1. Dahaka dainai momo be edia mauri ai gau haida idia dadaraia?

HARI Dirava ena taunimanima milioni momo ese edia mauri ai gau haida idia dadaraia. Hegeregere, tadikaka bona taihu momo be abia hidi idia karaia do idia headava lasi. Danu, headava taudia momo be abia hidi idia karaia hari natudia do idia havaraia lasi. Bona famili momo be kohu momo lasi maurina idia noholaia. Momo ese unai abia hidi idia karaia badina idia ura edia nega bada idia henia Iehova ena hesiai gaukara idia karaia totona. Idia moale bona idia diba Iehova ese edia dabu gaudia ibounai do ia henia. Do idia lalohisihisi, a? Lasi! Dahaka dainai unai bamona ita hereva? Badina ta be Iehova ese “abidadama taudia ibounai edia tamana,” Aberahamo, ia hanamoa.​—Roma 4:11.

2. (a) Heberu 11:8-10, 16 ena hereva bamona, dahaka dainai Aberahamo be Uru ia rakatania? (b) Inai stadi lalonai dahaka do ita stadilaia?

² Aberahamo be mai ena ura ida Uru ena siti dekenai ia noholaia mauri namona ia rakatania. Dahaka dainai? Badina ia be “[siti] mai ena badina aukana ia naria noho.” (Heberu 11:8-10, 16 duahia.) Unai “siti” be dahaka? Aberahamo be unai siti ia gini totona ia naria noho lalonai, dahaka hekwakwanai haida ia davaria? Edena dala ai Aberahamo bona hari iena haheitalai idia badinaia taudia ita tohotohoa diba?

3. Aberahamo ese ia naria siti be dahaka?

³ Aberahamo ese ia naria siti be Dirava ena Basileia. Iesu Keriso bona 144,000 horoa Keristani taudia be unai Basileia lalonai do idia lohia. Paulo ia gwau unai Basileia “be mauri Diravana ena siti, guba Ierusalema.” (Heb. 12:22, NWT; Apok. 5:8-10; 14:1) Iesu ese ena hahediba taudia ia hadibaia unai Basileia totona do idia guriguri. Do idia noinoi unai Basileia  do ia mai unai amo Dirava ena ura be tanobada ai do ia karaia guba ai ia karaia bamona.​—Mat. 6:10.

4. Genese 17:1, 2, 6 ena hereva bamona, Aberahamo be Dirava ese ia gwauhamatalaia siti eiava Basileia dekenai, dahaka ia diba?

⁴ Aberahamo be Iehova ena Basileia do ia gaukara dalana ia diba, a? Lasi, badina lagani momo lalodiai unai be “hunia hereva helagana.” (Efe. 1:8-10; Kol. 1:26, 27) To, Aberahamo ia diba iena tubudia haida be king ai do idia lao. Iehova ese ia dekenai unai ia gwauhamatalaia. (Genese 17:1, 2, 6 duahia.) Aberahamo ese Dirava ena gwauhamata ia abidadama henia momokani dainai, ia ese Horoa Tauna, eiava Mesia, Dirava ena Basileia ena king ai do ia lao tauna ia itaia bamona. Unai dainai, Iesu ese Israela taudia ia hamaoroa: “Emui tamana Aberahamo be ia moale bada egu dina ia itaia totona, bona ia itaia bona ia moale.” (Ioa. 8:56) Ia hedinarai goevagoeva, Aberahamo ia diba iena tubudia be Basileia ta ai do idia lohia, bona Iehova ese idia do ia durua. Unai dainai, Aberahamo be mai ena ura ida Iehova ena gwauhamata ia guguru negana ia naria.

5. Edena dala ai ita diba Aberahamo be Dirava ese do ia haginia siti ia naria?

⁵ Edena dala ai Aberahamo ia hahedinaraia ia be Dirava ese do ia haginia siti, eiava Basileia ia naria noho? Dala ginigunana be, ia be tanobada basileia ta ena sitisen ai ia lao lasi. To, ia be tano idauidau ai ia loaloa tauna, bona abia hidi ia karaia tano ta ai do ia noho lasi, bona tanobada ena king ta do ia durua lasi. Danu, Aberahamo be sibona ena basileia ta ia haginia lasi. To, ia be Iehova ia badinaia bona ia naria Iena gwauhamata Ia hagugurua totona. Unai amo ia hahedinaraia, ia be Iehova ia abidadama henia momokani. Mani Aberahamo ese ia davaria hekwakwanai haida ita herevalaia, bona do ita itaia iena haheitalai amo dahaka ita dibaia.

