1. Anong mga pagsasakripisyo an ginigibo nin dakul, asin taano?

MINILYON na lingkod nin Diyos ngunyan an naggigibo nin mga pagsasakripisyo. Pinili nin dakul na brother asin sister na magdanay na daing agom. May mga mag-agom na nagdesisyon na dai nguna mag-aki. May mga pamilya na pinagdadanay na simple an saindang pamumuhay. Gabos sinda nagdesisyon nin arog kaiyan huli sa sarong mahalagang dahilan—gusto nindang paglingkudan si Jehova sa abot kan saindang makakaya. Kontento sinda asin nagtitiwala na itatao ni Jehova an gabos na bagay na talagang kaipuhan ninda. Masasayang daw an pagtitiwala nindang iyan? Dai! Taano ta nasabi niyato iyan? An sarong dahilan iyo na binendisyunan ni Jehova si Abraham, an “ama kan gabos na may pagtubod.”—Roma 4:11.

2. (a) Sigun sa Hebreo 11:8-10, 16, taano ta andam si Abraham na bayaan an Ur? (b) Ano an pag-uulayan ta sa artikulong ini?

² Andam na binayaan ni Abraham an saiyang komportableng buhay sa siyudad nin Ur. Taano? Huli ta hinahalat niya “an siyudad na igwa nin tunay na mga pundasyon.” (Basahon an Hebreo 11:8-10, 16.) Ano “an siyudad” na iyan? Anong mga kadipisilan an napaatubang ki Abraham mantang hinahalat niya na maitugdok an siyudad na iyan? Asin paano ta maaarog si Abraham saka an mga lingkod ni Jehova sa satong panahon na inarog an halimbawa niya?

3. Ano an siyudad na hinalat ni Abraham?

³ An siyudad na hinalat ni Abraham iyo an Kahadian nin Diyos. An minakompuwesto sa Kahadian na iyan iyo si Jesu-Cristo asin an 144,000 na linahidan na Kristiyano. Inaapod ni Pablo an Kahadian na “sarong siyudad kan buhay na Diyos, an langitnon na Jerusalem.”  (Heb. 12:22; Kap. 5:8-10; 14:1) Tinukduan ni Jesus an saiyang mga disipulo na ipamibi an Kahadian na iyan, na hinahagad na dumatong iyan para mangyari an buot nin Diyos sa daga kun paano sa langit.—Mat. 6:10.

4. Uyon sa Genesis 17:1, 2, 6, gurano kadakul an aram ni Abraham manungod sa siyudad, o Kahadian, na ipinanuga nin Diyos?

⁴ Aram daw ni Abraham an mga detalye kun paano oorganisaron an Kahadian nin Diyos? Dai. Sa laog nin dakul na siglo, “sagradong hilom” an mga detalyeng iyan. (Efe. 1:8-10; Col. 1:26, 27) Pero aram ni Abraham na may mga gikan siyang magigin mga hadi. Espesipikong ipinanuga iyan saiya ni Jehova. (Basahon an Genesis 17:1, 2, 6.) May makusugon na pagtubod si Abraham sa mga panuga nin Diyos na garo baga nahihiling niya an Linahidan, o an Mesiyas, na magigin Hadi kan Kahadian nin Diyos. Iyan an dahilan kaya nasabi ni Jesus sa mga Judio kan panahon niya: “An saindong amang si Abraham naugmang marhay sa paglaom na mahiling an sakuyang aldaw, asin nahiling niya iyan asin nag-ugma siya.” (Juan 8:56) Malinaw na aram ni Abraham na an mga gikan niya magigin kabtang nin sarong Kahadian na iiestablisar ni Jehova, asin andam siyang maghalat na utubon ni Jehova an panugang iyan.

5. Paano ta naaraman na hinahalat ni Abraham an siyudad na dinisenyo nin Diyos?

⁵ Paano ipinahiling ni Abraham na hinahalat niya an siyudad, o Kahadian, na dinisenyo nin Diyos? Inot, dai nagin kabtang si Abraham nin ano man na kahadian sa daga. Paburubalyo siya nin istaran, na piniling dai magpirmi sa sarong lugar asin dai magsuportar sa siisay man na tawong hadi. Dugang pa, dai siya nag-establisar nin sadiri niyang kahadian. Imbes, padagos siyang nagsunod ki Jehova asin naghalat na utubon Niya an Saiyang panuga. Sa paggibo kaiyan, nagpahiling si Abraham nin ekstraordinaryong pagtubod ki Jehova. Pag-ulayan ta an pira sa mga kadipisilan na napaatubang saiya, asin aramon ta kun ano an manunudan niyato sa saiyang halimbawa.

