1. Nga vilandile 3 Yoane 3, 4, ni kiki kili kyalengia tunvue nsaansa?

EBA, KUNTI watontonkania nsaansa yaaunvuile Yoane, musita lwaaunvuile nangue baalia baakwasiizie kusambilila kisinka, baali batwaliliile kumubombela Yehova bali bakisinka? Baasaakeene ni maavia engi, kabili Yoane waali waikwinda saana kukoselezia babo Bakristu bakisinka baali wamwene kuya bali baana bakue ba kimupasi. Enka evio, tuli twaunvua nsaansa musita baana betu ba kwivyalila ao ba kimupasi lubali baipeela kuli Yehova ni kutwalilila kumubombela.​—Soma 3 Yoane 3, 4.

2. Juu ya ki Yoane waaleembele mikanda itatu?

² Mu muaka wa 98 Yesu wasyavyelue, paange Yoane waali waikeele peepi ni muzi wa Efeso ao mwenka mu muzi. Ipalile waaile kwikala kooko kisia kufuma mu buloko, mu kilila kya Patmosi. Mu peepi ni ozo musita, mupasi wakue Yehova waamusonseziizie aleembe mikanda itatu. Kikata kya ezio mikanda kyaali kubakinkizia Bakristu basuunge kiketekelo kyabo muli Yesu ni kutwalilila kwenda mu kisinka.

3. Ni biipuzio ki bituli kwasuka?

³ Yoane i mutumua wa mpeleezio waali waasyele wakosele, kabili waali waemeene palua aali ibiipile yaleetelue mu bilonghaano na bakasambilizia ba bufi. * (1 Yoan. 2:18, 19, 26) Babo babisanguka baali balanda nangue bamumanine Leeza, inzi tebaali banakila mafunde akue Yehova. Ale, tumone musoko utunguluilue na mupasi, waaleetele Yoane. Musita utuli mukukita evio, tuli kwasuka biipuzio bitatu: Kwenda mu kisinka kuli na mana ki? Ni biki bili kutwanzia paange kwenda mu kisinka? Kabili kunti twakwasiana siani kusiala mu kisinka?

4. Kukoonkana ni 1 Yoane 2:3-6 ni 2 Yoane 4, 6, tupalile kukita ki eevi twende mu kisinka?

⁴ Eevi kwenda mu kisinka, tupalile kumana kisinka kili mu Bibilia, Mulandu Wakue Leeza. Kabili, tupalile “kunakila mafunde akue [Yehova].” (Soma 1 Yoane 2:3-6; 2 Yoane 4, 6.) Yesu waatusiliile kyakumueneko kipuililikile kya kumunakila Yehova. Pakaako, kukoonka ntanfu yakue Yesu peepi saana kukoonkana ni buviinde, i nzila imo ya mana ya kumunakila Yehova.​—Yoan. 8:29; 1 Pet. 2:21.

5. Tupalile kuya twasininkiziizie ki?

⁵ Eevi tutwalilile kwenda mu kisinka, tupalile kuya twasininkiziizie nangue Yehova ni Leeza wa kisinka, kabili nangue kubalua kintu kyali watubuila kupitila Mulandu wakue, Bibilia, ni kya kisinka. Kabili tupalile kuya twasininkiziizie nangue Yesu i Masia waalailue. Leenu, bantu bengi bali batwisika nangue Yesu asaakuilue kuya wali Likolo wa Bukolo Bwakue Leeza. Yoane waalandile nangue kwakaba kwali bantu “bengi bali bazezyana,” babo bakazeezia baalia basyali baiteaniizie kusakila kisinka palwakue Yehova ni Yesu. (2 Yoan. 7-11, NWT) Yoane waaleembele eevi: “Ale wabufi naani kine te olia ali wakaana nangue Yesu i Kristu?” (1 Yoan. 2:22, NWT) Kusambilila Mulandu Wakue Leeza i nzila imosie ya kulengia te kunti tuzeziiwe. Kinesie twakita evio twakaba kufikiila kumumana Yehova ni Yesu. (Yoan. 17:3) Kabili, kisiasie kukita evio tuli kuviinda kwisininkiziizia nangue tuli ni kisinka.

