1. Ino ty raha mahafalifaly antsika laha hentea ty 3 Jaona 3, 4?

MBA ERITSERETO moa ty hafaleani-Jaona lafa naharè hoe mbo manohy manompo ani-Jehovah olo nampeany hianatsy fahamarina rey! Niatriky raha sarotsy maro rozy, ka niezaky marè Jaona mba hanatanjaky ty finoan-drozy. Sahala amy anakiny ara-panahy ty fahitany ani-Kristiana tsy nivaliky reo. Manahaky ani-zay koa fa falifaly biby tsika lafa manokam-bata ho ani-Jehovah noho manohy manompo azy avao ty anakintsika, na ty olo nampeantsika hahay ty fahamarina.—Vakio 3 Jaona 3, 4.

2. Ino ty raha kendreni-taratasy nisoratini-Jaona rey?

² Nipetraky ta Efesosy na tsy lavitsy teo vasa Jaona tamy tao 98. Mety ho nifindra tao ie lafa baka nabototsy baka amy sesitany tamy nosy Patmo any. Tokony ho tamy fotoa zay, le natosikini-fanahy masini-Jehovah ie ka nanoratsy taratasy telo. Ty raha kendreni-taratasy reo, le mba handrisiky ty Kristiana tsy mivaliky mba hivahatsy amy ty finoany ani-Jesosy noho handeha amy fahamarina avao.

3. Ino iaby ty fanontanea hovaleantsika?

³ Jaona ro velo farany tamy apostoly reo, ka niasa loha ie amy ty ho voka-dratini-fisiani-mpampianatsy sandoky tamy fiangona eo. * (1 Jaona 2:18, 19, 26) Nivola ho mahay a Ndranahary mpivadi-pinoa reo, kanefa tsy nanoriky ty didini-Jehovah. Handiniky ty torohevitsy nameani-Jaona tsika amy lahatsoratsy toy ato, sady hamaly ani-fanontanea telo retoa: Ino ty  dikani-hoe mandeha amy fahamarina? Ino iaby ty raha mety hanaka antsika? Le akory ty hanampeantsika ty hafa hijano amy fahamarina ao avao?

4. Laha hentea ty 1 Jaona 2:3-6 noho 2 Jaona 4, 6, ino ty tafilitsy amy hoe mandeha amy fahamarina?

⁴ Mba handehana amy fahamarina, le mila mahay ty marina amy Safà-Ndranahary ao tsika. Ankoatsini-zay, le tsy maintsy ‘mitandrina ty didini-Jehovah’ tsika, zany hoe manoriky ani-raha rey. (Vakio 1 Jaona 2:3-6; 2 Jaona 4, 6.) Nanome modely tena soa Jesosy amy fanoriha ty safàni-Jehovah. Dikani-zay, manoriky ty safàni-Jehovah tsika laha manao ze azontsika atao mba hanoriha marìny ty liani-Jesosy.—Jaona 8:29; 1 Pet. 2:21.

5. Tokony ho resy lahatsy amin’ino tsika?

⁵ Mba handehana amy fahamarina ao avao, le tokony ho resy lahatsy tsika hoe Jehovah ro Ndranaharini-fahamarina, ka marina iaby ze raha volaniny amintsika amy Baiboly ao. Tokony ho resy lahatsy koa tsika fa Jesosy ro Mesia nampitamany. Maro henanizao ty olo misalasala hoe nivoatendry ho Mpanjakani-Fanjakà-Ndranahary Jesosy. Nampitandrina Jaona fa hisy “mpamitaky” maro, hamitaky ani-ze mbo tsy parè hiaro ty marina mikasiky ani-Jehovah noho Jesosy. (2 Jaona 7-11) Ho zao ty nisoratini-Jaona: “Ia moa ty mpavandy fa tsy ze mandà ani-Jesosy tsy ho Kristy?” (1 Jaona 2:22) Ty fianara ty Safà-Ndranahary avao ro fomba soa hanampy antsika tsy ho voafitaky. Laha manao ani-zay tsika, le hahay ani-Jehovah noho Jesosy. (Jaona 17:3) Ho resy lahatsy tsika amy zay hoe nahita ty marina.