6. Anong klaseng siyudad an Ur?

⁶ An siyudad na binayaan ni Abraham ligtas saka komportable, asin an mga tawo duman edukado saka mayaman. Pinoprotektaran iyan nin dakulang lanob saka nin mahiwas asin hararom na kanal sa tulong gilid kaiyan. An mga taga Ur matibay sa pagsurat saka sa aritmetik. Asin minalataw na an siyudad sentro nin negosyo; dakul na dokumento sa negosyo an nakutkot sa  lugar na iyan. An mga harong gibo sa ladrilyo; an mga lanob pinalitadahan dangan pininturahan nin puti. An nagkapira sa mga harong na ini may 13 o 14 kuwarto na nakapalibot sa sarong patyo na an salog gibo sa gapo.

7. Taano ta kinaipuhan ni Abraham na magtiwala na poprotektaran siya ni Jehova asin an pamilya niya?

⁷ Kinaipuhan ni Abraham na magtiwala na poprotektaran siya ni Jehova asin an pamilya niya. Taano? Girumdumon na binayaan ni Abraham asin Sara an saindang ligtas asin komportableng harong sa siyudad nin Ur para mag-istar sa mga tolda sa mga kalangtadan kan Canaan. Mayo nang dakulang lanob saka mahiwas asin hararom na kali na maprotektar saiya asin sa saiyang pamilya. Imbes, madali na sana sindang maatake nin mga kaiwal.

8. Sa sarong pagkakataon, ano an kinaipuhan na atubangon ni Abraham?

⁸ Ginibo ni Abraham an kabutan nin Diyos, pero sa sarong pagkakataon, nasakitan siyang matawan nin kakanon an saiyang pamilya. Kinaipuhan niyang atubangon an grabeng tiggutom sa mismong daga kun sain siya pinaduman ni Jehova. Grabe an tiggutom na iyan kaya nagdesisyon si Abraham na temporaryo sindang magbalyo sa Ehipto kan pamilya niya. Minsan siring, mantang nasa Ehipto, an agom niya kinua ni Faraon, an tagapamahala kan nasyon. Imahinara an kahaditan na siguradong namatian ni Abraham kan dai pa pinapahiro ni Jehova si Faraon na ibalik si Sara ki Abraham.—Gen. 12:10-19.

9. Anong mga problema sa pamilya an kinaipuhan na atubangon ni Abraham?

⁹ Nagkaigwa man nin darakulang problema sa pamilya ni Abraham. Dai nagkakaaki an saiyang namumutan na agom na si Sara. Ikinamundo ninda iyan na marhay sa laog nin dakul na taon. Pag-abot nin panahon, itinao ni Sara ki Abraham an saiyang suruguon na si Hagar tanganing mangaki para sainda ni Abraham. Pero kan magbados na si Hagar sa aki niyang si Ismael, pinunan niyang hamakon si Sara. Nagin dipisil na marhay an sitwasyon kaya pinalayas ni Sara si Hagar.—Gen. 16:1-6.

10. Anong mga pangyayari na kalabot si Ismael asin Isaac an nakabalo sa pagtitiwala ni Abraham ki Jehova?

¹⁰ Nagbados man giraray si Sara asin nagkaaki ki Abraham nin aking lalaki na pinangaranan kaining Isaac. Padaba ni Abraham an duwa niyang aki, si Ismael saka si Isaac. Pero huli sa maraot na pagtrato ni Ismael ki Isaac, napiritan si Abraham na pahalion si Ismael asin si Hagar. (Gen. 21:9-14) Pakalihis nin dakul na taon, sinabi ni Jehova ki Abraham na idulot kaini si Isaac bilang atang. (Gen. 22:1, 2; Heb. 11:17-19) Sa duwang pangyayaring iyan, kinaipuhan na magtiwala ni Abraham na uutubon ni Jehova pag-abot nin panahon an saiyang mga panuga manungod sa mga aki niya.

