1. Ki sakrifis onlo sèwvitè a Bondyé ka fè, é pou ki rézon ?

JÒDIJOU, ni plizyè milyon moun ki ka sèvi Bondyé é ki ka fè sakrifis. Ni onlo frè é sè ki désidé pa mayé. Ni onlo moun-mayé ki désidé pa fè timoun aprézan. É ni dé fanmi ki désidé viv èvè mwens lajan é ki ka menné on vi ki pi senp konnyéla. Men yo pa enki pran sé désizyon-lasa konsa. Yo fè sa pou on rézon ki vréman enpòwtan : yo vé ba Jéova sa yo ni dè méyè. A pa ti kontan yo kontan vi-la yo ni konnyéla la é yo ka fè fon asi Jéova pou i ba-yo tousa yo bizwen ! Èskè sé lèspwa a malpapay yo ni ? Awa ! Kijan nou fè sav sa ? Sé paskè lè nou ka gadé an Bib-la, nou ka rann-nou kont kè Jéova toujou ba sèwvitè a-y tousa yo té bizwen. Pa ègzanp, i béni Abraam, « papa tout moun ki ni lafwa » (Wom. 4:11).

2. a) Dapré sa ki maké an Ébré 11:8-10, 16, poukwa Abraam té paré a kité Our ? b) Ka nou ké vwè adan awtik-lasa ?

² Abraam té ka viv alèz a-y adan on vil yo té ka kriyé Our. Men i lagé vi-lasa san pwoblèm. Poukwa ? Pas i té ka atann on vil, « on vil ki ni fondasyon ki solid » (li Ébré 11:8-10, 16). Ki vil ésa ? Ki difikilté Abraam jwenn toupannan i té ka atann kè yo té konstwi vil-lasa ? Kijan nou pé imité-y é kijan nou pé imité moun ki ka sèvi Bondyé é ki ka suiv ègzanp a Abraam jòdijou ?

3. Ki « vil » Abraam té ka atann ?

³ Vil-la Abraam té ka atann la sé wayòm a Bondyé. Adan wayòm-lasa, nou ka touvé Jézi é sé 144 000 krétyen wen la. Lè Pòl ka palé dè wayòm-la i ka kriyé-y « vil a Bondyé vivan la kivédi Jérizalèm-la ki an syèl-la » (Ébr. 12:22 ; Rév. 5:8-10 ; 14:1). Jézi aprann disip a-y priyé pou  wayòm-lasa vini. Pas sé grasa wayòm-lasa, volonté a Bondyé ké fèt asi latè kon i ka fèt an syèl-la (Mat. 6:10).

4. Sèlon Jénèz 17:1, 2, 6, ka Abraam té sav asi wayòm-la oben asi vil-la Bondyé té pwomèt-li la ?

⁴ Ès Abraam té sav ègzaktèman kijan wayòm a Bondyé té’é òwganizé ? Non. Pannan plizyè syèk, tout sé détay-lasa sé té on « sèkré ki sakré » (Éféz. 1:8-10 ; Kol. 1:26, 27). Men sa Abraam té sav, sé kè pawmi désandan a-y, ni moun ki té’é vin wa pas sé on pwomès Jéova té fè-y (li Jénèz 17:1, 2, 6). Abraam té ni onlo fwa adan sé pwomès-lasa. Kifè, sé konsi i té ka vwè Mési-la, kivédi sila Bondyé té’é chwazi la pou vin Wa a wayòm a-y. Sé pousa Jézi di sé Juif-la : « Abraam papa-zòt té kontan toubònman davwa i té ni lèspwa i té’é vwè jou an mwen rivé on jou, é i vwè-y é tchè a-y té kontan » (Jan 8:56). On biten ki sèten sé kè Abraam té sav kè pawmi désandan a-y ni moun ki té’é fè pawti a wayòm-la Bondyé té’é mèt la. É i té paré a atann kè Jéova réyalizé pwomès a-y.

5. Abraam té ka atann vil-la Bondyé kréyé la. Kijan nou fè sav sa ?

⁵ Sé Bondyé ki désiné plan a vil-la, kivédi plan a wayòm-la Abraam té ka atann la. Kijan Abraam montré kè i té ka atann vil-lasa ? On prèmyé biten i fè, sé kè i pa soutyenn pon wayòm a épòk a-y. I pa jen rété onsèl koté é i pa jen soutyenn pon wa asi latè. Anplisdisa, Abraam pa jen chèché a mèt pwòp wayòm a-y anplas. I té ka fè sa Jéova té ka di-y, é i té ka atann kè Jéova réyalizé pwomès a-y. Sé konsa i montré kè i té ni fwa an Bondyé toubònman. An-nou vwè ki difikilté i jwenn é an-nou vwè ka ègzanp a-y ka aprann-nou.

