1. Hi ku ya hi 3 Yohane 3, 4, i yini lexi endlaka hi tsaka?

 EHLEKETA ndlela leyi muapostola Yohane a tsake hayona loko a twa leswaku vanhu lava a va dyondziseke ntiyiso va ha tirhela Yehovha hi ku tshembeka. A va langutane ni mitlhontlo yo tala naswona Yohane u tirhe hi matimba leswaku a tiyisa ripfumelo ra Vakreste volavo vo tshembeka lava a a va teka tanihi vana vakwe. Hilaha ku fanaka, na hina ha tsaka loko vana va hina kumbe vanhu lava hi va dyondziseke ntiyiso, va tinyiketela eka Yehovha va tlhela va ya emahlweni va n’wi tirhela.—Hlaya 3 Yohane 3, 4.

2. A ku ri xihi xikongomelo xa mapapila lama tsariweke hi Yohane?

² Hi lembe ra 98 C.E., swi nga endleka Yohane a a tshama eEfesa kumbe ekusuhi na kona. Kumbexana u rhurhele kona endzhaku ka loko a ntshunxiwile exihlaleni xa Patmosi. Hi nkarhi wolowo, Yehovha u n’wi huhutele ku tsala mapapila manharhu. Xikongomelo xa mapapila wolawo, a ku ri ku tiyisa Vakreste vo tshembeka leswaku va tshama va tshembekile ni ku hambeta va famba entiyisweni.

3. Hi swihi swivutiso leswi hi nga ta swi hlamula?

³ Eka vaapostola hinkwavo, Yohane hi yena wo hetelela ku hanya naswona a karhateka hi nkucetelo wo biha lowu vadyondzisi va mavunwa a va ri na wona evandlheni. * (1 Yoh. 2:18, 19, 26) Vagwinehi volavo a va vula leswaku va tiva Xikwembu kambe a va nga yi yingisi milawu ya Yehovha. A hi kambisiseni xitsundzuxo lexi Yohane a xi tsaleke. Loko hi ri karhi hi endla tano, hi ta  hlamula swivutiso swinharhu leswi nge: Swi vula yini ku famba entiyisweni? Hi yihi mitlhontlho leyi hi langutanaka na yona? Naswona hi nga pfunana njhani leswaku hi hambeta hi famba entiyisweni?

4. Hi ku ya hi 1 Yohane 2:3-6, na 2 Yohane 4, 6, hi fanele hi endla yini leswaku hi kota ku famba entiyisweni?

⁴ Leswaku hi kota ku famba entiyisweni, hi fanele hi tiva ntiyiso lowu nga eRitweni ra Xikwembu, ku nga Bibele. Ku engetela kwalaho, hi fanele hi hlayisa “swileriso swa [Yehovha],” leswi vulaka leswaku hi fanele hi swi yingisa. (Hlaya 1 Yohane 2:3-6; 2 Yohane 4; 6.) Yesu u hi vekele xikombiso lexinene loko swi ta emhakeni yo yingisa Yehovha. Ndlela ya nkoka leyi hi nga swi kombisaka hayona leswaku hi yingisa Yehovha, i ku landzelerisisa mikondzo ya Yesu hilaha hi nga kotaka hakona.—Yoh. 8:29; 1 Pet. 2:21.

5. I yini lexi hi faneleke hi khorwiseka ha xona?

⁵ Leswaku hi hambeta hi famba entiyisweni, hi fanele hi kholwa leswaku Yehovha i Xikwembu xa ntiyiso nileswaku hinkwaswo leswi a hi byelaka swona eRitweni rakwe, ku nga Bibele, i ntiyiso. Nakambe, hi fanele hi kholwa leswaku Yesu i Mesiya loyi a tshembisiweke. Vanhu vo tala namuntlha a va kholwi leswaku Yesu u totiwile tanihi Hosi ya Mfumo wa Xikwembu. Yohane u lemukise vanhu leswaku ku ta va ni “vaxisi vo tala,” lava nga ta hambukisa lava nga swi lunghekelangiki ku yimela ntiyiso mayelana na Yehovha na Yesu. (2 Yoh. 7-11) U te: “Muhembi i mani loko ku nga ri loyi a landzulaka leswaku Yesu i Kreste?” (1 Yoh. 2:22) Lexi nga ta hi pfuna leswaku hi nga hambukisiwi, i ku tinyika nkarhi wo dyondza Rito ra Xikwembu. Sweswo hi swona leswi nga hi pfuna hi tiva Yehovha na Yesu. (Yoh. 17:3) Nakambe, hi swona swi nga ta endla hi kholwa leswaku hi kume ntiyiso.

