1. Jech kʼuchaʼal chal 3 Juan 3 xchiʼuk 4, ¿kʼusi ti xijmuyubaj-o yuʼune?

NOPBO skʼoplal liʼe: li jtakbol Juane xmuyubaj tajek kʼalal laj yaʼi ti tukʼ-o yakʼoj sbaik ta stojolal Jeova li buchʼutik la skolta ta mantale. Ep kʼusitik la snuptanik li ermanoetik taje, jech oxal li jtakbole la stsatsubtasbe xchʼunel yoʼontonik, yuʼun xkoʼolaj kʼuchaʼal xnichʼnabtak laj yil. Kʼalal chkiltik ti chakʼbe xkuxlejalik Jeova xchiʼuk ti chtunik-o ta stojolal li kalab jnichʼnabtik o li buchʼutik jkoltaojtik ta mantale, xijmuyubaj-o tajek (kʼelo 3 Juan 3, 4).

2. ¿Kʼusi sventa li kartaetik la stsʼiba Juane?

² Li ta sjabilal 98, li Juane te toʼox van nakal ta Efeso o te van ta stsʼel. Jaʼo van te bat ta naklej kʼalal lokʼ ta chukel li ta Patmose. Li vaʼ orae, jaʼo tijbat yoʼonton yuʼun chʼul espiritu yoʼ stsʼiba oxlik karta. Taje jaʼ sventa skolta ermanoetik yoʼ tsotsuk-o xchʼunel yoʼontonik ta stojolal Jesus xchiʼuk ti mu xiktaik-o li mantale.

3. ¿Kʼusi ta jkʼeltik li ta xchanobil liʼe?

³ Li vaʼ orae, chamem xa ox li yan jtakboletike. Jaʼ yuʼun, li jtakbol Juane chat yoʼonton ta skoj ti oy buchʼutik chloʼlavanik li ta tsobobbaile (1 Juan 2:18, 19, 26). * Li jvalopatinej mantaletik taje chalik ti xojtikinik Diose, pe muʼyuk chchʼunbeik li smantale. Li ta xchanobil liʼe, ta jkʼeltik kʼusitik tojobtasel laj yal li Juane. Ta jkʼeltik xtok kʼusi skʼan xal ti teutik-o ta mantale, li kʼusitik xuʼ smakutike xchiʼuk ti kʼuxi xuʼ jkolta jbatik sventa mu xkiktatik li mantale.

4. Jech kʼuchaʼal chal 1 Juan 2:3-6 xchiʼuk 2 Juan 4, 6, ¿kʼusi skʼan jpastik yoʼ teutik li ta mantale?

⁴ ¿Kʼusi skʼan jpastik sventa teutik li ta mantale? Skʼan jchanbetik skʼoplal ta Vivlia xchiʼuk ti jchʼunbetik li smantaltak Jeovae (kʼelo 1 Juan 2:3-6; 2 Juan 4, 6). Li Jesuse la xchʼunbe lek smantal li Stote. Jtos ti kʼu yelan xuʼ jchʼunbetik smantal Jeovae jaʼ ti xkakʼtik persa xchanbel stalelal li Jesuse (Juan 8:29; 1 Ped. 2:21).

5. ¿Kʼusi skʼan jpʼeluk ta koʼontontik?

⁵ Sventa teutik-o li ta mantale, skʼan jpʼeluk ta koʼontontik ti melel li kʼusi chal Jeovae. Jaʼ yuʼun, xuʼ jchʼuntik ti melel li kʼusi chal ta Skʼope. Skʼan jpʼeluk ta koʼontontik liʼ xtoke: li Jesuse jaʼ li Mesias ti albil onoʼox skʼoplale. Li avie, ep buchʼutik mu xchʼunik ti jaʼ laj yichʼ tʼujel Jesus sventa spas mantal li ta Ajvalilal yuʼun Diose. Li Juane laj onoʼox yal ti xuʼ van chlajik ta loʼlael li buchʼutik muʼyuk jpʼel ta yoʼontonik li kʼusi chal Vivlia ta sventa Jeova xchiʼuk Jesuse, yuʼun chtal ep jloʼlavanejetik (2 Juan 7-11). Xi laj yale: «¿Buchʼu li jutkʼope? ¿Mi mu jaʼuk li buchʼu tsmuk ta yoʼonton ti jaʼ Kristo li Jesuse?» (1 Juan 2:22). Sventa mu xijlaj ta loʼlaele, skʼan jchantik li Skʼop Diose, yuʼun jaʼ noʼox jech xuʼ xkojtikintik lek li Jeova xchiʼuk Jesuse (Juan 17:3). Mi jech la jpastike, jpʼel ta koʼontontik ti melel li kʼusi jchʼunojtike.

6. ¿Kʼusi tsnuptanik li kerem tsebetike?

