1. Кӧп ака-эјелер јеҥил эмес кандый јӧптӧр чыгарган ла нениҥ учун?

БӰГӰНГИ кӱнде Кудайдыҥ миллиондор тоолу ишчилери Иеговага кӧптӧдӧ иштеерге турганынаҥ улам јеҥил эмес јӧптӧр чыгарат. Темдектезе, кӧп ака-эјелер биле тӧзӧбӧс деп сананып алгандар. А билелӱ улус эм тура балдарлу болбос деп сананып алган. Је балдарлу улус јӱрӱмин јеҥилтип јадылар. Бу ака-эјелер јаан сӱӱнчи алып, Иегова олордыҥ ончо керексиништерин јеткилдеер деп бир де алаҥзыбай јат. Је олор чӧкӧй бербес пе? Јок! Бис бого нениҥ учун алаҥзыбай јадыс? Нениҥ учун дезе Иегова алдындагы да ӧйдӧ бойыныҥ ишчилерине керектӱ ончо немени берген. Темдектезе, Кудай Авраамга, «бӱдӱп турган ончо улустыҥ адазына», алкыжын јетирген (Рим. 4:11).

2. а) Еврейлерге 11:8—10, 16-ла болзо, нениҥ учун Авраам Ур деп каланы артыргызарга белен болгон? б) Бис бу јӧрмӧлдӧ нени шӱӱжерис?

² Авраам Ур деп каладагы јакшы јӱрӱмин артыргызарга белен болгон. Нениҥ учун? Нениҥ учун дезе ол «бек тӧстӱ каланы» сакыган. (Еврейлерге 11:8—10, 16 кычырыгар.) А бу кандый «кала»? Бу «каланы» сакып тура, Авраамда кандый кӱчтер болгон? Бис Авраамнаҥ ла оныҥ темиле јӱрген эмдиги ӧйдиҥ ака-эјелеринеҥ кандый тем алар аргалу?

3. Авраам кандый «каланы» сакыган?

³ Авраамныҥ тыҥ сакыган «калазы» — Иисус Христос ло 144 000 майлаткан христиандардаҥ турган Кудайдыҥ Каандыгы. Павел бу Каандыкты «тирӱ Кудайдыҥ калазы теҥеридеги Иерусалим» деп адаган (Евр. 12:22; Ачыл. 5:8—10; 14:1). Иисус бойыныҥ ӱренчиктерин шак ла бу Каандыкты келзин деп мӱргӱӱрге ӱреткен. Бу Каандык Кудайдыҥ табын  јӱк ле теҥериде эмес, је јерде де бӱдӱрип салар (Матф. 6:10).

4. Башталганы 17:1, 2, 6 аайынча болзо, Авраам Иегованыҥ айдып койгон «калазы», ол эмезе Каандыгы, керегинде нени билер болгон?

⁴ Авраам Кудайдыҥ Каандыгы канайып тӧзӧлӧрин јакшы билген бе? Јок. Бу кӧп чактардыҥ туркунына «јажырылган [«агару», ЈТ] јажыт» болуп арткан (Еф. 1:8—10; Кол. 1:26, 27). Је андый да болзо, Авраам оныҥ балдарыныҥ кезиги каандар болор деп билген. Бу керегинде Иегова ого бойы айткан. (Башталганы 17:1, 2, 6 кычырыгар.) Авраам Иегованыҥ берген сӧзине майлатканды, ол эмезе Мессияны, кӧргӧн чылап тыҥ бӱткен. А Мессия Кудайдыҥ Каандыгыныҥ Кааны болор учурлу болгон. Оныҥ да учун Иисус иудейлерге мынайып айткан: «Слердиҥ адагар Авраам Мениҥ кӱнимди кӧрӧтӧнине сӱӱнип-јыргап јӱрген. Ол кӧрди де, сӱӱнди де» (Иоанн 8:56). Айдарда, Авраам оныҥ бала-барказы Иегованыҥ тургузып салган Каандыгында башкарарын билер болгон деп бир де алаҥзыбай јадыс. Мынаҥ улам Авраам Кудай берген сӧзин бӱдӱрер деп сакыырга белен болгон.

5. Авраам Кудайдыҥ берер болгон «калазын» сакыган деп, бис кайдаҥ билерис?

⁵ Авраам «каланы», ол эмезе Кудайдыҥ тургузып салган Каандыгын сакып турганын канайып кӧргӱскен? Баштапкызында, Авраам кандый да ороонныҥ албатызына кирбеген. Ол бир јерде узак јуртабай, јердиҥ каандарына јӧмӧшпӧй, кӧчкӱн кижи болуп јӱрген. Анайда ок Авраам бойыныҥ Каандыгын тургузарга албаданбаган. Ол Иеговага сӧсуккур болгон ло оныҥ берген сӧзиниҥ бӱдерин сакыган. Анайып Авраам Иеговага сӱреен тыҥ бӱткенин кӧргӱскен. Эмди, ондо кандый кӱчтер болгон ло оныҥ теминеҥ бис неге ӱренер аргалу деп кӧрӱп ийектер.

