1. Ia 3 Ioane 3, 4, eaa ta tatou ka rekareka?

E TAMANAKO ana mei teaa te rekareka ia Ioane i te akarongo anga e te tavini tiratiratu ua ra tana aronga i apii i te tuatua mou ia Iehova? Kua tupu te manamanata kia ratou, kua aruaru a Ioane i te akamaroiroi i te akarongo o teia au Kerititiano tiratiratu, tana i manako e tamariki pae vaerua nana. Ka rekareka katoa tatou i ta tatou uaorai tamariki e te aronga ta tatou i apii kia akatapu ia ratou uaorai kia Iehova e e tavini tamou iaia.—E tatau ia 3 Ioane 3, 4.

2. Eaa te akakoroanga no te au reta ta Ioane i tata?

² I te 98 T.N., te noo vaitata ra a Ioane ki Ephesia. Penei kua neke aia ki reira mei tona akataaia anga mei te enua o Patamo. I te reira taime, kua akakeu te vaerua tapu o Iehova iaia kia tata e toru reta. Te akakoroanga kia akamaroiroi i te au Kerititiano tiratiratu kia irinaki ua rai ia Iesu e kia aaere i roto i te tuatua mou.

3. Eaa te au uianga ka pau tatou?

³ Ko Ioane te apotetoro openga e ora ra, kua manata aia i te kino a te au puapii pikikaa e akatupu ra i roto i te putuputuanga. * (1 Ioa. 2:18, 19, 26) Karanga ratou e kua kite ratou i te Atua, kareka ra ta Iehova akauenga kare ratou i akono. Ka uriuri tatou i ta Ioane akoanga tei akauruia. Ia tatou e rave nei i teia, ka pau tatou e toru uianga: Eaa te aiteanga kia aaere i roto i te tuatua mou? Eaa te au arairai anga ka tupu kia tatou? Akapeea tatou me tauturu i tetai e tetai kia noo ki roto i te tuatua mou?

4. Ia 1 Ioane 2:3-6 e 2 Ioane 4, 6, eaa te ō maira i te aaere anga i roto i te tuatua mou?

⁴ Kia aaere i roto i te tuatua mou, ka anoanoia tatou kia apii i te tuatua mou Pipiria. Pera katoa kia “akono tatou i [ta Iehova] akauenga,” koia oki kia akarongo ki te reira. (E tatau ia 1 Ioane 2:3-6; 2 Ioane 4, 6.) Kua oronga mai a Iesu i te akaraanga meitaki no te akarongo kia Iehova. Ko tetai mataara meitaki i reira, i te akarongo kia Iehova koia oki na te aru vaitata anga i to Iesu takainga vaevae.—Ioa. 8:29; 1 Pete. 2:21.

5. Eaa ta tatou ka irinaki papu?

⁵ Kia aaere ua rai i roto i te tuatua mou, kia papu ia tatou e ko Iehova te Atua tuatua mou, e e mea mou tana e akakite maira kia tatou i roto i tana Tuatua te Pipiria. E kia papu tatou e ko Iesu te Mesia taputouia. E maata i teia tuatau kua ekoko e kua akatainuia a Iesu ei Ariki no te Patireia o te Atua. Akamatakite mai a Ioane e “manganui oki te pikikaa,” te ka akavare i te aronga kare i papa i te paruru i te tuatua mou no runga ia Iehova e Iesu. (2 Ioa. 7-11) Tata a Ioane e: “Koai te pikikaa mari ra ko tei karanga e kare a Iesu i te Mesia?” (1 Ioa. 2:22) Te ravenga anake kia kore tatou e akavareia, koia oki kia apii i te Tuatua a te Atua. Me rave tatou i teia ka kite meitaki tatou ia Iehova e Iesu. (Ioa. 17:3) I reira tatou e papu ei tei ia tatou te tuatua mou.

6. Eaa tetai arairai anga ka tupu ki te au mapu Kerititiano?

⁶ Kia matakite pouroa te au Kerititiano kia kore e akavareia e te apiianga a te tangata. (1 Ioa. 2:26) Ka anoanoia te au mapu Kerititiano kia matakite tikai i teia ereere. Karanga a Alexia, * e tuaine Varani e 25 ona mataiti e: “Toku mapu anga kua apii au i te apiianga a te tangata, te apiianga kua tupu ua mai te au mea. Kua reka au i teia. Inara kua manako mai au kare au e akarongo ua ki taku e apii ra i te apii, mari ra e tuku i tetai tuatau no Iehova kia apii mai iaku.” No reira kua apii a Alexia i te puka Life—How Did It Get Here?  By Evolution or by Creation? I roto i nga epetoma, kua kore tona manako ekoko. Karanga a Alexia e: “Kua akapapu rai au kiaku e te akakite ra te Pipiria i te tuatua mou. Na te rave anga i ta te reira e akakite ra kua tupu te rekareka e te ‘au kiaku.”

