1. Andi ta mbei u ta wai, kumafa 3 Johanisi 3, 4 ta taki?

PAKISEI luku unfa apösutu Johanisi bi o ta wai, di a jei taa dee sëmbë dee a bi heepi u ko a di tuutuu lei, bi ta dini Jehovah ku hii de hati go dou. Sömëni soni bi ta miti de, nöö Johanisi bi ta mbei hii möiti u heepi dee Keesitu sëmbë aki u de ko abi wan taanga biibi. A bi ta si de kuma miii fëën a di biibi. Wë sö nöö useei ta wai te dee fuu seei mii, nasö te dee mii fuu a di biibi buta de libi a Jehovah maun, nöö de ta dini ën ku hii de hati go dou.​—Lesi 3 Johanisi 3, 4.

2. Faandi mbei Johanisi bi sikifi dee biifi dee a sikifi?

² A kan taa a di jaa 98 bifö Keesitu, Johanisi bi ta libi a Efeise nasö zuntu ku Efeise. Kandë a bi go ta libi ala baka di a kumutu a katibo a di paati de kai Patimosi. A dee ten dë, di santa jeje u Jehovah bi mbei a sikifi dii biifi. A bi sikifi dee biifi aki u da dee Keesitu sëmbë taanga u de ta biibi a Jesosi go dou, söseei u de ta piki di lei u Jehovah Gadu go dou.

3. Fuun soni woo taki?

³ Johanisi hën bi dë di lasiti apösutu di bi fika a libi, nöö a bi ta booko hën hedi ku di ko di wanlö ganjansëmbëma bi ta ko a dee kemeente * (1 Joh. 2:18, 19, 26). Dee sëmbë aki bi ta taki taa de sabi Gadu, ma de an bi ta du andi Jehovah taki. Boo luku andi Gadu bi mbei Johanisi piki dee sëmbë u di kemeente. Te woo luku di soni dë, nöö woo taki u dii soni: Andi da di piki di u musu ta piki di lei u Masa Gadu? Andi sa tapa u fu wa du ën?  Unfa u sa heepi u na u fu wa kumutu a di tuutuu lei?

4. Andi u musu du fuu sa piki di lei u Masa Gadu, te u luku andi 1 Johanisi 2:3-6 ku 2 Johanisi 4, 6, ta taki?

⁴ Fuu sa piki di lei u Masa Gadu, nöö u musu ko sabi dee soni dee sikifi a di Wöutu fëën, di Bëibel. Boiti di dë, u musu ta „piki Masa Gadu buka ta libi kumafa a kë”. Hën da u musu ta hoi dee wëti fëën. (Lesi 1 Johanisi 2:3-6; 2 Johanisi 4, 6.) Jesosi bi piki Gadu buka a hii soni. Fëën mbei ee u kë piki Gadu buka a soni, nöö u musu ta djeesi Jesosi a hii futu.​—Joh. 8:29; 1 Pet. 2:21.

5. Fuun soni u musu dë seiki?

⁵ Fuu sa ta piki di lei u Masa Gadu go dou, nöö u musu ta biibi tuutuu taa Jehovah hën da di Gadu di ta taki tuutuu soni, söseei u musu ta biibi tuutuu taa hii dee soni dee a ta piki u a di Wöutu fëën da tuutuu soni. Boiti di dë, u musu ta biibi tuutuu taa Jesosi da di Mësiasi di Gadu bi paamusi taa bi o ko. Sömëni sëmbë u di ten aki an ta kaba biibi taa Gadu buta Jesosi ko Könu u di Könuköndë fëën. Johanisi bi taki taa sömëni ganjansëmbëma bi o ko, nöö de bi o sa ganjan dee sëmbë dee an bi o ta biibi tuutuu taa dee soni di di Bëibel ta taki u Jehovah ku Jesosi, da tuutuu soni (2 Joh. 7-11). Johanisi bi taki taa: „Di sëmbë di o ko ta fia taa Masa Jesosi nëën da di Paamusi Könu Masa Gadu manda ko da u aki fuu ta biibi ën, nöö di sëmbë di ko taki sö, hën da wan ganjansëmbëma” (1 Joh. 2:22). Di wan kodo fasi fa u sa köni u sëmbë an feni u ganjan, hën da te u ta lei soni a di Wöutu u Gadu. Di fasi dë, da di wan kodo fasi fa u sa ko sabi Jehovah ku Jesosi (Joh. 17:3). Nöö te u du di soni dë, ufö woo sa ko dë seiki taa u dë a di tuutuu lei.

