 Tudi mujinga ha mavu adi mutuamezewa gudi Satana sh’a mambo. Hene yajiya gukhala lamba mukunda nu esue ha gulandula guwenda mu giamatshidia. Aklisto anyi ajingile gu gisugishilo gia siekle ya thomo ataganele nu lamba dia luholo elu. Yehowa wakuatesele mupostolo Yone mu njila ya nyuma yabonga ha gusonega mikanda thathu ha gukuatesa Aklisto a mu siekle ya thomo nu esue mangino. Mikanda yene mbayitukuatesa ha gujiya ingonza yajiya gutukanga njila ha guwenda mu giamatshidia nu ndaga tuajiya gutshita ha guyibinga.
^ par. 3 Tala galuanda “ Ndaga Yatumine Yone ha Gusonega Mikanda Yenji.”
^ par. 6 Mu longo edi, majina ako asombegesewe.
^ par. 11 Tala longo “As-tu vraiment tous les faits?” mu Inzo Yaleha ya Mutaledi ya Août 2018 ya Français.
^ par. 59 UKOTELESHI WA IFUANESA: phangi mumoshi wa mukhetu udi mu khalasa, mafuta enji a khalasa adi gumuwambela nu gumudijiga ndaga jiatadila gubungisa muila mala nu mala, akhetu nu akhetu. (Mu kutime jiko, ana kalegela shinga ya mikubu yavula gu mago ha gumonegesa egi ana tshigina gubungisa muila mala nu mala, akhetu nu akhetu.) Gungima udi mutshita ba recherche ha gukolesa gutshigina guenji. Gulonguga guenji guamukuatesa ha guzula desizio diabonga.
