1. Ki sakrifis bokou adoratèr Bondjé ka fè, é poukisa ?

JÒDLA, milyon adoratèr Bondjé ka fè sakrifis. Bokou frè ké sò désidé pa maryé. I gen mouché ké madanm ki désidé antann anvan yé fè timoun. É sèrten fanmi désidé gen roun lavi senp. Si yé désidé fè sa a paské yé lé bay Jéova sa ki miyò annan yé lavi. Yé kontan sèrvi Jéova konsa, é yé savé ki Bondjé ké bay yé sa yé vréman bézwen. Ès a charyé dlo ké panyen ? Non ! Poukisa nou pouvé dibout dèyè sa ? Roun rézon, a paské nou savé ki Jéova béni Abraam, « papa tout sa ki gen lafwa » (Rom. 4:11).

2. a) Dapré Hébreux 11:8-10, 16, poukisa Abraam té paré pou lésé Our ? b) Kisa nou ké wè annan sa artik-a ?

² A ké tout so tchò Abraam asèpté lésé bèl ti lavi i té gen lò i té ka rété Our. Poukisa ? Paské i té ka antann « vil-a ki gen vré fondasyon-yan » (li Hébreux 11:8-10, 16). Di ki vil yé ka palé ? Ki problèm Abraam trapé pannan i té ka antann sa vil-a fèt ? É kouman nou pouvé imité li ké ròt sèrvitèr Bondjé di nou lépòk ki swiv so èkzanp ? Sa artik-a ké bay nou répons asou sa késyon-yan.

3. Ki « vil » Abraam té ka antann ?

³ « Vil » Abraam té ka antann-an a rwayonm Bondjé-a. Annan sa rwayonm-an i gen Jézi ké 144 000 krétyen wen-yan. Pòl ka di osi ki rwayonm-an sa « vil Bondjé ki vivan-an, Jérizalèm ki annan syèl-a » (Héb. 12:22 ; Rév. 5:8-10 ; 14:1). Jézi anprann so disip priyè pou sa  rwayonm-an vini pou volonté Bondjé fèt asou latè-a, kou annan syèl-a (Mat. 6:10).

4. Dapré Genèse 17:1, 2, 6, kisa Abraam té savé asou rwayonm-an, ouben vil Bondjé té promèt-a ?

⁴ Ès Abraam té konnèt tout ti détay asou fason rwayonm Bondjé-a té ké maché ? Non. Pannan lontan, sa détay-ya té sa roun ‘sigré ki té sakré’ (Éph. 1:8-10 ; Col. 1:26, 27). Mé sa Abraam té savé, a ki i té ké gen rwa annan pitit so pitit. A byen sa Jéova té promèt li (li Genèse 17:1, 2, 6). Lafwa Abraam té gen annan promès Bondjé té tèlman fò ki a té kousidiré i té ka wè Mési-a, sa lé di sa-la ki té chwazi pou divini Rwa rwayonm Bondjé-a. A pou sa Jézi di sé Jwif-ya : « Abraam zòt papa té kontan bokou lò i té ka sonjé jou mo té ké vini-a, i wè sa jou-a é i té kontan » (Jean 8:56). Asiré pa pitèt, Abraam té savé ki Jéova té ké mété roun rwayonm koté pitit di so pitit té ké rwa, é i té paré pou antann so Bondjé réyalizé so promès.

5. Kouman nou savé Abraam té ka antann vil Bondjé té désidé fè-a ?

⁵ Kouman Abraam montré i té ka antann vil-a, sa lé di rwayonm Bondjé té désidé fè-a ? Pou koumansé, i pa mélé so kò annan pyès rwayonm di so lépòk. I pa janmen monté so kaz pyès koté é i pa janmen soutni pyès rwa asou latè-a. Anplis di sa, i pa chaché fè so pròp rwayonm. I té ka obéyi Jéova é i té ka antann i réyalizé so promès. A konsa i montré ki so lafwa té vayan menm. Annou gadé plizyèr problèm Abraam jwenn é annou wè sa so èkzanp ka anprann nou.

