1. Ngo ngete 3 Djɔanɛ 3, 4 otepelande, kɛkɔnge kɛtɔpɛyɛ osasa?

WƐ NKOKA ntɔnɔla osasa woyalisa la ɔpɔstɔlɔ Djɔanɛ wina wɔ ndoke ambɔ anto windakotshɛ djɛ ndjewa akambo wa nsɔsɔlɔ wakindjɛki ngo nkambela Yehova la n’kɔmano? Iwɔ wapomanaki la ekakasano efula, edjinge Djɔanɛ ananghaka la wolo djɛ nkembɛ djawo djɛ Akristo wasɔ windɔsaka ngete wana wande walonyuma. Edjinge iso, tongoyalake l’osasa wina wɔ wɔnaso ɔmɔtshi wela ndemba kana wela lonyuma oyapɛyɛnde te Yehova edjinge okindjɛnde ndokambela la n’kɔmano.​—Wala 3 Djɔanɛ 3, 4.

2. Okoma wɔkɔnge wofunamisa enkanda wɛ Djɔanɛ?

² Lá 98 Ɛ.K. (l’ɛtɛndɔ kɛso), nkoka Djɔanɛ intatshɛki lá Ɛfɛsɛ. Nkoka ndjala nde atshɔka takɔ lɔkɔngɔ wɔ nde mposa má lokando lá ntshanga djɛ Patɛmɔsɛ. L’ɛtɛndɔ kɛso, nyuma k’ekina kɛ Yehova kotshindaka djɛnde nfuna enkanda esato. Okoma wɔ enkanda wɛnde nde djɛ nkotshɛ Akristo wa n’kɔmano djɛ nkidjɛ ndjala la djawo te Yeso edjinge nkidjɛ nkɛnda l’akambo wa nsɔsɔlɔ.

3. Weepo wɛkɔnge wohonaso nkadjimola?

³ Djɔanɛ ayalaka ɔpɔtɔlɔ w’ekomo woyalisa la lowiko, edjinge nde okaka paa efula la elakanyelo wɛ wetsha w’engolo welá otshumano. * (1 Dj. 2:18, 19, 26) Apɔstɔlɔ wasɔ watepelaki djɛ wewaki Ndjambe, kaanga oyɛwɔ nghɔsɔ iwɔ lako ndjala la ntshunamo ta tɔkfɔ tɔ Yehova. Nyontshɔ toko shishima dako djɛ Djɔanɛ ndafune má wolo wɔ nyuma. Laasotashishima, towa ekadjimwelo lá weepó esato wɛnɛ: Nkɛnda l’akambo wa nsɔsɔlɔ  osakisolande nge? Wayi wakɔnge wakoka ntilela onkeka djɛ nkɛnda l’akambo wa nsɔsɔlɔ? Edjinge Wopo wɔkɔnge oyɛso ladjɛ nangha djɛ nkotshɛ winaso djɛ ntshikala l’akambo wa nsɔsɔlɔ?

4. Lá nkilika 1 Djɔanɛ 2:3-6 edjinge 2 Djɔanɛ 4, 6, kɛkɔnge koyɛso ladjɛ nangha djɛ nkɛnda l’akambo wa nsɔsɔlɔ?

⁴ Djɛ nkɛnda l’akambo wa nsɔsɔlɔ, iso ladjɛ ndjewa nsɔsɔlɔ kemá Otepela wɔ Ndjambe, Bible. Edjinge, iso ladjɛ ‘nkindjɛ nɛmɛyɛ ɛlɛmbɛ [wɛ Yehova.]’ (Wala 1 Djɔanɛ 2:3-6; 2 Djɔanɛ 4, 6.) Yeso atotshikelaka ndjɔmbɔmba kɛ djɔ kɛ onto woyalisa la okitshakitshɛ te Yehova. Djɛko ndeke, yopo imɔtshi yɛ wɔlɔ yɛ nɛmɛyɛ Yehova nde nkilika ndjɔmbɔmba kɛ Yeso wɔlɔ wɔlɔ.​—Dj. 8:29; 1 Pɛ. 2:21.

