1. Soleki fa 3 Yohanes 3, 4 e sori, dan sortu sani e meki wi prisiri?

NA APOSTEL Yohanes ben musu fu breiti di a yere taki den sma di a yepi fu kon sabi Yehovah e tan du san den leri. Den ben kisi furu tesi, èn Yohanes ben du ala san a man fu tranga a bribi fu den Kresten disi, di a ben si leki en pikin. Na so a de tu taki wi breiti te den pikin fu wi nanga den Bijbelstudie fu wi e gi densrefi abra na Yehovah èn te den e tan dini en.​—Leisi 3 Yohanes 3, 4.

2. Fu san ede Yohanes skrifi den brifi fu en?

² A kan taki na ini a yari 98, Yohanes ben libi na ini a foto Efeise noso krosibei fu a foto dati. Kande a froisi go drape baka di a komoto na strafu-oso na a èilanti Patmos. Na a ten dati Yehovah meki a skrifi dri brifi. A ben musu skrifi den brifi disi fu gi den Kresten deki-ati fu tan bribi na ini Yesus èn fu tan gi yesi na Yehovah.

3. Sortu aksi wi o luku?

³ Na a ten dati Yohanes ben de a lasti apostel di ben de na libi èn a ben broko en ede nanga den falsi leriman di ben de na ini den gemeente (1 Yoh. 2:18, 19, 26). * Den leriman dati ben taki dati den ben sabi Gado, ma den no ben gi yesi na en. Na ini na artikel disi wi o luku sortu rai Yohanes ben gi den brada nanga sisa èn wi o luku den dri aksi disi: San o yepi wi fu tan gi yesi na Gado? San kan  meki en muilek gi wi fu gi yesi na en? Èn fa wi kan yepi makandra fu tan gi yesi na Gado?

4. Soleki fa 1 Yohanes 2:3-6 nanga 2 Yohanes 4, 6 e sori, dan san wi musu du?

⁴ Fu man dini Yehovah wi musu kon sabi den tru leri fu Bijbel. Boiti dati, wi musu „hori den komando fu [Yehovah]”, dati wani taki wi musu gi yesi na en. (Leisi 1 Yohanes 2:3-6; 2 Yohanes 4, 6.) Yesus ben gi yesi na Yehovah na ini ala sani. Dati meki a de wan bun eksempre gi wi. Sobun, wan prenspari fasi fa wi e gi yesi na Yehovah na te wi e waka baka na eksempre fu Yesus.​—Yoh. 8:29; 1 Petr. 2:21.

5. Sortu sani wi musu bribi?

⁵ Efu wi wani tan gi yesi na Yehovah, dan wi musu bribi taki ala sani di skrifi na ini en Wortu tru. Boiti dati, wi musu bribi taki Yesus na a Mesias. Furu sma no e bribi taki Yehovah poti Yesus leki Kownu fu Gado Kownukondre. Yohanes ben taki dati „furu bedrigiman” ben o de di ben o kori den wan di no abi wan tranga bribi na ini Yehovah nanga Yesus (2 Yoh. 7-11). Yohanes ben skrifi: „Suma na a leiman? A no a sma di e taki dati a no e bribi taki Yesus na a Krestes?” (1 Yoh. 2:22) A wan-enkri fasi fa sma no o man kori wi na te wi e studeri Gado Wortu. Te wi e du dati wi o kon sabi Yehovah nanga Yesus (Yoh. 17:3). Boiti dati, wi o de seiker taki den sani di wi e leri tru.

6. San kan meki en muilek gi yongu Kresten fu tan gi yesi na Gado?

⁶ Ala Kresten musu luku bun nanga den leri fu a grontapu (1 Yoh. 2:26). Ma spesrutu yongu Kresten musu luku bun nanga a sani disi. Alexia * wan sisa fu Fransikondre di abi 25 yari e taki: „Di mi ben de na skoro ete, mi ben kisi na evolutie-leri nanga tra sani di sabiman e bribi. Mi ben lobi sonwan fu den leri disi. Ma den leri disi ben bruya mi èn den ben meki mi tweifri na den sani di mi ben leri fu Bijbel. Mi ben feni taki mi no ben kan bribi ala den sani di mi ben leri na skoro sondro fu gi Yehovah wan kans.”  Alexia studeri a buku Leven​— Hoe is het ontstaan? Door evolutie of door schepping? Baka wan tu wiki a no ben tweifri moro. Alexia e taki: „Mi overtoigi misrefi taki den leri na ini Bijbel tru. Èn mi kon si taki efu mi e libi soleki fa Bijbel e sori, dan mi o de koloku èn mi o abi wan bun libi.”