⁶ Skʼan xkichʼ jpʼijiltik sventa mu sloʼlautik li kʼusi chal krixchanoetike (1 Juan 2:26). Pe jaʼ mas to skʼan skʼel sbaik li kerem tsebetike. Xi chal Alexia * ti jaʼ jun ermana ta Francia ti 25 sjabilale: «K’alal chichanunaj to’oxe, la jchanbe skʼoplal ti kʼunkʼun kʼataj talel li kuxlejale. La jchan xtok li kʼusi chakʼik ta chanel krixchanoetike. Bakʼintike, melel xa yaʼeluk li kʼusi chalike. Taje laj yakʼ jnop mi melel li kʼusi jchʼunoje. Pe xi la jnope: ‹Mu lekuk ti jchʼun ta anil li kʼusi chalike, skʼan jkʼel li kʼusi chal Vivliae›». Li Alexiae la xchan li livro La vida... ¿cómo se presentó aquí?  ¿Por evolución, o por creación? Kʼalal echʼ junchibuk xemanae, laj yakʼ venta ti melel li kʼusi xchʼunoje. Xi to chale: «Laj kil ta jsat jtuk ti melel li kʼusi chal Vivliae, ti jaʼ ximuyubaj-o xchiʼuk jun noʼox koʼonton mi ta jchʼun li kʼusi chale».

7. ¿Kʼusi skʼan jkʼel-o jbatik, xchiʼuk kʼu yuʼun?

⁷ Oy kʼusi skʼan jkʼel-o jbatik ta bikʼit ta mukʼ: jaʼ mi chijtun xa yilel ta stojolal Jeova, pe ti oy kʼusi chopol ta jpastike. Li Juane laj onoʼox yal ti mu xuʼ xijtun ta stojolal Dios mi chijmulivaje (1 Juan 1:6). Mi ta jkʼantik ti lekuk xilutik li Jeovae, skʼan lekuk xkakʼ ta ilel jtalelaltik skotol ora. Muʼyuk kʼusi xuʼ jmukbetik li Jeovae, yuʼun «lek chajal ta sat» skotol (Ebr. 4:13).

8. ¿Kʼusi skʼan mu jchanbetik li krixchanoetike?

⁸ Li krixchanoetike lek noʼox chilik li spasel mulile, pe skʼan mu jchanbetik. Xi laj yal li jtakbol Juane: «Mi chkaltik ti muʼyuk jmultike, yakal ta jloʼla jba jtuktik» (1 Juan 1:8). Kʼalal jaʼo kuxi li Juane, xi toʼox chalik li jvalopatinej mantaletike: «Xuʼ xkamigointik Dios akʼo mi jpastik li kʼusi chopol chile». Ep buchʼutik jech tsnopik li avi eke. Chalik ti xchʼunojik Diose, pe muʼyuk tstsakik ta venta li kʼusi chopol chile, jech kʼuchaʼal ta sventa li chiʼinejbail ta vayele. Li krixchanoetike chalik ti maʼuk chopol li kʼusi mulil chil Jeovae.

9. ¿Kʼu yelan chaʼi sba kerem tsebetik mi chchʼunik li kʼusi chal Vivliae?

⁹ Li kerem tsebetike xuʼ van tsujat yuʼun xchiʼilik ta abtel o ta chanvun ta sventa li chiʼinejbail ta vayele. Jaʼ yuʼun, xuʼ van vokol chaʼiik ti mu jechuk snopik eke. Jaʼ jech la snuptan jun ermano ti Aleksandar sbie, xi chale: «Junantik tsebetik ta j-eskuelae tsujikun sventa jchiʼinan ta vayel. Xi chalbeikune: ‹Mi jaʼ lek chavil keremotik ti chʼabal anoviae›». Kerem tseb, mi jaʼ jech yakal chanuptane, teuk ta ajol  liʼe: mi chachʼun li kʼusi chal Vivliae, jun noʼox avoʼonton, muʼyuk cha-ipaj, muʼyuk chavul avoʼonton xchiʼuk lek-o chavil aba xchiʼuk li Jeovae. Kʼalal chatsal jujukoj li kʼusi chopole, mas xa kʼun chavaʼi spasel li kʼusi leke. Naʼo me ti jaʼ Satanas tstijbe yoʼonton krixchanoetik yoʼ mu stsakik ta venta kʼusi chal Vivlia ta sventa li chiʼinejbail ta vayele. Mi muʼyuk chachanbe stalelal li krixchanoetike, tstsal avuʼun li Satanase (1 Juan 2:14).

10. ¿Kʼu yuʼun xuʼ jun noʼox koʼontontik xijtun ta stojolal Jeova jech kʼuchaʼal chal 1 Juan 1:9?