6. Andi sa tapa dee njönkuwan u de an piki di lei u Masa Gadu?

⁶ Hii dee Keesitu sëmbë musu ta köni u sëmbë an ganjan de kisi ku dee lei u libisëmbë, möönmöön dee njönkuwan (1 Joh. 2:26). Alexia * da wan sisa u Gaan Faansiköndë, di abi 25 jaa. A bi taki taa: „Di mi bi möön njönku, de bi lei mi wantu soni a siköö di bi ta mbei mi bi ta hakisi miseei ee mi dë a di tuutuu lei. De bi lei mi taa hii soni ko fu hënseei, söseei de bi lei mi woto soni jeti. So juu mi bi ta si kuma dee  lei dë bi sa dë tuu. Ma mi bi pakisei taa an bi o bunu u mi tuwë dee soni di di Bëibel ta taki disa a wan së, nöö mi bia ta biibi hii soni di de ta lei mi a siköö.” Alexia bi lei soni a di buku Leven​—Hoe is het ontstaan? Door evolutie of door schepping? A wantu wiki dendu, an bi ko ta si möön taa dee lei dë bi sa dë tuu. Alexia bi taki taa: „Mi bi mbei möiti u mi ko dë seiki taa dee soni di di Bëibel ta taki da tuutuu soni. Nöö mi bi ko si taa ee mi ta libi kumafa di Bëibel ta taki, nöö mi o dë waiwai, söseei mi o abi wan bööböö libi.”

7. Andi u musu ta köni fu wa du, nöö faandi mbei u musu ta köni fu wa du ën?

⁷ Hii Keesitu sëmbë, gaanwan ku pikiwan tuu, musu ta köni u de an ta du kuma de ta dini Jehovah, nöö de ta du soni di an bunu tjubitjubi. Johanisi bi taki taa wa sa dë a di tuutuu lei, nöö u ta libi wan fanafiti libi (1 Joh. 1:6). Ee u kë u Jehovah Gadu feni u bunu a di ten aki, söseei a di ten di ta ko, nöö u musu ta hoi a pakisei taa a ta si hii soni di u ta du. Fuu taki ën seei, nöö wa sa du zöndu tjubitjubi, biga Jehovah ta si hii soni di u ta du.​—Heb. 4:13.

8. Ku andi u musu ta köni?

⁸ U musu ta köni fu wa ko ta si di soni de kai zöndu kumafa dee sëmbë u di goonliba aki ta si ën. Apösutu Johanisi bi taki taa: „Ma ee u ta mbei taa wa du hogi wan daka, wë nöö u seei u ta ganjan” (1 Joh. 1:8). A di ten u Johanisi, so sëmbë di bi bia baka da di biibi bi ta taki taa wan sëmbë ku Gadu bi sa dë mati jeti, hii fa di sëmbë ta du soni di Gadu an lobi. Sö nöö so sëmbë u di ten fuu aki ta si soni tu. Sömëni sëmbë ta taki taa de ta biibi a Gadu, ma de an ta kë tei Jehovah fan te a taki taa wan soni hogi, möönmöön te a nama a manu ku mujëë soni. Di soni di Jehovah ta taki taa an bunu, hën de ta taki taa bunu. Nasö de ta taki taa hii sëmbë musu taki da hënseei ee andi möön bunu dëën.

9. Un wini dee njönkuwan ta feni te de ta du soni kumafa di Bëibel ta taki?

⁹ A sa taanga seei da dee Keesitu sëmbë dee njönku, u de si di duumi di womi ku mujëë ta  duumi ku deseei, a di soifi fasi. A sa dë sö ee dee sëmbë di de ku de ta wooko a di wan kamian nasö dee mii di de ku de nango a di wan siköö, ta duwengi de u de ko ta si soni woto fasi. Di soni aki hën bi pasa ku Aleksandar. A bi taki taa: „So mujëë mii di mi ku de bi nango a di wan siköö, bi ta suku u duwengi mi u mi duumi ku de. De bi taki taa mi da wan womi mii di ta kë womi kuma miseei, biga ma abi lobima.” Ee dee soni aki ta pasa ku i tu, nöö hoi a pakisei taa ee i hoi iseei, hën i du soni kumafa di Bëibel ta taki, nöö di soni dë o heepi i fu ja lasi lesipeki da iseei. A o heepi i tu fu ja ko kisi wan taku siki, fu ja ko dë ku gaan fuka a hati, söseei a o heepi fii ku Jehovah an poi. Te i ta hoi iseei fu ja du soni di an bunu, nöö pikipiki an o ko ta taanga da i sö möön fii du soni kumafa Jehovah kë. Hoi a pakisei tu taa Saatan hën mbei sëmbë ko ta si soni a wan föutu fasi, te a nama a manu ku mujëë soni. Hën da te i ta hoi iseei fu ja ko ta si soni kuma dee sëmbë u di goonliba aki, nöö u sa taki taa i ’wini Didibi’.​—1 Joh. 2:14.

