1. ¿Bin-a te ya yakʼ stseʼelil koʼtantik jich bitʼil ya yal 3 Juan 3, 4?

TE JPUK-KʼOP Juan tseʼelnax yoʼtan te kʼalal la yaʼiy stojol te jun yoʼtan ayik ta stojol Jehová te machʼatik la yakʼbey snop te smelelil kʼope. Te Juan jich la yil bitʼil yal snichʼnab te jchʼuunjeletik te jun yoʼtan la yakʼ sbaik ta stojol te Jehovae. Ta skaj te bayal wokolil yak ta kʼaxel ta stojolike, te Juan la spas tulan ta stulantesbeyel te schʼuunel yoʼtanike. Jaʼnix jich ya yakʼbotik bayal stseʼelil koʼtantik-euk te kʼalal jun yoʼtan ya yakʼ sbaik ta stojol Jehová te kal jnichʼnabtik o te machʼatik ya jkoltaytik ta snopel te smelelil kʼope sok te jun yoʼtan ya x-abatinik ta stojol te Jehová (kʼopona 3 Juan 3, 4).

2. ¿Bin swentail te la stsʼibay oxeb kartaetik te Juan?

² Ta jaʼbil 98, te Juan kuxin-niwan ta lum Éfeso o nopol tey-a. Teyniwan bajt ta kuxinel te kʼalal lokʼ ta chukel ta isla yuʼun Patmos. Ta yorail-abi, ta swenta te chʼul espiritu te Jehová la yakʼbey stsʼibay oxeb kartaetik te Juane. Te bin swentail te kartaetik-abi, jaʼ te ya stijbey yoʼtan te jchʼuunjeletik te manchuk ya xchʼay te schʼuunel yoʼtanik ta stojol te Jesús sok te manchuk ya yijkitayik te smelelil kʼope.

3. ¿Bintik jojkʼoyel ya kakʼbeytik sujtib ta artikulo ini?

³ Ta tiempo-abi, jaʼxanix stukel kuxul-a te jpuk-kʼop Juan, la smel yoʼtan kʼalal la yil te lotil jpʼijubteswanejetik yakik ta yutsʼinbeyel te schʼuunel yoʼtan te kongregasionetike (1 Juan 2:18, 19, 26). * Te apostataetik ini ya yalik te ya snaʼbeyik sba te Diose, pero ma schʼuunbeyik te smantale. Ta artikulo ini ya kilbeytik skʼoplal te tojobtesel la yakʼ te Juan sok ya kakʼbeytik sujtib oxeb jojkʼoyeletik: ¿bin ya skʼan ya yal te ya xbeenotik ta smelelil kʼope?, ¿bin wokolil ya jsitintaytik? sok ¿bin-utʼil ya xjuʼ te talel kʼaxel ya jkoltay jbatik swenta ya xbeenotik ta smelelil kʼope?

4. Jich bitʼil ya yal ta 1 Juan 2:3-6 sok 2 Juan 4, 6, ¿bin ya skʼan ya jpastik swenta ya xbeenotik ta smelelil kʼop?

⁴ Swenta ya xbeenotik ta smelelil kʼop ya skʼan ya jnaʼtik bin-a te smelelil kʼop te ay ta Bibliae. Jaʼnix jich ya skʼan ya jchʼuunbeytik te smantal te Jehová (kʼopona 1 Juan 2:3-6; 2 Juan 4, 6). Te Jesús la yakʼ kiltik lekil ejemplo ta swenta te schʼuunbeyel smantal te Jehová. Jun te bitʼil ya jpastik-euke, jaʼ te ya jtʼuntik ta lek te ejemplo yuʼun te Jesuse (Juan 8:29; 1 Ped. 2:21).

5. ¿Bin ya skʼan te jchʼuunejtik ta leke?