¹⁰ Jaʼ noʼox Jeova xuʼ xalbutik li kʼusi mu stakʼ pasele. Chkakʼtik persa ti jchʼunbetik li smantale. Pe kʼalal oy kʼusi chopol ta jpastike, jamal chkalbetik li jmultike (kʼelo 1 Juan 1:9). Mi tsots li kʼusi la jpastike, ta jkʼanbetik koltael li buchʼutik svaʼanoj Jeova sventa xchabiutik ti jaʼ li moletike (Sant. 5:14-16). Mu lekuk ti oy-o jmul chkaʼi jbatik ta skoj li kʼusi chopol toʼox la jpastik ta voʼnee. ¿Kʼu yuʼun? Yuʼun li Jtotik ta vinajele la stak tal Xnichʼon sventa stoj jmultik xchiʼuk ti jtatik pertone. Ta melel, li Jeovae chakʼ ta perton li buchʼutik tsutes yoʼontonike. Vaʼun, xuʼ jun noʼox koʼontontik xijtun ta stojolal (1 Juan 2:1, 2, 12; 3:19, 20).

11. ¿Kʼusi skʼan jpastik yoʼ mu xchibajesutik li jvalopatinej mantaletike?

¹¹ Mu jchʼuntik xtok li kʼusi chalik li jvalopatinej mantaletike. Li Satanase ep buchʼutik stunesoj tal sventa xchibajesutik ta mantal. Jaʼ yuʼun, skʼan jkʼeltik lek mi melel li kʼusi chkichʼtik albele o mi jecheʼ. * Li kajkontratike xuʼ spukik batel jecheʼ loʼiletik ta Internet o ta redes sociales sventa mu xa jpat koʼontontik ta stojolal Jeova  xchiʼuk ti chopoluk xa xkiltik li kermanotaktike. Mu me xijlaj ta loʼlael, yuʼun jaʼ tspuk talel li Satanase (1 Juan 4:1, 6; Apok. 12:9).

12. ¿Kʼu yuʼun skʼan jtsatsubtas li xchʼunel koʼontontike?

¹² Sventa mu xchibajesutik li Satanase, skʼan jpat lek koʼontontik ta stojolal Jesus xchiʼuk jchʼuntik ti jaʼ vaʼanbil yuʼun Jeova sventa xkʼot ta pasel li kʼusi tskʼan yoʼontone. Jech xtok, skʼan jpat koʼontontik ta stojolal «li tukʼil xchiʼuk pʼijil mosoil» ti jaʼ vaʼanbil yuʼun Jeova yoʼ sbeiltas li s-organisasione (Mat. 24:45-47). Mas to ta jpat koʼontontik ta stojolalik mi nopolik noʼox ta jchantik li Skʼop Diose. Maʼuk noʼox, yuʼun tstsatsub xchʼunel koʼontontik jech kʼuchaʼal jtekʼ teʼ ti tsʼunul lek yibele. Jaʼ jechtik laj yalbe batel ermanoetik ta Kolosas li Pabloe, xi laj yale: «Jech kʼuchaʼal achʼamojik li Kristo Jesus ti jaʼ Kajvaltike, jechuk-o me jmoj oyoxuk xchiʼuk, akʼo lek avibelik ta stojolal xchiʼuk akʼo lek anaklebik ta stojolal jech kʼuchaʼal pakʼbal na xchiʼuk lekuk-o tsots li xchʼunel [avoʼontonike]» (Kol. 2:6, 7). Mi tsots lek xchʼunel koʼontontike, mu kʼusi spas yuʼun Satanas xchiʼuk sviniktak yoʼ xkiktatik li mantale (2 Juan 8, 9).

13. ¿Kʼusi ti jnaʼojtik leke, xchiʼuk kʼu yuʼun?

¹³ Jnaʼojtik ti ta onoʼox spʼajutik li krixchanoetike (1 Juan 3:13). Xi laj yal li Juane: «Skotol li krixchanoetike oyik ta sjuʼel li Satanase» (1 Juan 5:19). «Oy tajek skʼakʼal yoʼonton» li Satanase, yuʼun snaʼoj ti poʼot xa xlaj li sbalumile (Apok. 12:12). Maʼuk noʼox tspukbe skʼoplal chiʼinejbail ta vayel o li kʼusi chal jvalopatinej mantaletik yoʼ slubtsanutik ta mantale, yuʼun tsots tskontrainutik xtok. Snaʼoj ti jutuk xa skʼan xichʼ lajesel li Satanase, jaʼ yuʼun yakʼojbe tajek yipal yoʼ spajes li cholmantale o ti xkikta jbatik ta mantale. Mu labaluk sba chkaʼitik ti oy kʼusi mu xa xakʼ jpastik o ti spajesojik ta j-echʼel kabteltik li ta junantik lumetike. Pe kuchem tal yuʼun li kermanotaktike. Yakʼojik ta ilel ti xuʼ tukʼ-o xkakʼ jbatik ta stojolal Jeova manchuk mi ep kʼusitik tstunes li Satanase.

