1. ¿Chuqui an i mele cabʌl hermanojob, i chucoch?

ILI ora, cabʌl hermanojob yicʼot hermanajob an chuqui i meleyob come yom i ñumen melbeñob i yeʼtel (troñel) Jehová. Cabʌl an mach bʌ añic miʼ ñujpuñelob. An xñujpuñelob maxto bʌ yomobic i yalobil ili ora. I cheʼ jaʼel, an familiajob mach bʌ cabʌlic miʼ wen sʌclañob i chubʌʼan. Tiʼ pejtelelob tijicñayob come yujilob chaʼan mi caj i yʌqʼuentelob ti Jehová chuqui anto bʌ yom i chaʼañob, i Jehová cheʼʌch mi caj i mel. ¿Chucoch mucʼʌch lac ñop? Come ti wajali Dios tsaʼʌch i cʌnta jaʼel jiñi i wiñicob. Jumpʼejl ejemplo, tsiʼ yʌqʼue i bendición Abrahán, jiñi i «tat pejtelelob muʼ bʌ i ñopob Dios» (Ro. 4:11).

2. a) Cheʼ bajcheʼ miʼ yʌl Hebreos 11:8-10, 16, ¿chucoch Abrahán tsiʼ cʌyʌ jiñi tejclum Ur? b) ¿Chuqui mi caj laj qʼuel ti ili estudio?

² Abrahán tsiʼ cʌyʌ pejtelel muʼ bʌ i mejlel i taj yaʼ ti Ur. ¿Chucoch? Come tsiʼ pijta «jini tejclum am bʌ i cʼʌclib» (pejcan Hebreos 11:8-10, 16). ¿Chuqui jiñi «tejclum»? ¿Chuqui ti wocol tsiʼ ñusa Abrahán cheʼ bʌ wolito (choncolto) i pijtan chaʼan miʼ mejlel jiñi tejclum? ¿Bajcheʼ miʼ mejlel lac mel tsaʼ bʌ i mele Abrahán yicʼot majqui am bʌ i lajiyob ili ora? Mi caj lac jacʼ ti ili estudio.

3. ¿Chuqui jiñi «tejclum» tsaʼ bʌ i pijta Abrahán?

³ Jiñi tejclum tsaʼ bʌ i pijta Abrahán jiñʌch jiñi i Yumʌntel Dios, yaʼ ochem Jesucristo yicʼot jiñi 144 mil xñoptʼañob bombiloʼ bʌ. Pablo tsiʼ yʌlʌ chaʼan ili Yumʌntel jiñʌch «i tejclum jini  cuxul bʌ Dios, jini Jerusalén am bʌ ti panchan» (He. 12:22; Ap. 5:8-10; 14:1). Jesús tsiʼ cʌntesa jiñi xcʌntʼañob i chaʼan chaʼan miʼ cʼajtiñob miʼ tilel ili Yumʌntel chaʼan miʼ mejlel chuqui yom Dios «ti pañimil cheʼ bajcheʼ ti panchan» (Mt. 6:10).

4. Cheʼ bajcheʼ miʼ yʌl Génesis 17:1, 2, 6, ¿chuqui yujilix bʌ Abrahán chaʼan jiñi tejclum o Yumʌntel tsaʼ bʌ i yʌlʌ Dios?

⁴ Abrahán mach wen yujilic bajcheʼ mi caj i chajpʌntel jiñi i Yumʌntel Dios come ti cabʌl jab «mucul» tsaʼ ajñi (Ef. 1:8-10, TNM; Col. 1:26, 27). Pero yujilʌch chaʼan añʌch i pʼolbalob muʼ bʌ caj i yochelob bajcheʼ rey come Jehová tsaʼʌch i wʌn sube (pejcan Génesis 17:1, 2, 6). Tsaʼʌch i wen ñopo jiñi albil tac bʌ i chaʼan Dios i lajalix bajcheʼ wolix (yʌquelix) i qʼuel jiñi Yajcʌbil bʌ o jiñi Mesías muʼ bʌ caj i yochel ti Rey ti jiñi i Yumʌntel Dios. Jin chaʼan, Jesús tiʼ sube jiñi judíojob: «Tijicña laʼ tat Abraham cheʼ bʌ tsiʼ ñaʼta j qʼuiñilel ti pañimil. Abraham tsiʼ chʼʌmbe isujm. Tijicña tsiʼ yubi» (Jn. 8:56). Abrahán yujilʌch chaʼan jiñi i pʼolbal mucʼʌch caj i yochelob ti jiñi Yumʌntel waʼchocobil bʌ ti Dios yicʼot tsiʼ pijta chaʼan Jehová miʼ tsʼʌctesan i tʼan.

