1. Heezzantto Yohaannisa 3, 4n odettidaagaadan, nuuni ufayttanaadan oottiyaabay aybee?

TUMAA siyanaadan I maaddidoogeeti aggennan Yihoowawu ammanettidi haggaaziyoogaa kiitettida Yohaannisi siyido wode ay keena ufayttidaakko qoppana danddayay? Eta daro metoy gakkiis; qassi Yohaannisi ba naatudan xeelliyo he ammanettida Kiristtaanetu ammanuwaa minttanawu baaxetiis. Hegaadan, nu naati woy tumaa siyanaadan nuuni maaddidoogeeti bantta huuphiyaa Yihoowawu sheedhdhidi aggennan awu haggaaziyo wode nuuni keehi ufayttoos.—3 Yohaannisa 3, 4 nabbaba.

2. Yohaannisa dabddaabbeti xaafettidoy aybissee?

² Yohaannisi 98 M.Ln Efisoonan woy hegaa matan deˈennan waayi aggana. Paaximo giyo haruuruwan qashuwaappe birshshetti simmidi, I yaa beennan aggenna. I heezzu dabddaabbeta xaafanaadan Yihoowa geeshsha ayyaanay A denttettidoy he wode heeraana. Ammanettida Kiristtaaneti Yesuusan ammaniyo bantta ammanuwaa naaganaadaaninne tuman deˈiyoogaa aggennaadan denttettanaassi he dabddaabbeti xaafettidosona.

3. Nuuni zaaruwaa beˈana oyshati awugeetee?

³ Kiitettidaageetuppe he wode deˈiyay Yohaannisa gidiyo gishshawu, worddo asttamaareti gubaaˈiyan gattiyo qohoy A qofissiis. * (1 Yoh. 2:18, 19, 26) He kaddidaageeti Xoossaa eroos giikkonne, eti Yihoowa azazota azazettokkona. Yohaannisi ayyaanay kaalettin yootido zoriyaa ane beˈoos. Nuuni Yohaannisi yootido zoriyaa ha huuphe yohuwan xannaˈana, qassi ha heezzu oyshatu zaaruwaa beˈana: Tuman deˈiyoogaa giyoogee woygiyoogee? Tuman deˈennaadan nuna aybi diggana danddayii? Qassi tuman deˈanaadan issoy issuwaa waati maaddana danddayiyoo?

4. Koyro Yohaannisa 2:3-6⁠ynne 2 Yohaannisa 4, 6y yootiyoogaadan, tuman deˈanawu nuuni oottana koshshiyaabay aybee?

⁴ Nuuni tuman deˈanawu, Xoossaa Qaalan, Geeshsha Maxaafan deˈiya tumaa erana koshshees. Qassi, nuuni ‘Yihoowa azazuwaa naagana’ bessees, hegaa giyoogee azazota azazettana koshshees giyoogaa. (1 Yohaannisa 2:3-6; 2 Yohaannisa 4, 6 nabbaba.) Yihoowawu azazettiyoogan Yesuusi wottiyoobi baynna leemiso. Yaatiyo gishshawu, nuussi danddayettida keenan Yesuusa leemisuwaa kaalliyoogee nuuni Yihoowawu azazettiyo keehi koshshiya oge.—Yoh. 8:29; 1 PHe. 2:21.

5. Nuuni ay ammanettana bessii?

⁵ Nuuni tuman deˈanawu, Yihooway ubbatoo tumaa yootiyoogaanne I ba Qaalan Geeshsha Maxaafan yootiyo ubbabay tuma gidiyoogaa ammanana bessees. Qassi, Yesuusi qaalaa gelido Mase gidiyoogaakka nu ammanana bessees. Yesuusi Xoossaa Kawotettaa Kawo gididi tiyettidoogaa ha wodiyan daroti ammanokkona. Yihoowabaanne Yesuusabaa yootiya tumaa minttidi ammanennaageeta cimmana danddayiya “balettiya daro asati” he wode deˈiyoogaa Yohaannisi yootiis. (2 Yoh. 7-11) Yohaannisi hagaadan giis: “Yesuusa giyoogee Kiristtoosa gidin erikke giya urappe attin, worddanchchi oonee?” (1 Yoh. 2:22) Nuuni cimettennan aggana danddayiyoy Xoossaa Qaalaa xannaˈiyoogaa xallaana. Yaatikko, nuuni Yihoowanne Yesuusa erana. (Yoh. 17:3) Qassi nuuni tumaa eriyoogaa ammanettana.

