NDRIMA NYA GIHEVBULO 30
Simama gu vbanya khu lisine
“Gi mwalo gi nyi tsakisago guvbindra gupwa gupwani sanana sangu si ngu vbanya khu gu landra Iisine.” — 3 JOH. 4.
NDZIMO 54 ‘Eyi khiyo ndziya’
ESI HI NA SI HEVBULAGO AVBA NYA NDRIMA YEYI *
1. Guya khesi si yeyedzidwego omu ga 3 Johane 3, 4, ginani gi hi tsakisago?
NGA dundrugeya khu gutsaka a gu pwidego mupostoli Johane tepo a ngapwa gupwani vale a va phasidego gu hevbula lisine va ngo simama gu thumeya Jehovha khu gutumbega! Va emisanide ni sigaradzo nya singi ganiolu Johane dzi garadzide gasi gu tiyisa gukhodwa gwawe kholu a di gu va wona kha nga sanana saye khu liphuvboni. Khu ndziya nyo fane, anethu hi ngu tsaka tepo hi wonago sanana sathu nyo si velege mwendro ava hi va hevbudzidego lisine na va gu hendzeledza womi wawe ga Jehovha va bwe va simama gu mu thumeya. — Leri 3 Johane 3, 4.
2. Khu mevbi makungo nya malangaliya ma lovidwego khu Johane?
2 Khu 98 E.C., Johane adzina a di gu vbanya Efeso mwendro vbafuvbi ni Efeso. Si nga gira na fulugide aya khala iyoyo hwane nyo duswe khu pasoni, gidwane gya Patimosi. Khiyo tepo yoyo Jehovha a thumisidego liphuvbo laye nya guage gasi gu ninga tshivba Johane nyo love malangaliya mararu. Makungo nya malangaliya yoyo gu diri gu kutsa maKristo nyo tumbege gu simama ni gukhodwa gwawe ga Jesu ni gu vbanya khu lisine.
3. Siwudziso muni hi na si hlamulago?
3 Johane khuye mupostoli nyo hegise a vbanyidego mafuni nigu a di gu garadzega khu gu wona gu khuye vathu va di gu hevbudza malipha libandlani. * (1 Joh. 2:18, 19, 26) Vahevbudzi vovo nya malipha va di gu khavo va ngu muti Nungungulu ganiolu va di si landreyi milayo ya Jehovha. Hongoleni hi ganeya khu wusingalagadzi owu Jehovha a rumidego Johane gasi gu wu lova. Tepo hi na gu ba hi hevbula khu wusingalagadzi wowo, hi na hlamula siwudziso sesi nya siraru: So thula ginani gu vbanya khu lisine? Sigaradzo muni hi tshanganago naso? Nigu hi nga phasana kharini gu simama gu vbanya khu lisine?
SO THULA GINANI GU VBANYA KHU LISINE?
4. Guya khu 1 Johane 2:3-6 ni 2 Johane 4, 6, ginani hi yedego gu gira gasi hi vbanya khu lisine?
4 Gasi gu vbanya khu lisine, hi yede guti lisine li gomogo omu nya Lito la Nungungulu, Bhibhiliya. Hi yede gambe gu “landrisa milayo ya [Jehovha],” si thulago gu mu engisa. (Leri 1 Johane 2:3-6; 2 Johane 4, 6.) Jesu hi vegede giyeyedzo nya gyadi nyo engise Jehovha. Khu kharato, mweyo nya dzindziya nya lisima hi nga engisago khiyo Jehovha khu gu hi landreya gwadi giyeyedzo gya Jesu khavba si kodzegago khavbo. — Joh. 8:29; 1 Ped. 2:21.
