1. Ḇebor ro Allah kawasa Ḇyesi rosai sibur kwar na, ma sifrur roi ine kukro?

BABOINE Allah kawasa Ḇyesi sibor sya sibur roi nabor kwar insama sfarmyan ḇe Yahwe I. Rupa ra, naek srar sia skinfir fa sfarḇuk ḇa. Ḇefarḇuk kwar sya sun wos oser fa sna romawa ḇa. Kina sya smam fa sikenem syadadi ḇa. Roi ḇefnai fa sifrur roi nane kam iso simarisen sḇuk nabor syadi ro fararur ḇesren ḇe Yahwe I. Sna marasrisen ma sikyar Yahwe nari fyasos rosai sfandun kaku nakam. Sipok sfafko ḇaḇeri. Kokyar roi ine kyaku kukro? Oser ya iso ro fafisu naiwara, Yahwe ḇyebarakas Abraham i kwar. Naiso sor i ḇe kma ro snonggaku ḇekyar syakam.​—Rm. 4:11.

2. (a) Imnis wos ro Ibrani 11:8-10, 16 ya, rosai ḇefnai fa Abraham ibur mnu Ur? (b) Rosai nari kawos ro farkarkor ine?

² Abraham ḇyarek ma ikenem kuker payamyum ro mnu Ur, mboi imarisen ibur na. Ibur na kukro isya iwaf ”mnu ḇena araref ḇenako”. (Wasya Ibrani 11:8-10, 16.) ”Mnu” sairi? Samswen rosai Abraham ismai fafisu iwaf kaker Allah ḇyawes mnu ani? Ma rariso na kakmnis ra Abraham i ma snonggaku ḇeso nyan ḇyena ḇero baboine sya?

3. Rosaiso mnu Abraham iwaf ani?

³ Mnu Abraham iwaf anya iso Allah Karajan Ḇyedi. Ḇepoik ḇe raja ro Karajan ani iso Yesus Kristus fnoḇek snonggaku ri 144.000 ḇesmai ramrem sya. Paulus dap Karajan ine ḇe ”Allah mnu ḇekenem ḇyedi, isoine Yerusalem ro boiyaswa”. (Ibr. 12:22; Why. 5:8-10; 14:1) Yesus fyarkor manfamyan ḇyesi fa senadi sor insama Karajan anine  ryama fa ifrur Allah Marisen Ḇyena ryarirya ro supswan ine imnis ro nanggi.​—Mat. 6:10.

4. Ro Kejadian 17:1, 2, 6 ya, Abraham ifawi mnis kaku roi Allah ḇyeasas kwar ḇekur ḇe mnu ḇaido Karajan ani ke?

⁴ Abraham ifawi manggun ḇa moḇsariso Allah fyasos Karajan ani rai. Ro swaf kawan kaku, roi ine kyankunes kaker. (Ef. 1:8-10; Kol. 1:26, 27) Imbape, Abraham ifawi kpu up ḇyesi sino sisya na sakḇepoik ḇe raja kukro Yahwe ḇyeasas faro i kwar. (Wasya Kejadian 17:1, 2, 6.) Abraham ikyar kaku faro Allah asas Ḇyenane imnis rya myam Mesias i kwar, isoine snonggaku nari ḇe Raja ro Allah Karajan Ḇyedi. Iso eḇedari Yesus ikofen yoḇ kawasa Yahudi ḇero fafisu ya ḇo doḇe, ’Abraham kma mgoḇedi iryaḇ kaku mboi nari myam ras ayedi ma myam i kwar ma iryaḇ kaku.’ (Yoh. 8:56) Nasnai kaku, Abraham ifawi kpu up ḇyesi nari saksun ro Karajan Yahwe ḇyawes ine. Ma imarisen iwaf isof Yahwe ifrur asas Ḇyena fa ndarirya.

5. Moḇsa kofawi Abraham isya iwaf mnu Allah ḇyawes ani rai?

⁵ Moḇsa Abraham fyasnai isya iwaf mnu, ḇaido Karajan, Allah ḇyawes ani rai? Isoine ima dakmanmin karajan oso ro supswan ine ḇa. Ḇye mandaman monda, ḇyarek ro moḇ oser ḇa ma daksaramper raja snonggaku oso ḇa. Oso wer ido, Abraham syewar fa ḇyawes karajan ḇe manggundi ḇa. Imbape, isouser pdef faro Yahwe I ma iwaf isof Yahwe ifrur asas Ḇyena ndarirya. Roi Abraham ifrur nane nfasnai ima ikyar kaku faro Yahwe I. Rwama komam samswen rosai ḇekur Abraham i ma farkarkor rosai kun ro i.

