1. Ni kuha kweferereza oku abingi bakozire kandi shi ahabw’enki bakukozire?

ABAHEREZA ba Ruhanga bingi omuri obu bwire nibeferereza ebintu byingi. Benetata na banyanyazi bingi bakasharamu kuguma bari bonka. Abashija n’abakazi bamwe bakareka kuzara. Amaka gamwe gakorobya embera. Abo bona bakakora ezo nsharamu kugira ngu bakore byingi omu murimo gwa Yehova oku biri kubasika kona. Nibashemererwa kandi nibesiga ku Yehova arije kubaha byona ebi bari kwetenga. Mbehi nibefuza ahabw’oko kweferereza? Ingaha buzima! Eco nitukimanya tuta? Ni ahabw’okuba omu bwire bwa kare, Yehova akaha emigisha Abrahamu, ‘ishenkuru wa bona’ abine okwikiriza.—Rom 4:11.

2. (a) Tukuratize ebiri omu Baheburaayo 11:8-10, 16, ahabw’enki Abrahamu yabire ayetegwire kuruga omuri Uri? (b) Ni enki eki twaza kushwijuma omuri eki kicweka?

² Abrahamu akeferereza ebintu byona n’amagara marungi ebi yabire ayine omu tawuni ya Uri. Ahabw’enki? Ni ahabw’okuba akaba ategerize ‘kutaha omu rurembo orwine emisingi.’ (Shoma omu Baheburaayo 11:8-10, 16.) Orwo “rurembo” ni ruha? Ni biha bizibu ebi Abrahamu yabugine obu yabire ategerize ngu orwo rurembo ruheze kombekwa? Kandi shi ni bata oku turi kubasa kuba nka Abrahamu n’abandi bahereza b’omuri obu bwire abakuratize ecokureberaho ceye?

3. Ni ruha “rurembo” oru Abrahamu yabire ategerize?

³ Orurembo oru Abrahamu yabire ategerize ni Obukama bwa Ruhanga. Obwo Bukama nibwebemberwa na Yesu Kristo  hamwe n’Abakristo abashukirweho omwika 144,000. Paulo akagamba ku obwo Bukama ari ‘orurembo rwa Ruhanga ohurire, Yerusaalemu orw’omu iguru.’ (Heb 12:22; Kush 5:8-10; 14:1) Yesu akegesa abegi beye kushaba ngu Obukama bwije, ebi Ruhanga ari kwenda bikorwe omu nsi nk’oku biri kukorwa omu iguru.—Mat 6:10.

4. Tukuratize ebiri omu Kutandika 17:1, 2, 6, ni enki eki Abrahamu yabire ari kumanya aha rurembo ninga Obukama obu Ruhanga yamuraganisize?

⁴ Mbehi Abrahamu akaba namanya oku Obukama bwa Ruhanga buriba butebekanisibwe? Ingaha. Hakahwaho ebinyigana byingi eby’eyo ntebekanisa bisherekirwe. (Efe 1:8-10; Kol 1:26, 27) Konka Abrahamu akaba ari kumanya ku bamwe omu ruzaro rweye bariba abagabe. Yehova akatuma Abrahamu yakizaho kwesiga eyo ndagano. (Shoma omu Kutandika 17:1, 2, 6.) Abrahamu akaba ari kwesigira kimwe ebi Ruhanga yamuraganisize, ku yabire arije kubona owatorinwe ninga Mesiya, owabire arije kuba Omugabe w’Obukama bwa Ruhanga. Ni yo nshonga Yesu yagambire Abayudaaya omu bwire bweye ngu: ‘Isho Abrahamu akashemererwa ayine ekihika c’okureba ekiro cange; ku yakirebire, yayesima munonga.’ (Yoh 8:56) Obwe rero ni amazima Abrahamu akaba namanya ge ku oruzaro rweye rwabire rurije kuba omu Bukama bwa Yehova, kandi akaba ashemerire kutegereza kuhisa obu Yehova yabire arahikirize eyo ndagano.