6. Yelaga Kiristtaaneti tuman deˈennaadan diggana danddayiyaabay aybee?

⁶ Kiristtaaneti ubbay asa qofan cimettennaadan naagettana bessees. (1 Yoh. 2:26) Ubba qassi yelaga Kiristtaaneti he piriyaappe naagettana koshshees. Paranssaaye biittan deˈiya, layttay 25 gidido Alekisiyo * giyo michchiyaa hagaadan gaasu: “Taani timirtte keettan, lodda laamiyaabaanne asa qofa gidida harabaa tamaaraas, qassi he qofati taani tumaa siranaadan oottidosona. Issi issitoo, he timirtteta taani dosaas. Taani Geeshsha Maxaafay tamaarissiyoobaa aggada asttamaareti tamaarissiyo ubbabaa ammaniyoogee bala gidana gaada qoppaas.” Deˈuwaa—I Ha Saˈan  Deˈidoy Ayba Ogiyaanee? Lodda Laamiyaaneeyye Meretaanee? giya maxaafaa Alekisiya xannaˈaasu. A siriyoogaa amarida saaminttaa giddon aggaasu. Alekisiya hagaadan gaasu: “Geeshsha Maxaafay tumubaa yootiyoogaa taani shaakka eraas. An deˈiya maarata kaalliyoogee tana ufayssanaagaanne tawu sarotettaa demissanaagaa akeekaas.”

7. Nuuni ay oottennaadan naagettana bessii, qassi aybissi?

⁷ Yelaga woy cima gidin, Kiristtaaneti ubbay iitabaa oottiiddi Yihoowawu haggaaziyaaba milatennaadan naagettana bessees. Nuuni pokkobaa oottiiddi tuman deˈana danddayennaagaa Yohaannisi yootiis. (1 Yoh. 1:6) Nuuni Yihooway nunan ufayttanaadan koyikko, nuuni oottiyo ubbabaa Yihooway beˈiyoogaa muletoo hassayana koshshees. Nuuni geeman oottiyoobaa asay beˈana xayikkonne, nu oottiyo ubbabaa Yihooway beˈana danddayees.—Ibr. 4:13.

8. Nuuni ixxana bessiyaabay aybee?

⁸ Nuuni alamee nagaraa xeelliyo xeelaa ixxana koshshees. Kiitettida Yohaannisi hagaadan giis: “Nuuni nunan nagari baawa giikko, nurkka nuna cimmoos.” (1 Yoh. 1:8) Yohaannisa wode, kaddidaageeti issi uri Xoossay iita giyoobaa oottiiddi aara dabbotidi deˈana danddayees giidi yootoosona. Ha wodiyan, nuuni hegaa mala xeelay deˈiyo asaa giddon deˈoos. Daroti Xoossan ammaniyoogaa yootiyaaba gidikkonne, nagaraa xeelliyaagan Yihooway yootiyoobaa eti ammanokkona. Ubba qassi eti Yihooway mattumaa gaytettaabaa yootiyoobaa ammanokkona. Mattumaa gaytettaa xeelliyaagan Yihooway nagara giyo amaridabati deˈikkonne, issi uri koyikko hegeeta oottana danddayiyoogaa he asati yootoosona.

9. Yelagati Geeshsha Maxaafay tamaarissiyo likkebaa oottiyoogee loˈˈo gidiyoy aybissee?

⁹ Yelaga Kiristtaaneti banttanaara tamaariyaageeti woy oottiyaageeti pokkobaa xeelliyoogaadan  etikka xeellana mala iisettiyaabadan qoppana danddayoosona. Alekzandera hegaa malabay gakkiis. I hagaadan giis: “Timirtte keettan deˈiya amarida macca naati taani etaara mattumaa gayttanaadan oottanawu malidosona. Taayyo macca laggee baynna gishshawunne taani etaara mattumaa gayttikke giido gishshawu, eti tana attuma asaara mattumaa gayttiyaagaa gidoosona.” Inttena hegaa malabay gakkana danddayees. SHin Geeshsha Maxaafaappe intte erido likkebaa oottikko, ufayttana, intte payyatettaa naagana, azzanekketanne Yihoowaara dabbotaa minttidi deˈana. Qassi intte paaciyaa eqettiyoogee, likkebaa oottiyoogee inttena wayssennaadan maaddees. Mattumaa gaytettaabaa ha alamee xeelliyo bala xeelawu pulttoy Seexaanaa gidiyoogaa hassayite. Hegaa gishshawu, alamiyaa asaadan intte qoppennan ixxikko, ‘xalahe halaqaa xoonana.’—1 Yoh. 2:14.

