1. Sayikki Yohaannisi 3, 4 kultanno garinni hagiirsiisannonkeri maati?

SOQQAMAASINCHU Yohaannisi halaale affanno gede kaaˈlinonsa manni Yihowara ammaname soqqamanni noota macciishshi woyite mageeshshi geeshsha hagiidhinoro hanni hendo! Insara lowo qarri iillinonsa; soqqamaasinchu Yohaannisi ayyaanaamittete oososi ikkitinori kuri Kiristaani ammana kaajjishate lowore assino. Ninkeno oosonkenna wolu halaale kulloommonsa manni heeshshonsa Yihowara sayisse uyite isira ammanante soqqantanni noota laˈneemmo woyite lowo geeshsha hagiidhineemmo.—3 Yohaannisi 3, 4 nabbawi.

2. Yohaannisi sasenta sokka borreessinohu mayiraati?

² Yohaannisi 98 M.D. Efesooni katamira woy hakko qooxeessira heeˈrikki digatino. Isi hakkira haˈrinohu, Fiximo yinanni giddichora usuraminowiinni tidhamihu gedensaanni ikkara dandaanno. Hatte mereero, Yihowa ayyaani sase sokka borreessanno gede kakkayisinosi. Isi tenne sokka borreessinohu, ammanamino Kiristaani Kiristoosira noonsa ammana kaajjishiˈrannonna halaalunni heeˈranno gede kaaˈlateeti.

3. Konni birxichira hiikkuri xaˈmuwa xiinxallineemmo?

³ Hakkawaro tonaalame soqqamaasine giddo lubbotenni noohu Yohaannisi callaati; iso kaphu rosiisaano songo daaffanni nooti yaachishshinosi. * (1 Yoh. 2:18, 19, 26) Kuri kaadaasine Magano anfoommo yitannoha ikkirono, hajajosi diagadhitanno. Hanni xa Yohaannisi qullaawu ayyaaninni amaalino amaale laˈno. Tenne laˈneemmo woyite sase xaˈmora dawaro afiˈneemmo:  Halaalunni heeˈrate yaa mayyaate? Halaalunni heeˈneemmokki gede guficho ikkannonkeri maati? Halaalunni heeˈneemmo gede mimmito kaaˈla dandiineemmohu hiittoonniiti?

4. Umi Yohaannisi 2:3-6nna 2 Yohaannisi 4, 6 kultanno garinni, halaalunni heeˈrate maa assa hasiissannonke?

⁴ Halaalunni heeˈrate, Maganu Qaali giddo noo halaale afa hasiissannonke. Qoleno, ‘Maganu hajajo wonsha’ yaano isira maahoyye yine gala hasiissannonke. (1 Yohaannisi 2:3-6; 2 Yohaannisi 4, 6 nabbawi.) Yesuusi Yihowara guutu garinni hajajame dancha lawishsha ikkinonke. Konnira, Yihowara hajajammeemmota leellisha dandiineemmo doogga giddo mitte, dandaaminke deerrinni Yesuusi haruma haˈrate.—Yoh. 8:29; 1 Phe. 2:21.

5. Maa buuxiˈra hasiissannonke?

⁵ Halaalunni heeˈrate, Yihowa halaalu Magano ikkinotanna isi Qaalisi widoonni kulannonkeri baalu halaale ikkinota buuxiˈra hasiissannonke. Qoleno, Yesuusi daanno yine masaalotenni kulloonni Mesihicha ikkinota ammana hasiissannonke. Yannankera batinyu manni Yesuusi Maganu Mangiste Moote ikke gashshe noota huluullamanno. Yohaannisi, Yihowanna Yesuusira gari ammana noonsakkire soˈrisiissara dandiitannori “lowo soˈrisiisanno” noota kule qorowisiisino. (2 Yoh. 7-11) Isi, “Yesuusi Buuramino Moote ikkinota ammana giwannoha agurranna, kaphaanchu wolu nooni?” yee borreessino. (1 Yoh. 2:22) Kuni manni soˈrisiisannonkekki gede gargadha dandiineemmohu Maganu Qaale seekkine xiinxallinummoro callaati. Yihowanna Yesuusa afa dandiineemmohuno hatto assinummoro callaati. (Yoh. 17:3) Qoleno, hatto assa hoongummoro cuˈmiˈnoommohu halaale ikkinota buuxiˈra didandiineemmo.