5. Nitumanya tuta ku Abrahamu yabire ategerize ‘orurembo’ oru Ruhanga yayombekire?

⁵ Ni bata oku Abrahamu yayerekire ku yabire ategerize ‘orurembo’ ninga Obukama obu Ruhanga yatireho? Ec’okubanza, Abrahamu tarayejwangire omu butegeki bw’ensi. Akaba ari kutura nafurafuruka, kandi tihariho omwanya ogu yayombekiremu ngu agugumemu ninga ngu agire obutegeki bw’ensi obu yashagika. Nambwenu, Abrahamu taragerizeho kweteraho obugabe bweye. Omu mwanya gw’eco, akagumizamu korobera Yehova ategerize obu arihikiriza endagano yeye. Eco kikatuma Abrahamu yakizaho kwesiga Yehova. Reka tushwijume ebizibu ebi Abrahamu yabugine turebe n’eki turi kubasa kumwegeraho.

6. Etawuni ya Uri ekaba eri eta?

⁶ Etawuni eyi Abrahamu yarugiremu ekaba  eri engiiga, eri ndungi, eyine obusinge kandi erimu abantu abashomire. Ekaba erinzirwe n’ebisika n’amizi embaju zona. Abantu b’omuri Uri bakaba batungukire omu by’okuhandika n’okukora ebishushani. Nambwenu eyo tawuni ekaba etungukire omu by’obushubuzi; obwe rero abantu bingi bakaba nibija kushuburira omuri eyo tawuni. Amaju g’abaturage gakaba gombecesize amatafari kandi gaterire amarangi ga mutare. Kandi ago maju gakaba gari mahango ahakuba hariho agabire gine nk’ebisika 13 ninga 14, kandi embuga ekaba erimu amabare gabonire.

7. Ahabw’enki Abrahamu yabire ari kwesiga ku Yehova yabire arije kumurinda we n’eka yeye?

⁷ Abrahamu akaba ari kwesiga ku Yehova yabire aramurinde we n’eka yeye. Ahabw’enki? Yijuka ku Abrahamu na Sara basigire enju yabo ndungi bakaza kutura omu mahema omuri Kanaani. Kandi aho hantu hakaba hatarinzirwe ahakuba abazigu bakaba bari kubasa kubahikaho omu buryo bworobi.

8. Ni kiha kizibu eki Abrahamu yabugine?

⁸ Abrahamu akaba ari kukora ebi Ruhanga ari kwenda konka hariho obu yabire nabura eby’okutunga eka yeye. Akabugana ekizibu c’enjara omu ihanga eri Yehova yamwoherizemu. Eyo njara ekaba eshambire ahakuba ekatuma Abrahamu yasharamu kufurukira omuri Misiri we n’eka yeye obwire buce. Konka ku bahikireyo, Faraho omutegeki wa Misiri, akamutwaraho omukazi weye. Tekateka oku Abrahamu yabire ari kwehurira obu Yehova yabire atakahanire Faraho ngu amugarurire Sara.—Kut 12:10-19.

9. Ni biha bizibu ebi eka ya Abrahamu yabire eyine?

⁹ Eka ya Abrahamu ekaba erimu ebizibu. Omukazi weye owu yabire ari kukunda munonga Sara, akaba atari kuzara. Bakamara emyaka myingi bari omuri obwo busaasi bw’okutagira kana. Eco kikatuma, Sara yaha Abrahamu omuzana wabo Hagari kugira ngu abazarire abana. Konka obu Hagari yabire ayine enda ya Ishimaeli, akatandika kujoga Sara. Ebintu bikakizaho kuguma byatuma Sara yabinga Hagari.—Kut 16:1-6.

10. Ni enki ecabireho ahagati ya Ishimaeli na Isaaka ecagerize okwikiriza kwa Abrahamu?

¹⁰ Sara akahika aho yagira enda rero yazarira Abrahamu omwojo, bamweta Isaaka. Abrahamu akaba nakunda abojo beye bombi, Ishimaeli na Isaaka. Konka ahabw’okugira ngu Ishimaeli akaba natwariza kubi Isaaka, Sara akaragira Abrahamu ngu abinge Hagari n’omwojo weye Ishimaeli. (Kut 21:9-14) Bwanyima, Yehova akashaba Abrahamu ngu aheyo Isaaka nk’ekitambo. (Kut 22:1, 2; Heb 11:17-19) Omuri ezo mbera zona, Abrahamu akaguma ari kwesiga ku Yehova arihikiriza ebi yamuraganisize aha bojo beye.