6. Ki jan dè vil Our té yé ?

⁶ Vil-la Abraam lésé la sé té on vil ki té rich é sé moun-la té ka viv alèz a yo é ansékirité koté-lasa. Té ni gwo miray tout alantou a vil-la é té ni on kannal byen fon ki té ka pwotéjé 3 fasad a-y. Moun ki té ka rété a Our té sav ékri é yo té fò an kalkil. É i ka sanm sa sé on koté  yo té ka fè onlo afè piskè sé awkéològ-la touvé onpakèt papyé ki ka montré sa. Sé kaz-la té fèt èvè brik ; yo té ka kouvè pan a sé kaz-la èvè plat é yo té ka pasé lacho asi yo pou fè-yo vin blan. Ni déotwa kaz ki té ni 13 ou 14 pyès ki té ka bay asi on lakou ki té fèt èvè wòch.

7. Poukwa Abraam té sèten kè Jéova té’é pé pwotéjé ki li ki fanmi a-y ?

⁷ Fò Abraam té ni konfyans kè Jéova té’é pwotéjé ki li ki fanmi a-y. Poukwa ? Pa oubliyé kè lè Abraam é Sara té ka rété a Our i té alèz a-y é i té ansékirité. Men i lagé tousa pou i té ay viv anba tant, a Kanaan é lwen a tout vil ki té ni an péyi-lasa. Pa té ni pon miray ni pon kannal pou pwotéjé-yo ankò. Konnyéla, nenpòt ki lènmi té’é pé ataké-yo fasilman.

8. Ki difikilté Abraam jwenn ?

⁸ Abraam té ka fè volonté a Bondyé, men pannan on tan i té ni dimal a ba fanmi a-y bwè é manjé pas rivé onlè, la Jéova voyé-y la, moun té ka mò-fen davwa pa té ni asé manjé. Tèlman sitiyasyon-la té grav i désidé ay viv an Éjipt èvè fanmi a-y pannan kèlkè tan. Men lè i rivé la, faraon-la ki té ka dirijé péyi-la, chapé èvè madanm a Abraam pa fòs. Ou ka tou konprann Abraam té angwasé toubònman ! É sé yenki lè Jéova fè faraon lagé Sara, Abraam dwèt santi-y myé (Jén. 12:10-19).

9. Ki difikilté ki té ni an fanmi a Abraam ?

⁹ Té ni gwo pwoblèm an fanmi a Abraam osi. I té enmé Sara, madanm a-y, onlo men malérèzman, Sara pa té pé fè timoun. Pannan plizyè lanné, yo té vréman tris akòz dè sa. Alò, Sara ba Abraam sèwvant a-y Aga, pou sèwvant-lasa té fè on timoun pou yo. Men, lèwvwè Aga vin touvé-y ansent Izmaèl, i mété-y ka méprizé Sara toubònman. Sara pa té pé èvè-y ankò, kifè, i désidé voyé-y alé ! (Jén. 16:1-6).

10. Ka ki rivé Izmaèl é Izaak ki té’é pé anpéché Abraam fè Jéova konfyans ?

¹⁰ Sara fin pa tonbé ansent é i ba Abraam on tigason. Abraam kriyé-y Izaak. Abraam té enmé toulédé gason a-y. Men konm Izmaèl té ka fè Izaak bon méchansté, Abraam té oblijé voyé ki li ki manman-y alé (Jén. 21:9-14). Tibwen plita, Jéova mandé Abraam sakrifyé Izaak gason a-y (Jén. 22:1, 2 ; Ébr. 11:17-19). Sé 2 sitiyasyon-lasa dwèt fè Abraam réfléchi toubònman. Ès i té’é kontinyé fè Jéova konfyans ? Fò i té sèten kè Jéova té’é fè ansòt pou tout biten pasé byen pou toulédé gason a-y.