6. Moḇsa mnu Ur isnai rai?

⁶ Mnu Ur Abraham ibur anya ima moḇ ḇepyum dirya, ma ḇeḇarek ro diansya sismai farkarkor ḇepyum ma senana. Ayar karui ḇenako ma warḇedaf rikyor nayarwarek mnu anine. Kawasa ḇero Ur sima sifawi sfasfas ma skarkor. Rya  snonggaku ḇebor srama sḇaḇoḇ ro mnu ine kukro manfawawi ḇero baboine sisrow roi ḇeḇair moḇ ine iso randak iwara sfarḇaḇyan ro na. Sifrur rum-rum ro karui sipyak, seplester, ma secet na fa napyoper. Rum ono nya sim ri 13 roḇa 14 ḇeyar kintal sifrur ro tehel na.

7. Rosai ḇefnai fa Abraham ikyar Yahwe nari kyadaunwarek i ma kina ḇyesi?

⁷ Fandun fa Abraham ikyar Yahwe nari kyadaunwarek i ma kina ḇyesi. Ikyar kukro? Koswarepen, Abraham ibur rum ḇepyum ḇyedi ma payamyum ismai ro mnu Ur ani ḇo rya ḇyarek ro rum kruḇen ḇero maper ro sup Kanaan. Ayar karui ma warḇedaf nayarwarek manggundi ma kina ḇyesi ḇa. Kirinema, rya sna moḇ fa skadaunwarek si ḇa. Inja, na napyan fa mbroḇ sya smun si.

8. Samswen rosai ḇekur Abraham i ro fafisu oso, ma rosai kofarkor ro fawar ine?

⁸ Abraham ifrur Allah marisen Ḇyena kwar, mboi fafisu oso jadi fa fyan kina ḇyesi ḇa. Ine ḇyejadi rofyor basbiser myun kaku ro sup Kanaan. Basbiser ya myun kaku mura, Abraham dun kina ḇyesi fa sra sḇarek fasaw ro sup Masir. Imbape, rofyor Abraham isya ryo sup Masir kwar, ḇepoik ro diwa, isoine Firaun i, dun swari fa ibur i. Kwarapan, Abraham na imgakwarek kaku swari, Sara i, isof Allah Yahwe dor Firaun i fa ḇyuk kaḇer Sara ḇe Abraham i.​—Kej. 12:10-19.

9. Samswen ḇese rosai Abraham kina ḇyesi sismai wer?

⁹ Abraham kina ḇyesi sismai samswen ḇese wer. Swari, Sara i, dakkapar romawa ḇe i ḇa. Taun ḇe taun, roi ine nafnai su fa sufafko. Mura ido, Sara ḇyuk binfyan ḇyedi, Hagar i, fa Abraham fyarḇuk kuker i insama kyapar romawa fa Abraham ma Sara suna i ḇe romawa suḇedi. Mura, Hagar fyadores Ismael i. Roi nane nafnai fa Hagar myamkyof Sara i. Ine dun samswen syadi, inja Sara iyaw Hagar i fa ibur.​—Kej. 16:1-6.

10. Rosai monda ḇefrowes Abraham kakyar ḇyedi faro Yahwe I?

¹⁰ Ḇarpur ya, Sara kyapar romawa oso faro Abraham i, ma sunir i ḇe Ishak. Abraham iswar Ismael ma Ishak su. Mboi Ismael ifrur pyum Ishak i ḇa, inja Yahwe iwan Abraham fa iyaw Ismael ma Hagar su fa subur. (Kej. 21:9-14) Muniwara, Yahwe dor Abraham i fa myun Ishak ḇe farsarser. (Kej. 22:1, 2; Ibr. 11:17-19) Fafisu Abraham iyaw Ismael ma imbe myun Ishak i, fandun fa ikyar kaku Yahwe nari ifrur asas Ḇyena fa ndarirya roro roma ḇyedine.

