1. Bici birhushagalula biganirirwe omu 3 Yowane 3, 4?

WANARHANYA bushagaluke bunganaci entumwa Yowane yagwerhe erhi eyumva oku abantu yarhabalaga bamanye okuli, bacigendekire bakolera Yehova? Bagendekire balwisa mazibu manji, Yowane agendekera akola bwenene ly’aseza obuyemere bw’abo Bakristu bishwekerezi, n’oko kwarhuma akababona nka bana bage. Ko n’oko, ene nalyo, nirhu rhunashagaluke bwenene erhi rhubona abana birhu (babe ba mubiri erhi ba bunyamuka) bahikira aha bacihâna emwa Yehova n’okugendekera bashimbulira okuli.​—Osome 3 Yowane 3, 4.

2. Bici byarhumaga Yowane ayandika ago maruba asharhu?

² Omu mwaka gwa 98 mwa kano kasanzi kirhu, byanahashikana Yowane abe erhi al’ilamire e Efezi erhi hofi nayo. Byanahashikana abe erhi arhenzire eyo munda enyuma z’okurhenga omu mpamikwa omu cirhwa c’e Patmosi. Enyuma za hisanzi hisungunu iroho litagatifu lya Yehova lyamulongoza oku ayandike ago maruba asharhu. Ebyarhumaga ayandika ago maruba kwali kuha Abakristu bishwekerezi omurhima oku bagendekere bazibuhya obuyemere bwabo muli Yezu banagendekere balambagira omu okuli.

3. Madoso gahi rhwaganirira mw’eci cigabi?

³ Yowane yo yali ntumwa nzinda okufâ. Abwine gurhi enyigirizo z’obunywesi zarhondera zayahukira bunyi-bunyi ecigamba c’Ecikristu. * (1 Yowane 2:18, 19, 26) Abagoma bakayalagaza oku bayemire Nnamahanga cikone barhakag’ikenga amarhegeko gage. Rhulolage amahano Yehova ahîre Yowane. Na buzinda rhwaganirira aga madoso asharhu: Okulambagira omu okuli kw’okuderha gurhi? Mazibu gahi gakarhuma rhurhalambagira omu okuli? Gurhi rhwakarhabalana lyo rhugendekera rhwalambagira omu okuli?

4. Lugenda 1 Yowane 2:3-6 na 2 Yowane 4, 6, okulambagira omu okuli kuli kujira bici na bici?

⁴ Lyo rhulambagira omu okuli kuli kwa bulagirire rhumanye rhunahugûkwe Ebibliya Kanwa ka Nnamahanga. Na ntyo rhushinganine “okushimba amarhegeko gage,” kw’okuderha oku rhukwanine rhugarhumikire. (Osome 1 Yowane 2:3-6; 2 Yowane 4, 6) Yezu ayerekine olwiganyo lwinja lw’okukenga amarhegeko ga Yehova. Co cirhumire enjira nguma rhwakayerekanamwo oku rhukenzire amarhegeko ga Yehova, rhukwanine rhushimbe enshando za Yezu.​—Yowane 8:29; 1 Pet. 2:21.

5. Bici rhwakayemera n’obwalagale?

⁵ Lyo rhulambagira omu okuli, bihunyîre rhuyemere oku Yehova ye Nnamahanga w’okuli na ngasi byoshi adesire omu Bibliya biba by’okuli. Na kandi bihunyire rhuyemere n’obwalagale oku Yezu ye Masiya walaganyizibagwa. Bantu banji banaderhe oku arhali Yezu ye Mwami w’Obwami bwa Nnamahanga. Co cirhumire Yowane ayandikâga oku omw’igulu mwayish’izûka “banywesi banji,” bakanarhebire abantu barhal’icirheganyize okuhalira okuli lugenda Yehova na Yezu. (2 Yowane 7-11) Yowane ayandika ntya: “Ndigi munywesi kuleka ohakana oku Yezu ye Kristu?” (1 Yowane 2:22) Enjira nguma yone yakarhulanga rhurharhebagwa kuli kusoma n’akuyiga Akanwa ka Nnamahanga. Okujira ntyo kone kwakarhurhabala rhumanye bwinja Yehova na Yezu. (Yowane 17:3) N’omu kujira ntyo, rhwanayemera n’obwalagale oku rhwerhugwerhe okuli.