11. Fò Abraam té atann Jéova èvè onlo pasyans. Poukwa ?

¹¹ Pannan tout tan-lasa, fò Abraam té atann Jéova èvè onlo pasyans. I ka sanm sa i té ni plis ki 70 an lèwvwè i lésé Our èvè fanmi a-y (Jén. 11:31 – 12:4). Pannan 100 an apépré, i viv diféran koté a Kanaan. É i té anba tant. Lè i mò i té ni 175 an (Jén. 25:7). Jéova té pwomèt-li kè i té’é ba désandan a-y péyi-la i travèsé la, men i pa ni tan vwè sa fèt. É i pa viv asé lontan pou i té vwè Bondyé mèt wayòm a-y anplas. Magrésa, lè Labib ka palé dè-y i ka di kè i mò ‘vyé’ é kè ‘i viv plen vant a-y’ (Jén. 25:8). Sé vré, i jwenn onlo difikilté, men fwa a-y rété fò. I té dakò pou atann Jéova é i fè sa èvè plézi. Poukwa i rivé andiré ? Sé paskè pannan tout vi a-y Jéova pwotéjé-y é i aji èvè-y kon on bon zanmi ka fè (Jén. 15:1 ; Iz. 41:8 ; Jak 2:22, 23).

12. Ka nou ka atann, é ka nou ké vwè ?

¹² Menmjan ki Abraam, nou ka atann  on vil ki ni fondasyon ki solid. Men nou, nou pa’a atann kè yo konstwi-y paskè dépi 1914, Bondyé mété wayòm-la anplas é wayòm-lasa ja ka gouvèné an syèl-la (Rév. 12:7-10). Nou, sa nou ka atann sé kè i gouvèné latè. Men pannan nou ka atann, nou ka jwenn enpé sitiyasyon ki ka sanm séla Abraam é Sara jwenn la. Ès moun ki ka sèvi Jéova jòdijou ka suiv ègzanp a Abraam ? Nou pé réponn wi pas adan Tou dè Gad la yo ka rakonté-nou istwa a sèwten frè é sè é nou ka rann-nou kont kè yo ni on fwa ki solid é kè yo ni onlo pasyans kon Abraam é Sara. Jistèman, an-nou ègzaminé ègzanp a sèwten sèwvitè a Bondyé é an-nou vwè ka yo pé aprann-nou.

13. Ka ègzanp a frè Bill Walden ka aprann-vou ?

¹³ Fò ou paré a fè sakrifis. Si nou vé mèt vil a Bondyé kivédi wayòm a-y prèmyé douvan an vi an nou, fò-nou imité Abraam ; fò-nou paré a fè sakrifis pou fè Bondyé plézi (Mat. 6:33 ; Mawk 10:28-30). An-nou palé dè on frè, non a-y sé Bill Walden *. Sa té ja ka fè plizyè lanné i té ka fè étid a awchitèk adan on linivèwsité é an 1942, alòskè i té toupré pran diplòm a-y, i koumansé étidyé Labib èvè Témwen a Jéova. On pwofésè a-y té ja jous prévwa on travay ba-y, men i rèfizé. I di-y kè i vé fè plis pou Jéova, kifè, i préféré rèfizé travay-lasa menmsi i byen péyé. On ti moman apré, yo kriyé-y pou fè lawmé. Men èvè onlo rèspé i rèfizé fè-y é parapòt a sa, yo fè-y péyé on amann a 10 000 dola é yo ba-y 5 an lajòl. 3 lanné apré, yo libéré-y. Aprésa, i fè lékòl a Galaad é i vin misyonè an Afrik. I mayé èvè Eva, é yo sèvi Jéova an Afrik ansanm. Sa mandé-yo onlo sakrifis. Men apré plizyè lanné, yo viré o Zétazini pou yo té pé sa pran swen a manman Bill. Pou rézimé vi a-y, mi sa Bill di : « Jéova pèwmèt-mwen sèvi-y pannan plis ki 70 an é lèwvwè an ka sonjé bèl privilèj-lasa, dlo ka sòti an zyé an mwen. Souvantfwa, an ka di Jéova  mèsi pas sé-y ki fè si an itilizé vi an mwen pou an té sèvi-y. » É vou, ès ou té’é pé òwganizé-w pou sèvi Jéova aplentan tout rèstan a vi a-w ?

14-15. Lè ou ka gadé sa ki rivé frè é sè Apostolidis, ka sa ka aprann-vou ?