6. Ki kalité vil Our té sa ?

⁶ Vil Abraam té lésé-a té plen ké soumaké, moun-yan té gen tousa yé té bézwen é yé té ka santi yé kò an sékirité. Gras a so gran baryè ké roun gran kannal yé té fè asou so trwa bò, vil Our té byen protéjé. Moun-yan ki té ka rété la té konnèt ékri é yé té fò annan zafè konté.  Dapré roun patché dokiman yé trouvé koté Our té fika anvan, moun-yan té ka vandé ké achté bokou annan sa koté-a. Yé té ka fè kaz-ya ké brik ; yé té ka mété plat asou mir kaz-ya épi a ké lacho yé té ka blanchi yé. Roun ran kaz té gen 13 ouben 14 pyès, é yé chak té ka bay asou roun lakou.

7. Poukisa a té pou Abraam té sir ki Jéova té ké protéjé li ké so fanmi ?

⁷ A té pou Abraam té sir ki Jéova té ké protéjé l’ ké so fanmi. Poukisa ? Sonjé sa li ké Sara té lésé : koté yé té fika yé té gen yé kaz, yé té an sékirité é yé té gen tousa yé té bézwen. Yé lésé tousa pou alé viv anba tant annan lakanpagn annan péyi Kanaan. I pa té gen pyès gran baryè ni pyès gran kannal pou protéjé yé fanmi ankò. Aprézan, moun-yan té pouvé vini ataké yé fasilman.

8. Ki problèm Abraam jwenn ?

⁸ Abraam té ka fè volonté Bondjé, mé pannan roun tan, i pa té ka rivé bay so fanmi manjé. Roun gran lafamin tonbé asou péyi koté Bondjé té voyé li-a. Tèlman sa lafamin-an té rèd, i désidé pati Éjip pannan roun ti moso tan ké so fanmi. Mé lò i rivé, Faraon ki té ka dirijé péyi-a pran Sara. Imajiné sa ! A pa ti enkyèt Abraam té enkyèt jistan Jéova fè Faraon randé li so madanm (Gen. 12:10-19).

9. Ki problèm Abraam jwenn annan so fanmi ?

⁹ Abraam jwenn problèm annan so fanmi osi. So madanm Sara, ki i té tèlman kontan, pa té pouvé fè timoun. Lannen apré lannen, yé té divèt viv ké sa chagren-an annan yé tchò. Finalman, Sara bay Abraam so sèrvant, Agar, pou i fè roun timoun pou yé. Mé lò Agar tonbé ansent Ismaèl, i koumansé méprizé Sara. Sitiasyon-an divini tèlman rèd ki Sara té oblijé mété Agar dèrò (Gen. 16:1-6).

10. Kouman sa ki pasé ké Ismaèl ké Izaak té pouvé fè Abraam pédi so konfyans annan Jéova ?

¹⁰ Finalman, Sara tonbé ansent é i bay Abraam roun timoun i aplé Izaak. Abraam té kontan so dé pitit. Mé kou Ismaèl té ka malmennen Izaak, Abraam té oblijé mété ni Agar ni Ismaèl dèrò (Gen. 21:9-13). Pita, Jéova doumandé Abraam sakrifyé so pitit Izaak pou li (Gen. 22:1, 2 ; Héb. 11:17-19). Sa dé sitiasyon-yan té pouvé fè Abraam pédi so konfyans annan Jéova. A té pou Abraam té sir ki Bondjé té ké fè tout bagaj byen pasé pou so dé pitit.