5. Ginani hi yedego gu gi khodwa?
5 Gasi hi simama gu vbanya khu lisine, gu vbwetega hi khodwa gu khethu Jehovha khuye Nungungulu nya lisine nigu satshavbo a si ganeyago omu nya Lito laye, Bhibhiliya, lisine. Nigu hi yede gu khodwa gambe gu khethu Jesu khuye Mesiya hi tumbisidwego. Vathu nya vangi muhuno va ngu kanakana gu khavo Jesu todzidwe kha nga Pfhumu nya Mufumo wa Nungungulu. Johane gengedzide gu khuye gu diri ni “vakanganyisi nya vangi,” va nga hadzi pengisa vale va nga ba va tandrega gu emeya lisine maningano ni Jehovha ni Jesu. (2 Joh. 7-11) Johane lovide khuye: “Gasi khu mani muliphi? Khu wule a ganelago khuye Jesu khandruye Kristo.” (1 Joh. 2:22) Gasi hi si pengiswi gu vbwetega hi hevbula Lito la Nungungulu. Ha gu gira isoso khavbo hi na tigo gwadi Jehovha ni Jesu. (Joh. 17:3) Nigu isoso khiso si na hi phasago gu tiyisega gu khethu esi hi si hevbulago lisine.
SIGARADZO MUNI HI TSHANGANAGO NASO?
6. Khu gevbini gigaradzo egi vaphya nya maKristo va tshanganago nagyo?
6 Makristo yatshavbo gu vbwetega ma dzi woneya gasi ma si pengiswi khu dzifilozofiya nya vathu. (1 Joh. 2:26) Vaphya ngudzungudzu gu vbwetega va yiti mhango yeyi. Alexia * wa França, a gu ni 25 myaga, wari khuye: “Tepo nyi nga ba nyi hevbula xikola nyi hevbude khu evholusawu ni simbe sihevbudzo nya vathu. Sihevbudzo soso si nyi giride nyi pheya gu kanakaneya lisine. Khu gu gimbiya nya tepo, nyi di pheya gu wona sihevbudzo soso na si gu pwala. Ganiolu, nyi di vbedza nyi wona gu kheni kha nyi yeli gu dzegeya gu khodwa esi nyi hevbudzwago xikwatuno. Nyi yede gu dundrugeya khesi Jehovha a nga ba a nyi hevbudza.” Alexia a di hevbula libhuku, A Vida — Qual a Sua Origem? A Evolução ou a Criação? Ndrani nya dzisemana dzidugwana basi gukanakana gwaye gwatshavbo gu di vbeya. Uye wari khuye: “Nyi di hevbula nyabune, nyi tiyisega gu kheni esi Bhibhiliya yi si ganeyago lisine. Nyi bwe nyi tugula gu kheni gu vbanya khu milayo nya Bhibhiliya si na nyi ninga gutsaka ni gurula.”
7. Ginani hi yedego gu dzi woneya gwagyo nigu khu ginani?
7 Makristo yatshavbo, gani vaphya gani vakhongolo, gu vbwetega va dzi woneya gasi va si dzi embeyi gu khavo va gu thumeya Jehovha narigu gusihalani vo gira silo nyo vivbe. Johane yeyedzide gu khuye kha si kodzegi gu vbanya khu lisine na hi gira silo nyo vivbe gambe. (1 Joh. 1:6) Ha gu ba hi vbweta gu tsakisa Jehovha, tepo yatshavbo gu vbwetega hi dundruga gu khethu Jehovha a ngu hi wona. Lisine kheli, gumwalo gighoho gi sihadego kholu satshavbo hi girago Jehovha a ngu si wona.— Hebh. 4:13.
8. Ginani hi yedego gu mba gira?
8 Kha hi yeli gu wona gighoho kha nga edzi litigo li gi wonago khidzo. Mupostoli Johane lovide esi: “Ha gu ganela gukhethu hi mwalo gighoho, ha gu dzi kanganyisa ethu vamune wurumba.” (1 Joh. 1:8) Matshiguni ya Johane, vawugeyi va di gu khavo muthu a nga gira silo nyo vivbe a bwe a simama nari pari ya Nungungulu. Muhuno, ho vbanya vbakari nya vathu va pimisago khu ndziya yayimweyo. Nya vangi vari khavo va ngu khodwa ga Nungungulu ganiolu na va gira esi Jehovha a si nyenyago, ngudzungudzu wubhayi. Esi Jehovha a gu khuye si vivbide avo vo si wona kha nga silo esi muthu ni muthu a yedego gu dzi hatheya gu gira.