6. Ino ty raha sarotsy mety hatrehini-tanora kristiana?

⁶ Mila miamby soa ty Kristiana iaby mba tsy ho voafitakini-filozofìn’olombelo. (1 Jaona 2:26) Ty tanora ro tena mila miamby soa mba tsy ho tratsini-fandriky io. Hoy Alexia * anabavy 25 tao, baka a Fransy any: “Taloha, tamy zahay mbo tan-dakilasy tany, le nianatsy mikasiky évolution noho filozofỳ. Tsy nety nazava amiko mihintsy raha rey, fe ho raha nahakinto ahy kindraiky. Fe nitsapako koa fa tsy mety laha mijanjy ani-ze raha ampianary ahy an-dakilasy any avao aho, fa tsy mijanjy ty hevitsini-Jehovah.” Nianarani-Alexia ty boky hoe Nanao Akory ty Nampisy ty Fiaina? Niavy ho azy sa Nisy Namoro? * Vola vitsivitsy tafarani-zay, le  tsy nisalasala sasy ie. Hoy ty asany: “Niresy lahatsy aho hoe marina ty raha volanini-Baiboly. Le nihitako koa fa ho sambatsy noho falifaly aho laha miay mifanaraky amy ty fitsipiky anatiny ao.”

7. Mila miamby soa amin’ino tsika, le ino ty antony?

⁷ Ndre tanora tsika ndre antitsy, le mila miamby soa mba tsy hanao raha raty ambaliky any fe mbo manao kisary manompo ani-Jehovah. Nanazava Jaona fa tsy afaky mandeha amy fahamarina tsika no sady raty fandaisam-bata. (1 Jaona 1:6) Laha ta hahazo hatò amy Ndranahary tsika henanizao noho amy hoavy, le tokony hitovy amy fandaisam-batantsika lafa hitan’olo maro rey avao ty fihetsikintsika. Sady tsy misy mivony zao ty fahotàntsika, satria Jehovah mahita ty raha iaby ataontsika.—Heb. 4:13.

8. Ino ty raha tokony hohalavirintsika?

⁸ Tokony hohalavirintsika ty hevitsini-tontolo toy mikasiky ty fahotà. Nanoratsy apostoly Jaona hoe: “Laha mivola tsika hoe: ‘Tsy mana ota tsika’, le mamita-bata tsika.” (1 Jaona 1:8) Nivola ty mpivadi-pinoa tamy androni-Jaona hoe sady afaky manota ty olo raiky no afaky mifandramby amy Ndranahary. Mbo mitovy hevitsy amy zay avao koa ty olo manodidy antsika henanizao. Maro ty olo mivola hoe mino a Ndranahary, fe tsy maneky ty hevitsini-Jehovah mikasiky ty fahotà, sirtò amy resaky firaisa. Ndre fa ambarani-Jehovah hoe raty ty fandaisam-bata sisany, le mbo mivola rozy hoe mianky amy kiraidraiky raha zay laha zay ty teany.

9. Manino ro mahasoa ani-tanora reo ty manaraky ty raha inoan-drozy miory amy Baiboly?

⁹ Tena sarotsy ty mandà ty hevitsini-mpiaraky mianatsy na mpiaraky miasa mikasiky ty fandaisam-bata maloto, sirtò ho ahi-ty tanora kristiana. Ho zay ty nahazo ani-Aleksandar. Hoy ty asany: “Nisy ajà ampela vitsivitsy tan-dakilasy ao niforosè ahy hanao firaisa amin-drozy.  Nivola rozy hoe lahilahy tea lahilahy aho satria tsy misy ampela miaraky amiko.” Mety ho tratsini-raha manahaky ani-zay iha. Fe tiarovo fa lafa iha mivahatsy amy ty raha inoanao amy Baiboly ao, le miaro ty vatanao, ty fahasalamanao, ty fihetseham-ponao noho ty fifandrambesanao amy Jehovah. Saky manohitsy fakam-panahy amy zay iha, le hihamora aminao ty manao raha soa. Tiarovo koa fa baka amy Satana ty hevitsy raty ananani-tontolo toy mikasiky firaisa. Ka lafa tsy maneky hitovy hevitsy amin-drozy iha, le ‘mandresy ani-azy raty iny.’—1 Jaona 2:14.

