1. Eska na uandajka 3 Juanu 3, 4, ¿ambe úsïni eskachi kánikua sési pʼikuarheraaka?

¿ÚSÏNCHI eranhaskani na enga xáni tsípini japka apostuli Juanu enga kurhaapka eskaksï ima kristianuecha enga ima jarhuataapka míteni jurhimbikuani, útasïksï Jeobani marhuakuxapka? Juanu ísï exeasïrendi ini ambakiti kristianuechani komu imeri uájpecha. Jimbokaksï uánikua uandanhiatechani jatsiaspka, apostuli kánikua jánguarhintaspti para imecheri jakajkukuani uinhaperantani. Juchajtuchi kánikua sési pʼikuarherasïnga engaksï juchari sapiicha o imecha engachi jorhendaaka Bibliaeri ambe, niárajka aiakukuarheni Jeobani ka seguirinksï jarhani marhuakuni (arhinta je 3 Juanu 3, 4).

2. ¿Andisï Juanu karaapi imani tanimu kartechani?

² Uéxurhini 98, jamberi Juanu, Efesu irekani japti o jima no iauanisï. Jamberi jima mótsepti enga na uéntapkia kárselirhu enga Patmosi anapu islarhu japka. Jiánisï, Jeobaeri espiritu santu úspti eska tanimu kartechani karaapiringa. Karaaspti imani kartechani para úni eskaksï ima ambakiti kristianuecha no méni jurajkupiringa jakajkuni Jesusini ka paraksï seguirini jurhimbikuarhu jarhani.

3. ¿Náki tanimu kurhamarhikuechanchi mókuantaua ini jorhenguarhikua jimbo?

³ Jiánisï, Juanuterkusï irekani japtia komu apostuli ka uandanhiaxapti jimbokaksï kúnguarhikuarhu jarhaspka no jurhimbiti jorhentpiricha engaksï támisï jánhastaani japka máteruechani (1 Juanu 2:18, 19, 26). * Íksï apostatecha uandasïrendi eskaksï mítespka Tata Diosïni, peruksï no úsïrendi ambe enga ima juramuenga. Ini jorhenguarhikua jimbo, exeakachi ambe enga Juanu uandapka ka mókuantauakachi tanimu kurhamarhikuechani: ambe arhikuekasïni jurhimbikuarhu jámani, náki uandanhiatechanchi niárasïni jatsiani ka nénachi uá iáminduecha jarhuajperani parachi méntkisï jurhimbikuarhu jarhani.

4. Eska na arhijka 1 Juanu 2:3-6 ka 2 Juanu 4, 6, ¿ambechi jatsiski para úni parachi méntkisï jurhimbikuarhu jarhani?

⁴ Para méntkisï jurhimbikuarhu jarhani, orhetachi jatsiska para míteni jurhimbikueri ambe enga Tata Diosïri Karakata jorhentpijka enga jindeka Biblia. Ístu, jatsiskachi para úni ambe engajtsïni Jeoba juramuchijka (arhinta je 1 Juanu 2:3-6; 2 Juanu 4, 6). Jesusijtsïni ambakiti ejemplu xarhatachesti. Ísï jimbo, parachi úni ambe enga Jeoba uandajka, jatsiskachi para jánguarhintani Jesusini terukukuntani iámindu ambe jimbo (Juanu 8:29; 1 Ped. 2:21).

5. ¿Amberichi jatsiski para seguru jarhani?

