1. Premali 3. Jovanova 3, 4, so anela amendže bahtalipe?

ŠAJ li te zamisline kobor bahtalo hine o apostol Jovan ked šundža so okola kolendže pomožindža te upoznajinen o čačipe hem ponodri verno služinena e Jehovase? On doživindže but problemija hem o Jovan but trudindža pe te zorjačeri i vera kotar odola verna hrišćanija kola hine lese sar čhave. Sar ov, hem amen hijam bahtale ked amare čhave ja okola kolencar proučindžam, predajinena po dživdipe e Jehovase hem istrajno služinena lese. (Čitin 3. Jovanova 3, 4.)

2. Ko so i poruka ando e Jovanese lila valjandža te podstaknini e hrišćanen?

² Ko 98. berš, ki nevi era, o Jovan verovatno živindža ko Efes ja paše uzo leste. Ov verovatno dželo odothe palo odova so hine oslobodimo ando phanlipe ko ostrvo Patmos. Negde ko odova vreme, e Jehovaso sveti duh podstaknindža le te pisini trin lila. I poruka ando odola lila valjandža te podstaknini e verno hrišćanen, te zorjačeren pi vera ko Isus hem pana ponodri te živinen premalo čačipe.

3. Ko kola pučiba ka dobina o odgovor?

³ O Jovan hine jedino apostol kova ačhilo ki phuv. Isto adžahar, but brinindža pe odolestar sar o hovavne učiteljija utičinena upro skupštine * (1. Jov. 2:18, 19, 26). Odola otpadnikija vačerdže so pendžarena e Devle, ama on na šundže e Jehovase zapovestija. Ko akava članko ka dikha, kova savet o Jovan dindža hem ka dobina o odgovor ko trin pučiba: So značini te živina premalo čačipe? So šaj te sprečini amen te  živina premalo čačipe? Hem sar šaj te pomožina jekh jekhese te ačhova ko čačipe?

4. Premali 1. Jovanova 2:3-6 hem 2. Jovanova 4, 6, so valjani te čera te šaj te živina premalo čačipe?

⁴ Te šaj te živina premalo čačipe, amen valjani te džana o čačipe kova tano ko e Devleso Lafi, ki Biblija. Uzo odova, amen mora te ičera amen „ko [e Jehovase] zapovestija.“ (Čitin 1. Jovanova 2:3-6; 2. Jovanova 4, 6.) O Isus ačhavdža amendže savršeno primer ko odova sar te ova poslušna e Jehovase. Odolese, jekh važno način ko kova šaj te mothova so šunaja e Jehova tano adžahar so oponašinaja e Isuse so pobuter šaj (Jov. 8:29; 1. Petr. 2:21).

5. Ko so mora te ova uverime?

⁵ Te šaj hem ponodri te živina premalo čačipe, amen mora te ova uverime so o Jehova tano Devel ando čačipe hem so sa so vačeri prekalo po Lafi, i Biblija, tano čačipe. Isto adžahar, mora te ova uverime so o Isus tano obećimo Mesija. Avdije, but manuša sumnjinena so o Isus tano pomazimo sar Kralj ando e Devleso Kraljevstvo. O Jovan upozorindža so ka oven „but prevarantija“, kola ka prevarinen okolen kola na hine len zorali vera upro Jehova hem upro Isus (2. Jov. 7-11). O Jovan pisindža: „Koj tano o hovavno ako na okova so na priznajini so o Isus tano čače Hrist?“ (1. Jov. 2:22). Ako proučinaja e Devleso Lafi, amen na ka ova prevarime. Jedino adžahar ka pendžara e Jehova hem e Isuse (Jov. 17:3). Tegani ka ova uverime so arakhljam o čačipe.

6. So šaj te sprečini e ternen te živinen premalo čačipe?

⁶ Sare amen mora te ova oprezna te na bi prevarinena amen e manušenge sikljoviba (1. Jov. 2:26). Posebno o terne valjani te pazinen te na peren ki akija zamka. Amari phen, i Aleksija *, kotar i Francuska, koja isi la 25 berš, phenela: „Ked dželjum ki škola, sikljiljum kotar i evolucija hem kotar avera e manušenge sikljoviba, sebepi kola počmindžum te sumnjinav ko čačipe. Sar dželo o vreme, odola sikljoviba but privucindže man. Ama, džandžum so nane ispravno samo te šunav odova so sikavdže man ki škola, već hem so valjani te dav prilika e Jehovase te sikavi  man.“ I Aleksija proučindža i knjiga Život – kako je nastao? Evolucijom ili stvaranjem? Palo nekobor kurče, više na hine la sumnje. Oj phenela: „Kokri maje dokažindžum so o čačipe tano ki Biblija. Haljiljum so ako živinava premalo olake merilija, ka ovav bahtali hem ka ovel man unutrašnjo mir.“

7. So mora te pazina te na ova hem sose?

⁷ Sare amen, bilo te ova terne ja phure, mora te ova oprezna te na ova dujemujengo. O Jovan vačerdža so našti te živina premalo čačipe hem ko isto vreme nemoralno te živina (1. Jov. 1:6). Ako mangaja o Jehova te ovel zadovoljno amencar, na valjani te bistra so o Jehova dikhela sa so čeraja. Čak, iako o manuša na dikhena so čeraja ked hijam kokri, o Jehova sa dikhela (Jevr. 4:13).