6. Hi wihi ntlhontlho lowu Vakreste lava ha riki vantshwa va langutanaka na wona?

⁶ Vakreste hinkwavo va fanele va tivonela leswaku va nga hambukisiwi hi filosofi ya vanhu. (1 Yoh. 2:26) Ngopfungopfu Vakreste lava ha riki vantshwa, hi vona lava faneleke va tivonela eka ntlhamu lowu. Makwerhu wa xisati Alexia, * wa le Furwa naswona a nga ni malembe ya 25, u ri: “Loko ndza ha ri ntsongo, dyondzo ya ku tiendlekela ka swilo ni filosofi, a swi ndzi pfilunganya miehleketo. Mikarhi yin’wana tidyondzo teto a ndzi ti teka ti twisiseka. Kambe  ndzi swi xiyile leswaku ndzi ta va ndzi endla xihoxo loko ndzi honisa leswi Yehovha a hi dyondzisaka swona kutani ndzi kholwa leswi a ndzi swi dyondza exikolweni.” Alexia u tinyike nkarhi wo dyondza buku leyi nge Life—How Did It Get Here? By Evolution or by Creation? Endzhaku ka mavhiki ma nga ri mangani, ku kanakana ka yena ku herile. U ri: “Ndzi khorwisekile leswaku leswi Bibele yi swi vulaka i ntiyiso. Nakambe, ndzi swi xiyile leswaku loko ndzo hanya hi milawu ya yona, ndzi ta tiphina hi vutomi.”

7. Hi fanele hi papalata yini naswona hikwalahokayini?

⁷ Vakreste hinkwavo, ku nga khathariseki malembe ya vona, va fanele va papalata ku hanya vutomi bya mikoka yimbirhi. Yohane u vule leswaku a hi nge swi koti ku famba entiyisweni loko hi hala tlhelo hi tikhoma ku biha. (1 Yoh. 1:6) Loko hi lava ku amukeleka eka Xikwembu namuntlha ni le nkarhini lowu taka, hi fanele hi tikhoma hi ndlela leyi kombisaka leswaku swilo hinkwaswo leswi hi swi endlaka swi lo tlangandlaa, erivaleni. A ku na xidyoho lexi hi nga xi endlaka exihundleni lexi Yehovha a nga taka a nga xi voni.—Hev. 4:13.

8. I yini leswi hi faneleke hi swi papalata?

⁸ Hi fanele hi papalata ndlela leyi vanhu va misava leyi va xi langutaka hayona xidyoho. Muapostola Yohane u te: “Loko hi ku: ‘A hi na xidyoho,’ ha tixisa.” (1 Yoh. 1:8) Enkarhini wa Yohane, vagwinehi a va vula leswaku munhu a nga endla xidyoho kambe a tama a ri ni vuxaka lebyinene ni Xikwembu. Ninamuntlha, hi hanya ni vanhu lava nga ni langutelo ro tano. Vanhu vo tala va vula leswaku va gandzela Xikwembu kambe a va na mhaka ni ndlela leyi Yehovha a langutaka xidyoho hayona, ngopfungopfu loko xidyoho xexo xi fambisana ni timhaka ta masangu. Swilo leswi nga xidyoho eka Yehovha vona a va swi teki ku ri xidyoho, va vula leswaku munhu a nga tihlawulela ndlela yin’wana ni yin’wana leyi a lavaka ku hanya hayona.

9. Vantshwa va vuyeriwa njhani loko va titshega hi ntiyiso lowu va wu dyondzeke eBibeleni?

 ⁹ Vakreste lava ha riki vantshwa va nga tikuma va ngheniwe hi langutelo leri hoxeke ra vadyondzikulobye kumbe vatirhikulobye loko swi ta etimhakeni ta masangu. Aleksandar u tshame a langutana ni xiyimo lexi fanaka. U ri: “Tintombhi tin’wana exikolweni a ti ndzi sindzisa ku etlela na tona. A ti vula leswaku leswi ndzi nga riki na ntombhi, ndzi gay.” Loko ku ri leswaku na wena u langutana ni miringo leyi fanaka, swi tive leswaku loko u titshega hi ntiyiso lowu u wu dyondzeke eBibeleni, u sirhelela xindzhuti xa wena, rihanyo ni vuxaka bya wena na Yehovha. Loko u hlula ndzingo lowu u langutanaka na wona, swi ta ku olovela ku endla swilo leswinene. Tsundzuka, ndlela yo biha leyi vanhu va langutaka timhaka ta masangu hayona, yi huma eka Sathana. Hikwalaho, loko u yima u tiyile loko u langutana ni ndzingo, u “[hlula] lowo homboloka.”—1 Yoh. 2:14.