11. Rosai ḇefnai fa Abraham iwaf monda Yahwe I?

¹¹ Ro fafisu anya, Abraham fyasnai iwaf monda Yahwe I. Fafisu dun kina ḇyesi fa sibur mnu Ur anya, umur ḇyeja taun ri 70 kwar. (Kej. 11:31–12:4) Ro swaf taun utin oser syadi, Abraham ḇyarek ro rum kruḇen ma imbran sup Kanaan ḇesiper. Abraham imar fafisu ḇyeumur taun ri 175. (Kej. 25:7) Imbape myam ḇaim Yahwe ifrur asas Ḇyena ndarirya, isoine ḇyuk sup anya ḇe Abraham kpu up ḇyesi. Oso wer ido, ikenem kawan ḇa fa myam fafisu mnu ani, isoine Karajan Allah, dores. Rarirya mboi, Refo doḇe Abraham ”ḇyemansar ma iryaḇ”. (Kej. 25:8) Samswen ḇekur i na nabor fafaya, mboi ikyar nako ma iwaf Yahwe I ḇesya kwar. Isusu ḇa kukro? Snar Yahwe kyadaunwarek i ma ifrur pyum i ḇe bati Ḇyedi isof imar.​—Kej. 15:1; Yes. 41:8; Yak. 2:22, 23.

12. Rosai koisya kowaf ya, ma rosai nari kawos ya?

 ¹² Raris Abraham i, kowaf kako ”mnu ḇena araref ḇenako”. Imbape, koma kowaf mnu ani fa Allah ḇyawes na ḇa. Karajan Allah dores kwar ro taun 1914 ma ḇyepoik ro nanggi kwar. (Why. 12:7-10) Koisya kowaf Karajan ani ḇyepoik kaku faro supswan ine. Ro swaf kowaf kaker ine, samswen ḇekur ko na nabor raris moḇ Abraham ismai raya. Yahwe manfamyan Ḇyesi ro baboine sakfrur ra Abraham i. Farfyar sena naisya ro syap Baryas, nane nfasnai sakna kakyar ma siwaf monda raris Abraham i. Rwama komam fawar ḇeḇeso ma kawos farkarkor rosai kun ro na.

13. Rosai kofarkor ro Naek Walden fawar ḇyena?

¹³ Komarisen kobur roi ono fa kofarmyan ḇe Yahwe I. Komam Karajan Allah ḇe roi ḇefandun ro kenem koḇena ido, kofrur raris Abraham i kada. Ima imarisen ibur roi nabor fa ifrur Allah marisen Ḇyena. (Mat. 6:33; Mrk. 10:28-30) Komampan Naek Bill Walden * fawar ḇyena. Ro taun 1942, Naek Bill imnai ro farkarkor ḇekaki oso ro Amerika Serikat, ma ismai nasan teknik arsitektur. Ro taun anya kako, dakfarkor Refo kuker Saksi Yahwe. Dosen oso ifrur fasasos fa Naek Bill imnai ro universitas anya kwar ido, daksmai fararur. Mboi doḇe dun wos oser kwar fa imewer ismai fararur kuker ḇaḇyak ḇekaki, mboi imbe fyarmyan ḇe Allah. Fyoro ḇa mura, pamarenta sor i fa daksun ro militer. Mboi imewer, inja sor i fa ḇyak denda dolar ri 10.000 ma ismai ro bui swaf taun ririm. Taun ḇekyor ya, sisasyar i. Mura, sor i fa iso Farkarkor Gilead ma dakfarmyan ḇe misionaris ro sup Afrika. Naek Bill fyarḇuk kuker Srar Eva ma surir subur marasrisen suḇena ḇo sura sufarmyan ro sup Afrika. Sufarmyan ro diwa swaf  taun ḇeḇeso mura, sukaḇer ḇe sup Amerika fa sumamfaduru Naek Bill snari. Naek Bill ikofen ḇekur marandan ḇyedine, ”Yamam swaf taun ri 70 syadi yafarmyan ḇe Yahwe I ḇe syowi ḇeba kaku. Fafisu yakain yakara na, mgarui ine nadai ro mgamor yesuine. Yakofen kasumasa ker kukro Yahwe ifnoḇek aya fa yakinfir sasar ḇa, isoine yafarmyan ḇe I.” Au kako wamarisen fa wakfarmyan ro oras nakam ke?

14-15. Rosai kofarkor ro Naek ma Srar Apostolidis fawar suḇena?

¹⁴ Kopok kokara awer na komkei ro samswen na. Ro Abraham fawar ḇyena, kofawi snonggaku ḇefarmyan faro Yahwe I saksmai samswen. (Yak. 1:2; 1 Ptr. 5:9) Komam fawar ro Naek Aristotelis Apostolidis. * Ḇyebaptis ro Yunani taun 1946. Ima Saksi ḇeryaḇ kaku. Ro taun 1952, isrow srar oso sḇukidapsasor i, snori Eleni. Sumarisen fa sufarmyan ḇe Yahwe I. Imbape, Srar Eleni ismai dafduf tumor otak. Skanow tumor anya bur i kwar, mboi fyor sufarḇuk taun riḇeḇeso kwar, tumor anya kyaḇer wer. Dokter sya siknai Srar Eleni tumor ḇyani wer, mura fafisu ine dawos pyum raris randak ya wer ḇa. Ismai dafduf ma ismai wayam ro pamarenta kako, mboi Srar Eleni iryaḇ pdef ro fararmyan.