5. ¿Bajcheʼ la cujil chaʼan Abrahán tsaʼʌch i pijta jiñi «tejclum» waʼchocobil bʌ ti Dios?

⁵ ¿Bajcheʼ tsiʼ pʌsʌ Abrahán chaʼan tsiʼ pijta jiñi «tejclum» o Yumʌntel waʼchocobil bʌ ti Dios? Ñaxan, maʼañic tsiʼ yʌcʼʌ i bʌ tiʼ wenta juntiquil yumʌl ila ti pañimil (mulawil). Maʼañic tsaʼ cʌyle ti chumtʌl ti jumpʼejl tejclum i mi tsaʼicto i yʌqʼue i coltaya juntiquil yumʌl. I cheʼ jaʼel, maʼañic tsiʼ ñopo i bajñel waʼchocon i yumʌntel. Tiʼ pejtelel ora tsiʼ chʌn jacʼbe i tʼan Jehová i tsiʼ pijta chaʼan miʼ tsʼʌctesan jiñi albil bʌ i chaʼan. Cheʼ bajcheʼ jiñi, tsiʼ pʌsʌ chaʼan wen añʌch i ñopoñel ti Dios. Laʼ laj qʼuel chuqui tac ti wocol tsiʼ ñusa i chuqui miʼ mejlel laj cʌn tiʼ tojlel.

6. ¿Bajcheʼ yilal jiñi tejclum Ur?

⁶ Jiñi tejclum tsaʼ bʌ i cʌyʌ Abrahán an ñʌchʼtʌlel yilal i wen chumulob. An i chaʼan colem bʌ tsʼajc yicʼot joy topʼol i chaʼañob jiñi lum tiʼ yuxwejlel jiñi tejclum. Jiñi chumuloʼ bʌ yaʼ ti Ur wen yujilob i chaʼan tac bʌ tsʼijb yicʼot matemática. Ti jiñi tejclum cabʌl jax chuqui miʼ wen chojñel come jiñi arqueólogojob  an i wen tajayob jun tac chaʼan bʌ choñoñel. Jiñi otot tac melbil (pʌtbil) ti ladrillo yicʼot wen utsʼatax bajcheʼ bombil tac. An tac am bʌ i chaʼan 13 o 14 cuarto.

7. ¿Chucoch Abrahán yomʌch miʼ ñop chaʼan muʼ bʌ caj i cʌntan yicʼot i familiajob jiñʌch Jehová?

⁷ Abrahán yomʌch miʼ ñop chaʼan muʼ bʌ caj i cʌntan yicʼot i familiajob jiñʌch Jehová. ¿Chucoch? Come yaʼ ti Ur tsiʼ cʌyʌyob wem bʌ i chumlib baqui an ñʌchʼtʌlel yilal i tsaʼ chumleyob ti pisil tac bʌ otot yaʼ ti Canaán. Maʼañix chan tac bʌ tsʼajc yicʼot joy topʼol tac bʌ lum. I maʼañix chuqui miʼ mʌctañob tiʼ contrajob.

8. ¿Chuqui bʌ wocol tac tsiʼ ñusa Abrahán?

⁸ Abrahán tsaʼʌch i mele chuqui yom bʌ Dios, pero ti jumpʼejl bʌ qʼuin tsiʼ taja wocol chaʼan miʼ mʌcʼlan i familia. Tsaʼ tejchi cabʌl wiʼñal yaʼ baqui tsiʼ choco majlel Jehová chaʼan miʼ chumtʌl. Jin chaʼan, tsiʼ jumucʼ pʌyʌ majlel i familia ti chumtʌl yaʼ ti Egipto. Pero cheʼ bʌ yaʼix añob yaʼi, jiñi faraón, yumʌl bʌ ti jiñi tejclum, tsiʼ chilbe i yijñam Abrahán, jiñi Sara. Miʼ mejlel lac ñaʼtan chaʼan Abrahán tsaʼʌch i wen cʼojoʼta jinto cheʼ bʌ Jehová tiʼ sube jiñi faraón chaʼan miʼ chaʼ sutqʼuiben i yijñam (Gn. 12:10-19).