Vaphya, tiyisani gukhodwa gwanu avba nya esi mu si hevbulago omu nya Bhibhiliya maningano ni esi si gu sadi ni esi si vivbidego gasi mu kodza gu emeya gukhodwa gwanu (Wona ndrimana 9) *
9. Khu ginani si gu sadi gu vaphya va engisa esi Bhibhiliya yi si ganeyago?
9 Vaphya nya maKristo va nga kutsedzedwa khu sihevbuli sikwawe mwendro sithumi sikwawe gu wona wubhayi kha nga gilo gi nga mba vivba. Khiso si giregedego Aleksandar. Wari khuye: “Sagadzyana nyo khaguri xikwatunu si di zama gu nyi kutsedzeya gu hengeya malawu naso. Si di khiso olu nyi gu mwalo namoradha so yeyedza gu khiso nyi gheyi.” Wo emisana ni gilingo nya nga igyogyo, dundruga gu khuwo wo bangeleya avba nya matshina nya milayo nya Bhibhiliya wo dzi vhikeya wabune, u vhikeya womi wago, u khala nu tsakide u bwe u khala pari nya yadi ya Jehovha. Nigu tepo ni tepo u bombago gu gira silo nyo vivbe, u na si kodza gu gira esi nya sadi. Dundruga gu khuwe, mawonelo nya litigo leli maningano ni malawo ma guta khiyo ga Sathane. Khu kharato, tepo u bombago gu si beleya wo ‘pala Sathane.’ — 1 Joh. 2:14.
10. 1 Johane 1:9, a gu hi phasa kharini gu thumeya Jehovha khu livhalo li agidego?
10 Hi ngu dziti gu khethu Jehovha khuye a yedego gu hi embeya esi si vivbidego ni esi si gu sadi. Nigu hi ngu dzi garadza gasi hi si giri gighoho. Ganiolu, ho tshuka hi ghoha, hi yede gu dawuleya sighoho sathu ga Jehovha khu nombelo. (Leri 1 Johane 1:9.) Nigu ho tshuka hi gira gighoho nya gikhongolo, gu vbwetega hi lomba giphaso ga madhota ma emisidwego khu Jehovha gasi gu hi khathaleya. (Jak. 5:14-16) Ambari ulolo, kha hi yeli gu khaleya gu dzipwa nandru khu kotani nya sighoho hi giridego gale. Khu ginani? Kholu Papayi wathu nya lihaladzo a hi ningide dzegiso wa Gyanana gyaye gasi hi kodza gu divaledwa sighoho sathu. Tepo Jehovha a ganeyago gu khuye a na divaleya vale va dzi layago o ganeya lisine. Khu kharato, hi mwalo gighelo nya gu hi si thumeyi Jehovha khu livhalo li agidego. — 1 Joh. 2:1, 2, 12; 3:19, 20.
11. Hi nga vhikeya kharini mapimo yathu ga sihevbudzo si songago gukhodwa gwathu?
11 Gu vbwetega hi si dzumeyi sihevbudzo sa vawugeyi. Gukhugeya tepo li nga emiswa khiyo libandla nyo pheye, Sathane o thumisa silo nya singi gasi gu yala gukanakana mapimoni nya sithumi sa Nungungulu. Khu gighelo gyogyo, gu vbwetega hi si kodza gu hambanisa lisine la Nungungulu ni malipha ya Sathane. * Valala vathu va nga thumisa interneti mwendro dzisayiti nya mabhulo gasi gu songa wupari wathu ni Jehovha ni lihaladzo lathu khu vandriyathu. Dundruga gu khuwe Sathane khuye a vhuvhumisago silo soso, khu kharato, si potse. — 1 Joh. 4:1, 6; Gutu. 12:9.