⁵ Parachi no méni jurajkuni jurhimbikuani, jatsiskachi para seguru jarhani eska Jeoba jindeska Tata Diosï enga méntkisï jurhimbitku ambe uandajka, ka ísï jimbo, iámindu ambe engajtsïni imeri Karakata jimbo arhijka, jurhimbitkuesti. Ístuchi jatsiska para seguru jarhani eska Jesusi jindeska Mesiasi enga aiatspinhapka. Ini jurhiatikuecha jimbo, uánikuechaksï no jakajkusïndi eska Jesusi erakunhaska para Reini Tata Diosïri Reinurhu. Juanu uandaspti eskaksï japiringa uánikuecha engaksï támisï jánhastaapiringa imechani engaksï no seguru japiringa ambe enga jurhimbitkueka Jeobaeri ka Jesusiri ambe (2 Juanu 7-11). Juanu karaspti: “Jimajkani, ¿né jindeski chkuanderari? ¿No jindeski ima enga uandajka eska Jesusi no jindeska Diosïri míndakata?” (1 Juanu 2:22). Parachi no jurajkuni eskajtsïni támisï jánhastaaka, jatsiskachi para arhintani Tata Diosïri Karakatani. Solu ísïchi uáka sési míteni Jeobani ka Jesusini (Juanu 17:3). Ka ísïchi niáraaka seguru jarhani eskachi míteska ambe enga jurhimbitkueka.

6. ¿Ambeksï niárasïni nitamakuarhini uátsïcha ka tumbiicha engaksï Jeobani marhuakujka?

⁶ Iáminduechachi jatsiska para jingontku jámani parajtsïni no támisï jánhastani ambe engaksï kʼuiripuecha jorhentpijka (1 Juanu 2:26). Uátsïcha ka tumbiichaksï jatsisti para sánderu jingontku jámani ini ambe jingoni. Alexia, * Francia anapu pirenchi ma enga 25 jatirika, uandasïndi: “Engani eskuela nirenga, jorhenguarhispka eska kʼuiripuni no nema kueraaska ka ístu máteru ambe engaksï kʼuiripuecha jorhentpijka. I ambe úspti eskani nóteru segura japiringuia eska ísïska ambe enga Biblia jorhentpijka. Ménisï niáraspka tsitini ambe engani eskuelarhu jorhenguarhienga. Peruni eratsespka eska no sési japiringa jurajkuni ambe enga Biblia jorhentpijka ka jakajkuni iámindu ambe engajtsïni eskuelarhu jorhendenga”. Alexia arhintaspti libruni La vida... ¿cómo se presentó aquí? ¿Por evolución, o por creación? Máru  semanecha jimbojku, niáraspti segura jarhani ambe enga jakajkuenga. Ima uandasïndi: “Niáraspka ji mismuni exeni eska Biblia jurhimbikua ambe jorhentpisïnga. Ka exespka eska úni ambe enga jimini uandajka, úpiringa eskani tsípikua jingoni irekapiringa ka pínandikua jingoni”.

7. ¿Ambechi no jatsiski para úni ka andi?

⁷ Kʼératicha o sapirhaticha, iáminduechachi jatsiska para jingontku jámani parachi no tsimani ambe úni jarhani: Jeobani marhuakuni ka ístu no sési ambe úni jarhani. Juanu ini ambe arhikuekaxapti enga uandapka eskachi no uáka jurhimbikuarhu jarhani ka ístu ísku jándikua ambe niátani jarhani (1 Juanu 1:6). Engachi uéjka eskajtsïni Tata Diosï jaiapanhintaaka iásï ka para sánderu orhepani, jatsiskachi para méntkisï ísï jámani enajkijtsïni iáminduecha exeni jarhajki ambe engachi újka. No ma kʼamanharhintskua úsïndi jískakata jarhani, jimboka Jeoba iámindu ambe exesïnga (Ebr. 4:13).

8. ¿Ambechi no jatsiski para jiókuarhini?

⁸ Ístuchi no jatsiska para májkueni exeni kʼamanharhintskuani ísï eskaksï kʼuiripuecha. Apostuli Juanu karaspti: “Engachi uandajka eskachi nómbe pekadu jatsiska, jucha jandiajku kʼarakuarhisïnga [o enganiarikuarhini]” (1 Juanu 1:8). Jiáni enga apostuli Juanu irekani japka, apostatechaksï uandasïrendi eska nema úpiringa uékaparini kʼamanharhintskua ambe úni ka útasï Tata Diosïri amigueni. Ini jurhiatikuecha jimbo, uánikuechaksï májkueni eratsesïndi. Uandasïndiksï eskaksï jakajkusïnga Tata Diosïni, peruksï no jiókuarhisïndi ambe enga Jeoba uandajka kʼamanharhintskueri ambe, ka sánderia seksueri ambe. Ambe enga Jeoba uandajka eska kʼamanharhintskueska, kʼuiripu uandasïndi eska no xáni no sési ambeska, sino eska nema uáka erakukuarhini néna irekani.