6. Ni kiki kili kuviinda paange kulengia Bakasininkizia bamisepuka balekele kwenda mu kisinka?

⁶ Bakristu bonse bapalile kuya bakengeele eevi te kunti bazeziiwe na masambilizio a bantu. (1 Yoan. 2:26) I nkile Bakristu bakili bamisepuka. Bapalile kuya bakengeele saana ku ozo muteo. Alexia, * nkazi wa mu kyalo kya Ufaransa, ali na miaka 25, walanda eevi: “Musita unaali nakilisie musepuka, naali naemiiwa saana mu maano na lisambilizio lya kulanda nangue bintu bituli twamona, byaalukileko kupitila kwialulula, ni masambilizio ange a bantu. Nsita inge, naali namona nangue azo masambilizio aweeme. Inzi naamwene nangue te buino kupuulula bintu bilandile Bibilia ni kuzuminasie kila kantu kaali kalanda balimu.” Alexia waasambiliile kitabu Bukose​—Bwaalukileko Siani? Kupitila Kwialulula ao Kubumbua?, kya Kifaransa. Ni kisia nsiku iniini, waalekeele kutwisika. Alexia walanda eevi: “Naaisininkiziizie ne muine nangue mu Bibilia i muli kisinka. Kabili naainikile nangue kwikala  kukoonkana ni Mafunde alimo kuli kumpeela mutende ni nsaansa.”

7. Tupalile kuya twakengeele eevi te kunti tukite ki, kabili juu ya ki?

⁷ Bakristu bonse, bamisepuka ni bakulu, bapalile kuluisia eevi te kunti bekale buikazi bwa bubumbi munda (ao bunafiki). Yoane waalandile nangue tetuviinda kuya twaenda mu kisinka ni wenka olia musita twali ni lwendo lubiipile. (1 Yoan. 1:6) Kine tutonene Yehova atwitabile leenu ni musita uli waiza, tupalile kukita bintu twamwene nangue bilisie palweleele. I kulanda nangue, te kuli lizaambi lifyme paantu kila kintu kituli twakita, Yehova ali wamona.​—Baeb. 4:13.

8. Tupalile kukaana ki?

⁸ Tupalile kukaana kutontonkania kwa bantu ba ku kyalo palua lizaambi. Mutumua Yoane waaleembele eevi: “Kine twalanda nangue tetuli na kibalo [lizaambi], twaibeepa sie fwe bene, kabili mukati mwetu te muli kisinka.” (1 Yoan. 1:8) Mu nsiku yakue Yoane, babisanguka baali balanda nangue muntu kunti wakita lizaambi na bufue ni wenka ozo musita atwalilile kuya wali kibuza wakue Leeza. Leenu twikeele pakati ka bantu bali ni malanga nga azo. Bengi bali balanda nangue bamuzumiine Leeza, inzi tebeezi kwitabila malanga akue Yehova palua lizaambi, i nkile kine ni lizaambi palua kulaalana. Keelia kimwenue na Yehova nangue ni lwendo lubiipile, bali balanda nangue bobo ni busaakuzi bwa muntu, ao nangue ezio ni nzila inge ya buikazi.

9. Bamisepuka kunti banoonkelamo siani kine basiala basimpile mu bintu bibazumiine biswapiile Bibilia?

⁹ Bakristu bakili bamisepuka kunti bamona kyakolele kutwalilila kuya bali ni malanga aweeme palua kulaalana kine basambi nabo ku masomo ao babombi nabo, babapatikizia kukita beelia bikaniizie Bibilia. Keekio kyakitikile kuli Aleksandar. Walanguluka eevi: “Bakaziana bamo ku masomo baaeziizie kumpatikizia ndaale nabo. Baalandile nangue, kine nsikwete ata mukaziana wa kulaala nakue, manake ndinalaala  na balalume nane.” Kine ni weewe wasaakaana ni buezio nga bobo, languluka nangue kine wasyala wasimpile mu bintu byuzumiine biswapiile Bibilia, uli kusuunga mukinzi obe, bukose bobe, mutende obe wa mukati, ni bukibuza bobe pamo ni Yehova. Kabili, kila musita luwaanzia buezio, kyakaba kyaleengele kuli weewe kukita bintu biweeme. Languluka kabili nangue malanga abiipile a bantu ba ku kyako palua kulaalana afumine kuli Sataana. Kansi, kine wakaana kutontonkania nga bantu ba ku kyalo, ‘wamuviinda olia mubi.’​—1 Yoan. 2:14.