¹⁵ Naek Apostolidis myamfaduru swari swaf taun ri 30. Swaf anya fyarmyan ḇe penatua, fyararur ḇe panitia kebaktian, ma ifnoḇek fararur ḇaḇawes Balai Karajan. Mura ro taun 1987, fafisu Srar Eleni isya ḇyaryas ro rum ḇarpondi, kedwa sifrur ro manggarmom ḇemarḇak kaku isapi ḇo iplam i ro dokor ḇyedi ma ḇyeparpar. Ḇyarek ro moḇ oser monda swaf taun rikyor rawo imar. Naek Apostolidis doḇe roi nane nakyaren kaku kenem ḇyedi. Ikofen, ”Ro swaf taun ḇe taun, samswen ḇekur aya na nabore. Samswen ono kyur kanandor aya. Inja, fandun fa yamkuepen. Yamewer roi nane kam nafnai fa yaḇesanekar. Ḇape, Yahwe ifrur  aya fa yasambraḇ ḇesya kwar fa yakamar samswen ayenane.” (Mz. 94:18, 19) Yahwe iswar kaku manfamyan Ḇyesi ḇesewar fa ḇefarmyan faro I ro fafisu ḇesamswen na.

16. Ananun ḇepyum rosai Naek Knorr ḇyuk ḇe swari?

¹⁶ Kokara mura ḇe ras ḇarpon iyama monda. Abraham myam mura ḇe barakas nari Yahwe ḇyuk ro ras ḇarpon ya. Ine iso ḇefnoḇek i fa imkuepen pdef. Srar Audrey Hyde fyarḇuk ḇepon kuker Naek Nathan H. Knorr, mboi Naek ine imar kukro iduf kanker. Mura fyarḇuk kuker Naek Glenn Hyde, mboi Naek ine ḇyekandera kukro ismai dafduf sor ḇe Alzeimer. Mboi Srar Audrey syewar fa myam mura ḇe ras ḇarpon iyama. * Imbesrar ine doḇe minggu riḇeso Naek Knorr imbe imar anya, ikofen roi ḇesambraḇser i. Fyar ḇo doḇe, ”Nathan ikofen ḇe aya ḇo doḇe, ’Komar ido saneraro koḇena naisya kwar, ma nari kopok koḇekandera wer ḇa.’ Ramnai, danunepen aya ḇo doḇe, ’Mam mura ḇe ḇarpon, ḇaḇyak ya sfasos kwar.’ . . . Ikofen wer, ’Wamyaren pdef, swewar fa buk kenem bedi fa wafnoḇek snonggaku ḇese insama waryaḇ pdef.’” Nanema anun ḇepyum kaku fa komyaren pdef kofnoḇek snonggaku ḇesesya ma koryaḇ ro saneraro koḇena!​—Rm. 12:12.

17. (a) Rosai ḇefnai fa komam mura ḇe ras ḇarpon iyama monda? (b) Moḇsa na kosouser wos ḇero Mikha 7:7, nafnoḇek ko fa kosmai barakas ro ras ḇarpon iyama?

¹⁷ Baboine, fandun kaku fa komam mura ḇe ras ḇarpon iyama. Roi ḇejadi ro dunya ine nfasnai kaku koisya kokenem ro papupes ras-ras ḇepupes kwar. Kero wer, na kowafwaf wer ḇa ”mnu ḇena araref ḇenako” ani fa ḇyepoik supswan ine ḇesiper. Barakas oso iso, snonggaku koswar sya simar kwar mboi na kosrow kaḇer kuker si. Ro fafisu ani, Yahwe na ḇyebarakas Abraham i snar kakyar ma kaḇaḇaḇ ḇyena dun kankenem ḇe i ma kina ḇyesi ro supswan ine. Nari wakro diwa fa wasrow si ke? Imbo, mboi wakfrur kaku raris Abraham i mande. Isoine wabur roi ono fa swewar ḇepon Karajan Allah, samswen nabor mboi wakyar pdef, ma wawaf monda Yahwe I ḇesya kwar.​—Wasya Mikha 7:7.