11. Ahabw’enki Abrahamu yabire ashemerire kugumizamu kutegereza Yehova agumisirize?

¹¹ Omuri obwo bwire bwona, Abrahamu akega kugumizamu kwehangana ategerize Yehova. Obu we n’eka yeye barugire omuri Uri nabasa kuba yabire ayine emyaka eri kurenga 70. (Kut 11:31–12:4) Akamara emyaka eri kurenga igana ari kutura omu mahema kandi ari kuguma nafurafuruka omu ihanga rya Kanaani. Abrahamu akafa ayine emyaka 175. (Kut 25:7) Konka tarabwine Yehova ari kuhikiriza endagano yeye y’okuha eryo hanga oruzaro rweye. Kandi tarabwine orurembo ninga Obukama bwa Ruhanga buri kutebwaho. Konka nabwe Abrahamu akagambwaho ku yafire ge kandi ayine emyaka myingi. (Kut 25:8) N’obu Abrahamu yabugine ebizibu byingi akaguma ayine okwikiriza kuhamire, ategerize Yehova. Ahabw’enki yabasize kugumizamu kutegereza? Ni ahabw’okuba omu kubaho kweye Yehova akamurinda kandi yamutwaza nka munywani weye.—Kut 15:1; Isa 41:8; Yak 2:22, 23.

12. Ni enki eki tutegerize, kandi shi ni enki eki twaza kushwijuma?

 ¹² Nka Abrahamu, tutegerize kutaha omu rurembo orwine emisingi. Konka itwe titutegerize ngu rwombekwe. Ahakuba Obukama bwa Ruhanga bukatebwaho omu mwaka gwa 1914, kandi hati, nibutegekera omu iguru. (Kush 12:7-10) Konka tutegerize ngu bwije kutegeka ensi. Omu bwire obu tucategerize ngu ebyo bihikirire, nitubugana ebizibu byingi ebiri kushushana n’ebyahikire ahari Abrahamu na Sara. Mbehi abahereza ba Yehova b’omuri obu bwire nibatoreza ecokureberaho ca Abrahamu? Enkuru z’ebyabireho eziri kushohora omu Munara g’Omurinzi nizereka ku abahereza ba Yehova b’omuri obu bwire bine okwikiriza n’okugumisiriza nka Abrahamu na Sara. Reka tushwijume zimwe omuri ezo nkuru turebe n’eki turi kubasa kuzegeraho.

13. Ni enki eki ori kwegera ahari mwenetata Walden?

¹³ Ba oyetegwire kweferereza. Twaba twetegwire kuta omu mwanya g’okubanza orurembo rwa Ruhanga, ni okugamba Obukama bweye, nituba tushemerire kuba nka Abrahamu, tutura twetegwire kweferereza kugira ngu tuhimbise Ruhanga. (Mat 6:33; Mak 10:28-30) Yetegereze ecokureberaho ca mwenetata ori kwetwa Bill Walden. * Omu mwaka gwa 1942, obu Bill yatandikire kwega Bibuli n’Abahamya ba Yehova, akaba ari hihi kumara yunivasiti omu by’okukora ebishushani by’amaju omuri Amerika. Omushomesa wa Bill akaba yamurondire omurimo ogu yabire arakore yaheza kwega, konka Bill akagwanga. Akamushobororera ku yarekire omurimo gw’ensi kugira ngu akorere Ruhanga omu bwijwire. Ku hahwireho obwire buce, Bill akagemwa kuza omu mahe. Akabyanga rero yahebwa ekihano c’okusibwa emyaka itano kandi yacwebwa dola 10,000. Akakomororwa bwanyima y’emyaka ishatu. Bwanyima benetata bakamweta ngu aze kwega Ishomero rya Gileadi, bwanyima bamwohereza kuba mishonari omuri Afurika. Bill akatasya Eva, bahereza hamwe omuri Afurika. Ku hahwire emyaka, bakagaruka  omuri Amerika kufa ahari nyina wa Bill. Bill akagamba ngu: “Ku ndi kutekateka aha mugisha g’okuba naheerize Yehova emyaka eri kurenga 70 omu murimo g’omutano, amarira nigeshuka. Kandi nimusima munonga ahabw’okuba akagumizamu kunyebembera omu buhereza bwange.” Mbehi n’iwe oyetegwire kuhereza Yehova omu murimo g’obwire bwona?

14-15. Ni enki eki ori kwegera aha byahikire ahari mwenetata Apostolidis n’omukazi weye?

