1. ˈAlomanay salikaka kinafalahay to maanan hani? Hano mihaen ko demak nangra hani?

ITINIAY icowacowa pala a ˈalomanay salikaka makahiay kinafalah, roma tamdaw cowa ka ciraramod, roma ciramodayto a tamdaw misaˈosiay eca ka ciwawa, roma paro no lomaˈ kantangay ko kaˈorip. Mihaen ko demak nangra pakayniay i kalimlaan a patosokan, misarocod a matayal saki Yihofaan. Marenecay cangra, pakasoˈlinayho to dadimokosen ni Yihofa cangra. Cowa ko mamatoled cangra! Hano mafanaˈ kita hani? Samanen i nolitengan, mihaenay ci Yihofa a midimokos to sikawdan Ningra. O cecay tinakoan i ci Apraham, adihayay ko malifokay ningra a sapalemed ni Yihofa, sowal no Fangcalay Cudad, ci Apraham malo wamaay no ‘pakasoˈlinay ko falocoˈ a tamdaw.’—Loma 4:11.

2. (1) Mikitini Hipray 11:8-10, 16, hano makahi ci Apraham miliyas to Ur hani? (2) Oniya lalakaw wa milengo to maanan a salicay hani?

² Salo sanay ci Apraham a misawad to sinowayay a kaˈorip, miliyas to Ur a niyaroˈ. Misamanay hani? Samanen ‘mitalaay to soˈlinay palamiten a niyaroˈ, cingra. (ˈOsien ko Hipray 11:8-10, 16.) Ora ‘niyaroˈ’ o maanan ko mitoroˈan? Itini pitala ningra to pipatireng toniya niyaroˈ a tatokian, tahalifaay to maanan pasangaray? Sasamaan kita minanam cingraanan? Aniniay lintad ˈalomanay salikaka mitodongay ci Aprahaman, wa ngaˈay kita mikitira cangranan minanam to maanan?

3. O mitalaan ni Apraham a niyaroˈ o maanan ko mitoroˈan hani?

³ O mitalaan ni Apraham a niyaroˈ o Hongti Kitakit no Kawas, oniya Hongti Kitakit ci Yis Kristo ato 144,000 tatayra kakarayan  a Krisciyang ko mikapotay, panganganan ni Pawlo ko Hongti Kitakit no Kawas to ‘niyaroˈ no soˈlinay Kawas, kakarayan a Yirusalim.’ (Hipray 12:22; Paˈarawan 5:8-10; 14:1) Pasifanaˈan ni Yis ko nisawawaan itini satolon a micangacang to kaira noniya Hongti Kitakit, ano mihaen wa malaˈosi ko araaw no Kawas itini fafekang no sera, malecad i kakarayan.—Matay 6:10.

4. Mikitini Satapangan17:1, 2, 6, pakayni mikiˈokan ni Yihofa a Hongti Kitakit no Kawas, hakowaay ko kafanaˈ ni Apraham hani?

⁴ Samanay ko pikapot to Hongti Kitakit no Kawas, mafanaˈay ci Apraham to polong a demak han? Cowa. Samanen itini halafinay tatokian, oniya demak o ‘fangcalay pakakemoday a demak.’ (Ifiso 1:8-10; Kolosay 1:26, 27) Kawra mafanaˈay ci Apraham, o papina a teloc ningra o mamalo hongti, samanen na mikiˈokan ni Yihofa cingra toniya demak. (ˈOsien ko Satapangan 17:1, 2, 6.) Tanektekay ko pakasoˈlin ni Apraham to sakiˈok no Kawas, malecaday o pakaˈarawayto ci Misiyaan, oya mamala hongti no Hongti Kitakit no Kawas no ikor. Mansa mihaen ko sowal ni Yis to Yutaya tamdaw: ‘O lalitengan namo ci Apraham lipahakay a mitokel a pakaˈaraw to romiˈad ako, lipahakay cingra a pakaˈaraw.’ (Yohani 8:56) Mafanaˈay ci Apraham to roma teloc ningra o mamikapot malo Hongti Kitakit, oniya Hongti Kitakit ci Yihofa ko patirengay, mansa makahiyay cingra mihadidi mitala to kalaˈosi no sakiˈok ni Yihofa.