10. Lileembo lya 1 Yoane 1:9 lili lyatukwasia siani kumubombela Yehova twali ni kampingu kaswetele?

¹⁰ Tumanine nangue Yehova i ali ni nsambu ya kulanda nangue kukita kintu kampanda ni lizaambi. Kabili tuli twakita maka etu onse eevi te kunti tukite lizaambi. Inzi, kine twakita kilubo, tupalile kulapila kilubo keekio kuli Yehova mu lipepo. (Soma 1 Yoane 1:9.) Kine twakita lizaambi, tuli twaloomba bakote baasaakuilue na Yehova eevi kutwemena, batukwasie. (Yak. 5:14-16) Inzi, te tupalile kwiunvua twatitikiilue na bintu bibiipile bitwakitile musita waapitile. Juu ya ki? Paantu Baba weetu ali ni ntono, waateaniizie ngeleelo ya kilubula mulandu kyakue Muana wakue eevi mazaambi etu eleelue. Musita Yehova lwali walanda nangue ali kweleela bantu bali balapila mazaambi, ni kisinka. Pakaako, te kuli kintu kyakutwanzia kumubombela twali ni kampingu kaswetele.​—1 Yoan. 2:1, 2, 12; 3:19, 20.

11. Kunti twaisuunga siani ku masambilizio ale kuviinda kwinoona kiketekelo kyetu?

¹¹ Tupalile kukaana masambilizio a babisanguka. Kubambila pa musita waatendekele kilonghaano kya Kikristu, Kibanda ali mukubombia bantu bengi bali bazeeziana eevi kulengia babombi bakisinka bakue Leeza batendeke kutwisika. Pakaako, tupalile kumana vya kupusania kisinka ni bufi. * Baluani betu kunti babombia  Enternete ao bitente bya kubuilana mpunda eevi kutulengia tulekele kumuketekela Yehova ni kubatona balupua betu. Languluka nangue Sataana i muine ali wasonsezia mpunda ezio ya bufi, kansi ikaane!​—1 Yoan. 4:1, 6; Nfy. 12:9.

12. Juu ya ki tupalile kulumia kiketekelo kyetu mu bisinka bitwaasambiliile?

¹² Eevi tuviinde kumwanzia Sataana ali waezia kunakia kiketekelo kyetu, tupalile kulumia kiketekelo kyetu muli Yesu ni mu kifulo kyali nakio mu mupaango wakue Leeza. Kabili, tupalile kuswapila nzila imosie ili mukubombia Yehova leenu eevi kutungulula kuteania kwakue. (Mat. 24:45-47) Tuli twalumia kiketekelo kyetu kupitila kusambilila lyonse Mulandu Wakue Leeza. Kinesie twakita evio, kiketekelo kyetu kili kuya kyali nga kimuti kili ni misila isimpile mu bulongo. Paulo waalondoluele kintu kipaleene ni keekio musita lwaaleembeele kilonghaano kya Kolosai. Waalandile eevi: “Kine mumuketekeele Yesu Kristu kuba Mulopue weenu, ikalilile muli weene. Ziike misila yeenu muli weene, kuule bwikazi bwenu bonse pali weene, ni kuba mwasimpiisie kiketekelo kyenu.” (Bakol. 2:6, 7) Te kuli kintu ata kimo kili kukita Sataana ao baalia batunguluilue kuli weene, kili kuviinda kumuzelengania Mukristu alumiizie kiketekelo kyakue muine.​—2 Yoan. 8, 9.

13. Tupalile kuya twamanine ki, kabili juu ya ki?

¹³ Tupalile kuya twamanine nangue kyalo kyakaba kutusuula. (1 Yoan. 3:13) Yoane watulangulusia nangue “kyalo kyonse kiteekelue na olia mubi.” (1 Yoan. 5:19) Paantu mpela ya keeno kyalo yapalama saana, Sataana wakila kusasa. (Nfy. 12:12) Kukila pa kubombia miteo ifyaminiine, nga evelia muteo palua kulaalana ao bufi bwa babisanguka, ali mukubombia ni miteo imwenekelesie paswetele, nga evelia kukyuzia bila nkumbu. Sataana amanine nangue wasialasie ni musita uniini wa kwezia kulekezia miilo yeetu ya kusimikila ao kutiona kiketekelo kyetu. Te kya kupapia kine miilo yeetu imo ao yonse ili mukukaniiwa mu byalo binge. Anzia evio, balupua ni bankazi betu mu bebio byalo bali mukusipikizia. Bali mukulangilila nangue, anzia kine Sataana ao bakwasi bakue bezie kubakitila bantu bakue Yehova bintu bya siani, kunti twaviinda kusiala bakisinka!