⁵ Swenta ya x-ayinotik ta smelelil kʼop ya skʼan te jchʼuunejtik ta lek jaʼ Dios yuʼun te smelelil kʼop te Jehovae, jaʼ yuʼun spisil te bin ya yalbotik te Biblia jaʼ smelelil. Jaʼnix jich ya skʼan te schʼuunej koʼtantik ta lek te jaʼ Mesías te albil skʼoplal te Jesuse. Ta ora ini bayal ants winiketik ma schʼuunik te jaʼ tsaot te Jesús yuʼun ya x-och ta Ajwalil ta Wentainel yuʼun te Diose. Te Juan la yal te ay «tsobol jloʼloywanejetic» te ya xjuʼ ya sloʼlayik te machʼatik maba stsakoj yip ta yoʼtanik te smelelil kʼop ta stojol te Jehová sok te Jesuse (2 Juan 7-11). Te Juan jich la stsʼibay: «¿Machʼa a te ya yaʼiy lot? Ha te machʼa ya yal te ma haʼuc Cristo te Jesús» (1 Juan 2:22). Te bin ya skʼan ya jpastik swenta maba ya kichʼtik loʼlayele, jaʼ te ya jnoptik te sKʼop Diose. Jaʼnaxme jich ya jnaʼbeytik sba ta lek te Jehová sok te Jesuse (Juan 17:3). Jichme ya jnaʼtik te ayotik ta smelelil kʼope.

6. ¿Bin wokolil ya sitintayik te jchʼieletike?

⁶ Jpisiltik te jchʼuunejtik Diose ya skʼan ya jkanantay jbatik swenta ma sloʼlayotik-a te snopojibal yuʼun te ants winiketike (1 Juan 2:26). Te machʼatik ya skʼan ya skanantay sbaik ta lek ta swenta te pejtsʼe, jaʼ te jchʼieletike. Jtul ermana ta Francia te Alexia * sbiil te 25 yaʼbilal jich la yal: «Te kʼalal ayon ta eskuela la jnopbey skʼoplal te ebolusion sok yantik te bin ya yakʼik ta nopel te ants winiketike. Jich yuʼun, och jnop te ayniwan maba smelelil te bin jnopoj ta stojol te Jehová. Aynix la yikʼbon koʼtan te bin ya yakʼik ta nopele. Pero la jnop te maba lek teme jaʼnax ya jchʼuun te bin ya jnop ta klase, ya skʼan te ya jchʼam kaʼiy-euk te bin ya yalbon te Jehovae». Te Alexia la skʼopon te libro La vida... ¿cómo se presentó aquí? ¿Por evolución, o por creación? Cheʼoxeb semana ta patil la sta ta ilel te maba melel te bin la snop ta eskuelae. Jich ya yal: «Joʼon-nix la jta ta ilel te jaʼ smelelil te bin ya yal te Bibliae. La jta ta  ilel te jaʼ tseʼel koʼtan sok ay slamalil koʼtan teme jaʼ ya jchʼuun te mantaliletik ay ta Bibliae».

7. ¿Bin-a te ma skʼan ya jpastik sok bin yuʼun?

⁷ Jpisiltik te j-abatotik yuʼun te Diose, chikan teme jchʼielotik o ayix kaʼbilaltik ya skʼan ya jpastik tulan yuʼun ma chebuk te bin ya jpastike, te jchʼuunejtik Dios yilel pero ya jpastik te bin chopole. Te jpuk-kʼop Juan la yalbey skʼoplal ini, melel la yal te ma xjuʼ ya jtʼuntik te smelelil kʼop soknix te ya jpastik te bin ma stojiluke (1 Juan 1:6). Teme ya jkʼantik te lek ya yilotik te Dios ta ora ini sok ta pajel chaʼbej, yame skʼan te spisil-ora lek te jtaleltike, jichuk ya kaʼiytik te ya yilotik ta spisil-ora te ants winiketike. Ta melel, maʼyuk mulil te ya xjuʼ ta mukele, melel te Jehová spisil ya yil stukel (Heb. 4:13).

8. ¿Bin-a te ya skʼan ya jpʼajtike?

⁸ Jaʼnix jich ya skʼan ya jpʼajtik te bin ya snop te balumilal ta swenta te mulile. Te jpuk-kʼop Juan jich la stsʼibay: «Teme ya caltic te mayuc jmultic, ya jloʼloy jbahtic, ma ba ay ta coʼtantic te smelelil cʼope» (1 Juan 1:8). Ta skʼajkʼalel te Juan, te apostataetik ya yalik te yato xjuʼ te lek ya x-ilot yuʼun Dios te machʼa yak ta spasel mulile. Ta ora ini bayal machʼatik jich ya snopik-euk. Ya yalik te ya schʼuunik te Diose pero ma schʼuunik te bin ya yal ta swenta te mulile, kʼaxtoxan-a teme jaʼ ta swenta te spasel mulweje. Te bin mulil ya yil stukel te Jehová, jich bitʼil te sjoy sbaik ta winikil o ta antsil te ya smulan sbaik, lek ya yilik stukel te ants winiketik ta balumilal.