9. ¿Néna marhuakuasïni uátsïchani ka tumbiichani ísï irekani eska Biblia na uandajka?

⁹ Sánderu tumbiicha engaksï Jeobani marhuakujka, úpirindiksï úkua jukanchani paraksï no májkueni exeni ísku jándikueri ambe ísï eskaksï ánchikuarhitarhu o eskuelarhu anapu kompanieruecha. Ini ambesï nitamakuarhipti Testigu ma enga Aleksandar arhinhajka. Ima miásïndi: “Eskuelarhu,  máru nanakechaksï afuersa uékasïrendi eskani imechani jingoni ísku jándikua ambe niátapiringa. Uandasïrendiksï eskani no tatakespka jimbokani no kámasïrenga nobiani”. Jamberiri tʼu uátsï o tumbi, inde jásï amberi nitamakuarhijka. Enga ísïka, miá eska engari ísï irekaska eska Biblia na uandajka, uákari eskari janhanharhinhaaka, nori pʼamenchaaka, sésiri pʼikuarheraaka ka ambakiti pájperakuari ma jatsiaka Jeoba jingoni. Ka engari sánderu uánikua tsʼéjkukuechani úska orhepani uérakuani, sánderu fásiliuati parari úni ambe enga sési jaka. Asï mirikurhi eska Noambakitisï újka eska kʼuiripu no no sési exeaka ísku jándikua ambe. Ísï jimbo, andasïngari Noambakitini engari no niárajka ísï eratseni eska kʼuiripu enga no marhuakujka Jeobani (1 Juanu 2:14).

10. ¿Nénajtsïni jarhuatasïni 1 Juanu 1:9 parachi úni sési marhuakuni Jeobani?

¹⁰ Míteskachi eska Jeobajkusï újka uandani ambe enga no sési jaka. Ka juchachi kánikua jánguarhintasïnga parachi no indeni ambe úni. Peru engachi niárajka kʼamanharhintskua ambe úni, kómarhikua jimbochi aiangusïnga Jeobani (arhinta je 1 Juanu 1:9). Ka enga kʼéri kʼamanharhintskua máejka, orhejtsïkutichanchi kurhakuasïnga eskajtsïni jarhuataaka, jimboka Jeoba imechani erakuaska parajtsïni jarhuatani (Sant. 5:14-16). Peru nóchi jatsipiringa para méntku no sési pʼikuarherani jarhani imani ambe jimbo engachi antesi no sési úka. ¿Andi? Jimboka juchari Táti uékpiti, íntspiska imeri Uájpani parachi úni puáminhantaani juchari kʼamanharhintskuechani. Jeoba ísï úsïndi enga uandajka eska puákuantauaka imechani engaksï no sési ambe úka peru engaksï moantakia. Ísï jimbo, uákachi sési marhuakuni Jeobani (1 Juanu 2:1, 2, 12; 3:19, 20).

11. ¿Ambechi uá úni parachi no jakajkuni ambe engaksï apostatecha uandajka?

¹¹ Jarhasti máteru ambe engachi no jatsika para jiókuarhini: ambe engaksï apostatecha uandajka. Desde jiáni enga uénaka jarhani kúnguarhikua, Noambakiti uánikua kʼuiripuechani úraasïndi para úni eskaksï Jeobaeri ambakiti marhuaricha no seguru jauaka ambe engaksï jakajkujka. Ísï jimbo, jatsiskachi para sési míteni ambe jurhimbikua ambeski ka ambe chkuanderakua  ambeski. * Juchari ikiatspitichaksï uáti úrani Internetini ka redesi sosialichani paraksï úni eskachi nóteru mintsita jingoni mintsikaakia Jeobani ni xénchaani erachichani. Ju je no jakajkuni inde chkuanderakua ambe jimbokaksï Noambakitiriska (1 Juanu 4:1, 6; Jaŋ. 12:9).

