1. Anni ira nisakrifisio na wawwaragi tam, anna ngatta kingnguada yatun?

TA MADDAGGUN, minillion ta totolay na Dios i massassakrifisio. Aru tannira i pinilida nga mattalupaddian nga awan tu atawa. Egga gapa ira i magatawa nga dinisidida i ari labbi mapeggan tu ána. Pinasimple gapa na karuan nga familia i pattoleda. Kingnguada yatun ira nga passakrifisio megafu ta importante nga rason​—kayàda nga passerbian si Jehova adde ta mawayyada. Magayayya ira anna mattalo kani Jehova nga iyawana i ngamin nga pakawagadda. Fustu kari i desisiodda? Wan! Kunnasi tam makasiguradu? Megafu ta ta nappasa, binendisionan ni Jehova si Abraham,“i yama na ngamin nga mangurug ta Dios.”​—Roma 4:11.

2. (a) Ta Hebreo 11:8-10, 16, ngatta pinanawan ni Abraham i Ur? (b) Anni i gigiammuattam taw nga artikulo?

² Pinanawan ni Abraham i komfortable nga pattolena ta siudad na Ur. Ngatta? Megafu ta iddanamanna i ‘siudad nga maladda i nikepataddagna.’ (Bibbigan i Hebreo 11:8-10, 16.) Anni yatun nga “siudad”? Anni ira nga kapurueba i neparubang kani Abraham durante nga iinnagganna i kepataddag natun nga siudad? Kunnasi ittam nga mabbalin tu kagitta ni Abraham anna danuri namarig ta ehemplona ta kaggawattam?

3. Anni i siudad nga iddanaman ni Abraham?

³ I siudad nga iddanaman ni Abraham ay i Pappatulan na Dios. Si Jesu-Cristo i Patul naw nga Pappatulan anna makipammaguray nisa i 144,000 nga nazelugan nga Cristiano. Inagalan ni Pablo yatun nga Pappatulan nga “siudad na matolay  nga Dios, i Jerusalem ta langi.” (Heb. 12:22; Nep. 5:8-10; 14:1) Sinudduan ni Jesus i disipulosna nga ipakimalloda nga duttal nakuan yatun nga Pappatulan tapenu makua i uray na Dios ta davvun nga kunne ta langi.​—Mat. 6:10.

4. Segun ta Genesis 17:1, 2, 6, kunnasi i karu na ammu ni Abraham meyannung ta Pappatulan nga nipromesa na Dios?

⁴ Ammu kari ni Abraham i detalye ira ta kepataddag na Pappatulan na Dios? Ari. Ta ginatu nga dagun, “sekreto nga plano” danatun nga detalye. (Efe. 1:8-10; Col. 1:26, 27) Ngem ammu ni Abraham nga mabbalin tu patul i karuan ta gakana. Espesipiko nga nipromesa yatun ni Jehova nisa. (Bibbigan i Genesis 17:1, 2, 6.) Daka-dakal i pattalo ni Abraham ta promesa ira na Dios nga gittana masingi-singanna i Mesias nga mabbalin tu Patul na Pappatulan na Dios. Megafu taw, makagi ni Jesus ta Judio ira ta kaggawanna: “Nagayaya si Abraham nga yama nu ta iniddanaman na tu masingan na i aggaw na dattal ku. Nasingan na lagu, ay nagayaya yaya.” (Juan 8:56) Siguradu gafu nga ammu ni Abraham nga i karuan ta gaka-gakana ay mabbalin tu parte na Pappatulan nga ipataddag na Dios, anna mapasensia nga innagganna i pangituppal ni Jehova tatun nga promesana.

5. Ngatta makagi tam nga iinnaggan ni Abraham i siudad nga nipataddag na Dios?

⁵ Kunnasi nga nipasingan ni Abraham nga iinnagganna i siudad onu i Pappatulan nga nipataddag na Dios? Ollu, ari nabbalin si Abraham nga sakup na maski anni nga pappatulan ta davvun. Nagala-ali yayya ta madduruma nga lugar, awan tu permanente nga pinaddiananna anna awan tu patul nga sinuportanna. Kunne na paga, ari nga nappataddag si Abraham tu sarilina nga pappatulan. Lallagu, tulu-tuloy nga sinuttulna si Jehova anna iinnagganna nga tuppalan ni Jehova i nipromesana. Nakepasingan gafu tu nerumu-ruma nga pangurug si Abraham kani Jehova. Gigiammuattam i karuan ta kapurueba nga inarubanna anna nu anni i magigiammu tam ta ehemplona.