11. Taano ta kinaipuhan ni Abraham na mapasensiyang maghalat ki Jehova?

¹¹ Sa bilog na panahon na ini, kinaipuhan ni Abraham na makanuod na mapasensiyang maghalat ki Jehova. Posibleng marhay na labi na siyang 70 anyos kan siya asin an saiyang pamilya maghali sa Ur. (Gen. 11:31–12:4) Asin sa laog nin mga sanggatos na taon, nag-istar siya sa mga tolda, asin nagduman sa manlain-lain na parte kan daga nin Canaan. Nagadan si Abraham kan siya 175 anyos. (Gen. 25:7) Pero dai niya na nahiling na inutob ni Jehova an saiyang panuga na itatao niya sa mga gikan ni Abraham an daga na linakawan kaini. Asin dai niya na nahiling na naestablisar an siyudad, an Kahadian nin Diyos. Dawa arog kaiyan, si Abraham ilinadawan na nagadan na “gurang na saka kontento.” (Gen. 25:8, NWT) Sa ibong kan gabos na kadipisilan na kinaipuhan niyang atubangon, napagdanay ni Abraham na makusog an saiyang pagtubod asin maugma siyang naghalat ki Jehova. Taano ta nakatagal siya? Huling sa bilog na buhay ni Abraham, prinotektaran siya ni Jehova asin trinatar siya bilang amigo.—Gen. 15:1; Isa. 41:8; Sant. 2:22, 23.

12. Ano an hinahalat niyato, asin ano an pag-uulayan ta?

¹² Arog ni Abraham, hinahalat niyato an siyudad  na igwa nin tunay na mga pundasyon. Minsan siring, dai ta hinahalat na maitugdok iyan. Naestablisar na an Kahadian nin Diyos kan 1914 asin lubos na iyan na namamahala sa langit. (Kap. 12:7-10) Pero hinahalat niyato na lubos iyan na mamahala sa daga. Mantang hinahalat niyato iyan na mangyari, mapapaatubang kita sa dakul na kadipisilan na kaagid kan napaatubang ki Abraham asin Sara. Inaarog daw kan mga lingkod ni Jehova ngunyan an halimbawa ni Abraham? Ipinapahiling kan mga istorya nin buhay na ipinublikar sa An Torrengbantayan na dakul ngunyan an nagpahiling nin pagtubod asin pagigin mapasensiya arog ni Abraham asin Sara. Pag-ulayan ta an pira sana kaiyan asin hilingon kun ano an manunudan ta.

13. Ano an nanudan mo sa eksperyensiya ni Brother Walden?

¹³ Magin andam na gumibo nin mga pagsasakripisyo. Kun gusto niyatong magin panginot sa satong buhay an siyudad nin Diyos, an Kahadian, dapat na magin arog kita ni Abraham, na andam na naggibo nin mga pagsasakripisyo para paugmahon an Diyos. (Mat. 6:33; Mar. 10:28-30) Mangnuhon an halimbawa kan brother na si Bill Walden. * Kan 1942, madali nang maggradwar si Bill sa sarong unibersidad sa U.S. sa kursong architectural engineering kan nagpuon siyang makipag-adal sa mga Saksi ni Jehova. Hinanapan na si Bill nin trabaho kan propesor niya asin hahalaton na lang kutang makagradwar siya, pero nagsayuma si Bill. Ipinaliwanag niya na nagdesisyon na siyang bayaan an sekular na karera para mas lubos na makapaglingkod sa Diyos. Dai nahaloy pagkatapos kaiyan, inapod si Bill para sa serbisyo militar. Magalang siyang nagsayuma kaya pinamulta siya nin $10,000 asin sinentensiyahan nin limang taon na pagkapreso. Pinalibre siya pakalihis nin tulong taon. Kan huri, inimbitaran siyang mag-atender sa Gilead School asin nagmisyonero sa Aprika. Dangan nagin agom ni Bill si Eva, asin magkaibanan sindang naglingkod sa Aprika, na diyan kinaipuhan nindang gumibo nin mga pagsasakripisyo. Pag-abot nin panahon, nagbalik sinda sa United States para atamanon an ina ni Bill. Kun manungod sa buhay niya, sinabi ni Bill: “Napapaluha ako pag iniisip-isip ko an pambihirang pribilehiyo na gamiton ni  Jehova para maglingkod sa saiya sa laog nin labing 70 taon. Parati ko siyang pinapasalamatan sa paggiya sa sako na magin karera ko an paglilingkod na ini.” Puwede mo man daw na gibuhon na karera an bilog na panahon na pagmiministeryo?

14-15. Ano an nanudan mo sa eksperyensiya ni Brother asin Sister Apostolidis?