14. ¿Kʼu yelan xuʼ jkoltatik li ermanoetik yoʼ mu xiktaik mantale?

¹⁴ Mi oy xkʼuxul koʼontontik ta stojolal li ermanoetike, xuʼ jkoltatik yoʼ mu xiktaik li mantale (1 Juan 3:10, 11, 16-18). Kakʼtik ta ilel ti jkʼanoj jbatik ta jujuntal kʼalal jun noʼox koʼontontik xchiʼuk kʼalal oy jvokoltike. Jech kʼuchaʼal liʼe, ¿mi skʼan van jkoltatik o jpatbetik yoʼonton junuk ermano ti oy buchʼu chamem yuʼune? ¿Mi oy van kermanotaktik ti skʼan koltael ta svaʼanel salonik o snaik ta skoj ti laj yil svokolik ta nikele? Mu baluk noʼox ti xkaltik ti jkʼanojtik xchiʼuk ti kʼux ta koʼontontik li kermanotaktike, yuʼun skʼan xkakʼtik ta ilel xtok.

15. ¿Kʼusi skʼan jpastik jech kʼuchaʼal chal 1 Juan 4:7 xchiʼuk 8?

¹⁵ Kʼalal jkʼanoj jbatik ta jujuntale, chkakʼtik ta ilel ti yakal ta jchanbetik stalelal li Jtotik ta vinajel ti skʼanojutik tajeke (kʼelo 1 Juan 4:7, 8). Jtos ti kʼu yelan xuʼ xkakʼtik ta ilele jaʼ ti xkakʼtik ta perton li yantike. Mi kʼanvanemutike, chkakʼtik ta perton xchiʼuk ta jchʼay ta joltik mi oy buchʼu chopol kʼusi la spasbutike (Kol. 3:13). Jkʼeltik kʼusi kʼot ta stojolal jun ermano ti Aldo sbie. Kʼux tajek laj yaʼi kʼalal kʼot ta xchikin ti oy kʼusi chopol laj yal jun ermano ta stojolal li xchiʼiltak ti jmoj slumalike.  Xi chale: «Ep ta velta la jkʼanbe Jeova ti akʼo skoltaun sventa mu chopoluk xa xkil li ermano taje». Pe laj yalbe xtok ti jmojuk xlokʼik ta cholmantale. Vaʼun, laj yalbe kʼu yelan chaʼi sba. Xi to chale: «Kʼalal laj kalbe ti chopol laj kaʼi jba ta skoj li kʼusi laj yale, la skʼanbun perton. Ti kʼu yelan laj yalbune te laj kakʼ venta ti chopol tajek chaʼi sba ta skoj li kʼusi laj yale. La jchapan li jkʼopkutike xchiʼuk kamigo jbakutik li avie».

16, 17. ¿Kʼusi skʼan jpʼeluk ta koʼontontik spasel?

¹⁶ Li jtakbol Juane skʼanoj tajek li yermanotake xchiʼuk oy ta yoʼonton ti lekuk oyik ta mantale. Jech laj yakʼ ta ilel kʼalal la stsʼiba li oxlik kartae. Tspat tajek koʼontontik ti jech stalelalik li buchʼutik chbat ajvalilajikuk xchiʼuk Kristoe (1 Juan 2:27).

¹⁷ Kakʼ ta koʼontontik li tojobtaseletik laj xa jkʼeltike. Jpʼeluk ta koʼontontik ti mu xkiktatik li mantale xchiʼuk skotoluk ora jchʼunbetik smantaltak li Jeovae. Jchanbetik li Skʼope xchiʼuk jchʼuntik li kʼusi te chale. Jtsatsubtas xchʼunel koʼontontik ta stojolal Jesus. Mu jchʼuntik li kʼusitik chakʼik ta chanel li krixchanoetike xchiʼuk li kʼusi chalik li jvalopatinej mantaletike. Mu chopoluk kʼusi jpastik xchiʼuk ti chijtun xa yilel ta stojolal Jeovae. Mu jchʼuntik mi oy buchʼu tsujutik ta spasel kʼusi chopole. Jtsaktik ta venta li kʼusi chal Jeova ta sventa li chiʼinejbail ta vayele. Jkolta kermanotaktik yoʼ mu xiktaik li mantale: kakʼtik ta perton li buchʼu chopol kʼusi tspasbutike xchiʼuk jkoltatik li buchʼutik oy kʼusitik tsnuptanike. Vaʼun, xuʼ me teutik-o ta mantal mu ventauk li kʼusitik ta jnuptantike.