1. As e dey for 3 John 3, 4, wetin de make us happy?

HOW you think say apostle John go feel when e hear say the people wey e help to learn the truth still de serve Jehovah well? This faithful Christians wey apostle John de see as e pikin them face plenty problems. And John try e best to help them make their faith dey strong. Na so we too de feel happy when we see say our pikin them or other people wey we help to learn the truth promise to serve Jehovah and continue to do so.​—Read 3 John 3, 4.

2. Why John write this three letters?

² For 98 C.E., e fit be say John de live for Ephesus or near Ephesus. Maybe e go Ephesus after e comot from prison for the island of Patmos. Around that time, Jehovah use e holy spirit help John to write this three letters. The reason why e write this letters na to make this faithful Christians continue to get faith for Jesus and continue to follow the way of the truth.

3. Which questions we go answer?

³ That time, na only John dey alive among all the apostles. John de worry about how lie-lie teachers de cause problem for the congregations. * (1 John 2:18, 19, 26) This lie-lie teachers de pretend say they know God, but they no de obey wetin Jehovah talk. For this topic, we go see the advice wey John give and we go answer this three questions: Wetin e mean to follow the way of the truth? Wetin fit make us stop to follow the way of the truth? And how we fit  help our brothers and sisters to remain for the truth?

4. As e dey for 1 John 2:3-6 and 2 John 4, 6, wetin e mean to follow the way of the truth?

⁴ If we want follow the way of the truth, we go need to know the truth for Bible. We go still need to “obey” wetin Jehovah talk. (Read 1 John 2:3-6; 2 John 4, 6.) Na Jesus show the best example of how we fit obey Jehovah. So one important way wey we fit obey Jehovah na to really follow the example of Jesus.​—John 8:29; 1 Pet. 2:21.

5. Wetin we must believe?

⁵ If we want continue to follow the way of the truth, we must believe say Jehovah de always talk true and everything for Bible na true. And we must believe say na Jehovah choose Jesus to be Christ. Plenty people today no believe say God don choose Jesus to be King of God’s Kingdom. John warn brothers that time about “plenty people wey de deceive” other people. E go dey easy for this people to deceive the brothers if they no really believe the truth about Jesus and Jehovah. (2 John 7-11) John write say: “No be person wey no gree say Jesus na Christ be liar?” (1 John 2:22) If we no want make they deceive us we need to study Bible. Na only if we do this one we go know Jehovah and Jesus. (John 17:3) And na only that time we go really dey sure say we get the truth.

6. Wetin fit stop young people make they no follow the truth?

⁶ Make all Christians dey careful make people no use their ideas deceive them. (1 John 2:26) Na young people need to really dey careful of this danger. One French sister wey e name na Alexia * and e be 25 years, talk say: “When I dey school, I learn about evolution and other ideas wey people de teach and this things make me confuse about the truth. Sometimes I de believe wetin them de teach. I tell myself say e no good if I no check wetin Bible de talk and just de believe everything wey my school teachers de teach.” Alexia  study the book Life​—How Did It Get Here? By Evolution or by Creation? Just after some weeks Alexia stop to doubt. Alexia talk say: “I study to dey sure say everything for Bible na true. And I see say if I obey wetin Bible talk e go give me joy and peace.”

7. Wetin we need to dey careful about, and why?

⁷ Every Christian, whether na young or old person, must dey careful make e no de pretend say e de serve Jehovah and still de do bad things. Apostle John talk say we no fit de follow the way of the truth and still de do things wey Jehovah say make we no do. (1 John 1:⁠6) If we want make Jehovah dey happy with us now and for future, we need to always remember say Jehovah de see everything wey we de do. Even if people no see wetin we de do for secret, Jehovah de see everything wey we de do.​—Heb. 4:13.

8. Wetin we no go accept?

⁸ Make we no accept the ideas about sin wey people for this world de teach. Apostle John write say: “If we talk say, ‘We no get sin,’ we de deceive ourself.” (1 John 1:8) For the time of John, lie-lie teachers for congregation de talk say person fit de do bad things and still be friend of God. Today, people still de think like them. Plenty people de talk say they believe God, but they no gree accept wetin Jehovah talk about sin, especially about sex. Some things about sex dey, wey Jehovah talk say na sin, but this people de talk say e no bad for person to do this things if e like to do-am.

9. Wetin young Christians go gain if they do the correct thing wey Bible talk?

⁹ E fit no easy for young Christians to do the correct thing about sex. This one go really hard if people for their workplace or school no gree accept wetin Bible talk about sex and de try to make them do wetin them de do. This kind thing happen to  one brother wey e name na Aleksandar. E talk say: “Some girls for school de try to make me sleep with them. They talk say if I no get girlfriend then e mean say I de sleep with men.” If you de face this kind temptation, make you remember say if you do wetin Bible talk, you go dey happy with yourself, you no go carry sickness, you go get clean conscience and you go continue to be tight friend with Jehovah. And anytime you no gree do bad thing, e go make-am easy for you to do the correct thing. Make you still remember say the bad ideas wey this world get about sex come from Satan. So if you no accept their ideas, you “don win the wicked one.”​—1 John 2:14.