6. Ур кандый кала болгон?

⁶ Авраамныҥ артыргызып салган Ур деп калазы ӧскӧ калаларга кӧрӧ, јадарга эптӱ ле јакшы корулалган, бай кала болгон. Оны айландыра јаан стенелер ле ӱч јанынаҥ суулу оролор болгон. Ур деп каланыҥ улузы бичикчи ле чоттоп билер улус болгондор.  Археологтордыҥ табып алган ишле колбулу кӧп документтерин кӧрзӧ, саду калада ӧзӱм алынган. Улустыҥ јаткан туралары кирпичтеҥ тудулган, олордыҥ стенелери шыбалып, черетелетен. Кезик тураларда 13—14 кыптаҥ болотон, а чеденниҥ ич јанын таштарла јайып салатан.

7. Авраамга Иегова оны ла оныҥ билезин корулаар деп нениҥ учун тыҥ бӱдер керек болгон?

⁷ Авраамга Иегова оны ла оныҥ билезин корулаар деп тыҥ бӱдер керек болгон. Нениҥ учун? Нениҥ учун дезе Авраам ла Сарра Ур деген каладагы јеткер јок ло јакшы јӱрӱмин артыргызып, Ханаанныҥ јерлериле кӧчӱп јӱргендер. Эмди Авраамды ла оныҥ билезин корулайтан јаан стенелер де, тереҥ оролор до болбогон. Олорго кандый ла ӧйдӧ ӧштӱлер табарар аргалу болгон.

8. Авраамда бир катап кандый кӱчтер болгон?

⁸ Авраам ончо немени Иегованыҥ јакарганы аайынча эткен. Је кандый да ӧйдӧ ого билезин азыраарга кӱч боло берген. Иегованыҥ ого барзын деп айдып берген јеринде ачана-торо башталган. Айалга там ла кӱч боло берерде, Авраам билезиле бир кезек ӧйгӧ Египет јаар кӧчӧ берген. Је Египетте фараон Сарраны ӱйи эдип аларга, оны Авраамнаҥ айрып, бойыныҥ ӧргӧӧзине јатыргызып алган. Сананып ийзеер де, Иегова фараонды кату каруузына тургузып, фараон Сарраны божотпогончо, Авраамга кандый кӱч болгонын! (Баш. 12:10—19).

9. Авраамныҥ билезинде кандый кӱчтер болгон?

⁹ Авраамныҥ билезинде де уур-кӱчтер болгон. Оныҥ сӱӱген ӱйинде, Саррада, балдар болбогон. Бу олорго канча јылдардыҥ туркунына ачу экелген. Учы-учында Сарра олорго балдар чыгарып берзин деп, Авраамга бойыныҥ јалчызын Агарьды берип јат. Је Агарь Измаилле барланып калала, Сарраны јабыс кӧрӧр болгон. Мынаҥ улам Сарра Агарьды базынып баштаарда, ол оноҥ кача берген (Баш. 16:1—6).

10. Авраамныҥ Иеговага тыҥ бӱдӱп турганы кандый учуралдарда ченелген?

¹⁰ Учы-тӱбинде Сарра карынду болуп, Авраамга уул бала чыгарып берген. Ол оны Исаак деп адаган. Авраам бойыныҥ уулдарын, Измаилди де, Исаакты да сӱӱген. Је јаан уулы огожына јаман баштанар болгон. Оныҥ учун Авраамга Измаилди ле Агарьды айылынаҥ чыгара сӱрӱп ийерге келишкен (Баш. 21:9—14). Кӧп јылдар ӧткӧн кийнинде Иегова Авраамды Исаак уулын тайылгага берзин деп сураган (Баш. 22:1, 2; Евр. 11:17—19). Бу эки учуралда Авраамга Иегова Исаак ла Измаил керегинде айткан сӧстӧриниҥ ончозын кыйалта јогынаҥ бӱдӱрип койор деп бир де алаҥзыбас керек болгон.

11. Нениҥ учун Авраамга Иегованы чыдажып сакыыр керек болгон?