6. Uru be edena bamona siti?

⁶ Aberahamo ese ia rakatania siti ena mauri be namo, idia gari lasi, bona unuseniai taga bona sikuli bada taudia idia noho. Unai siti gimaia totona, ena kahana toi dekenai magu badadia idia gini bona ranu ese ia hagegea. Danu Uru ai idia noho taudia be  toretore bona matematik idia diba. Bona unai siti be bisinesi karaia gabuna badana, badina akioleji taudia ese unai siti gunana ena gabu idia geia neganai, bisinesi pepadia momo idia davaria. Ruma momo be biriki amo idia karaia, edia haba be manada bona peni kurokuro amo idia penia. Unai ruma haida be mai edia ariara gabuna bona daiutu 13 o 14 ese idia hagegea.

7. Dahaka dainai Aberahamo ia abia dae Iehova ese ia bona ena bese do ia gimaia?

⁷ Aberahamo ia abia dae momokani Iehova ese ia bona iena bese do ia gimaia. Dahaka dainai? Ita laloatao Uru ai Aberahamo bona Sara be ruma namona ta ai idia noho, to unai idia rakatania bona Kanana tanona ai palai rumadia ai idia noho. Unuseniai ia bona ena bese be magu badadia bona ranu dobudia ese idia gimaia lasi. To hari, edia inai taudia ese idia tuari henidia diba.

8. Nega ta Aberahamo be dahaka hekwakwanai ia davaria?

⁸ Aberahamo be Dirava ena ura ia karaia, to nega ta aniani be lasi ena ruma bese ia ubua totona. Iehova ese ia siaia gabuna dekenai hitolo bada ia vara. Unai dainai, Aberahamo be ena bese ida Aigupito dekenai idia lao, unuseniai nega sisina idia noho totona. To, Aigupito dekenai idia noho lalonai, unai tano ena lohia tauna, Farao, ese Sara ia abia lao ena ruma dekenai iena adavana ai ia lao totona. Mani oi laloa, Aberahamo be ia lalohekwarahi bada ela bona Iehova ese Farao ia panisia bena Aberahamo dekenai Sara ia henia lou.​—Gen. 12:10-19.

9. Aberahamo ena ruma bese lalonai dahaka hekwakwanai ia vara?

⁹ Aberahamo ena ruma bese ena mauri dalana be ia auka. Iena lalokau hahinena, Sara, be gabani. Unai dainai lagani momo lalonai idia lalohisihisi. Vadaeni, Sara ese Aberahamo dekenai iena hesiai kekenina Hagara ia henia, unai amo ia ese Aberahamo bona Sara totona natudia do ia havaraia. To Hagara be ia rogorogo neganai, Sara ia kirikirilaia. Unai be hekwakwanai badana ai ia lao, bena Sara ese Hagara ia lulua.​—Gen. 16:1-6.

10. Dahaka hekwakwanai ese Aberahamo ena abidadama Iehova dekenai ia tohoa?

¹⁰ Gabeai Sara ia rogorogo bona Aberahamo ena natuna mero ia havaraia, bona ena ladana ia hatoa Isako. Aberahamo ese ena natuna ruaosi, Isamaela bona Isako ia lalokau henidia. To, Isamaela be Isako ia kara namo henia lasi dainai, Aberahamo ese Isako bona Hagara ia hamaorodia ena ruma amo do idia siri. (Gen. 21:9-14) Gabeai, Iehova ese Aberahamo ia noia Isako do ia bouboulaia totona. (Gen. 22:1, 2; Heb. 11:17-19) Unai nega rua ai, Aberahamo ia abidadama Iehova ese ena gwauhamata iena natudia totona be do ia hagugurua.