6. Wedellu Kiristaani halaalunni heedhannokki gede guficho ikkannonsari giddo mittu maati?

⁶ Baalunku Kiristaani alamete hayyo soˈrisiissannonsakki gede qoropha hasiissannonsa. (1 Yoh. 2:26) Hakko iso wedellu tini woshshaado amaddannonsakki gede qoropha hasiissannonsa. Aleksiya * yinanniti 25 diro ikkannoseti Faransayete heedhanno rodoo togo yitino:  “Rosu mine suutu soorronna wole alamete roso rosumma yannara halaale huluullama hanafoomma. Kuni rosi baxisannoe woyiti no. Ikkirono, Yihowa Qaali yaannore afummakki, rosu mine rosoommare calla ammana digaraho yee hedoomma.” Aleksiya Heeshsho Mamiinni Daggu?—Suutu Soorronninso Kalaqamunni? yaanno maxaafa nabbabbino. Shiima lamala giddo ise huluullama agurtino. Aleksiya togo yitino: “Qullaawu Maxaafi kulannori halaale ikkinota buuxiˈroomma. Qoleno Qullaawu Maxaafi biddishshi garinni gala hagiirrenna keere afiˈnanni gede assitannota huwatoomma.”

7. Maa assineemmokki gede qoropha hasiissannonke? Mayira?

⁷ Baalunku Kiristaani yaano jawuno shiimuno lamu gari heeshsho heedhannokki gede qoropha hasiissannonsa. Yohaannisi kaˈaanni halaalunni heeˈnanni kaˈaanni maaeela heeshsho heeˈra dandiinannikkita coyiˈrino. (1 Yoh. 1:6) Xaano ikko albillitte Magano hagiirsiisa dandiineemmohu, isi illera assineemmori baalu reqecci yee leellannota qaangeemmoha ikkirooti. Konnira, Yihowawiinni goˈlinori nookki daafira, iso maaxamme loosa dandiineemmo cubbi dino.—Ibi. 4:13.

8. Maa qoropha hasiissannonke?

⁸ Cubbo alame laˈanno garinni laˈneemmokki gede qoropha hasiissannonke. Soqqamaasinchu Yohaannisi, “‘Cubbu dinonke’ yinummoro umonke dongeemmo” yee borreessino. (1 Yoh. 1:8) Yohaannisi waro, kaadaasine mittu manchi afanni heeˈre cubbo loosannoha ikkirono, Maganu jaala ikke heeˈra dandaanno yitanno. Yannankerano batinyu manni hatto yee hedanno. Insa Magano ammanneemmo yitannoha ikkirono, cubbo Yihowa laˈˈanno garinni dilaˈanno; roorenkanni foorrete daafira noonsa lao Yihowara noosi lao ledo kiphi yitannote. Yihowa cubboho yiinore insa kayinni mittu manchi baxisisi geeshsha assa dandaanno yitanno.

9. Wedellu Qullaawu Maxaafi roso seekkite cuˈmiransa kaaˈlitannonsahu hiittoonniiti?

 ⁹ Roorenkanni wedella Kiristaana ledonsa loossannori woy rossannori amanyootu maaeelle daafira Qullaawu Maxaafi kulannori ledo kiphi yaannore assitanno gede xixxiibbannonsa. Aleksaanderi yinanni rodiira togoo fonqoli iillinosi. Isi togo yiino: “Rosu mine mitu seenni insa ledo fooreemmo gede xixxiiwannoe. Qoleno insa ‘Meya jaala hoogginohehu, labballu ledo fooratto daafiraati’ yaannoe.” Aterano togoo fonqoli tuncu yiinoheha ikkara dandaanno; togoo woyite Qullaawu Maxaafi kulannore harunsate sharramattoha ikkiro, ateneetira noohe ayirrinyinna fayyimmakki baˈannokki gede agadhitanni nootto; hattono tiiˈˈikki dibushiishannohe; qoleno, Yihowa ledo noohe jaaloomi kaajje heeˈranno. Mitto mittonka fonqolo qeelte saitto kiiro, gara ikkinore assa diqarrissannohe. Qoleno, alame amanyootunni maaeeltanno gede assinohu Sheexaane ikkinota deˈooti. Konnira alamete ikkito giwattoha ikkiro, ‘busha qeeltanni’ nootto.—1 Yoh. 2:14.