12. ¿Andichisï jatsi para sánderu mintsikani imani jurhimbikua ambe engachi jorhenguarhikia?

¹² Engachi uéjka orhepani uérakuani Noambakitiri tsʼéjkukuechani, jatsiskachi para sánderu mintsikani Jesusini ka ambe enga úni jaka paraka úkuarhiaka ambe enga Tata Diosï uéjka. Ístuchi jatsiska para mintsikani jántspirini enga mintsinharhikueka ka jánhastini enga Jeoba úrani jaka para imeri kúnguarhikuani orhejtsïkuni (Mat. 24:45-47). Engachi méntkisï arhintaaka Tata Diosïri Karakatani, niáraakachi sánderu mintsikani indeni ambe ka juchari jakajkukua sánderu ísïuati eska anhatapu ma enga iauani inchaskuajka imeri sïranguechani. Pablu ini ambe uandaspti enga Kolosasi anapuechani karakuapka: “Ísï jimbo eskajtsï na entregarikuarhika tata Jesukristuni, ístu seguiri je imani jingoni májkuentstini jarhani, ísï komueska ma anhatapu enga sési sïrangua jukajka, o komueska ma kʼumanchikua enga sési uaxastakata jarhajka, ka sési jimbojtsï mintsikani imani” (Kol. 2:6, 7). Enga juchari jakajkukua sési uaxastakata jauaka, ambe uéjki Noambakiti úni o imecha engaksï imani jingonika, no uáti eskachi jurajkuaka jurhimbikuani (2 Juanu 8, 9).

13. ¿Ambechi míteski Jeobaeri marhuaricha ka andi?

¹³ Míteskachi eskajtsïni parhakpini anapuecha kurhunhiaka (1 Juanu 3:13). Juanujtsïni miátantasïndi “eskaksï iámindu parhakpini anapuecha Noambakitiri juramukua jimbo jarhaska” (1 Juanu 5:19). Nóteru ióni kuerataxatia paraka kʼamajkunhaaka ambe enga xáni úkuarhini jaka parhakpinirhu, jimbosï Noambakiti sánderu ikiani jati (Jaŋ. 12:12). No solu úrasïndi ísku jándikua ambe ka apostatecheri chkuanderakuechani, sino ístu úsïndi eskachi no sési kánhaaka. Ima mítesti eska no ióni jimbo kʼamajkunhaakia, jimbosï sánderu ka sánderu jánguarhintani jati paraka nóteru aianhpinhaakia Jeobaeri ambe ka eskachi nóteru mintsikaakia Tata Diosïni. Ísï jimbo, nójtsïni ísku pakatasïndi engajtsïni máru paisicharhu nóteru sésikua íntskujkia parachi Jeobani kómarhini. Peru nájkiruka ísïka, juchari erachicha engaksï imani paisicha jimbo jaka, tekaantaxatiksï. Xarhataxatiksï eskachi uáka méntkisï Jeoba jingoni jarhani ambe uéjki engajtsïni Noambakiti úchiaka.

14. ¿Nénachi uá jarhuataani erachichani ka pirenchichani paraksï seguirini jarhani jurhimbikuarhu jarhani?

