1. მუჭოთ 3 იოანეშ 3, 4-ის ჭარჷ, მუს მოუღ ჩქინდა ხიოლ?

შეილებნანო წერმიდგინათ, მუნერ ბედნერ იჸუაფუდ მოციქულ იოანე, მუჟამსით ქიგეგენდჷ, ნამდა მიდგას ართ დროს ჭეშმარიტებაშ გაგებას მეხვარ, კინ ართგურო ომსახურდეს იეჰოვას? თინეფ ბრელ პრობლემას ობრძოლდეს დო ათეშენ იოანე ირფელს ორთუდ თე ართგურ ქრისტიანეფიშ რწმენაშ გამანგარებელო, მით მუშ სქუალეფო მიორჩქუდ. თეშნერო, ჩქინდა ხოლო მოუღ ხიოლ, მუჟამსით ჩქინ სქუალეფ ვარდა თინეფ, მიდგას ჭეშმარიტებაშ გაგებას მივეხვარით, დუდის უძღვინენა იეჰოვას დო ართგურო ომსახურნა თის (წეკითხით 3 იოანეშ 3, 4).

2. მუ მიზან უღუდ იოანეშ წერილეფს?

² იოანე, ახ. წ. 98 წანას, საეგებიოთ ეფესოს ვარდა თიშ გოხოლუას ცხოვრენდჷ. იოანექ შილებე თე ადგილშა თიშ უკულ გინორთჷ, მუთ კუნძულ პატმოსის პატიმრობაშე გეთავისუფალ. სოდგარენ თე დროს იეჰოვაქ თინა წმინდა შურით აღძრჷ, ნამდა სუმ წერილ დოჭარკო. თე წერილეფიშ მიზან რდუ, აღძრუკო ართგურ ქრისტიანეფ, ვადინუესკო იესოშ რწმენა დო ვეგნურთესკო ჭეშმარიტებაშ შარაშე.

3. ნამ კითხვეფს ვუპასუხენთ?

³ თი დროს მოციქულეფშე ხვალე იოანე რდუ ცოცხალ დო მანგარო ოწუხუდ, ნამდა ტყურა გურაფეფქ გლახათ იმოქმედ კრებეფშა (1 იოან. 2:18, 19, 26). * განდგომილეფ ამტკიცენდეს, ნამდა იჩინენდეს ღორონთის, მარა სინამდვილეს თინეფ ვამორჩილდეს იეჰოვაშ მოთხოვნეფს. მორთ გუვარჩუათ იოანეშ რჩევა, ნამუთ თიქ ღორონთშე შთაგონებათ ჭარჷ დო ქუპასუხათ სუმ კითხვას: მუს ნიშნენს ჭეშმარიტებას გილულა? მუ დაბრკოლებეფს  შეფხვადუთ? დო მუჭო შემლებნა მივეხვარათ ართიანს, ქუდოფსქიდათ ჭეშმარიტებას?

4. მუჭოთ 1 იოანეშ 2:3—6 დო 2 იოანეშ 4, 6-ის ჭარჷ, მუ ოკო ვაკეთათ ჭეშმარიტებას ქიგლაფრთათინ?

⁴ ჭეშმარიტებას ქიგლაფრთათინ, ოკო მიჩქუდან ღორონთიშ სიტყვას, ბიბლიას ინოჭარილ ჭეშმარიტება. თეს გეძინელ, ოკო იფცვენდათ იეჰოვაშ მცნებეფს, შხვა სიტყვეფით ქოფთქუათინ, ოკო ვომორჩილდათ თინეფს (წეკითხით 1 იოანეშ 2:3—6; 2 იოანეშ 4, 6). იესოქ მორჩილებაშ სრულყოფილ მაგალით დომტეს. თაშ ნამდა, ართ-ართ მნიშვნელოვან საშვალება, მუდგათ იეჰოვას ვომორჩილუთ, იესოშ მაგალითიშ მეჸუნა რე (იოან. 8:29; 1 პეტ. 2:21).

5. მუშა ოკო ვორდათ დარწმუნებულ?