5. Wayi wakɔnge woyɛso ladjɛ ndaashikikɛ?

⁵ Djɛ nkindjɛ nkɛnda l’akambo wa nsɔsɔlɔ, iso ladjɛ ndjala la ndaashikikɛ ente Yehova ndeke Ndjambe kelekɔ l’akambo wa wɔlɔ edjinge k’enkfumɔ ketoshimelande má Otepela wɔnde Bible, kelekɔ ngo nsɔsɔlɔ. Edjinge iso ladjɛ ndaashikikɛ ente Yeso ndeke Mɛsiya kelakemisa. Lɔɔko kɛnɛ, anto efula ndjilaka ehamo ambɔ Yeso lako nkfutama avuta djɛnde ndjala Nkfumi kɛ Onkfumi wɔ Ndjambe. Djɔanɛ atovungola ante ‘ase lodjimbo,’ wangoyala l’otshumano edjinge wangondjimbola wanɛ watayalɔngɔsɔla djɛ malema akambo wa nsɔsɔlɔ wime Yehova nya Yeso. (2 Dj. 7-11) Djɔanɛ afunaka ante: ‘Kanga ongolo na apengo kanga lopawola djɛ Yeso alekɔ Kristo?’ (1 Dj. 2:22) Djɛko ndeke yopo yɛkɔ imɔ yokokaso ndjala la yewo dj’ipa ndjimbama, ngo ndjeka Otepela wɔ Ndjambe. Edjinge, ngo iso nangha nghɔsɔ ndeke isongewa Yehova nya Yeso. (Dj. 17:3) Iso ladjɛ nangha nghɔsɔ djɛ iso ndaashikikɛ djɛ tolekɔ l’akambo wa nsɔsɔslɔ.

6. Onkenka wɔkɔnge wopomana la dangala l’eseka w’Akristo?

⁶ Akristo ankfumɔ ladjɛ ndaalama dj’ipa ndodjimbama má filozofi yɛ wana w’anto. (1 Dj. 2:26) Layopo itshikitanyi, dangala la eseka w’Akristo ladjɛ ndalama dj’ipa ndovundama l’ilonga yɛsɔ. Nkaana kɛso Alexia, * kelekɔ l’ɛnɔnyi 25 l’intatshɛ lá France, atepela ante: “Wina wɔmayalaka ilɛngɛ, akambo w’andja wantshimbɛki yimba  efula, ndjɔmbɔmba olakanyelo wɔ opilwelo edjinge filozofi yɛ wana w’anto. Mbala imɔtshi, elakanyelo wɛsɔ wansasangɛki. Koko nyɛnaka djɛ mpakoke ndjekameyɛ wayi wiyandakanyɛka lá nkalasa ko nyimɛ yimba má olakanyelo wɔ Yehova.” Alexia ekaka onkanda La vie : comment est-elle apparue ? Évolution ou création ? Lɔkɔngɔ wɔ mbengo imangha toko, ehamo wɛnde weshilaka. Alexia ntepelaka ante: “ntayala la ehamo lonkina ente Bible alekɔ l’akambo wa nsɔsɔlɔ. Ndjɛka ndɛna djɛ nkamba la tɔkfɔ t’eleteyi angɔmpɛyɛ osasa edjinge vuu.”

7. L’ohemba wɔkɔnge woyɛso ladjɛ mpikama edjinge ladjikɛnge?

⁷ Akristo ankfumɔ, ayale ndangala kana nkokolo, ladjɛ mpikama la ntondo kɛ ohemba wɔ ndjala la ndongi m’pe. Djɔanɛ ɛnyɛka ante topakoke ndjala tɔkɛnda l’akambo wa nsɔsɔlɔ koko toyala la lowiko lɔ dongi m’pe. (1 Dj. 1:6) Ntsha iso nkɔpaka Ndjambe ntawola, iso ladjɛ mvungɔka wina tshɛ djɛ Yehova nyɛnaka djoyi nkfumɔ djonanghaso. ayale kaanga anto wapɛnyi wayi wonanghaso la widjima, Yehova nyɛnaka djoyi nkfumɔ djonanghaso.​—Heb. 4:13.