6. Mazibu gahi mwene wirhu muguma arhimanine nago?

⁶ Abakristu boshi bihunyire babe masu lugenda efilozofi z’abantu. (1 Yowane 2:26) Ci bwenene Emisole Mikristu y’eshinganine ebe masu lugenda ogo murhego. Alexia, * mwali wirhu w’e France ogwerhe myaka 25 adesire ntya: “Amango naciri emasomo, irhwe lyanshandala lugenda entanya nyinji ziyerekire okuhinduka kw’ebintu n’efilozofi z’abantu. Mango maguma na maguma ezo nyigirizo zakag’impumako. Obwenge bwani bwasharha, ntacikag’ihikira aha nahugûkwa ebi Ebibliya eyigirizize n’ebi abalimu bali bayigiriza.” Alexia aciyigiriza ecitabu, La vie: comment est-elle Apparue ? Évolution ou Création ? Enyuma za migobe misungunu akarhinda kali kamayunjulirana omw’irhwe lyage kahwa. Alexia adesire ntya: “Nahikira aha nabona n’okuhugûkwa niene oku enyigirizo ziba omu Bibliya zoshi ziba z’okuli. Kandi nahikira aha  nahugûkwa oku amarhegeko ga Nnamahanga gali ga kumpa obushagaluke n’omurhula.”

7. Bici rhukwanine rhuhagalike, na bulya gurhi?

⁷ Rhuli Bakristu rhweshi, rhube misole erhi bashosi, rhushinganine rhuyake akalamo k’okulama obulyalya. (kulama nka Bakristu kasanzi kalebe n’akandi rhulame nka bapagani) Yowane asegize oku birhakahashikana nsa nguma rhulambagire omu okuli n’ezindi nsa rhulame akalamo kw’okujira eby’enshonyi. (1 Yowane 1:6) Erhi akaba rhulonzize rhube n’omwishingo buno n’omu mango gayisha, kuli kwa bulagirire ensiku zoshi rhukakengera oku ngasi kantu koshi rhukola mube omu mwizimya erhi omu bulangashane, Yehova anabone ebi rhuli rhwajira. Ciru akaba nta muntu yeshi-yeshi wabwine ecaha erhi ebi rhwajiraga, ensiku zoshi rhukwanine rhukakengera oku Yehova anabwine.​—Habr. 4:13.

8. Ntanya zihi rhukwanine rhuyake?

⁸ Rhuyake entanya z’igulu lugenda okulibona ecaha. Entumwa Yowane yayandika: “Erhi rhwankaderha nti ‘rhurhagwerhi caha’ erhi kucirheba rhucirhebire, n’okuli erhi kurharhulimo.” (1 Yowane 1:8) Omu mango ga Yowane, abagoma bakag’ijira n’obwalagale ebintu Nnamahanga ashomba na buzinda baderhe oku bali bîra bage. Ene nalyo, rhulamire omu bantu bagwerhe entanya mbi lugenda ecaha. Bantu banji bali bayalagaza oku bayemire Nnamahanga cikone balahire entanya zage okubiyerekire ecaha. Barhayemera entanya za Yehova okubiyerekire oku ecirumbu c’obuhya cakakolesibwa. Arhali oku Yehova abona ecaha n’olugenzi lubi kw’iguli licibona. Abantu bohe banakaderha mpu wanajira ecijiro c’obuhya nk’oku onalonzize erhi akaba oko kw’obwine kukushagalwire.

9. Gurhi musole muguma gwayungusire omu kuyemera n’okuhugûkwa oku ebi Ebibliya edesire biba by’okuli?

⁹ Kanji-kanji emisole Mikristu yo elug’irhebwa. Ebwa masomo, ababo banakabashumya oku bihunyire bahindule entanya zabo okubiyerekire ecijiro c’obuhya. Ebyo byahikiraga mwene wirhu Alexandre wa myaka 30. Adesire ntya: “Emasomo, banyere baguma na baguma bakag’ilonza mpu njire nabo eby’enshonyi. Banambwire  oku akaba ntajira mwîra wa munyere, nciseze nonze owirhu mulume rhwakarhôlana naye.” Nkaba nawe oli wagera omu marhangulo ga ntyo. Cikone ensiku zoshi okakengera oku okukenga amarhegeko ga Nnamahanga buba bulanzi kuli rhwe. Okakashologorhwa n’ebijiro by’enshonyi, waba n’entanya nyinja, amagala minja, na kandi wakacikenga, ci bwenene akantu kw’obulagirire bwenene wagendekera waba n’obwîra bwinja haguma na Yehova. Akasanzi wamahagalika amarhangulo lugenda ebijiro by’enshonyi, onahugûkwe oku omu ntyo wamahagalika entanya za Shetani. Erhi wakahiga oku orhakajira eby’enshonyi, aho erhi “wamahima omubi.”​—1 Yowane 2:14.