9. ¿Chuqui ti wocol tsiʼ ñusa Abrahán tiʼ familia?

⁹ Cabʌl wocol tsiʼ ñusa jiñi i familia Abrahán. Jiñi cʼuxbibil bʌ i yijñam, Sara, maʼañic miʼ mejlel ti tilel i yalobil. Tiʼ caj ili wocol, cabʌl jab tsiʼ wen ubiyob i chʼijiyemlel. Ti wiʼil, Sara tiʼ sube Abrahán chaʼan miʼ pʌy Agar bajcheʼ i yijñam. Cheʼ bajcheʼ jiñi, Agar miʼ mejlel i yʌqʼueñob i yalobil jiñi Abrahán yicʼot Sara. Pero cheʼ bʌ cʌntʌbilix i chaʼan Ismael, tsaʼ caji i pʼaj jiñi Sara. Tsaʼ wen tsʌtsʼa jiñi wocol, jin chaʼan Sara an chuqui tsiʼ mele chaʼan Agar miʼ putsʼel loqʼuel (Gn. 16:1-6).

10. ¿Chuqui tsaʼ ujti tiʼ tojlel Ismael yicʼot Isaac tsaʼ bʌ i yʌcʼʌ ti wocol i ñopoñel Abrahán ti Jehová?

¹⁰ Tiʼ wiʼil, Sara tsiʼ yʌqʼue i yalobil i ñoxiʼal i tsiʼ yotsʌbe i cʼabaʼ bajcheʼ Isaac. Abrahán tsiʼ wen cʼuxbi jiñi chaʼtiquil i yalobil, Ismael yicʼot Isaac. Pero Ismael tsiʼ mele mach bʌ tojic tiʼ tojlel Isaac, jin chaʼan Abrahán tsiʼ choco loqʼuel Ismael yicʼot Agar (Gn. 21:9-14). I ti wiʼil, Jehová tiʼ sube Abrahán chaʼan miʼ tsʌnsan Isaac (Gn. 22:1, 2; He. 11:17-19). Ti jiñi chaʼpʼejl wocol tsaʼ bʌ i ñusa Abrahán, tsaʼʌch i ñopo chaʼan Jehová mucʼʌch caj i tsʼʌctesan jiñi tsaʼ bʌ i wʌn alʌ tiʼ tojlel jiñi i yalobilob.

11. ¿Chucoch Abrahán maʼañic tiʼ sʌtʌ i pijtaya ti Jehová?

¹¹ Tiʼ pejtelel ora, Abrahán maʼañic tiʼ sʌtʌ i pijtaya ti Jehová. Cheʼ bʌ tsaʼ loqʼui yicʼot i familia yaʼ ti Ur, tajol ñumeñix ti 70 i jabilel (Gn. 11:31-12:4). I cheʼ bʌ 100 jab tsaʼ chumle ti pisil tac bʌ otot yicʼot tsiʼ joy xʌñʌ ñumel jiñi tejclum Canaán. Cheʼ bʌ tsaʼ chʌmi Abrahán añix 175 i jabilel (Gn. 25:7). Maʼañic tsiʼ qʼuele bajcheʼ Jehová tsaʼʌch i yʌqʼue jiñi i pʼolbalob jiñi lum baqui tsiʼ xʌñʌ ñumel. Cheʼ jaʼel, maʼañic tsiʼ qʼuele bajcheʼ tsaʼ waʼchoconti jiñi tejclum tsaʼ bʌ i pijta, jiñi i Yumʌntel Dios. Pero jiñi Biblia miʼ yʌl chaʼan «cabʌlix i jabilel» tsaʼ chʌmi yicʼot tijicña (Gn. 25:8). Anquese tsiʼ ñusa cabʌl wocol, chʌn pʼʌtʌl tsaʼ ajñi i ñopoñel yicʼot maʼañic tsiʼ sʌtʌ i pijtaya ti Jehová. ¿Chucoch tsaʼʌch mejli i cuch jiñi wocol tac? Come tiʼ pejtelel i cuxtʌlel tsaʼ ajñi bajcheʼ i yamigo Jehová yicʼot tsaʼ cʌntʌnti (Gn. 15:1; Is. 41:8; Stg. 2:22, 23).