10. Manino ty 1 Jaona 1:9 ro manampy antsika hanompo ani-Jehovah amy feoni-fieritsereta malio?

¹⁰ Ekentsika hoe Jehovah ro mana zo hamaritsy ty atao hoe fahotà, ka manao ze azontsika atao tsika mba tsy hanota. Fe laha nanota tsika, le tokony hivavaky amy Jehovah sady hieky ty raha tsy nety nataontsika. (Vakio 1 Jaona 1:9.) Laha nanao fahotà bevata tsika, le mila ty fanampeani-anti-panahy satria rozy ro nitendreni-Jehovah hikarakara antsika. (Jak. 5:14-16) Fe tsy tokony hiasa loha marè amy ty hadisoa nataontsika taloha tsika. Ino ty antony? Satria fa nameani-Babantsika be fitiava iny ho sorom-panavota ty Anakilahiny, amy zay ho afaky hahazo fanengà hadisoa tsika. Lafa mivola Jehovah hoe hanenga ty hadisoani-mpanota nibebaky ie, le hanao ani-zay vatany ie. Ka tsy misy raha tokony hanaka antsika tsy hanompo ani-Jehovah amy feoni-fieritsereta malio.—1 Jaona 2:1, 2, 12; 3:19, 20.

11. Akory ty hiarovantsika ty saintsika amy ze fampianara mety hanimba ty finoantsika?

¹¹ Tsy tokony hanaraky ty fampianarani-mpivadi-pinoa tsika. Liani-nanombohani-fiangona kristiana, le nampiasa mpamitaky maro ty Devoly mba hahavy ty mpanompo-Ndranahary tsy mivaliky hisalasala. Tsy maintsy miezaky amy zay tsika mba hahay hanavaky ty marina  noho ty vandy. * Mampiasa Internet noho tranonkala fifandrambesa ty fahavalontsika mba hampihena ty fatokisantsika ani-Jehovah noho ty fitiavantsika ani-rahalahy noho anabavintsika reo. Tohero raha rey, le tiarovo hoe ia ty ambalikiny ao!—1 Jaona 4:1, 6; Apok. 12:9.

12. Manino tsika ro tokony hiezaky hampitombo ty fankasitrahantsika ani-fahamarina nianarantsika rey?

¹² Mba hahafahantsika manohitsy ty fanafihani-Satana, le mila mampitombo ty finoantsika ani-Jesosy noho ty anjara asany amy fikasà-Ndranahary tsika. Mila matoky ani-mpanompo ampiasani-Jehovah mba hitariky ty fandaminany henanizao iny koa tsika. (Mat. 24:45-47) Hitombo ty fatokisantsika lafa mianatsy tsy tampaky ty Safà-Ndranahary tsika. Hanahaky hazo mandatsaky vahatsy ambany tany any io ty finoantsika amy zay. Niresaky raha mitovy amin’io Paoly lafa nanoratsy ho ani-fiangonani-Kolosia. Hoy ty asany: “Fa naneky ani-Kristy Jesosy ho Tompo nareo, le mba miharoa lia aminy koa, ka mba hamahatsy soa noho hiory avao aminy eo sady tsy ho voahozonkozo amy finoa.” (Kol. 2:6, 7) Laha miezaky manatanjaky ty finoantsika tsika, le tsy ho vitani-Satana noho azy manoha azy reo ty hampihozonkozo antsika.—2 Jaona 8, 9.

13. Ino ty tokony hampoizintsika, le ino ty antony?

¹³ Fa ampoizintsika hoe ho halani-tontolo toy tsika. (1 Jaona 3:13) Nampitiaro antsika Jaona hoe “zao tontolo zao iaby, le ambany fahefàni-azy raty iny eo.” (1 Jaona 5:19) Fa mihamarìny ty farani-tontolo toy ka vomaiky miharomotsy Satana. (Apok. 12:12) Mampiasa ty fandaisam-bata maloto noho ty vandy ataoni-mpivadi-pinoa ie mba hamandriha antsika. Fe tsy zay avao, fa manafiky antsika mivanta koa ie. Haini-Satana fa kelikely sisa ty fotoa ananany, ka ataony ze azony atao mba hampijanona ty asa fitoria ataontsika na hanimbà ty finoantsika. Ka tsy mahatseriky laha voasakasaka na voarara ty asantsika amy tany sisany. Fe miaritsy avao rahalahy noho anabavintsika amy tany reo any ndre eo raha zay. Atoron-drozy fa azontsika atao ty mandresy, ndre ino ndre ino ataoni-azy raty iny amintsika!