¹⁴ Otaritekateka ngu toribugana ebizibu. Nk’oku tukirebire omu cokureberaho ca Abrahamu, abahereza ba Yehova abamukorire omu kubaho kwabo kona na bo bakabugana ebizibu. (Yak 1:2; 1 Pet 5:9) Yetegereze oku ebyo biri amazima omu cokureberaho ca mwenetata ori kwetwa Aristotelis Apostolidis. * Akabatizibwa omu mwaka gwa 1946 omuri Bugurika, kandi omu gwa 1952 akasigura munyanyazi ori kwetwa Eleni, owu babire babuganisize entego. Ku hahwire obwire, Eleni akarwara endwara y’omu bwonko. Akakira, konka ku bamazire kugitwa ekagaruka. Dokita akongera yamushwijuma, konka ekicweka kimwe c’obwonko kikaba kitari kukora ge; eco kituma kugamba byamugumira. N’obu yabire ayine eco kizibu c’oburwire n’obutegeki buri kumuhiganisa akaguma ahamire.

¹⁵ Hakahwa emyaka 30 Aristotelis ari kufa aha mukazi weye. Omuri obwo bwire akaba nahereza nk’omuzehe omu kibina, ari omuri Komiti y’eby’ebiterane, kandi akaba nayamba omu kombeka ecombeko c’ebiterane. Omu mwaka gwa 1987, Eleni akabugana butandu ari omu murimo g’okuburira. Akamara emyaka ishatu omuri koma rero yafa. Aristotelis nashoborora enkuru yeye ari kugira ngu: “Hakahwa emyaka myingi ndi kubugana ebizibu byingi kandi ebimwe omuri byo bikanshasha munonga; konka nkagumizamu kwehangana tinayikiriza ngu hagire ecamara amani. Kandi burijo, Yehova akaba nampa amani agu nabire ndi kwetenga kugira ngu mbase kwehanganira ebyo bizibu.” (Zab 94:18, 19) Buzima Yehova nakwasa abari kukora cona ekiri kubasika ngu bamuhereze, n’obu bakuba bine ebizibu!

16. Ni buha buhabuzi burungi obu mwenetata Knorr yahire omukazi weye?

 ¹⁶ Ta omutima aha biro by’omu misho. Abrahamu akaguma atire omutima aha migisha eyi Yehova yabire aramuhe, kandi eco kikatuma yagumizamu kwehanganira ebizibu ebi yabire ari kubugana. Munyanyazi ori kwetwa Audrey Hyde na we ni co eki yakozire. N’obu yafisize omushija weye ow’okubanza, Nathan H. Knorr, ayisirwe na kansa, omushija weye wa kabiri, Glenn Hyde, na we akarwara endwara y’omu bwonko. * Ogo munyanyazi akagamba ku ecamukwasize ari ebi mwenetata Knorr yamugambire atakafire. Akagamba ngu: “Nathan akanyijusya ku ‘bwanyima y’okufa, amasiko gitu gari kuba gacariho kandi ku tutari kugaruka kubugana obusaasi.’ Akongeraho ngu: ‘Ogume otekateke aha migisha yawe y’omu biro by’omu misho.’ Knorr akongera yangambira ngu: ‘Guma ohugire ori kukoresa amagara gawe omu kuhereza abandi. Eco ni co ekirituma watunga okushemererwa.’” Mbehi tikiri kutushemeza kuguma turi kuhereza abandi ‘tushemerirwe twine amasiko’!—Rom 12:12.

17. (a) Ahabw’enki tushemerire kugumizamu kuta omutima aha migisha y’omu biro by’omu misho? (b) Ni bata oku kukuratiza ebiri omuri Miika 7:7 kiri kutukwasa kushemerererwa emigisha y’omu biro by’omu misho?

¹⁷ Omuri obu bwire, twine enshonga nyingi eziri kutuma twata omutima aha biro by’omu misho kukira kare hona. Ebiri kubera omu nsi nibyereka ku turi aha muheru gw’ebiro by’emperu. Juba aha nituba tutacategerize ngu Obukama bwa Ruhanga bwije butegeke eyi nsi. Omu migisha eyi burituretera harimu n’okubona abantu bitu abafire bari kuzoka. Obwo bwire Yehova aryaha emigisha Abrahamu n’eka yeye ahabw’okwikiriza n’okwehangana kweye ari kubazora ngu tube hamwe na bo omu nsi. Mbehi n’iwe oryaba ori yo ori kubaaciira? Nobasa kwija kuba ori yo ku oragumizemu kweferereza ahabw’Obukama bwa Ruhanga, okagumizamu kwikiriza n’obu wakubugana ebizibu, kandi okagumizamu kwehangana otegerize Yehova nka Abrahamu.—Shoma omuri Miika 7:7.