10. Unfa 1 Johanisi 1:9 ta heepi u fuu dini Jehovah ku wan limbo hati?

¹⁰ U sabi taa Jehovah hën abi leti u taki ee wan sëmbë ta libi a wan fasi di an bunu, nöö u ta mbei hii möiti fu wa du zöndu. Ma te a ko pasa taa u du wan zöndu, nöö u ta piki Jehovah un zöndu u du. (Lesi 1 Johanisi 1:9.) Nöö ee u du wan gaan zöndu, nöö u ta suku heepi a dee gaanwomi, u di Jehovah buta de u de luku u (Jak. 5:14-16). Ma wa musu ta si kuma wa bunu möön, u di u bi mbei föutu a di ten di pasa. Faandi mbei wa musu si soni sö? Wë biga di Tata fuu di lobi u manda di Womi Mii fëën ko paka di lusupaima da u, sö taa a sa da u paadon u dee zöndu fuu. Te Jehovah ta taki taa a o da u paadon ee u ta tjali tuutuu u dee zöndu dee u mbei, nöö a o du ën tuutuu. Sö u ta si taa na wan soni sa tapa u fuu dini Jehovah ku wan limbo hati.​—1 Joh. 2:1, 2, 12; 3:19, 20.

11. Unfa u sa köni ku lei di sa mbei di biibi fuu ko suwaki?

¹¹ Wa musu ta tei dee lei di dee sëmbë dee bia baka da di biibi, ta lei wotowan. Sensi di di kemeente  u Keesitu sëmbë seti, hën Didibi ta suku u mbei di biibi u dee sëmbë u Gadu ko suwaki. Fëën mbei a dë fanöudu fuu ko sabi andi da tuu ku andi da ganjan. * Dee sëmbë dee buuse u sa ta buta soni a Internet u mbei di biibi di u abi a Jehovah ko suwaki, nasö u mbei wa ko ta lobi dee baaa ku dee sisa fuu möön. Na biibi dee lö soni dë. A Saatan de ta kumutu!​—1 Joh. 4:1, 6; Ako. 12:9.

12. Faandi mbei u musu mbei möiti fuu ko ta möön biibi dee soni dee u lei?

¹² Ee wa kë u Saatan mbei di biibi fuu ko suwaki, nöö u musu mbei möiti fuu ko ta möön biibi a Jesosi, söseei u musu biibi taa hën da di sëmbë di Jehovah tei u du di soni di a abi a pakisei u du. U musu ta futoou dee baaa dee Jehovah buta u tei fesi a di ölganisaasi fëën tu (Mat. 24:45-47). Di biibi fuu o ko möön taanga, te u ta lei soni a di Wöutu u Gadu hii juu. Te u ta du sö, nöö di biibi fuu o ko dë kuma wan pau di di lutu fëën go fundu a goonbasu. Sö wan pei soni Paulosu bi taki a di biifi di a bi sikifi manda da dee Keesitu sëmbë u Kolosën. A bi taki taa: „Fa i si un tei Jesosi Keesitu ko unu Masa dë kaa, nöö ku ën nöö un musu ta libi e. Biga unu ku ën ko di wan. Nöö un musu dë a Masa Jesosi kuma wan pau di hën lutu go fundu a goon. Un musu ta biibi ën taanga nango möönmöön” (Kol. 2:6, 7). Ee u ta mbei hii möiti u di biibi fuu ko möön taanga, nöö Saatan ku dee sëmbë dee tei hën së an o sa tapa u fu wa piki di lei u Masa Gadu möön.​—2 Joh. 8, 9.

13. Andi u musu hoi a pakisei taa o pasa, nöö faandi mbei u musu hoi di soni dë a pakisei?

¹³ U musu ta hoi a pakisei taa dee sëmbë u di goonliba aki o buuse u (1 Joh. 3:13). Johanisi bi taki kaa taa „hii dee oto sëmbë u di goonliba aki tuu dë a didibi basu” (1 Joh. 5:19). Möönmöön di kaba u di goonliba aki ta ko zuntu, nöö möönmöön Saatan hati ta boonu (Ako. 12:12). Na suku nöö a ta suku u ganjan u puu a Jehovah ku soni kuma fanafiti libi a manu ku mujëë soni, nasö ku dee mindimindi soni di dee sëmbë dee bia baka da di biibi ta taki. Ma a ta mbei sëmbë du ku u tu. Saatan sabi taa ten an fika hia dëën möön faa sa feni pasi tapa di peleikiwooko fuu nasö faa mbei taa di biibi fuu ko suwaki. Fëën mbei an ta bigi da u te u ta si taa de ta tapa wan pisi u di wooko fuu nasö hii di wooko fuu a so köndë. Ma ku ën sö seei dee baaa ku dee sisa fuu dee dë a dee köndë dë ta hoi dou. Di soni aki ta lei taa aluwasi andi Saatan ta du ku dee sëmbë u Gadu, tökuseei de o ta hoi dou!

