1. Nemene la hna kuca hnene la itre xaa hlue i Iehova, nge pine nemen?

 AME enehila, itre milio la itre hlue i Akötresie ka xomehnöth la itre xaa aja i angatr. Ame itre xan, hnei angatr hna iën matre tha tro kö a faipoipo. Ame la itre xaa trefën, hnei angatr hna iën troa hetre nekönatr e thupen. Nge hnei itre xaa fami hna ahmaloeëne la mele i angatr. Eje hi, aja i angatr troa catre nyihlue i Iehova. Xecie koi angatr laka, tro kö Iehova a hamëne la itre hnei angatr hna ajan. Hapeu, ka gufa kö la aqane axecië mekuna i angatr? Waea. Pine nemen? Atre hi së laka, hnei Iehova hna amanathithi Aberahama ekö, “keme ne la itretre lapaun.”—Rom. 4:11.

2. (a) Thenge la Heberu 11:8-10, 16, pine nemene matre hnei Aberahama hna tro qa Ure? (b) Nemene la hne së hna troa ce wang?

² Hnei Aberahama hna nue la mele i angeic ka lolo ngöne la traon e Ure. Pine nemen? Pine laka, angeic a treqene la “traon ka hetre nyipi trepen.” (E jë la Heberu 11:8-10, 16.) Nemene la traon cili? Nemene la itre jol hna cile kow hnei Aberahama ngöne la angeic a treqene troa acile lai traon? Nemene la aqane tro sa nyitipu angeic memine la itre xaa hlue i Akötresie enehila?

3. Nemene la traon hna treqen hnei Aberahama?

³ Ame la traon hna treqen hnei Aberahama, tre, kola qaja la Baselaia i Akötresie. Iesu memine la ala 144 000 lao hna iën la ka sine la Baselaia cili. Öni Paulo: “Traon ne la Akötresie ka mel, me Ierusalema ne hnengödrai.” (Heb. 12:22; Hna ama. 5:8-10; 14:1) Hnei Iesu  hna inine la itretre dreng troa thith matre traqa pi la Baselaia, nge troa eje la aja i Akötresie e celë fen tun e hnengödrai.

4. Thenge la Genese 17:1, 2, 6, nemene la hnei Aberahama hna atre göne la traon hna thingehnaean hnei Akötresie, ene la Baselaia?

⁴ Hapeu, atre kö Aberahama la aqane trongene la Baselaia i Akötresie? Waea. Ame ekö, itre ithuemacanyi lai “ka hmitrötr nge hna juetrën.” (Efe. 1:8-10; Kol. 1:26, 27) Ngo atre hi Aberahama laka, tro la itre matra i angeic a joxu. Celë hi la hna thingehnaean hnei Iehova. (E jë la Genese 17:1, 2, 6.) Hnei Aberahama hna catre lapaun kowe la hna thingehnaean hnei Iehova, matre kösë öhne hi angeic la Mesia, ene la joxu ne la Baselaia. Celë hi matre öni Iesu koi angetre Iudra: “Hnei Aberahama, keme i nyipunie hna lapa treqene la drai ne tro ni a traqa. Nge öhne hë angeice lai me madrin.” (Ioane 8:56) Eje hi, atre hi Aberahama laka, tro la matra i angeic a sine la Baselaia hna acile hnei Iehova. Nge angeic pë hë a treqene tro Akötresieti a eatrëne la hna thingehnaean.

5. Nemene la aqane amamane Aberahama laka, angeic a lapa treqen la “traon” hna acile hnei Akötresie?

⁵ Nemene la aqane amamane Aberahama laka, angeic a lapa treqene la “traon” ene la Baselaia hna acile hnei Akötresie? Ame la hnapan ke, tha hnei angeice kö hna sine la ketre baselaia. Hnei angeic palahi hna feke trootro. Tha hnei angeice kö hna lapa hut ngöne la ketre götran, me nyihluene la ketre joxu. Ketre, tha hnei angeice kö hna thel troa joxu. Hnei angeic hna drengethenge Iehova me lapa treqen la tro Nyidrëti a eatrëne la itre hna thingehnaean. Celë hi aqane amamane Aberahama la lapaune i angeic koi Akötresie. Tro sa pane ce wang la itre jol hna cile kow hnei Aberahama me xomi ini qa ngöne la tulu i angeic.