5. Hano mafanaˈ kita to mitalaay ci Apraham to Hongti Kitakit no Kawas hani?

⁵ Hano mafanaˈ kita to mitalaay ci Apraham to Hongti Kitakit no Kawas hani? Saka 1, cowa ka malo finawlan no cecay kitakit cingra, salinalinah sanay ko kaˈorip ningra, cowa ka saˈosi ko kitiraan, cowa ka pidama to cecay hongti. Saka 2, cowa ka patireng ci Apraham to niyah a kitakit, padotocay cingra midofdof ci Yihofaan, mihadidi mitala to palaˈosi no Kawas to sakiˈok Ningra. O pakasoˈlin ni Apraham ci Yihofaan tada kasemeranto! Dotoc, nengnengen ita o maanan ko masiˈayaway ningra a sapalifet, ato ngangaˈay kita mikitira cingranan minanam to maanan.

6. Masamaanay a niyaroˈ ko Ur hani?

⁶ O nalacolan ni Apraham a niyaroˈ i Ur o rihadayay sinowayay, hanaca o kadofahay  a niyaroˈ itiya. Oniya niyaroˈ ˈakawangay ko ˈadipel, i taliyok iraay ko sapidipot to niyaroˈ a ˈalo. O Ur a tamdaw mafanaˈay mitilid ato misaˈosi. Ano nengnengen o satenokan no misasingdiay ko Ur, adihayay ko materekay mitilidan a lalakaw no misasingdiay. Tano lingkaan ko lomaˈ patireng, misiakian ko cafeng, miecadan to kohecalay. O potal no roma lomaˈ misikalan ko fakeloh, i taliyok 13 tangasa 14 ko kafotiˈan.

7. Hano papakasoˈlin ci Apraham ci Yihofaan to mamidipot cingranan ato paro no lomaˈ ningra hani?

⁷ O mamarocek ko pitadiˈec ni Apraham ci Yihofaan to mamidipot cingranan ato paro no lomaˈ ningra. Tiya miliyas to sinowayay a lomaˈ i, itini sanay i kohkoh a pakopang, awaayto ko sadipot no ˈalo ato ˈadipel, madoloayto malood no ˈada cangra.

8. Tahalifaay ci Apraham to maanan a pasangaray hani?

⁸ Tooran ni Apraham ko limoˈot no Kawas a mafolaw, kinacecayay cangoˈotay ko kakaenen sapaliliˈ to paro no lomaˈ. Samanen ora katayraan nangra a pala makedalay, hato keriden ningra ko paro no lomaˈ malinah tayra i Icip. Tahira i Icip i, miˈafasan ni Falaw ko fafahi ningra ci Sara, tada calemcemay ci Apraham itiya, kao ngaˈayay palimoˈotan ni Yihofa ci Falaw patikolen ci Sara ci Aprahaman.—Satapangan 12:10-19.

9. Paro no lomaˈ ni Apraham iraay ko maanan a pasangaray hani?

⁹ O kaˈorip no paro no lomaˈ ni Apraham cowa ka sahto saan o rihadayay. Soˈlin maolahay cingra to fafahi ci Saraan, kawra cowa ka ciwawa ci Sara, adihayay a mihecaan, cariraway cangra toniya demak. Ikor pafelian ni Sara ci Apraham ci Hakaran malo fafahi, mitokel ira ko wawa ningra. Kawra, mapoyapoy ci Hakar ci Ismailan i, misakahmaway ci Saraan, marawraway ko kalalaˈed no paro no lomaˈ nangra, mansa laplapen ni Sara ci Hakar.—Satapangan 16:1-6.

10. O maanan a demakan palifetay to pakasoˈlinay falocoˈ ni Apraham hani?

¹⁰ Saikor mapoyapoyayto ci Sara, mahofoc ci Isakan. Ci Ismail aci Isak o kaolahan ni Apraham a wawa. Kawra ikor misamsaman ni Ismail ci Isak, hato misaalian ni Apraham ci Hakar aci Ismail a miliyas. (Satapangan 21:9-14) Ikor no pina miheca, palimoˈotan ni Yihofa ci Apraham mipatoˈaya ci Isakan. (Satapangan 22:1, 2; Hipray 11:17-19) Toniya tosa a demak, marocekay ko pitadiˈec ni Apraham ci Yihofaan, pakasoˈlin to papalaˈosien Ningra ko pakayniay toniya tosa wawa a sakiˈok.