14. Andi da wan fasi fa u sa heepi dee baaa ku dee sisa fuu u de dini Gadu go dou?

¹⁴ Ee u kë heepi dee baaa ku dee sisa fuu u de dini Gadu go dou, nöö u musu abi pasensi (1 Joh. 3:10, 11, 16-18). U musu lobi useei. Ma an musu dë sö te soni nango bunu nöö. A musu dë sö te u dë a fuka tu. I sabi wan sëmbë di abi heepi ku kötöhati fanöudu u di wan sëmbë fëën lasi libi ö? Nasö i jei taa so baaa ku sisa abi heepi fanöudu u toona mbei di Könuköndë zali u de nasö di wosu u de, u di gaan wata nasö gaan ventu ko booko soni a di köndë u de u? Wë dee soni dee u ta taki ta lei taa u lobi dee baaa ku dee sisa fuu, söseei de ta lei taa u ta fii da de. Ma di soni di ta möön lei di soni dë, hën da dee soni dee u ta du.

15. Andi u musu du kumafa 1 Johanisi 4:7, 8 ta taki?

¹⁵ U ta lei taa u ta du soni kuma di lobihati Gadu fuu, te u ta lei taa u lobi useei. (Lesi 1 Johanisi 4:7, 8.) Wan u dee möön bunu fasi fa u ta lei taa u lobi useei, hën da te u ta da useei paadon. A sa pasa taa wan sëmbë du wan soni ku u di hati u, nöö a hakisi u fuu dëën  paadon. Woo lei taa u lobi sö wan sëmbë, te u dëën paadon, nöö u mbei möiti fu wa pakisei di soni di a bi du möön (Kol. 3:13). Wan baaa de kai Aldo hati bi ko boonu ku wan baaa di a bi ta lesipeki, u di di baaa dë bi taki wan soni di nama ku dee sëmbë u di lö fëën, di bi hati ën gaanfa seei. Aldo bi taki taa: „Mi bi ta begi Jehovah hii juu faa heepi mi u ma ko ta si di baaa dë wan fasi.” Ma Aldo bi du wan woto soni tu. A bi hakisi di baaa fu hën ku ën go peleiki makandi. Di de bi dë a peleiki, hën Aldo konda da di baaa unfa di soni di a bi taki bi hati ën tjika. Aldo bi taki taa: „Di di baaa bi jei taa di soni di a bi taki bi toobi mi, hën a hakisi mi u mi dëën paadon. Mi bi sa jei a di fasi fa a bi ta fan taa a bi hati ën taa a taki sö wan soni. Baka di dë, u bi disa hii di soni dë, hën u ko dë mati baka.”

16-17. Andi u musu mbei hii möiti fuu du?

¹⁶ Apösutu Johanisi bi lobi dee baaa ku dee sisa fëën, nöö a bi kë u de abi wan taanga biibi. Te u ta lesi dee dii biifi dee a bi sikifi da de, nöö u ta si unfa a bi lobi de tjika, söseei unfa a bi ta booko hën hedi ku de tjika. U ta wai seei u di u sabi taa dee womi ku dee mujëë dee o go tii makandi ku Jesosi a liba ala, da sëmbë di lobi wotowan, söseei di ta booko de hedi ku wotowan, kuma Johanisi.​—1 Joh. 2:27.

¹⁷ Be wa fëëkëtë dee soni dee u taki a di woto aki. Boo mbei hii möiti fuu ta piki Jehovah buka a hii futu. Lei soni a di Wöutu fëën, nöö buta futoou nëën. Mbei möiti fii ko ta möön biibi Jesosi. Koti pasi da dee lei u libisëmbë ku dee soni di dee sëmbë dee bia baka da di biibi, ta lei sëmbë. Köni be ja ta du kuma i ta dini Gadu, nöö i ta du hogi tjubitjubi. Hoi dee wëti u Jehovah dee a da u fuu hoi. Söseei boo ta heepi dee baaa ku dee sisa fuu, ta da de paadon, u de sa abi wan taanga biibi go dou. Te u ta du sö, nöö woo sa piki di lei u Masa Gadu go dou, aluwasi andi ta pasa.