11. Poukisa Abraam té divèt pran pasyans pou wè Jéova réyalizé so promès ?

¹¹ Pannan tousa tan-an, Abraam té divèt anprann antann Jéova réyalizé so promès. Pitèt i té gen pasé 70 lannen lò i lésé Our ké so fanmi (Gen. 11:31–12:4). É pannan pasé 100 lannen, i viv anba tant, pa bò isi, pa bò la annan péyi Kanaan. Lò i mouri, i té gen 175 lannen (Gen. 25:7). Mé i pa wè Jéova réyalizé so promès di bay so pitit péyi koté i té pasé-a. É i mouri anvan i gen tan wè Bondjé mété so rwayonm. Mé Labib-a ka di ki lò i mouri « i té gen roun bèl ti-laj, i viv lontan é i té gen tan byen profité » (Gen. 25:8). Menm si i jwenn roun patché problèm, i kontinyé gen roun lafwa fò é i pran plézi antann Jéova. Si i rivé tchenbé rèd konsa, a paské Jéova protéjé li pannan tout so lavi, é i aji ké li kou roun zanmi (Gen. 15:1 ; Is. 41:8 ; Jacq. 2:22, 23).

12. Kisa nou ka antann, é kisa nou ké wè ?

 ¹² Kou Abraam, nou menm osi nou ka antann vil-a ki gen vré fondasyon-yan. Mé nou pa ka antann sa vil-a fèt, paské Bondjé ja mété so rwayonm dépi 1914, é dépi sa jou-a i ka dirijé annan syèl-a (Rév. 12:7-10). Atò nou ka antann i dirijé latè-a. Toupannan nou ka antann, nou ka kontré sitiasyon ki ka sanblé ké sa Abraam ké Sara viv. Ès sèrvitèr Bondjé jòdla ka swiv èkzanp Abraam ? Istwè frè ké sò ki ékri annan Tourdégard-a ka montré ki, kou Abraam ké Sara, bokou annan yé ka montré yé gen lafwa ké pasyans. Annou gadé ki èkzanp sèrten sèrvitèr Bondjé bay nou, é annou wè kisa yé ka anprann nou.

13. Kisa èkzanp Bil Walden ka anprann to ?

¹³ A pou to paré fè sakrifis. Si nou lé mété vil Bondjé-a, sa lé di so rwayonm, an prémyé annan nou lavi, nou divèt imité Abraam ki té paré pou fè sakrifis pou fè Bondjé plézi (Mat. 6:33 ; Marc 10:28-30). Annou palé di roun frè yé té ka aplé Bil Walden *. I alé linivèrsité pannan plizyèr lannen, é an 1942, lò i té paré pou pran so diplonm architèk, i koumansé étidyé Labib-a ké Témwen Jéova-ya. So profésèr té déja trouvé roun travay pou li, mé i pa asèpté l’. I èspliké l’ ki i té désidé lésé karyèr architèk-a pou fè plis bagaj pou Bondjé. Roun ti moman apré sa, yé aplé l’ pou alé fè larmé. I di yé ké rèspè ki i pa té ké fè larmé. Akoz di sa, yé bay li roun amann 10 000 dolar pou péyé é i té pou fè 5 lannen lajòl. Yé lagé l’ apré 3 lannen. Apré sa, yé envité l’ pou fè Lékòl Galaad é i divini misyonèr an Afrik. Pita, i maryé ké Éva, é i kontinyé sèrvi Jéova ké li an Afrik. Sa doumandé yé fè sakrifis. Finalman, yé routounen Étazini pou pran swen di manman Bil. Pou fini, men sa Bil ka di asou so lavi : « Jéova bay mo  roun gran lònò. I itilizé mo pannan pasé 70 lannen. Lò mo ka sonjé sa, dlo ka vini an mo wéy. Souvan mo ka di li mèrsi paské a li ki fè mo pran sa bèl karyèr-a. » Ès to menm osi to pouvé désidé pran sèrvis a plen tan-an pou tout to lavi ?

14-15. Kisa to ka anprann di sa ki rivé frè ké sò Apostolidis ?