6. Anni nga klase na siudad i Ur?

⁶ Protektadu anna komfortable i pattolay ta siudad na Ur nga pinanawan ni Abraham.  Edukadu anna mariku i totolay tatun. Egga i darakal nga pader natun nga siudad anna tallu nga aralam nga kanal ta pallevuna. Malalaki ta pattura anna pakkwenta i taga-Ur ira. Sentro gapa na negosio i siudad anna aru nga dokumento na negosio i nalegan tatun nga lugar. Napadday ta ladriliu i babalay na totolay anna finu i zizzing onu libag na balay ira nga napintoran tu furaw. I karuan tatun nga balay ay egga i 13 onu 14 nga kuartona anna batu i datag na arubayadda.

7. Ngatta kawagan nga mattalo si Abraham nga protektan yayya ni Jehova tuange i familiana?

⁷ Mawag tu mattalo si Abraham kani Jehova nga protektanna yayya anna i familiana. Ngatta? Daddamman nga pinanawan da Abraham anni Sara i protektadu anna komfortable nga balena ta siudad na Ur tapenu maddian ta tolda ta katanapan na Canaan. Ari ngana yayya maprotektan tuange i familiana na darakal nga pader anna aralam ira nga kanal. Mabi laman ngana ira nga atakeyan na kalabadda.

8. Anni nga kapurueba i neparubang kani Abraham?

⁸ Kingngua ni Abraham i uray na Dios, ngem egga i tiempo nga narigatan yayya nga pakanan i familiana. Grabe gare i pabbisin ta lugar nga pinaddoban nisa ni Jehova. Megafu tatun, nagali labbi si Abraham anna i familiana ta Ehipto. Turi ta keggada ta Ehipto, ina na mammaguray nga si Faraon i atawa ni Abraham nga si Sara. Nonopammu i pavvuru-vurung nga natageno ni Abraham adde ta nipetoli ni Jehova kani Faraon si Sara.​—Gen. 12:10-19.

9. Anni ira nga problema i neparubang ta familia ni Abraham?

⁹ Egga gapa i darakal nga problema ta familia ni Abraham. Ari nga makka-ana si Sara nga iddeddukanna. Aru nga dagun nga marraddam ira megafu tatun. Turi kua, niyawa ni Sara i aripanna nga si Hagar kani Abraham tapenu mapeggan tu ána para nira nga magatawa. Ngem turi ta navussi si Hagar kani Ismael, ininsultona si Sara. Tensionado i situasion yatutta pinapanaw ni Sara ta baleda si Hagar.​—Gen. 16:1-6.

10. Anni ira i namurueba ta pattalo ni Abraham kani Jehova?

¹⁰ Navussi gabbalaman si Sara anna napeggan ira tu ana ni Abraham nga ningagananna tu Isaac. Parehu nga iddeddukan ni Abraham i ánana nga da Ismael anna Isaac, ngem megafu ta inuyu-uyaw ni Ismael si Isaac, fuersadu nga pinapanaw ni Abraham si Ismael anna si Hagar. (Gen. 21:9-14) Zimittal i tiempo nga nikiddaw ni Jehova nga isakrifisio ni Abraham si Isaac. (Gen. 22:1, 2; Heb. 11:17-19) Tatun nga dua nga situasion, kawagan nga mattalo si Abraham kani Jehova nga tuppalanna i promesana nisa meyannung ta ánana.