12. a) ¿Chuqui woli lac pijtan jiñi i wiñiconbʌla Dios? b) ¿Chuqui mi caj laj qʼuel?

¹² Cheʼ bajcheʼ Abrahán, joñonla woli lac pijtan jaʼel jiñi tejclum am bʌ i cʼʌclib. Maʼañic woli lac pijtan chaʼan mi caj i mejlel jiñi tejclum come jiñi i Yumʌntel Dios tsaʼix waʼchoconti ti 1914 yicʼot añix tiʼ wenta jiñi panchan (Ap. 12:7-10). Pero woliyʌch lac pijtan chaʼan miʼ mel i yeʼtel ila ti Lum. Cheʼ bʌ wolito lac pijtan,  mi caj lac ñusan jaʼel wocol tac cheʼ bajcheʼ tsaʼ bʌ i ñusa Abrahán yicʼot Sara. ¿Am ba mejlem i lajiñob Abrahán jiñi i wiñicob Jehová ili ora? Ti jiñi Lac Tsictesʌbentel an lac taja chuqui ujtem bʌ tiʼ tojlel jiñi hermanojob am bʌ i pʌsʌyob i ñopoñel yicʼotob i pijt cheʼ bajcheʼ Abrahán yicʼot Sara. Laʼ lac tsʼitaʼ cʌn chaʼan ili hermanojob yicʼot laʼ laj qʼuel chuqui miʼ mejlel laj cʌn.

13. ¿Chuqui miʼ cʌntesañet jiñi tsaʼ bʌ ujti tiʼ tojlel jiñi hermano Bill?

¹³ Laʼ laj cʌy chuqui la com lac bajñel mel chaʼan mi lac melben i chaʼan bʌ Dios. Mi la com chaʼan jiñi i Yumʌntel Dios jiñʌch ñumen ñuc bʌ ti laj cuxtʌlel yom mi lac mel bajcheʼ Abrahán chaʼan mi lac tijicñesan Dios (Mt. 6:33; Mr. 10:28-30). Laʼ laj qʼuel tsaʼ bʌ i ñusa jiñi hermano Bill Walden. * Ti 1942, cheʼ bʌ tsʼitaʼ jax yom chaʼan miʼ sujtel ti ingeniero yaʼ ti Estados Unidos, tsaʼ caji ti estudio yicʼot i testigojob Jehová. Juntiquil i maestro tsiʼ sʌclʌbe i yeʼtel cheʼ baʼ ora miʼ loqʼuel yaʼ ti universidad, pero Bill maʼañic tsiʼ jacʼʌ. Tsiʼ yʌlʌ chaʼan maʼañic mi caj i mel jiñi eʼtel come yom i ñumen melben i yeʼtel Dios. Mach jalic tsaʼ ñumi, tsaʼ subenti ochel bajcheʼ soldado. Wen jach tsiʼ yʌlʌ chaʼan maʼañic mi caj i yochel bajcheʼ soldado, i tiʼ caj ili tsaʼ aqʼuenti i toj multa yicʼot tsaʼ subenti chaʼan mi caj i yajñel joʼpʼejl jab ti cárcel. Cheʼ bʌ uxpʼejlix jab yaʼan, tsaʼ locʼsʌnti ti cárcel. Ti wiʼil, tsaʼ pʌjyi ti jiñi Cʌntesʌntel loqʼuem bʌ ti Biblia i chaʼan Galaad i tsaʼ chojqui majlel ti África bajcheʼ misionero. Bill tsaʼ ñujpuñi yicʼot Eva i temel tsiʼ melbeyob i yeʼtel Jehová yaʼ ti África, baqui cabʌl chuqui tsiʼ qʼuextayob tiʼ cuxtʌlel. Cheʼ ñumeñix cabʌl jab, tsaʼ chaʼ majliyob ti Estados Unidos chaʼan miʼ cʌntʌbeñob i ñaʼ Bill. Cheʼ bʌ miʼ wen ñaʼtan pejtelel tsaʼ bʌ i chumta, Bill miʼ yʌl: «Wen tijicñayon cheʼ bʌ mic wen ñaʼtan chaʼan ñumen ti 70 jab an i cʼʌñʌyon Jehová chaʼan mic wen melben i yeʼtel. Ti bele ora mi cʌqʼuen wocolix i yʌlʌ chaʼan tsiʼ coltayon j cʼʌn j cuxtʌlel chaʼan mic melben  i yeʼtel». ¿Muʼ baʼ mejlel a cʼʌn a cuxtʌlel chaʼan maʼ melben i yeʼtel Jehová tiʼ pejtelel ora?