10. Umi Yohaannisi 1:9 Yihowara keeraanchu tiiˈˈinni soqqammeemmo gede kaaˈlitannonkehu hiittoonniiti?

¹⁰ Kuni cubboho kuni dicubboho yee kulate qoosso noosihu Yihowa ikkinota ammanneemmo. Qoleno cubbo loonseemmokki gede wolqanke assitu geeshsha sharrammeemmo. Soˈne loonsummoro kayinni, assinoommore maanxummokki huuccattotenni Yihowara kula hasiissannonke. (1 Yohaannisi 1:9 nabbawi.) Shota ikkinokki cubbo loonsummoro, Yihowa ninke towaattanno gede shoomino cimeeyyewiinni kaaˈlo xaˈmira hasiissannonke. (Yai. 5:14-16) Ikkollana alba loonsoommo cubbira gaabbinanni ninkeneeto qussa dihasiissannonke. Mayira yiniro, baxillaanchu Anninke cubbinkera maaro afiˈneemmo gede Beettosi wodote kakkalo asse uyinonke. Yihowa cubbinkera addinta maaro eˈnummoro, woˈmunni  woˈma gatona yaannonke. Konnira, mittu coyino Yihowara keeraanchu tiiˈˈinni soqqammeemmokki gede assankera didandaanno.—1 Yoh. 2:1, 2, 12; 3:19, 20.

11. Ammananke gawajjara dandaanno rosiwiinni xeertiˈra dandiineemmohu hiittoonniiti?

¹¹ Kaadaasinete roso giwa hasiissannonke. Kiristaanu songo xintantu yannanni kayise, Daawuloosi ammanantinote Maganu soqqamaasine wodanira huluullo wixate lowo soˈrisiisaano horoonsiˈranni keeshshino. Konnira, halaalenna kapho bande afa hasiissannonke. * Diinnanke, Yihowanna roduuwanke ammanneemmokki gede assate interneetenna dagoomittete webisayite horoonsidhara dandiitanno. Konne totao naqannohu Sheexaane ikkinota qaange giwa hasiissannonke!—1 Yoh. 4:1, 6; Aju. 12:9.

12. Ronsoommo halaale naada hasiissannonkehu mayiraati?

¹² Sheexaanu gawajjannonkekki gede gargadhate, Yesuusira noonke ammana kaajjishiˈranna isi Maganu hedinore wonshannohu hiittoonniitiro huwata hasiissannonke. Qoleno, Yihowa xaa yannara loososi loosate horoonsiˈranni noo dirijjite addaxxa hasiissannonke. (Mat. 24:45-47) Hatto assate Maganu Qaale ganyine xiinxalla hasiissannonke. Hatto assinummoro, ammananke giddo hige lixino rumushsho afidhino haqqicho gede ikkitanno. Phaawuloosi Qolasiyaasi songora sokka borreessi woyite togoo lawishsha horoonsiˈrino. Isi togo yiino: “Mooticha Yesuusa Kiristoosa ammaˈnitinoonni garinni isinni heedhe. Isi aana rumuxxitine uurritine, rossinoonni garinni ammanatenni kaajje.” (Qol. 2:6, 7) Sheexaanuno ikko isi wido ikkitinori ammanasi kaajjishiˈrino Kiristaancho halaalunni heeˈrannokki gede assa didandiitanno.—2 Yoh. 8, 9.