10. How wetin 1 John 1:9 talk fit help us serve Jehovah with clean conscience?

¹⁰ We know say Jehovah get the right to tell us wetin be sin. And we de try our best make we no commit sin. But when we sin, we go pray to Jehovah and confess our sin. (Read 1 John 1:9.) And if na serious sin, we go meet the elders make they help us, because Jehovah don choose them to help us. (Jas. 5:​14-16) But make we no continue to think about the bad thing wey we don do before. Why e no good make we de think about-am? Na because Jehovah give e Pikin make e die for us so that e fit forgive our sins. When Jehovah talk say e go forgive us if we repent, e really mean-am. So we fit serve Jehovah with clean conscience because e don make-am possible.​—1 John 2:1, 2, 12; 3:19, 20.

11. How we fit protect ourself from ideas wey fit make our faith weak?

¹¹ Make we no accept the ideas of people wey don leave the truth. Since the time wey the Christian congregation start, Devil don de try to make Christians doubt the truth to make their faith weak. So because of this one, we need to know wetin  be true and wetin be lie. * Our enemies fit use Internet to make our faith for Jehovah weak and to make our love for our brothers and sisters weak. No believe this lies, because they come from Satan!​—1 John 4:1, 6; Rev. 12:9.

12. Why e good make we make our faith for the truth strong?

¹² If we no want allow Satan to make our faith weak, we go need to make our faith for Jesus strong and for how Jehovah de use Jesus to do wetin e want. We still need to trust the only people wey Jehovah de use to direct e organization today. (Matt. 24:45-47) We go make our faith strong when we de always study Bible. Then our faith go be like tree wey the roots really go down inside ground. Paul still talk the same thing when e write to Christians for Colossae. E talk say: “Just as wuna don put faith for Christ Jesus the Lord, make wuna continue to waka as one with Christ. Make wuna root dey deep and de grow inside Christ. Stand strong inside the faith.” (Col. 2:6, 7) If we try our best to make our faith strong, Satan and e followers no go fit stop us to continue to follow the way of the truth.​—2 John 8, 9.

13. Wetin we suppose expect, and why?

¹³ We must expect say the world go hate us. (1 John 3:13) John tell us say “na the wicked person de control the whole world.” (1 John 5:19) The end of this world de near more-more, so Satan de vex more-more. (Rev. 12:12) E no de only use cunny way like things about sex wey bad or the lie-lie from people wey don leave the truth. E still de use people attack us direct as them de suffer us. Satan know say e get only small time to stop our preaching work or to make our faith weak. E no de surprise us when they ban our work for some countries. Even with this one, our brothers and sisters for this countries still de endure. This our brothers don show say no matter wetin Satan de do we fit still dey faithful to Jehovah!

14. Wetin be one way wey we fit help our brothers and sisters to remain for the truth?

¹⁴ If we want help our brothers and sisters to remain for the truth, we must show them pity. (1 John 3:10, 11, 16-18) We need to show love to our brothers and sisters no be only when everything dey fine, but even when problem dey. For example, you know any brother or sister wey e person don die and e need comfort and help for other ways? Or you don hear say heavy rain, fire, or strong wind scatter the property of some brothers and sisters and they go need help to build their Kingdom Halls and their house? No be only for mouth we de really show say we love and de show pity for our brothers and sisters, but na when we do something to help them.

15. As 1 John 4:7, 8 talk, wetin we need to do?

¹⁵ We de follow the example of Jehovah our Papa for heaven when we show love to our brothers and sisters. (Read 1 John 4:7, 8.) One important way to show love na to forgive our brothers and sisters. For example, person fit make us vex and after, e beg us. We go show love if we forgive the person and stop to think about wetin the person do to us. (Col. 3:13) One brother wey e name na Aldo vex when one brother wey e respect talk bad about people from the place wey Aldo come from. Aldo talk  say, “I pray to Jehovah all the time make e help me so that I no go de think bad about this brother.” But Aldo still do another thing. E ask the brother if two of them fit go preach together. As them de preach together, Aldo explain how e vex with wetin the brother talk. Aldo talk say, “When the brother hear how wetin e talk really pain me, the brother start to beg. From the way the brother talk, I see-am say e really feel bad about wetin e talk. That day, two of us close from field service as friends.”

16-17. Wetin we go make up our mind to do?

¹⁶ Apostle John really love e brothers and e want make they get strong faith. The advice wey e give them for the three letters wey e write de show the love and care wey e get for the brothers. E de sweet us to know say the men and women wey Jehovah don choose to rule with Jesus for heaven de show love and care, just like apostle John!​—1 John 2:27.

¹⁷ Make we always de remember this advice wey we don talk about. Make we make up our mind to follow the way of the truth, and this one mean say we go always de obey Jehovah for everything wey we de do. We go study e Word the Bible and trust wetin e talk. We go get strong faith for Jesus. We no go gree accept ideas from the world and lie-lie teaching from people wey don leave the truth. We no go ever pretend to serve Jehovah and still de do bad thing, and we no go gree listen to people when them de try to make us do bad thing. We go obey the things wey Jehovah say make we do. And make we help our brothers to continue to get strong faith as we de forgive them if they vex us, and de help them when they need help. Then, no matter the problem wey we de face, we go continue to follow the way of the truth.