¹¹ Авраамга кӧп јылдардыҥ туркунына Иегова бойыныҥ сӧзин бӱдӱрер деп чыдажып сакыыр керек болгон. Авраам билезиле кожо Ур деп каладаҥ чыгарда, ол 70 јаштаҥ ажа берген болор (Баш. 11:31—12:4). Ол јӱс јылдаҥ ажыра байкандарда јадып, Ханаанныҥ јерлериле кӧчӱп јӱрген. Авраам 175 јашту болордо божогон (Баш. 25:7). Је Иегова оныҥ бала-барказына берер болгон јерин канайып бергенин ол анайып ла кӧрбӧгӧн. Анайда ок ол тыҥ сакыган «калазы», ол эмезе Кудайдыҥ Каандыгы, тургузылган ӧйгӧ јетире јӱрбеген. Андый да болзо, Агару Бичикте айдылганыла ол јӱрӱмниҥ бастыра јанын толо јӱрӱп божогон (Баш. 25:8). Јӱрӱминде кӱч ченелтелер де болгон болзо, ол Иеговага тыҥ бӱдӱп, оны сакыырга белен болгон. Авраамга ченелтелерди ӧдӧргӧ не болушкан? Иегова оны бастыра јӱрӱмине корулаган ла оныҥ најызы болгон (Баш. 15:1; Иса. 41:8; Иак. 2:22, 23).

12. Бис ончобыс нени сакып јадыс? Оноҥ ары бис нени шӱӱжерис?

 ¹² Бис, Авраам ла чылап, «бек тӧстӱ каланы» сакып јадыс. Је биске бу каланыҥ тӧзӧлӧрин сакыыры керек јок. Нениҥ учун дезе Кудайдыҥ Каандыгы 1914 јылдаҥ ала теҥериде башкарып јат (Ачыл. 12:7—10). Бис бу башкару јерле башкарарын сакып јадыс. Је эм тура бисте Авраам ла Сарраныҥ кӱчтерине тӱҥей кӱчтер болуп јат, је бис олордоҥ тем алар аргалу. «Каруулчы шибееде» ака-эјелердиҥ биографияларын кычырып, бистиҥ де ӧйдӧ кӧп ака-эјелер Кудайга, Авраам ла Сарра чылап, тыҥ бӱдӱп, чыдамкайын кӧргӱзет деп кӧрӱп јадыс. Је эмди бир канча биографияларды эске алып, олор бисти неге ӱредет деп сананып ийектер.

13. Билл Уолдениҥ теми слерди неге ӱредет?

¹³ Кудайга иштеерге, та нени де артыргызарга белен болыгар. Кудайдыҥ Каандыгы баштапкы јерде болзын деп турган болзоос, биске, Авраам ла чылап, Кудайды сӱӱндирерге, та нени де артыргызарга белен болор керек (Матф. 6:33; Марк 10:28—30). Билл Уолден аканыҥ темин кӧрӱп ийектер *. Ол 1942 јылда университетти божодып, архитектурный проекттер тургузатан бакалаврдыҥ степенин алар учурлу болгон. Бу ок ӧйдӧ ол Иегованыҥ Керечилериле таныжып, Агару Бичикти ӱренерге јӧпсинген. Бир канча ӧйдӧҥ Билдиҥ ӱредӱчилериниҥ бирӱзи оны ӱредӱзин божоткон кийнинде иштезин деп, бир фирмала куучындажып салган. Је Билл јӧпсинбеген. Ол ийде-кӱчин карьерага эмес, је Кудайдыҥ ижине берерге турган деп јартап берген. Мыныҥ кийнинде јаан удабай Билди черӱге алдырткан. Ол черӱге барбаска турганын тоомјылу јартап берерде, оны США-ныҥ 10 000 долларына штарфтап, беш јылга тӱрмеге отургызып салган. Ӱч јылдаҥ Билди тӱрменеҥ чыгарып ийген. Мыныҥ кийнинде ол Галаад Сургалдыҥ ӱредӱзин божодып, Африкада миссионердиҥ ижин баштаган. Оноҥ Билл Ева деп сыйынла биле тӧзӧп, оныла кожо Африкада  миссионерлер болуп, оноҥ ло ары иштеген. Бир канча јылдар ӧткӧн кийнинде, олор Билдиҥ энезин кичеерге, США дӧӧн јанып келгендер. Ӧткӧн јӱрӱми керегинде Билл мынайып куучындайт: «Мен андый ырысту кижи! Иегова меге јаан ајару эдип, бойыныҥ табын бӱдӱрерге, 70 јылдаҥ ажыра тузаланганына јаан быйанду болодым. Мен Иеговага оныҥ ижин баштапкы јерге тургузарга болушканына јаантайын быйаным айдып јӱредим». А слер Иеговага ӧйигерди толо берип, иштеер аргалу ба?

14, 15. Аристотелис ле Элени Апостолидистердиҥ теми слерди неге ӱредип јат?