10. Yohane wo sungula 1:9, yi hi pfuna njhani leswaku hi kota ku tirhela Yehovha hi ripfalo leri baseke?

¹⁰ Ha swi tiva leswaku Yehovha hi yena loyi a nga ni mfanelo yo vula leswaku hi swihi swilo leswi nga xidyoho. Hikwalaho, hi tikarhatela ku papalata ku endla xidyoho. Kambe loko ho tshuka hi dyohile, hi khongela eka Yehovha hi n’wi byela hi ta xidyoho xexo. (Hlaya 1 Yohane 1:9.) Loko hi endle xidyoho lexikulu, hi kombela ku pfuniwa eka vakulu lava Yehovha a va hlawuleke leswaku va hi khathalela. (Yak. 5:14-16) Hambiswiritano, a hi fanelanga hi tshamela ku titwa nandzu hikwalaho ka swihoxo leswi hi tshameke hi swi endla. Hikwalahokayini? Hikuva Tata wa hina wa rirhandzu u nyikele hi gandzelo ra nkutsulo ra N’wana wakwe leswaku hi ta rivaleriwa swidyoho. Loko Yehovha a vula leswaku u ta rivalela vadyohi lava hundzukaka, u va a tiyisile. Hikwalaho, a ku na nchumu ni wun’we lowu nga hi sivelaka ku tirhela Yehovha hi ripfalo leri baseke.—1 Yoh. 2:1, 2, 12; 3:19, 20.

11. Hi nga tisirhelela njhani eka tidyondzo leti nga tsanisaka ripfumelo ra hina?

 ¹¹ Hi fanele hi papalata tidyondzo ta vagwinehi. Ku sukela loko ku ta va ku simekiwe vandlha ra Vukreste, Diyavulosi u karhi u tirhisa vaxisi leswaku va kanganyisa malandza yo tshembeka ya Xikwembu. Hikwalaho, hi fanele hi tiva ku hambanisa ntiyiso ni mavunwa. * Valala va hina va nga tirhisa Inthanete kumbe social media leswaku va hi endla hi nga n’wi tshembi Yehovha swin’we ni vamakwerhu. Papalata mavunwa wolawo tanihi leswi u swi tivaka leswaku ma huma eka mani!—1 Yoh. 4:1, 6; Nhlav. 12:9.

12. Hikwalahokayini hi fanele hi tlangela ntiyiso lowu hi wu dyondzeke?

¹² Leswaku hi hlula mitlhamu ya Sathana, hi fanele hi tshemba Yesu ni ku tiva ndlela leyi a hoxaka xandla hayona eka xikongomelo xa Xikwembu. Hi fanele hi tlhela hi tshemba nhlangano lowu Yehovha a wu tirhisaka namuntlha. (Mat. 24:45-47) Hi ta kota ku endla sweswo, loko hi tinyika nkarhi wo dyondza Rito ra Xikwembu nkarhi ni nkarhi. Loko hi endla tano, ripfumelo ra hina ri ta tiya ku fana ni nsinya lowu dzimeke timitsu emisaveni leyi tiyeke. Pawulo u vulavule hi mhaka leyi fanaka, loko a tsalela vandlha ra le Kolosa. U te: “Tanihi leswi mi amukeleke Kreste Yesu, Hosi, hambetani mi famba evun’weni na yena, mi dzima timitsu ni ku akiwa eka yena ni ku tiyisiwa eripfumelweni. (Kol. 2:6, 7) A xi kona lexi Sathana kumbe vanhu lava kuceteriwaka hi yena va nga xi endlaka, lexi nga tsanisaka ripfumelo ra Mukreste loyi a weke a pfuka leswaku a tiyisa ripfumelo rakwe.—2 Yoh. 8, 9.

13. I yini leswi hi faneleke hi swi langutela naswona hikwalahokayini?

¹³ Hi fanele hi langutela ku vengiwa hi vanhu va misava leyi. (1 Yoh. 3:13) Loko Yohane a hi tsundzuxa u ri: “Misava hinkwayo yi le hansi ka matimba ya lowo homboloka.” (1 Yoh. 5:19) Leswi makumu ya misava leyi ma nga kwala nyongeni, Sathana u dye makala ku tlula rini na rini. (Nhlav. 12:12) A nga hi hlaseli hi tindlela leti tumbeleke ntsena, to tanihi ku tikhoma ko biha hi swa masangu kumbe hi mavunwa ya vagwinehi. U tlhela a hi hlasela hi ku kongoma, hi ku endla leswaku hi khomiwa hi ndlela ya tihanyi. Wa swi tiva leswaku u saleriwe hi nkarhi wutsongo wo sivela ntirho wo chumayela ni ku tsanisa ripfumelo ra hina. A swi hlamarisi leswi ntirho wa hina wu yirisiweke ematikweni yo tala. Hambiswiritano, vamakwerhu lava nga ematikweni wolawo va ya emahlweni va tiyisela. Va tiyisekisa leswaku hambiloko lowo homboloka a hi hlasela hi miringo yo hambanahambana, hi ta hlula!