9. ¿Bin-utʼil ya xkoltayotik te jchʼieletik teme jaʼ ya spasik ta skuxlejalik te bin snopojik ta Bibliae?

⁹ Te achʼix keremetik te schʼuunejik Dios, ya xjuʼ ya snopbeyik spensar te sjoʼtakik ta aʼtel o ta eskuela ta swenta te spasel mulile. Jaʼ jich kʼot ta stojol te Aleksandar. Jich ya yal: «Ay chaʼoxtul achʼixetik ta eskuela te la stijbonik koʼtan yuʼun ya xwayon sok. Ya yalik te jaʼ ya jmulan te keremetike, melel maʼyuk jlekol». Achʼix kerem, ayniwan jich ya xkʼot ta pasel ta atojol ta patil bael. Teme jich kʼot ta atojole, naʼame te jaʼ lek akʼoplal ya xkʼoat teme jaʼ ya apas ta akuxlejal te bin anopoj ta Bibliae, jaʼnix jich ma stsakat chamel, lek  ya awaʼiy aba sok lek ya awil aba sok te Jehovae. Te kʼalal ya xkʼayat ta stsalel te bin chopole, jaʼme kʼunxan ya awaʼiy spasel-a te bin stojile. Mame xchʼay ta awoʼtan ini, te Satanás jaʼ ya stijbey yoʼtan te ants winiketik ta stuuntesel te sbakʼetalik ta spasel mulil. Jich yuʼun te kʼalal maba pajal apensar sok te ants winiketik, jich ya atsal te Satanase (1 Juan 2:14).

10. ¿Bin-utʼil ya skoltayotik te 1 Juan 1:9 yuʼun maʼyuk jmultik ya kaʼiytik ta stojol te Jehová?

¹⁰ Jpisiltik jnaʼojtik te ay sderecho te Jehová ta yalel bin-a te mulil ya yil stukele. Jich yuʼun ya jpastik tulan yuʼun ma jpastik te bin ma lek ta site. Pero teme ay ya jta jmultik ta stojol ya kalbeytik ta jamal ta orasion (kʼopona 1 Juan 1:9). Teme tulan te mulil la jpastike jletik koltayel ta stojol te ansianoetik, melel jnaʼojtik te jaʼ akʼbil yaʼtelik yuʼun te Jehová swenta ya skoltayotik (Sant. 5:14-16). Teme ay la jpastik mulil pero la sujtesix koʼtantik, mame kakʼtik te ya xchʼaybotik te sbujtsʼ koʼtantik te kʼalal ay ya xtal ta koʼtantik te bin la jpastike. ¿Bin yuʼun? Melel te Jehová te mero kʼuxotik ta yoʼtane, la yakʼ ta lajel ta jtojoltik te sNichʼan yuʼun ya stoj te jmultike. Te Jehová ya spasbey perdon ta smelelil te machʼa ya sujtes yoʼtane. Jich yuʼun ya xjuʼ te jun koʼtantik ya x-abatinotik ta stojol te Jehová te maʼyuk jmultik ya kaʼiytik ta stojol (1 Juan 2:1, 2, 12; 3:19, 20).

11. ¿Bin ya skʼan ya jpastik swenta maba ya yutsʼinbotik te schʼuunel koʼtantik te bin ya yalik te apostataetike?

¹¹ Ay yan te bin ya skʼan ya jpʼajtike: jaʼ te bin ya yalik te apostataetike. Jaʼto te chiknaj tal te kongregasion ta sbabial siglo, ay machʼatik stuuntesoj te Satanás yuʼun ya yutsʼinbey schʼuunel yoʼtanik te j-abatetik yuʼun Dios te jun yoʼtanik ta stojole. Jich yuʼun ya skʼan ya jnaʼtik stsajtayel ta lek bin-a te smelelil kʼope sok bin-a te lotile. * Te jkontrataktik ya xjuʼ ya stuuntesik te Internet sok te redes sosiales yuʼun maba ya smukʼulinix koʼtantik ta lek te Jehová sok te ya xpejkʼaj te skʼuxul koʼtantik ta stojol te kermanotaktike.  Jich yuʼun akʼa jpʼajtik te bin ya yalik te apostataetike, melel jaʼ talem ta stojol te Satanase (1 Juan 4:1, 6; Apoc. 12:9).