10. Bici rhwakajira biri biderhe omu 1 Yowane 1:9, byakarhurhabala rhube n’ezamiri zicire?

¹⁰ Rhubarhuyemire oku Yehova ye wakarhubwira ebinja n’ebibi, erhi ecaha n’ecirhali co. Ntyo rhunajire okwirhu koshi rhurhajiraga ecaha. Cikone erhi rhwakahungama ebyaha birhu byoshi, Yehova anarhubabalira. (Osome 1 Yowane 1:9) Cikone erhi rhwakajira ecaha cizibu rhwanajibona abagula Yehova ahizireho rhubahugûlire ebi rhwajijire lyo barhurhabala. (Yak. 5:14-16) Amango abagula bamayusirhurhabala, rhwanacihangana rhurhacijaga rhwacigayaguza okubiyerekire ebintu rhwajiraga. Bulya gurhi? Bulya Yehova ahanyire omwana wage abe ngombôlo lyo rhubabalirwa ebyaha birhu. Erhi Yehova akaderha oku anababalire ecaha bulya waciyunjuzize, onahugûkwe oku kobinali ananakubabalire. Omu ntyo ntaco cakarhuhanza oku rhurhakolera Yehova n’ezamiri zicire.​—1 Yowane 2:1, 2, 12; 3:19, 20.

11. Gurhi rhwakajira lyo rhuhasha rhwahagalika enyigirizo zakahira obuyemere bwirhu mw’akarhinda?

¹¹ Rhushinganine rhulahire enyigirizo z’abagoma. Kurhondêra amango ecigamba c’Ecikristu carhangizibagwa, Ibilisi anakakolesa njira nyinji lyo ahira akarhinda omu buyemere bw’abakozi ba Nnamahanga. Omu ntyo, kuli kwa bulagirire rhukaciseza rhuhugûkwe olubero egarhi kw’okuli n’obunywesi. * Abashombanyi birhu  banakakolesa e enterneti, amaradiyo lyo barhuderha kubi n’okulonza rhulahire obuyemere bwirhu, n’obuzigire bwirhu kuli Yehova na kuli bene wirhu. Ohugûkwe oku oshinganine oyake ezo nyigirizo, orhaziyemeraga bulya ziri za bunywesi zarhenga emwa Shetani!​—1 Yowane 4:1, 6; Maf. 12:9.

12. Gurhi rhwakajira lyo rhugendekera rhwazibuhya obuyemere bwirhu omu okuli rhwaciyigirizize?

¹² Lyo rhuhagalika enshumi za Shetani, kuli kwa bulagirire okuba n’obuyemere muli Yezu n’okuhugûkwa omukolo gwage omu muhigo gwa Nnamahanga. Kandi rhushinganine rhulongozibwe kugerera enjira nguma yone Yehova ali akolesa ene lyo alongoza abakozi bage. (Mat. 24:45-47) Kuli kwa bulagirire okukaciyigiriza buca buyira Akanwa ka Nnamahanga lyo rhuba n’obuyemere buzibu. Buzinda obuyemere bwirhu bwanaba nka murhi gugwerhe emizi mizibu-zibu. Paolo adesire ebintu bishushine n’ebyo erhi ayandikira Abakristu b’Ekolosi ntya: ‘Nk’oku mwayemire Yezu Kristu mpu abe Nnawinyu, mukwanine mulame omu mulungano haguma naye. Mumuserekwo buzibu muyorhe muzibuhire omu buyemere nka kula banamuyigirizagya.’ (Kol. 2:6, 7) Nta kantu koshi-koshi, erhi marhangulo goshi-goshi, Shetani akakolesa gakahirimya Omukristu ogendekire azibuhya obuyemere bwage.​—2 Yowane 8, 9.

13. Bici rhushinganine rhucirheganyekwo na bulya gurhi?

¹³ Rhukwanine rhumanye n’obwalagale oku rhuba rhushombirwe n’igulu. (1 Yowane 3:13) Entumwa Yowane yayandika ntya: “Igulu lyoshi liri omu buhashe bw’Omubi.” (1 Yowane 5:19) Okw’igulu ligendekire lyaja ebuzinda, kwo na Shetani agendekire ayushûla enshombo yage kurhuyerekera. (Maf. 12:12) Ly’arhugwarha mpirha ali akolesa obwenge-hushu omu kurhurheba kugerera enyigirizo z’abagoma n’olugenzi lubi lugenda ecijiro c’obuhya. Arhali oko kwone ali ajira, agendekire alibuza bene wirhu n’okubakweba omu mpamikwa. Shetani amanyire oku kasanzi kasungunu kone kamusigalire, co cirhumire ali ajira okwage koshi ly’ahanza omukolo gwirhu gw’amahubiri erhi kurhuvuna omurhima rhurhacibaga n’obuyemere. Ntyo rhurhali rhwasomerwa erhi rhwaciyumva mpu cihugo cilebe na cilebe bahanzizemw’omukolo gwirhu. Cikoki, ciru akaba ntyo, bene wirhu na bali birhu bagendekire balembera. Oko kuyerekine oku ciru Shetani akajira gurhi, erhi rhwakahiga okubêra bishwekerezi kuli Nnamahanga, rhwanahikira aha rhwamuhima!