¹⁴ Слерде кӱчтер болбос деп сананбагар. Авраамныҥ јӱрӱмин кӧргӧнисте Иеговага јӱрӱмин учурлап та салган улуста кӱчтер тӱҥей ле болуп јат (Иак. 1:2; 1 Пет. 5:9). Мыны Аристотелис Апостолидис * аканыҥ теминеҥ кӧрӱп јадыс. Ол 1946 јылда Грецияда сууга чӧҥӱрилген. А 1952 јылда Элени деп сыйынла алыжар болуп, экӱ Иеговага ӧйин толо берип иштеерге кӱӱнзегендер. Је Элени тыҥ оорый берген. Эмчилер оныҥ меезинеҥ опухоль тапкан. Ого операция эдип, опухольды јоголтып салган. Је тойдыҥ кийнинде бир канча јылдар ӧдӧ берерде, опухоль ойто табылган. Экинчи операцияныҥ кийнинде, Элениниҥ сол јаны иштебей, ол јакшы куучынданып албай барган. Је бойыныҥ оору-јоболына да, анайда ок ол ӧйдӧги Грецияныҥ јаҥдары Иегованыҥ Керечилерин истежип турганына да кӧрбӧй, Элени јарлаар иште эрчимдӱ турушкан.

¹⁵ Аристотелис оору ӱйин 30 јыл кичееген. Бу јылдарга ол аксагал болуп иштеген, курултайлардыҥ башка-башка комитеттеринде турушкан ла курултайдыҥ Тураларын тударына болушкан. 1987 јылда јарлап турган ӧйдӧ Элениле јеткер болгон. Ол ӱч јылга комада бололо, божоп калган. Ӧткӧн јӱрӱмин сананып, Аристотелис ака мынайып куучындайт: «Јӱрӱмимде болгон уур-кӱчтерди ле сакыбаган јанынаҥ болгон ченелтелерди ӧдӱп чыгарга, меге чыдамкай ла турумкай болорына ӱренер керек болгон. Иегова меге ончо уур-кӱчтерди ӧдӱп чыгарга, керектӱ  ийде-кӱчти јаантайын берип туратан» (Сар. 94:18, 19). Кандый ла ченелтелерге кӧрбӧй, акту јӱрегинеҥ иштеп турган ишчилерин Иегова тыҥ сӱӱп јат.

16. Нейтан Норр бойыныҥ ӱйине кандый јӧп берген?

¹⁶ Келер ӧйдиҥ кайралын ундыбай јӱригер. Авраам Иегованыҥ берер болгон кайралын ундыбай јӱрген. Бу дезе, ого кӱчтерди ӧдӧргӧ болушкан. Одри Хайд эје база јакшы кӱӱн-санаалу болорго албаданган. Оныҥ баштапкы ӧбӧӧни, Нейтан Норр рактаҥ божогон. А экинчи ӧбӧӧни, Глен Хайд, Альцгеймера деп оорунаҥ шыралаган *. Одри эјениҥ айтканыла, ого Норрдыҥ божоор алдында канча да неделе озо айткан сӧстӧри болушкан. Нейтан меге мынайып айткан деп куучындаган: «„Ӧлӱм — ол учы эмес. Бисте бек ижемји бар, бис база качан да шыралабазыс“. Оноҥ ол мениҥ кӱӱн-санаамды кӧдӱрип: „Ичкери кайралыҥа кӧр“ — дейле, оноҥ айткан: „Ӧскӧ улуска болужып, кӧп иштенип јӱр, бу сеге сӱӱнчиҥди јылыйтпаска болужар“». Улуска болужып, ижемји бар деп сӱӱнип јӱригер деп айдылган јӧп бистерге сӱрекей јаан тузалу болот (Рим. 12:12).

17. а) Бис келер ӧйгӧ нениҥ учун алаҥзыбай кӧрӧр аргалу? б) Михей 7:7-де бичилген сӧстӧр Иегованыҥ кайралын аларга, биске канайып болужар?

¹⁷ Биске бӱгӱн келер ӧйдиҥ кайралын алдындагызына кӧрӧ, оноҥ тыҥ сакыыр керек. Нениҥ учун дезе телекейде болуп турган айалга бис калганчы кӱндердиҥ учында јададыс деп кӧргӱзет. Удабас бистиҥ сакып турган «бек тӧстӱ калабыс» бастыра јерле башкарар. Бисти кӧп алкыштар сакып јат. Темдектезе, бис божоп калган јуук улузысты кӧрӧрис. Ол ӧйдӧ бӱдӱмјизи ле чыдамкайы учун кайралды Авраам да алар. Иегова ого ло оныҥ јуук улузына јерде болотон ӱргӱлји јӱрӱмди сыйлаар. Слер олорды кӧрӧргӧ кӱӱнзейдеер бе? Авраам чылап, Кудайдыҥ Каандыгына болуп, та нени де артыргызып турган болзогор, анайда ок кӱч ӧйлӧрдӧ бӱдӱмјигерди тыҥыдып, Иегованы чыдажып сакыырга ӱренип турган болзоор, слер олорды кӧрӧр аргалу. (Михей 7:7 кычырыгар *.)