12. ¿Bin yuʼun ya skʼan ya jpastik tulan yuʼun ya schʼuunxan koʼtantik te bin jnopojtik ta Bibliae?

¹² Teme ya jkʼan ya jtsaltik te bin ya yakʼ tal ta jtojoltik te Satanás, ya skʼan ya smukʼulinxan koʼtantik te ya skoltayotik te Jesús sok te ayuk ta koʼtantik te aʼtelil akʼbil yuʼun te Jehová swenta ya xkʼot ta pasel te skʼanojel yoʼtane. Jaʼnix jich ya skʼan ya smukʼulin koʼtantik te j-abat te jun yoʼtan sok pʼij te ya stuuntes te Jehová ta yilel te organisasion yuʼun ta ora ini (Mat. 24:45-47). Teme spisil-ora ya jkʼopontik te Bibliae, yame yichʼxan yip te schʼuunel koʼtantike, jichme ya xkʼot bitʼil mukʼul teʼ te mero kʼuben te slojpʼ o te yisime. Jich ay ta yoʼtan te Pablo kʼalal jich la yal ta Colosenses 2:6, 7: «Hich te bin utʼil la awicʼ ta awoʼtanic te Cajwaltic Jesucristo, hich me ya xʼayinex ta stojol, cʼuhbenuc ochel alohpʼic, soc tsʼahcubiluquex hahchel ta stojol soc yichʼojuc yip te schʼuhunel awoʼtanic». Teme jich yichʼoj yip te schʼuunel koʼtantike, chikan te bin ya spas te Satanás sok te machʼatik ya yakʼ sbaik ta loʼlayel yuʼune, maba ya yutsʼin te schʼuunel koʼtantike (2 Juan 8, 9).

13. ¿Bin-a te jnaʼojtik ta jamale sok bin yuʼun?

¹³ Jnaʼojtik ta jamal te ya spʼajotik te balumilale (1 Juan 3:13). Te jpuk-kʼop Juan jamal la yal «te ay ta scʼab pucuj swohlol te bahlumilale» (1 Juan 5:19). Kʼax nopolix te slajibal te chopol balumilale, jich yuʼun ta ora ini kʼaxtoxan ilinem te Satanase (Apoc. 12:12). Ma jaʼuknax ya stuuntes te bin ya smon koʼtantike, jich bitʼil te yalel ta mulil sok te bin ya yalik te apostataetike. Jaʼnix jich ya stuuntes ants winiketik yuʼun ya yutsʼinotik. Te Satanás snaʼoj ta lek te maʼyukix bayal tiempo yuʼun ya x-aʼtej, jich yuʼun yak ta spasel tulan yuʼun ya skom te scholel skʼop Dios sok te ya spijtesotik ta stojol te Jehová. Jich yuʼun ma chajpuk ya kiltik-a te ay nasionetik te banti maba libre ayotik ta yichʼel ta mukʼ te Jehová. Manchukme jich-abi, te kermanotaktik tey-a maba skomoj sbaik ta spasel te aʼtelile. Jich yakik ta yakʼel ta ilel te ya xjuʼ te jun koʼtantik ta stojol te Dios chikan bin ya spas ta jtojoltik te Satanase.

14. ¿Bin-utʼil ya xjuʼ ya jkoltaytik te kermanotaktik yuʼun maba ya yijkitayik te smelelil kʼope?

¹⁴ Jun te bin-utʼil ya xjuʼ ya jkoltaytik te kermanotaktik swenta ma xyijkitayik te smelelil kʼope, jaʼ te ya jnaʼbeytik yoʼbolil sbaik (1 Juan 3:10, 11, 16-18). Ya skʼan kʼux ya kaʼiy jbatik chikan teme lek ayotik o ayotik ta wokole. Jnop kaʼiytik ini, teme ay jtul ermano te ay machʼa lajem yuʼune, ¿aybal bin-utʼil ya xjuʼ ya jkoltaytik sok te ya kakʼbeytik smukʼul kʼinal yaʼiye? Teme ay ermanoetik te staojik wokol ta skaj tulan nijkel, yikʼal jaʼal o yan wokolil, ¿yabal xjuʼ ya jkoltaytik ta schaʼpasel te snaik o te sNail Tsobleje? Ma jaʼuknax ya skʼan ya kaltik te kʼux ta koʼtantik sok te ya jnaʼbeytik yoʼbolil sba te kermanotaktike, ya skʼan ya kakʼtik ta ilel sok kaʼteltik.