¹⁴ Uákachi jarhuataani erachichani paraksï jurhimbikuarhu jarhani engachi pʼamojpitiska (1 Juanu 3:10, 11, 16-18). Jatsiskachi para iáminduecha xénchperani jiáni engachi sési nitamakuarhini jauaka ka ístu engachi no sési nitamakuarhini jauaka. Por ejemplu, ¿míteskichi erachini o pirenchini ma enga uarhiranchaka nemani ka uétarhinchani jarhani parachi sési pʼikuastantani o parachi máteru ambe jingoni jarhuatani? ¿Míteskichi eska nani no sési ambe úkuarhiska ka erachichaksï uétarhinchani jarhani jarhuajperata para ménderu uántani imecheri kʼumanchikuechani o Kʼumanchikuechani Reinueri? Ambakiti uékperakua ka pʼamojperakua engachi erachichani jimbo pʼikuarherajka, xarhatasïngachi úkuecha jingoni ka no solu uandakuecha jingoni.

15. Eska na uandajka 1 Juanu 4:7, 8, ¿ambechi jatsiski para úni?

¹⁵ Engachi xarhatajka eskachi uékperasïnga, májkuenchi úni jarhasïnga eska juchari Táti auandarhu anapu enga xáni uékpitika (arhinta je 1 Juanu 4:7, 8). Ma ambe engachi uáka úni para xarhatani uékperakua, jindesti puátspentani. Por ejemplu, engajtsïni nema no sési pʼikuastajka, uékperakua uáti eskachi puákuntaaka ka mirikurhini ambe enga úka (Kol. 3:13, TNM). Ju je exeni ambe enga nitamakuarhika erachi ma  enga Aldo arhinhajka. I erachi kánikua no sési pʼikuarheraspti enga kurhaapka eska máteru erachi enga ima kánikua janhanharhienga, no sési ambe uandapka kʼuiripuecheri ambe engaksï májkueni anapuepka eska Aldo. Uandantasïndi: “Someni kurhakuspka Jeobani eskarini jarhuatapiringa parani no no sési exeni imani erachini”. Peru ístu máteru ambe úspti: pʼímarhispti paraksï márku uérani aianhpini. Jiáni aianguspti na enga pʼikuarherani japka. Aldo, uandantasïndi: “Enga erachi mítepka na engarini no sési pʼikuastapka ambe enga uandapka, arhisptirini eskani tekaakuntapiringa. Engani kurhachakupka, kuenta íntskukuarhispka eskarini mintsita jingonisï ísï arhini japka. Úspkachi sési pájperantani ka mirikurhispkachi ambe enga úkuarhipka”.

16, 17. ¿Ambechi eratsetixaki úni?

¹⁶ Apostuli Juanu kánikua xénchaasïrendi erachichani ka uékasïrendi eska imecheri jakajkukua méntkisï sési japiringa. Ka inde ambe sési xarharasïndi imani konsejuecha jimbo enga karaapka imani tanimu kartechani jimbo. Xáni engajtsïni sési pʼikuastantajka míteni eskaksï májkueni pʼikuarherasïnga eska Juanu, ima acheeticha ka uarhiiticha engaksï Kristu jingoni juramuaka auandarhu (1 Juanu 2:27).

¹⁷ Ju je jukaparharaani ini konsejuechani engachi exeakia. Ju je méntkisï eratsetini jarhani jurhimbikuarhu jarhani ka iámindu ambe jimbo kurhajchani Jeobani. Ju je arhintani Bibliani ka mintsikani ambe enga uandajka. Ju je sánderu mintsikani Jesusini, ístu, no jiókuarhini ambe engaksï kʼuiripuecha jorhentpijka ni kurhaani ambe engaksï apostatecha uandajka. Ju je jánguarhintani parachi no tsimani ambe úni jarhani: Jeobani marhuakuni ka ístu no sési ambe úni jarhani. Ju je jurajkuni eskajtsïni Jeoba arhiaka ambe engachi jatsika para úni imeri ambakiti juramukuecha jingoni. Ka ju je jarhuataani juchari erachichani paraksï méntkisï jurhimbikuarhu jarhani puákuntapariani imechani engajtsïni no sési pʼikuastajka ka ístu jarhuatapariani imechani engaksï uétarhinchajka. Jiájkani, no arhiparini náki uéjki tsʼéjkukuachi jatsini, méntkisïchi jurhimbikuarhu jauaka.