14. Ino ty fomba raiky anampeantsika ty rahalahy noho anabavintsika hijano amy fahamarina ao avao?

¹⁴ Mba hanampea ty rahalahy noho anabavintsika hijano amy fahamarina ao avao, le mila mahay miferinay tsika. (1 Jaona 3:10, 11, 16-18) Mila mifankatea tsika ndre milamindamy ty fiainantsika, ndre misy raha sarotsy. Renao va, ohatsy, hoe nisy olo nimaty longo ka mila amea fampahereza na fanampea? Sa misy mpiara-manompo hainao hoe sahira satria niravàni-siklony ty hananany, na misy mila fanampea mba hamboatsy trano na Efitrano Fanjakà? Ho hita amy ty raha volanintsika, sirtò amy ty raha ataontsika, hoe tena teantsika noho ferinesantsika vatany rahalahy noho anabavintsika reo.

15. Mila manao ino tsika laha hentea ty 1 Jaona 4:7, 8?

¹⁵ Manahaky ani-Babantsika be fitiava an-danitsy any iny tsika lafa mifankatea. (Vakio 1 Jaona 4:7, 8.) Fomba raiky bevata ampisehoantsika fitiava ty fanengà hadisoa. Mety nanao raha nampalahelo antsika, ohatsy, ty olo raiky fe bakeo niala tsiny. Mampiseho fitiava tsika amy zay laha manenga ty hadisoany, ka tsy mieritseritsy an’iny sasy. (Kol. 3:13) Zay ty raha nahazo ani-rahalahy Aldo. Nivola raha raty mikasiky ty olo karaza raiky aminy rahalahy raiky tena nihajàny iny. Hoy ty asani-Aldo: “Nangataky fanampea tamy Jehovah  avao aho mba tsy ho raty ty fahitako ani-rahalahy iny.” Fe nanao raha hafa koa Aldo. Nitaominy hiaraky manompo aminy rahalahy iny. Lafa niaraky amy zay rozy, le niresahini-Aldo tamy rahalahy iny hoe nampalahelo azy ty raha nivolaniny. “Lafa nirèni-rahalahy iny raha zay”, hoasani-Aldo, “le tena niala tsiny ie. Tsapako tamy ty feony hoe tena nanenenany raha nivolaniny iny. Nanjary mpinama ndraiky zahay tafarani-zay, fa tsy nieritseritsy ani-raha iny sasy.”

16-17. Tokony ho tapa-kevitsy hanao ino tsika?

¹⁶ Tena teani-apostoly Jaona vatany rahalahiny reo, ka nanoratsy ani-taratasy telo rey ie mba hanomeza torohevitsy hanampy an-drozy hana finoa matanjaky. Tena mampahery ty mahay hoe lahilahy noho ampela manahaky azy ro voahosotsy hiaraky manjaka amy Kristy!—1 Jaona 2:27.

¹⁷ Loniky lahy tsika mba handramby am-po ty torohevitsy nidinihintsika tato, ka ho tapa-kevitsy handeha amy fahamarina avao noho hanoriky ty safàni-Jehovah amy fiainantsika iaby iaby. Ianaro ty Safàny, le matokisa azy. Hatanjaho ty finoanao ani-Jesosy. Halaviro ty filozofìn’olombelo noho ty fampianarani-mpivadi-pinoa. Ka maneky ho voatao hanota na hanao kisary manompo ani-Jehovah. Ampifanaraho amy fitsipikini-Jehovah ty fiainanao. Ndao tsika hanampy ty rahalahy noho anabavintsika hatanjaky avao, ka hanenga ty hadisoani-ze nanao raha nampalahelo antsika noho hanampy ani-ze mila fanampea. Handeha amy fahamarina avao tsika amy zay, ndre ino ndre ino raha sarotsy atrehintsika.