8. So amen mora te odbacina?

⁸ Amen mora te odbacina o gledište kova akava sveto isi le ando greh. O apostol Jovan pisindža: „Ako phenaja: ’Na hijam grešna‘, amen hovavaja kokri amen“ (1. Jov. 1:8). Ko e Jovaneso vreme, o otpadnikija vačerdže so neko šaj te čerel greh hem ko isto vreme te ačhol amal e Devleja. Avdije, živinaja maškaro manuša kola razmislinena ko slično način. But olendar phenena so verujinena ko Devel, ama na prihvatinena e Jehovaso gledište ando greh, posebno oleso gledište ando seks. Odova soj tano greh ko e Jehovase jačha, olendže tano lično izbor ja averčhane način ando dživdipe.

9. Sose tano šukar ked o terne ičerena pe ko odova so sikljilje andi Biblija?

⁹ Posebno e ternendže šaj te ovel pharo sose olenge kolege ki buti ja amala ki škola na prihvatinena e biblijako gledište ando seks. Odova desindža pe e Aleksandrese kova phendža: „Ki škola, disave čhaja manglje te soven mancar. On phendže so hijum gej, sebepi so nane man kamli.“ Šaj diso slično hem tuče desindža pe. Ama, ako ičereja tut ko  odova so sikljiljan kotar i Biblija, tegani ka ovel tut samopoštovanje, ka arakhe to sastipe, na ka ovel tut razlog te žaline hem ka ačhove amal e Jehovaja. So pobuter putija ačhoveja verno, tuče ka ovel sa polokho te čere odova soj tano ispravno. Isto adžahar, ma te bistre, so akale svetoso gledište ando seks avela ando Beng. Odolese, ked deja sa tutar te na razmisline sar o manuša ko sveto, tu „pobedindžan e Lošnone“ (1. Jov. 2:14).

10. Sar o mislija andi 1. Jovanova 1:9, pomožinena amendže te ovel amen čisto savest dži služinaja e Jehovase?

¹⁰ Amen priznajinaja so jedino o Jehova isi le pravo te phenel soj tano pogrešno hem trudinaja amen te na čera disavo greh. Ama, ako pogrešinaja, odova šaj te priznajina e Jehovase ki molitva. (Čitin 1. Jovanova 1:9.) Isto adžahar, ako čerdžam dijekh ozbiljno greh, amen ka roda pomoć ando starešine, kolen o Jehova postavindža te brininen pe amendar (Jak. 5:14-16). Ama, na valjani te dozvolina o osećaj andi krivica te mučini amen sebepi o greh kova angleder čerdžam. Sose? Odolese so amaro brižno Dad dindža pekle Čhave sar otkupno žrtva te šaj amare grehija te oven oprostime. Ked o Jehova phenela so ka oprostini okolendže so kajinena pe, ov odova čače mislini. Odolese, nane ništa so šaj te sprečini amen te služina e Jehovase hem te ovel amen čisto savest (1. Jov. 2:1, 2, 12; 3:19, 20).

11. Sar šaj te zaštitina amare mislija ando ideje kola lošno šaj te utičinen ki amari vera?

¹¹ Amen mora te odbacina o ideje ando otpadnikija. Kotar samo početko andi hrišćansko skupština, o Beng koristindža but prevarantija te bi čhivel i sumnja ko mislija ando verna e Devlese sluge. Odolese, valjani te džana te razlikujina o čačipe hem o hovajbe. * Prekalo društvena mreže ja internet, amare neprijateljija mangena te ruminen amaro  poverenje upro Jehova hem amaro mangipe premalo amare phralja hem phenja. Ma te bistre, koj tano palo sa odola hovajba hem odbacin len (1. Jov. 4:1, 6; Otkr. 12:9).

12. Sose valjani te ovel amen pana pozorali vera ko čačipa kola sikljiljam?

¹² Te šaj te izdržina e Bengese napadija, valjani te ovel amen pana pozorali vera ko Isus hem te haljova savi uloga ov isi le ki e Devlesi namera. Isto adžahar, valjani te ovel amen poverenje upro okola kolen o Jehova avdije koristini (Mat. 24:45-47). Amaro poverenje ovela pana pobaro ked redovno proučinaja e Devleso Lafi. Tegani amari vera ka ovel sar o kaš kase korenija tane hor ki phuv. Ked pisindža e hrišćanendže ko Kolos, o Pavle phendža diso slično: „Odolese, sebepi so mothovdžen i vera ko Hrist Isus, amaro Gospod, hem ponodri mora te živinen sar ov so živindža. Oven ukorenime ano leste, izgradinen tumen ano leste hem utvrdinen tumen ki vera“ (Kol. 2:6, 7). Ako trudinaja amen te zorjačera amari vera, o Beng hem okola soj tane ki olesi strana na ka šaj te sprečinen amen te živina premalo čačipe (2. Jov. 8, 9).