7. Nanga sortu sani wi musu luku bun èn fu san ede?

⁷ Ala Kresten, awinsi den yongu noso den owru, musu luku bun taki den no e dini Yehovah, dan den du ogri kibrikibri. Yohanes ben taki dati wi no kan dini Yehovah, dan wi e du sani di no e kruderi nanga Bijbel (1 Yoh. 1:6). Efu wi wani taki Yehovah prisiri nanga wi, wi musu hori na prakseri taki ala ten Yehovah e si san wi e du. Sobun, srefi efu tra sma no e si san wi e du, Yehovah e si wi.​—Hebr. 4:13.

8. Sortu denki wi no musu teki abra?

⁸ Wi no musu si sondu leki fa a grontapu e si en. Na apostel Yohanes ben skrifi: „Efu wi taki: ’Wi no abi sondu’, dan wi e kori wisrefi” (1 Yoh. 1:8). Na ini a ten fu Yohanes den sma di ben drai baka gi a tru bribi, ben taki dati wan sma ben kan de wan mati fu Gado awinsi a ben e du ogri. Na ini a ten disi sma e denki so ete. Furu sma e taki dati den e bribi na ini Gado, ma den no e si sondu na a srefi fasi leki Gado, spesrutu te a abi fu du nanga seks. Yehovah e leri wi taki soso wan man nanga uma di trow mag abi seks, ma den sma fu grontapu feni taki wan sma kan abi seks nanga suma a wani èn o ten a wani.

9. Fu san ede a bun te yonguwan e du san Bijbel e taki?

⁹ Te sma na skoro noso na wrokope abi wan tra denki fu seks, a kan muilek gi  yonguwan fu si seks soleki fa Yehovah e si en. Na so a ben de gi Aleksandar. A e taki: „Son meisje na skoro ben wani dwengi mi fu abi seks nanga den. Fu di mi no ben abi wan vriendin, meki den ben taki dati mi ben musu fu de wan homo.” Efu a sani disi e miti yu tu, dan hori na prakseri taki te yu e du san Bijbel e taki, yu o firi bun fu di yu e tyari yusrefi soleki fa Yehovah wani. Boiti dati, yu no o du sani di o pori yu gosontu, di o meki yu firi lasi-ati èn di o pori yu matifasi nanga Yehovah. Ibri leisi te yu e kakafutu gi tesi, a o kon moro makelek gi yu fu du san bun. No frigiti taki a denki di a grontapu disi abi fu seks e kon fu Satan. Sobun, te yu no e teki a denki fu grontapu abra, yu e „wini na ogriwan”.​—1 Yoh. 2:14.

10. Fa 1 Yohanes 1:9 e yepi wi fu dini Yehovah nanga wan krin konsensi?

¹⁰ Wi e agri taki Yehovah abi a reti fu taki san na sondu èn wi e du ala san wi man fu no sondu. Ma te wi meki wan fowtu, wi e taigi Yehovah san wi du. (Leisi 1 Yohanes 1:9.) Èn te wi du wan seryusu sondu, wi e suku yepi na den owruman di Yehovah poti fu yepi wi (Yak. 5:14-16). Ma wi no musu tan prakseri wan fowtu di wi meki na ini a ten di pasa. Fu san ede? Fu di wi lobi Papa seni en Manpikin kon dede gi wi, so taki wi kan kisi pardon fu wi sondu. Te Yehovah e taki dati a o gi sma di abi berow pardon, dan a e du dati trutru. Dati meki wi kan dini en nanga wan krin konsensi.​—1 Yoh. 2:1, 2, 12; 3:19, 20.

11. Fa wi kan kibri wisrefi gi den leri di kan swaki wi bribi?

¹¹ Wi musu luku bun nanga den falsi leri fu den sma di drai baka gi a tru bribi. Sensi di a Kresten gemeente seti, Didibri e pruberi fu swaki a bribi fu Kresten.  Dati meki wi musu man si efu wan sani tru noso efu na wan lei. * Den feanti fu wi kan gebroiki Internet fu panya lei di e swaki wi bribi na ini Yehovah èn di e meki taki a lobi di wi abi gi den brada nanga sisa e kon kowru. No bribi den lei disi. Den e kon fu Satan!​—1 Yoh. 4:1, 6; Openb. 12:9.

12. Fu san ede wi musu kon abi wan tranga bribi?

¹² Efu wi wani kakafutu gi Satan, dan wi musu tranga wi bribi na ini Yesus èn wi musu bribi taki en na a sma di Yehovah e gebroiki fu du san a abi na prakseri. Wi musu frutrow den brada tu di Yehovah poti fu tiri en organisâsi (Mat. 24:45-47). Te wi abi a gwenti fu studeri Gado Wortu, dan wi bribi o tranga. Wi bribi o de leki wan bon di abi rutu di e go dipi na ini a gron. Na dati Paulus ben taki di a ben skrifi den Kresten na Kolose. A ben taki: „Now di unu kon bribi na ini Masra Yesus Krestes, dan tan tyari unsrefi na wan fasi di e sori taki unu e gi yesi na en. Neleki fa rutu e meki wan bon tanapu steifi na ini a gron, na so un musu tanapu steifi èn bribi na ini Yesus” (Kol. 2:6, 7). Efu wi e du ala san wi man fu tranga wi bribi, dan Satan nanga den bakaman fu en no o man tapu wi fu tan du san wi leri.​—2 Yoh. 8, 9.