8. Kɛkɔnge koyɛso ladjɛ ntona?

⁸ Iso ladjɛ ntona ikanyi y’andja wanɛ lá n’kambo djɛ ovunga kana mpekanto. Ɔpɔstɔlɔ Djɔanɛ afunaka ante: ‘Ntsha iso ntepela ente: ‘Iso lako la ovunga,’ mbɔkoko tomboyadjimba edjinge nsɔsɔlɔ lako l’eloko wɛso.’ (1 Dj. 1:8) Lá nshi yɛ Djɔanɛ, apɔstɔlɔ watepelaki ambɔ onto nkoka nangha ovunga l’ɛkɔpa kɛnde, ko nkindjɛ ndjala la djokanelo djɛ wɔlɔ la Ndjambe. Lɔɔko kɛnɛ, tɔsɛna l’anteyi kɛ anto walekɔ la wopo wɔ tokanyi tɔmɔko toko. Anto efula ntepelaka ambɔ walekɔ la djawo te Ndjambe, ntshende wapawola ikanyi yɛ Yehova lá n’kambo djɛ ovunga, pekapeka wayi wa loseka. Wayi wɔsa Yehova ngete ovunga iwɔ ndjetaka ambɔ wayi wa wɔlɔ kana nkfumbo djɛwɔ djɛ lowiko.

9. Ɛtshɔkɔ wɛkɔnge wewa dangala l’eseka wina w’ovundawɔ djawo djɛwɔ djemá Bible mpidji?

⁹ Lá lɛdji lotshikitanyi, Akristo wa dangala l’eseka nkoka ntshindama djɛ nkilika tokanyi tɔ  winawɔ welá nkalasa kana l’olemo lá Wayi wa mbindo. Wopo wɔsɔ ndeke lokomelisa Aleksandar. Nde ntepelaka ante: “Wana wa wamato welá nkalasa kɛso waantshindaki djɛ lemi nsanga mbeto isawɔ. Iwɔ watepelaki ambɔ etengo motayala la oshile ɔmɔtshi, mbɔkoko lananghaki loseka lɔ mpame la mpame.” Ntsha wɛ ombopomana l’ohemba wɔ nghɔsɔ, mvungɔ ente, wina wovundɛ djawo djɛko djɛmbopikama má Bible mpidji, ongolama odjito wɔkɔ, ndemba djɛko, yimba yɛko edjinge djokanelo djɛko nya Yehova. Lá wina onkfumɔ wɔnghongopikamaka l’ehemba, angoyala n’kambo djɛ wɔdju djɛ wɛ nanghaka kɛnɛ kelekɔ wɔlɔ. Ewa ente, ikanyi yɛ nyɛtshi ye l’andja wanɛ lá n’kambo djɛ nsanga mbeto ndjɛ me Satana. Djɛko ndeke, wina onkfumɔ wotonɛ ntɔnɔla ngete as’andja wanɛ we ‘ongoleka kanga nyɛtshi wolo.’​—1 Dj. 2:14.

10. Wopo wɔkɔnge wotokotshɛ 1 Djɔanɛ 1:9 djɛ n’kambela Yehova la nkfumoloko kɛ piyɔɔ?

¹⁰ Iso ndjewaka ente Yehova alekɔ la lotshungɔ lɔnde ndjila ante n’kambo djɛnɛ ndekɔ ovunga kana mpekanto. Edjinge iso nanghaka la wolo dj’ipa nangha ovunga. Ntsha tombonangha ovunga, iso ndjisolaka ovunga wɔkɔ le Yehova lá lɔlɔmbɔ. (Wala 1 Djɔanɛ 1:9.) Edjinge ntsha to mbonangha ovunga w’ekekete, iso ladjɛ mpona okotshɔ wɔ tokokolo, tɔsɔnamisa me Yehova djɛ ntolama. (Dja. 5:14-16) Koko, topakoke ndeka ndaakiyanyɛ efula la evunga wisombonangha lá etsho wemboheta. Ladjikɛnge? Ladjikɛnde Papa kɛso kɛ ngandji akapaka wɔnande ngete oshinga wɔ mbendo má evunga wɛso. Wina wɔ Yehova otepelande ante angodjipisanyɛ anto wanangha evunga ko wayapɛla, nde angokotshɛke kɛnɛ k’otepelakande. Djɛko ndeke, lako ekete kekoka ntoshimba djɛ nkambela Yehova la nkfumoloko kɛ piyɔɔ.​—1 Dj. 2:1, 2, 12; 3:19, 20.