11. Dahaka dainai Aberahamo be mai haheauka ida Iehova ia naria?

¹¹ Unai negai, Aberahamo be mai haheauka ida Iehova ia naria. Iena mauri lagani be reana 70 ia hanaia bona ena ruma bese be Uru hanua idia rakatania. (Gen. 11:31–12:4) Bona lagani handred bamona, ia be Kanana tanona dekenai palai rumadia ai ia noho loaloa. Aberahamo ena mauri lagani be 175 neganai ia mase. (Gen. 25:7) To, Iehova ese iena bese dekenai ia gwauhamatalaia tanona ia henia karana be Aberahamo ese ia itaia lasi. Bona ia ese unai siti, Dirava ena Basileia, ia haginia karana ia itaia lasi. To, Baibel ia gwau Aberahamo be “mai maino ida” ia mase. (Gen. 25:8, NWT) Herevana Aberahamo be hekwakwanai idauidau ia haheaukalaia, to iena abidadama ia hagoadaia bona mai ena ura ida Iehova ia naria. Dahaka ese Aberahamo ia durua ia haheauka totona? Aberahamo ena mauri lalonai, Iehova ese ia gimaia bona ena turana bamona ia kara henia.​—Gen. 15:1; Isa. 41:8; Iam. 2:22, 23.

12. Dahaka ita naria noho, bona dahaka gaudia do ita herevalaia?

 ¹² Aberahamo hegeregerena, ita be siti mai ena badina aukana ita naria noho. To, ita be unai siti ia gini totona ita naria noho lasi. Dirava ena Basileia be lagani 1914 ai ia gini vadaeni bona guba ia lohiaia noho. (Apok. 12:7-10) To, ita naria gauna be unai Basileia ese tanobada ibounai do ia lohiaia. Unai nega ita naria noho lalonai, ita be Aberahamo bona Sara ese idia davaria hekwakwanai hegeregerena do ita haheaukalaia danu. Hari, Iehova ena hesiai taudia ese Aberahamo ena haheitalai idia tohotohoa noho, a? Gima Kohorona ai idia torea mauri sivaraidia ese idia hahedinaraia, hari momo be Aberahamo bona Sara bamona, abidadama bona haheauka karana idia hahedinaraia noho. Mani unai sivarai haida ita herevalaia bona ita itaia edena dala ai ita idia durua diba.

13. Tadikaka Walden ena ekspiriens amo dahaka oi dibaia?

¹³ Mai emu ura ida gau haida oi dadaraia. Bema ita ura iseda mauri ai Dirava ena siti eiava Basileia ita atoa guna, namona be Aberahamo bamona Dirava ita hamoalea totona, gau haida do ita dadaraia. (Mat. 6:33; Mar. 10:28-30) Mani tadikaka ta ladana Bill Walden ena haheitalai ita laloa. * Lagani 1942 ai, Bill be U.S. ena iunivesiti ta amo kahirakahira ia gradueit bona ena digri ia abia neganai, ia be Iehova ena Witnes taudia ida ia stadi matamaia. Bill ena tisa tauna be dala ia karaia Bill ia gradueit murinai moni gaukara ta do ia abia, to Bill ese unai ia dadaraia. Ia hamaoroa abia hidi ia karaia vadaeni moni gaukara do ia abia lasi, badina ia ura Dirava ena hesiai gaukara do ia karaia. Daudau lasi, gavamani taudia ese Bill idia oda henia ami lalonai do ia vareai. Ia be mai hemataurai ida unai ia dadaraia dainai, faini moni badana ia henia bona idia siaia lagani faiv dibura ruma ai do ia noho. Lagani toi murinai idia ruhaia. Gabeai, idia boiria Gilead Sikuli dekenai ia lao bona Africa dekenai misinari gaukara ia karaia. Bena Bill be Eva ia adavaia, bona idia ruaosi be Africa dekenai hesiai  gaukara idia karaia, unai idia karaia totona gau momo idia dadaraia. Lagani haida murinai, idia be United States dekenai idia giroa lou Bill ena sinana idia naria totona. Bill ena sivarai dokonai, ia gwau: “Egu matana ranu idia diho badina lagani 70 idia hanaia lalonai, Iehova ese iena hesiai gaukara ai lau ia gaukaralaia. Nega momo ia lau tanikiu henia badina lau ia durua egu mauri lau gaukaralaia ia lau hesiai henia totona.” Oi be ful-taim hesiai gaukara oi karaia diba, a?

14-15. Tadikaka bona Taihu Apostolidis edia sivarai amo dahaka oi dibaia?