14. Njira ehi nguma rhwakarhabalamwo bene wirhu na bali birhu lyo bagendekera balambagira omu okuli?

¹⁴ Lyo rhurhabala bene wirhu na bali birhu bagendekere balambagira omu okuli, kuli kwinja rhukabayumviza obonjo. (1 Yowane 3:10, 11, 16-18) Kuli kwa bulagirire rhukazigira bene wirhu na bali birhu amango bali omu mazibu n’akasanzi bali omu mwishingo. Kwa lwiganyo, ka hali mwene wirhu rhumanyire wahezize omuzigirwa wage analagirire oku burhabale n’oburhulirize? Erhi ciru nkaba hali bene wirhu erhi bali birhu rhumanyire bahirirwe erhi kushabukirwa n’Enyumpa y’entimanano erhi yabo, banalagirire oku burhabale bwirhu lyo bashub’iyiyubaka? Erhi rhwakajirhabala bene wirhu, oko kunayerekane kunganaci rhubazigire rhunabayumvirhire obonjo omu nderho n’omu bijiro.

15. Lugenda 1 Yowane 4:7, 8, bici rhushinganine rhujire?

¹⁵ Rhunakayiga olwiganyo lwa Larha wirhu w’omu mpingu erhi rhuyereka bene wirhu na bali birhu obuzigire. (Osome 1 Yowane 4:7, 8) Enjira y’obulagirire rhwakayerekanamwo oku rhuzigirine, kuli kukababalirana rhwene na nnene. Kwa lwiganyo, erhi mwene wirhu akarhugokeza, buzinda ayishe arhuhûne obonjo, ka rhunamubabalire erhi rhunaje rhwaderha-derha ebi anarhujiriraga? (Kol. 3:13) Mwene wirhu muguma ohamagalwa okw’izino lya Aldo ahikire aha aciyumva kubi erhi mwene wirhu muguma  ogwerhe omukolo gwago-gwago omu cigamba, adêrha kubi obûko bwa Aldo. Aldo adesire ntya: “Ndi nasalira Yehova bwenene antabale ntabaga n’entanya mbi kuyerekera mwene wirhu.” Mwene wirhu Aldo arhanya ebi akajira ly’aj’ibona mwene wirhu. Ahiga oku aja omu mahubiri n’oyo mwene wirhu. Buzinda erhi bayusa omukolo gw’amahubiri, ahugûlira oyo mwene wirhu oku anaciyumvirhe kubi lugenda enderho aderhaga okubiyerekire obûko bwage. Aldo ayushwire ntya: “Erhi mubwira oku anangokize, ho n’aho ampuna obonjo.” “Izu aderhâgamwo ly’anyumvisa kunganaci oyo mwene wirhu aciyunjuzize lugenda ebi anaderhâga. Ngasi muguma aja emwabo erhi rhukola bîra, na kuhika ene rhugendekire rhwaba bîra.”

16-17. Bici rhuhizire okujira?

¹⁶ Entumwa Yowane yal’izigire bene wabo na bali babo bwenene, anal’ilonzize bagendekere bazibuha omu buyemere. Alibazigire n’okubashibirira bwenene. Oko kwabonekine kugerera amahano abahâga gali omu maruba asharhu abayandikirâga. Rhuhizirwemwo omurhima okumanya oku abalume n’abakazi bayish’irhambula haguma na Yezu, bayish’igendekera barhuzigira n’okurhushibirira aka Yowane!​—1 Yowane 2:27.

¹⁷ Nka rhwakashwekerera amahano rhuganirire oku murhima n’okugakolesa, kwanarhulerhera migisho minji. Rhweshi haguma, bene wirhu na bali birhu, rhuhige okugendekera rhwalambagira omu okuli, rhukarhumikira Yehova omu ngasi kanga k’akalamo kirhu koshi. Rhugendekere rhwayiga Akanwa kage n’okulama okuli. Rhuzibuhye obuyemere bwirhu muli Yezu. Rhuhagalike efilozofi z’abantu n’enyigirizo z’abagoma. Rhuyake akalamo kw’obulyalya, kw’okuderha rhurhabaga kugulu kuguma emwa Yehova n’okundi omu byaha. Rhulame nk’oku amarhegeko ga Yehova gw’olugenzi lwinja ganarhubwizire na kandi rhurhabale bene wirhu bazibuhye obuyemere bwabo, nka rhwagosinye rhukababalirana, n’okurhabalana omu kasanzi bihunyire ntyo. Erhi rhwakajira ebyo byoshi ciru akaba rhuli omu mazibu gahi, rhwanagendekera rhwalambagira omu okuli.