10. Geeshsha kahay deˈiyoogeeta gididi Yihoowawu haggaazanaadan 1 Yohaannisa 1:9y nuna waati maaddii?

¹⁰ Nagaray aybakko yootanawu Yihoowawu maatay deˈiyoogaa nuuni ammanoos. Nuuni nagaraa oottennan agganawu nuussi danddayettida ubbabaa oottoos. SHin nuuni nagaraa oottikko, woosan nu nagaraa Yihoowawu paaxoos. (1 Yohaannisa 1:9 nabbaba.) Qassi nuuni gita nagaraa oottikko, nuna heemmanaadan Yihooway sunttido cimati maaddanaadan oychchoos. (Yaaq. 5:14-16) SHin, nuuni kase oottido nagaraabaa ubbatoo qoppana koshshenna. Ayssi giikko, siiqiya nu Aaway nu nagaray atto geetettanaadan ba Naˈaa wozo yarshsho oottidi immiis. Nuuni oottidoban tumuppe azzanikko nuussi atto gaanaagaa Yihooway yootiyo wode, I odidoogaadan oottees. Hegaa gishshawu, nuuni geeshsha kahay deˈiyoogeeta gididi ayyo oottanaadan Yihooway maaddiis.—1 Yoh. 2:1, 2, 12; 3:19, 20.

11. Nu ammanuwaa shugissana danddayiya timirttetuppe nuuni waani naagettana danddayiyoo?

 ¹¹ Nuuni kaddidaageetu qofaa ixxana bessees. Dabloosi Kiristtaanetu ammanuwaa shugissanawu ubbatoo baaxetiiddi deˈiis. Yaatiyo gishshawu, nuuni tumaanne wordduwaa waati shaakkanaakko erana koshshees. * Yihoowaara dabbotido nu dabbotaanne nu ishantta siiqiyo siiquwaa shugissanawu, nuna ixxiyaageeti Intterneetiyan woy sooshal miidiyan worddobaa yootana danddayoosona. He worddota ammanoppite, eti Seexaanaappe yoosona!—1 Yoh. 4:1, 6; Ajj. 12:9.

12. Nuuni tamaarido tumata mintti ammanana koshshiyoy aybissee?

¹² Seexaanay nu ammanuwaa shugissanawu oottiyoobaa eqettanawu nuuni Yesuusa mintti ammanananne Yihooway ba sheniyaa polanawu A waati goˈettiyaakko mintti ammanana koshshees. Yihooway ha wodiyan ba dirijjitiyaa kaalettanawu goˈettiyoogeetunkka nuuni ammanettana koshshees. (Maa. 24:45-47) Xoossaa Qaalaa ubbatoo xannaˈiyoogee nu ammanuwaa minttees. Yaatiyo wode nu ammanoy xaggaa gakkanawu xaphuwaa yeddida mittaa mala gidana. PHawuloosi Qolasiyaasa gubaaˈiyawu xaafido wode hegaara issi malabaa yootiis. I hagaadan giis: “Intte Godaa Kiristtoos Yesuusa ekkidoogaadan, aani de7ite. Aani xaphuwaa yeddidi diccite; intte tamaaridoogaadan ammanuwan minnite; Xoossaa ubba wode galatite.” (Qol. 2:6, 7) Nuuni nu ammanuwaa minttanawu baaxetikko, Seexaanay woy aara hashetiyaageeti nuuni tuman deˈennaadan diggana danddayokkona.—2 Yoh. 8, 9.

13. Nuuni ay naagana bessii, qassi aybissi?

¹³ Alamee nuna ixxanaagaa nuuni naagana bessees. (1 Yoh. 3:13) Yohaannisi “ha mule sa7aikka xalahe halaqan haarettidoogaa” nuna hassayissiis. (1 Yoh. 5:19) Ha alamiyaa xayoy matatti matatti biyo wode, Seexaanaa hanqqoy yaa gujji gujji bees. (Ajj. 12:12) I pokkobaanne kaddidaageeti yootiyo worddobaa mala geema qohuwaa goˈettiyoogaa xalla gidennan, wolqqaama yedetaa mala qoncce qohuwaakka goˈettees. Nu sabbakuwaa oosuwaa digganawu woy nu ammanuwaa shugissanawu guutta wode xallay attidoogaa Seexaanay erees. Issi issi biittati nu oosuwaa teqqidoogee woy muleera diggidoogee garamissiyaaba gidenna. Gidikkonne, he biittatun deˈiya nu ishanttinne michchontti genccidi deˈoosona. Yaatiyo gishshawu, Seexaanay Yihoowa asaa bolli ay oottikkonne, nuuni ammanettidi deˈana danddayoos!