¹⁴ Namo lasi oi laloa hekwakwanai do oi davaria lasi. Aberahamo ena sivarai amo ita diba, edia mauri ibounai lalonai Iehova idia hesiai henia taudia be hekwakwanai idia davaria danu. (Iam. 1:2; 1 Pet. 5:9) Mani Aristotelis Apostolidis dekenai ia vara gauna ita itaia. * Ia be lagani 1946 ai, Greece dekenai ia bapatiso, bona lagani 1952 ai taihu ta ladana Eleni ida ia maoheni, bona idia ruaosi idia ura Iehova idia hesiai henia. To, Eleni ena harana dekenai tiuma ia vara. Unai tiuma idia kokia, to idia headava bona lagani haida murinai, tiuma ma ia vara lou. Doketa ese opereisen idia karaia lou, to Eleni ena tauanina ena kahana ia mase bona ia herevahereva namonamo lasi. Unai negai herevana ia gorere bona gavamani idia dagedage, to ia be haroro gaukara ia goadalaia.

¹⁵ Aristotelis be lagani 30 lalonai ena adavana ia naria. Unai negai ia be elda tauna ta, hebouhebou ena komiti gaukara ia karaia, bona Assembly Hall haginia gaukarana ia durua. To, lagani 1987 ai, Eleni be ia haroro noho lalonai, ena murina dekenai auri iduara metauna ta ia koua bona ia botaia bena bero badana ia abia. Ia be lagani toi ia maserea (coma), bena ia mase. Aristotelis ese idia vara gaudia be inai bamona ia gwauraia: “Idia hanaia lagani lalodiai, hekwakwanai momo lau davaria, bona haida be idia vara kava gaudia. Unai dainai, egu lalona lau hadaia do lau gini goada bona gau ta ese lau do ia hamorua lasi. To, Iehova be hanaihanai unai hekwakwanai hanaia totona lau dekenai goada ia henia.”  (Sal. 94:18, 19) Iehova ese ia idia hesiai henia taudia ia lalokau henia, badina idia gaukara goada, herevana hekwakwanai idia davaria!

16. Tadikaka Knorr ese ena adavana dekenai dahaka sisiba namona ia henia?

¹⁶ Vaira negana oi laloa noho. Aberahamo be vaira negai Iehova ese do ia henia hahenamo ia laloa noho, bona unai ese ia durua ia davaria hekwakwanai ia haheaukalaidia totona. Taihu Audrey Hyde be vaira nega ena helaro ia laloa noho, herevana ena adavana ginigunana Nathan H. Knorr be kensa gorere amo ia mase, bona ena adavana iharuana Glenn Hyde be Alzheimer’s gorere ia abia. * Taihu ia gwau Tadikaka Knorr ia do mase lasi lalonai ia gwauraia herevana ta ese ia durua. Ia gwau: “Nathan ese lau ia hamaoroa: ‘Mase murinai, gau ta ese iseda helaro do ia koua lasi, bona hisihisi do ita mamia lou lasi.’ Bena lau ia hagania: ‘Vaira negana oi laloa noho, badina emu hahenamo be unuseniai.’ . . . Ma ia gwau: ‘Oi bisi noho​—emu mauri oi gaukaralaia ma haida oi durua totona. Unai amo do oi moale.’” Unai be sisiba namona, ita bisi noho ma haida ita durua totona, bona ‘iseda helaro dainai ita moale’!​—Roma 12:12.

17. (a) Dahaka dainai vaira negana ita naria noho be namo? (b) Edena dala ai Mika 7:7 ita badinaia neganai, ita ia durua vaira nega ena hahenamo ita moalelaia totona?

¹⁷ Hari, badina momo dainai vaira negana ita laloa be namo. Tanobada ai idia vara noho gaudia ese idia hahedinaraia ita be inai nega oromana ena dina gabedia ai ita noho. Kahirakahira, Dirava ena Basileia ese inai tanobada ibounai do ia lohiaia negana do ita naria lou lasi. Do ita moalelaia hahenamo be momo, ta be do ita itaia iseda lalokau taudia be mase amo do idia toreisi lou. Unai negai, Iehova ese Aberahamo be ena abidadama bona haheauka karana dainai do ia hanamoa, ia bona ena ruma bese be tanobada ai do idia toreisi lou. Oi be unuseniai do oi noho, idia oi welkam henia totona, a? Unuseniai noho diba, bema Aberahamo bamona, Dirava ena Basileia totona gau haida oi dadaraia, bona herevana dahaka hekwakwanai oi davaria, to mai abidadama bona haheauka ida Iehova oi naria.​—Mika 7:7 duahia.