6. Ka tune kaa la traon e Ure?

⁶ Ame la traon hna trotrij hnei Aberahama, tre, ka tru hnei mo nge lolo me tingeting la mel e cili. Hna xup xötreithe la  traon hnei hag ka draië catr nge hna si hnaope ne la köni götrane la traon. Atreine hi la itre atr troa cinyihan me thele numera. Ketre, hnene la itre ka ithel hna öhn la itre pepa ne salem e cili. Nge ame la itre uma, hna xupe hnei birik, matre ka catr la itre ngöne uma. Traqa koi 14 la itre hnahag, nge hetre hnë tro qëmeken.

7. Pine nemene matre nyipiewekë tro Aberahama a lapaun laka, tro Iehova a thupë angeic me fami angeic?

⁷ Nyipiewekë tro Aberahama a lapaun laka, tro Iehova a thupë angeic me fami angeic. Pine nemen? Pine laka, hnei Aberahama me Sara hna trotrij la mele ka loi me tingeting e Ure, matre troa lapa ngöne la itre uma mano ngöne la hnapapa e Kanana. Paatre hë lo itre hag me hnaop ka jui ka thupë angeic me fami angeic e traqa hetre ithupëjia.

8. Nemene la itre jol hna cile kow hnei Aberahama?

⁸ Hnei Aberahama palahi hna kuca la aja i Iehova. Ngo ame la ketre ijin, jole koi angeic troa ithuane la fami angeic. Hna traqa la ketre jiin atraqatr ngöne la nöj hnei Iehova hna upi angeice kow. Celë hi matre hnei angeic me fami angeic hna fek a tro Aigupito. E cili, hnei Farao hna thapa la föi Aberahama. Pane mekune jë la akötre i Aberahama utihë la Iehova a upi Farao troa nue Sara.

9. Nemene la itre jol ka traqa ngöne la fami Aberahama?

⁹ Nyimutre fe la itre jol ka traqa ngöne la fami Aberahama. Eje hi, tha ka hnaho kö Sara. Nyimu macatre ne lapa fë nyidroti la jol cili. celë hi matre hnei Sara hna upi Hagara, hlue i eahlo, koi Aberahama, matre troa hetre matra i nyidro. Ngo ame hë la Hagara a upune Isamaela, hnei angeic hna nyiqane methinë Sara. Akötre catr palaha Sara, matre hnei eahlo hna helë Hagara.—Gen. 16:1-6.

10. Nemene la ka traqa koi Isamaela me Isaaka nge ka tupathe la lapaune i Aberahama?

¹⁰ Ame hë thupen, hnei Sara hna hnaho nekö i Aberahama trahmany me hë nyën ka hape, Isaaka. Ka tru la ihnimi Aberahama kowe la lue nekö i nyidrëti trahmany. Ngo hnei Isamaela hna lapa qanangazo Isaaka, matre hnei Aberahama hna helë Isamaela me thine i angeic. (Gen. 21:9-14) Thupene lai, hnei Iehova hna upi Aberahama troa huujëne la mele i Isaaka. (Gen. 22:1, 2; Heb. 11:17-19) Eje hi, lue ewekë lai ka tupath la lapaune i Aberahama. Nyipiewekë tro Aberahama a mejiun laka, tro Iehova a thupëne la lue nekö i nyidrë.