14. Kunti twabakwasia balupua ni bankazi betu basiale mu kisinka mu nzila ki imo?

¹⁴ Eevi kukwasia balupua ni bankazi betu kusiala mu kisinka, tupalile kulangilila nkumbu. (1 Yoan. 3:10, 11, 16-18) Tupalile kulangililana ntono apanasie musita bintu lubili buino inzi ni musita wafika maavia. Kwa mufuano, umanine muntu kampanda wakifuilua na mutonua wakue kabili akabiile kukwasiiwa mu nzila ipalile? Ao, bakikubuila nangue balupua ni bankazi kampanda baakizeezelua na bintu byabo bingi musita wa mwela ukata, ntensi ao mvula ikata, kabili nangue bakabiile kukwasiiwa kukuula Masesi a Bukolo ao nganda yabo? Tupalile kulangilila nangue tuli ni ntono ni nkumbu ikata ku balupua ni bankazi betu apanasie kupitila milandu yeetu, inzi kintu kya mana saana, kupitila bikitua.

15. Nga vilandile 1 Yoane 4:7, 8, tupalile kukita ki?

¹⁵ Tuli twamupala Baba weetu wa ntono ali ku muulu musita utuli twalangililana ntono. (Soma 1 Yoane 4:7, 8.) Nzila imo ya kulangilila ntono ni kupitila kweleelana. Kwa mufuano, muntu umo kunti walengia tufiitue, kisia waloomba tumueleele. Tuli twalangilila ntono kupitila kumueleela ni kusuulako kilubo kyakue. (Bakol. 3:13) Lupua umo ali wakuutua Aldo waasaakeene ni bobo buavia. Abanga wamukindikile lupua umo, inzi, ozo lupua waalandile milandu ya kukisia palua bantu ba ntundu yakue Aldo. Aldo walanda eevi: “Naatwaliliile kupepa kuli Yehova eevi ankwasie te kunti ntontonkanie bintu bibiipile  palua ozo lupua.” Inzi, Aldo waakitile ni kinge kintu. Waapinguile kumuloomba lupua aye nakue mu miilo ya kusimikila. Lubaali baya babomba miilo ya kusimikila, Aldo waamulondoluele vyaaiunvuile palua milandu yaalandile ozo lupua. Aldo walanda eevi: “Musita lupua lwaaunvuile nangue naakisikile saana palua milandu yakue, waaloombele mueleele. Kupitilasie lizui lyakue, naainikile nangue waanuunine saana palua milandu yakue. Kisia paapo, twaalukile babibuza baweeme kabili.”

16-17. Tupalile kuya twapinguile kukita ki?

¹⁶ Mutumua Yoane waali wabatonene saana balupua kabili waatonene baye bali ni kiketekelo kyalumine. Ntono yakue ni kubeemena bimwenekelesie paswetele kupitila masoke aabapeele mu mikanda yakue itatu. Kili buino saana kumana nangue balalume ni banakazi bakateeka pamo ni Yesu ku muulu, ni beene bali ni ntono kabili bali baemenana nga Yoane!​—1 Yoan. 2:27.

¹⁷ Tusuunge ku mutima musoko utwalondoluela mu leeli lyasi. Tupingule kansi kwenda mu kisinka twamunakiile Yehova mu byonse bituli twakita. Sambilila Mulandu wakue, kabili uuketekele. Kuula kiketekelo kilumine muli Yesu. Kaana malanga ao masambilizio a bantu ni a babisanguka. Kaana buikazi bwa bubumbi munda kabili te kukita lizaambi. Ikala buikazi bobe kukoonka ni mafunde a pa muulu akue Yehova alandiile palua lwendo. Kabili tubakwasie balupua ni bankazi betu basiale balumine kupitila kubeleela baalia bali batukisia ni kubakwasia baalia bakabiile kukwasiiwa. Kine twakita evio, anzia tusaakaane ni maavia a siani, twakaba kutwalilila kwenda mu kisinka.