11. Hano misaaliay ci Apraham mihadidi a mitala ci Yihofaan hani?

¹¹ Hakelong no kaˈorip ni Apraham wa mihadidi a mitala ci Yihofaan. Mikerid cingra to paro no lomaˈ miliyas to Ur i, 70 ko mihecaan alatek. (Satapangan 11:31-12:4) Lalomaˈ no 100 miheca, itini sanay i pakopangan ko kitiraan, itini pala no Kanang misalinalinah. 175 ko mihecaan, mapatayay ci Apraham. (Satapangan 25:7) Kawra, cowa pakaˈaraw cingra to kalaˈosi no sakiˈok ni Yihofa, pafeli to Kanang a pala i teloteloc ningra, cowa pakaˈaraw toya ‘niyaroˈ’, oya Hongti Kitakit no Kawas a mapatireng. Soˈlin mahaen, sowal no Fangcalay Cudad ci Apraham ‘matoˈas a marenec ko kapatay.’ (Satapangan 25:8) Soˈlin adihayay ko malifaay ni Apraham a roray, padotocay pakasoˈlin cingra ci Yihofaan, makahi a mitala ci Yihofaan. Hano ngaˈay cingra tahatolas ko pihadidi hani? Samanen i hakelong no kaˈorip ningra, padotocay ci Yihofa a midipot cingranan, pala ngaˈayay a widang cingranan.—Satapangan 15:1; Isaya 41:8; Yakop 2:22, 23.

12. Wa mitala kita to maanan hani? Dotoc wa minengneng to maanan hani?

¹² Malecad ci Aprahaman, oha mamitala kita toya ‘iraay ko soˈlinay palamiten a niyaroˈ.’ Kawra cowa ko mamitala kita to pipatireng  toya niyaroˈ, samanen itini 1914 miheca mapatirengayto ko Hongti Kitakit no Kawas, misatapang i kakarayan a mikowan. (Paˈarawan 12:7-10) O tatalaen ita i, o pikowan noniya Hongti Kitakit to polong a cikiw. Kawra, itini pitalaan a tatokian, o mamalecad kita ci Aprahaman aci Saraan tahalifa to pasangaray alatek. Aniniay lintad a salikaka mitodongay to ngaˈayay taˈarawan ni Apraham, adihayay ko matiliday a nalifetan no tamdaw i Mikecolay, malecaday cangra ci Aprahaman aci Saraan ira ko pakasoˈlinay ci Yihofaan, padotocay a mihadidi mitala to pipalaˈosi no Kawas to sakiˈok Ningra. Dotoc nengnengen ita ko pina tinakoan, ato mamananam ita ko maanan.

13. Mikitini nalifetan no salikaka ci Pie mananam iso ko maanan?

¹³ Makahi a kinafalah. Ano sasalakat kita a micangacang to Hongti Kitakit no Kawas, o tatodongen ita ci Apraham makahi pakayni ci Yihofaan a kinafalah. (Matay 6:33; Marko 10:28-30) Nengnengen ita ko tinakoan no salikaka ci Pie Oeten. * 1942 miheca, misatapangay ci Pie malacafay to Misawacayay Tamdaw ni Yihofa minanam to Fangcalay Cudad. Itiya itiniay cingra i Padaka no patirengay a picudadan, hanaca o mamicodiyapto. O singsi ni Pie patadoay cingranan milimasmas to katayalan, kawra cowa ka picada cingra, samanen maharekayto cingra misaˈosi tano adihayay toki a matayal saki Kawasan, caay kakahi micangacang to adihayay ko lifon a tayal. Caka halafin, macadaay ni Pie ko sakalasofitay a safanaˈ, kawra manaˈayay cingra a malingad, telocto masayfangay to 1 emang no Padaka payci ato mapalit to 5 miheca. Tolo miheca mapalit matedalayto. Ikor, matahidangay cingra tayra Kiliyat picudadan, micodiyap manilnilay tayra i Afrika malo milakowitay to riyar a mitosilay. Ikor mararamoday ci Pie aci Iwaan, itiniay i Afrika tatosa a matayal, adihayay ko kinafalah nangra itira. Ikor misaaliay to dadimokosen ko wina ni Pie, patikolay cangra i Padaka. Sanay ko pitolas ni Pie to nalifetan no niyah: “Ano maharateng ko pisaka dademak ni  Yihofa to niyah to 70 mihecaan, tiloc sanay ko losaˈ ako. Marariday kako miakoˈid ci Yihofaan mikayat takowanan matatodong ko mipiliˈan, mihodop Cingranan malo tayal no hakelong no kaˈorip.” Wa ngaˈay kiso miemin to toki misakafah i hakelong no kaˈorip han?

14-15. Mikitini i milifetan ni Alisetote mananam iso ko maanan hani?