11. Pine nemene matre nyipiewekë tro Aberahama a lapa treqe Iehova?

¹¹ Hnei Aberahama hna inine troa lapa treqe Iehova. Traqa koi 70 lao macatre i Aberahama ngöne la angeic a tro qa Ure me fami angeic. (Gen. 11:31–12:4) Nge traqa koi 100 lao macatre ne angeic a mel e hnine la itre uma mano e Kanana. Hnei Aberahama hna mec ngöne la angeic a 175 lao macatre. (Gen. 25:7) Tha hnei angeice kö hna öhn la kola eatr la hna perofetan hnei Iehova laka, troa hamën la nöje Kanana kowe la itre matra i angeic. Ketre, tha öhne fe kö angeic la kola acile la Baselaia i Akötresie. Ame pe, öni Tusi Hmitrötr ka hape, angeic a mec “nge nyipi qate catë hë.” (Gen. 25:8) Ngacama nyimutre la itre jol ka traqa koi Aberahama, ngo hnei angeic palahi hna lapaun me lapa treqe Iehova. Hnei Aberahama hna cile catr  ke, hnei Iehova hna thupë angeic, enehmu i Nyidrë.—Gen. 15:1; Is. 41:8; Iako. 2:22, 23.

12. Nemene la hne së hna lapa treqen, nge nemene la hne së hna troa ce wang?

¹² Tui Aberahama, easa lapa treqene la traon ka hetre nyipi trepen. Tha kolo kö a qaja la ketre traone hna xup hnei atr. Kolo pe a qaja la Baselaia i Akötresie hna acile lo 1914. (Hna ama. 12:7-10) Easa treqene tro ej a musi e celë fen. Ngo tro fe sa hane cile kow la itre jol tui Aberahama me Sara. Hapeu, kolo kö a nyitipu Aberahama hnene la itre hlue i Iehova enehila? Ame e hnine la itre Ita Ne Thup, hetre itre hna melën hnene la itre trejin ka catre lapaun nge ka atreine itreqe. Tro sa ce wang la itre xaa tulu me xomi ini qa ngön.

13. Nemene la ini hne së hna xom qa ngöne la tulu i Bill Walden?

¹³ Loi e tro sa xomehnöth la itre xaa aja së. Maine easa ajane troa amë panëne la Baselaia ngöne la mele së, loi e tro sa nyitipu Aberahama. Hnei angeic hna xomehnöth la itre xaa aja i angeic, matre troa amadrinë Akötresie. Tro sa ce wang la hna melën hnei Bill Walden. * Ame lo 1942, hnei nyidrë hna kapa la pepa matre troa architecte. Thupene la itre macatre ne ini, hnei nyidrë hna nyiqane ini tus memine la itre Temoë Iehova. Hnene la porofesör i Bill hna öhne la ketre huliwa, ngo hnei nyidrëti hna thipën. Öni Bill ka hape, nyidrë a ajane troa catre huliwa koi Akötresie. Celë hi matre, ame la kola hë nyidrë troa sooc, hnei nyidrë hna thipën. E cili, hna upi Bill troa nyithupene la 10 000 dollars me akalabusi nyidrë koi 5 lao macatre. Thupene la köni macatre, hna nue nyidrëti hmaca. E cili, hna hë Bill troa sine la Ini Ne Gileada, nge hna upi nyidrë troa mesinare e Afrique. Hnei nyidrë hna faipoipo me Eva, nge hnei nyidroti  hna thele troa catre huliwa koi Iehova. Ngo hnei nyidroti hna bëek e Etazini matre troa thupën la thine i Bill. Öni Bill: “Eni a treij la eni a mekun laka, hnei Iehova hna aijijë ni troa huliwa koi Nyidrë koi 70 lao macatre. Eni a olene koi Iehova la hna xatua ni ngöne la itre macatre cili.” Hapeu, ijiji epuni kö troa nue la mele i epun troa catre nyihlue i Iehova?

14-15. Nemene la hna ini së hnene la tulu i Aristotelis me föi nyidrë?