7. Eaa ta tatou kia matakite eiaa e rave, e no teaa ra?

⁷ Pouroa te au Kerititiano, mapu e te aronga pakari, ka kopae ratou i te oraanga taki rua. Karanga mai a Ioane kare e rauka ia tatou i te aaere i roto i te tuatua mou e te akono i te oraanga tau kore. (1 Ioa. 1:6) Kia mareka mai te Atua ia tatou i teianei e te tuatau ki mua, ka anoanoia tatou kia akamaara e te kite maira a Iehova i te au mea ravarai. Kare e mea ngaro no te mea te kite maira a Iehova i ta tatou e rave ra.—Ebe. 4:13.

8. Eaa ta tatou ka patoi?

⁸ Kia patoi tatou i to te ao manako no te ara. Tata te apotetoro ko Ioane: “Kia karanga tatou e kare a tatou ara, te pikikaa nei tatou ia tatou uaorai, e kare te tuatua-mou i roto ia tatou nei.” (1 Ioa. 1:8) I to Ioane tuatau, karanga te aronga pikikaa ka rauka i tetai tangata i te rave i te kino e ka vai rai tona pirianga ki te Atua. Teia tuatau, te noo nei rai tatou i rotopu i teia tu oraanga. E maata te karanga ra e te irinaki ra i te Atua, inara kare ratou e āriki ana i to Iehova manako no te ara, no te oraanga pirianga ainga. Ko ta Iehova i manako e au mea kino tikai, karanga ratou e na tetai rai tana ikianga, e e oraanga ke atu tona.

9. Eaa te meitaki ka tupu ki te au mapu no te akono i to ratou irinakianga Pipiria?

⁹ Penei ka māroia te au Kerititiano mapu kia āriki i te au tu anoano tau kore o te au oa apii me kore te au oa angaanga. Kua tupu teia kia Aleksandar. Karanga aia: “Kua māro mai te au tamariki  tamaine i te apii kia piri ainga au kia ratou. Karanga mai ratou no te mea kare oku oa tamariki tamaine penei e tamaine sodoma au.” Me e tupu ana teia kia koe, e akamaara me akono papu koe i toou irinakianga Pipiria, ka paruru koe ia koe uaorai, toou oraanga, toou manako ngakau, e toou pirianga kia Iehova. Me patoi ua koe i te timata anga, ka māmā ua ia koe i te rave i te tika. E akamaara e no ko mai ia Satani teia manako kino no te pirianga ainga tau kore. No reira me patoi koe i teia ereere, kua ‘vi taua vaerua kino ra ia koe.’—1 Ioa. 2:14.

10. Akapeea a 1 Ioane 1:9 me tauturu ia tatou kia tavini ia Iehova ma te akava ngakau mā?

¹⁰ Ka āriki tatou e tei ia Iehova te tikaanga kia akakite mai i te mea kino. E ka aruaru tatou kia kore e rave i te reira. Inara me rave tatou i te ara, ka aaki tatou i to tatou tarevake kia Iehova na roto i te pure. (E tatau ia 1 Ioane 1:9.) Me rave tatou i te kino pakari, ka pati tauturu tatou ki te aronga pakari ta Iehova i iki ei tiaki ia tatou. (Iako. 5:14-16) Inara auraka tatou e manako ua rai i te kino tei raveia ana i te tuatau i topa. Eaa te tumu? No te mea kua oronga mai to tatou Metua aroa i te rangi i te atinga oko o tana Tamaiti, e rauka ai ta tatou ara i te akakoreia. Me karanga a Iehova e ka akakore aia i te ara a te aronga tei tataraara, ka pera rai aia. No reira kare e mea e arai ia tatou mei te tavini anga ia Iehova ma te akava ngakau mā.—1 Ioa. 2:1, 2, 12; 3:19, 20.

11. Akapeea tatou me paruru i to tatou manako mei te au apiianga pikikaa?

¹¹ Kopae tatou i te apiianga a te aronga tei akaruke i te akarongo. Mei te taime mai i akamata ai te putuputuanga Kerititiano, kua tauta te Tiaporo i te akatupu i te au manako ekoko ki te au tavini tiratiratu o te Atua ei akavare ia ratou. No te reira, ka anoanoia tatou kia kite i te tuke  i rotopu i te mea mou e te pikikaa. * Ka taangaanga to tatou enemi i te Initaneti me kore te social media kia akaparuparu i to tatou irinaki ia Iehova e to tatou inangaro i to tatou au taeake. E akamaara e naai teia apiianga pikikaa e kia kopae i te reira!—1 Ioa. 4:1, 6; Apo. 12:9.

12. Eaa te tumu kia akaketaketa i to tatou akarongo i te tuatua mou?

¹² Kia patoi i ta Satani ravenga akavare, ka anoanoia tatou kia akamaroiroi i to tatou irinaki ia Iesu e tana tuanga no te akatupu i ta te Atua akakoroanga. Ka anoanoia tatou kia irinaki i te aronga ta Iehova e taangaanga nei i teia tuatau. (Mata. 24:45-47) Ka akaketaketa tatou i to tatou irinaki anga na te apii putuputu i te Tuatua a te Atua. Aite i reira to tatou akarongo ki tetai tumu rakau kua toro tona aka ki raro roa i te one. Taiku katoa a Paulo i teia manako i tona tataanga ki te putuputuanga i Kolosa. Karanga aia: “Kua āriki kotou i te Atu ra i te Mesia ia Iesu, kia akono kotou i tana: Kia akaia ki roto iaia, e kia patuia ki rungao iaia, e kia akatinamouia kotou i te akarongo.” (Kolo. 2:6, 7) Kare rava e rauka ia Satani e tetai ua atu i te akaparuparu i tetai Kerititiano kua akaketaketa ua rai i tona akarongo.—2 Ioa. 8, 9.