13. So valjani te očekujina hem sose?

¹³ Amen mora te očekujina so o sveto ka mrzini amen (1. Jov. 3:13). O Jovan podsetini amen so „celo sveto tano ko e Lošnonese vasta“ (1. Jov. 5:19). Sar o krajo ando akava lošno sveto tano sa popaše, e Bengesi holi tani sa pobari hem pobari (Otkr. 12:12). Ov na samo so lukavo napadini amen adžahar so koristini o nemoral hem o hovajba ando otpadnikija, već hem direktno napadini amen adžahar so koristini o progonstvo. O Beng džanela so ačhilo lese samo pana hari vreme te zaustavini amaro propovedanje hem te peravi amari vera. Odolese, na hijam iznenadime so ko disave phuvja sa ja disave amare aktivnostija tane zabranime. Ama, amare phralja hem phenja ko odola phuvja istrajinena čak hem ko asavke okolnostija. On dokažinena so amen šaj te ačhova zorale, bizo obzir so o Beng čerela amendže.

14. Sar šaj te pomožina amare phraljendže hem e phenjendže te ačhon ko čačipe?

¹⁴ Te šaj te pomožina amare phraljendže hem e phenjendže te ačhon ko čačipe, amen mora te mothova saosećanje (1. Jov. 3:10, 11, 16-18). Amen valjani te manga jekh jekhe na samo ked tano sa šukar, nego hem ked pojavinena pe o problemija. Na primer, da li džaneja nekas kase neko mulo hem sebepi odova valjani lese uteha ja disavi praktično pomoć? Ja da li šundžan so disave phralja doživindže i prirodno katastrofa hem so sebepi odova palem valjani te čerel pe olengi dvorana ja olengo čher? Kobor tano baro amaro mangipe hem saosećanje premalo amare phralja hem phenja, ka mothovi pe na samo odoleja so phenaja, već soj tano pana považno, odoleja so čeraja.

15. Premali 1. Jovanova 4:7, 8, so valjani te čera?

¹⁵ Amen oponašinaja amare brižno nebesko Dade ked mothovaja mangipe jekh jekhese. (Čitin 1. Jovanova 4:7, 8). Jekh važno način sar mothovaja amaro mangipe tano adžahar so ka oprostina jekh jekhese. Na primer, šaj neko povredindža amen, ama palo odova izvinindža pe. Amen šaj te mothova mangipe adžahar so ka oprostina lese hem so ka bistra odova so čerdža amendže (Kol. 3:13). O phral kova vičini pe Aldo hine uznemirimo ked o phral kas poštujindža lošno vačerdža kotar o manuša andi olesi kultura. O Aldo phenela: „Stalno molindžum man e Jehovase te na ovel man negativno mišljenje kotar odova phral.“ Uzo odova, o Aldo odlučindža te pučel e phralje te džan ki služba. Dži hine ki  služba, o Aldo objasnindža odole phraljese sar osetindža pe sebepi olese lafija. O Aldo phenela: „Ked odova phral šundža sar olese lafija utičindže upro mande, ov izvinindža pe. Kotar o način sar vačerdža, šajindžum te dikhav kobor hine lese žao sebepi odova so phendža. Ko krajo andi služba, palem uljam amala hem o problemi ačhavdžam palo amende.“

16-17. So valjani te ova odlučna te čera?

¹⁶ O apostol Jovan but manglja pe phraljen hem manglja te ovel len zorali vera. Oleso mangipe hem i briga jasno dičhona ko savetija kola dindža amendže ko olese trin lila. Šukar tano te džana so o murša hem o džuvlja kola ka vladinen e Isuseja, ka postupinen amencar sar so o Jovan postupindža averencar (1. Jov. 2:27).

¹⁷ Odolese, celone vileja prihvatin o savet kova razmotrindžam ko akava članko. Ov odlučno te živine premalo čačipe adžahar so ka šune e Jehova ko sa. Proučin oleso Lafi hem verujin ano leste. Izgradin zorali vera ko Isus. Ma prihvatin akale svetose sikljoviba hem o ideje ando otpadnikija. Pazin te na ove duje mujengo hem ma čer odova soj tano neispravno. Živin premalo e Jehovase moralna merilija. Hem pomožin e phraljendže hem e phenjendže te ačhon zorale adžahar so ka oprostine okolendže kola povredinena tut hem so ka pomožine okolendže kase valjani. Tegani, bizo obzir sova borinaja amen, hem ponodri ka živina premalo čačipe.