13. Kiristaana ma assinannita anfoommo? Mayira?

¹³ Alame gibbannonketa anfoommo. (1 Yoh. 3:13) Yohaannisi “Tini gobba [woy alame] gudisante bushunni amadantino” yiino. (1 Yoh. 5:19) Alamete goofimarchi gambisanno woyite, Sheexaanu hanqi roore buwanno. (Aju. 12:12) Sheexaanu amanyootu maaeellenna kaadaasine horoonsiˈre ninke goˈle gawajjatenni sainore assanno. Isi dartu iillannonke gedeno assanno. Sheexaanu gattinosi yanna shiima ikkitinota afino daafira, sabbankeemmota hoolatenna ammananke hunate haqqa reejje yaanno. Babbaxxitino gobbuwara loosonke agamboonnihu woy hoolloonnihu iseraati. Ikkollana, kuri gobbuwara heedhanno roduuwinke ammanatenni kaajjite no. Insa Sheexaanu aye geeshshi qarra abbinkerono iso qeela dandiineemmota leellishshino!

14. Roduuwinke halaalunni heedhanno gede kaaˈla dandiineemmo doogga giddo mitte hiittenneeti?

¹⁴ Roduuwinke halaalunni heedhanno gede kaaˈlate mararreemmore ikka hasiissannonke. (1 Yoh. 3:10, 11, 16-18) Roduuwinke ledo faffote yannara calla ikkikkinni qarru barrano baxama hasiissannonke. Lawishshaho, sheshifachishanna mitore assite kaaˈla dandaattohu shiiro amaddinosihu no? Woy kalaqamu danonni Gambooshshu Addaraashensa woy mininsa diigameenna qarrantino roduuwi no? Roduuwanke lubbora banxeemmotanna mararreemmonsata leellisha dandiineemmohu coyiˈneemmorinni roore assineemmorinniiti.

15. Umi Yohaannisi 4:7, 8 kultanno garinni, maa assa hasiissannonke?

¹⁵ Mimmito banxeemmoha ikkiro, baxillaanchu Anninke Yihowa faale haˈnanni heeˈnoommo. (1 Yohaannisi 4:7, 8 nabbawi.) Baxille leellisha dandiineemmo doogga giddo mitte, mimmitoho gatona yaate. Lawishshaho, mittu  manchi koffi assinonke daafira gatona yiie yaara dandaanno. Iso gatona yineemmohanna hakko coye agurreemmoha ikkiro baxille leellinshanni heeˈnoommo. (Qol. 3:13) Aldo yinanni Kiristaanchi, mittu ayirrisanno rodii isi gaˈre daafira gara ikkinokkire coyiˈranna macciishshiti baasa xissiisiˈrino. Aldo “Konne rodoo giweemmokki gede kaaˈlaera Yihowa jaate huucciˈroommo” yiino. Ikkollana isi wolereno assino. Hakkonni rodii ledo soqqamate dinye amadino. Mitteenni soqqantanni heedheenna Aldo hakku rodii coyiˈrinorinni koffi yiinota kulinosi. Aldo togo yiino: “Coyiˈrinori xissiisinoeta kulummosita, gatona yiie yiino. Isi ikke coyiˈrino gari, lowo geeshsha gaabbinota leellishanno. Kawa kaˈaa higinonkere tirre wirro jaalla ikkinoommo.”

16-17. Maa assate murciˈra hasiissannonke?

¹⁶ Soqqamaasinchu Yohaannisi ayyaanaamittete roduuwasi lowo geeshsha baxanno, hattono ammanatenni kaajjite heedhara hasiˈranno; isi sasente sokkasira amaalino amaale tenne leellishshanno. Kiristoosi ledo gashshanno gede dooraminohu isi gedee manna ikkinota afanke jawaachishshannonke!—1 Yoh. 2:27.

¹⁷ Konni birxichira noo amaale harunsate sharrammo. Heeshshonke woˈmantenni Yihowara hajajamme halaalunni heeˈrate murciˈno. Maganu Qaale xiinxallino, hattono Qullaawu Maxaafi kulannore addaxxino. Yesuusira noonke ammana kaajjishiˈno. Alamete hayyonna kaadaasinete roso effiˈne gimbo. Lamu gari heeshsho heeˈneemmokki gedenna cubbo loonseemmokki gede qorophino. Yihowaha amanyootu seera harunsino. Koffi assitinonkere gatona yine hattono qarrantinore kaaˈline roduuwinke halaalunni heedhanno gede irkinso. Hatto assinummoro aye geeshshi qarri iillinkerono, halaalunni heeˈra dandiineemmo.