⁵ ჭეშმარიტებას გილულა ვემვოტუათინ, დარწმუნებულ ოკო ვორდათ, ნამდა იეჰოვა ჭეშმარიტებაშ ღორონთ რე დო ათეშენ, ირფელ, მუდგას თინა მუშ სიტყვაშ საშვალებათ მირაგადნა, ჭეშმარიტება რე. თეს გეძინელ, დარწმუნებულ ოკო ვორდათ, ნამდა იესო დუნაპირებ მესია რე. ამდღა ბრელს ვა ჯერს, ნამდა იესო ღორონთიშ სამეფოშ მეფე რე. მუჭოთ იოანექ თქუ, „ბრელ მეტყურექ გემკორჩქინდჷ“, მიდგაქ შილებე მიოჩილითუას თინეფ, მით დიო მზათ ვა რე დეცვას იეჰოვა დო იესოშ გურშენ ჭეშმარიტება (2 იოან. 7—11). იოანექ ჭარჷ: „მი რე მეტყურე, თინა ვარიო, მით იჩიებ, ნამდა იესო ვა რენია ქრისტე?“ (1 იოან. 2:22). ხვალე ღორონთიშ სიტყვაშ დოგურაფას შეულებ მიმეხვარან, ნამდა თეცალ აზროვნებათ ვედებღორათ (იოან. 17:3). ხვალე თე დროს იპჸით დარწმუნებულ, ნამდა მუთ ბწანა, ჭეშმარიტება რე.

6. მუ რე ართ-ართ დაბრკოლება, ნამდგას ახალგაზრდა ქრისტიანეფ შეხვადნა?

⁶ არძა ქრისტიან კურცხას ოკო რდას, ნამდა ვედეღორას ფილოსოფიათ (1 იოან. 2:26). განსაკუთრებულო ახალგაზრდა ქრისტიანეფქ ოკო დეცვან დუდ თე საფრთხეშე. საფრანგეთის მახორუ ართ და ალექსა, * ნამუთ 25 წანერ რე, იჩიებ: „სკოლას ვორდინ, ევოლუციაშ თეორიას დო ფილოსოფიას მოგურუანდეს, მუდგაქ ჩქიმ აზროვნებაშა იმოქმედ დო ჭეშმარიტებაშა ეჭვეფქ გენშმოღალაფუ. მინშა მობწონდჷ, მუდგას ბგურაფლენდჷ. მარა ფიფქრენდჷ, ნამდა სწორ ვეჸუაფუდ, ბიბლიურ გურაფეფს ყურადღება ვემვაქციკო დო ირფელ დებჯერკო, მუდგას მასწავლებერეფ მოგურუანდეს“.  ალექსა გურაფლენდჷ წიგნის „მუჭო გორჩქინდჷ სიცოცხლექ, ევოლუციათ დოვარ გუმაჭყაფალიშ საშვალებათ?“. მუსხირენ მარაშა თის ეჭვეფქ მეუდინ. ალექსა იჩიებ: დებრწმუნ, ნამდა მუთ ბიბლიას ჭარჷ, ჭეშმარიტება რე დო ქიმეფხვად, ნამდა ბიბლიურ ნორმეფით ცხოვრება ხიოლ დო შინაგან სიმშვიდეს მომღანდჷ.

7. მუს ოკო გურზას არძა ქრისტიანქ დო მუშენ?

⁷ არძა ქრისტიანქ, ახალგაზრდაქ დო ხანშა მიშულირქ, ოკო გურზას ჟირმაგ ცხოვრებაშ ცდუნებას. იოანექ ხაზ გუსვჷ თი აზრის, ნამდა ვეშმალებენა ჭეშმარიტებას გილაფრთათ დო თეწკუმა ართო უზნეო ცხოვრებათ იფცხოვრათ (1 იოან. 1:6). ღორონთიშ მოწონა მიღდანინ, თეშ ოკო იფქციებდათ, ითამ ჩქინ საქციელს შხვეფ ხოლო ორწყენა. მარა ადამიანეფ ვარწყედანინ ხოლო, იეჰოვა ირფელს ორწყე (ებრ. 4:13).

8. მუს ოკო ავარიდათ დუდ?

⁸ ჩქი დუდ ოკო ავარიდათ ქვეყნიერებაშ თვალსაზრისის ცოდვაშ გურშენ. მოციქულ იოანექ ჭარჷ: „უცოდველეფ ვორეთია ქიფჩიებუთ-და, დუდის იბღორენთ დო ჭეშმარიტება ვა რე ჩქინწკუმა“ (1 იოან. 1:8). იოანეშ დროს განდგომილეფ ამტკიცენდეს, ნამდა კოჩის შეულებუდ ღორონთშო მიუღებელ მუდგარენეფ აკეთკო დო თეწკუმა ართო, ჯგირ ურთიერთობა უღუდკო იეჰოვაწკუმა. ხალხ ამდღა ხოლო თაშ ფიქრენს. ბრელ ამტკიცენს, ნამდა წანს ღორონთ, მარა თინეფ თეშ ვა უჯინენა ცოდვას, მუჭოთ ღორონთ უჯინე, განსაკუთრებულო თიმწკუმა, მუჟამსით საქმე სექსუალურ უზნეობას ოხუ. თინა, მუთ იეჰოვაშ თოლს ცოდვა რე, ხალხის პირად გინაჭყვიდირალო მიორჩქ.