11. Wopo wɔkɔnge okokaso nama timba tɔso má elakanyelo wekoka ntshita djawo tshɛso?

¹¹ Iso ladjɛ ntona olakanyelo wɔ w’apɔsta. Má bango djɛ otshumano wɔ Akristo, Djabolo akamba l’ase lodjimbo djɛ nkona ehamo lá timba tɔ  ankambi wɛ Ndjambe wɛ n’kɔmano. Kɛnɛ kelekɔ la n’kambo n’tshɔ nde, iso ladjɛ ndjewa ntshikitanyɛ wayi walekɔ nsɔsɔlɔ la w’ongolo. * Antonyi waso nkambaka la Ɛtɛrnɛtɛ kana la réseaux sociaux djɛ ntshita djokanelo djɛso la Yehova edjinge ngandji kokaso wananyɔ. Iso topakoke ndjawola engolo wɛsɔ ladjikɛnde welekɔ prɔpagadɛ yɛ Satana!​—1 Dj. 4:1, 6; Ndj. 12:9.

12. Ladjikɛnge oyɛso ladjɛ nkembɛ djawo djɛso m’akambo wa nsɔsɔlɔ wiseke?

¹² Djɛ iso mpikama l’ehemba wɛ Satana, tokembɛ djawo djɛso te Yeso edjinge lá odjito wokotshɛnde lá kɛnɛ kɛ Ndjambe ndombosangola djɛ nangha. Iso ladjɛ ndaawɛkɛ l’epeko kɛkɔ kɛmɔ kekamba la Yehova lɔɔko kɛnɛ. (Mat. 24:45-47) Iso nkembɛka djawo djɛso má ndjeka Otepela wɔ Ndjambe wina la wina. L’onanghaso nghɔsɔ, djawo djɛso djengoyala ngete otamba wɔ esisa wɛnde ntshɔka otale tá looko. Poolo atepelaka djoyi n’tshɔ laandafunela otshumano wɔ Kɔlɔsɛ. Nde ndombotepela ante: ‘Etengo nyawola Kristo Yeso Nkfumi, nyokindjɛ nkɛnda ngo lande, nyopike esisa la nyopikame tende edjinge nyopikame lá djawo.’ (Kɔl. 2:6, 7) Lako kaanga n’kambo mɔ djɛ Satana kana wanɛ wadjimbwama mende oyɛwɔ ladjɛ nanghela Okristo wokembɛ djawo djɛnde dj’ipande nkɛnda l’akambo wa nsɔsɔlɔ.​—2 Dj. 8, 9.

13. Djoyi djɛkɔnge djokongaso edjinge ladjikɛnge?

¹³ Iso ladjɛ ndjila yimba ente ase andja wangototona. (1 Dj. 3:13) Djɔanɛ atovungola ante ‘andja w’otondo walekɔ ndɔndjɛma me kanga nyɛtshi.’ (1 Dj. 5:19) Etengo ekomo k’andja iyotaleke ntshɔ ngo tá nyɛtshi, Satana ataleke ngonyomala. (Ndj. 12:12) Nde nkambaka apengo la topo tɔmayɛlɛ, wayi wa mbindo wa nsanga mbeto la engolo wime w’apɔsta toko. Koko nde nkambaka l’ehemba wɛnama papoo etengo ndjolo djɛ ntonaghela nyɛtshi. Satana ndjewaka ante nshi yɛnde imbotshikala daambi djɛnde nyemɛ olemo wɔso w’ipoposanyɛ ntsha koko ntɔhɔdjɛ lá djawo. Lɔɔko kɛnɛ topakamɔ wina woshimbawɔ olemo wɔso kana ilelawɔ ewila efula enkeka. Kaanga oyalawɔ nghɔsɔ, wananyɔ la wankaana w’elá ewila wɛsɔ walekɔ ngo la nkelembo. Iwɔ wɛnyɛ ambɔ n’kambo nkfumɔ djenangha kanga nyɛtshi ɔsɔ, tongoleka ngo wolo!

14. Yoopo yɛkɔnge imɔtshi yokokaso nkotshɛ wananyɔ la wankaana djɛ ntshikala l’akambo wa nsɔsɔlɔ?

¹⁴ Djɛ nkotshɛ wananyɔ la wankaana dj’iwɔ ntshikala l’akambo wa nsɔsɔlɔ, iso ladjɛ ndaawoka djandji. (1 Dj. 3:10, 11, 16-18) Iso ladjɛ ndjokana ngandji apengo wina woyalaso wɔlɔ, edjinge wina woposa ekakasano. Ndjɔmbɔmba, wɛ ndjewaka onto ɔmɔtshi w’ombowusɛ onto wɔnde ɔmɔtshi wokande ngandji edjinge alekɔ la djonyi djɛ ndokeketshɛ lá wopo wɔ wɔlɔ? Ntsha omboká wɔnanyɔ w’Okristo ɔmɔtshi ambótshutshɛ n’kete djɛnde nkfumɔ má ekakasano weyɛ má n’kete djetongamisa edjinge walekɔ lá djonyi djɛ mba okotshɔ djɛ nkalɔ mpika Amvulu yɛwɔ yɛ Onkfumi edjinge amvulu yɛwɔ? Iso nyɛnyɛka ngandji la djandji dj’efula dj’okaso wananyɔ l’ankaana apengo lá wopo wotepelaso koko edjinge lá wopo wonanghaso.