14. Nu ishanttinne michchontti tuman deˈanaadan nuuni maaddana danddayiyo issi ogee aybee?

¹⁴ Nu ishanttinne michchontti tuman deˈanaadan maaddanawu, nuuni qarettana bessees. (1 Yoh. 3:10, 11, 16-18) Nuuni loˈˈo wode xallan gidennan, metoy merettiyo wodekka issoy issuwaa siiqana koshshees. Leemisuwawu, siiqiyo uri hayqqin minttettoy woy hara maadoy koshshiyo ura eray? Woy qassi meretay daafabaa gattin etawu daro aqoy xayido gishshawu, eta SHiiquwaa Addaraashata woy keettata zaaretti keexxanawu maadoy koshshiyo amarida ishanttubaa siyadii? Nuuni nu ishanttanne michchontta keehi siiqiyoogaanne etawu qarettiyoogaa haasayiyoogaa xallan gidennan, oosuwan bessiyoogee keehi koshshiyaaba.

15. Koyro Yohaannisa 4:7, 8y yootiyoogaadan, nuuni ay oottana koshshii?

¹⁵ Nuuni issoy issuwaa siiqiyo wode saluwan deˈiya nu siiqo Aawaa milatoos. (1 Yohaannisa 4:7, 8 nabbaba.) Nuuni issoy issuwawu atto giyoogee siiquwaa bessiyo issi oge. Leemisuwawu,  issi uri nuna yiilloyikko, awu atto giyoogaaninne A mooruwaa dogiyoogan A siiqiyoogaa bessana koshshees. (Qol. 3:13) Aldo giyo ishay I bonchchiyo issi ishay A biittaa asaabaa iitabaa haasayido wode yiillotiis. Aldoy hagaadan giis: “He ishaabaa iitabaa qoppennaadan tana maaddana mala ubbatoo Yihoowa woossaas.” Qassi Aldoy harabaakka oottiis. I banaara haggaazana mala he ishaa oychchanawu kuuyiis. Eti issippe haggaazishin, he ishay haasayidoban Aldoy ay keena yiillotidaakko awu yootiis. Aldoy hagaadan giis: “I haasayido iitaban taassi aybi siyettidaakko he ishay siyido wode tana maarotaa oychchiis. I ba haasayidoban keehi zilˈˈettidoogaa taani I haasayido ogiyaappe akeekaas. Hegaappe simmin, nuuni zaarettidi loˈˈo lagge gidida.”

16-17. Nuuni ay oottanawu murttana koshshii?

¹⁶ Kiitettida Yohaannisi ba ishanttanne michchontta keehi siiqiyo gishshawu, etawu mino ammanoy deˈana mala koyiis. I ba heezzu dabddaabbetun eta zorido zoree I eta siiqiyoogaanne etawu qoppiyoogaa loytti qonccissees. Yesuusaara saluwan haarana attumaageetinne maccaageeti Yohaannisaagaadan siiqiyaageetanne qoppiyaageeta gidiyoogaa eriyoogee keehi loˈˈoba!—1 Yoh. 2:27.

¹⁷ Nuuni tamaarido zoriyaa wozanan wottoos. Tuman deˈanawu, hegeekka, nu oottiyo ubbaban Yihoowawu azazettanawu murttoos. A Qaalaa xannaˈitenne hegaa ammanite. Yesuusa mintti ammanite. Asa qofaanne kaddidaageetu qofaa ixxite. Iitabaa oottiiddi Yihoowawu haggaaziyaaba mule milatoppite, qassi nagaraa intte oottanaadan inttena zoriyaageetu zoriyaa siyoppite. Yihooway kandduwawu kessido maaratudan deˈite. Nuna yiilloyidaageetussi atto giyoogaaninne maadoy koshshiyoogeeta maaddiyoogan nu ishantti minnidi deˈanaadan maaddoos. Yaatikko, metoy deˈishinkka, nuuni ubbatoo tuman deˈana.