¹⁴ Pa konpranndèdi kè ou pé’é ni pon pwoblèm an vi a-w. Ègzanp a Abraam ka aprann-nou kè moun ki ka pasé tout vi a yo ka sèvi Jéova ka jwenn difikilté osi (Jak 1:2 ; 1 Pyè 5:9). Sé sa ègzanp a Aristotelis Apostolidis * ka aprann-nou osi. I pran lèbatèm an Grès an 1946. An 1952, i fiyansé èvè on sè non a-y sé Eleni. É yotoulédé té byen désidé a sèvi Jéova aplentan tout vi a yo. Men, malérèzman sè-la tonbé malad : i vin ni on kansè an sèwvo a-y. Sé mèdsen-la opéré-y, é opérasyon-la maché. Aprésa, yo mayé. Men, kèlkè lanné apré, kansè-la wouvin. Sé dòktè-la wouopéré Eleni, men malérèzman, apré opérasyon-lasa i vin paralizé é i pa té ka rivé palé byen kon avan. Men i kontinyé fè tousa i té pé an prédikasyon magré i té byen malad é magré gouvènman-la té ka pèwsékité sé Témwen-la onlo a épòk-lasa.

¹⁵ Pannan 30 an Aristotelis okipé dè madanm a-y. É pannan tout tan-lasa, i sèvi antankè ansyen adan lasanblé a-y, i té adan plizyè komité yo ka mèt si pyé pou òwganizé sé lasanblé-la. É anplisdisa, i pawtisipé adan konstriksyon a on Sal dasanblé osi. Aprésa, an 1987, pannan sè-la té ka préché, on gwo pòt an fè ki té k’ay fèmé dèyè do a-y varé anlè-y fò menm. É akòz dè kou-la i pran la i rété 3 an dan lèkoma é aprésa, i mò. Pou rézimé vi a-y, mi sa Aristotelis di : « Pannan tout vi an mwen an jwenn onpakèt pwoblèm. Ni dé malè ki rivé-mwen alòskè an pa té ka atann-mwen. Alò, fò an té byen désidé a andiré é a pa lésé ayen dékourajé-mwen. Antouka, on biten ki sèten, sé kè Jéova toujou ban-mwen fòs-la an té bizwen la pou an té rivé about a tout sé difikilté-lasa. » (Sòm 94:18, 19). Lèwvwè on moun ka fè tousa i pé pou  sèvi Jéova magré i ka jwenn gwo difikilté, a pa ti enmé Jéova enmé-y !

16. Ki bèl konsèy frè Knorr ba madanm a-y ?

¹⁶ Toujou sonjé bénédisyon dèmen ké pòté. Abraam toujou té ka sonjé sé bénédisyon-la Bondyé té’é ba-y la. É sa ba-y fòs sipòté lè i té ka jwenn difikilté. Sè Audrey Hyde * fè éfò pou toujou rété pozitif, menm lè Nathan Knorr, 1^é mari a-y, mò èvè on kansè é menm lè Glenn Hyde, 2^èm mari a-y, vin Alzaymè. On jou, i èspliké kè sa ki édé-y sé sa frè Knorr té di-y déotwa simenn avan i mò. Mi sa sè-la di : « Nathan fan’an sonjé kè apré lanmò ni on èspwa. É a pa pawòl anlè ! Nou pé’é jen soufè ankò. É aprésa i di-mwen : “Sé douvan pou ou gadé ! Pas sé douvan rékonpans a-w yé.” É i ajouté : “Fò ou toujou ni onlo biten a fè. Toutotan ou si latè, fè tousa ou pé pou édé lézòt. Konsa, tchè a-w ké kontan.” » Mi on bon ti konsèy mi ! Lè ou ka pasé tan a-w ka édé lézòt é lè ‘èspérans-la ka mèt onlo jwa an tchè a-w’, pa ni pi bèl biten ki sa ! (Wom. 12:12).

17. a) Pou ki biten fò-nou sonjé bénédisyon dèmen ké pòté ? b) Si nou ka imité Miché é kè nou ka fè sa ki maké an Miché 7:7, ka dèmen ké pòté dè bon pou nou ?

¹⁷ Sé konnyéla pou nou gadé douvan ! É sé konnyéla pou nou sonjé bénédisyon dèmen ké poté ! Sa ki ka fèt toupatou si latè ka montré on mannyè ki klè kè sistèm-lasa k’ay bout. Talè, wayòm a Bondyé ké ka gouvèné toutlatè é nou pé’é ni a atann-li ankò. A pa ti bénédisyon nou ké ni ! Jous fanmi an nou ki mò é kè nou enmé ké résisité. A moman-lasa, Jéova ké rékonpansé Abraam pou fwa a-y é pasyans a-y ; i ké résisité ki li ki fanmi a-y pou viv asi latè. Ès ou ké la pou akéyi-yo ? Ni mwayen sa fèt si ou imité Abraam kivédi si ou paré a fè sakrifis pou wayòm a Bondyé, si fwa a-w rété fò menmsi ou ka jwenn éprèv é si ou ka kontinyé atann Jéova èvè onlo pasyans (li Miché 7:7).