9. მუ ჯგირობუა მოუღ ახალგაზრდეფშა ბიბლიურ პოზიციაშ მტკიცას დაცვებას?

⁹ განსაკუთრებულო ახალგაზრდა ქრისტიანეფს შილებე უჭირდან, სწორ თვალსაზრის უღდან სექსუალურ უზნეობაშე, მუშენდა თანაკლასელეფ ვარდა თანამშრომელეფ ოცადნა, თინეფს აზროვნება დათირაფუან. ზუსტას თაშ მოხვად ალექსანდარიშ შემთხვევას. თინა  იჩიებ: „ჩქიმ სკოლას ნამთინე ძღაბ ოცადუდ, ქუდომჸუნუკო, ნამდა სექსი მიღუდკო თინეფწკუმა. მუჟამსით თეშე ვარიას ვურაგადუდ, თინეფ იჩიებდეს, ნამდა ჰომოსექსუალ ვორდჷ დო თენა რდუ ვარიაშ მიზეზ“. თქვა ხოლო თეცალ ცდუნებეფ ქოიღნან-და, რშუდან, მუჟამსით მტკიცას იცვენთ ბიბლიურ პოზიციას, თეშნერო თქვან დუდიშ პატიცემას გიმირჩქინანთ, იცვენთ თქვან ფიზიკურ დო ემოციურ ჯამრთელობას დო სქიდუთ იეჰოვაშ მეგობრეფო. ირო, მუჟამსით ურზუთ ცდუნებას, უმოსო გეადვილებნა სწორას მოქციება. თეს გეძინელ, რშუდან, ნამდა თე ქვეყნიერებაშ არასწორ თვალსაზრის სექსიშ გურშენ სატანაშე მოურს. თაშ ნამდა, მუჟამსით ვემურთ კომპრომისშა, გიორჯგინანთ „უბადოს“ (1 იოან. 2:14).

10. მუჭო მოხვარნა 1 იოანეშ 1:9-ს ინოჭარილ სიტყვეფ, ნამდა სუფთა სინდისით ვემსახურათ იეჰოვას?

¹⁰ ჩქი ვაღიარენთ, ნამდა ხვალე იეჰოვას უღჷ უფლება, გეგნოჭყვიდას, მუ რე ცოდვა. მართალ რე, ჩქი ირნერო ვოცადუთ, ვეშებცოდათ, მარა, მუჟამსით ვაშენთ, თეს იეჰოვაშ წოხლე ვაღიარენთ ლოცვაშ დროს (წეკითხით 1 იოანეშ 1:9). სერიოზულ ცოდვა ჩებდინით-და, მოხვარას ფთხინთ უხუცესეფს, მით იეჰოვაქ გიორინუ, ნამდა ჩქინდე იზრუნან (იაკ. 5:14—16). მარა ულირს დაშებულშე ირო ოკო ვა ბწუხენდათ. მუშენ იფჩიებუთ თეს? მუშენდა ჩქინ მოჸოროფე მუმაქ, მუშ სქუაშ გიშაჸიდირალიშ მსხვერპლიშ საფუძველშა, შეიოლებერო გინაშქვჷ ჩქინდა ცოდვეფიშ პატიება. მუჟამსით იეჰოვა იჩიებ, ნამდა აპატიენს მომნანიე შემცოდველს, თეს აუცილებერო გაკეთენს. თაშ ნამდა, იეჰოვაქ საშვალება მუჩეს, სუფთა სინდისით ვემსახურათ თის (1 იოან. 2:1, 2, 12; 3:19, 20).

11. მუჭო შემლებნა ჩქინ დუდიშ დაცვება თიცალ აზროვნებაშე, ნამუთ რწმენას დამსუსტენა?

¹¹ ჩქი ოჭიშ ოკო ვურთინუათ განდგომილეფიშ აზროვნებას. ქრისტიანულ კრებაშ ჩამოყალიბებაშე მოჸუნაფილ, სატანა ოცად, მეტყურეეფიშ საშვალებათ ეჭვეფ დოთასას ღორონთიშ ართგურ მსახურეფიშ გონებას. ათეშენ, ოკო მიჩქუდან, მუჭო გიშაბგორათ ართიანშე  ტყურა დო მართალ. * ჩქინ ნტერეფქ შილებე ინტერნეტიშ ვარდა სოციალურ ქსელეფიშ საშვალებათ ტყურეფ გავრცელან, ნამდა მემდინუან იეჰოვაშ ნდობა დო და დო ჯიმალეფიშ ჸოროფა. რშუდან მი მიკურე თე ირფელს დო ვედეჯერათ სატანაშ ტყურეფ! (1 იოან. 4:1, 6; გამოცხ. 12:9).