12. Khu ginani hi yedego gu tiyisa gukhodwa gwathu avba nya lisine hi li hevbudego?
12 Gasi hi kodza gu timiseya silingo sa Sathane, gu vbwetega hi engedzeya gutumba gwathu avbo ga Jesu ni thumo waye avba nya makungo ya Nungungulu. Hi yede gambe gu tumba ndziya eyi Jehovha a yi thumisago gasi gu hi ninga guhodza nya liphuvbo muhuno. (Mat. 24:45-47) Ndziya nyo engedzeye gutumba gwathu ga Nungungulu khu gu leri Bhibhiliya tshigu ni tshigu. Khavbovbo, gukhodwa gwathu gu na fana ni simbo wu tsitsidego gwadi mikhamba. Pawulo ganede silo nya nga isoso tepo a nga loveya lidangaliya libandla la vaKolosi. A di khuye: “Kha nga olu mu hakhidego Pfhumu Jesu Kristo, gu vbwetega mu vbanya khu gupwanana naye, mu tsitsa gwadi mikhamba, mu tiyiswa gukhodwani.” (Kol. 2:6, 7) Ho dzi garadzeya gu tiyisa gukhodwa gwathu kha si na nga kodzega gu Sathane ni vaphasedzeyi vaye va hi ndreyisa ndziyani ya Nungungulu. — 2 Joh. 8, 9.
13. Ginani egi hi gi vireyago nigu khu ginani?
13 Hi virede gu nyenywa khu litigo leli. (1 Joh. 3:13) Johane a ngu hi dundrugisa gu khuye “litigo latshavbo lomo vbavbatshi nya tshivba ya Sathane.” (1 Joh. 5:19) Kha nga olu litigo leli la Sathane li yago li hidzimeya mahegiso, Sathane a guya a kukuteya. (Gutu. 12:12) Uye kha thumisi dzindziya nyo sihale basi gasi gu hi pengisa nya nga wubhayi ni malipha ya vawugeyi. Uye a gu thumisa gambe silo nyo wonege nya nga gu hi tshanisa. A ngu dziti gu khuye tepo yi mu tshaledego gasi gu hi pengisa ni gu hi digisa gu tshumayela yidugwana. Khu kharato, kha si hi samadzisi tepo hi wonago thumo wathu na wu gu himbedzedwa mayigoni nya mangi. Ambari ulolo, vandriyathu va gomogo mayigoni momo va ngu simama gu timiseya. Avo vo yeyedza gu khavo ambari Sathane o gira ginani, gima kha va na nga diga gu tumbega ga Jehovha!
PHASANANI GU SIMAMA LISINENI
14. Khu yevbi mweyo nya dzindziya hi nga phasago khiyo vandriyathu gu vbanya khu lisine?
14 Gasi gu phasa vandriyathu gu simama gu vbanya khu lisine gu vbwetega hi va yeyedza pweya-wusiwana. (1 Joh. 3:10, 11, 16-18) Hi yede gu haladzana khu gyathu ambari tepo silo si garadzago. Khu giyeyedzo, ina u nguti muthu nyo khaguri a fedwego khu muthu a mu haladzago a vbwetago giphaso ni gu thaveledwa? Mwendro u di ngapwa gupwani vandriyathu wulangawo va dugeledwe khu mhango nya tumbunugo nigu gu vbwetega gu vbahedzwa dziSalawu nya Mufumo ni dzindranga dzawe? Hi nga yeyedza gukhathala ni pweya-wusiwana khu vandriyathu vovo nasiri khu malito basi ganiolu khu mithumo gambe.