14, 15. ¿Chuqui mi laj cʌn tiʼ tojlel jiñi hermano Aristotelis yicʼot Eleni?

¹⁴ Mach lac ñaʼtan chaʼan maʼañic baqui ora mi caj lac ñusan wocol. Jiñi tsaʼ bʌ ujti tiʼ tojlel Abrahán miʼ pʌsbeñonla chaʼan mucʼʌch caj i tajob wocol jaʼel jiñi muʼ bʌ i yʌqʼueñob i cuxtʌlel Jehová (Stg. 1:2; 1 P. 5:9). Jiñʌch tsaʼ bʌ ujti tiʼ tojlel jiñi hermano Aristotelis Apostolidis. * Tsiʼ chaʼle chʼʌmjaʼ ti Grecia ti 1946. Jiñʌch juntiquil hermano wen tijicña bʌ, i ti 1952 tiʼ sube Eleni chaʼan yom i pʌy tiʼ yijñam come juntiquilʌch hermana jaʼel yom bʌ i melben i yeʼtel Jehová tiʼ pejtelel ora. Pero Eleni tsaʼ cʼamʼa i jiñi doctorob tiʼ subeyob chaʼan an jumpʼejl tumor tiʼ jol. Tsaʼʌch i tsepbeyob loqʼuel, i ti wiʼil tsiʼ chaʼ pʌsʌ i bʌ cheʼ bʌ maxto cabʌlic jab ñujpuñemob. Tiʼ chaʼ tsepbenti, pero maʼañix tsaʼ mejli i ñijcan pejtelel i bʌcʼtal yicʼot wocolix chaʼan miʼ chaʼlen tʼan. Anquese Eleni cʼamʌch yicʼot jiñi yumʌlob woliʼ ticʼlañob jiñi i testigojob Jehová ti jimbʌ ora, chʌn tijicña tsiʼ chaʼle subtʼan.

¹⁵ Anquese Aristotelis cheʼ bʌ 30 jab tsiʼ cʌnta i yijñam, tsaʼ ajñi bajcheʼ anciano, tsiʼ chaʼle coltaya bajcheʼ comité chaʼan colem tempa bʌ yicʼot tsiʼ chaʼle coltaya chaʼan tiʼ melol jumpʼejl i Yotlel colem tempa bʌ. Cheʼ jiñi, ti 1987, Eleni tsiʼ taja jumpʼejl accidente cheʼ bʌ woli ti subtʼan. Uxpʼejl jab tsaʼ ajñi bajcheʼ chʌmeñix, i ti wiʼil tsaʼ yoque chʌmi. Aristotelis miʼ yʌl tsaʼ bʌ i ñusa: «Ti jiñi jabil tac ñumen bʌ tilel, an c taja cabʌl wocol tac mach tac bʌ pijtʌbilic c chaʼan. Jin chaʼan, yomʌch mic lʌtʼ muʼ bʌ i tilel tic tojlel i chaʼan maʼañic chuqui miʼ cʼunʼesañon. Jehová añʌch i yʌqʼueyon ti bele ora jiñi c pʼʌtʌlel i cʼʌjñibal bʌ c chaʼan chaʼan mic lʌtʼ jiñi wocol tac» (Sal. 94:18, 19). Tiʼ sujm, Jehová miʼ wen cʼuxbin jiñi muʼ bʌ i chaʼleñob wersa chaʼan miʼ melbeñob i yeʼtel anquese añob i wocol.