12. მუშენ ოკო ვეცადათ ბიბლიაშე ნაგურეფ ჭეშმარიტებაშ მიმართ რწმენაშ გამანგარებას?

¹² სატანაშ თავდასხმას ქუგურზათინ, ოკო გუვამანგარათ იესოშ მიმართ რწმენა დო ჯგირო მარჩქილედან, მუ როლს ასრულენს თინა ღორონთიშ განზრახვაშ შესრულებას. თეწკუმა ართო, ოკო ვონდუდათ ართგურ დო გონიერ მონას დო ბჯერდან, ნამდა იეჰოვა ხვალე თიშ საშვალებათ ხემძღვანელენს მუშ ორგანიზაციას (მათ. 24:45—47). ღორონთიშ სიტყვაშ ირიათო გიმორკვიება ჩქინ რწმენას ამანგარენს. შედეგო, ჩქინ რწმენა აგურუ ჯას, ნამდგას ჩხვიჩხვეფ დიხას ტომბაშო აფჷ გოდგუმილ. პავლექ თეცალ აზრ მიშინუ, მუჟამსით კოლოსეშ კრებას მეჭარ. თიქ თქუ: „თეშ გილართით უფალ ქრისტე იესოწკუმა ართობას, მუჭოთ მიღით თინა, მუშენდა თიწკუმა ჩხვიჩხვეფ გაფნა გოდგუმილ, იშენებუთ დო იმანგარებუთ რწმენას“ (კოლ. 2:6, 7). მუჟამსით ირნერო ვეცადებუთ რწმენაშ გამანგარებას, ვართ სატანას დო ვართ თიშ ქვეყნიერებას ვეშიალებე, მიმოტებაფუან ჭეშმარიტებას გილულა (2 იოან. 8, 9).

13. მუ ვამკვენა დო მუშენ?

¹³ ჩქი ვამკვენა, ნამდა ქვეყნიერებას ბჯოგუთ (1 იოან. 3:13). იოანე გუმოშინანა: „მთელ ქიანა უბადოშ ხეს რე“ (1 იოან. 5:19). მუთ უმოს ხოლოს ვორეთ თე ქვეყნიერებაშ მოსპუალაწკუმა, სატანა უმოსო იჟღამებ (გამოცხ. 12:12). თინა ბრელით უმოს ძალიერ იარაღეფს გიმირინუანს, ვინემ უზნეობა დო განდგომილეფიშ ტყურეფ რე. თინა გიმირინუანს სასტიკ თხოზინს. სატანას უჩქჷ, ნამდა აკაბცხა დროქ დასქიდ ქადაგებაშ საქმეშ გაჩერებელო ვარდა ჩქინ რწმენაშ დასუსტებელო. ათეშენ ვამკვენა, ნამდა ბრელ ქიანას ჩქინ საქმიანობა შეზღუდულ ვარდა ვარიებულ რე. თეშ უმკუჯინუო, თეცალ ქიანეფს მახორუ ჩქინ და დო ჯიმალეფ მოთვინებას გიმირჩქინანა. თინეფ ამტკიცენა, ნამდა სატანაქ მუდგა ვაკეთასინ, შემლებნა გივორჯგინათ თის!

14. მუჭო შემლებნა ქიმვეხვარათ და დო ჯიმალეფს ჭეშმარიტებას გილულას?

¹⁴ და დო ჯიმალეფს ჭეშმარიტებას გილულას ქიმვეხვარათინ, გურშა ოკო მიბღათ თინეფიშ გაჭირება (1 იოან. 3:10, 11, 16—18). ხვალე თიმწკუმა ოკო ვეგმიფრჩქინათ ჸოროფა, მუჟამსით ირფელ ჯგირო რე; პრობლემეფიშ დროს ხოლო ოკო მიჸორდან ართიან. მაგალთო, ხომ ვეჩინენთ მითინს, მიდგას საჸოროფო ადამიან აფჷ ღურელ დო გურიშ ექექაფა ვარდა პრაქტიკულ მოხვარა ოსაჭირ? ვარდა ხომ ვა გაიგებნა, ნამდა თანაქრისტიანეფ სტიქიურ უბედრობაქ დაზარალ დო სამეფო დარბაზეფიშ ვარდა ჸუდეეფიშ გარემონტებას მოხვარა ოსაჭირნა? ჩქი ხვალე სიტყვეფით ვარინ საქმეეფით გიმიფრჩქინანთ დიდ ჸოროფას დო გურშა მემღუნა თანაქრისტიანეფიშ გაჭირება.