¹⁴ The mekune kö laka, ka pë ejolene la mel. Kola mama ngöne la tulu i Aberahama laka, nyimutre la itre jol hna troa cile kow hnene la itre ka catre huliwa i Iehova. (Iako. 1:2; 1 Pet. 5:9) Celë hi hna melën hnei Aristotelis Apostolidis. * Hna bapataiso nyidrë e Grèce lo 1946, nge ame hë lo 1952, hnei nyidrëti hna iatre me Eleni, ketre trejin ka ajane troa catre huliwa koi Iehova. Nyidroti petre hi a ase faipoipo, nge hna öhn la ketre cancer ngöne la atuate i Eleni, matre hna xöji eahlo. Ngazo pe, hna fetra hmaca lai mec, matre hnene la itre droketre hna xöji Eleni hmaca, nge hna hetre ethane koi eahlo. Tha drenge hë eahlo la ketre götrane la ngönetrei nge jole hë troa ithanata. Ngacama hace catre la meci Eleni nge kola icilekeu hnei mus, ngo hnei eahlo palahi hna catre cainöj.

¹⁵ Hnei Aristotelis hna thupëne la föi nyidrë koi 30 lao macatre. Ketre, hnei nyidrëti hna xome la hnëqa ne qatre thup, me sine la komite ne asabele, me ixatua troa xup la ketre Uma Ne Asabele. Ame lo 1987, hnei Eleni hna eatr ngöne la hna cainöj, matre 3 lao macatre ne meköle eahlo ngöne koma. Ame hë e thupen, hnei eahlo hna mec. Öni Aristotelis: “Tru catre la itre jol ka traqa koi ni. Ngo hnenge hna cile catr me xomihni aqeany. Hnei Iehova palahi hna hamë ni la trengecatr ka ijij, matre tro ni a atreine cile kow la itre jol cili.” Eje hi,  Iehova a hnime la itre ka catre huliwa i Nyidrë ngöne la itre jol!

16. Nemene la eamo ka lolo hna hamën hnei Nathan Knorr kowe la föi nyidrë?

¹⁶ Troa mekun la itre drai elany. Hnei Aberahama hna lapa mekun la itre manathith hnei nyidrëti hna troa kapa qaathei Iehova. Celë hi ka xatua nyidrë troa cile catr ngöne la itre jol. Celë hi hna kuca hnei trejin Audrey Hyde, * ngöne la kola meci hnei Nathan Knorr, pane föi eahlo, me ngöne la kola Alzheimer hnene la hnaaluene föi eahlo, Glenn Hyde. Öni Audrey ka hape, hna xatua eahlo hnene la hna qaja hnei Nathan Knorr, qëmekene tro nyidrëti a mec. Öni nyidrë: “Catre jë mejiun laka, troa hetre melehmaca nge pë hmaca kö akötr. Lapa mekune ju la itre manathith elany. Catre jë huliwa koi Akötresie me xatuane la itre xan. E cili, tro hë nyipoti a madrin.” Drei la ketre eamo ka lolo hna hamën, ene la troa kuca la loi koi itre xan me ‘madrin ngöne la mejiun’!—Rom. 12:12.

17. (a) Pine nemene matre loi e tro sa lapa mekun la itre drai elany? (b) Nemene la itre manathith hne së hna troa kapa elany, e tro sa nyitipune la tulu i Mika ngöne Mika 7:7?

¹⁷ Ame enehila, nyipiewekë tro sa lapa mekun la itre drai elany. Kola mama ngöne la itre ewekë ka traqa enehila laka, easa melën la itre drai hnapin. Easenyi hë matre tro la Baselaia i Akötresie a musi e celë fen. E cili, tro ha amelene la itre sinee së hne së hna hnim. Ketre, tro Iehova a amanathithi Aberahama ke, hnei nyidrëti hna catre lapaun me atreine itreqe. Ame elany, tro Iehova a amele nyidrëti hmaca memine la fami nyidrë e celë fen. Hapeu, tro kö sa hane kepe angatr elany? Ijije hi tro sa nyitipu Aberahama. Loi e tro sa xomehnöth la itre xaa aja së, me amë panëne la Baselaia i Akötresie, me catre lapaune ngöne la itre jol, me lapa treqe Iehova.—E jë la Mika 7:7.