¹⁴ Dai pag-asahan na dai ka magkakaigwa nin problema. Nanudan niyato sa halimbawa ni Abraham na mapapaatubang man sa mga problema dawa an mga tawong idinudusay an bilog nindang buhay sa paglilingkod ki Jehova. (Sant. 1:2; 1 Ped. 5:9) Pag-isipan kun paano ini nagin totoo sa eksperyensiya ni Aristotelis Apostolidis. * Nabawtismuhan siya kan 1946 sa Grecia, asin kan 1952 nagin katrato niya an sister na si Eleni, na kapareho niya an mga pasuhan. Pero, nagkahilang si Eleni asin na-diagnose na may tumor sa hutok. Hinali an tumor, pero pakalihis sana nin pirang taon pagkakasal sa sainda, nagbalik an tumor. Inoperaran giraray siya kan mga doktor, pero medyo naparalisar an hawak ni Eleni, asin dai na siya makataram nin normal. Nagdanay siyang maigot na ministro dawa may hilang siya asin sa ibong kan pagpersegir kan gobyerno kan panahon na iyan.

¹⁵ Sa laog nin 30 taon, inataman ni Aristotelis an saiyang agom. Durante kan panahon na iyan naglingkod siya bilang elder, nagtrabaho sa mga komite sa asembleya, asin nagtabang sa pagtugdok kan sarong Assembly Hall. Dangan kan 1987, naaksidente si Eleni mantang naghuhulit. Tulong taon siyang na-coma, dangan nagadan siya. Manungod sa mga inagihan ni Aristotelis, sinabi niya: “Sa paglihis nin mga taon, huli sa dipisil na mga kamugtakan, masakit na mga problema, asin dai inaasahan na mga pangyayari, kinaipuhan ko nin grabeng kusog nin buot asin pakatagal. Pero, pirmi akong tinatawan ni Jehova kan kinakaipuhan na kusog para makayanan an mga problemang ini.” (Sal. 94:18, 19) Namumutan nanggad ni Jehova an mga lingkod niya na ginigibo an gabos na makakaya ninda para saiya dawa may inaagihan sindang mga problema!

16. Anong marahay na sadol an sinabi ni Brother Knorr sa saiyang agom?

¹⁶ Magpokus sa mga mangyayari sa maabot na panahon. Nagpokus si Abraham sa mga balos na itatao ni Jehova saiya sa ngapit, asin nakatabang  ini saiya na makayanan an inaagihan niyang mga problema. Pinagdanay ni Sister Audrey Hyde * sa saiyang isip an paglaom niya para sa maabot, dawa pa nagadan sa kanser an inot niyang agom na si Nathan H. Knorr asin nagkaigwa nin Alzheimer’s disease an saiyang ikaduwang agom na si Glenn Hyde. Sinabi niya na nakatabang saiya an sinabi ni Brother Knorr pirang semana na sana bago ini magadan. Sinabi niya: “Pinagirumdom sako ni Nathan: ‘Pagkagadan ta, sigurado an paglaom ta, asin dai na kita nuarin man makakamati giraray nin kulog.’ Dangan dinagka niya ako: ‘Maghiling ka sa inutan, ta yaon diyan an balos sa saimo.’ . . . Sinabi pa niya: ‘Magdanay kang sibot—hinguwahon mong gamiton an buhay mo sa paggibo nin marahay sa iba. Makakatabang ini sa saimo na magin maugma.’” Praktikal nanggad na sadol na magdanay na sibot sa paggibo nin marahay sa iba asin na ‘ipag-ugma an satong paglaom’!—Roma 12:12.

17. (a) Taano ta may marahay na dahilan kita na magpokus sa kun ano an mangyayari sa maabot? (b) Paano makakatabang sa sato an pag-arog sa halimbawa na nasa Miqueas 7:7 na makamtan an mga bendisyon sa maabot na panahon?

¹⁷ Ngunyan, may mas dakul kitang dahilan na magpokus sa kun ano an mangyayari sa maabot. Malinaw na ipinapahiling kan mga pangyayari sa kinaban na nasa huring kabtang na kita kan huring mga aldaw kan sistemang ini nin mga bagay. Dai na mahahaloy, dai ta na kaipuhan na halaton na lubos na mamahala sa bilog na daga an siyudad na igwa nin tunay na mga pundasyon. Kaiba sa dakul na bendisyon na makakamtan ta iyo an mahiling an binuhay liwat na mga mahal niyato sa buhay. Sa panahon na iyan, babalusan ni Jehova si Abraham huli sa saiyang pagtubod asin pagigin mapasensiya paagi sa pagbuhay liwat sa saiya asin sa saiyang pamilya digdi sa daga. Yaon ka daw duman para i-welcome sinda? Puwede iyan mangyari kun arog ni Abraham, andam ka man na gumibo nin mga pagsasakripisyo para sa Kahadian nin Diyos, kun papagdanayon mo an saimong pagtubod dawa may mga problema, asin kun manunudan mong mapasensiyang maghalat ki Jehova.—Basahon an Miqueas 7:7.