14. Hi nga va pfuna njhani vamakwerhu leswaku va tshama entiyisweni?

¹⁴ Leswaku hi pfuna vamakwerhu va tshama entiyisweni, hi fanele hi va komba ntsetselelo. (1 Yoh. 3:10, 11, 16-18) Hi fanele hi rhandzana, ku nga ri loko swilo swi famba kahle ntsena kambe ni loko xiyimo xi tika. Hi xikombiso, xana u tiva makwerhu wo karhi loyi a loveriweke naswona a lavaka ku chaveleriwa kumbe ku pfuniwa hi swin’wana? Kumbexana u tiva vamakwerhu vo karhi lava hlaseriweke hi mhangu ya ntumbuluko naswona va lavaka ku pfuniwa leswaku va pfuxeta Holo ya vona ya Vugandzeri kumbe makaya ya vona? Hi kombisa vamakwerhu leswaku ha va rhandza ni ku va twela hi swiendlo, ku nga ri hi marito ntsena.

15. Hi ku ya hi 1 Yohane 4:7, 8, i yini leswi hi faneleke hi swi endla?

¹⁵ Loko hi rhandzana, hi kombisa leswaku hi tekelela Tata wa hina wa rirhandzu wa le tilweni. (Hlaya 1 Yohane 4:7, 8.) Ndlela yin’wana ya nkoka leyi hi swi kombisaka hayona leswaku  ha rhandzana, i ku rivalelana. Hi xikombiso, munhu un’wana a nga hi twisa ku vava kutani a kombela ku rivaleriwa. Loko hi n’wi rivalela hi tlhela hi rivala hi xihoxo lexi a xi endleke, hi kombisa leswaku ha n’wi rhandza. (Kol. 3:13) Makwerhu Aldo, u tshame a langutana ni xiyimo xo fana ni lexi, endzhaku ka loko makwerhu un’wana loyi a n’wi xixima ngopfu, a vulavule ku biha hi rixaka ra ka vona. Aldo u ri: “A ndzi tshamela ku khongela eka Yehovha leswaku a ndzi pfuna ndzi va ni langutelo lerinene hi makwerhu loyi.” Aldo u endle matshalatshala. U kombele makwerhu yoloye leswaku va famba swin’we ensin’wini. Loko va ri karhi va tirha nsimu, Aldo u byele makwerhu yoloye ndlela leyi a titweke hayona hi leswi a swi vuleke. Aldo u ri: “Loko makwerhu yoloye a twa ndlela leyi ndzi titweke hayona, u kombele ku khomeriwa. Ndlela leyi a vulavula hayona a yi tikomba leswaku wa tisola hakunene. Hi ye emahlweni ni vunghana bya hina kutani hi rivala hi mhaka yoleyo.”

16-17. Hi fanele hi tiyimisela ku endla yini?

¹⁶ Muapostola Yohane a a karhateka ngopfu hi vuxaka bya vamakwavo na Yehovha, sweswo swi vonake kahle eka xitsundzuxo lexi a va tsaleleke xona eka mapapila yakwe manharhu lama huhuteriweke. Mayana ku tsakisa ka swona ku tiva leswaku vavanuna ni vavasati lava nga ni rirhandzu ku fana na yena, va totiwile leswaku va ya fuma na Kreste!—1 Yoh. 2:27.

¹⁷ Onge hi nga xi tekela enhlokweni xitsundzuxo lexi hi buleke ha xona! A hi tiyimiseleni ku hambeta hi famba entiyisweni, hi yingisa Yehovha eka swilo hinkwaswo. Dyondza Rito rakwe naswona u n’wi tshemba hi ku helela. Vana ni ripfumelo leri tiyeke eka Yesu. Papalata filosofi ya vanhu ni tidyondzo ta vagwinehi. Papalata ku hanya vutomi bya mikoka yimbirhi ni ku endla xidyoho. Hanya hi milawu leyi tlakukeke ya Yehovha. Nakambe, a hi pfuneni vamakwerhu leswaku va tshama va ri ni ripfumelo leri tiyeke hi ku va rivalela loko va hi twise ku vava, hi tlhela hi pfuna lava lavaka ku pfuniwa. Loko hi endla tano, hi ta hambeta hi famba entiyisweni hambiloko hi langutana ni mitlhontlho.