16. ¿Chuqui wem bʌ ticʼojel tiʼ sube jiñi hermano Knorr jiñi i yijñam?

¹⁶ Laʼ lac chʌn acʼ lac pensar ti jiñi talto bʌ qʼuin. Abrahán cojach tsiʼ chʌn ñaʼta muʼ bʌ caj  i yʌqʼuentel ti Jehová ti talto bʌ qʼuin, jin chaʼan tsiʼ lʌtʼʌ jiñi wocol tac tsaʼ bʌ i ñusa. Jiñʌch tsaʼ bʌ i ñaʼta jiñi hermana Audrey Hyde, anquese jiñi ñaxam bʌ i ñoxiʼal, Nathan Knorr, tsaʼ chʌmi tiʼ caj jiñi cáncer, i jiñi i chaʼticlel i ñoxiʼal, Glenn Hyde, tsiʼ taja Alzheimer. * Jiñi hermana miʼ yʌl chaʼan tsiʼ wen colta jiñi tsaʼ bʌ i sube jiñi hermano Knorr cheʼ bʌ mach cabʌlix semana mi caj ti chʌmel (sajtel). Tiʼ sube: «Cheʼ baʼ ora mi lac chʌmel, Jehová mi caj i yʌqʼueñonla jiñi tsaʼ bʌ i subeyonla, i maʼañix baqui ora mi caj lac ñusan wocol». Cheʼ jiñi, tsiʼ yʌqʼue ili ticʼojel: «Chʌn ñaʼtan jiñi talto bʌ qʼuin come yaʼʌch baqui an a majtan». I tsiʼ bej sube: «Chʌn chaʼlen eʼtel, chaʼlen wersa chaʼan maʼ coltan yambʌlob. Jiñʌch muʼ bʌ caj i tijicñesañet». Ili jiñʌch wem bʌ ticʼojel chaʼan yom mi lac chaʼlen wersa lac mel chuqui wem bʌ tiʼ tojlel yambʌlob yicʼot chaʼan yom tijicñayonla chaʼan jiñi woli bʌ lac pijtan (Ro. 12:12).

17. a) ¿Chucoch yomʌch mi lac chʌn acʼ lac pensar ti jiñi talto bʌ qʼuin? b) ¿Bajcheʼ mi caj i coltañonla cheʼ mi lac mel muʼ bʌ i yʌl Miqueas 7:7 chaʼan mi lac ñusan lac bʌ ti jiñi bendición muʼ bʌ caj i tilel?

¹⁷ Ili ora yomʌch mi lac chʌn acʼ lac pensar ti jiñi talto bʌ qʼuin. Jiñi woli bʌ i yujtel tiʼ pejtelel pañimil miʼ yʌqʼueñonla laj qʼuel chaʼan chumuloñixla ti jiñi cojix bʌ qʼuin tac. Mach jalix yom chaʼan jiñi tejclum am bʌ i cʼʌclib miʼ tech i mel i yeʼtel ila ti Lum. Junchajp muʼ bʌ caj i yʌqʼueñonla lac tijicñʌyel jiñʌch cheʼ mi caj lac chaʼ qʼuel jiñi tsaʼix bʌ chʌmiyob lac chaʼan. Cheʼ jiñi, Jehová mi caj i yʌqʼuen i bendición Abrahán chaʼan jiñi i ñopoñel yicʼot jiñi i pijt tsaʼ bʌ i pʌsʌ cheʼ bʌ mi caj i chaʼ tejchesʌntel yicʼot i familia ila ti Lum. ¿Yaʼ ba mi caj a wajñel chaʼan maʼ pejcañob? Yaʼʌch mi caj a wajñel, mi mucʼʌch a mel tsaʼ bʌ i mele Abrahán chaʼan maʼ coltan i Yumʌntel Dios, cheʼ chʌn añʌch a ñopoñel anquese an wocol tac i maʼ chʌn acʼ a pijtaya ti Jehová (pejcan Miqueas 7:7).