¹⁴ Pa konprann di to pa ké janmen gen problèm. Èkzanp Abraam ka montré nou ki menm sa ki ka bay Jéova tout yé lavi ka jwenn problèm (Jacq. 1:2 ; 1 Pierre 5:9). A sa Aristotélis Apostolidis * wè. I pran batenm-an an Grès, an 1946 é an 1952, i fiyansé ké roun sò, Éléni. Éléni té lé sèrvi Jéova kou li menm. Mé Éléni tonbé malad : yé wè i té gen roun timèr annan so sèrvo. Yé rivé tiré timèr-a, mé déztrwa lannen apré yé maryé, timèr-a rouvini. Dòktèr-ya opéré l’ ankò, mé akoz di sa, i rété paralizé asou roun bò é i pa té ka rivé palé byen. Magré so maladi ké pèrsékisyon gouvèrnman-an té ka mété asou Témwen Jéova-ya a sa lépòk-a, i kontinyé préché ké bokou balan.

¹⁵ Pannan 30 lannen, Aristotélis pran swen di so madanm, é an menm tan, i té sa roun ansyen, i té annan komité pou asanblé-ya é i idé pou fè roun lasal. Malérèzman, an 1987, pannan i té ka préché, roun gro lapòt an fè fronmen asou Éléni é vòltijé l’ asou trotwar-a. I fè trwa lannen annan koma é apré sa i mouri. Men sa Aristotélis di asou sa i té ka rousanti : « Pannan tout sa lannen-yan, ké tout vyé kalité problèm ki tonbé asou mo konsa, mo té oblijé tchenbé rèd, épi pa moli. Mé Jéova toujou bay mo fòrs mo té bézwen pou mo tchenbé » (Ps. 94:18, 19). Jéova gen bokou lanmou pou tousa ki ka fè sa yé pouvé pou kontinyé sèrvi l’ menm si yé anba tribilasyon !

16. Ki bèl konsèy frè Knorr bay so madanm ?

¹⁶ Kontinyé gadé douvan. Abraam té ka kontinyé sonjé sa Jéova té ké bay li, é a sa ki fè li tchenbé lò problèm té ka tonbé  asou li roun dèyè ròt. Kou Abraam, sò Odré Hyde * toujou éséyé gardé sa bon létadèspri-a, menm lò so prémyé mari, Natan Knorr, mouri ké roun kansèr, é lò so dézyèm mari, Glèn Hyde, trapé maladi Alzaymèr. Roun jou, i èspliké ki sa ki idé l’ bokou, a sa Natan Knorr di li plizyèr simenn anvan i mouri. Odré ka di : « Men sa Natan fè mo sonjé : “Asiré pa pitèt, nou gen roun èspwar apré lanmò, é nou pa ké janmen soufri ankò.” I bay mo sa konsèy-a apré sa : “Gadé douvan, paské to rékonpans, a douvan i fika.” Épi i di : “A pou to toujou gen bokou bagaj pou fè, éséyé itilizé tousa to gen, tout to fòrs pou fè bagaj pou ròt moun. A konsa to ké gen tchò kontan.” » I ankourajé li toujou rété okipé ka idé ròt moun é kontinyé ‘gen tchò kontan gras a lèspérans’. Men roun bèl konsèy ! (Rom. 12:12).

17. a) Poukisa nou divèt kontinyé gadé douvan ? b) Michée 7:7 ka palé nou di pasyans Miché té gen. Si nou ka imité l’ ki bénédiksyon nou ké pouvé gen dimen ?

¹⁷ Jòdla, nou gen ankò plis rézon di kontinyé gadé douvan. Tousa nou ka wè jòdla ka pasé annan monn-an ka vréman montré ki nou ka viv dèrnyé moman sa sistèm-an. Titalò, nou pa ké bézwen antann ankò ki vil-a ki gen vré fondasyon-yan dirijé latè-a. Nou ké gen roun patché bénédiksyon, parèkzanp, Jéova ké résisité moun nou té kontan ki mouri. A sa moman-an, Jéova ké rékonpansé Abraam pou so lafwa ké so pasyans. I ké résisité li ké so fanmi asou latè-a. Ès to ké la pou rousouvwè yé ? To pouvé la si, kou Abraam, to paré pou fè sakrifis pou rwayonm Bondjé-a, si to ka kontinyé gen roun lafwa ki fò magré éprèv to ka pasé é si to ka anprann antann Jéova ké pasyans (li Michée 7:7).