13. Eaa ta tatou ka tapapa atu, e no teaa ra?

¹³ Ka tapapa atu tatou e ka makitakitaia tatou e teianei ao. (1 Ioa. 3:13) Akamaara mai a Ioane e “te vai ua nei rai to te ao ravarai i raro ake i taua vaerua kino ra.” (1 Ioa. 5:19) I teia akatereanga e ope atura, ka kino atu to Satani riri. (Apo. 12:12) Ka taangaanga aia i te au akavare anga o te ainga tau kore e te au pikikaa a te aronga tei akaruke i te akarongo. Ka taangaanga katoa aia i te takinokino anga. Kite a Satani e manga taime poto ua tona no te arai i te angaanga tutu aere e te akakore i to tatou akarongo. Kare i te mea poitirere e kua araiia e kua tāpuia ta tatou angaanga i tetai au enua. Noatu rai, te akakoromaki ra to tatou au taeake e te au tuaine. Te akaari ra ratou noatu te takinokino anga a te Tiaporo, ka vai tiratiratu rai tatou!

14. Eaa tetai mataara ka tauturu tatou i te au taeake e te au tuaine kia noo ki roto i te tuatua mou?

¹⁴ Ei tauturu i te au taeake e te au tuaine kia noo ki roto i te tuatua mou, e akaari tatou i te tu tangi aroa. (1 Ioa. 3:10, 11, 16-18) Ka aroa tatou i tetai e tetai me tupu te au mea meitaki pera katoa me tupu te manamanata. Ei akaraanga, kua kite ainei koe i tetai taeake tei takake atura te akaperepere e ka anoanoia te akapumaana anga me kore te tauturu tau? Rongo ainei koe e kua ngere tetai au taeake i ta ratou apinga i roto i te tumatetenga natura e ka anoanoia te tauturu no te akatu akaou i te au Are Uipaanga Patireia e to ratou are? Ka akaari tatou i te tu tangi aroa no te au taeake e te au tuaine na roto i ta tatou ka tuatua e ta tatou ka rave.

15. Ia 1 Ioane 4:7, 8, eaa ta tatou ka rave?

¹⁵ Ka aru tatou i to tatou Metua i te rangi me aroa tatou i tetai e tetai. (E tatau ia 1 Ioane 4:7, 8.) Tetai mataara puapinga ka akaari tatou i te aroa na te akakore anga i te ara a tetai e tetai. Ei akaraanga, penei ka akariri tetai ia tatou inara kua tataraara mai. (Kolo. 3:13) Tupu teia timata anga ki te Taeake ko Aldo, te rongo anga aia i tetai taeake tana i akangateitei  te akakino anga i tona enua tangata. Karanga a Aldo, “Pure putuputu au kia Iehova kia tauturu mai iaku kia akakore i toku au manako tau kore no teia taeake.” E mea ke atu ta Aldo i rave. Pati atura aia i te taeake kia aere kapiti raua i te tutu aere. Ia raua e angaanga kapiti ra, akakite a Aldo e kua mamae tikai aia i tana i tuatua. “Te kite anga te taeake i toku mamae,” i na Aldo ei, “kua tataraara aia. Kite meitaki au e kua tataraara aia i tana i tuatua. I muri mai kua akaoaoa akaou maua.”

16-17. Eaa ta tatou ka aruaru?

¹⁶ Akaperepere tikai te apotetoro ko Ioane i tona au taeake i te pae vaerua, e kua kitea te reira aroa i roto i te ako tana i oronga i roto i tana reta akauruia e toru. Mei teaa atura te akamaroiroi te kite e kua akatainuia te au tane e te au vaine mei iaia rai ei tauturu tutara kia Karaiti.—1 Ioa. 2:27.

¹⁷ E akamanako meitaki tatou i te ako tei uriuriia. E aruaru tatou i te aaere i roto i te tuatua mou, te akarongo anga kia Iehova i te au mea ravarai. Apii i tana Tuatua, e e irinaki i te reira. Akamatutu i te akarongo ki roto ia Iesu. Kopae i te kite tangata e te au apiianga a te aronga tei akaruke i te akarongo. Eiaa e aru i te oraanga taki rua e eiaa e rave ua i te ara. E aru i to Iehova au turanga ngateitei. E tauturu i te au taeake kia vai matutu na te akakore anga i te ara a te aronga tei akariri mai ia tatou e e tauturu i te aronga tei anoano i te tauturu. Noatu te manamanata, ka aaere ua atu tatou i roto i te tuatua mou.