11. Ngatta ta kawagan nga mapasensia nga maginnag si Abraham kani Jehova?

¹¹ Tatun ira nga tiempo, mawag tu mapasensia nga innaggan ni Abraham si Jehova. Posible nga maturu tu 70 i dagunna turi ta pinanawanna anna na familiana i Ur. (Gen. 11:31–12:4) Maggi magatu nga dagun nga naddian yayya ta tolda anna makalelevu yayya ta davvun na Canaan. Magedad tu 175 si Abraham turi ta natay yayya. (Gen. 25:7) Ngem ari nga nasingan ni Abraham i ketuppalan na promesa ni Jehova nga iyawa ta gaka-gakana i davvun nga naddiananna. Arianna gapa nga nasingan i nepataddag nga siudad onu i Pappatulan na Dios. Maski kunnari paga, natay si Abraham nga ‘lakay anna kontentu.’ (Gen. 25:8) Maski nu aru i kapuruebana, matuyag lagapa i pangurugna anna magayayya yayya nga naginnag kani Jehova. Kunnasi yayya nga nakapagattam? Ta interu nga pattolena, pinrotektan anna nibilang yayya ni Jehova nga kofunna.​—Gen. 15:1; Isa. 41:8; Sant. 2:22, 23.

12. Anni i iinnaggattam, anna anni i ikonsidera tam?

 ¹² Kagitta ni Abraham, iinnaggattam i siudad nga maladda i nikepataddagna. Ngem ariattam ngana nga innaggan i kepataddag natun gare nepataddag ngana i Pappatulan na Dios turi ta 1914 anna imagurayan ngana natun i langi. (Nep. 12:7-10) Ngem iinnaggattam nga mammaguray yatun ta interu nga davvun. Durante nga maginnag ittam, aru i kapurueba tam nga kunna nesimmu kada Abraham anni Sara. Naparigan kari na aripan ira ni Jehova ta kaggawattam i ehemplo ni Abraham? Ipasingan na istoria ira na pattolay nga nepublisa ta Passifusifutan nga aru ta kaggawattam i egga i pangurug anna pasensiada kagitta da Abraham anni Sara. Ikonsidera tam i karuan tatun nga istoria anna nu anni i magigiammu tam.

13. Anni i magigiammum ta ekspiriensa ni Brother Walden?

¹³ Sigga-paran nga massakrifisio. Mepoppollu tam i siudad na Dios onu i Pappatulan nu parigattam si Abraham nga sigga-paran nga nassakrifisio tapenu mapagayayyana i Dios. (Mat. 6:33; Mar. 10:28-30) Kunnaw i istoria ni Brother Bill Walden. * Ta 1942, mappapange nga maggradua si Bill ta unibersidad ta U.S. ta kurso nga architectural engineering turi ta nakipaggigiammu yayya ta Saksi ira ni Jehova. Nige paga maggradua ni Bill, egga ngana i trabahu nga niyawa nisa na profesorna, ngem arianna nga inalawa yatun. Niyesplikana nga dinisidina ngana nga mas masserbi ta Dios imbes nga alawatan i trabahu nga atannang i suelduna. Ari nabbayag, nidob na gobiernu nga tullung si Bill ta serbisiu militar. Nammanaki yayya yatutta pinammultada yayya tu $10,000 anna nasentensian yayya tu lima ragun nga kefuku. Kabalin na tallu nga ragun, nakalawan yayya. Tapus, nembitan yayya nga maggigiammu ta Gilead School anna mammisionero ta Africa. Inatawa ni Bill si Eva tapus nasserbi ira ta Africa, nu sitaw aru i mawag nga isakrifisioda. Kabalin na piga nga ragun, nanoli ira ta United States tapenu tangngallan i yena ni Bill. Kunnaw i makagi ni Bill ta pattolena: “Makatangi ngà nu manono  ku i mammarakasta nga pribilehio nga inusanà ni Jehova ta maturu 70 nga dagun ta passerbì nisa. Kanayun ngà mabbala-balo ta panguffunna nio tapenu usan i pattolè ta passerbi nisa.” Awayyam kari nga usan i pattolem ta ngamin-tiempo nga passerbi?

14-15. Anni i magigiammum ta ekspiriensa da Brother anni Sister Apostolidis?