¹⁴ Hamaan halamham to rarihaday ko kaˈorip. Mikitini nalifetan ni Apraham ngaˈay mahapinang ita, o madimadiay midoko to Kawas a tamdaw o tatahalifa to roray. (Yakop 1:2; 1 Pitiro 5:9) Salikaka ci Alisetote * marorayay ko kaˈorip. 1946 miheca, itiniay cingra i Kirisiya micada to paputisem. 1952 miheca, mikotiyaay ci Aylaynian, makalimay cangra misarocod matayal saki Yihofaan. Kawra ci Aylayni iraay ko lifawa no ponoˈ ningra. Ikor no mikerit lifawa mararamoday cangra, kawra caka pina miheca, malaliyaway ko adada ni Aylayni. Ikor no tokaden, cowato kangaˈay tatemik ko tireng ni Aylayni, mafiyoray ko saka somowal a inaneng ningra. Soˈlin cakangaˈay romakat, misiˈayawayho to sapalak no mikowanay, kamayanho fanekfek cingra a mirienang to mitosilay demak.

¹⁵ 30 miheca ci Alisetote a midimokos to fafahi. Toniya tatokian, malo malohemay malitengay cingra, midama misaday to kasapala taykay, mirienagho patireng to pitaykayan. Ikor, itini 1987 miheca, itini pitosilan mifekaday ko pades ni Aylayni. Toloay miheca a mapehel cingra, salikor mapatayay. Mitolas ci Alisetote to nalifetan ningra sanay: “Adihayay mihecaan, adihayay ko masiˈayaway ako a pasangaray demak, kafahalan a demak taˈediˈedip sanay ko pasangaray, misaaliay kako to taˈangayay pihadidi ato ka tanektek ngaˈ ngaˈay. Nikawrira, pafeliay ci Yihofa takowanan to haˈicel, padama takowanan pakaremo to pasangaray.” (ˈOlic 94:18, 19) O salikaka itini pasangaray pakayraan kamayan misarocod a matayal saki Yihofaan, maedeng tangongolay ko olah ni Yihofa cangraanan.

16. Salikaka ci Nolo pafeliay i fafahi ningra to maanan sapaini hani?

¹⁶ Ka picerid miharateng to hatokel. Marariday ci Apraham midotim to halifon no ikor, padamaay konini cingranan miremo to masiˈayaway  a pasangaray. Nengnengen ita ko nalifetan no fafahiyan salikaka ci Awteli. Saka cecay faˈinay ningra ci Nisen Nolo o ekang ko sakapatay, saka tosa faˈinay ci Kelon Hayte ciadadaay to hinapawanay a adada, kawra cowa ka mapawan ningra ko hatokel no ikor. Sanay ko sowal ni Awteli, ˈayaw no mapatay ko salikaka ci Nolo taˈangayay ko sadama no sapaini cingranan. Sanay cingra: “Patalipaˈelalay ci Nisen takowanan: Soˈlin mapatay ko tamdaw, kawra iraay ko tanektekay a hatokel, noikor cowa to ko mamiemem to masakenaay a adada, . . . ka pasiˈayaw kiso a mitapal, samanen itiniay i kaˈayaw ko halifon . . . ka ˈifowa to ciepocay a tayal, patafang to niyah matayal saki tao. Mihaen, o lalipahak ko kaˈorip iso.” Matatodongay koniya sapaini, ano mararid kita a padama to tao, ‘pakayni hatokel a lipahak,’ mihaen o tatahatolas a mihadidi.—Loma 12:12. *

17. (1) Hano iraay ko lalangian ita mihamham to hanoikor hani? (2) Mikitini Mika 7:7, sasamaan ko hademak ita ngaˈ milifok to noikoran a sapalemed hani?

¹⁷ Anini, ikakaay ko adihay no lalangian ita mitokel to hanoikor, samanen mahapinangay ko pakayraan no hekal, itiniay kita i salikoray no lekakawa maˈorip. Caka halafin, cowato ko mamitala kita, oya ‘soˈlinay palamiten a niyaroˈ’ mamikowanto polong a cikiw! Itiya wa adihay ko malifokay ita a sapalemed, o cecay i, maˈaraw ko mapatayay salawina patikol a maˈorip. Pakayni pakasoˈ lin ato pihadidi ni Apraham o papalifonen ni Yihofa cingra, miliyaw paˈorip cingranan ato paro no lomaˈ ningra. Wa itini kiso i Lakoing a militemoh cangranan han? Ano malecad kiso ci Aprahaman, makahi a pakayni Hongti Kitakit no Kawas a kinafalah, itini pasangaray a pakayraan kamayan madimadi to Kawas, hanaca mihadidi a mitala to pipalaˈosi ni Yihofa to sakiˈok Ningra, mihaen wa ira ko hatiniay a toki iso.—ˈOsien ko Mika 7:7.