15. Lá nkilika 1 Djɔanɛ 4:7, 8, kɛkɔnge koyɛso ladjɛ nangha?

¹⁵ Tongokolake Papa kɛso kɛ ngandji kel’olongo wina wokanaso ngandji isɔmɛlɛ isɔmɛlɛ. (Wala 1 Djɔanɛ 4:7, 8.) Lɛdji l’ɔmɔtshi lɔ djonyi lɛnyɛso ngandji nde nyimeyana isɔmɛlɛ isɔmɛlɛ. Ndjɔmbɔmba, onto ɔmɔtshi nkoka tonanghela nyɛtshi ko ndɔtɔlamba dj’iso ndo wimeyɛ. Iso tongɛnyɛke ngandji kɛso má ndowimeyɛ, la nvungɛ ovunga wɔkɔ. (Kɔl. 3:13)  Wɔnanyɔ wetawɔ Aldo apomanaka la okakasano wɔsɔ wina wɔ ndoke wɔnanyɔ ɔmɔtshi w’iyɔsaka l’odjito atepela wayi wa nyɛtshi la n’kambo djɛ ikɔlɛ yɛwɔ. Aldo atepelaka ante, “Ndɔmbaka Yehova la entete djɛnde nkotshɛ lemi djipa ndjala la tokanyi tɔ nyɛtshi tende.” Nde ananghaka djoyi nkina, Aldo atepela ante: “wina wokisa wɔnanyɔ wɔsɔ etepela windatepela, nde ɔlɔmbaka djɛnde ndowimeyɛ. Ngo má otepela wɔnde, ndjokaka wopo wɔ ndakiyana la kɛnɛ kindatepela. Toshiyɛka n’kambo n’tshɔ ngo ngete ntombe.”

16-17. Akambo wakɔnge woyɛso ladjɛ ndaashikikɛ djɛ nangha?

¹⁶ Ɔpɔtɔlɔ Djɔanɛ ayalaka la ngandji k’efula te wananyɔ wa lonyuma edjinge nde akɔpaki dj’iwɔ ndjala la djawo djɛ wɔlɔ, wopo wɔ ndoyakiyanyɛka ɛnyɛki djɛ nde alekɔ la ngandji edjinge má alako windaapɛyɛ nyɛnamaka papoo lá enkanda esato windafune. Alekɔ nsɔsɔlɔ ekeketshelo djɛ ndjewa ente wananyɔ walekɔ ngete nde wambɔkfutama avuta djɛ ntɔlɔndjɛ l’olongo lá Kristo!​—1 Dj. 2:27.

¹⁷ Djɛko ndeke, nyontshɔ tɔlɛmɛyɛ alako wisombowa lá djamba djɛnɛ. Topikame djɛ nkɛnda ngo lá akambo wa nsɔsɔlɔ, toyale la ntshunamo te Yehova l’akambo ankfumɔ welá lowiko lɔso. Tekake Otepela wɔ Ndjambe edjinge toyapɛyɛ l’eteyi. Toyale la djawo djɛ wolo te Yeso.Totawolake filozofi yɛ wana w’anto la olakanyelo wɔ w’apɔsta. Topikame lá lodjimbo lototshinda djɛ ndjala la lowiko lɔ dongi m’pe la nangha evunga wɛ n’kekete. Tɔlɛmɛyɛ tɔkfɔ tɔ Yehova tolendana la n’kfumbo. Lonkina nyontshɔ tokotshɛ wananyɔ dj’iwɔ mpikama pikaa la nyimeyɛka watonanghela evunga la nkotshɛka walekɔ la djonyi djɛ okotshɔ. Ntsha tombonangha nghɔsɔ, kaanga tongo pomana la ekakasano wɛkɔnge, tongo kindjɛ nkɛnda ngo lá akambo wa nsɔsɔlɔ.