¹⁴ Ariammu nonopan nga ariammu makkaproblema. Nagigiammu tam ta ehemplo ni Abraham nga makkaproblema gapa maski danuri inusada i interu pattoleda nga masserbi kani Jehova. (Sant. 1:2; 1 Ped. 5:9) Napakurug yatun ta ekspiriensa ni Aristotelis Apostolidis. * Nabawtisowan yayya ta Greece turi 1946 anna ta 1952, nakitratu yayya nga mekasal kani Sister Eleni, anna parehu nga kayàda nga mas paga passerbian si Jehova. Ngem nattaki si Eleni anna nadiskubre nga egga i tumor ta utona. Nalsa i tumor ngem piga ragun kabalin na kasalda, nanoli mangana i tumor. Inoperan yayya uli na doktor ngem na-paralyze si Eleni anna marigatan ngana yayya nga mabbida. Ngem nattalupaddian yayya nga matalikarag ta ministerio maski nu egga takina anna mameppersigi i gobiernu tatun nga tiempo.

¹⁵ Trenta dagun nga sinangngallan ni Aristotelis i atawana. Tatun nga daga-ragun, elder yayya, miembro na convention committee, anna nanguffun yayya ta pappataddag ta tadday nga Assembly Hall. Tapus ta 1987, naaksidente si Eleni durante nga mallayyagayya. Na-comatose yayya tu tallu nga ragun, tapus natay yayya. Ta ngamin nga nappasan ni Aristotelis, kinagina: “Ta aru nga dagun, neparubang ngà ta aru nga problema. Gavva anna kakku inekspekta i karuan tatun, yari tu mawag nga determinadu ngà nga magattam anna kakku pagurayan i maski anni nga mamakkafi niakan. Kanayun nga niyawa ni Jehova i sikan nga kawagakku tapenu marubang danatun nga problema.” (Sal. 94:18, 19) Kuruga iddeddukan ni Jehova danuri kukukuadda i adde na mawayyada nga masserbi nisa maski nu aru i problema!

16. Anni i niperaddam ni Brother Knorr ta atawana?

¹⁶ Maffokus ta mappange. Naffokus si Abraham ta bendision ira nga iyawa nisa ni  Jehova ta mappange. Nakoffun yatun tapenu marubanna i kapurueba ira. Kunnatun gapa si Sister Audrey Hyde. Kanayun yayya nga positibo maski nu natay ta cancer i ollu nga atawana nga si Nathan H. Knorr anna nattaki tu Alzheimer’s disease i mekadua nga atawana nga si Glenn Hyde. * Nakagina nga nakoffun nisa i kinagi ni Brother Knorr piga ligguan nige na patena. Kunna: “Niperaddam nio ni Nathan: ‘Kabalin na patay, siguradu ngana i iddanama tam, anna ariattam ngana vuluvuga nga magattam uli ta taki.’ Tapus pinagaramnà: ‘Maffokus ka ta mappange, nu sitaw i dian na bala-balo mu.’ . . . Kunna paga: ‘Mabbalikka tu okupadu. Usammu i pattolem ta pangngua tu mapia ta tanakuan. Makoffun yaw tapenu magayayya ka.’” Talaga makoffun yatun nga tabarang nittam nga mabbalin tu okupadu ta pangngua tu mapia ta tanakuan anna ‘mappalupagia megafu ta iddanama tam’!​—Roma 12:12.

17. (a) Ngatta makasta nu maffokus ittam ta mappange? (b) Kunnasi nga makoffun nittam i Mikias 7:7 tapenu mala tam i bendision ira ta mappange?

¹⁷ Ta maddaggun, mas aru i rasottam tapenu maffokus ittam ta mappange. Manawag nga ipasingan na mesissimmu ta mundo nga egga tam ngana ta ultimu nga parte na pangurianan ira nga aggaggaw. Aranni ngana i tiempo nga ariattam ngana nga innaggan nga mammaguray i Pappatulan na Dios ta interu davvun. Tadday ta bendision ira nga mamagayayya ta nittam ay masingattam noka nga maginnolay i iddeddukattam ira. Tatun nga tiempo, bala-balakkan ni Jehova i pangurug anna pasensia ni Abraham gukaban na pamaginnolena nisa anna ta familiana. Egga ka kari tari tapenu dafungan ira? Posible yatun nu parigammu si Abraham nga sigga-paran nga nassakrifisio para ta Pappatulan na Dios, ariammu vuluvuga ibbattan i pangurug mu maski nu egga ira i problema, anna nu mapasensia nga innaggammu si Jehova.​—Bibbigan i Mikias 7:7.