15. მუჭოთ 1 იოანეშ 4:7, 8-ს ჭარჷ, მუ ოკო ვაკეთათ?

¹⁵ მუჟამსით ართიანწკუმა ჸოროფას გიმიფრჩქინანთ, თეთ ჩქინ მოჸოროფე ზეციერ მუმაშ მაგალითის მეპჸუნთ (წეკითხით 1 იოანეშ 4:7, 8). ჸოროფაშ გიმორჩქინაშ ართ-ართ მნიშვნელოვან საშვალება ართიანიშ პატიება რე. მაგალთო, შილებე მიდგაინქ მოწყინებაფუან, მარა უკულ ბოდიშ ქომწუან. მუჟამსით ვაპატიენთ დო ვეგიფშინანთ თიშ შეცდომას, თეშნერო ჸოროფას გეგმიფრჩქინანთ (კოლ. 3:13). ართ ჯიმაქ, ალდოქ თეცალ პრობლემას შეხვად, მუჟამსით ჯიმაქ, ნამდგას მანგარ პატის ცენდჷ, გლახათ მიშინუ თიშ ეთნიკურ წარმომავლობა. ალდო იჩიებ: „ლოცვას ირიათო ფთხინდჷ იეჰოვას მოხვარას, ნამდა თე ჯიმაშე  გლახა ვამფიქრებუდკო“. მარა ალდოქ თეშე უმოს გაკეთ. თიქ გეგნოჭყვიდ, თე ჯიმაწკუმა მიდართკო მსახურებაშა. მუჟამსით ართო ქადაგენდეს, ალდოქ თე ჯიმას გეუნწყჷ, მუჭო უწყუნუ გურ თიშ სიტყვეფქ. ალდო იჩიებ: „მუჟამსით თე ჯიმაქ ქიგეგ, მუჭო მიწყუნუ გურ თიშ ნათქუელქ, ბოდიშ ქომწუ. თიშ ხონარიშ ტონშე ბგინაფლენდჷ, მუშმანწარათ ნარღენდჷ ნარაგადას. ჩქი თე პრობლემა ულირს ქიდიბტეთ დო ჯგირ მეგობრეფო ქუდოფსქიდით“.

16, 17. მუ ოკო მაფდან გინოჭყვიდილ?

¹⁶ მოციქულ იოანეს უჸორდჷ და დო ჯიმალეფ დო ათეშენ წუხენდჷ თინეფიშ სულიერ მდგომარეობაშე. თიშ გრძნობეფ არგამათ იძირე თი რჩევაშე, ნამუთ მუშ სუმხოლო წერილს ჭარჷ. მართალო გურიშემაკინალ რე თიშ რჩქინა, ნამდა იოანეცალ მოჸოროფე დო მზრუნველ ქომოლკათა დო ოსურკათა იმართველენა იესოწკუმა ართო ზეცას! (1 იოან. 2:27).

¹⁷ მორთ გურშა მიბღათ თე სტატიას გარჩიებულ რჩევა დო გინოჭყვიდილ მაფდან, ნამდა გილაფრთათ ჭეშმარიტებას, შხვა სიტყვეფით ქოფთქუათინ, ცხოვრებაშ არძა მხარეს დევემორჩილათ იეჰოვას. ქიდიბგურუათ ღორონთიშ სიტყვა დო მიღდან თიშ ნდობა. გუვავითარათ ძალიერ რწმენა იესოშ მიმართ. ოჭიშ ქურთინუათ ფილოსოფიას დო განდგომილეფიშ აზროვნებას. გავურზათ ჟირმაგ ცხოვრებაშ ცდუნებას დო ვეჩებდინათ ცოდვა. იფცხოვრათ იეჰოვაშ მაღალზნეობრივ ნორმეფით. თეს გეძინელ, ვაპატუათ თინეფს, მით გურს მიწყუნუანა, ქელუდირთათ თი თანაქრისტიანეფს, მიდგას მოხვარა ოსაჭირნა დო თეშნერო მივეხვარათ და დო ჯიმალეფს, სულიერო მტკიცას გერდან. შედეგო, მუდგა სირთულეს ვეშეფხვადათინ, გუვაგრძელენთ ჭეშმარიტებას გილულას.