15. Ta swenta te bin ya yal 1 Juan 4:7, 8, ¿bin ya skʼan ya jpastik?

¹⁵ Te kʼalal talel kʼaxel kʼux ya kaʼiy jbatike, jich ya jkʼayinbeytik te skʼuxul yoʼtan te jTatik ay ta chʼulchane (kʼopona 1 Juan 4:7, 8). Jun te bitʼil ya kakʼtik ta ilel skʼuxul koʼtantike, jaʼ te kʼalal ya jpasbeytik perdon te yantike. Jich bitʼil teme ay machʼa ay bin maba lek ya yalbotik, te skʼuxul koʼtantik yame skoltayotik ta spasbeyel perdon sok ta schʼayel ta koʼtantik te bin la spase (Col. 3:13). Kiltik te bin kʼot ta pasel ta stojol te ermano Aldo. Ya snaʼbey sba jtul ermano te yichʼoj ta mukʼe, pero te kʼalal la yaʼiy te ay bin chopol la yal ta swenta te slumale, bayal ilin yuʼun. Te Aldo jich la yal: «Bayal buelta la jkʼanbey te Jehová te yakuk skoltayon yuʼun manchuk ya kilintay te ermanoe». Te Aldo aytoxan bin la spas, la yikʼ lokʼel ta scholel skʼop Dios te ermano-abi. Tey-abi la scholbey yaʼiy te bin yaʼiyel ya yaʼiy  sbae. ¿Bin kʼot ta pasel? Te Aldo jich ya yalxan: «Kʼalal la snaʼ te bin yaʼiyel la kaʼiy jba ta skaj te bin la yale la skʼanbon perdon. La kil te bayal la smel yoʼtane, melel jelon te snukʼul te skʼope. Ta patil, lek jajch kil jbatik yan buelta, la jchʼay ta koʼtantik te bin kʼot ta pasele».

16, 17. ¿Bin-a te ya skʼan ya kakʼ ta koʼtantik spasele?

¹⁶ Te jpuk-kʼop Juan kʼax kʼux ta yoʼtan te yermanotake sok ya skʼan te lekuk ay te schʼuunel yoʼtanike. Te skʼuxul yoʼtan chiknaj ta ilel ta lek te kʼalal la yak te tojobtesel ta oxeb karta te akʼbot stsʼibay yuʼun te Diose. Bayal ya yakʼbotik smukʼul koʼtantik snaʼel te ay bayal skʼuxul yoʼtanik jich bitʼil te jpuk-kʼop Juan te machʼatik ya sjokinik ta aʼtel te Cristo ta chʼulchan (1 Juan 2:27).

¹⁷ Jich yuʼun, jchʼuuntik spasel te tojobteseletik te la kilbeytikix skʼoplale. Kakʼ ta koʼtantik te maʼyuk bin-ora ya kijkitaytik stʼunel te smelelil kʼop sok te ya jchʼuunbeytik skʼop te Jehová ta spisil te bin ya jpastike. Jnoptik ta lek te Biblia sok akʼa smukʼulin koʼtantik te bin ya yale. Jtulantestikxan te schʼuunel koʼtantik ta stojol te Jesuse. Mame jnopbeytik spensar te ants winiketik sok te bin ya yalik te apostataetike. Jpastik tulan te ma chebuk te bin ya jpastike, te jchʼuunejtik Dios yilel pero ya jpastik te bin chopole. Jchʼuuntik te lekil mantaliletik ya yakʼbotik te Jehová ta swenta te jkuxlejaltik sok jtaleltik. Jaʼnix jich, jkoltaytik te kermanotaktik swenta tulan te schʼuunel yoʼtanike. Jich ya jpastik te kʼalal ya jpasbeytik perdon te machʼatik ay bin maba lek ya spasbotik sok te kʼalal ya jkoltaytik te machʼatik ay swokolike. Te kʼalal jich ya jpastike, chikan biluk wokolil te ya jtsal jbatik soke, maʼyuk bin-ora ya kijkitaytik stʼunel te smelelil kʼope.