13. Fu san ede wi no musu fruwondru taki grontapu no lobi wi?

¹³ Wi no musu fruwondru taki grontapu no lobi wi (1 Yoh. 3:13). Yohanes e memre wi taki „heri grontapu de na ini a makti fu na ogriwan” (1 Yoh. 5:19). A kaba fu a grontapu disi e kon moro krosibei èn Satan e atibron moro nanga moro (Openb. 12:12). Satan no e pruberi fu kisi wi nanga hurudu nanga falsi leri wawan, ma wi e kisi hebi frufolgu tu. Satan sabi taki a no abi furu ten moro fu tapu wi fu du a preikiwroko èn fu swaki wi bribi. Dati meki a no e fruwondru wi taki na ini son kondre wi no mag preiki fri èn taki na ini tra kondre lanti tapu a wroko srefi. Toku den brada nanga sisa na ini den kondre dati e horidoro. Den e sori taki awinsi san Satan e du nanga a pipel fu Yehovah, wi man tan gi yesi na en!

14. Fa wi kan yepi den brada nanga sisa fu tan dini Yehovah?

¹⁴ Wi musu sori sari-ati efu wi wani yepi wi brada nanga sisa fu tan dini Yehovah (1 Yoh. 3:10, 11, 16-18). A no soso te sani e go bun wi musu sori lobi, ma wi musu du dati tu te problema de. Fu eksempre, yu sabi wan brada noso sisa di lasi wan lobiwan na ini dede èn di abi trowstu nanga yepi fanowdu? Noso yu yere taki son brada nanga sisa kisi fu du nanga wan rampu èn den abi yepi fanowdu fu bow den Kownukondre zaal noso den oso baka? Wi no musu taki nomo taki wi lobi den brada nanga sisa fu wi, ma wi musu du sani fu sori lobi nanga sari-ati gi den.

15. Soleki fa 1 Yohanes 4:7, 8 e sori, dan san wi musu du?

¹⁵ Wi e teki na eksempre fu wi hemel Papa te wi e sori lobi gi makandra. (Leisi 1 Yohanes 4:7, 8.) Wan prenspari fasi fa wi kan sori lobi na te wi e gi makandra pardon. Fu eksempre, kande wan sma du wan hati sani nanga wi èn a aksi wi fu gi en pardon. Wi e sori lobi te wi e gi en  pardon èn te wi no e tan prakseri a sani di a du (Kol. 3:13). A sani disi pasa nanga wan brada di nen Aldo. A ben mandi di wan tra brada di a ben lespeki taki wan sani fu a ras fu en di a no ben lobi. Aldo e taki: „Mi begi furu èn mi aksi Yehovah fu yepi mi fu no denki takru fu a brada disi.” Ma Aldo du wan tra sani tu. A aksi a brada fu preiki makandra nanga en. Di den ben wroko makandra, a taigi a brada taki a sani di a ben taki hati en. Aldo e taki: „Di a brada yere fa mi e firi fu a sani di a taki, a aksi mi pardon. Mi ben kan yere na en sten taki a ben sari taki a ben du so wan sani. Baka dati wi ben de bun mati baka.”

16-17. Soleki fa wi leri na ini na artikel disi, dan san wi musu du?

¹⁶ Na apostel Yohanes ben lobi den brada nanga sisa èn a ben wani taki den ben musu abi wan tranga bribi. Wi e si a lobi fu en na ini den dri brifi di a skrifi gi den. A e gi wi deki-ati te wi e prakseri taki den man nanga uma di Gado salfu fu tiri makandra nanga Yesus na ini hemel e sori lobi neleki Yohanes.​—1 Yoh. 2:27.

¹⁷ Meki wi du san wi leri na ini na artikel disi. Wi musu du muiti fu gi yesi na Yehovah na ini ala sani. Wi musu studeri Gado Wortu èn wi musu bribi den sani di wi e leri. Wi musu abi wan tranga bribi na ini Yesus. Wi no musu teki a denki fu grontapu abra èn wi no musu bribi den falsi leri fu sma di drai baka gi a tru bribi. Wi no musu du sondu kibrikibri èn wi no musu meki sma dwengi wi fu du sani di no bun. Wi musu libi soleki fa Yehovah wani. Wi musu yepi den brada nanga sisa te den de na nowtu èn wi musu gi den pardon efu den du wan hati sani nanga wi. Te wi e du den sani disi, dan wi e tan du san wi leri.