15. Kha nga si lovidwego omu ga 1 Johane 4:7, 8, ginani hi yedego gu gira?
15 Ha gu yeyedzana lihaladzo ho pimedzeya Papayi wathu nya lihaladzo wa ndzadzini. (Leri 1 Johane 4:7, 8.) Ndziya nya lisima nyo yeyedze khiyo lihaladzo khu gu hi divaleyana. Khu giyeyedzo, muthu nyo khaguri a nga hi gireya gilo nyo vivbe ganiolu a vbedza a lomba divalelo. Hi nga yeyedza lihaladzo khu gu hi mu divaleya hi bwe hi si divala. (Kol. 3:13) Ndriyathu nyo khaguri nyo pwani khu Aldo, tshanganide ni gilingo nya nga egi. A dipwa ndriyathu a nga ba a ningwa ngudzu githawo na gu ganeya guvivba khu vathu nya lifumbo laye. Aldo wari khuye: “Nyi di gu gombeya ngudzu gasi Jehovha a nyi phasa gu mba pimisa guvivba khu ndriyathu wule.” Ganiolu Aldo kha hegeya gu gira nombelo basi. A di hunga gu hongola thumoni nyo tshumayele ni ndriyathu wule. Tepo va nga ba va thuma gumogo, Aldo a di tshamuseya edzi si nga ba si mu khuhide khidzo esi si ganedwego khu ndriyathu wule. Wari khuye: “Tepo ndriyathu wule a ngapwa edzi nyi khuhidwego khidzo khesi a ganedego a di lomba divalelo. Khu lito laye basi ni esi a ganedego nyi kodzide gu wona edzi a nga ba dzi layide khidzo khesi a nga ganeya. Hi di khala dzipari, hi dzega gigaradzo hi futeya.”
16-17. Ginani hi yedego gu dzi emiseya gu gira?
16 Mupostoli Johane a di gu va haladza ngudzu vandriyathu nigu a di gu vbweta gu khuye va manega ni gukhodwa nyo tiye. Nigu lihaladzo lolo li ngu wonega avba nya wusingalagadzi a va ningidego avba nya malangaliya yale nya mararu. Si ngu tsakisa guti gu khethu vama ni vanyamayi va na fumago ni Jesu ndzadzini va ni lihaladzo kha nga Johane. — 1 Joh. 2:27.
17 Gima hi nga divali esi hi si hevbudego avba nya ndrima yeyi. Hongoleni hi dzi emiseyani gu vbanya khu lisine, hi engisa Jehovha ga satshavbo womini wathu. Hevbula Lito laye u bwe u li tumba. Manega ni gukhodwa nyo tiye khu Jesu. U nga dzumeyi sihevbudzo nya dzifilozofiya nya vathu ni vawugeyi. Dzi woneye gu ganeya gu khuwe wo thumeya Jehovha ganiolu na wu gira silo nyo vivbe nigu u nga ningi ndzeve vale va gu kutsedzeyago gu gira silo nyo vivbe. Vbanya khu milayo nyo khugege ya Jehovha. Hongoleni hi phasa vandriyathu gu tiyisa gukhodwa gwawe khu gu divaleya ava va hi hoseyago hi bwe hi phasa vale va vbwetago giphaso. Ho gira isoso, ambari ho emisana ni sigaradzo muni hi na simama gu vbanya khu lisine.
NDZIMO 49 Tsakisa monyo wa Jehovha
^ ndri. 5 Ho vbanya omu nya litigo li fumedwago khu papayi nya malipha, Sathane. Khu kharato, si ngu garadza gu vbanya khu lisine. Makristo ma vbanyidego guvbeyani nya lizana-myaga nyo pheye E.C. va tshanganide ni sigaradzo nyo fane. Jehovha thumiside mupostoli Johane gu lova malangaliya mararu ma nga hadzi phasa maKristo yaya gumogo ni ethu muhuno. Malangaliya yoyo ma na hi phasa gu tugula sigaradzo hi emisanago naso ni ndziya nyo si pale khiyo.
^ ndri. 3 Wona kwadru “ Esi si ganedwago khu malangaliya ya Johane.”
^ ndri. 6 Mambe malina ma vbindrugedzidwe.
^ ndri. 11 Wona ndrima nya gihevbulo “Ina u ngu siti satshavbo si pategago?” omu nya Mukhedziseyi nya Agosto nya 2018.
^ ndri. 59 TSHAMUSELO NYA DZIFOTO: Na giri xikwatunu, gyagadzyana gimwegyo gyo wona silo si seketeyago guhaladzana nya vathu nya sivbango nya wuvelegi nyo fane. (Ga mayigo nyo khaguri, dzikori nya nga edzi dzi wonegago avba nya foto yeyi dzo emeya guhaladzana nya vathu nya sivbango nya wuvelegi nyo fane.) Khu hwane, a gira wugevisisi gasi gu tiyisa gukhodwa gwaye kha nga muKristo. Isoso sa gu mu phasa gu mba gira silo nyo vivbe.
